Lēsoni 87
Tokāteline mo e Ngaahi Fuakava 84:43–61
Talateú
ʻI he ʻaho 22 mo e 23 ʻo Sepitema, 1832, ne maʻu ai ʻe Siosefa Sāmita e fakahā ʻoku lekooti ʻi he Tokāteline mo e Ngaahi Fuakava 84. Naʻe fakahā ʻe he ʻEikí ʻi he fakahā ko ʻení, ha ngaahi moʻoni fekauʻaki mo e lakanga fakataulaʻeikí, ʻo hangē ko ia naʻe aleaʻi ʻi he lēsoni kimuʻá. Naʻe toe akoʻi ʻe he ʻEikí e Kāingalotú ki he mahuʻinga ʻo e tokanga ki he folofola ʻa e ʻOtuá. Naʻá ne valokiʻi ʻa kinautolu ʻi heʻenau fakavaʻivaʻingaʻaki e Tohi ʻa Molomoná mo e ngaahi fekau mo e ngaahi fakahā kehé.
Ngaahi Fokotuʻu ki hono Akoʻí
Tokāteline mo e Ngaahi Fuakava 84:43–53
ʻOku akoʻi ʻe he ʻEikí ʻa e mahuʻinga ʻo e tokanga ki he folofola ʻa e ʻOtuá
Fakamanatu ange ki he kau akó ʻa e taumuʻa ne nau fokotuʻu ʻi he kamataʻanga ʻo e taʻú ke ako fakaʻaho e folofolá. Fakaafeʻi kinautolu ke fakakaukau ki he tuʻunga ʻoku nau ʻi ai ʻi hono fai e taumuʻa ko ʻení. Hili hono fakakaukauʻi eni ʻe he kau akó, ʻeke ʻa e ngaahi fehuʻi ko ʻení:
-
Ko e hā ha ngaahi faingataʻa ʻe niʻihi ʻokú ke fehangahangai mo ia ʻi he feinga ke ako e folofolá ʻi he ʻaho takitaha? (ʻI he tali ʻa e kau akó, fakahā ange ʻe lava ke faingataʻa ai ke tauhi ha ʻulungaanga ʻo e ako folofola fakaʻahó.)
-
Ko e hā ʻokú ke fili ai ke ako e folofolá, neongo ʻe lava pē ke faingataʻa ke fai he taimi ʻe niʻihi?
Fakamatalaʻi ange ʻi he lēsoni ʻo e ʻaho ní, ʻe ako ʻe he kau akó e ngaahi moʻoni mei he Tokāteline mo e Ngaahi Fuakava 84 ʻa ia te nau lava ʻo ueʻi kinautolu ke hokohoko atu ʻi heʻenau feinga ke ako e folofolá.
Fakaafeʻi e kau akó ke lau fakalongolongo e Tokāteline mo e Ngaahi Fuakava 84:43–44 pea feinga ke ʻiloʻi e ngaahi foʻi lea mo e ngaahi kupuʻi lea ʻoku nau akoʻi e mahuʻinga ʻo hono ako mo fakaʻaongaʻi ʻa e folofola ʻa e ʻEikí.
-
Ko e hā e ngaahi lea mo e ngaahi kupuʻi lea naʻá ke ʻilo ʻoku nau akoʻi ʻa e mahuʻinga ʻo hono ako mo fakaʻaongaʻi e folofola ʻa e ʻEikí? (ʻE ala talaatu ʻe he kau akó e ngaahi foʻi lea mo e ngaahi kupuʻi lea hangē ko e “fekau,” “tokanga faivelenga”, mo e “moʻui ʻo fakatatau ki he folofola kotoa pē.”)
Fakaafeʻi ha tokotaha ako ke lau leʻolahi e Tokāteline mo e Ngaahi Fuakava 84:45–46. Kole ki he kalasí ke nau muimui ki ai pea kumi e ngaahi foʻi lea mo e ngaahi kupuʻi lea ʻi he potufolofola ko ʻení ʻoku ʻuhinga tatau mo e “ko e folofola ʻa e ʻEikí.”
-
Ko e hā e ngaahi foʻi lea mo e ngaahi kupuʻi lea naʻá ke maʻú? (ʻOku totonu ke kau ʻi he ngaahi talí ʻa e “moʻoní,” “māmá,” “Laumālié,” “ʻa e Laumālie ʻo Sīsū Kalaisí” mo e “leʻo ʻo e Laumālié.”)
