Torolalana amin’ny fandalinana ny filazantsara

Fanahy Masina

Iraka sy vavolombelon’ny Raintsika any An-danitra sy i Jesoa Kristy

Afaka mitadidy fotoana ve ianao izay nahalalanao fa nahafantatra anao ny Ray any An-danitra na nahatsapanao fankasitrahana noho ny Sorompanavotan’i Jesoa Kristy? Angamba ianao mahatsiaro fotoana iray izay nihainoanao ny mpaminany velona ka fantatrao fa marina ny zavatra nampianariny. Na mety tsaroanao fa namaky ny soratra masina ianao ary nisy fahatsapana mahery vaika tonga tao aminao. Angamba ianao nahatsikaritra bitsika izay nitarika anao hiala amin’ny toe-javatra mampidi-doza iray na nahatsapa fiadanana na fampiononana nandritra ny fotoan-tsarotra. Ireo rehetra ireo dia fisehon’ny Fanahy Masina avokoa. Manolo-tanana amin’ireo zanany Andriamanitra ary mifandray amin’izy ireo amin’ny alalan’ny fitarihana sy ny herin’ny Fanahy Masina. Mandray ny fanomezana ny Fanahy Masina ianao rehefa atao batisa ato amin’ Ny Fiangonan’i Jesoa Kristy ho an’ny Olomasin’ny Andro Farany. Ny Rainao any An-danitra be fitiavana dia manome fahafahana anao higoka ny fitiavany sy ny fitarihany—ary indraindray ny fanitsiany—amin’ny alalan’ny iraka avy aminy dia ny Fanahy Masina izany.

Iza ny Fanahy Masina?

Mpikambana fahatelo ao amin’ Ny Andriamanitra ny Fanahy Masina. Olona fanahy Izy, tsy manana vatana nofo sy taolana (jereo ny Fotopampianarana sy Fanekempihavanana 130:22.). Manana ny toetoetran’ny olona masina ny Fanahy Masina ary matetika no antsoina hoe “ny Fanahy.” Afaka mahatsapa ny “herin’ny” Fanahy Masina ny zanak’ Andriamanitra rehetra. Ireo izay atao batisa kosa dia mandray ny “fanomezana” ny Fanahy Masina, na ny fampanantenana fa afaka miaraka amintsika mandrakariva ny Fanahy Masina.

Topimaso momba ny lohahevitra: Fanahy Masina

Torolalana amin’ny fandalinana ny filazantsara mifandray amin’izany: Ny Andriamanitra, Fanomezana ny Fanahy Masina, Fanambarana ho an’ny tena manokana

Fizarana 1

Ny Fanahy Masina dia afaka ny ho lasa fitahiana tsy hay sandaina ho anao

Arakaraka ny hianaranao bebe kokoa momba ny Fanahy Masina no hanirianao kokoa ny handray sy hiaina ireo fisehoan’ny Fanahy Masina. Ny Nefita tao amin’ny tempoly tao Soafeno dia nanana faniriana avy amin’ny fo mba homena ny Fanahy Masina (jereo ny 3 Nefia 19:8–9). Misy dingana azonao atao mba hampitomboana ny fanirianao hahatsapa ny Fanahy Masina, na ny Fanahin’ny Tompo (jereo ny 1 Nefia 13:37; 2 Nefia 31:12–13; Môrônia 7:31–32; 8:26). Satria nirahina mba hijoro ho vavolombelona momba an’ Andriamanitra Ray sy i Jesoa Kristy ary hanentana anao hanaraka Azy Ireo ny Fanahy Masina, dia fitahiana tsy hay sandaina izany (jereo ny 2 Nefia 31:18).

Zavatra tokony hosaintsainina

• Azonao atao ny mamerina mijery ny sasany amin’ireo soratra masina izay manantitrantitra ireo fomba maro ahafahan’ny Fanahy Masina mitondra anao hanakaiky kokoa an’ Andriamanitra. Ny Fanahy Masina:

  • Mijoro ho vavolombelona momba ny Ray sy ny Zanaka (jereo ny Jaona 15:26; 3 Nefia 11:32, 36).

  • Manamasina sy manadio (jereo ny Almà 13:10–12; 3 Nefia 27:19–20; Môrônia 6:4).

  • Manambara sy mijoro ho vavolombelona momba ny fahamarinana (jereo ny 2 Nefia 32:4–5; Almà 5:46–47; Fotopampianarana sy Fanekempihavanana 8:2–3).

  • Mampionona (jereo ny Jaona 14:16–17, 26; Môrônia 8:26; Fotopampianarana sy Fanekempihavanana 36:2).

  • Manamarina sy mamehy amin’ny Fanahy Masin’ny Fampanantenana Azy (jereo ny Efesiana 1:13–14; Fotopampianarana sy Fanekempihavanana 88:3–4; 132:7).

• Ny filoha Wilford Woodruff dia nilaza hoe: “Raha manana ny Fanahy Masina miaraka aminareo ianareo … dia tsy misy fanomezana lehibe kokoa, tsy misy fitahiana lehibe kokoa, tsy misy fijoroana ho vavolombelona lehibe kokoa noho izany omena ny olona eto an-tany na iza izany na iza.” Fomba iray manan-danja ahafahanao mikatsaka ny hahatsapa ny Fanahy Masina tsy tapaka ny fotoana andraisanao ny fanasan’ny Tompo amim-pahamendrehana (jereo ny Fotopampianarana sy Fanekempihavanana 20:77, 79). Manaova lisitry ny fomba nahatonga ny Fanahy Masina ho fitahiana ho anao. Inona no azonao atao mba hiomanana hahita bebe kokoa ny fisehoan’ny Fanahy Masina?

