Leksyon 1

“Ang Banay mao ang Pinakamahinungd anon sa Plano sa Tiglalang”

Katuyoan

Aron sa paghatag og gibug-aton sa mahangturong pagkamahinungdanon sa banay ug aron pagtabang sa mga sumasalmot nga mahibalo unsa ang ilang gikinahanglan nga buhaton aron makadawat sa hingpit nga kaayohan diha sa tun-anan sa Mga Relasyon sa Kaminyoon ug sa Banay.

Pagpangandam

Tun-i pag-usab ang mga baruganan ubos sa “Ang Imong mga Kapangakohan isip Magtutudlo” (sa mga pahina x-xiii niini nga manwal). Pangita og mga paagi sa paggamit mining mga baruganan sa imong pagpangandam sa pagtudlo.
Basaha ang tataw nga mga ulohan sa leksyon, diin gilatid ang mga doktrina ug mga baruganan sa leksyon. Isip bahin sa imong pagpangandam, palangdonga kining mga doktrina ug mga baruganan sa tibuok semana, tinguhaa ang giya sa Espiritu sa paghukom unsa ang kinahanglan nga imong hatagan og gibug-aton sa pagtubag sa mga panginahanglan sa mga sumasalmot.
Sa mainampoon nga paagi tun-i “Ang Banay: Usa ka Pamahayag ngadto sa Kalibutan” makita sa pahina ix diha sa Giya sa pagtuon sa Sumasalmot sa mga Relasyon sa Kaminyoon ug sa Banay.
Pagbaton og kopya sa Giya sa Pagtuon sa Sumasalmot sa Mga Relasyon sa Kaminyoon ug sa Banay (36357) alang sa matag sumasalmot. Kinahanglan nga ikaw makadawat niining mga kopya gikan sa kapangulohan sa Pang-Domingo nga Tulunghaan, sa klerk sa purok o sa luyo-luyong klerk sa purok nga gihatagan og katungdanan alang sa mga materyal.
Sa layo pa, hangyoa ang usa o duha ka mga sumasalmot sa pag-andam og daklit nga pakigsaysay mahitungod sa ilang gibati sa diha nga sila naminyo sa templo. Hangyoa usab sila sa pag-andam sa pagsulti mahitungod sa hingpit nga kalipay ug mga panalangin nga ilang nadawat niining kinabuhia tungod kay sila nabugkos ngadto sa ilang kapikas alang sa kahangturan. Tinguhaa ang giya sa Espiritu samtang ikaw mohukom kinsa ang kinahanglan nga imong hangyoon sa paghimo niining buluhaton.
Sa dili pa magsugod ang klase, isulat sa pisara kining mosunod nga kinutlo (gikan sa Stand Ye in Holy Places [1974], 255).

Ang pinakamahinungdanon sa buluhaton sa Ginoo nga ikaw ug ako sa bisan kanus-a makahimo manghitabo sulod sa mga bongbong sa atong kaugalingong mga panimalay.

Presidente Harold B. Lee

Ika-11 nga Presidente sa Simbahan

Gisugyot nga Kalamboan sa Leksyon

Ang mga propeta sa ulahing mga adlaw nagpahayag sa walay katapusang pagkamahinungdanon sa kaminyoon ug sa banay.

Ipakigbahin kining usa tinuod nga sugilanon:

Ang usa ka tawo ingon og nawad-an sa tanang mga butang tungod sa usa ka makalilisang nga baha. Siya nagbakho, dili tungod sa pagkawala sa iyang kalibutanong mga butang, apan tungod kay dili niya makit-an ang iyang hinigugmang asawa ug upat ka mga anak. Dako kaayo ang posibilidad nga sila nangalumos. Sa wala madugay ang balita miabot nga sila buhi ug naghulat kaniya sa dili halayo nga kasangkapan sa emerhensya. Unsa na man lang kamalipayong tipik sa panahon sa dihang ang banay nagkapundok pag-usab. Samtang sila nagmaya, ang tawo miingon, “naangkon ko na usab ang akong banay, ug bisan tuod ako nagbarug nga walay usa ka yutan-ong kabtangan nga nahibilin sa akong ngalan, ako mibati sama sa usa ka milyonaryo” (gikutlo ni Robert L. Simpson, panahon sa Conference Report, Oct. 1980, 11-12; o Ensign, Nov. 1980, 11).

