Leksyon 16

Ang Pag-ampo sa Banay, Pagtuon sa Kasulatan sa Banay, ug Gabii sa Banay

Katuyoan

Aron sa pag-awhag sa mga banay sa paghimo sa makanunayong pag-ampo sa banay, pagtuon sa kasulatan sa banay ug gabii sa banay ug sa pagtudlo sa ebanghelyo sa matag usa niining mga kahimtang.

Pagpangandam

Paghunahuna og mga paagi nga ikaw makagamit sa mga baruganan ubos sa “Imong mga Kapangakohan isip Magtutudlo” (mga pahina x-xiii niining manwal).
Palandonga ang mga doktrina ug mga baruganan nga gilatid sa tataw nga mga ulohan sa leksyon. Sa tibuok semana, hunahunaa ang mga paagi sa pagtudlo niining mga doktrina ug mga baruganan. Tinguhaa ang giya sa Espiritu sa paghukom unsa ang kinahanglan nga imong hatagan og gibug-aton sa pagtubag sa mga panginahanglan sa mga sumasalmot.
Kon ang mosunod nga mga materyal anaa, pagdala og pipila o sa tanan niini sa klase. Pag-andam sa pagpakita niini samtang ikaw maghisgot sa gabii sa banay.
1. Mga kasulatan.
2. Fanily Home Evening Resource Book (31100).
3. Sumbanan nga Basahon sa Banay.
4. Family Home Evening Video Supplement (53276) ug Family Home Evening Video Supplement 2 (53277).
5. Mga Baruganan sa Ebanghelyo (31110).
6. Mga Magasin sa Simbahan.
7. Our Heritage: A Brief History of The Church of Jesus Christ of Latter-day Saints (35448).
8. Mga Manwal sa Melchizedek nga Pagkapari ug Kapunongan sa Kahupayan.
9. Mga giya sa pagtuon sa sakop sa klase alang sa mga tun-anan sa Doktrina sa Ebanghelyo.
10. For the Strength of Youth (34255)
11. Hinimo sa Simbahan nga mga Istorya sa Kasulatan sama sa Mga Istorya sa Basahon ni Mormon (34730).
12. Mga Hulagway sa Ebanghelyo (34730).
Kon ikaw mogamit sa pagbansay sa pagtuon pag-usab sa 100, pagdala nganha sa klase og piraso sa papel ug ballpen o lapis alang sa matag sumasalmot.

Gisugyot nga Kalamboan sa Leksyon

Ang pag-ampo sa banay ug pagtuon sa kasulatan ug gabii sa banay kinahanglan maoy mag-una nga mga prayoridad sa matag banay sa mga Santos sa Ulahing mga Adlaw.

Ipasabut nga niadtong Pebrero 1999 ang Unang Kapangulohan mipadala og sulat ngadto sa mga sakop sa Simbahan sa tibuok kalibutan. Ang sulat naglakip sa mosunod nga pahimangno:

“Kami motabang sa mga ginikanan ug mga anak nga mohatag og labing mahinungdanong og labing mahinungdanong pagtagad ngadto sa pag-ampo sa banay gabii sa banay, pagtuon ug pahimangno sa ebanghelyo, ug maayong mga kalihokan sa banay. Bisan unsa pa ka angay ug tukma ang ubang mga kinahanglanon o mga kalihokan, gikinahanglan gayud nga dili itugot nga pulihan ang balaanong-gitakda nga mga katungdanan nga ang mga ginikanan ug mga banay lamang ang makahimo sa husto nga paagi” (Sulat sa Unang Kapangulohan, Peb. 11, 1999).

Ngano nga kini nga mga tambag labing mahinugdanon karon?

Ipasabut nga kining leksyon naghisgot unsay makahimo sa mga ginikanan sa paghimo sa inadlaw nga pag-ampo ug pagtuon sa kasulatan ug senemana nga mga gabii sa banay.

Ang mga banay makadawat og mahinungdanong mga panalangin kon sila maghiusa sa pag-ampo.

