LEKSYON 13

Itudlo ang mga Baruganan sa Ebanghelyo Ngadto sa mga Anak

Bahin 1

Katuyoan

Pagtabang sa mga sumasalmot nga molambo ang ilang mga tinguha ug abilidad sa pagtudlo sa mga anak mahitungod sa sukaranan nga mga baruganan ug mga ordinansa sa ebanghelyo.

Pagpangandam

Mohunahuna og mga paagi nga ikaw makagamit sa mga baruganan ubos sa “Imong mga Kapangakohan isip Magtutudlo” (mga pahina x-xiii niini nga manwal).
Mopalandong sa mga doktrina ug mga baruganan nga gilatid diha sa tataw nga mga ulohan sa leksyon sa tibuok semana, pangita og mga paagi sa pagtudlo niini nga mga doktrina ug mga baruganan. Tinguhaa ang giya sa Espiritu sa paghukom unsay kinahanglan nga imong hatagan og gibug-aton aron matubag ang mga panginahanglan sa mga sumasalmot.

Gisugyot nga Kalamboan sa Leksyon

Ang mga pagtudlo sa mga ginikanan makatabang sa mga anak nga magpabilin nga lig-on diha sa ilang hugot nga pagtuo.

Modibuho sa mosunod nga mga hulagway diha sa pisara.

Unsa ang gipaila niining duha ka mga hulagway? Unsa ang gitudlo niini nga hulagway mahitungod sa pag-atiman sa mga anak?

Kon ang mga sumasalmot adunay kalisud sa pagtubag niini nga mga pangutana, ipahinumdom kanila ang sugilanon ni Presidente Hinckley bahin sa pagtanom og usa ka kahoy, gikan sa Leksyon 12. (Kon ikaw nagtudlo niini nga leksyon sa linain ug wala makatudlo sa leksyon 12, ipakigbahin ang sugilanon sa mga pahina 58 sa dili pa ikaw mohisgot sa mga hulagway sa pisara.)

Ang kahoy sa wala nagpaila sa usa ka bata kinsa nahisalaag gikan sa ebanghelyo tungod kay ang iyang mga ginikanan wala makatudlo ug makatuman sa ebanghelyo diha sa panimalay. Ang kahoy sa tuo nagpaila sa usa ka bata kinsa nakat-on sa ebanghelyo tungod sa mga pulong ug panig-ingnan sa mga ginikanan. Kon ang kusog nga mga hangin mohuros, ang linghod pa nga kahoy nga giagak sa hilo magpadayon sa pagtubo nga tul-id. Mao usab ang mga anak malagmit labaw pa nga magpabili nga lig-on sa hugot nga pagtuo kon ang ilang mga ginikanan nakatudlo sa yano nga mga baruganan sa ebanghelyo.

Basaha ang Doktrina ug mga Pakigsaad 68:25–28 uban sa mga sumasalmot.

Sumala niining tudling sa kasulatan, unsay gikinahanglan sa Ginoo sa mga ginikanan nga itudlo sa ilang mga anak? (Ilista ang mga tubag sa mga sumasalmot diha sa pisara ingon nga gipakita sa ubos.)

Hugot nga pagtuo kang Jesukristo

Paghinulsol

Bunyag

Pagdawat sa gasa sa Espiritu Santo

Pag-ampo

Paglakaw nga matarung sa atubangan sa Ginoo
Ngano nga mahinungdanon nga ang mga ginikanan motudlo niining mga baruganan ug mga ordinansa ngadto sa ilang mga anak samtang ang mga anak batan-on pa.

Samtang nag-alagad isip Tigdumalang Obispo, si Obispo Robert D. Hales mipasabut: Ang mga anak kinsa gitudloan sa pag-ampo ug kinsa mag-ampo uban sa ilang mga ginikanan kon mga batan-on pa malagmit nga mag-ampo sa panahon nga sila edaran na. Kadtong kinsa gitudloan samtang sila mga batan-on pa nga mahigugma sa Dios ug motuo nga Siya buhi sa kasagaran labaw nga magpadayon sa ilang espirituhanong kalamboan ug makadugang sa ilang mga pagbati sa paghigugma kon sila mohingkod na (sa Conference Report, Oct. 1993, 10; o Ensign, Nov. 1993, 10).

Ang mga ginikanan kinahanglan nga motudlo sa ilang mga anak sa unang mga baruganan ug mga ordinansa sa ebanghelyo.

Gamita ang mosunod nga mga pangutana sa paghisgot sa mga paagi nga ang mga ginikanan mahimong makatabang sa ilang mga anak sa paggamit sa mga baruganan sa hugot nga pagtuo ug pag-andam nga mabunyagan ug modawat sa gasa sa Espiritu Santo. Samtang mogiya sa panaghisgutan, awhaga ang mga sumasalmot sa pagpakigbahin sa mga panig-ingnan gikan sa ilang kaugalingong kinabuhi.

