Leksyon 14

Itudlo ang mga Baruganan sa Ebanghelyo ngadto sa mga Anak

Bahin 2

Katuyoan

Pagtabang sa mga sumasalmot nga molambo ang ilang tinguha ug abilidad sa pagtudlo sa mga anak sa kalooy ug pag-alagad, pagkamatinuoron, ug pagtahud alang sa mga kabtangan sa uban, sa hingpit nga kalipay sa matinuorong pagpanrabaho, ug ,moral nga kaputli.

Pagpangandam

Tun-i pag-usab ang mga baruganan ubos sa “Imong mga Kapangakohan isip Magtutudlo” (mga pahina x-xiii niini nga manwal). Pangita og mga paagi nga makagamit niini nga mga baruganan sa imong pagpangandam sa pagtudlo.
Basaha ang tataw nga mga ulohan nga naglatid sa mga doktrina ug mga baruganan sa leksyon. Isip kabahin sa imong pagpangandam, palandonga kining mga doktrina ug mga baruganan sa tibuok semana, magtinguha sa giya sa Espiritu sa paghukom unsay imong hatagan og gibug-aton nga makatubag sa mga panginahanglan sa mga sumasalmot. Kon gikinahanglan maggahin og duha ka mga tagal sa leksyon sa pagtudlo niini nga mga baruganan.
Kon ang mosunod nga mga materyal anaa, tun-i pag-usab kini ug dad-a kini sa klase.
1. For the Strength of Youth (34285).
2. A Parents Guide (31125).
3. Family Home Evening Resource Book (31106). Samtang imong tun-an pag-usab kining kapanguhaan, hatagi og talagsaong pagtagad ang “Teaching Responsibility” sa mga pahina 246–47, ug “Teaching about Procreation and Chastity,” sa mga pahina 253–60. Ikonsiderar ang pagtumbok niining mga artikulo panahon sa leksyon.

Gisugyot nga Kalamboan sa Leksyon

Ang mga ginikanan nagpakita og gugma sa ilang mga anak kon sila motudlo kanila.

Ipakigbahin ang mosunod nga kasinatian nga gisaysay ni Elder Loren C. Dunn sa Kapitoan:

“Samtang kami nagtubo sa gamay nga komunidad, ang akong amahan nakakita sa panginahanlan alang sa akong igsoong lalaki ug kanako nga makat-on sa baruganan sa trabaho. Ingon nga sangputanan, siya mipatrabaho kanamo sa gamay nga umahan sa tumoy sa lungsod diin siya gipadako. Siya nagdumala og lokal nga pamantalaan busa siya dili magahin og daghang panahon uban kanamo gawas sa sayo sa buntag ug sa gabii. Kana sa tinuod usa ka kapangakohan alang sa duha ka mga tin-edyer, ug usahay kami nakahimo og mga sayop.

“Ang among umahan gilibutan sa laing mga umahan, ug usa sa mag-uuma mihapit aron makigkita sa akong amahan usa ka adlaw niana aron sa pagsulti kaniya sa mga butang nga iyang gituohan nga among nahimong sayop. “Ang akong amahan naminaw kaniya ug dayon miingon, ‘Jim, ikaw wala makasabut. Tan-awa, ako nag-atiman og batang mga lalaki ug dili mga baka.’ Human sa kamatayon sa akong amahan, si Jim misaysay kanamo sa iyang sugilanon. Ako mapasalamaton kaayo alang sa usa ka amahan kinsa mihukom sa pag-atiman sa batang mga lalaki ug dili mga baka. Bisan pa sa mga kasaypanan, kami nakat-on unsaon sa pagpanrabaho nianang gamay nga umahan, ug ako tingali bisan og sila wala mosulti niini sa daghan kaayong mga pulong, kami sa kanunay nasayud nga kami labaw pa nga mahinungdanon ngadto ni Mama ug Papa kay sa mga baka o alang niana nga butang labaw sa tanan” (sa Conference Report, Oct. 1974, 12; o Ensign, Nov. 1974,11).

Unsay nakapadani kaninyo mahitungod niining sugilanon?