Basaha ang 3 Nephi 18:21 uban sa mga sumasalmot. Dayon ipakigabahin ang mosunod nga tambag gikan ni Presidente Gordon B. Hinckley, ang ika-15 nga Preisdente sa Simbahan:

“Himoa nga ang matag banay niini nga Simbahan nga magkahiusa sa pag-ampo. Karon, mahinungdanon ang paghimo og tinagsa nga pag-ampo, apan usa ka talagsaong butang sa paghimo og pag-ampo sa banay. Mag-ampo ngadto sa inyong Amahan sa Langit sa hugot nga pagtuo. Mag-ampo sa ngalan sa Ginoong Jesukristo. Kamo walay labaw pa nga maayong mahimo alang sa inyong mga anak kay sa pagbanosbanos kanila diha sa pag-ampo sa banay, pagpahayag og pasalamat alang sa ilang mga panalangin. Kon sila mohimo niana samtang sila batan-on pa, sila motubo uban sa espiritu sa pagpasalamat, sa malipayon nga mga kasingkasing” (“Inspirational Thoughts,” Ensign, Aug. 1997, 5).

Unsay mahimo sa mga banay sa paghimo og kinaiya sa inadlaw nga pag-ampo sa banay? Unsa nga mga hagit ang inyong gisagubang sa paghimo og inadlaw nga pag-ampo sa banay, ug unsa ang inyong gibuhat sa pagsulbad niini?
Unsa ang mahimo sa mga banay sa paghimo og pag-ampo sa banay usa ka makahuluganon nga panahon alang kanila? (Agi og dugang sa mga tubag sa mga sumasalmot, ipakigbahin ang pipila o tanan nga mosunod nga mga sugyot.)
1. Ang mga ginikanan makagahin og panahon sa dili pa magsugod ang pag-ampo sa pagpangutana kon adunay bisan unsa nga butang diin ang banay kinahanglan nga magpasalamat sa Langitnong Amahan o kon adunay bisanunsang mga kabalaka nga kinahanglan nga ilang hinumduman diha sa ilang pag-ampo.
2. Ang mga ginikanan makasiguro nga ang mga anak sa kasagaran gihatagan sa kahigayunan sa paghatag sa pag-ampo sa banay.
3. Ang banay mahimong mahinumduman sa pag-ampo alang sa mga pangulo sa Simbahan, mga misyonaryo, ug mga sakop sa banay kinsa nanginahanglan og talagsaon nga mga panalangin.
4. Ang mga ginikanan makagamit sa ilang mga pag-ampo nga panahon sa pagtudlo. Sama pananglit, ang ilang mga pagpahayag sa pagpasalamat makaawhag og managsama nga mga pagbati sa ilang mga anak.
5. Ang mga ginikanan makahisgot sa mga ngalan sa ilang mga anak matag usa diha sa ilang mga pag-ampo, nagtabang sa mga anak nga mobati sa gugma sa ilang Langitnong Amahan ug sa ilang yutan-ong mga ginikanan alang kanila.
Unsa nga mga panalangin ang inyong nadawat ug sa inyong banay tungod sa pag-ampo sa banay?

Ang pagtuon sa kasulatan sa banay makatabang sa mga banay nga maduol ngadto sa Dios.

Isulat ang mosunod nga mga hugpong sa mga pulong diha sa pisara o basaha kini sa kusog.

Nagkadugang nga balaang pagtahud
Nagkadugang nga pagtahud ug pagkamahunahunaon
Wala kaayo ang panagbingkil
Ang kahanas sa pagtambag sa mga anak sa dakong paghigugma ug kaalam
Labaw nga mauyunon sa tambag sa mga ginikanan
Nagkadugang nga pagkamatarung
Tugob sa hugot nga pagtuo, paglaum, ug gugma nga putli
Kalinaw, hingpit nga kalipay, ug kamaya

Hangyoa ang mga sumasalmot sa pagpalandong sa mosunod nga pangutana sa walay pagtubag og kusog:

Unsa ang inyong mahimo sa pagdala mining mga panalangin sa labaw ka tugob nganha sa inyong panimalay?

Ipasabut nga si Presidente Marion G. Romney sa Unang Kapangulohan mipamatuod nga kining mga panalangin moabut sa labaw nga katugob nga paagi ngadto sa atong mga panimalay kon kita magtuon sa mga kasulatan, ilabi na sa Basahon ni Mormon:

“Ako mobati sa tinuod nga kon, sa atong mga panimalay, ang mga ginikanan mobasa gikan sa Basahon ni Mormon sa mainampoong paagi ug makanunayon, sa ilang mga kaugalingon ug uban sa ilang mga anak, ang espiritu nianang mahinungdanong basahon moabut sa atong mga panimalay ug sa tanan nga nagpuyo diha. Ang espiritu sa balaang pagtahud ug konsiderasyon alang sa matag usa motubo. Ang espiritu sa panagbingkil mawala. Ang mga ginikanan motambag sa ilang mga anak sa dakong paghigugma ug kaalam. Ang mga anak labaw nga mauyunon ug manunuton sa tambag sa ilang mga ginikanan. Ang pagkamatarung molambo. Ang hugot nga pagtuo, paglaum, ug gugma nga putli ang tiunay nga gugma ni Kristo—anaa sa atong mga panimalay ug mga kinabuhi, naghatag sa ilang pagmata sa kalinaw, hingpit nga kalipay ug kamaya” (sa Conference Report. Apr. 1980, 90; o Ensign, May 1980, 67).