Sa daklit ipakigbahin ang imong lig-on nga mga pagtuo ug pagpamatuod mahitungod sa kaminyoon ug sa banay. Kon angay, ipakigbahin ang imong mga pagbati mahitungod sa imong kaugalingong banay. Dayon basaha ang mosunod nga pamahayag ni Elder Boyd K. Packer sa Korum sa Napulog Duha ka mga Apostoles:

“Ang labing mahinungdanong bahin sa Simbahan dili ang [sentro] sa istaka; dili ang kapilya.…Ang labing sagrado nga dapit dinhi sa yuta mahimong dili ang templo. Ang kapilya, ang [sentro] sa istaka, ug ang templo mga sagrado samtang sila makasalmot sa pagtukod sa labing sagrado nga mga relasyon sa Simbahan, ang banay—ug ngadto sa pagpanalangin sa pinakasagrado nga mga relasyon diha sa Simbahan, ang banay” (“That All May Be Edified” [1982], 234–35).

Hatagi ang matag sumasalmot og kopya sa Giya sa Pagtuon sa Sumasalmot sa mga Relasyon sa Kaminyoon ug sa Banay. Ipapakli sa mga sumasalmot ang pahina iv. Ipasabut nga sa 1995, ang Unang Kapangulohan ug Korum sa Napulog Duha ka mga Apostoles mipagawas og pamahayag ngadto sa tibuok kalibutan mahitungod sa kaminyoon ug sa banay. Daghan niining mga doktrina ug mga baruganan nga gitudlo diha sa pamahayag pagahisgutan sa panahon niini nga tun-anan. Basaha ang pamahayag uban sa mga sumasalmot, samtang magdapit sa lainlaing mga sumasalmot nga mobasa og kusog sa matag parapo.

Unsa ang ubang mga doktrina ug mga baruganan nga gitudlo diha sa pamahayag bahin sa banay? (Hunahunaa ang paglista sa mga tubag sa mga sumasalmot diha sa pisara.) Ngano nga ang kalibutan nanginahanglan niini nga tambag ug pasidaan?

Si Presidente Gordon B. Hinckley, ang ika-15 nga Presidente sa Simbahan, mipasabut: “Nganong nakaangkon man kita niining pamahayag sa banay karon? Tungod kay ang banay karon gihasmagan. Sa tibuok kalibutan ang mga banay nagkatibulaag. Ang dapit diin pagasugdan ang pagpauswag sa katilingban mao ang panimalay. Ang mga anak mohimo, sa kasagaran, kon unsa ang gitudlo kanila. Kita naninguha sa paghimo sa kalibutan nga mas maanindot pinaagi sa paghimo sa banay nga mas lig-on” (“Inspirational Thoughts,” Ensign, Aug. 1997, 5).
Sa unsa nga paagi nga ikaw ug ang imong banay napalig-on pinaagi sa pagsunod sa tambag niini nga pamahayag?

Ang mahangturong kaminyoon makahatag og hingpit nga kalipay ug mahinungdanong mga panalangin niining kinabuhia ug hangtud sa kahangturan.

Ipasabot og maayo nga ang mahangturong kaminyoon maoy pinakamahinungdanon ngadto sa piano sa kalipay sa Langitnong Amahan. Kini makahatag og kahigayunan aron ang banay makakaplag sa tinuod nga kalipay dinhi niining kinabuhia ug magpadayon ug mouswag hangtud sa kahangturan.