Ipasabot og maayo nga si Elder Dunn ug ang iyang igsoong lalaki nasayud kanunay nga ang ilang mga ginikanan nahigugma kanila. Usa ka paagi nga ang mga ginikanan makapakita og gugma alang sa ilang mga anak mao ang paggahin og panahon sa pagtabang kanila nga makat-on ug makagamit sa mga baruganan sa ebanghelyo. Kini nga leksyon naghisgot unsaon sa pagtudlo sa mga anak sa lima ka sukaranan sa mga baruganan sa pagpuyo sa ebanghelyo: kapuangod ug pag-alagad, pagkamatinuoron, pagtahud sa kabtangan sa uban, ang hingpit nga kalipay sa matinuoron nga pagpanarbaho ug moral nga kaputli.

Ang mga ginikanan kinahanglan gayud motudlo sa mga anak sa kalooy ug pag-alagad.

Ipasabut nga sa Iyang tibuok nga pangalagad, ang Manluluwas mitudlo sa kamahinungdanon sa paghigugma ug pag-alagad sa uban. Siya mitudlo niining baruganan pinaagi sa pulong ug panig-ingnan.

Unsay mga kaayohan nga moabut ngadto sa mga anak kinsa nakakat-on gikan sa ilang mga ginikanan sa paghigugma ug pag-alagad sa uban? (Agi og dugang sa pagpangayo sa mga tubag sa mga sumasalmot, ipakigbahin ang mosunod nga mga panig-ingnan.)

Si Presidente Boyd K. Packer, Akting Presidente sa Korum sa Napulog Duha ka mga Apostoles, nakamatikod:

Sa milabay nga mga katuigan, ako nakabantay sa usa ka minahal nga igsoong babaye nga mohatag og pag-alagad labaw kaayo kay sa bisan unsa nga balaang tawag sa pagtudlo o pagpangulo sa Simbahan. Siya nakakita sa panginahanglan ug mialagad—dili ‘Ang tawga ko kon ikaw nanginahanglan og tabang; apan ‘Ania ako; unsay sarang nga akong mahimo?’ Siya mohimo sa daghan kaayong gagmay nga mga butang, sama sa pagkugos sa anak sa usa ka tawo sulod sa tigum o paghatud sa bata ngadto sa tulunghaan kinsa nabiyaan sa sakyanan. Siya kanunay magpangita sa bag-o nga mga nawong sa simbahan ug moduol sa pag-abi-abi kanila…

“Siya nakakat-on nianang Espiritu sa pag-alagad gikan sa iyang inahan. Ang espiritu sa pag-alagad labing hingpit nga ikatudlo diha sa panimalay. Kita kinahanglan gayud nga motudlo sa atong mga anak pinaagi sa panig-ingnan ug mosulti kanila nga ang dili hakog nga espiritu mahinungdanon ngadto sa kalipay“ (sa Conference Report, Oct. 1997, 5; o Ensign, Nov. 1997, 6).

Sulod sa usa ka banay, usa ka anak adunay usa ka malisud nga panahon. Aron sa pagtabang kaniya nga moatubang sa iyang mga hagit, ang iyang mga ginikanan miawhag kaniya mga mohimo og sekreto nga buhat sa pagpangalagad alang sa laing sakop sa banay matag adlaw. Sa katapusan sa semana, siya wala kaayo maguol sa iyang kaugalingong mga kasamok ug nagsugod sa pagtagamtam sa mga panalangin ug kalinaw nga moabut sa pag-atiman sa uban.
Unsay atong makat-unan sa panimalay mahitungod sa pag-alagad nga dili nato makat-unan sa laing dapit?
Unsang mga sugyot ang inyong ipakigbahin nga makatabang sa mga ginikanan sa pagtudlo sa ilang mga anak nga moalagad sa uban?

Hunahunaa ang pagsulat sa mga tubag sa mga sumasalmot diha sa pisara. Awhaga ang mga sumasalmot nga mopakigbahin sa ilang mga panig-ingnan gikan sa ilang kaugalingon nga mga kinabuhi. Hangyoa usab sila nga mopakigbahin sa mga ideya alang sa mga buluhaton sa pag-alagad sa banay. Samtang ikaw mogiya sa panaghisgutan, ipahayag ag mosunod nga mga ideya:
1. Ang mga ginikanan makapakita sa panig-ingnan pinaagi sa pag-alagad sa mga sakop sa banay, pagtuman sa mga buluhaton sa Simbahan, ug pagpanggawas sa pagtabang sa uban nga anaa sa ilang palibot.
2. Sila makapangita og mga kahigayunan alang sa ilang mga anak nga moalagad sa mga sakop sa banay ug sa uban libot kanila. Bisan ang mga anak nga gagmay pa kaayo mahimo nga mobati sa hingpit nga kalipay sa pag-alagad.