Naghisgot ngadto sa mga saad ni Preisdente Romney, si Presidente Ezra Taft Benson, ang ika-13 nga Presidente sa Simbahan, miingon: “Kini nga mga saad— magkadugang nga gugma ug panag-uyon diha sa panimalay, dako nga pagtahud tali sa usa ka ginikanan ug anak, nagkadugang nga pagkaespirituhanon ug pagkamatarung—dili bugnaw nga mga saad, apan unsa gayud ang gipasabut ni Propeta Joseph Smith sa diha nga siya miingon nga ang Basahon ni Mormon makatabang kanato nga mahiduol ngadto sa Dios” (sa Conference Report, Oct. 1986, 6; o Ensign, Nov. 1986, 7).

Dapita ang mga sumasalamot sa pagsaysay mahitungod sa mga panalangin nga moabut sa ilang mga banay pinaagi sa pagtuon sa kasulatan sa banay.

Unsay gibuhat sa paghimo sa pagtuon sa kasulatan sa banay nga malampuson? Unsa ang mga hagit nga inyong gisagubang, ug unsa ang inyong gibuhat sa pagsulbad, ug unsa ang inyong gibuhat sa pagsulbad niini? (Agi og dugang sa mga tubag sa mga sumasalmot ipakigbahin ang pipila o tanan sa mosunod nga mga sugyot.)
1. Magtambayayong sa paghatag og panahon sa pagtuon sa mga kasulatan isip banay sa matag adlaw. Kini sa kasagaran mao ang labing lisud nga bahin sa pagtuon sa kasulatan sa banay. Bisan pa niana, ang mga banay makapangayo sa giya sa Espiritu samtang sila motino unsa ang labing maayo sa ilang mga kahimtang.
2. Paghunahuna sa paghimo og pipila ka gidugayon sa panahon o piho nga gidaghanon sa mga bersikulo, mga kapitulo, o mga pahina nga basahon sa matag adlaw.
3. Kon mahimo, tan-awa ang mga matag sakop sa banay aduna niining hugpong sa mga kasulatan. Bisan ang mga bata nga dili pa makabasa matabangan gikan sa pagbaton sa ilang kaugalingong mga kasulatan. Ang mga ginikanan makahatag og mga kasulatan sa ilang mga anak diha sa mga bunyag, mga adlaw sa natawhan, o uban pang espesyal nga mga okasyon o ang mga anak makakita og salapi sa pagpalit sa ilang kaugalingon mga kasulatan.
4. Pagpulipuli sa pagbasa, pagtabang sa batan-on pa nga mga anak kon gikinahanglan. Human sa pagbasa sa tudling pag-usab unsay nabasa na ug gisaysay kini sa paagi nga ang batan-ong mga anak makasabut.
5. Himoa nga ang mga batan-ong mga anak modibuho sa mga hulagway sa mga sugilanon. Pananglitan, usa ka banay makahimo og usa ka hulagway nga naglarawan sa talan-awon ni Lehi sa kahoy sa kinabuhi.
6. Pagsag-ulo pagdungan sa kinaham nga mga bersikulo.
7. Basaha ang mga kasulatan nga nagsaysay sa espesyal nga mga hitabo sama sa Pasko sa Pagkabanhaw, Pasko, bunyag, pag-orden sa pagkapari, o pagpahinungod sa templo.
8. Pagsiksik og tinuyo nga hilisgutan sa ebanghelyo nga magkahiusa.
9. Paghimo og kwaderno sa banay alang sa pagtala og mga pangutana, mga tumong, o panghunahuna nga may kalabutan uban sa pagbasa sa kasulatan.

