Lēsoni Ako ʻi ʻApí
Tokāteline mo e Ngaahi Fuakava 84–87 (ʻIuniti 18)
Nāunau ʻOku Teuteu maʻá e Faiako Ako ʻi ʻApí
Fakanounou ʻo e Lēsoni Ako ʻi ʻApi Fakaʻahó
ʻOku ʻikai fakataumuʻa ʻa e fakamatala fakanounou ko ʻeni ʻo e ngaahi meʻa naʻe hokó, ngaahi tokāteliné mo e tefitoʻi moʻoni kuo ako ʻe he kau akó ʻi heʻenau ako ʻa e Tokāteline mo e Ngaahi Fuakava 84–87 (ʻiuniti 18) ke akoʻi ko ha konga hoʻo lēsoní. ʻOku nofotaha e lēsoni ʻokú ke akoʻí ʻi he niʻihi pē ʻo e ngaahi tokāteline mo e tefitoʻi moʻoni ko ʻení. Muimui ki he ueʻi ʻa e Laumālie Māʻoniʻoní ʻi hoʻo fakakaukauʻi ʻa e fie maʻu hoʻo kau akó.
Naʻe ako ʻe he kau akó ha fakahā fekauʻaki mo e temipale ke langa ʻi he Selusalema Foʻoú, pea naʻa nau laukonga foki fekauʻaki mo e feinga ʻa Mōsese ke teuteu hono kakaí ke nau hū ki he ʻao ʻo e ʻOtuá. Naʻe ako ʻe he kau akó ʻa e ngaahi tefitoʻi moʻoni ko ʻení: Kuo pau ke tau maʻu e ngaahi ouau ʻo e Lakanga Taulaʻeiki Faka-Melekisētekí ka tau hangē ko e ʻOtuá mo nofo ʻi hono ʻafioʻangá; pea kapau ʻe fakahoko totonu ʻe kinautolu ʻoku maʻu ʻa e lakanga fakataulaʻeikí honau ngaahi uiuiʻí, ʻe fakamāʻoniʻoniʻi kinautolu ʻe he ʻOtuá pea foaki kiate kinautolu ʻa e meʻa kotoa ʻokú Ne maʻú.
Naʻe ako ʻe he kau akó ha tefitoʻi moʻoni ʻe ua mei he lēsoni ko ʻení, ʻa ia ʻe tokoni kiate kinautolu ke nau foki hake ai ki he ʻao ʻo e ʻOtuá: Kapau te tau talangofua ki he folofola ʻa e ʻOtuá, ʻe fakamaama kitautolu ʻo fakafou ʻi he Laumālie ʻo Kalaisí; pea kapau te tau tokanga ki he Laumālie ʻo Sīsū Kalaisí, te tau ʻalu hake ki he Tamaí. Naʻe ako foki ʻe he kau akó ʻe fakapoʻuli ʻetau ngaahi fakakaukaú pea ʻe fakamalaʻiaʻi kitautolu kapau te tau vaʻinga ʻaki e folofola ʻa e ʻOtuá. Naʻe toe fakamatalaʻi foki ʻi he lēsoni ko ʻení ʻa e faleʻi ke ako fakamātoato e folofolá pea moʻui ʻaki ʻa e meʻa ʻoku nau akoʻí. ʻIkai ngata aí, naʻe ako ʻe he kau akó ʻoku maʻu ʻe he Kāingalotú ha fatongia ke fakahoko honau tufakanga ʻi he tokoni ke fakamafola e ongoongoleleí ʻi he funga ʻo e māmaní.
