“Doktrina at mga Tipan 25, Bahagi 2: ‘Hangarin ang mga Bagay na Mas Mabuti,’” Manwal ng Titser ng Seminary para sa Doktrina at mga Tipan, (2025)
“Doktrina at mga Tipan 25, Bahagi 2,” Manwal ng Titser ng Seminary para sa Doktrina at mga Tipan
Lesson 40: Doktrina at mga Tipan 23–26
Doktrina at mga Tipan 25, Bahagi 2
Hangarin ang mga Bagay sa Mas Mabuting Mundo
Ang sinabi ng Panginoon sa isang tao ay kadalasang naaangkop sa iba. Totoo ito tungkol sa marami sa mga salitang sinabi ng Panginoon kay Emma Smith na nakatala sa Doktrina at mga Tipan 25 (tingnan sa talata 16). Inanyayahan siya ng Panginoon na maghanap ng mga bagay na tutulong sa kanya na tumanggap ng “putong ng kabutihan” (talata 15). Ang lesson na ito ay makatutulong sa mga estudyante na hangarin ang mga pagpapala ng Panginoon at isantabi ang mga bagay ng mundo.
Mga Posibleng Aktibidad sa Pag-aaral
Isang bagay na mas mabuti
Isipin kung paano mo matutulungan ang mga estudyante na mailarawan sa isipan ang kahalagahan ng pagbibigay-priyoridad sa pinakamahalaga sa ating buhay. Ang isang paraan na magagawa mo ito ay magdala ng isang lalagyan sa klase, tulad ng isang kahon. Magdala rin ng iba’t ibang bagay na maaaring kumatawan sa interes ng mga estudyante, tulad ng bola ng soccer, isang notebook sa paaralan, isang maliit na instrumento sa musika, isang set ng mga banal na kasulatan, at iba pa. Tiyaking magdala ng mas maraming bagay kaysa sa magkakasya sa lalagyan. Ipaliwanag sa mga estudyante na ang lalagyan ay kumakatawan sa ating buhay. Sabihin sa mga estudyante na pumili ng mga bagay na gusto nilang matiyak na kasama sa kanilang buhay. Kapag napuno na ang lalagyan, itanong sa mga estudyante kung may gusto silang ipalit sa isang bagay na wala sa lalagyan. Pagkatapos ng aktibidad na ito, maaari mong sabihin sa mga estudyante na pag-isipan ang mga priyoridad sa kanilang buhay. Ang sumusunod ay isang paraan na magagawa mo ito.
Isulat sa iyong journal kung ano sa palagay mo ang pinakamahahalagang priyoridad sa iyong buhay. Habang pinag-aaralan mo ang lesson na ito, mapanalanging pag-isipan kung nais ng Ama sa Langit na gumawa ka ng anumang pagbabago sa iyong mga priyoridad.
Sa Doktrina at mga Tipan 25, kinausap ng Panginoon si Emma Smith at binigyan Niya ito ng payo tungkol sa kanyang mga priyoridad.
Basahin ang Doktrina at mga Tipan 25:10, at alamin kung ano ang paanyaya ng Panginoon na gawin ni Emma Smith.
-
Ano sa palagay mo ang ibig sabihin ng “hangarin ang mga bagay na mas mabuti”?
-
Anong mga katotohanan ang matututuhan natin mula sa talatang ito?
Ang mga bagay ng Diyos
Tulungan ang mga estudyante na matukoy ang katotohanan na inaanyayahan tayo ng Panginoon na isantabi ang mga bagay ng mundong ito at hangarin ang mga bagay ng Diyos. Maaari mong sabihin sa mga estudyante na maaari nilang markahan ang mga salita sa Doktrina at mga Tipan 25:10 na tumutulong sa pagtuturo ng katotohanang ito.
Tulungan ang mga estudyante na maunawaan ang payo ng Panginoon sa pamamagitan ng pag-anyaya sa kanila na hanapin ang gayon ding mga parirala sa mga sumusunod na banal na kasulatan. Maaari mong sabihin sa mga estudyante na pumili ng isang pariralang gusto nila at ipaliwanag kung ano ang ipinauunawa nito sa kanila. Maaari mong ipakita sa mga estudyante kung paano nila magagawang i-cross reference o iugnay ang mga talatang ito sa isa’t isa.