Itudlo nga kon mahimong malisud nga magkapundok ang banay nga maghiusa alang sa pagtuon sa kasulatan, ang mga ginikanan kinahanglan mahinumdom nga ang ilang mga paningkamot mahimong adunay labaw nga malungtarong epekto kay sa ilang mahunahunaan. Si Sister Susan L. Warner, kinsa nakaalagad ingon nga ikaduhang magtatambag sa kinatibuk-ang kapangulohan sa Primarya, miingon:

“Sa unsa nga banay kami misulay sa paghimo og sayo sa buntag nga pagtuon sa kasulatan. Apan kami sa makadaghan napakyas samtang ang usa ka anak nga lalaki mireklamo ug gikinahanglan nga pukawon. Sa katapusan siya miabut, siya buot nga sa matag higayon ibutang ang iyang ulo sa lamesa. Paglabay sa mga katuigan, samtang nag-alagad sa iyang misyon, siya misulat sa panimalay: Salamat kaninyo sa patudlo kanako sa mga kasulatan. Ako buot nga kamo mahibalo nga sa tanan niadtong mga panahon ako milihok sama nga ako nakatulog, ako sa pagkatinuod nagpaminaw uban sa akong mga mata nga gipiyong’ ”(sa Conference Report, Apr. 1996, 109; o Ensign, May 1996, 79).

Ang gabii sa banay makatabang sa mga banay sa pagpanalipod sa ilang mga kaugalingon batok sa kalibutanong mga impluwensya.

Ipasabut nga niadtong 1915, si Presidente Joseph F. Smith ug ang iyang mga magtatambag sa Unang Kapangulohan mitudlo sa mga ginikanan sa pagsugod sa paghimo og makanunayong “Gabii sa Banay.” Kini mao ang panahon alang sa mga ginikanan sa pagtudlo sa ilang mga banay sa mga baruganan sa ebanghelyo. Ang Unang Kapangulohan misulat: “Kon ang mga Santos motuman niining tambag, kami mosaad nga mahinungdanong mga panalangin mosangpot. Ang paghigugma diha sa panimalay ug ang pagkamasulundon sa mga ginikanan molambo. Ang hugot nga pagtuo mapalambo sa mga kasingkasing sa mga batan-on sa Israel, ug sila modawat og gahum sa pagpakig-away sa dautang impluwensya ug mga tintasyon nga naglibot kanila” (sa James R. Clark, comp., Messages of the First Presidency of the Church of Jesus Christ of Latter-Day Saints, 6 volumes [1965-75], 4:339).

Si Presidente Gordon B. Hinckley mihisgot sa unsa nga paagi nga ang iyang mga ginikanan misunod sa tambag ni Presidente Smith:

“Niadtong 1915 si Presidente Joseph F. Smith mihangyo sa mga katawhan sa Simbahan sa pahimo og gabii sa banay. Ang akong amahan miingon nga kami kinahanglan mohimo sa ingon, ug busa kami kinahanglan nga moandam sa lawak-dawatan diin ang dako nga piyano ni Mama mahimutang ug mohimo unsa ang gisugo sa Presidente sa Simbahan.

“Kami dili kaayo mga maayo nga mga tigpasundayag ingon nga mga anak. Kami magkahiusa sa paghimo sa tanang mga matang sa mga butang samtang magdula, apan sa usa kanamo nga mosulay sa pag-awit og solo sa atubangan sa uban sama sa pagpangayo og sorbete nga nagpabilin nga gahi diha sa lung-agan sa kusina. Sa sinugdanan, kami buot mokatawa ug mohimo og gamay nga mga sulti kalabut sa pasundayag sa usag usa. Apang ang among mga ginikanan mipadayon. Kami miawit nga nagkahiusa. Kami miampo nga nagkahiusa. Kami naminaw nga walay timik samtang si Mama nagbasa sa Biblia ug sa mga sugilanon sa Basahon ni Mormon. Si Papa misaysay kanamo sa mga sugilanon gikan sa iyang panumduman… .

“Gikan niadtong yanong gagmay nga mga tigum, nga gihimo sa lawak-dawatanan sa among karaan nga panimalay miabut ang usa ka butang nga dili mahulagway ug talagsaon. Ang among paghigugma alang sa among mga ginikanan nalig-on. Ang paghigugma alang sa igsoong mga lalaki ug igsoong mga babaye nadugangan. Ang among pahigugma alang sa Ginoo milambo. Ang pagtamud alang sa yano nga pagkamaayo mitubo sa among mga kasingkasing. Kining talagsaong mga butang nahitabo tungod sa tambag sa Presidente sa Simbahan. Akong nakat-unan ang usa ka butang nga hilabihang makahuluganon tungod niana” (Teachings of Gordon B. Hinckley [1997], 211-12).