ʻAho 3 (Tokāteline mo e Ngaahi Fuakava 85–86)
Naʻe fakakaukau e kau akó ʻi he lēsoni ko ʻení ki he mahuʻinga ʻo e ngaahi lekooti ʻa e Siasí. Naʻa nau ako kapau te tau moʻui ʻaki e ngaahi fono ʻa e ʻOtuá, ʻe hiki hotau hingoá ʻi he ngaahi lekooti ʻo e Siasí ko ha kāingalotu faivelenga. Naʻe toe ʻilo lahi ange ʻa e kau akó ki he talanoa fakatātā ʻo e uité mo e teá mo nau ʻilo ʻe tānaki ʻe he ʻEikí ʻa e kau māʻoniʻoní lolotonga e ngaahi ʻaho fakaʻosí pea fakaʻauha leva e kau faiangahalá ʻi Heʻene Hāʻele ʻAnga Ua Maí. ʻIkai ngata aí, naʻe ako ʻe he kau akó te tau lava ʻo ʻomi ʻa e fakamoʻuí ki he niʻihi kehé ʻaki hono tokoniʻi kinautolu ke nau maʻu e ngaahi tāpuaki ʻo e ongoongoleleí.
ʻAho 4 (Tokāteline mo e Ngaahi Fuakava 87)
Naʻe ako ʻe he kau akó e kikite ʻa e palōfita ko Siosefa Sāmitá kau ki he tau ʻi he ngaahi ʻaho fakaʻosí mo ako ʻe lava ke kikiteʻi ʻe he ʻEikí e kahaʻú. Naʻe ako foki ʻe he kau akó kuo fakahoko e ngaahi folofola ʻa e ʻEikí naʻe fou ʻi he Palōfita ko Siosefa Sāmitá pea mo e ngaahi founga naʻe fakahoko ai kinautolú. Naʻa nau fakakaukau foki ki he mahuʻinga ʻo e tuʻu ʻi he ngaahi potu māʻoniʻoní pea ʻoua ʻe hiki mei ai kae ʻoua kuo hāʻele mai ʻa e ʻEikí.
Talateú
ʻE tokoni ʻa e lēsoni ko ʻení ki he kau akó ke mahino ange mo nau fakamatalaʻi ʻa e tokāteline ʻo e lakanga fakataulaʻeikí. ʻOku maʻu foki ai ʻe he kau akó ha faingamālie ke vahevahe ʻa e meʻa naʻa nau ako mei heʻenau ako ʻi he uike ní, ki he founga te tau ngāue lelei ange ai ko ha meʻa ngāue ki he ʻOtuá mo fakatupulaki e lakanga fakataulaʻeikí.
Ngaahi Fokotuʻu ki hono Akoʻí
Fakatokangaʻi ange: ʻI hoʻo teuteu ki he lēsoni ko ʻení, fakaafeʻi ha tokotaha ako ke haʻu mo ha tatau ʻo ha laine ʻo e mafai ʻo e lakanga fakataulaʻeikí ki he kalasí (mei ha mēmipa honau fāmilí pe ʻanautolu pē). ʻE lava ke maʻu e tatau fakataautaha ʻo ha laine ʻo e mafai ʻo e lakanga Taulaʻeiki Faka-Melekisētekí mei he Mēmipá mo e Ngaahi Lēkooti faka-Sitētisitika ʻo e Siasí, ʻaki ha ʻīmeili ʻo kole ki he lineofauthority@ldschurch.org kae hiki ʻa e PLA ʻi he taumuʻa ʻo e tohí. ʻE tali mai ia mo ha foomu ke fakafonu pea fakafoki ange.
Tokāteline mo e Ngaahi Fuakava 84
ʻOku fakahā ʻe he ʻEikí ʻa e laine lakanga fakataulaʻeiki ʻa Mōsesé
Tokoni ki he kau akó ke nau toe vakaiʻi ha niʻihi ʻo e ngaahi foʻi lea ne nau ako ʻi he uike ko ʻení ʻaki hono vahevahe ʻa e kau akó ke nau tauhoa. ʻI he hoa takitaha, kole ki ha tokotaha ako ʻe taha ke sītuʻa ki he palakipoé ke ʻoua ʻe lava ʻo sio ki ai. Fakamatalaʻi ange te ke tohi ʻi he palakipoé ha foʻi lea pe kupuʻi lea mahuʻinga ʻoku fekauʻaki mo ha tefitoʻi tokāteline ʻo e ongoongoleleí. ʻE fakaʻuhingaʻi mo fakamatalaʻi leʻosiʻi ʻe he tokotaha ʻoku sio ki he palakipoé ʻa e foʻi lea pe kupuʻi lea mahuʻingá ki honau ngaahi hoá, pea ʻe mateʻi ʻe honau ngaahi hoá ʻa e foʻi leá pe kupuʻi leá. ʻE fetongi leva e kau akó, peá ke tuku ke hokohoko atu ʻa e ʻekitivitií ʻi hono hiki ha foʻi lea pe kupuʻi lea foʻou ʻi he palakipoé.
