Leksyon 2

Pagpalambo sa Panaghiusa diha sa Kaminyoon

Katuyoan

Pagtabang sa minyo nga mga magtiayon aron mas molig-on ang panaghiusa ug pagtabang sa mga sakop nga dili minyo sa pag-andam sa pagtagamtam sa panaghiusa sa kaminyoon.

Pagpangandam

Samtang ikaw mangandam sa imong kaugalingon sa pagtudlo, pangita og mga paagi sa pagsunod sa mga baruganan ubos sa “Imong mga Kapangakohan isip Magtutudlo” (pahina x-xiii niini nga manwal).
Basaha ang tataw nga mga ulohan sa leksyon. Kining mga ulohan makahatag og kinatibuk-ang pagpasabut sa mga doktrina ug mga baruganan diha sa leksyon. Isip bahin sa imong pagpangandam, pamalandong og mga paagi nga makatabang sa mga sumasalmot nga makagamit niining mga doktrina ug mga baruganan. Tinguhaa ang giya sa Espiritu sa paghukom unsa ang kinahanglan nga imong hatagan og gibug-aton sa pagtubag sa mga panginahanglan sa mga sumasalmot.
Pagdala nganha sa klase og usa ka piraso nga papel ug ballpen o lapis alang sa matag sumasalmot.

Gisugyot nga Kalamboan sa Leksyon

Ang Ginoo nagmando sa mga bana ug mga asawa sa paghiusa.

Sa pagsugod sa leksyon, isulat diha sa pisara ang 1+1=1.

Sa unsang paagi nga kini naghulagway sa relasyon sa kaminyoon?

Human ang mga sumasalmot makahisgut niining pangutana, basaha ang Genesis 2:24 uban kanila. Ipasabot og maayo nga ang Dios nagsugo sa mga bana ug mga asawa sa paghiusa.

Unsa ang gipasabot alang sa usa ka bana ug asawa nga maghiusa?

Ipabasa sa mga sumasalmot ang mosunod nga pamahayag ni Elder Henry B. Eyring sa Korum sa Napulog Duha ka mga Apostoles (sa pahina 8 diha sa Giya sa Pagtuon sa Sumasalmot sa Mga Relasyon sa Kaminyoon ug sa Banay).

“Sa paglalang sa lalaki ug sa babaye, ang paghiusa kanila sa kaminyoon wala ihatag isip paglaum; kini usa ka sugo! ‘Tungod niini, ang lalaki magabiya sa iyang amahan ug sa iyang inahan, ug moipon siya sa iyang asawa, ug sila mahimong usa ka unod’ (Genesis 2:24). Ang atong Langitnong Amahan buot nga ang atong mga kasingkasing magkahiusa. Kana nga panag-ipon sa gugma dili yano nga usa ka sumbanan lamang. Kini usa ka panginahanglan” (sa Conference Report, Apr. 1998, 85; o Ensign, May 1988, 66).

Ipasabut nga kini nga leksyon naghisgot og pipila ka mga paagi diin ang mga bana ug mga asawa mahimong mahiusa.

Ang mga bana ug mga asawa kinahanglan nga magminahalay sa usag usa isip magkatimbang nga managkauban.

Ipasabut nga usa ka mahinungdanong baruganan sa panaghiusa sa kaminyoon mao nga ang mga bana ug asawa kinahanglan nga magmahal sa usag usa isip magkatimbang nga managkauban. Samtang nag-alagad isip Unang Magtatambag diha sa Unang Kapangulohan, si Presidente Gordon B. Hinckley miingon:

“Ang kaminyoon, sa tinuod nga pagsabot, maoy usa ka panag-uban sa mga managsama , nga wala sa duha ang mopakita og pagdominar sa usa, apan, hinoon, nga ang matag usa moawhag ug motabang sa bisan unsa nga mga kapangakohan ug mga pangandoy nga anaa sa usa o kaniya” (“I Believe,” Ensign, Aug. 1992, 6).