Ihambing ang Doktrina at mga Tipan 25:10 sa Mateo 6:19–21 at 2 Nephi 9:51.
-
Anong mga salita o parirala sa mga talatang ito sa banal na kasulatan ang makatutulong sa iyo na maunawaan ang paanyaya ng Panginoon?
Maaaring kailangan ng mga estudyante ng tulong sa pag-iisip ng mga partikular na bagay na maaaring ituring na “mga bagay ng daigdig na ito” (Doktrina at mga Tipan 25:10). Maaari mong anyayahan ang mga estudyante na gumawa ng listahan sa pisara ng mga makamundong bagay na makahahadlang sa atin sa paggawa ng mga bagay ng Diyos. Pagkatapos ay maaari mong sabihin sa mga estudyante na pag-isipang mabuti kung gaano nila kahusay na naisasantabi ang mga bagay na ito. Tulungan ang mga estudyante na maunawaan na may ilang bagay na hindi gaanong nararapat na pag-ukulan ng ating oras, samantalang ang iba ay hindi talaga nararapat sa ating oras at pansin.
-
Anong mga halimbawa mula sa buhay ng Tagapagligtas ang nagpapakita na tumuon Siya sa mga bagay ng Diyos sa halip na sa mga bagay ng mundo?
Kung kailangan ng mga estudyante ng tulong sa pag-iisip ng mga halimbawa, maaari mong sabihin sa kanila na saliksikin ang mga sumusunod na reference: Lucas 2:42–49; Juan 2:13–16; Juan 6:38.
-
Paano matutulungan ng Tagapagligtas ang isang teenager na nagsisikap na isantabi ang mga bagay ng mundong ito?
Ibinahagi ni Elder Richard G. Scott [1928–2015] ng Korum ng Labindalawang Apostol ang sumusunod na karanasan ng isang teenager:
Sa Russia Rostov-na-Donu Mission inanyayahan ang mga kabataan na mag-index ng 2,000 pangalan ang bawat isa sa kanila at ihanda ang kahit isang pangalan lang mula sa sarili nilang pamilya para sa mga ordenansa sa templo. Ang mga nakagawa sa mithiing ito ay inanyayahang pumunta sa bagong Kyiv Ukraine Temple. Isang binatilyo ang nagkuwento ng kanyang karanasan: “Marami akong inuubos na oras noon sa mga computer game. Nang simulan ko ang indexing, wala na akong panahon na maglaro nito. Noong una naisip ko, “Naku! Paano nangyari ito!’ Nang matapos ang proyektong ito, nawalan na rin ako ng interes sa paglalaro. … Ang gawain sa genealogy ay isang bagay na magagawa natin dito sa mundo, at mananatili ito sa langit.” (Richard G. Scott, “Ang Kagalakan ng Pagtubos sa mga Patay,” Liahona, Nob. 2012, 94)
-
Ano ang pinakanapansin mo sa karanasan ng binatilyong ito?
Upang matulungan ang mga estudyante na pag-isipan ang anumang personal na karanasan nila sa pagsasantabi ng mga bagay ng mundo, maaari mo silang bigyan ng oras na sagutin ang sumusunod na tanong sa kanilang journal.
-
Paano ka napagpala nang piliin mong hangarin ang mga bagay ng Diyos sa iyong buhay?
Tulong sa paghahangad ng mas mabubuting bagay
Ang huling anim na talata ng Doktrina at mga Tipan 25 ay naglalaman ng payo tungkol sa iba’t ibang aspeto ng buhay ni Emma. Basahin ang Doktrina at mga Tipan 25:11–16 at alamin kung paano rin tayo matutulungan ng payong ito mula sa Panginoon na hangarin ang mas mabubuting bagay.
-
Ano ang nakita mo na maaaring makatulong sa iyo na “isantabi muna ang mga bagay ng daigdig na ito, at hangarin ang mga bagay na mas mabuti”? (talata 10).