Unsa nga mga panalangin ang atong madawat niining kinabuhia kon kita maminyo alang sa kahangturan?

Dapita ang gitudlo nga mga sumasalmot nga mohisgot sa daklit kon unsa ang ilang gibati sa diha nga sila naminyo sa templo ug mahitungod sa hingpit nga kalipay ug mga panalangin nga ilang nadawat dinhi niining kinabuhia tungod kay sila nabugkos ngadto sa ilang kapikas alang sa kahangturan (tan-awa sa “Pagpangandam,” aytem 5).

Hunahunaa ang pagpakigbahin og usa o labaw pa sa mosunod nga mga pahayag:

Si Presidente James E. Faust sa Unang Kapangulohan mitudlo: “Daghang mga pakigsaad ang kinahanglanon kaayo sa kalipay dinhi ug sa umaabot nga kinabuhi. Kauban sa labing mahinungdanon mao ang mga pakigsaad sa kaminyoon nga nahimo tali sa bana ug asawa. Gikan niining mga pakigsaad modagayday ang labing mahinungdanong mga kalipay sa kinabuhi” (sa Conference Report Apr. 1998, 19; o Ensign, May 1998, 17).

Si Elder Boyd K. Packer miingon nga “ang romansa, gugma, kaminyoon, ug pagkaginikanan” mao “the purest, most beautiful and appealing experiences of life” (in Conference Report, Oct. 1993, 28; or Ensign, Nov. 1993, 21).

Si Elder Joseph B. Wirthlin sa Korum sa Napulog Duha ka mga Apostoles mipahayag: “Ang matam-is nga panag-uban sa mahangturong kaminyoon mao ang usa sa labing mahinungdanong mga panalangin nga gihatag sa Dios ngadto sa Iyang mga anak. Sa pagkatinuod, ang daghang mga katuigan nga akong giambitan uban sa akong matahum nga kauban nakahatag kanako sa hilabihan ka hingpit nga kalipay sa akong kinabuhi. Sukad sa sinugdanan sa panahon, ang panag-uban sa kaminyoon sa bana ug asawa gikinahanglan sa mahinungdanong laraw sa kalipay sa atong Langitnong Amahan. Ang atong mga kinabuhi matandog alang sa maayo, ug kaming duha nahatagan og kaayohan ug nahimong halangdon samtang kami nakatagamtam sa matam-is nga mga panalangin sa pagpakig-uban sa minahal nga mga sakop sa banay” (sa Conference Report, Oct. 1997, 42; o Ensign, Nov. 1997, 32).

Sa iyang unang pakigpulong ngadto sa kinatibuk-ang mga sakop sa Simbahan isip Presidente sa Simbahan, si Presidente Gordon B. Hinckley miingon: Ngadto sa akong hinigugma nga asawa nga magkalim-an og walo anyos sa hinapos niini nga bulan, ako mopahayag og pagtamud…Dako kaayo ang akong pagpasalamat alang niining tinamud nga babaye kinsa nagpabilin diha sa akong kiliran taliwala sa kahayag ug kangitngit. Ang among pamarog karon dili na tag-as sama kaniadto. Apan walay naagian nga pagkakunhod sa among gugma alang sa usag usa.” (Sa Conference Report, Apr. 1995, 93; o Ensign, May 1995, 70).

Ipasabut nga kadaghanan sa mga tawo nagtuo nga ang kaminyoon ug kinabuhi sa banay kutob lamang sa mortal nga mga kasinatian. Apan isip mga sakop sa Simbahan, kita nakahibalo nga ang usa ka takus nga magtiayon makasulod sa templo ug, pinaagi sa usa ka sagrado nga ordinansa sa pagkapari, pagabugkoson isip bana ug asawa alang sa kahangturan. Kon ang usa ka lalaki ug babaye maminyo sa ingon niini nga paagi, ang usa ka mahangturon nga yunit sa banay nagsugod.