Nganong kinahanglanon man nga ang mga bana ug mga asawa mohatag og bili sa usag usa isip magkatimbang nga managkauban aron mahiusa?
Unsa ang pipila ka mga kinaiya o batasan nga makapahimo sa mga bana ug mga asawa nga magkahiusa sa panag-uban sa ilang kaminyoon? Unsa ang buhaton sa mga bana o mga asawa aron makabuntog sa ingon niana nga mga hagit?

Si Elder Boyd K. Packer sa Korum sa Napulog Duha ka mga Apostoles mitudlo:

“Kini wala magpasabut nga ang babaye igo lang nga mopahiuyon sa iyang kaugalingon ngadto sa mga katungdanan sa pagkapari sa iyang bana o sa iyang anak nga mga lalaki. Siya sa dayag kinahanglan mopaluyo ug moabag ug moawhag kanila.

“Ang mga naghupot sa pagkapari, sa laing bahin, kinahanglan gayud mopahiuyon sa ilang mga kaugalingon ngadto sa mga panginahanglan ug mga kapangakohan sa asawa ug inahan. Ang iyang [sa asawa] pisikal ug emosyonal ug intelekwtal ug kultural nga kaayohan ug iyang espirituhanong kalamboan kinahanglan gayud maoy una taliwala sa [ilang] mga katungdanan sa pagkapari.

“Walay buluhaton, bisan unsa ka gamay, nga may kalabutan sa pag-alima sa mga batang masuso, ang pagmatuto sa mga anak, o diha sa pag-atiman sa panimalay nga dili katimbang nga obligasyon sa [usa ka bana]” (“A Tribute to Woman,” July 1959, 75).

Si Elder Richard G. Scott sa Korum sa Napulog Duha ka mga Apostoles mitambag sa mga naghupot sa pagkapari: Sama sa usa ka bana ug takus nga pagkapari, kamo maayo gyod nga mosunod sa panig-ingnan sa Maluluwas, kinsang pagkapari inyong gihuptan. Kamo mohimo sa paghatag sa kaugalingon nganha sa asawa ug mga anak nga usa sa unang tumong sa inyong kinabuhi. Sa panagsa ang usa ka tawo mosulay sa pagkontrol sa lakaw sa kinabuhi sa matag sakop sa banay. Siya ang mohimo sa tanan nga mga desisyon. Ang iyang asawa ubos sa pag-alagad sa iyang kapritso. Kon kana mao bay naandan o dili, kana dili na mahinungdanon. Dili kana mao ang paagi sa Ginoo. Kana dili ang paagi sa pagtagad sa usa ka bana nga Santos sa Ulahing Adlaw ngadto sa iyang asawa ug banay” (sa Conference Report, Apr. 1999, 32; o Ensign, May 1999, 26).
Unsa ang pipila ka mga butang nga buhaton sa mga bana ug mga asawa kon sila magmahal sa usag usa isip magkatimbang nga managkauban? (Hunahunaa ang pagtingob sa mga tubag sa mga sumasalmot diha sa pisara. Kon gikinahanglan, ipakigbahin ang mga ideya nga gilista sa ubos ug dapita ang mga sumasalmot sa pagpakigbahin sa ilang mga kasinatian nga may kalabutan nianang mga ideya).
1. Sila magbahinay sa kapangakohan alang sa pagsiguro nga ang banay magdungan sa pag-ampo, maghimo sa gabii sa banay, ug magdungan sa pagtuon sa kasulatan.
2. Sila magtambayayong sa pagplano kon unsaon paggamit ang mga panalapi sa banay.
3. Sila magsabot-sabot ug mag-uyon bahin sa mga lagda sa panimalay ug sa unsa nga paagi nga madisiplina ang mga anak. Ang mga anak makasabot nga ang ilang mga ginikanan nagkahiusa niana nga desisyon.
4. Sila magtambayayong sa pagplano sa mga kalihokan sa banay.
5. Silang duha magtambayayong sa mga kapangakohan sa pag-atiman sa balay.
6. Sila maghiusa sa pagtambong sa Simbahan.

Ang mga bana ug mga asawa kinahanglang motugot nga ang ilang tagsatagsa ka mga kinaiya ug mga kahanas makatabang sa usag usa.