Upang matulungan ang mga estudyante na maghangad at makatanggap ng personal na paghahayag kung paano nila mas mabibigyang-priyoridad ang mga bagay ng Diyos, maaari mo silang anyayahang pag-aralan ang isa o mahigit pa sa mga sumusunod na paksa: musika, mga tipan, kaamuan, at ang mga kautusan ng Panginoon. Bigyan ang mga estudyante ng opsiyong mag-aral bilang isang klase o gumawa nang mag-isa o sa maliliit na grupo. Kung pipiliin nilang mag-aral bilang isang klase, sabihin sa mga estudyante na pumili ng isang paksa na pag-aaralan ng lahat. Kung nais ng mga estudyante na maggrupo-grupo, maaari silang makinabang kung pag-aaralan ng bawat isa ang isang bagay na magkakaiba at ibabahagi sa grupo ang nalaman nila. Ang isa pang opsiyon ay anyayahan ang ilang estudyante na maghanda bago magklase at pagkatapos ay magturo sa klase. Ibigay ang pinakamakatutulong na resources.
Musika
Doktrina at mga Tipan 25:11–12
Pangkalahatang Hanbuk: Paglilingkod sa Ang Simbahan ni Jesucristo ng mga Banal sa mga Huling Araw, 19.2 (“Musika sa Tahanan”), 19.3 (“Musika sa mga Miting ng Simbahan”)
“Lumakad sa Liwanag ng Diyos,” sa Para sa Lakas ng mga Kabataan: Isang Gabay sa Paggawa ng mga Pagpili (2022), 18 (tingnan ang bahaging “Hangarin ang bagay na nagpapasigla, nagbibigay-inspirasyon, at nag-aanyaya sa Espiritu”)
Maaari mong anyayahan ang mga estudyante na pumili ng isang himno at tuklasin kung ano ang itinuturo nito tungkol sa Panginoon at sa mga pagpapalang inilaan Niya para sa atin. Maaari mo ring ipakita sa mga estudyante ang iba pang makatutulong na resources ng musika at ang musikang makukuha ng mga kabataan sa Media Library.
Mga Tipan
“Lumakad sa Liwanag ng Diyos,” sa Para sa Lakas ng mga Kabataan: Isang Gabay sa Paggawa ng mga Pagpili (2022), 17 (tingnan ang bahaging “Mga Walang-hanggang Katotohanan”)
Mga Paksa ng Ebanghelyo, “Tipan,” https://www.churchofjesuschrist.org/study/manual/gospel-topics/covenant?lang=tgl
Maaari mong ipanood sa mga estudyante ang sumusunod na video na makatutulong sa kanila na maunawaan kung ano ang ibig sabihin ng tuparin ang ating mga tipan at kung anong mga pagpapala ang matatanggap natin sa paggawa nito.
Kaamuan
Gabay sa mga Banal na Kasulatan, “Maamo, Kaamuan,” scriptures.ChurchofJesusChrist.org
Ulisses Soares, “Maging Maamo at May Mapagpakumbabang Puso,” Liahona, Nob. 2013 (tingnan ang talata 1–6)
David A. Bednar, “Maging Maamo at May Mapagpakumbabang Puso,” Liahona, Mayo 2018 (tingnan ang bahaging “Ang Panginoon Bilang isang Halimbawa ng Kaamuan”)
Mga Kautusan
Gabay sa mga Banal na Kasulatan, “Kautusan ng Diyos, Mga,” scriptures.ChurchofJesusChrist.org
“Mahalin ang Diyos, Mahalin ang Inyong Kapwa,” sa Para sa Lakas ng mga Kabataan: Gabay sa Paggawa ng mga Pagpili (2022), 10
Hikayatin ang mga estudyante na ibahagi ang natutuhan nila at kung paano ito makatutulong sa kanila na hangarin ang mga bagay ng Diyos. Maaari mo silang anyayahang magbahagi sa iba pang mga estudyante na nag-aral ng parehong paksa, at marahil pati na rin sa mga estudyanteng nag-aral ng ibang paksa. Sabihin sa mga estudyante na sundin ang anumang pahiwatig na natanggap nila.
Kung kailangan ng mga estudyante ng tulong sa pag-iisip ng mga paraan para gawin ang natutuhan nila, maaari mong ituro sa kanila ang mga paanyayang matatagpuan sa bawat paksa ng Para sa Lakas ng mga Kabataan: Gabay sa Paggawa ng mga Pagpili (2022). Maaari mong sabihin sa mga estudyante na isulat kung ano ang gagawin nila para mahanap ang mga bagay ng Diyos at pagkatapos ay ilagay ang isinulat nila sa isang lugar kung saan nila ito makikita nang madalas. Hikayatin din sila na hingin ang tulong ng Panginoon at marahil ang tulong ng mga kapamilya at kaibigan.