Leksyon 15

Ang Paggiya sa mga Anak Samtang Sila Mohimo og mga Desisyon

Katuyoan

Aron sa pagtudlo sa mga baruganan nga makatabang sa mga ginikanan sa paggiya sa ilang mga anak sa paghimo og mga desisyon.

Pagpangandam

Samtang ikaw nag-andam sa imong kaugalingon sa pagtudlo, pangita og mga paagi sa pagsunod sa mga baruganan ubos sa “Imong mga Kapangakohan isip Magtutudlo“ (mga pahina x-xiii niini nga manwal).
Basaha ang tataw nga mga ulohan sa leksyon. Kining mga ulohan naghatag sa kinatibuk-ang pagpasabut sa mga doktrina ug mga baruganan sa leksyon. Ingon nga kabahin sa imong pagpangandam palandonga ang mga paagi sa pagtabang sa mga sumasalmot sa paggamit niini nga mga doktrina ug mga baruganan. Tinguhaa ang giya sa Espiritu sa paghukom unsa ang kinahanglan nga imong hatagan og gibug-aton sa pagtubag sa mga panginahanglan sa mga sumasalmot.
Pagdala og gamay nga bato nganha sa klase. Ikaw mogamit niini sa katapusan seksyon sa leksyon.

Gisugyot nga Kalamboan sa Leksyon.

Ang mga anak nagkinahanglan og paggiya samtang sila mohimo og mga desisyon.

Basaha ang mosunod nga mga balak nga gipakigbahin diha sa pakigpulong ni Presidente Thomas S. Monson sa Unang Kapangulohan sa kinatibuk-ang komperensya:

Siya mibarug diha sa kinasang-an sa mga dalan nga nag-inusara,
Ang kahayag sa adlaw sa iyang nawong.
Siya wala maghunahuna sa kalibutanong wala mahibaloi—
Siya andam sa panglalaking lumba.
Apan ang mga dalan nagpadulong sa sidlakan,
Ug mga dalan nagpadulong sa kasadpan,
Ug ang batang lalaki wala makahibalo haing dalan ang labing maayo;
Busa siya mipili sa dalan nga midala kaniya paingon sa ubos,
Ug siya napilde sa lumba ug sa korona sa mananaog.
Sa wala madugay siya nalaang sa kasuko
tungod kay walay usa nga mibarug diha sa kinasang-an sa mga dalan

Sa pagpakita kaniya sa maayong dalan.
Sa laing adlaw, sa mao nga dapit,
Usa ka batang lalaki sa dakong mga paglaum mibarug.
Siya, usab nag-andam alang sa panglalaking lumba;
Siya, usab nagpangita sa mga butang nga maayo;
Apan dihay usa kinsa nahibalo sa mga dalan.
Ug kanang usa mipakita kaniya kon unsa nga dalan ang agian.
Busa siya mibiya sa dalan nga modala kaniya paingon sa ubos,
Ug siya nakadaog sa lumba ug sa korona sa mananaug.
Siya karon naglakaw sa dakong dalan sa tabo
Tungod kay dihay usa nga nagbarug sa may kinasang-an sa mga dalan

Sa pagpakita kaniya sa maayong dalan. [gikutlo gikan sa Central Christian Monitor, sa Conference Report, Oct. 1993, 66-67; o Ensign, Nov. 1993,48].

Ipasabut nga ang mga bata ug mga batan-on sa kasagaran nagbarug diha sa kinasang-an sa mga dalan—sa mga panahon samtang sila moatubang sa mga desisyon nga makahatag og malungtarong epekto sa ilang mga kinabuhi. Ang mga ginikanan, nga nasayud sa mga dalan, kinahanglan nga anaa diha sa pagtabang sa ilang mga anak sa paghimo sa matarung nga mga desisyon. Bisan kon ang mga ginikanan dili makauban sa ilang mga anak sa mga higayon sa desisyon, ang mga anak kinahanglan makadawat sa giya ug mosalig sa mga pag-aghat sa Espiritu Santo kon sila makahinumdom sa mga pagtulun-an sa ilang mga ginikanan.