Basaha ang 1 Mga Taga-Corinto 11:11 uban sa mga sumasalmot. Dayon ipakigbahin ang mosunod nga pahayag ni Elder Richard G. Scott:

“Sa laraw sa Ginoo, nagkinahanglan og duha— usa ka lalaki og usa kababaye— ang pag-umol og usa.…Alang sa pinakadakung kalipay ug pagkamasanayon sa kinabuhi, ang bana ug asawa gikinahanglan. Ang ilang mga paningkamot magkatakdo ug gikinahanglan sa usag usa. Ang matag usa may tagsatagsa nga mga kinaiya nga labing maayo sa tahas nga gitino sa Ginoo alang sa kalipay isip usa ka lalaki o babaye. Kon gigamit sumala sa kabubut-on sa Ginoo, kanang mga kasarang motugot sa usa ka minyo nga magtiayon nga maghunahuna, maglihok, ug magmaya isip usa—magtambayayong sa pag-atubang sa mga hagit ug sa pagbuntog niini isip usa, magtubo diha sa gugma ug pagsabut, ug pinaagi sa mga ordinansa sa templo mabugkos nga mag-uban isip usa, hingpit, sa walay katapusan. Kana mao ang laraw” (sa Conference Report, Oct. 1996, 101; o Ensign, Nov. 1996, 73–74).

Sa paghulagway sa baruganan nga gitudlo ni Elder Scott, ihatag ang mosunod nga pagbansay:

Hatagi ang matag sumasalmot og usa ka piraso nga papel ug usa ka ballpen o lapis. Hangyoa ang matag minyo nga sumasalmot sa paglista sa pipila sa iyang mga kinaiya ug mga kahanas ug sa iyang kapikas. Hangyoa ang matag sakop nga dili minyo nga sumasalmot nga maghunahuna sa usa ka minyo nga magtiayon ug ilista ang pipila ka mga kinaiya ug mga kahanas sa bana ug asawa. Human sa pipila ka mga minuto nga makasulat ang mga sumasalmot, ipangutana ang mosunod nga mga pangutana:

Sa unsa nga mga paagi nga ang mga kinaiya ug mga kahanas nga imong gilista makatabang sa minyo nga mga magtiayon aron mahiusa? (Hangyoa ang mga sumasalmot sa pagpakigbahin og piho nga mga panig-ingnan).
Sa unsa nga paagi nga ang mga kalainan nga imong nakita tali sa mga bana ug mga asawa mahimong mga kalig-on diha sa ilang relasyon?

Basaha ang mosunod nga pamahayag ni Sister Marjorie P. Hinckley, asawa ni Presidente Gordon B. Hinckley, mahitungod sa iyang unang tuig sa kaminyoon:

“Kami naghigugmaay sa usag usa; walay pagduhaduha bahin niana, apan kami usab kinahanglang maanad sa usag usa. Ako nagtuo nga ang matag magtiayon kinahanglan nga maanad sa usag usa. Sa sinugdanan ako nakaamgo nga kami manglimbasog nga maanad sa usag usa kay sa kanunay nga mosulay sa pag-usab sa usag usa” (Church News, 26 Sept. 1998, 4).

Sa unsa nga mga paagi nga ang mga sangputanan mahimong lahi kon ang mga magtiayon maningkamot nga “maanad sa usag usa” kay sa “kanunay nga mosulay sa pag-usab sa usag usa”?

Ang mga bana ug mga asawa kinahanglan gayud nga magmaunungon ngadto sa usag usa.

Ipakigbahin ang mosunod nga tambag gikan ni Presidente Gordon B. Hinckley, ang ika-15 nga Presidente sa Simbahan:

“Tinoa nga wala gayuy bisan unsa nga panghitabo tali kaninyo nga makabungkag sa inyong kaminyoon. Himoa kini nga magmalampuson. Tinguhaa nga kini molampos. Adunay daghan kaayong panagbulag; diin ang mga kasingkasing nasakitan ug usahay mga kinabuhi nadaot. Pagsobra ka maunongon sa usag usa.” (“Life’s Obligation,” Ensign, Feb. 1999, 2, 4).