Hiki ʻa e sētesi taʻe kakato ko ʻení ʻi he palakipoé: Kapau te tau tokanga faivelenga ki he folofola ʻa e ʻOtuá, ʻe …
Fakaafeʻi e kau akó ke toe lau fakalongolongo e Tokāteline mo e Ngaahi Fuakava 84:45–46.
-
Makatuʻunga ʻi he meʻa naʻá ke maʻu ʻi he veesi 45–46, te ke fakakakato fēfē e sētesi ʻi he palakipoé? (Mahalo ʻe fokotuʻu atu ʻe he kau akó ha ngaahi tali kehekehe. Fakakakato ʻa e tefitoʻi moʻoni ʻi he palakipoé ke ne fakahaaʻi e tefitoʻi moʻoni ko ʻení: Kapau te tau tokanga faivelenga ki he folofola ʻa e ʻOtuá, ʻe fakamāmaʻi kitautolu ʻi he Laumālie ʻo Kalaisí.)
Taki e tokanga ʻa e kau akó ki he kupuʻi lea “[ko] e Laumālie ʻo Sīsū Kalaisí” ʻi he veesi 45. Fakamatalaʻi ange ko e kupuʻi lea ʻe taha ʻoku ʻuhinga tatau mo iá “ko e Maama ʻo Kalaisí.” Ko e Maama ʻo Kalaisí “ko ha fakaivia ki he leleí, ʻi he moʻui ʻa e kakai kotoa pē. … [Ka neongo ia,] ʻoku ʻikai totonu ke fetoʻoaki ʻa e Maama ʻo Kalaisí mo e Laumālie Māʻoniʻoní. ʻOku ʻikai ko ha taha ʻeni ia ʻo hangē ko e Laumālie Māʻoniʻoní” (Tuʻu Maʻu ʻi he Tuí [2004], 113). ʻOku ʻi loto ʻi he tokotaha kotoa pē ʻa e Maama ʻo Kalaisí pea ʻokú ne ʻomi ha “ʻilo ʻo e meʻa ʻoku tonú mo halá, [pe] ongo fakaeangamaʻá, pe konisēnisí.” Te ne “lava ke tataki kitautolu ke liliu ʻetau ngaahi tōʻongá—tuku kehe kapau te tau fakangaloʻi pe tukunoaʻi ia” (Boyd K. Packer, “The Light of Christ,” Ensign, Apr. 2005, 9).
Fakaafeʻi ha tokotaha ako ke lau leʻolahi e Tokāteline mo e Ngaahi Fuakava 84:47–48. Kole ki he kalasí ke muimui ki ai pea feinga ke ʻiloʻi e founga ʻe tāpuakiʻi ai kitautolu kapau te tau tokanga ki he Laumālie ʻo Sīsū Kalaisí.
-
Fakatatau ki he veesi 47, ʻe tāpuakiʻi fēfē kitautolu kapau te tau tokanga ki he Laumālie ʻo Sīsū Kalaisí? (ʻE lava ke fakaʻaongaʻi ʻe he kau akó ha ngaahi lea kehe, ka ʻoku totonu ke nau fakatokangaʻi ʻa e tefitoʻi moʻoni ko ʻení: Kapau te tau tokanga ki he Laumālie ʻo Sīsū Kalaisí, te tau haʻu ki he Tamaí. Hiki ʻa e tefitoʻi moʻoni ko ʻení ʻi he palakipoé.)
-
Fakatatau ki he veesi 48, ko e hā ʻe fai ʻe he Tamaí ʻi heʻetau haʻu kiate Iá? (Te Ne akoʻi kitautolu.)
-
ʻOku tau lau ʻi he veesi 48, ʻe akoʻi kitautolu ʻe he Tamaí ʻo ʻikai maʻatautolu pē ka ki he lelei foki ʻo e māmaní kotoa. Ko e hā ʻene ʻuhinga ʻo e meʻá ni kiate koé?