Ang mga ginikanan makatabang sa ilang mga anak nga mogamit sa ilang kabubut-on sa matarung nga paagi.

Ipasabut nga ang kabubut-on maoy usa ka labing mahinungdanong gasa sa Langitnong Amahan ngari kanato. Ang kabubut-on mao ang gahum sa pagpili ug sa paghimo alang sa atong mga kaugalingon. Pinaagi sa kabubut-on kita mopili sa pagsunod sa Manluluwas ug modawat sa panalangin sa kinabuhing dayon (Tan-awa sa 2 Nephi 2:25–28).

Basaha ang Doktrina ug mga Pakigsaad 58:27–28 uban sa mga sumasalmot.

Sa unsa nga paagi kining tudling magamit ngadto sa mga ginikanan samtang sila motabang sa ilang mga anak sa paghimo sa mga desisyon?
Unsa ang ubang mga kaayohan sa patugot sa mga anak sa paghimo sa mga desisyon?

Ang mosunod nga mga materyal naglatid sa mga baruganan nga masunod sa mga ginikanan sa pagtabang sa ilang mga anak nga mogamit sa ilang kabubut-on sa matarung nga paagi. Hisguti kining baruganan uban sa mga sumasalmot.

Itudlo sa mga anak ang mahinungdanon nga laraw sa kalipay sa Langitnong Amahan.

Uban sa mga sumasalmot, basaha ang mosunod nga kinutlo sa Alma 12:32:

“Busa ang Dios mihatag ngadto kanila sa mga sugo, human ikapahibalo ngadto kanila ang laraw sa katubsanan.”

Ngano nga mahinungdanon nga ang Dios mihatag sa mga sugo human sa pagpahibalo sa laraw sa katubsanan? Sa unsa nga paagi nga kining baruganan magamit ngadto sa mga paningkamot sa mga ginikanan sa pag-awhag sa ilang mga anak sa pagsunod sa mga sugo?

Si Elder Boyd K. Packer sa Korum sa Napulog Duha ka mga Apostoles mitudlo:

“Ang mga batan-on matingala ‘ngano?’—Ngano nga kita gisugo sa paghimo sa pipila ka mga butang, ug ngano kita gimandoan sa dili paghimo sa pipila ka mga butang? Ang kahibalo sa laraw sa kalipay…makahatag sa batan-ong mga kaisipan sa tubag… .

“Kamo wala diha uban sa [inyong] mga anak sa panahon sa ilang mga tintasyon. Niadtong makuyaw nga mga higayon sila kinahanglan gayud nga mosalig sa ilang kaugalingon mga kapanguhaan. Kon sila makapahiluna sa ilang mga kaugalingon sulod sa dugukan sa laraw sa ebanghelyo, sila mahimong malig-on pag-ayo.

“Ang laraw angay nga balikbalikon pag-usab. Dayon ang katuyoan sa kinabuhi, ang pagkatinuod sa Manunubos, ug ang kahigayunan sa mga sugo magpabilin uban kanila.

“Ang ilang pagtuon sa ebanghelyo, ang ilang mga kasinatian sa kinabuhi, madugang ngadto sa walay katapusang paglambo nga saksi ni Kristo, sa pag-ula, sa pagpahiuli sa ebanghelyo” (The Great Plan of Happiness [pakigpulong ngadto sa relihiyosong tigpahimangno, 10 Aug. 1993], 3).

Hatagi ang mga bata sa tin-aw nga mga sumbanan nga gibase sa mga baruganan sa ebanghelyo.

Ipasabut nga ang mga ginikanan kinahanglan nga mohatag sa ilang mga anak sa tin-aw nga mga sumbanan sa pagsunod sa paghimo sa mga desisyon. Kining paningkamot naglakip sa pagtudlo sa ebanghelyo ug pagtukod sa mga sumbanan sa kinaiya diha sa panimalay. Si Elder Joe J. Christensen sa kapitoan mitudlo:

“Ayaw kahadlok sa paghatag sa tin-aw og moral nga mga sundanan ug mga sumbanan. Siguroha sa pag-ingon dili kon gikinahanglan tuguti ang [inyong mga anak] nga masayud nga adunay pipila ka mga butang nga, ingon nga mga sakop sa inyong banay nga kamo sa yano dili mobuhat. Ang pipila ka mga ginikanan ingon og mabalak-on kaayo mahitungod sa pagkainila ug pagkasosyal sa ilang mga anak ug nagsunod sa daghang mga butang nga sa tinud-anay supak sa ilang maayong paghukom, sama sa mahalon nga mga urog, di ligdong nga mga sinina, dugay nga mga oras sa pagpauli, pagpakig-date sa wala pa mag-edad og napulog unom, malaw-ay nga mga sine, ug uban pa. Alang sa mga anak ug sa mga ginikanan, ang pagbarug alang sa unsay matarung malagmit, subo usahay. Mahimong adunay mga gabii nga mag-inusara, mga salo-salo nga wala matambongi, ug mga pelikula nga gisalida nga wala matan-aw. Mahimong dili sa kanunay makalingaw. Apan ang pagkaginikanan dili sangka sa pagkainila” (sa Conference Report, Oct. 1993, 13; o Ensign, Nov. 1993, 11).

Unsay mahimo sa mga ginikanan sa paghatag og tin-aw nga moral nga mga sumbanan alang sa ilang mga banay? (Samtang ang mga sumasalmot maghisgot niining pangutana, awhaga sila sa pagpakigbahin sa mga panig-ingnan gikan sa ilang kaugalingong mga kinabuhi.)

Basaha ang Moroni 7:15–19 uban sa mga sumasalmot.

Unsa nga tambag ang gihatag niining tudling mahitungod kon sa unsa nga paagi masayud sa maayo gikan sa dautan? Sa unsa nga paagi ang mga ginikanan makagamit niining tambag samtang sila maghimo og mga sumbanan alang sa ilang mga anak?
Sa unsa nga mga bahin sa ilang mga kinabuhi nga ang mga anak ug mga batan-on usahay nanginahanglan sa paghukom tali sa maayo ug dautan? Sa unsa nga paagi ang mga ginikanan makagamit sa tambag sa Moroni 7:15–19 sa pagtabang sa mga anak sa paghimo sa matarung nga mga desisyon?

Tabangi ang mga anak sa pag-ila sa impluwensya sa Espiritu Santo diha sa ilang mga kinabuhi. .

Ipasabut nga sa Moroni 7:15–19 mao ang mahitungod sa Kahayag ni Kristo, nga nagtabang kanato nga masayud sa maayo gikan sa dautan. Agi og dugang sa pagsunod sa kahayag ni Kristo, kita makadawat sa mga giya gikan sa Espiritu Santo “nga mopakita ngari [kanato] sa tanan nga mga butang unsa ang [atong] kinahanglang nga buhaton” (2 Nephi 32:5) ug motabang kanato nga “masayud sa kamatuoran sa tanan nga mga butang” (Moroni 10:5). Samtang ang mga anak makat-on sa pag-ila ug pagsunod sa mga pag-aghat sa Espiritu Santo, sila makadawat sa dugang tabang sa paghimo og mga desisyon. Human ang mga anak makadawat sa gasa sa Espiritu Santo, ang mga ginikanan makatabang kanila sa pagpalambo sa tinguha nga mahimong takus sa makanunayong nga panag-uban sa Espiritu.

Si Robert D. Hales sa Korum sa Napulog Duha ka mga Apostoles naghisgot bahin sa unsa nga paagi ang iyang inahan mitabang kaniya sa pag-ila sa impluwensya sa Espiritu Santo:

“Human sa akong bunyag ug kumpirma, ang akong inahan midala kanako sa daplin ug nangutana, ‘Unsay imong gibati?’ Ako mihulagway kutob sa akong mahimo sa mainit nga pagbati sa kalinaw, kahupayan, ug kalipay nga akong nasinati. Ang akong inahan mipasabut unsay akong gibati mao ang gasa nga akong bag-ong nadawat, ang gasa sa Espiritu Santo. Siya mipahimangno kanako nga kon ako magpabilin nga takus niini, ako makaangkon niana nga gasa kanunay uban kanako. Kana usa ka higayon sa pagtudlo nga milungtad uban kanako sa kinatibuk-an sa akong kinabuhi“ (sa Conference Report, Apr. 1999, 42; o Ensign, May 1999, 33).