Unsa ang kahulugan sa pulong maunongon nganha kaninyo? (Ang mga tubag mahimong maglakip sa matinud-anon, matinuoron, ug kasaligan diha sa usa ka relasyon.)

Ipasabut nga ang Ginoo naghatag og gibug-aton sa panginahanglan alang sa mga bana ug mga asawa nga magmaunongon sa usag usa. Basaha ang Doktrina ug mga Pakigsaad 42:22 uban sa mga sumasalmot. Itudlo nga kini nga sugo kaparehas nga magamit alang sa mga bana ug mga asawa.

Unsa ang gipasabut sa “higugmaa ang inyong bana o asawa sa inyong tibuok nga kasingkasing ug unong ngadto kaniya ug wala nay lain?

Si Presidente Spencer W. Kimball, ang ika-12 nga Presidente sa Simbahan, mitudlo: “Ang mga pulong wala nay lain nagsalikway sa matag usa ug sa tanang butang. Ang kapikas dayon mahimong pinakalabaw sa kinabuhi sa asawa o bana, ug ni sosyal nga kinabuhi, ni pagpanrabaho nga kinabuhi ni politikanhong kinabuhi ni bisan unsang laing tinguha ni tawo ni butang nga mahimong unahon sa bisan kanus-a ibabaw sa kauban nga kapikas” (Faith Precedes the Miracle [1972], 143).
Sa unsa nga paagi nga ang usa ka tawo makapugong sa mga sosyal, pagpanrabaho, ug mga buluhaton sa Simbahan nga dili makasamok sa pagkamaunongon ngadto sa iyang bana o iyang asawa?
Unsa ang pipila ka piho ka mga paagi diin ang mga magtiayon makapakita og pagkamaunongon sa usag usa? (Kon ang mga sumasalmot adunay kalisud sa pagtubag niini nga pangutana, ipakigbahin ang pipila ka mga panig-ingnan, sama nianang gilista sa ubos.)
1. Ang usa ka bana maka-iskedyul pag-usab sa buluhaton, kalingawan, o ubang mga atubangunon aron sa pagsaulog sa adlaw nga natawhan sa iyang asawa.
2. Ang usa ka asawa makaampo sa matag adlaw alang sa kalampusan sa iyang bana diha sa iyang mga kalihokan.
3. Sila makapaminaw sa usag usa, bisan kon ang paghimo sa ingon tingali dili masayon.
4. Sila makasultihanay sa mahigugmaon nga paagi ug magmatinahuron sa usag usa diha sa mga panagsultihanay uban sa mga sakop sa bana ug mga higala.

Panapos

Ipasabot og maayo nga ang Ginoo ug ang Iyang mga propeta nagsugo sa mga bana ug asawa nga maghiusa sa gugma ug magtambayayong sa pagbuhat isip imagkatimbang nga managkauban. Ang mga bana ug mga asawa makapakita sa ilang pagkamaunongon sa usag usa sa matag adlaw pinaagi sa ilang mga hunahuna, mga pulong, ug mga buhat.

Sigon sa pag-aghat sa Espiritu, pagpamatuod sa mga kamatuoran nga gihisgutan sa panahon sa leksyon.

Tan-awa sa pahina 8–11 diha sa Giya sa Pagtuon sa Sumasalmot sa Mga Relasyon sa Kaminyoon ug sa Banay. Awhaga ang mga sumasalmot nga tun-an pag-usab ang mga doktrina ug mga baruganan niini nga leksyon pinaagi sa (1) pagsunod bisan og usa sa mga sugyot sa “Mga Ideya alang sa Paggamit” ug (2) sa pagbasa sa artikulo “Nga Kita Mahimong Usa” ni Elder Henry B. Eyring. Itudlo nga ang minyo nga mga magtiayon makadawat og mahinungdanong mga kaayohan gikan sa pagbasa ug sa paghisgot pagdungan sa mga artikulo diha sa giya sa pagtuon. Pahinumdumi ang mga sumasalmot sa pagdala sa ilang mga giya sa pagtuon nganha sa klase alang sa sunod nga leksyon.