Unsang mahangturon nga mga panalangin ang gisaad ngadto sa minyo nga mga magtiayon kinsa nabugkos pinaagi sa gahum sa pagkapari ug unya magpabilin nga matinud-anon ngadto sa ilang mga pakigsaad? (Basaha ang Doktrina ug mga Pakigsaad 131:1–4; 132:19–24, 30–31 (Basaha ang Doktrina ug mga Pakigsaad 131:1-4; 132:19-24, 30-31 uban sa mga sumasalmot. Ang mosunod nga listahan naglakip og pipila ka mga tubag, diin mahimong isulat diha sa pisara.)
1. Sila pagahimayaon didto sa labing taas nga ang-ang sa Celestial nga gingharian uban sa Langitnong Amahan ug ni Jesukristo (D&P 131:1–3; 132:20–24).
2. Sila mag-uban “sulod sa panahon, ug sa tibuok kahangturan” (D&P 132:19). Ang ilang mga anak mahimo usab nga kabahin sa ilang mahangturong banay. (Ipasabut nga ang Balaang Espiritu sa Saad, kinsa gihisgutan diha sa D&P 132:19, mao ang Espiritu Santo. Sumala sa atong pagkamatinud-anon, ang Espiritu Santo mopahimatuod nga ang mga ordinansa sa pagkapari nga atong nadawat ug ang mga pakigsaad nga gihimo madawat sa Dios.)
3. Sila “makapanunod og mga trono, mga gingharian, mga kayutaan, ug mga kagamhanan” (D&P 132:19).
4. Sila magpadayon nga makabaton og mga binhi o mga anak nga Espiritu, hangtud sa kahangturan (D&P 132:19, 30–31; see also D&p 131:4).
Sa unsa nga paagi nga kini makatabang kanimo nga makahibalo nga ang banay mahimong mahangturon?

Itudlo nga adunay daghang mga matinud-anong mga Santos sa Ulahing mga Adlaw kinsa, dili tungod sa ilang kaugalingong kasaypanan, wala makabaton sa kahigayunan nga makadawat sa mga panalangin sa mahangturong kaminyoon dinhi niining kinabuhia. Ipasabot og maayo nga ang Ginoo misaad nga ang tanang mga matinud-anong mga Santos sa katapusan makadawat niini nga panalangin. Kon imong gibati nga kinahanglanon kaayo ang pagtabang sa mga sumasalmot nga makasabut niini nga baruganan, basaha ang mosunod nga pamahayag ni Elder Dallin H. Oaks sa Korum sa Napulog Duha ka mga Apostoles:

Kita nahibalo nga daghang takus ug talagsaong mga Santos sa Ulahing mga Adlaw nga sa pagkakaron adunay kakulang sa hingpit nga mga kahigayunan ug mahinungdanong mga kinahanglanon alang sa ilang pag-uswag. Ang pag-inusara, pagkawalay anak, kamatayon, ug diborsyo makapakyas sa mga mithi ug makalangan sa katumanan sa gisaad nga mga panalangin. Dugang pa, pipila ka mga babaye kinsa nagtinguha nga mahimong full-time nga mga inahan ug mga tig-amuma sa panimalay napugos nga mosulod sa full-time nga panrabaho. Apan kini nga mga kapakyasan mga temporaryo lamang. Ang Ginoo misaad nga didto sa mga kahangturan walay panalangin nga idumili ngadto sa iyang anak nga mga lalaki ug mga babaye kinsa nagtuman sa mga sugo, mga matinuoron ngadto sa ilang pakigsaad, ug naninguha pagbuhat sa matarung.