Unsa ang mabuhat sa mga ginikanan sa pagtabang sa ilang mga anak sa pagbati ug pag-ila sa impluwensya sa Espiritu Santo? (Ang mga tubag mahimong maglakip nga ang mga ginikanan makaawhag sa ilang mga anak sa pagtuon sa mga kasulatan, sa pagpaminaw sa sagrado nga musika, pagtuman sa mga sugo, ug pag-ampo uban sa tinuod nga tuyo. Sila usab makahimo sa pagpakigbahin sa espirituhanong mga kasinatian uban sa ilang mga anak ug sa pagpahayag sa paghigugma alang kanila.)

Ipasabot og maayo nga kinahanglan ang mga ginikanan nga moawhag sa pribadong relihiyosong pamatasan sa ilang mga anak, sama sa personal nga pagtuon sa kasulatan, pag-ampo, ug pagpuasa. Pag-apil sa relihiyosong mga kalihokan sa banay mahinungdanon, apan kini dili pa igo.

Hatagi ang gagmay nga mga bata sa mga kahigayunan sa paghigugma sa yano nga mga desisyon.

Itudlo nga ang mga ginikanan makahatag sa gagmay nga mga anak sa mga kahigayunan sa paghimo og mga desisyon. Sila makatuman sa mga yano nga paghukom, sa kasagaran nagtanyag lamang og duha ka mga pagpili ug pagsiguro nga ang duha ka mga pagpili madawat. Pananglit, ang ginikanan makaingon,” Buot ba ikaw nosul-ob sa imong bughaw nga sayal o sa imong pula nga sayal karong adlawa?” o “Buot ba ikaw nga maminaw og sugilanon o mopadayon sa pagdula hangtud sa panahon sa tingkatulog?” Sa makausa ang mga ginikanan nakatanyag na sa ingon nga pagpili, sila kinahanglan modawat sa desisyon sa bata.

Sa unsa nga paagi nga ang yano nga mga paghukom makatabang sa mga anak sa pag-andam sa paghimo og malukpanon ug malisud nga mga desisyon sa kaulahian sa ilang mga kinabuhi?

Tabangi ang mga anak sa pagsabut nga ang pipila ka mga desisyon adunay mahangturong sangputanan. .

Ipasabut nga sa panahon nga ang mga anak moatubang og malisud nga mga paghukom sama sa pagpili og mga kalihokan sa adlaw nga igpapahulay, pagpili og mga higala, paghimo og mga piano sa edukasyon, o paghimo og mga tumong alang sa pagpanarbaho, mahinungdanon nga sila masayud unsaon sa paghimo sa mga paghukom nga gipasikad sa mga kamatuoran sa ebanghelyo. Mahinungdanon nga sila makasabut nga ang ilang mga paghukom mahimong adunay mahangturong mga sangputanan. Ang mga ginikanan kinahanglan gayud nga mogahin sa sayo nga panahon sa mga kinabuhi sa ilang mga anak sa pagpakigsulti uban kanila mahitungod niining mga baruganan.

Unsa ang pipila ka mga paagi nga ang mga ginikanan makagiya sa ilang mga anak kon sila motabang kanila? (Ang mga tubag mahimong maglakip nga ang mga ginikanan mahimong makigbahin sa ilang kaugalingong mga kasinatian, pagpahinumdom sa ilang mga anak sa mga sugo sa Ginoo, ug pagtabang sa ilang mga anak sa paghunahuna sa mahangturong mga sangputanan sa lahi nga mga pagpili.)
Unsa nga sitwasyon nga ang mga ginikanan kinahanglan nga moapil kon ang mga anak naghimo og dili matarung nga mga desisyon?