Kamata ʻa e ʻekitivitií pea hiki ʻa e foʻi lea lakanga fakataulaʻeiki ʻi he palakipoé. Hili hono ʻiloʻi ʻe he kau akó e foʻi lea ko ʻení, hoko atu e ʻekitivitií ʻo fakaʻaongaʻi e ngaahi lea mo e kupuʻi lea ko ʻení: ouau, lakanga Taulaʻeiki Faka-ʻĒlone, fuakava, lakanga Taulaʻeiki Faka-Melekisēteki, ngaahi ouau fakamoʻuí. (Kapau ʻokú ke ongoʻi ʻe ʻaonga, ʻe lava ke ke kiʻi taʻofi ai hili hono ʻilo ʻa e foʻi lea mahuʻingá pea toe vakaiʻi nounou mo e kalasí hono ʻuhingá. ʻOku maʻu e ngaahi ʻuhinga nounou ki ha niʻihi ʻo kinautolu ʻi he ʻeikitivitī fakatauhoa ʻi he ʻIuniti 18: ʻAho 1 ʻi he tohi fakahinohino ako maʻá e kau ako semineli ʻi ʻapí. Ki ha ngaahi fakamatala lahi ange, vakai ki he, “Priesthood and Priesthood Keys” pe “Ordinances and Covenants” ʻo e konga ki he Ngaahi Tefitoʻi Tokāteliné ʻi he fakamatala fakalahi ʻi he ngataʻanga ʻo e tohi lēsoni ko ʻení.) Hili e ʻosi ʻa e ʻekitivitií, ʻeke ʻa e ngaahi fehuʻi ko ʻení:
-
Ko e ngaahi ouau fē ʻo e ongoongoleleí ʻoku ui ko e ngaahi ouau fakamoʻuí? (ʻI he tali ʻa e kau akó, hiki e ngaahi ouau ko ʻení ʻi he palakipoé: papitaiso, hilifaki nima, foaki ʻo e Lakanga Taulaʻeiki Faka-Melekisētekí [ki he houʻeiki tangatá], ʻenitaumeni ʻi he temipalé, mo e sila ʻi he temipalé.)
ʻOku akoʻi ʻi he Tokāteline mo e Ngaahi Fuakava 84 naʻe loto ʻa Mōsese ke tokoni ki he kakai kehé ke nau ʻunu ke ofi ange ki he ʻOtuá ʻo fakafou ʻi he ngaahi ouau fakamoʻui ʻo e lakanga fakataulaʻeikí. Fakaafeʻi e kau akó ke nau lau vave hifo ʻa e Tokāteline mo e Ngaahi Fuakava 84:6–17, ke ʻilo e founga naʻe lava ke fakahokohoko ai ʻe Mōsese hono mafai ʻi he lakanga fakataulaʻeikí kia ʻĀtama, ʻa ia naʻá ne maʻu ia mei he ʻOtuá.
-
Ko e hā ʻokú ke ako fekauʻaki mo e lakanga fakataulaʻeikí mei he ngaahi veesi ko ʻení? (ʻE lava ke ʻiloʻi ʻe he kau akó ha ngaahi tefitoʻi moʻoni kehekehe, ka ke fakapapauʻi ʻa e ngaahi meʻá ni: ʻOku maʻu ʻa e lakanga fakataulaʻeikí mei he ʻOtuá pea ʻoku foaki ia ʻaki hono hilifaki e nima ʻo kinautolu ʻoku nau maʻu ʻa e mafaí.)