• Efa nanontany tena ve ianao raha efa nandre ny feon’ny Fanahy? Azonao atao ny mamaky ireto andinin-tsoratra masina ireto mba hijerena ireo fomba ahafahan’ny Fanahy Masina maneho ny tenany aminao: 1 Mpanjaka 19:11–12; Lioka 24:30–32; Galatiana 5:22–23; Helamàna 5:30; Fotopampianarana sy Fanekempihavanana 6:22–23; 8:2–3; 11:11–14.

Sahanasa hoentina miara-mianatra amin’ny hafa

• Voaro ny ain’ny Filoha Lorenzo Snow satria notarihin’ny Fanahy Masina ireo namany. Vakio ny tantara hita ao amin’ny Enseignements des Présidents de l’Eglise: Lorenzo Snow ary ifanakalozy hevitra ny antony nahafahan’ireo namany nahalala sy nanaraka ny fitaoman’ny Fanahy Masina. Oviana ianao no nandray fiarovana sy fanampiana avy amin’ Andriamanitra izay nampitaina tamin’ny alalan’ny bitsika sy ny fahatsapana avy amin’ny Fanahy Masina?

Hianatra misimisy kokoa

• Gary E. Stevenson, “Ahoana no fomba hanampian’ny Fanahy Masina anao?,” Liahona, mey 2017, 117–20

• Kevin R. Duncan, “The Sacred Roles of the Holy Ghost,” Ensign, Oct. 2014, 62–65

Fizarana 2

Afaka manampy antsika hahafantatra ny fahamarinan’ny zava-drehetra ny Fanahy Masina

Tian’ Andriamanitra hianatra ny fahamarinana momba ny drafiny ho an’ny fahasambaran’izy ireo sy ny famonjena azy ireo ny zanany rehetra. Ny Filoha Russell M. Nelson dia nampitandrina fa ny fahavalo dia miasa mba “hampanjavozavo ny tsipika eo anelanelan’izay marina sy izay tsy marina. Mampihomehy ihany fa ny tondra-dranom-pahalalana azontsika eo amin’ny ratsantanantsika no mahatonga ny famantarana izay marina ho mihasarotra.” Tian’ Andriamanitra ianao hahatakatra mazava tsara ny fahamarinana sy ny fomba ahafahan’izany manampy anao hahita fifaliana sy hiomana ho amin’ny fiainana mandrakizay. Ny Fanahy Masina no iraky ny Tompo hampianatra sy hijoro ho vavolombelona aminao ny amin’ny fahamarinana. Nampianatra ny mpaminany Môrônia fa “amin’ ny herin’ny Fanahy Masina dia azonareo fantarina ny fahamarinan’ny zava-drehetra” (Môrônia 10:5; nampiana fanamafisana).

Zavatra tokony hosaintsainina

• Fomba iray hianarantsika fahamarinana amin’ny alalan’ny Fanahy ny fotoana itenenan’ireo mpaminany sy apôstôly eo ambany fitarihan’ny Fanahy Masina (jereo ny Fotopampianarana sy Fanekempihavanana 68:3–4). Nahoana no zava-dehibe ny mihaino sy mampandry sofina amin’ireo hafatra atolotry ny mpaminany sy ny apôstôly? Mampanantena koa ny Tompo fa hanamafy orina ny teninao amin’ny alalan’ny Fanahy Masina rehefa manao ny asan’ny Tompo ianao (jereo ny Fotopampianarana sy Fanekempihavanana 100:5–8).

• Ao amin’ilay lahateniny hoe “Ny fahamarinan’ny zava-drehetra” ny Loholona David F. Evans dia nizara fomba manan-danja ahafahanao mahita ny fahamarinana ho an’ny tenanao manokana. Oviana ianao no nanaraka io lamina amin’ny fikatsahana fahamarinana avy amin’ny Fanahy Masina io?

Sahanasa hoentina miara-mianatra amin’ny hafa

• Azonao atao ny mifanakalo hevitra momba ny fomba nitarihana anao tamin’ny fihainoana na famakiana ireo hafatry ny fihaonamben’ny Fiangonana. Nampanantena ny Filoha Russell M. Nelson fa ny “fanompoan’ny Fanahy Masina” dia “hanampy anao haheno izay tian’ny Tompo ho henonao” mandritra ny fihaonamben’ny Fiangonana. Inona avy ireo fomba sasantsasany ahafahanao miomana hianatra avy amin’ny Fanahy Masina rehefa mihaino na mandalina ireo hafatry ny fihaonamben’ny Fiangonana ianao?

Hianatra misimisy kokoa

• Jaona 16:13–14; 1 Nefia 2:16–17; 2 Nefia 33:1

• Mathias Held, “Mikatsaka fahalalana amin’ny alalan’ny Fanahy,” Liahona, mey 2019, 31–33

Loharanom-pitaovana hafa momba ny Fanahy Masina

• Soratra masina

• Hafatra avy amin’ny Fihaonamben’ny Fiangonana maneran-tany

• Fihirana sy hiran’ny ankizy

• Horonan-tsary

• Loharanom-pitaovana ho an’ny ankizy

Fanamarihana

1. Teachings of Presidents of the Church: Wilford Woodruff (2004), 49.

2. Teachings of Presidents of the Church: Lorenzo Snow (2012), 71–73.

3. Russell M. Nelson, “Inona no marina?,” Liahona, nôv 2022, 29.

4. David F. Evans, “Ny fahamarinan’ny zava-drehetra,” Liahona, nôv. 2017, 68–70.

5. Russell M. Nelson, “Fahamarinana madio, fotopampianarana madio, ary fanambarana madio,” Liahona, nôv. 2021, 6–7.