Hangyoa ang mga sumasalmot sa pagbasa sa mosunod nga tambag gikan ni Elder M. Russel Ballard sa Korum sa Napulog Duha ka mga Apostoles (pahina 74 diha sa Giya sa Pagtuon sa Sumasalmot sa mga Relasyon sa Kaminyoon ug sa Banay):

“Katungdanan sa mga ginikanan sa pag-apil kon sila makakita sa sayop nga mga pagpili nga gihimo. Kana wala magpasabut nga ang mga ginikanan mokuha gikan sa mga anak sa bililhong gasa sa kabubut-on. Tungod kay ang kabubut-on usa ka gasa nga gihatag sa Dios, ang pagpili sa katapusan, kon unsa ang ilang buhaton,sa unsa nga paagi sila maglihok, ug unsa ang ilang tuohan sa kanunay ilaha. Apan ingon nga mga ginikanan kita kinahanglan nga makasiguro nga ang atong mga anak makasabut sa angay nga pamatasan ug sa mga sangputanan nganha kanila kon sila mopadayon sa ilang sayop nga tumong. Hinumdumi walay ingon nga supak sa balaod nga pagdili diha sa panimalay. Mga sine, mga magasin, telebisyon, videos, ang Internet, ug uban pang medya anaa ingon nga mga bisita ug kinahanglan lamang abiabihon kon kini angay alang sa kalingawan sa banay. Himoa ang inyong panimalay nga usa ka dangpanan sa kalinaw ug pagkamatarung. Ayaw tuguti ang dautan nga mga impluwensya sa paghugaw sa inyong kaugalingong espesyal nga espirituhanong palibot. Pagmabination, mahunahunaon, malumo, ug manggiangayon sa unsa ang inyong isulti ug unsa ang inyong pagtagad sa matag usa. Dayon ang mga tumong sa banay nga gipasikad sa mga sumbanan sa ebanghelyo makapasayon sa paghimo sa maayong mga desisyon” (sa Conference Report, Apr. 1989, 114; o Ensign, May 1999, 87).

Ang mga ginikanan kinahanglan nga motugot sa mga anak nga makat-on gikan sa mga sangputanan sa dili maalamon nga mga desisyon.

Itudlo nga bisan ang mga ginikanan kinahanglan usahay moapail sa pagtabang sa ilang mga anak sa paghimo og matarung nga mga desisyon, sila kinahanglan nga dili moapil sa pagsanta sa mga sangputanan sa dili maalamon nga mga desisyon sa ilang mga anak.

Unsa ang mahimo nga resulta kon ang mga ginikanan mopanalipod sa ilang mga anak sa mga sangputanan sa ilang mga desisyon? (Awhaga ang mga sumasalmot sa pagpakigbahin sa mga panig-ingnan gikan sa ilang kaugalingong mga kinabuhi. Dayon basaha ang mosunod nga mga pamahayag.)

Si Elder Richard G. Scott sa Korum sa Napulog Duha ka mga Apostoles miingon: “Ang mga ginikanan dili mohimo og sayop sa tinuyo nga paagi sa pag-apil sa pagpawalay bili og pagsalikway sa natural nga mga sangputanan sa tinuyoang mga desisyon sa inyong anak sa pagsupak sa mga sugo. Ang mao nga mga lihok molig-on sa dili tinuod nga mga baruganan, mohatag sa higayon alang sa grabe pa nga sala, ug mopakunhod sa kalagmitan sa paghinulsol” (sa Confernece Report, apr. 1993, 43; o Ensigni, May 1993, 34).

Si Elder Robert D. Hales mitudlo: Makahadlok sa pagtugot sa atong mga anak sa pagkat-on gikan sa mga sayop nga ilang nahimo, apan sa ilang kabubut-on sa pagpili sa pamaagi sa Ginoo ug sa mga katakus sa banay labaw nga mahinungdanon kon ang pagpili nagagikan kanila kay sa kita mosulay sa pagpugos niadtong mga hiyas diha kanila. Ang mga pamaagi sa Ginoo sa paghigugma ug pag-uyon maayo pa kay sa pamaagi ni Satanas sa paghaylo ug pagpamugos, ilabi na sa pag-amuma sa mga tin-edyer” (sa Conference Report, Apr. 1999, 43; o Ensign, May 1999, 34).

Ang mga ginikanan kinahanglan nga mopakita sa walay hunong nga paghigugma alang sa mga anak nga nahisalaag.