Fakaafeʻi e kau akó ʻi he konga ko ʻeni ʻo e lēsoní ke nau ʻomi ha sīpinga ʻo ha laine ʻo e mafaí, ʻaki hono lau ia pe ko hono tohi ʻi he palakipoé. Tokoni ke mahino ki he kau akó ʻoku fakahaaʻi ʻe ha laine ʻo e mafai ʻo e lakanga fakataulaʻeikí e founga kuo foaki ai e mafai ʻo e lakanga fakataulaʻeikí mei ha taha maʻu lakanga fakataulaʻeiki ʻe taha ki ha taha kehe, meia Sīsū Kalaisi ki ha taha maʻu lakanga fakataulaʻeiki he ʻahó ni.
-
ʻOkú ke pehē ko e hā ʻoku mahuʻinga ai ke lava ʻe he kau maʻu lakanga fakataulaʻeikí ʻo fakahokohoko honau mafai lakanga fakataulaʻeikí ki he ʻOtuá? (Vakai, Hepelū 5:4.)
-
Ko e hā ha ngaahi aʻusia kuó ke maʻu naʻá ne fakamālohia hoʻo fakamoʻoni ki he lakanga fakataulaʻeikí?
Fakaafeʻi ha kau ako ʻe niʻihi ke nau fetongitongi ʻi hono lau leʻolahi e fakapapau mo e fuakava ʻo e lakanga fakataulaʻeikí ʻi he Tokāteline mo e Ngaahi Fuakava 84:33–44.
-
Ko e hā ʻoku talaʻofa ʻe he ʻEikí kiate kinautolu ʻoku nau maʻu ʻa e lakanga fakataulaʻeikí mo fua totonu honau uiuiʻí? ʻOku totonu ke ʻilo ʻe he kau akó ʻa e tefitoʻi moʻoni ko ʻení: Kapau ʻe fakahoko totonu ʻe kinautolu ʻoku maʻu ʻa e lakanga fakataulaʻeikí honau ngaahi uiuiʻí, ʻe fakamāʻoniʻoniʻi kinautolu ʻe he ʻOtuá pea foaki kiate kinautolu ʻa e meʻa kotoa ʻokú Ne maʻú.
-
Ko e hā ha ngaahi founga ʻoku fua totonu ai ʻe he kau maʻu Lakanga Taulaʻeiki Faka-ʻĒloné honau ngaahi fatongia ʻi he lakanga fakataulaʻeikí?
-
Ko e fē nai ha taimi naʻe fai tāpuekina ai koe koeʻuhí ne fakahoko ʻe ha taha maʻu lakanga fakataulaʻeiki ʻa hono ngaahi uiuiʻí?
Ke tokoni ki he kau akó ke nau vahevahe ha niʻihi ʻo e ngaahi fakakaukau ne nau maʻu lolotonga ʻenau ako ʻi he uike ní, ʻe lava ke ke fai ha niʻihi pe kotoa ʻo e ngaahi fehuʻi ko ʻení. (Fakatokangaʻi ange: ʻI hoʻo teuteu ki he konga ko ʻeni ʻo e lēsoní, ʻe lava ke ke toe vakaiʻi ʻa e ʻaho hono ua ʻo e ʻiuniti ko ʻení ʻi he tohi fakahinohino ako maʻá e kau ako semineli ʻi ʻapí.
-
Ko e hā naʻá ke ako fekauʻaki mo e mahuʻinga ʻo e tokanga fakamātoato ki he folofola ʻa e ʻOtuá? (Vakai, T&F 84:43–45, 54–58.)
-
Ko e hā e faikehekehe hono ako faivelenga mo moʻui ʻaki e folofola ʻa e ʻOtuá?