Fakamahinoʻi ange ʻikai ngata pē ʻi hono maʻu e Maama ʻo Kalaisí, ka naʻe lava ke maʻu ʻe ha niʻihi fakafoʻituitui ʻa e takaua ʻo e Laumālie Māʻoniʻoní hili ʻenau hū ki he fuakava ʻo e papitaisó. Te nau lava ʻo maʻu ha maama lahi ange ʻo fakafou ʻi he meʻafoaki ko ʻení pea tataki ki he ʻao ʻo e Tamaí ke maʻu ʻa e moʻui taʻengatá.
Fakaafeʻi ha tokotaha ako ke tāmateʻi ʻa e ngaahi maama ʻi he loki akó pea foki ki hono nofoʻangá. (Fakapapauʻi ʻoku ʻi ai ʻa e maama feʻunga ʻi he lokí ke lue lelei ʻa e tokotaha akó.) Fakaafeʻi e kau akó ke fakakaukau ki ha ngaahi taimi kuo nau ʻaʻeva ai ʻi he fakapoʻuli lōloa. Kole ki ha niʻihi ke nau fakamatalaʻi pe naʻe fēfē ʻa e aʻusia ko ʻení kiate kinautolú. Pea toe fakamoʻui leva e ngaahi māmá.
Fakamatalaʻi ange ʻoku faʻa ʻuhinga e folofolá ki he fakapoʻulí ke fakamatalaʻi fakataipe ʻaki ha tuʻunga fakalaumālie. Fakaafeʻi ha tokotaha ako ke lau leʻolahi e Tokāteline mo e Ngaahi Fuakava 84:49–53. Kole ki he kalasí ke nau muimui ki ai pea feinga ke ʻiloʻi pe ko hai ne pehē ʻe he ʻEikí ʻoku ʻi he fakapoʻuli fakalaumālié pea mo e ʻuhinga ʻoku nau ʻi he tuʻunga ai ko iá.
-
Ko hai ʻoku ʻi he fakapoʻulí? Ko e hā ʻoku nau ʻi he fakapoʻulí aí?
Fakamahinoʻi ange ʻi he ngaahi veesi ko ʻení, ko kinautolu ʻa ia ne fakamatalaʻi ne ʻi he fakapoʻulí ʻoku toe fakamatalaʻi foki ʻoku nau ʻi he pōpula ʻo e angahalá. ʻOku ʻuhinga ʻeni ʻoku nau fihia ʻi he ngaahi nunuʻa ʻo ʻenau ngaahi angahalá koeʻuhí he kuo teʻeki ke nau fakatomala.
-
Ko e hā e founga ʻoku faitatau ai e moʻui ʻi he pōpula ʻo e angahalá mo e nofo ʻi he fakapoʻulí?
Tokāteline mo e Ngaahi Fuakava 84:54–61
ʻOku valokiʻi ʻe he ʻEikí ʻa e Kāingalotú ʻi hono fakavaʻivaʻingaʻaki e Tohi ʻa Molomoná
Fakamatalaʻi ange ʻoku ʻikai ngata pē ʻi he pehē ne ʻi he fakapoʻulí ʻa e māmaní, ka naʻe pehē ʻe he ʻEikí kuo fakapoʻuli e ʻatamai ʻa e kāingalotu ʻo e Siasí.
Fakaafeʻi ha tokotaha ako ke lau leʻolahi e Tokāteline mo e Ngaahi Fuakava 84:54–56. Kole ki he kalasí ke nau muimui ki ai mo kumi ha ʻuhinga ʻe ua naʻe hoko ai ʻo fakapoʻuli e ʻatamai ʻa e kāingalotu ʻo e Siasí.
-
Fakatatau ki he veesi 54, ko e hā naʻe fakapoʻuli ai e ʻatamai ʻo e kāingalotu ʻo e Siasí?
-
ʻOku ʻuhinga ki he hā ke fakavaʻivaʻingaʻaki ha meʻa? (Ke tukunoaʻi ha meʻa pe taʻe fakaʻapaʻapa pe taʻe tokanga ki ai.) ʻE lava fēfē ʻe he taʻetuí pe ʻi hono vaʻinga ʻaki ha meʻa toputapú ʻo fakatupu ke fakapoʻuli ha ʻatamai ʻa ha taha?
Fakaafeʻi ha tokotaha ako ke lau leʻolahi ʻa e Tokāteline mo e Ngaahi Fuakava 84:57. Kole ki he kalasí ke nau muimui ki ai pea fekumi ki he meʻa naʻe vaʻinga ʻaki ʻe he Kāingalotú.