Itudlo nga bisan pa human sa hilabihang mga paningkamot sa mga ginikanan, pipila sa mga anak buot mohimo og mga desisyon nga maoy hinungdan sa hilabihang kaguol sa ilang mga kaugalingon ug sa uban. Ang mga ginikanan kinahanglan gayud nga dili mohunong sa paghigugma sa mga anak nga nahisalaag. Si Elder Richard G. Scott miingon:

“Pipila kaninyo adunay mga anak kinsa dili motubag nganha kaninyo, nagpili sa hilabihang kalahi nga mga dalan. Ang Amahan sa Langit kanunay aduna niana nga samang kasinatian. Samtang pipila sa Iyang mga anak nakagamit sa Iyang gasa sa kabubut-on sa paghimo sa mga pagpili nga supak sa Iyang tambag, Siya nagpdayon sa paghigugma kanila. Busa, ako sigurado, nga Siya wala gayud mobasol sa Iyang kaugalingon alang sa ilang dili maalamong mga pagpili” (sa Conference Report, Apr. 1993, 43; o Ensign, May 1993, 34).

Samtang nag-alagad sa Korum sa Napulog Duha ka mga Apostoles, si Elder Howard W. Hunter mihatag sa mosunod nga tambag sa mga ginikanan kinsa nakahimo sa ilang kutob mahimo apan naguol tungod sa mga sayop sa anak:

“Ang malampuson nga ginikanan mao ang usa kinsa nahigugma, usa kinsa nakasakripisyo, ug usa ka kinsa nakaatiman, nakatudlo, ug nakapangalagad sa mga panginahanglan sa anak. Kon kamo nakahimo niining tanan ug ang inyong mga anak sa gihapon nahisalaag o badlongon o kalibutan, kamo bisan pa niana, nagmalampuson nga ginikanan. Tingali adunay mga anak kinsa moabut sa kalibutan nga buot mohagit ni bisan kinsa nga pundok sa mga ginikanan sulod sa bisan unsa nga mga kahimtang. Sa ingon usab tingali adunay uban kinsa mipanalangin sa kinabuhi, ug hingpit nga kalipay ngadto sa, hapit bisan kinsa nga amahan o inahan” (sa Conference Report, Oct. 1983, 94; o Ensign, Nov. 1983, 65).

Hatagi ang mga sumasalmot sa gagmay nga bato nga imong gidala sa klase (tan-awa sa “Pagpangandam,” aytem 4). Hangyoa ang mga sumasalmot sa pagbutang dayon sa gamay nga bato sa atubangan sa iyang mata. Dayon hangyoa ang tawo sa paghulagway unsay iyang nakita. Basaha ang mosunod nga sambingay, nga gipakigbahin ni Elder Rochard G. Scott samtang siya nag-alagad sa Kapitoan:

“Kon ako mokuha og gamay nga bato ug ibutang dayon sa atubangan sa akong mata, kini naghulagway og dakong bato. Mao kining tanan nga akong nakita. Kini og ingon og makapawala sa paglaum—sama sa mga problema sa hinigugma nga makaapekto sa atong mga kinabuhi sa tanang panahon sa kinabuhi. Kon ang mga butang nga sa tinud-anay inyong nahimo sa pagtabang nahimo na, itugyan ang tanan ngadto sa mga kamot sa Ginoo ug ayaw na kaguol. Ayaw pagbati nga sad-an tungod kay kamo dili na makahimo. Ayaw usik-usiki ang inyong mga kusog sa dili makatabang nga kaguol. Ang Ginoo mokuha sa gamay nga bato nga miali sa inyong panan-aw ug isalikway kini taliwala sa mga hagit nga inyong giatubang sa inyong mahangturong kauswagan. Dayon kini makita sa husto nga panan-aw. Sa naglakaw nga panahon kamo mobati sa mga impresyon ug masayud unsaon sa paghatag sa dugang tabang. Inyong makaplagan ang dugang nga kalinaw kalipay ug dili mopasagad sa ubang nanginahanglan kaninyo, ug makahatag og daghan pang tabang tungod sa nianang mahangturong panan-aw” (sa Conference Report, Apr. 1988, 70; o Ensign, May 1988, 60).