“Daghan sa labing mahinungdanong mga kawad-on dinhi sa pagkamortral pagatul-iron panahon sa kaliboan, nga mao ang panahon sa paghingpit sa tanan nga wala pa mahingpit kabahin sa mahinungdanong piano sa kalipay alang sa tanan nga takus nga mga anak sa atong Amahan. Kita nahibalo nga tinuod ang mga ordinansa sa templo. Ako nagtuo usab nga kini tinuod sa mga relasyon ug mga kasinatian sa banay.” (sa Conference Report, Oct. 1993, 101; o sa Ensign, Nov. 1993, 75).

Sa paghisgot sa mga kahimtang sa tagsatagsa ka mga sumasalmot, makatabang kon basahon ang usa o duha sa mga pahayag sa “Dugang nga Kapanguhaan sa Materyal” sa pahina 9.

Ang tun-anan sa Mga Relasyon sa Kaminyoon ug sa Banay giplano aron pagtabang kanato nga makakaplag og hingpit nga kalipay diha sa mga relasyon sa atong banay.

Dapita ang usa ka sumasalmot nga basahon og kusog ang mosunod nga pahayag:

Si Presidente Harold B. Lee, ang ika-llnga Presidente sa Simbahan miingon: “Ang pinakamahinungdanong buluhaton sa Ginoo nga imo og ako gayud nga buhaton mao ang anaa sa sulod sa atong kaugalingong mga panimalay” (Stand Ye in Holy Places, 255).

Sa unsa nga mga paagi nga ang kalibutan mahimong lahi kon ang matag usa magpuyo sumala niining yano nga pamahayag?

Ipasabut nga kining tun-anan giplano aron sa pagtabang kanato nga makapalig-on sa mga kaminyoon ug sa mga banay ug makakaplag og hingpit nga kalipay diha sa mga relasyon sa atong mga banay. Ang mga leksyon gipasikad sa mga doktrina ug mga baruganan nga gitudlo diha sa kasulatan ug sa mga propeta sa ulahing mga adlaw.

Ipasabot nga pinaagi sa pagpili sa pagsalmot niining tun-anan, ang mga sakop nagkapakita og tinguha sa pagpalig-on sa ilang mga banay. Adunay tulo ka mga butang nga kinahanglan ilang himoon aron makadawat sa hingpit nga kaayohan niini nga tun-anan:

Mosalmot sa klase.

Itudlo nga ang tanan kinsa mosalmot diha sa tun-anan makakat-on gikan sa usag usa, bisan unsa pa ang ilang kasinatian bahin sa kaminyoon o pag-amuma og mga anak. Dapita ang mga sumasalmot nga mopamatuod sa mga kamatuoran nga ilang gihisgutan ug sa pagpakigbahin sa mga kasinatian nga nahiangay sa mga leksyon
Gamita ang Giya sa Pagtuon sa Sumasalmot sa Mga Relasyon sa Kamiyoon ug sa Banay.

Ipaabli sa mga sumasalmot ang ilang mga kopya sa Giya sa Pagtuon sa mga Sumasalmot sa Relasyon sa Kaminyoon ug sa Banay. Itudlo nga alang sa matag leksyon, ang giya naglakip sa “Mga Ideya alang sa Paggamit,.” nga mao ang mga sugyot pagtabang sa mga sumasalmot nga gamiton ang mga doktrina ug mga baruganan nga ilang nakat-unan. Agi og dugang, ang matag leksyon giubanan sa usa o duha ka mga artikulo sa Kinatibuk-ang mga Awtoridad sa Simbahan. Human sa matag leksyon, ang mga sumasalmot kinahanglan motapos bisan usa lamang sa mga gisugyot nga mga kalihokan ug magtuon sa matag artikulo. Ang minyo nga mga magtiayon makadawat og mahinungdanong mga kaayohan gikan dungan nga pagbasa ug paghisgot sa mga artikulo.