-
Ko e hā ha ngaahi fatongia ʻoku tau maʻu ki he kakai ʻi he māmaní? (Vakai, T&F 84:61–62, 85–88.)
-
Te ke tokoni fēfē ke fakakakato e tufakanga ʻo hono tufaki ʻo e ongoongoleleí ki he mamaní kotoa?
Tokāteline mo e Ngaahi Fuakava 87
ʻOku kikite ʻa Siosefa Sāmita ʻe lilingi hifo ʻa e taú ki he ngaahi puleʻanga kotoa pē
Kole ki he kau akó ke nau fakamatalaʻi nounou e meʻa naʻa nau ako fekauʻaki mo e kikite ʻi he Tokāteline mo e Ngaahi Fuakava 87.
-
ʻI hoʻo ako ki he fakahā ko ʻení, naʻe fakamālohia fēfē nai hoʻo tui ʻe lava ʻe he ʻEikí ʻo fakahā mai e ngaahi meʻa ʻo e kahaʻú ʻo fakafou ʻi Heʻene kau palōfitá?
-
ʻOku fakamālohia fēfē ʻe he Tokāteline mo e Ngaahi Fuakava 87 hoʻo fakamoʻoni ko e palōfita moʻoni ʻa Siosefa Sāmitá?
Fakapapauʻi ange kuo fakahoko pe ʻe fakahoko ʻa e kikite kotoa pē ʻi he Tokāteline mo e Ngaahi Fuakava 87. Fakaafeʻi e kau akó ke lau e Tokāteline mo e Ngaahi Fuakava 87:8 ke ʻilo e meʻa naʻe fakahinohino ʻe he ʻEikí ke tau fai kae lava ke tau mateuteu ki he ngaahi tau mo e ngaahi fakatamaki ʻe hoko ʻi he māmaní ʻi he ngaahi ʻaho fakaʻosí.
-
Ko e hā ʻoku fekauʻi mai ʻe he ʻEikí ke tau faí? (Tokoni kiate kinautolu ke nau ʻiloʻi ʻa e tefitoʻi moʻoni ko ʻení: Kuo pau ke tau tuʻu ʻi he ngaahi potu toputapú pea ʻoua ʻe hiki mei ai kae ʻoua ke hāʻele mai ʻa e ʻEikí.)
-
Ko e hā ha ngaahi potu toputapu ʻe niʻihi te ne lava ʻo ʻomi kiate kitautolu ʻa e nongá mo e malú?
-
Ko e hā e founga kuó ke ongoʻi kuo faitāpuekina ʻaki koe ʻa e nongá pe malú ʻi he tuʻu maʻu ʻi he taha ʻo e ngaahi potu māʻoniʻoni ko ʻení?
Fakaʻosi ʻaki e lēsoni ko ʻení haʻo fakamoʻoni ki he ngaahi moʻoni kuo mou aleaʻí.
ʻIuniti Hoko (Tokāteline mo e Ngaahi Fuakava 88–89)
Ke teuteuʻi e kau akó ki heʻenau ako e Tokāteline mo e Ngaahi Fuakava 88–89, ʻe lava ke ke fakaafeʻi kinautolu ke nau fakakaukau ki he ngaahi meʻá ni: Kuó ke ongoʻi tuenoa nai pe hohaʻa ʻoku ʻikai ʻafioʻi ʻe he Tamai Hēvaní ho ngaahi tūkunga pe fie maʻu fakatāutahá? ʻI hoʻo ako ʻa e Tokāteline mo e Ngaahi Fuakava 88, kumi e tali ʻa e ʻEikí ki he ngaahi ongo peheé. Ko e hā e “ngaahi kovi … ʻi he loto ʻo [e] kau tangata kākā” (T&F 89:4) ʻi he ngaahi ʻaho fakaʻosí? ʻI hoʻo ako e Tokāteline mo e Ngaahi Fuakava 89, kumi e faleʻi naʻe foaki ʻe he ʻEikí ʻa te te ne lava ʻo maluʻi koe mei he ngaahi kovi ko iá.