Sa pagbansay sa hugot nga pagtuo kang Jesukristo, kita kinahanglan nga adunay husto nga pagsabut sa Iyang kinaiya ug mga hiyas. Unsay mahimo sa mga ginikanan sa pagtabang sa ilang mga anak nga makasabut sa kinaiya ug mga hiyas sa Manluluwas?
Sa daklit tun-i pag-usab ang mga asoy ni Jesus nga nag-ayo sa anak nga babaye ni Jairo (Marcos 5:21–24, 35–43) ug ni Nephi nga nagtubag ngadto sa sugo sa pagkuha sa tumbaga nga mga palid (1 Nephi 3:1–7). Sa unsa nga paagi nga kining mga asoy sa kasulatan makatabang sa mga anak sa pagbansay sa hugot nga pagtuo kang Jesukristo?
Sa unsa nga paagi nga ang pagpakigbahin sa mga kasinatian gikan sa atong mga kinabuhi makatabang sa paglig-on sa hugot nga pagtuo sa anak.

Itudlo nga ang mga ginikanan kinahanglan nga mangita sa mga kahigayunan sa pagtudlo sa ilang mga anak nga ang hugot nga pagtuo makatabang kanato sa pag-atubang sa mga hagit ug mga kalisud sa kinabuhi. Pananglit, kon ang bata adunay kalisud sa tulunghaan o uban sa higala, ang mga ginikanan makabasa sa usa ka tudling sa kasulatan uban sa bata, motabang kaniya sa pag-ampo alang sa giya ug kahupayan; ug dayon mitabang sa anak nga mosabut sa unsa nga paagi nga ang Ginoo mohatag og tabang.

Samtang ang mga ginikanan maningkamot sa pagtudlo sa ilang mga anak bahin sa paghinulsol, ngano nga mahinungdanon alang kanila nga mangita sa mga higayon sa pagtudlo sa inadlaw nga kinabuhi?

Ipasabut nga kon ang mga ginikanan makakita sa ilang mga anak nga mohimo sa dili maalamon nga mga desisyon, sila makapangutana sa mga anak unsa ang ilang gibati mahitungod sa mga desisyon ug ang ilang mahimo unta sa laing paagi. Sila mahimong motugot sa mga anak nga mokorihir sa mga sayop, ingon nga gikinahanglan, mopadayag sa kasubo ngadto sa Ginoo ug niadtong kinsa nasilo o nasakitan. Mga ginikanan makatabang usab sa ilang mga anak nga makaila sa kalipay ug kalinaw nga moabut pinaagi sa tinuod nga paghinulsol.
Sa daklit tun-i pag-usab ang mga pagkakabig ni Alma ang Batan-on (Mosiah 27; Alma 36) ug sa mga Anti-Nephi-Lehi (Alma 23). Sa unsa nga paagi nga kining mga asoy sa kasulatan makatabang sa mga anak nga mohatag og bili sa mga panalangin sa paghinulsol ug kapasayloan?
Tun-i pag-usab ang pakigsaad sa bunyag pinaagi sa pagbasa sa Mosiah 18:8–10 ug Doktrina ug mga Pakigsaad 20:37 uban sa mga sumasalmot. Sa unsa nga paagi nga ang mga ginikanan makatabang sa ilang mga anak sa pag-andam sa paghimo ug sa pagtuman sa pakigsaad sa bunyag?
Sa unsa nga paagi nga ang mga ginikanan makatabang sa ilang mga anak nga maghandom nga mabunyagan ug modawat sa gasa sa Espiritu Santo?

Ang mga ginikanan kinahanglan nga ‘motudlo sa ilang mga anak sa pag-ampo ug sa paglakaw nga matarung sa atubangan sa Ginoo’