Ipasabut nga matag Presidente sa Simbahan sukad ni Presidente Joseph F. Smith mihatag og gibug-aton sa kamahinungdanon sa gabii sa banay. Karong adlawa ang Unang Kapangulohan mitambag sa mga banay sa paghimo sa gabii sa banay matag gabii sa Lunes.

Itudlo nga ang gabii sa banay kinahanglan kanunay nga maglakip sa pag-ampo sa banay ug leksyon nga mahimong itudlo sa usa ka ginikanan o usa sa mga anak. Ang mga ginikanan makatabang sa batan-ong mga anak sa pag-andam ug sa pagtudlo sa mga leksyon.

Ipasabut nga ang Simbahan nakahimo og mga materyal nga makatabang sa mga banay sa pagdumala og malampusong mga gabii sa banay. Ipakita ang mga materyal nga gihimo sa Simbahan nga imong gidala sa klase (tan-awa sa “Pagpangandam” aytem 3).

Agi og dugang sa pag-ampo ug sa leksyon, unsa ang uban pang mga kalihokan nga mahimo sa mga banay nga iapil sa mga gabii? (Ang mga tubag mahimong maglakip sa pagdula og mga dula, pagbasa sa mga kasulatan, pag-awit og mga himno o mga awit, paghimo og mga konseho sa banay, ug pagpangaon
Sa unsa nga paagi nga ang mga ginikanan makagamit sa gabii sa banay sa pagtabang pagtubag sa mga panginahanglan sa ilang banay? (Agi og dugang sa paghangyo sa mga ideya sa mga sumasalmot, ipakigbahin ang mosunod nga panig-ingnan.)

Usa ka amahan mihimo og mga leksyon sa gabii sa banay pinaagi sa pagsulti sa tinagsa nga paagi sa iyang mga anak. Samtang siya makigsulti sa iyang mga anak, siya buot mangutana kanunay og mga pangutana mahitungod sa piho nga mga bahin sa kabalaka, sama sa “Unsa ang ikasulti sa batang mga lalaki sa tulunghaan bahin sa batang mga babaye? Adunay bay bisan kinsa nga naghisgot mahitungod sa gidili nga mga drugas? Ang mga tubag sa mga anak nakatabang kaniya nga makaamgo unsa ang ilang kinahanglan nga makat-unan ug hisgutan. Siya ug ang iyang asawa maghiusa sa paglingkod ug magplano sa mga leksyon nga gibase niadtong mga panginahanglan. Ang mga anak malingaw sa pagpakigbahin sa ilang mga ideya ug makaandam sa pag-atubang sa mga sitwasyon sa tinuod nga kinabuhi.
Unsa ang mahimo nga buhaton sa mga ginikanan sa pa-awhag sa matag sakop sa banay sa pag-apil sa gabii sa banay?
Unsa ang mga panalangin nga modangat ngadto sa imong banay isip sangputanan sa paghimo og gabii sa banay?

Panapos

Hatagi og gibug-aton nga ang inadlaw nga pag-ampo sa banay ug pagtuon sa kasultan ug senemana nga gabii sa banay makapalig-on sa mga relasyon sa banay makapanalipod sa mga pagpamatuod sa mga sakop sa banay sa pag-atubang sa mga hagit sa kinabuhi.

Ingon nga giaghat sa Espiritu, ipahayag ang imong paghigugma alang sa imong banay ug ipamatuod ang mga kamatuoran nga gihisgutan sa panahon niini nga leksyon ug sa tibuok tun-anan.

Basaha ang mga pahina 78–79 diha sa Giya sa pagtuon sa Sumasalmot sa mga Relasyon sa Kaminyoon ug sa Banay. Awhaga ang mga sumasalmot nga tun-an pag-usab ang mga doktrina ug mga baruganan niining leksyon pinaagi sa (1) pagsunod bisan usa sa mga gisugyot sa “Mga Ideya alang sa Paggamit“ ug (2) pagabasa sa mga artikulo “Ang mga Panalangin sa Pag-ampo sa Banay,” ni Presidente Gordon B. Hinckley, ug “Busa Ako Gitudloan” ni Elder L. torn Perry. Itudlo nga ang minyo nga mga magtiayon makadawat og mahinungdanong mga kaayohan gikan sa pagbasa ug paghisgot pagdungan sa mga artikulo diha sa giya sa pagtuon.