-
Ko e hā ne vaʻinga ʻaki ʻe he Kāingalotú? (Ko e Tohi ʻa Molomoná mo e “ngaahi fekau ʻi muʻa” ʻa e ʻEikí, pe ngaahi fakahā kimuʻá, kau ai ʻa kinautolu ʻi he Tohi Tapú.)
-
Fakatatau ki he meʻa kuó ke ako mei he veesi 54–58, ko e hā e ngaahi nunuʻa te tau fehangahangai mo ia kapau te tau vaʻinga ʻaki e folofola ʻa e ʻOtuá? (ʻOku totonu ke fakahaaʻi ʻe he kau akó kapau te tau vaʻinga ʻaki e folofola ʻa e ʻOtuá, ʻe fakapoʻuli hotau ʻatamaí pea ʻe fakahalaiaʻi kitautolu. Mahalo te ke fie tohi ʻa e tefitoʻi moʻoni ko ʻení ʻi he palakipoé.)
Fakaafeʻi ha tokotaha ako ke lau leʻolahi e lea ko ʻeni naʻe fai ʻe Palesiteni ʻEselā Tafu Penisoni fekauʻaki mo e Tohi ʻa Molomoná:
“ʻOku makatuʻunga nai e ngaahi nunuʻa taʻengatá ʻi heʻetau tali ki he tohi ko ʻení? ʻIo, ki hotau tāpuakí pe fakamalaʻiá.
“ʻOku totonu ke ʻai ʻe he Kāingalotu kotoa ke hoko hono ako ʻo e tohí ni ko ha ngāue he moʻuí kotoa. Ka ʻikai ke fai ia, ʻokú ne tuku hono laumālié ʻi ha tuʻunga fakatuʻutāmaki mo liʻaki ʻa e meʻa te ne ʻoange ki heʻene moʻuí kotoa, ʻa e uouangataha fakalaumālie mo fakaeʻatamaí. ʻOku ʻi ai e faikehekehe ʻi he taha ului ʻoku langa ʻi he funga maka ʻo Kalaisí ʻo fou ʻi he Tohi ʻa Molomoná pea kei pikimaʻu ki he vaʻa ukameá, pea mo ia ʻoku ʻikaí” (“The Book of Mormon Is the Word of God,” Ensign, Jan. 1988, 5).
“ʻOua te tau nofo ʻi he halaiá, mo hono malaʻiá mo e fakamāú, ʻi heʻetau toʻo maʻamaʻa e meʻaʻofa maʻongoʻonga mo fakaofo ko ʻeni kuo foaki mai ʻe he ʻEikí kiate kitautolú. Ka tau ikunaʻi muʻa ʻa e ngaahi talaʻofa ʻoku fekauʻaki mo hono mataʻikoloa ʻaki ia ʻi hotau lotó” (“The Book of Mormon—Keystone of Our Religion,” Ensign, Nov. 1986, 7).
Fakaafeʻi e kau akó ke nau fakalaulauloto ki he founga ʻoku nau tokangaʻi ʻaki e Tohi ʻa Molomoná pea mo e meʻa te nau lava ʻo fai ke ngaohi ai ʻenau ako iá ko ha ngāue ʻi he kotoa ʻo e moʻuí.
Kole ki he kau akó ke toe vakaiʻi fakalongolongo ʻa e Tokāteline mo e Ngaahi Fuakava 84:57.
-
Ko e hā naʻe folofola ʻaki ʻe he ʻEikí ʻoku fie maʻu ke fai ʻe he Kāingalotú ko e tānaki ki he fakatomala mei hono vaʻinga ʻaki ʻEne folofolá? (Tokoni ke vakai e kau akó ʻoku ʻikai ngata pē ʻi hono manatuʻi ʻo e Tohi ʻa Molomoná mo e “ngaahi fekau ʻi muʻa” naʻe foaki ʻe he ʻEikí, ka naʻe fie maʻu ke fai ʻe he Kāingalotú e meʻa ʻoku hiki ʻiate kinautolú.)