Basaha ang mga pahina 3–7 diha sa giya sa pagtuon. Awhaga ang mga sumasalmot nga tun-an pag-usab ang mga doktrina ug mga baruganan niining leksyon pinaagi sa (1) pagsunod bisan usa lamang sa mga sugyot sa “Mga Ideya alang sa Paggamit,” ug (2) pagtuon sa artikulo “Alang Karon ug Hangtud sa Kahangturan,” ni Elder Boyd K. Packer.

Awhaga ang mga sumasalmot nga modala sa ilang mga giya sa pagtuon nganha sa klase sa matag leksyon.
Paningkamot sa pagsunod sumala sa mga doktrina ug mga baruganan diha sa mga leksyon.

Ipasabot og maayo nga dili igo ang pagkat-on lamang sa ebanghelyo. Aron ang ebanghelyo mahimong epektibo diha sa atong mga kinabuhi, kita kinahanglan gayud mopuyo unsa ang atong nakat-unan. Si Presidente Harold B. Lee mipahayag “Kita sa tinuod wala masayud bisan unsa sa mga pagtulun-an sa ebanghelyo hangud kita makasinati sa mga panalangin nga moabut gikan sa pagsunod sa matag baruganan” (Stand Ye in Holy Places, 215).

Ang atong mga panimalay mahimong “usa ka tipik sa langit” kon kita motukod niini “diha sa lig-on nga tukuranan sa atong Manunubos.”

Ipasabot og maayo nga sa kalibutan karon, ang panimalay maoy usa sa bugtong nga mga dapit diin kita makakita og kalinaw. Dayon basaha ang mosunod nga pamahayag ni Presidente Thomas S. Monson sa Unang Kapangulohan:

“Kon kita sa tinuod maninguha, ang atong panimalay mahimong usa ka tipik sa langit dinhi sa yuta. Ang mga hunahuna nga atong maisip, ang mga buhaton nga atong buhato, ang mga kinabuhi nga atong gipuy-an makaimpluwensya dili lamang sa kalampusan sa atong yutan-ong panaw; kini motimaan sa dalan ngadto sa atong mahangturong mga tumong” (sa Conference Report, Oct. 1988, 80-81; o Ensign, Nov. 1988, 69).

Sa unsa nga mga paagi nga ang mga panimalay mahimong “usa ka tipik sa langit”?

Human makatubag ang mga sumasalmot niini nga pangutana, ipakigbahin ang imong kaugalingong mga pagtuo kon sa unsa nga paagi ang panimalay mahimong usa ka tipik sa langit. Kon angay, pakigbahin og usa o duha ka personal nga mga kasinatian isip kabahin sa imong pagpamatuod.

Ipakigbahin ang mosunod nga pahayag ni Preidente Spencer W. Kimball, ang ika- 12 nga Presidente sa Simbahan:

“Daghan sa katilingbanong kaligdong nga sa nangagi nakatabang sa paglig-on ug pag-abag sa banay nangahanaw ug nangawagtang. Ang panahon moabut nga kadto lamang kinsa nagtuo sa banay sa tinud-anay og aktibo nga paagi ang makapatunhay sa ilang mga banay taliwala sa nagkapundok nga dautan libot kanato” (sa Conference Report, Oct. 1980, 3; o Ensign Nov. 1980, 4).

Basaha ang Helaman 5:12 uban sa mga sumasalmot. Dayon basaha ang mosunod nga pahayag ni Elder Joseph B. Wirthlin sa Korum sa Napulog Duha ka mga Apostoles:

“Kon kamo motukod sa inyong mga panimalay ibabaw sa katukurang bato sa atong Manunubos ug sa ebanghelyo, sila mahimong mga balaan nga dapit diin ang inyong mga banay mapasilungan gikan sa mabangis nga unos sa kinabuhi” (sa Conference Report, Apr. 1993, 88; o Ensign, May 1993, 71).

Unsa ang buot ipasabut nganha kaninyo sa pagtukod sa inyong panimalay “diha sa lig-on nga katukurang bato sa atong Manunubos? Unsa ang pipila ka piho nga mga butang nga himoon sa mga banay kon sila adunay panimalay nga nagpunting kang Kristo?