Ang mga ginikanan kinahanglan gayud nga motudlo sa mga anak sa pagkamatinuoron ug pagtahud sa kabtangan sa uban.

Ipakigbahin ang mosunod nga tambag gikan ni Presidente N. Eldon Tanner, kinsa mialagad isip Unang Magtatambag sa Unang Kapangulohan:

“Ang pahimangno sa pagkamatinuoron magsugod sa panimalay. Matag usa kanato adunay personal nga mga kabtangan nga atua ra. Kita makahimo sa pagpakigbahin ug kinahanglan mopakigbahin sa maong mga butang sama sa mga dulaan ug mga dula ug sa atong mga pag-alagad ngadto sa usag usa; apan kita adunay salapi, alahas o sinina nga personal nga kabtangan sa matag usa ug kinahanglan nga dili kuhaon sa walay pananghid sa tag-iya. Ang anak nga nagtahud sa mao nga pagkamatinuoron diha sa panimalay dili makasupak sa baruganan sa gawas sa panimalay. Sa laing bahin, ang kakulang sa mao nga pahimangno nag-awhag sa dili pagtahud sa mga katungod ug kabtangan sa uban.” (sa Conference Report, apr. 1978, 64; o Ensign,May 1978, 44).

Unsa ang mahitabo kon ang mga anak wala tudloi sa pagtahud sa kabtangan sa uban?
Sa unsa nga paagi nga ang mga anak makakat-on diha sa panimalay nga magmatinuoron ug motahud sa kabtangan sa uban? Kanus-a ang mga ginikanan kinahanglan mosugod sa pagtudlo niini nga mga baruganan ngadto sa ilang mga anak?

Ang mga ginikanan kinahanglan gayud motudlo sa mga anak mahitungod sa mga ganti sa matinuoron nga pagpanrabaho.

Ipasabut nga ang mga pangulo sa Simbahan sa makadaghan mitambag sa mga ginikanan mahitungod sa pagkamahinungdanon sa pagtudlo sa mga anak sa pagtrabaho. Bisan og kini usahay malisud sa pagtudlo sa mga anak sa pagtrabaho, ang mga ginikanan kinahanglan nga mopadayon niini nga paningkamot. Si Elder L. Tom Perry sa Korum sa Napulog Duha ka mga Apostoles mitambag: “Ang pagtudlo sa mga anak sa hingpit nga kalipay sa matinuoron nga pagpanrabaho maoy usa ka labing mahinungdanon sa tanang mga gasa nga inyong ikahatag ngadto kanila” (sa Conference Report, Apr. 1978, 64; o Ensign, May 1978, 44).

Unsa ang mga bili sa pagtudlo sa mga anak sa mga baruganan sa trabaho ug kakugi samtang sila bata pa? Sa unsa nga paagi nga ang mga ginikanan makatabang sa ilang mga anak nga makat-on sa pagtrabaho? (Samtang ang mga sumasalmot mohisgot niini nga pangutana, awhaga sila nga mopakigbahin sa mga panig-ingnan gikan sa ilang mga kinabuhi. Hunahunaa ang paghisgot sa mosunod nga mga ideya aron adunay mahimong panaghisgutan.)
1. Ipakita ang mga panig-ingnan alang sa mga anak pinaagi sa pagtabang sa malipayong paagi sa mga buluhaton sulod sa balay.
2. Hatagi ang mga anak og mga kapangakohan nga motakdo sa ilang mga abilidad.
3. Paggahin og panahon sa pagtudlo sa mga anak unsaon sa pagtuman sa ilang mga kapangakohan.
4. Ipahayag ang pagpasalamat alang sa tabang sa mga anak.

Basaha ang usa o duha sa mosunod nga mga pamahayag:

Si Presidente Gordon B. Hinckley, ang ika-15 nga Preisdente sa Simbahan mitambag: “Ang mga anak kinahanglan nga motrabaho uban sa ilang mga ginikanan—sa paghugas sa mga plato uban kanila, sa paglampaso sa mga salog uban kanila, sa pagputol sa mga balili sa nataran, sa pagpul-ong sa mga kahoy, sa pagpamintal ug pag-ayo ug pagpanglimpyo ug paghimo sa gatusang laing mga butang diin sila makat-on nga ang trabaho mao ang ganti sa kalimpyo ug kauswagan ug kalampusan” Teachins of Gordon B. Hinckley [1997, 707].