Sa unsa nga paagi nga ang mga ginikanan makakita sa makanunayong paghigugma sa anak nga lalaki o babaye kinsa nahisalaag? Sa unsa nga paagi sila makapakita sa sama nga paghigugma nga dili mobaliwala sa mga buhat sa anak nga lalaki o babaye?

Basaha ang Lucas 15:11–32 uban sa mga sumasalmot. Ipasabut nga kining tudling sa kasagaran gitawag og pasumbingay, mahitungod sa usikan nga anak. Bisan pa niana, mahimo usab nga tawgon nga sambingay sa mahigugmaong amahan.

Unsa ang atong makat-unan gikan niining sambingay mahitungod sa unsa nga paagi ang paghigugma sa mga ginikanan makaimpluwensya sa nahisalaag nga mga anak?

Samtang nag-aagad isip Unang Magtatambag sa Unang Kapangulohan, si Presidente Gordon B. Hinckley mitudlo:

“Pinaagi sa kasaysayan sa mga kaliwatan sa tawo, ang mga buhat sa masinupakon nga mga anak napuno sa kasubo ug sa kasakit, apan bisan pa kon adunay pagsukol, ang lig-ong mga pisi sa kinabuhi sa banay makaabut sa pagliyok ngadto sa usa ka masukulon.

“Ako nakahibalo nga walay labaw pa nga talagsaong sugilanon sa tibuok literatura kay sa gisaysay sa Ginoo nga gitala sa ikanapulog lima nga kapitulo sa Lucas. Kini nga sugilanon sa mapugsanon ug hakog nga anak nga lalaki kinsa nangayo sa iyang kabilin, nga iyang giwaldas hangtud walay nahibilin. Mahinulsulon, siya mipauli ngadto sa iyang amahan, apan samtang didto pa siya sa layo, nakita siya sa iyang amahan ug kini giabut ug kalooy, ug midagan ug migakos kaniya ug gihagkan siya” (sa Conference Report, Apr. 1991, 95; o Ensign, May 1991, 72).

Panapos

Hatagi og gibug-aton ang pagkamahinungdanon sa paggiya sa mga anak kon sila mohimo sa mga desisyon ug dayon motugot kanila sa pagkat-on gikan sa mga sangputanan sa ilang mga buhat. Pahinumdumi ang mga sumasalmot nga ang Ginoo mopanalangin sa mga ginikanan ingon nga sila mopadayon sa paghigugma ug pagbuhat uban sa ilang mga anak. Dayon basaha ang mosunod nga pamahayag nga gihimo ni Obispo Robert D. Hales samtang siya nag-alagad isip Tigdumalang Obispo:

Sa pagkatinuod ang mga ginikanan makahimo og mga sayop nga pamaagi sa ilang pagkaginikanan, apan pinaagi sa pagkamapainubsanon, hugot nga pagtuo, pag-ampo, ug pagtuon, ang matag tawo makakat-on sa maayo pa nga paagi ug sa ingon nga buhat mapanalanginan ang mga kinabuhi sa mga sakop sa banay karon ug sa pagtudlo sa hustong mga tradisyon alang sa mga kaliwatan nga mosunod” (sa Conference Report, Oct. 1993, 10-11; o Ensign, Nov. 1993, 10).

Kon giaghat sa Espiritu pagpamatuod sa mga baruganan nga gihisgutan sa panahon sa leksyon.

Basaha ang mga pahina 64–67 diha sa Giya sa Pagtuon sa Sumasalmot sa mga Relasyon sa Kaminyoon ug sa Banay. Awhaga ang mga sumasalmot nga tun-an pag-usab ang mga doktrina ug mga baruganan niining leksyon pinaagi sa (1) pagsunod bisan usa sa gisugyot sa “Mga Ideya alang sa Paggamit” ug (2) pagbasa sa artikulo “Sama sa Siga nga Dili Mapalong,” ni Elder M Russell Ballard. Itudlo nga ang minyo nga mga magtiayon makadawat sa mahinungdanong mga kaayohan gikan sa pagbasa ug paghisgot pagdungan sa mga artikulo sa giya sa pagtuon.