Ipasabot og maayo nga kining tun-anan naghisgot og mga baruganan nga makatabang sa paglig-on sa mga kaminyoon ug sa mga banay. Kita kinahanglan nga mogamit niining mga baruganan aron kita makaduol ngadto sa Langitnong Amahan ug ni Jesukristo diha sa atong mga panimalay. Kita kinahanglan gayud nga dili mawad-an sa pagtan-aw sa walay katapusang Pag-ula sa Manluluwas, nga mao ang makapahimo kanato sa pagpuyo uban sa atong mga banay hangtud sa hangtud.

Panapos

Ipadayag ang imong tumang kaikag mahitungod niining tun-anan, ug pahibaloa ang mga sumasalmot kon unsa ang ilang mapaabut gikan kanimo isip magtutudlo. Pananglit, ikaw mopasalig kanila nga ikaw moandam sa imong kaugalingon sa espirituhanong paagi sa pagtudlo ug nga ikaw mouban kanila sa paggamit sa mga baruganan sa matag leksyon ug sa pagpahimulos sa Giya sa Pagtuon sa Sumasalmot sa mga Relasyon sa Kaminyoon ug sa Banay. Awhaga silang imong gitudloan nga mohimo og pasalig nga mosalmot sa klase, mogamit sa giya sa pagtuon, ug mogamit sa mga doktrina ug mga baruganan nga ilang nakat-unan.

Sigon sa pag-aghat sa Espiritu Santo, ihatag ang imong pagpamatuod mahitungod sa pagkamahinungdanon sa banay. Ipadayag ang pasalamat sa kahibalo nga ang imong banay mahimong mahangturon.

Dugang nga Kapanguhaan nga Materyal

Mga pahayag sa mahitungod sa mga panginahanglan niadtong kinsa wala sa tradisyonal nga mga sitwasyon sa banay

Sa paghisgot sa mga kahimtang sa mga sumasalmot kinsa wala sa tradisyonal nga mga sitwasyon sa banay, basaha ang usa o duha sa mosunod nga mga pahayag.

Si Presidente Ezra Taft Benson, ang ika-13 nga Presidente sa Simbahan, naghisgot sa igsoong mga babaye nga dili minyo sa Simbahan: “Kami nagtan-aw kaninyo isip usa ka mahinungdanong kabahin sa pinakamahinungdanong pundok sa Simbahan. Kami nag-ampo nga ang among sagad nga paghatag og gibug-aton mahitungod sa mga banay dili makahatag kaninyo og pagbati nga kamo wala kaayo kinahanglana o dili kaayo bililhon alang sa Ginoo og sa iyang Simbahan. Ang sagrado nga talikala sa pagkasakop sa Simbahan may kalabutan labaw pa sa kahimtang sa kaminyoon, edad, o karon nga kahimtang. Ang inyong tagsatagsa nga pagkabililhon isip usa ka anak nga babaye sa Dios mopatigbabaw sa tanan” (“To the single Adult Sisters of the Church,” Ensign, Nov. 1988, 96).

Si Presidente Joseph Fielding Smith, ang ika-10 nga Presidente sa Simbahan, nagtudlo: “Kon ang usa ka lalaki o usa ka babaye kinsa gibugkos diha sa templo alang karon ug hangtud sa kahangturan makasala ug mawad-an sa katungod sa pagdawat sa kahimayaan sa celestial nga gingharian, siya dili makapugong sa pag-uswag sa nasakitan nga kauban kinsa nagmatinud-anon. Matag usa pagahukman sumala sa iyang [kaugalingon] nga mga buhat, ug walay kaangayan diha sa paghukom sa walay sala alang sa mga sala sa sad-an” (.Doctrines of Salvationi, comp. Bruce R. McConkie, 3 vols. [1954-56], 2:177).