-
Te ke fakamatala fakanounouʻi fēfē e meʻa ʻoku finangalo ʻa e ʻEikí ke tau fai ʻaki e Tohi ʻa Molomoná? (ʻE ala ʻiloʻi ʻe he kau akó ha ngaahi tefitoʻi moʻoni kehekehe, kae fakapapauʻi ke fakamamafaʻi ange e ngaahi meʻá ni: ʻOku totonu ke tau ako faivelenga ʻa e Tohi ʻa Molomoná pea moʻui ʻo fakatatau ki hono ngaahi akonakí. Tohi ʻa e moʻoni ko ʻení ʻi he palakipoé.)
Vahevahe tautau toko ua e kau akó. Kole ki he ngaahi hoá ke vahevahe ʻenau ngaahi tali ki he fehuʻi ko ʻení:
-
Ko hai ʻoku hoko ko ha faʻifaʻitakiʻanga lelei kiate koe ʻi hono ako ʻo e Tohi ʻa Molomoná mo moʻui fakatatau ki hono ngaahi akonakí?
Ke fakaʻosi e lēsoni ko ʻení, fakaafeʻi ha tokotaha ako ke lau leʻolahi ʻa e Tokāteline mo e Ngaahi Fuakava 84:60–61. Kole ki he kalasí ke nau muimui ki ai pea kumi ha ngaahi fakahinohino lahi ange ʻoku ʻomi ʻe he ʻEikí kiate kinautolu ʻoku nau maʻu ʻa ʻEne ngaahi leá ʻi he Tohi ʻa Molomoná. Hili hono lau ʻa e ngaahi veesi ko ʻení, ʻoku fakamahinoʻi ange ʻoku fakatatau ki he veesi 61, ko kinautolu ʻoku nau maʻu ʻa e ngaahi lea ʻa e ʻEikí ʻi he Tohi ʻa Molomoná ʻoku totonu ke nau fakamoʻoniʻi kinautolu ki he niʻihi kehé.
Fakaafeʻi ha kau ako toko siʻi ke nau fakamoʻoni ki he founga kuo tāpuekina ai kinautolu ʻi heʻenau ako e Tohi ʻa Molomoná pea feinga ke moʻui ʻo fakatatau ki he ngaahi moʻoni ʻokú ne akoʻí. (Te ke ala ʻoange ki he kau akó ha kiʻi taimi ke fakakaukau ki heʻenau ngaahi ʻaʻusiá kimuʻa pea kole ange ke nau talí.)
Fakamanatu ange ki he kau akó ʻa ʻenau taumuʻa ke ako e folofolá ʻi he ʻaho takitaha. Hiki e ngaahi fehuʻi ko ʻení ʻi he palakipoé, pea fakaafeʻi e kau akó ke nau hiki ʻenau ngaahi talí ʻi heʻenau pepa ki he kalasí pe tohinoa ako folofolá:
Ko e hā kuó ke ako he ʻahó ni ʻa ia kuó ne ueʻi fakalaumālie ai koe ke hokohoko atu hoʻo ako e Tohi ʻa Molomoná?
Ko e hā te ke fai ke ako faivelenga ange ai e Tohi ʻa Molomoná mo moʻui ʻaki e ngaahi moʻoni ʻokú ke ako mei aí?
Te ke fakaʻaongaʻi fēfē ʻa e Tohi ʻa Molomoná ke vahevahe ʻaki e ongoongoleleí mo e niʻihi kehé?
Fakamoʻoni ange ʻe toe ofi ange ʻa e kau akó ki he Tamai Hēvaní ʻi heʻenau moʻui ʻaki e ngaahi moʻoni naʻe aleaʻi he ʻahó ni ʻi he kalasí.