Samtang nag-alagad sa Korum sa Napulog Duha ka mga Apostoles, si Elder Jeffery R. Holland mitudlo: “Ang mahinungdanong bahin sa pagtudlo sa mga anak aron madisiplina ug maresponsable kinahanglan nga sila makat-on sa pagtrabaho… .Ang labing maayong mga magtutudlo sa baruganan mao ang mga ginikanan mismo. Alang kanako, ang panarbaho nahimong hingpit nga kalipay sa dihang ako unang mitrabaho uban sa akong amahan, apohan nga lalaki, mga uyoan, ug igsoong mga lalaki. Ako nakasiguro nga ako sa labaw nga nakadugang sa trabaho kay sa tabang, apan ang mga panumdoman makalipay ug ang mga leksyon nga nakat-unan mga mapuslanon. Ang mga anak kinahanglan nga makat-on sa kapangakohan ug pagsalig sa kaugalingon. Ang mga ginikanan ba sa kinaugalingon naggahin og panahon nga mopakita ug mopahayag ug mopasabut aron nga ang mga anak makahimo, ingon sa gitudlo ni Lehi, ‘sa pagbuhat alang sa ilang mga kaugalingon…ug nga dili pagaaghaton ’? (2 Nephi 2:26)” (sa Conference Report, Oct. 1990, 42; o Ensign, Nov. 1990, 34; tan-awa usab sa pahina 50 diha sa Giya sa Pagtuon sa Sumasalmot sa mga Relasyon sa Kaminyoon ug sa Banay).

Ngano nga mahinungdanon alang sa mga anak ang pagtrabaho uban sa ilang mga ginikanan ug ubang mga sakop sa banay? Sa unsa nga mga paagi nga ang mga relasyon makaimpluwensya kon ang mga sakop sa banay magtambayayong?

Unsa ang pipila ka mga ganti sa matinuorong trabaho? (Ang mga tubag mahimong maglakip niadtong anaa sa mosunod nga listahan.)
1. Katagbawan ug hingpit nga kalipay sa trabaho nga maayong pagkahimo.
2. Usa ka pagbati sa kalampusan.
3. Ang edukasyon mahinungdanon sa praktikal nga mga kahanas.
4. Pagkaamgo sa kaugalingong katakus
5. Mga ganti nga materyal sama sa mga pasidungog sa tulunghaan ug mga kaayohan sa panalapi.
Sa unsa nga paagi nga ang trabaho usa ka espirituhanong panalangin ingon man sa temporal nga panalangin?
Unsa ang mahimo sa mga ginikanan sa pagtabang sa ilang mga anak nga mokita og salapi ug mogamit niini sa maalamon nga paagi? Sa unsa nga paagi nga ang mga ginikanan makatabang sa ilang mga anak nga mobalanse sa pagpanrabaho sa ubang matang sa buhat sama sa buluhaton sa Simbahan, buluhaton sa tulunghaan, ug mga buluhaton sulod sa balay.
Unsa ang pipila ka mga kakuyaw sa mga ginikanan nga nagtugot sa ilang mga anak nga molikay sa kapangakohan sa pagtrabaho?

Si Elder Neal A. Maxwell sa Korum sa Napulog Duha ka mga Apostoles mitudlo:

“Ang ebanghelyo sa pagtrabaho kabahin sa ‘kahingpitan sa ebanghelyo.’ Bisan kon makalipay, ang buluhaton sa misyonaryo usa ka trabaho. Bisan kon makalipay, ang buhat sa templo trabaho. Apan pipila sa atong dili makabalibad nga mga batan-on maayong motrabaho, apan ang kadaghanan naningkamot sa pagpahimuot sa ilang mga kaugalingon …

“Pagmabinantayon … kon kamo magpatuyang magtinguha nga mahimong maayo ngadto sa inyong mga anak kay sila nganha kaninyo. Ayaw, bisan pa sa dili tinuyo nga paagi, mohimo sa mga butang nga labing dautan pinaagi sa pagwagtang sa kinahanglanon alang sa maayong trabaho ingon kabahin sa ilang kasinatian, sa ingon nanalipod sa inyong mga anak gikan sa mga butang nga nakatabang kaninyo unsa kamo karon!” (sa Conference Report, Apr. 1998, 50; o Ensign,, May 1998, 38).

Ang mga ginikanan kinahanglan gayud nga motudlo sa mga anak sa moral nga kaputli.