Ngano nga ang panig-ingnan sa mga ginikanan mao ang labing mahinungdanong magtutudlo sa pagtabang sa mga anak sa paghimo sa pag-ampo nga makanunayong bahin sa ilang mga kinabuhi?
Agi og dugang sa paghatag sa panig-ingnan sa pag-ampo, unsa ang pipila ka mga baruganan bahin sa pag-ampo nga ikatudlo sa mga ginikanan ngadto sa ilang mga anak? (Samtang ang mga sumasalmot motubag niini nga pangutana, basaha ug hisguti ang mosunod nga mga tudling ug kinutlo sa kasulatan. Awhaga ang mga sumasalmot nga mopakigbahin sa ilang mga kasinatian nga may kalabutan niini nga pagtulun-an.
1. Santiago 1:5–6 (Ang Dios mohatag kanato sa kaalam kon kita mangayo Kaniya uban sa hugot nga pagtuo.)
2. 2 Nephi 32:9 (Kita kinahanglan nga mag-ampo sa kanunay. Kita mag-ampo ngadto sa Amahan pinaagi ni Jesukristo.)
3. Alma 37:37 (Kon kita magpakigtambag uban sa Ginoo sa tanan nga atong buhaton, siya motudlo kanato sa maayo.
4. 3 Nephi 18:19–21 (Kon kita mag-ampo ngadto sa Amahan sa ngalan ni Jesukristo, kita makadawat unsay atong gipangayo kay kini matarung. Kita kinahanglang mag-ampo uban sa atong mga banay.)
5. Doktrina ug mga Pakigsaad 112:10 (Kon kita magmapainubsanon, ang Ginoo motubag sa atong mga pag-ampo.
Si Elder Dallin H. Oaks sa Korum sa Napulog Duha ka mga Apostoles mihisgot mahitungod sa pagkamahinungdanon sa paggamit “sa pinulongan sa pag-ampo.” Siya miingon nga ang mga anak makakat-on niining pinulongan gikan sa ilang mga ginikanan.

“Kita makakat-on sa atong lumad nga pinulongan sa yano nga paagi sa pagpaminaw niadtong kinsa mosulti niini. Kini tinuod usab sa pinulongan diin kita makigsulti sa atong Langitnong Amahan. Ang pinulongan sa pag-ampo labaw nga masayon ug labaw nga makalipay nga makat-unan kay sa bisan unsa nga pinulongan. Kita kinahanglan mohatag sa atong mga anak sa higayon sa pagkat-on niining pinulongan pinaagi sa pagpaminaw sa ilang mga ginikanan nga mogamit niini sa nagkalainlain nga pag-ampo nga gihalad sa adlaw-adlaw diha sa atong panimalay” (sa Confernece Report, Apr. 1993, 20 o Ensign, May 1993, 18).
Sa unsa nga paagi nga ang mga ginikanan mahimong mogamit sa pag-ampo sa banay isip panahon sa pagtudlo sa ilang mga anak?
Unsay mahimo sa mga ginikanan sa pag-awhag sa ilang mga anak sa pag-ampo sa tinagsa nga paagi?
Ang Ginoo miingon nga ang mga ginikanan kinahanglan nga motudlo sa ilang mga anak “sa paglakaw nga matarung sa Iyang atubangan” (D&P 68:28). Sa unsa nga mga paagi nga ang mga ginikanan makagamit sa mga kahimtang sa panimalay ug sa banay sa Pag-awhag sa ilang mga anak sa “paglakaw nga matarung sa atubangan sa Ginoo”? (Ang mga tubag mahimong maglakip nga ang mga ginikanan makatudlo sa ilang mga anak sa pagtuman sa mga balaod ug mga ordinansa sa ebanghelyo ug mobarug ingon nga mga saksi sa Dios sa tanang mga panahon ug diha sa tanang mga dapit.)
Unsa ang mahimo sa mga apohan ug ubang mga sakop sa banay sa pagtabang sa mga ginikanan nga makatudlo sa mga baruganan sa ebanghelyo ngadto sa mga anak? Sa unsa nga paagi nga inyong nakita nga ang maayong panig-ingnan sa ubang mga sakop sa banay makatabang sa mga anak?

Panapos

Hatagi og gibug-aton nga ang Dios mihatag sa mga ginikanan sa kapangakohan sa pagtudlo sa ilang mga anak sa mga baruganan sa pagkamatarung. Awhaga ang mga sumasalmot nga maningkamot sa pagpuyo sa mga baruganan nga gitudlo niining leksyon ug sa pagtino sa mga paagi diin sila mahimong labaw pa nga motudlo niining mga baruganan ngadto sa ilang mga anak.

Kon giaghat sa Espiritu, ipakigbahin ang imong mga pagtuo sa mga kamatuoran nga gihisgutan sa panahon sa leksyon.

Basaha ang mga pahina 61 diha sa Giya sa Pagtuon sa Sumasalmot sa mga Kaminyoon ug sa Banay. Awhaga ang mga sumasalmot nga tun-an pag-usab ang mga doktrina ug mga baruganan niini nga leksyon pinaagi sa (1) pagsunod bisan usa sa mga gisugyot sa “Mga Ideya alang sa Paggamit” ug (2) pagbasa sa artikulo “Pagpalig-on sa mga Banay: Atong Sagrado nga Katungdanan,” ni Robert D. Hales. Itudlo nga ang minyo nga mga magtiayon makadawat sa mahinungdanong mga kaayohan gikan sa pagbasa ug paghisgot pagdungan sa mga artikulo diha sa giya sa pagtuon.