Ngaahi Fakamatala Fakamahino mo e Puipuituʻá
Tokāteline mo e Ngaahi Fuakava 84:46. “ʻOku foaki ʻe he Laumālié ʻa e maama ki he tangata kotoa pē”
Naʻe ako ʻa Palesiteni Poiti K. Peeka ʻo e Kōlomu ʻo e Kau ʻAposetolo ʻe Toko Hongofulu Mā Uá ka ki he Maama ʻo Kalaisí pea mo e Laumālie Māʻoniʻoní:
“ʻOku kehekehe pē ʻa e Laumālie Māʻoniʻoní mo e Maama ʻo Kalaisí. Neongo ʻoku faʻa ʻi ai e taimi ʻoku fakamatalaʻi pē kinaua ʻe he folofolá he lea tatau, ka ko ha ongo meʻa kehekehe kinaua. ʻOku mahuʻinga ke ke ʻilo fekauʻaki mo kinaua fakatouʻosi. …
“ʻOku fakaʻuhingaʻi ʻe he folofolá e Maama ʻo Kalaisí ‘ko e Laumālie [ʻa ia] ʻokú ne foaki maama ki he tangata kotoa pē ʻoku haʻu ki he māmaní’ (T&F 84:46; tānaki atu hono fakamamafaʻí); ‘ko e maama ʻa ia ʻoku ʻi he ngaahi meʻa kotoa pē, ʻa ia ʻoku foaki ʻa e moʻui ki he ngaahi meʻa kotoa pē, ʻa ia ko e fono ʻoku puleʻi ʻaki ʻa e ngaahi meʻa kotoa pē’ (T&F 88:13; vakai foki, Sione 1:4–9; T&F 84:45–47; 88:6; 93:9).
“Pea ʻoku toe fakamatalaʻi foki ʻi he folofolá e Maama ʻo Kalaisí ‘ko e Laumālie ʻo Sīsū Kalaisí’ (T&F 84:45), ‘ko e Laumālie ʻo e ʻEikí’ (2 Kolinitō 3:18; vakai foki, Mōsaia 25:24), ‘ko e Laumālie ʻo e moʻoní’ (T&F 93:26), ‘ko e maama ʻo e moʻoní’ (T&F 88:6), ‘ko e Laumālie ʻo e ʻOtuá’ (T&F 46:17), pea ‘ko e Laumālie Māʻoniʻoní’ (T&F 45:57). ʻOku toe fakaʻaongaʻi foki ha niʻihi ʻo e ngaahi lea ko ʻení ke ʻuhinga ki he Laumālie Māʻoniʻoní.
‘Kuo tohi ʻe he Kau Palesitenisī ʻUluakí, ʻʻOku ʻi ai ha faʻahinga mālohi ʻoku mafola ʻi māmani kotoa ʻa ia ko e maama mo e moʻui ia ʻo e māmaní, “ʻa ia ʻokú ne fakamāmaʻi ʻa e tangata kotoa pē ʻoku haʻu ki he māmaní,” ʻa ia ʻoku ʻalu atu mei he ʻao ʻo e ʻOtuá ʻi he fuʻu ʻatā lahi fau, ko e maama mo e mālohi ʻoku foaki ʻe he ʻOtuá ʻi he ngaahi tuʻunga kehekehe “kiate kinautolu ʻoku kole kiate iá,” ʻo fakatatau mo ʻenau tuí mo e talangofuá.’ [“Receiving’ the Holy Ghost,” Improvement Era, Mar. 1916, 460.]
“ʻE tatau ai pē pe ʻoku ui e maama ko ʻeni ʻi lotó, ʻa e ʻilo ko ʻeni ʻo e tonú mo e halá, ko e ongoʻi e meʻa ʻoku totonú, pe konisēnisí, ko e Maama ʻo Kalaisí, ka te ne lava ke tataki kitautolu ke liliu ʻetau ngaahi tōʻongá—tukukehe kapau te tau fakangaloʻi pe tukunoaʻi ia” (The Light of Christ,”Ensign, April 2005, 8–9).