Hatagi og gibug-aton nga ang mga ginikanan adunay obligasyon sa pagtudlo sa ilang mga anak sa mga sumbanan sa Ginoo sa moral nga kaputli. Kini makatabang sa mga anak nga makigbatok sa tintasyon.

Ngano nga ang mga ginikanan mopasiugda sa paghisgot sa moral nga kaputli ug pagkasekswal uban sa ilang mga anak? Unsa ang mga kakuyaw kon ang mga ginikanan dili mopasiugda niini?

Itudlo nga sa kalibutan karon, ang mga anak dili makalikay nga makadungog mahitungod sa pagkasekswal. Bisan pa, kadaghanan sa unsay ilang madungog sa kalibutan nagpauswag sa pag-abuso sa sagradong gahum sa paglalang. Ang mga anak—ug ilabi na sa mga tin-edyer—nagkinahanglan sa tinuod nga kasayuran ug tinuod nga doktrina mahitungod niining mga hilisgutan. Ang mga ginikanan kinahanglan gayud motabang kanila nga makaangkon sa kalig-on nga makasagubang sa mga bakak nga gitudlo sa kalibutan. Sila kinahanglan gayud nga motudlo sa mga anak sa laraw sa Ginoo sa paggamit sa gahum sa paglalang.

Dapita ang mga sumasalmot nga mosaysay mahitungod sa malampusong kasinatian nga ilang nasinati sa ilang mga anak mahitungod niini nga hilisgutan. Dugang sa pagpangutana sa mga panan-aw sa mga sumasalmot, ipakigabahin ang mosunod nga mga bamganan:

Ang mga anak nga batan-on pa kaayo kinahanglan nga mahatagan sa tin-aw ug yano nga kasayuran mahitungod sa sagradong matang sa ilang mga lawas. Kini nga pagpasabut nagtabang kanila sa pagpanalipod sa ilang mga kaugalingon gikan niadtong buot mopahimulos kanila. Samtang ang mga anak nagkaduol na sa edad sa pagkahamtong, mga ginikanan kinahanglan nga magmabinantayon nga paagi mopasabut ngadto kanila sa mga kausaban nga mahitabo sa ilang mga lawas. Sila kinahanglang mopasabut nga ang pisikal nga pagkahingkod normal ug kabahin sa laraw sa Dios.

Ang mga ginikanan kinahanglan usab motabang sa ilang mga anak nga makasabut nga ang sekswalidad maayo kon gigamit sulod sa mga utlanan nga ihatag sa Ginoo apan usa ka grabe nga sala kon gigamit nga supak sa mga sugo sa Ginoo. Ang mga tin-edyer nagkinahanglan sa tin-aw nga mga sumbanan gikan sa ilang mga ginikanan mahitungod sa mga sumbanan sa Ginoo.

Ipakita ang gamay nga basahon sa For the Strenght of Youth. Ipasabut nga kining gamay nga basahon nagsangkap sa labing maayong tabang alang sa mga batan-on ug sa ilang mga ginikanan, Kini naglakip sa kasayuran sa mga sumbanan sa Simbahan alang sa dating, sinina, pinulongan, medya, musika ug pagsayaw. Awhaga ang mga ginikanan nga mobasa ug mohisgot niining gamay nga basahon sa tinagsa uban sa matag usa sa ilang mga anak kinsa batan-on pa kaayo. Kini nagsangkap og sayon nga paagi alang sa mga ginikanan nga moabut sa mga hilisgutan nga malisud nga hisgutan. Kini naghatag usab sa mga batan-on sa kahigayunan nga mangutana og piho nga mga pangutana mahitungod sa mga sumbanan sa moralidad. Ipakigbahin ang mosunod nga kinutlo gikan sa mga pahina 14-15 sa gamay nga basahon:

“Ang atong Langitnong Amahan mitambag nga ang sekswal nga kasuod kinahanglan itagana alang sa mga anak sulod sa mga talikala sa kaminyoon. Ang pisikal nga relasyon tali sa bana ug asawa mahimong matahum ug sagrado. Kini gi-orden sa Dios sa paglalang sa mga anak ug alang sa pagpahayag sa gugma sulod sa kaminyoon: ‘Tungod niini ang lalaki magabiya sa iyang amahan ug sa iyang inahan ug moipon siya sa iyang asawa ug sila mahimong usa ka unod’ (Genesis 2:24).

