“5: Ko Hoku Fakavaʻé: ʻAi ke Potupotutatau e Moʻuí,” Ko Hono Maʻu ha Mālohi ʻi he ʻEikí: Ivi Matuʻuaki Fakaelotó (2020)
“5: Ko Hoku Fakavaʻé: ʻAi ke Potupotutatau e Moʻuí,” Ko Hono Maʻu ha Mālohi ʻi he ʻEikí: Ivi Matuʻuaki Fakaelotó
Ko hoku Fakavaʻé: ʻAi ke Potupotutatau e Moʻuí—Taimi Lōloa Tahá: Miniti ʻe 20
Fakalaulauloto:
ʻE anga fēfē haʻaku ʻai ke potupotutatau e ngaahi fiemaʻu fakaʻaho ʻo e moʻuí?
Mamata ʻi he:
“Of Regrets and Resolutions,” ʻoku maʻu ʻi he https://churchofjesuschrist.org/study/video/self-reliance-videos [1:25]. (ʻIkai ha vitiō? Lau ʻa e fakamatala ki he “ʻA e Ngaahi Fakaʻiseʻisá mo e Tukupaá.”)
ʻA e Ngaahi Fakaʻiseʻisá mo e Tukupaá
Kapau ʻoku ʻikai ke mou lava ʻo mamata ʻi he foʻi vitioó, lau ʻa e fakamatala ko ʻení.
Palesiteni Dieter F. Uchtdorf
ʻIkai nai ʻoku moʻoni ʻetau faʻa femoʻuekiná? Ko e meʻa pango ʻetau tui ko e femoʻuekiná ko ha meʻa lelei, ʻo hangē leva ko e femoʻuekiná ko ha lavameʻa pe ko e fakaʻilonga ʻoku ʻi ha tuʻuga māʻolunga e moʻuí.
ʻOku pehē?
ʻOku ou fakakaukau ki hotau ʻEiki mo e Faʻifaʻitakiʻanga ko Sīsū Kalaisí, pea mo ʻEne moʻui nounou he lotolotonga ʻo e kakai ʻo Kāleli mo Selusalemá. Kuó u feinga ke fakakaukau ki haʻane fakavavevave takai ki he ngaahi fakatahá pe fai ha ngaahi meʻa lahi he taimi pē taha ke fakakakato ha ngaahi meʻa mahuʻinga.
ʻOku ʻikai ke u lava.
Ka, ʻoku ou sioloto ki he ʻAlo loto-ʻofa mo tokanga ʻo e ʻOtuá ‘i Heʻene moʻui ʻaonga he ʻahó takitaha. Ko e taimi naʻe fengāueʻaki ai mo kinautolu ne nau feohí, naʻa nau ongoʻi mahuʻinga mo ʻofeina. Naʻá Ne ʻafioʻi e mahuʻinga taʻengata ʻo e kakai naʻe feʻiloaki mo Iá. Naʻá Ne tāpuakiʻi mo tokoniʻi kinautolu. Naʻá Ne hiki hake mo fakamoʻui kinautolu. Naʻá Ne foaki ange ʻa e meʻaʻofa mahuʻinga ʻo Hono taimí.
(“ʻA e Ngaahi Fakaʻiseʻisá mo e Tukupaá,” Liahona, Nōvema 2012, 22)
Aleaʻi:
Ko e hā ha meʻa te tau lava ʻo ako mei he moʻui ʻa e Fakamoʻuí ʻe tokoni ke tau aʻusia ai ha moʻui ʻoku potupotutataú?
Laukonga:
Ko e ngaahi potufolofola mo e fakamatala eni mei he kau taki ʻo e Siasí:
“Pea tokanga ke fai ʻa e ngaahi meʻá ni kotoa pē ʻi he fakapotopoto mo e maau; he ʻoku ʻikai ke fie maʻu ʻa e tangatá ke lele ʻo vave ange ʻi he mālohi ʻokú ne maʻú” (Mōsaia 4:27).
“ʻOua naʻá ke manavahē; he ʻoku ou ʻiate koe: ʻoua ʻe loto-vaivai; he ko au ko ho ʻOtuá: te u fakamālohia koe; ʻio, te u tokoniʻi koe” (ʻĪsaia 41:10).
“Fai e lelei taha te ke lavá he ʻaho takitaha. Fai pē e ngaahi meʻa angamahení, pea kimuʻa ke ke fakatokangaʻí, ʻe fonu hoʻo moʻuí he mahino fakalaumālie te ne fakapapauʻi kiate koe ʻoku ʻofa hoʻo Tamai Hēvaní ʻiate koe. ʻI he taimi ʻe ʻilo ai ʻe ha taha e meʻá ni, pea ʻe mahuʻingamālie leva e taumuʻa mo e ʻuhinga ʻo e moʻuí, pea faingofua ange ai hono tauhi e moʻuí ke potupotutataú” (M. Russell Ballard, “ʻAi ke Potuotutatau e Ngaahi Fiemaʻu ʻi he Moʻuí,” Liahona, Sept. 2012, 50).
“Ko e potupotutataú ko hono ʻiloʻi ia e ngaahi meʻa ʻe lava ke liliú, fokotuʻutuʻu ia ki hono tuʻunga totonú, mo hono ʻiloʻi e ngaahi meʻa he ʻikai liliú” (James E. Faust, “The Need for Balance in Our Lives,” Ensign, Mar. 2000, 5).
Aleaʻi:
Ko e hā ha ngaahi meʻa ʻe lava ke fakafaingofuaʻi pe toʻo mei heʻetau moʻuí ka tau lava ʻo maʻu ha fiefia lahi ange?
Tukupā:
Te u ngāueʻi ʻeku fakakaukau ke ʻai ke potupotutatau ange ʻeku moʻuí.