Tokāteline mo e Ngaahi Fuakava 84:54–57. “Fakatomala pea manatuʻi … ʻa e Tohi ʻa Molomoná”
Kuo maluʻi fakalelei ʻe he Fakamoʻuí mo ʻEne kau palōfitá ʻa e fakatahatahaʻi mo e fakatolonga ʻo e Tohi ʻa Molomoná ʻi he hisitōliá. ʻOku mahuʻinga fau ʻa hono pōpoakí ki he kakai kotoa pē. Naʻe poupouʻi ʻe Palesiteni ʻEselā Tafu Penisoni ʻa e Kāingalotu ʻo e Ngaahi ʻAho Kimui Ní ke ʻoua te nau fakavaʻivaʻingaʻaki ʻa e pōpoaki ko iá:
“Ne valokiʻi ʻe he ʻEikí e niʻihi ʻo e kau faifekau kimuʻá, hili ʻenau foki ki ʻapí, ʻi he vahe 84 ʻo e Tokāteline mo e Ngaahi Fuakavá koeʻuhí naʻa nau vaʻinga ʻaki e Tohi ʻa Molomoná. Ko hono olá, naʻe fakapoʻuli honau ʻatamaí. Naʻe folofola ʻa e ʻEikí ne fakahalaiaʻi ʻe he faʻahinga ngāue pehení ngaohi ko ʻeni ʻo e Tohi ʻa Molomoná ʻa e Siasí kotoa, naʻa mo e fānau kotoa ʻo Saioné. Pea folofola leva ʻa e ʻEikí, ʻPea te nau moʻulaloa ki he fakahalaia ko ʻení kae ʻoua ke nau fakatomala pea manatuʻi ʻa e fuakava foʻoú, ʻio, ʻa e Tohi ʻa Molomoná.’ (Vakai, T&F 84:54–57.) ʻOku tau kei moʻulaloa nai ki he halaia ko iá?
“… ʻOku tautau ʻa e ngaahi nunuʻa mamafá ʻi heʻetau tali ki he Tohi ʻa Molomoná:
Naʻe folofola ʻa e ʻEikí, ʻKo kinautolu ʻe tali ia ʻi he tui, mo fai māʻoniʻoní, te nau maʻu ʻa e kalauni ʻo e moʻui taʻengatá;
“‘Ka ko kinautolu ʻoku fakafefeka honau lotó ʻi he taʻetuí, mo liʻaki iá, ʻe liliu ia ʻo hoko ko honau fakahalaiaʻiʻanga ʻo nautolu—
“‘He kuo folofola ʻaki ia ʻe he ʻEiki ko e ʻOtuá.’ (T&F 20:14–16.)
“ʻOku moʻoni nai e Tohi ʻa Molomoná? ʻIo
“ʻOku fakataumuʻa ia kia hai? Kiate kitautolu.
“Ko e hā hono taumuʻá? Ke ʻomi ʻa e tangatá kia Kalaisi.
“ʻOkú ne fakahoko fēfē ʻeni? ʻI hono fakamoʻoniʻi ʻa Kalaisí mo fakahā ʻEne ngaahi filí.
“Ko e hā e founga ʻoku totonu ke tau fakaʻaongaʻi ai iá? ʻOku totonu ke tau maʻu ha fakamoʻoni ki ai, ʻoku totonu ke tau faiako mei ai, ʻoku totonu ke tau fokotuʻu ia ko ha tuʻunga moʻui pea ‘tuku atu ia.’ [Vakai, 2 Nīfai 29:2.]
“Kuo tau fai nai ʻeni? ʻIkai hangē ko ia ʻoku totonu, pe kuo pau ke tau faí.
“ʻOku makatuʻunga nai e ngaahi nunuʻa taʻengatá ʻi heʻetau tali ki he tohi ko ʻení? ʻIo, ki hotau tāpuakí pe fakamalaʻiá.
“ʻOku totonu ke ngaohi ʻe he Kāingalotu kotoa pē ʻa e ako ʻo e tohi ko ʻení ko ha ngāue ʻi he kotoa ʻo e moʻuí. Ka ʻikai, ʻokú ne fokotuʻu ʻa hono laumālié ʻi ha tuʻunga fakatuʻutāmaki pea taʻe tokanga ki he meʻa ʻa ia te ne lava ke foaki ʻa e uouangataha fakalaumālié mo fakaʻatamaí ki he kotoa ʻo ʻene moʻuí” (The Book of Mormon Is the Word of God,”Ensign, Jan. 1988, 5).
Tokāteline mo e Ngaahi Fuakava 84:57–61. Ko hono fakaʻaongaʻi ʻo e Tohi ʻa Molomoná ʻi heʻetau akó mo e faiakó
Naʻe pehē ʻe Palesiteni ʻEselā Tafu Penisoni:
Kuo teʻeki ai ke hoko, pe ʻe hoko e Tohi ʻa Molomoná ko e uho ʻo ʻetau ako fakatāutahá, akoʻi ʻo e fāmilí, malangá, mo e ngāue fakafaifekaú. Kuo pau ke tau fakatomala ʻi he meʻá ni” (“Cleansing the Inner Vessel,” Ensign, May 1986, 5–6).