Dugang Kapanguhaan nga Materyal

Pag-apil sa maayo nga makalingaw nga mga kalihokan isip usa ka banay

Ipasabut nga agi og dugang sa pag-ampo sa banay, pagtuon sa kasulatan sa banay, ug gabii sa banay, maayo nga makalingaw nga mga kalihokan makatabang sa mga banay sa pag-ugmad og lig-on nga mga talikala sa gugma ug panaghiusa. Ang mga ginikanan kinahanglan nga moplano og mga panahon kanus-a ang ilang banay makaapil nga mag-uban sa sama nga mga kalihokan. Si Preisdente Ezra Taft Benson mitambag: paghimo og mga tradisyon sa mga pagbakasyon ug mga pagbiyahe ug mga lulinghayaw. Kining mga handumanan dili gayud hikalimtan sa inyong mga anak” (sa Conference Report, Oct. 1987, 63; 0 Ensign, Nov. 1987, 51).

Unsay mga kaayohan sa pag-apil sa makalingaw nga mga kalihokan isip banay?

Hunahunaa ang pagpakigbahin sa mosunod nga mga sugyot o pipila sa imong kaugalingon aron adunay panaghisgutan:
1. Ang mga sakop sa banay kinsa nakatagamtam sa mga kalihokan nga mag-uban makapalambo og dako pa nga paghigugma ug panag-uyon.
2. Sila malingaw nga mag-uban ug mohimo og mga relasyon nga molungtad sa ilang tibuok mga kinabuhi.
3. Ang mga anak makatagamtam sa panahon uban sa ilang mga ginikanan ug labaw nga makaandam sa pagpaminaw ug pagsunod sa tambag sa ilang mga ginikanan.
Unsa nga mga handumanan nga inyong nahinumduman sa mga kalihokan sa banay sa panahon nga kamo bata pa? Sa unsa nga paagi nga kining mga kalihokan nakaimpluwensya sa inyong kinabuhi?

Dapita ang mga sumasalmot sa pagpakigbahin og mga ideya alang sa kahigayunan, makapaikag, ug halandumong mga kalihokan sa banay nga gamay o walay gasto.

Tun-i pag-usab ang mga leksyon sa bahin B sa tun-anan sa Mga Relasyon sa Kaminyon ug sa Banay

Kini nga leksyon nagtapos sa bahin B sa tun-anan sa Mga Relasyon sa Kaminyoon ug sa Banay. Kon kamo nagtudlo sa tibuok nga tun-anan, paghunahuna sa paggamit sa mosunod nga pagbansay:

Hatagi ang matag sumasalmot og piraso sa papel ug ballpen o lapis. Hangyoa ang mga sumasalmot sa paggahin og tulo ka minuto sa paglista sa mga doktrina ug mga baruganan nga ilang mahinimduman gikan sa mga leksyon 9 hangtud sa 16 niining tun-anan. Himoa nga ilang linyahan sa ubos ang mga doktrina ug mga baruganan nga hilabihang makahuluganon nganha kanila. Awhaga sila nga mangandam sa paghisgot mahitungod sa pipila sa mga aytem nga ilang gilinyahan. Kon sila nanginahanglan og tabang gamita ang talaan sa mga sulod sa mga pahina iii-iv niini nga manwal o sa kinatibuk-ang pagpasabut sa tun-anan sa mga pahina iii-iv diha sa Giya sa Pagtuon sa Sumasalmot sa mga Relasyon sa Kaminyoon ug sa Banay.

Human sa tulo ka mga minuto, hangyoa ang matag sumasalmot sa pagbasa gikan sa ilang listahan ug ipasabut ngano nga kini mahinungdanon. Itingob ang mga panabut sa mga sumasalmot sa pisara, ug dawata ang kamahinungdanon sa matag komentaryo. Dayon ipakigbahin ang imong kinaugalingong panabut. Samtang kon aduna pay panahon, balika kini nga pagbansay.

Ipahayag ang imong pasalamat niadtong inyong natudloan alang sa ilang pag-apil niining tun-anan, ug awhaga sila sa pagpadayon sa pagpuyo sumala sa mga doktrina ug mga baruganan nga ilang gihisgutan sa tibuok tun-anan. Awhaga usab sila nga mobasa sa “Ang Banay: Usa ka Pamahayag ngadto sa Kalibutan” sa matag karon ug unya uban sa ilang mga banay ug mosunod sa iyang tambag diha sa ilang mga panimalay.