“Tungod kay ang sekswal nga kasuod sagrado kaayo, ang Ginoo nagsugo sa atong pagkontrol sa kaugalingon ug kaputli sa dili pa ang kaminyoon ingon man sa pagkamaunongon human sa kaminyoon. Sa dating, tagda ang inyong ka-date uban ang pagtahud ug paabuta ang inyong ka-date nga mopakita sa sama nga pagtahud nganha kaninyo. Dili gayud motagad sa inyong ka-date ingon nga usa ka butang nga magamit alang sa inyong kaugalingon maibugong mga tinguha o katagbawan. Ang dili tukma nga pisikal nga pagdapat makapawala sa pagkontrol sa kaugalingon. Sa kanunay pabilin sa pagkontrol sa imong kaugalingon ug sa imong pisikal nga mga pagbati.

“Ang Ginoo sa piho nga paagi nagdili sa pipila ka mga pamatasan, naglakip sa tanang sekswal nga relasyon sa wala pa ang kaminyoon, paghikap sa sagrado nga mga bahin sa lawas, sekso nga kahiwian sama sa pakighilawas sa managsama og sekso, panglugos, ug pakighilawas sa kabanay, paawas sa kinatawo, o paghunahuna nang daan sa pakighilawas, sa pulong o sa lihok.…

“Ang mga kalihokan sa panghilawas sa managsama og sekso makasasala ug salawayon ngadto sa Ginoo (tan-awa sa Mga Taga-Roma 1:26-27, 31). Ang dili kinaiyanhon nga mga pagbati, lakip niadtong mga tawo sa sama og sekso, sukwahi ngadto sa laraw sa Dios alang sa iyang mga anak. Kamo may tulubagon nga mohimo sa husto nga mga pagpili. Kon gitumong ba ngadto sa sama o kaatbang nga sekso, higal nga mga pagbati ug mga tinguha mahimong mosangpot sa labaw pang grabe mga sala. Ang tanang mga Santos sa Ulahing mga Adlaw kinahanglan makat-on sa pagkontrol ug pagdisiplina sa ilang mga kaugalingon.”

Ipasabot og maayo nga samtang ang mga ginikanan mohisgot uban sa ilang mga anak mahitungod sa pagkasekswal, sila makapamatuod nga ang moral nga kaputli mosangpot sa hingpit nga kalipay ug kalinaw.

Ngano nga kinahanglan alang sa mga ginikanan nga mohatag sa panig-ingnan sa moral nga kaputli agi og dugang sa pagtudlo bahin niini? Sa unsa nga paagi nga ang mga ginikanan makapakita sa panig-ingnan sa moral nga kaputli?

Itudlo nga ang mga bata makakat-on sa tinuod nga mga baruganan sa moral nga kaputli sa paagi nga ang mga ginikanan motagad sa usag usa, pinaagi sa mga matang sa literatura ug ubang medya nga tugutan sa ilang mga ginikanan diha sa panimalay, ug sa paagi nga ang ilang mga ginikanan mohisgot sa sagradong gahum sa paglalang.

Panapos

Ipasabot og maayo nga ang mga ginikanan adunay kapangakohan sa pagtudlo sa ilang mga anak sa mga baruganan sa pagkamatarung. Awhaga ang mga sumasalmot nga maningkamot sa pagpuyo sa mga baruganan nga gitudlo niining leksyon ug motino sa mga paagi diin sila labaw pang makatudlo pag-ayo niini nga mga baruganan ngadto sa mga anak.

Kon giaghat sa Espiritu, ipakigbahin ang inyong mga pagtuo sa mga kamatuoran nga gihisgutan sa panahon sa leksyon.

Basaha ang mga pahina pages 63–73 diha sa Giya sa Pagtuon sa Sumasalmot sa mga Relasyon sa Kaminyoon ug sa Banay. Awhaga ang mga sumasalmot nga tun-an pag-usab ang mga doktrina ug mga baruganan niini nga leksyon pinaagi sa (1) pagsunod bisan usa sa mga sugyot sa “Mga Ideya alang sa Paggamit” ug (2) pagbasa sa mga artikulo “Pagtudlo sa mga Anak” ni Presidente Boyd K. Packer. Itudlo nga ang minyo nga mga magtiayon makadawat sa mahinungdanong mga kaayohan gikan sa pagbasa ug paghisgot pagdungan sa mga artikulo diha sa giya sa pagtuon.