Parau tumu nō te aupurura’a

Tē mo’e ra ānei ia ’outou teie tuha’a faufa’a rahi nō te aupurura’a ?

Te aupurura’a ’o te « ’oa’oa ato’a i te feiā e ’oa’oa ra » ’e tae noa atu te « ’oto ato’a ho’i i te feiā e ’oto ra » (Roma 12:15).

Parau tumu nō te aupurura’a, Atopa 2019

Faʼahōho’araʼa nā Augusto Zambonato

’Ia feruri tātou i te aupurura’a, e mea ’ōhie ’ia feruri i te parau nō te tauturura’a i te feiā nava’i ’ore. E paraparau tātou nō te ’atu’atura’a i te ’āua o te vahine ’ivi, te ’āfa’ira’a i te mā’a tāmā’a nō te feiā tei ma’ihia ’aore rā te hōro’a i te feiā e fifi ra. E ha’amana’o tātou i te parau a’o a Paulo ’ia « ’oto ato’a ho’i i te feiā e ’oto ra », ’āre’a rā, tē nava’i ra ānei tā tātou rōtahira’a i ni’a i te tuha’a mātāmua o terā ’īrava—’ia « ’oa’oa ato’a i te feiā e ’oa’oa ra » ? (Roma 12:15). Te ’oa’oara’a ’e te feiā tā tātou e aupuru nei—te fa’ahanahanara’a ānei i tā rātou manuiara’a ’aore rā te tauturura’a ia rātou ’ia ’ite mai i te ’oa’oa i roto i te taime fifi—e tuha’a faufa’a rahi ïa nō te aupurura’a mai tā te Fa’aora.

Teie e toru mana’o e nehenehe e tauturu (’e hō’ē tē ’ape atu) ’a ’imi ai tātou i te rōtahi i ni’a i te maita’i tā te Atua i tu’u i roto i tō tātou orara’a.

1. E vai ara

Tē tauturu nei Bonnie H. Cordon, te peresideni rahi nō te Feiā ’Āpī Tamāhine, ia tātou ’ia māramarama ē, tītauhia ’ia hi’o i te feiā tā tātou e aupuru—nō te hi’o i tō rātou mau hōpoi’a ’e mau fifi, e ’ere noa rā, tō rātou ato’a mau pūai, mau tārēni ’e mau manuiara’a. ’Ua parau ’oia ē, tītauhia ’ia riro ’ei « hō’ē ’aito ’e te hō’ē hō tari’a (confident) »—e ta’ata tē vai ara i tō rātou vaira’a ’e ’o tē turu ia rātou i roto i tō rātou mau tīa’ira’a ’e mau tītaura’a ».¹

I roto i te parabole nō te māmoe ’e te pua’aniho, ’ua nā ’ō te Fa’aora ē e ui mai te ta’ata e ’itehia i tōna pae ’atau ē : « I nāfea mātou i ’ite ai ia ’oe i te po’iara’a, ’e ’ua fa’a’amu ia ’oe ? ’E te po’iha’ara’a, ’e ’ua fa’ainu atu ia ’oe ?

« I nāfea mātou i ’ite atu ai ia ’oe ē e ta’ata ’ē, ’e ’ua ’ite atu ia ’oe ? » (Mataio 25:37–38).

Te mau taea’e ’e te mau tuahine, te parau faufa’a, ’oia ho’i ïa ’ite atu », ’ua nā ’ō te tuahine Cordon. « ’Ua ’ite te feiā parau ti’a i te feiā nava’i ’ore nō te mea tē ha’apa’o ra rātou ’e te ’ite ra. E nehenehe ato’a tātou e riro ’ei mata ara nō te tauturu ’e nō te tāmāhanahana, nō te fa’ahanahana ’e nō te moemoeā ».²

2. E ’imi i te tumu e fa’ahanahana

Fa’ahanahana i te mau manuiara’a, te mea rahi ’e te mea na’ina’i. E nehenehe e manuiara’a nā roto atu i te ma’i mariri ’aita’ata ’aore rā te hō’ē ta’ara’a, te ’itera’a i te hō’ē tōro’a ’ohipa ’āpī ’aore rā te ’itera’a i te hō’ē tia’a tei mo’e, te tāpe’ara’a hō’ē ’āva’e i muri mai i te mo’era’a te tahi ta’ata herehia ’aore rā te manuiara’a i te ’ore e ’amu i te tihota.

E tāniuniu nō te fa’ahanahana i te reira, e tu’u atu i te hō’ē tareta ’aore rā haere e tāmā’a. Nā roto i te ’apo-’āmui-ra’a i tā tātou mau ha’amaita’ira’a, te orara’a ma te ’ā’au mehara ’e te fa’ahanahanara’a i te mau ha’amaita’ira’a ’e te mau manuiara’a a vetahi ’ē, ’ua roa’a ia tātou « te ’oa’oa i te ’oa’oa o tō [tātou] mau taea’e » (Alama 30:34).

3. E ’ite i te rima o te Fatu

I te tahi taime te ’oa’oara’a ’e vetahi ’ē, ’o te tauturura’a ïa ia rātou ’ia ’ite i te tumu nō te ’oa’oa—noa atu ā te mau fifi ’aore rā te mau taime au i roto i tō rātou orara’a. E ti’a noa i te parau mau ’ōhie ē, tē vai ara nei te Metua i te Ao ra ia tātou ’e ’ua ineine roa nō te fa’ateitei ia tātou, ’ia riro ’ei puna ’oa’oara’a fa’ahiahia.

E nehenehe tā ’outou e tauturu ia vetahi ’ē ’ia ’ite i te rima o te Fatu i roto i tō rātou orara’a nā roto i te fa’a’itera’a nāhea ’outou i te ’itera’a i te reira i roto i tō ’outou iho orara’a. ’Ia ’ōhie nō ’outou i te fa’a’itera’a nāhea te Metua i te Ao ra i te tauturura’a ia ’outou i roto i tā ’outou mau tāmatara’a. E nehenehe teie ’itera’a pāpū e tauturu ia vetahi ’ē ’ia ’ite mai ’e ’ia fā’i mea nāhea ’oia i te tauturura’a ia rātou (hi’o Mosia 24:14).

4. ’Eiaha e tā’ōti’a i tō ’outou ’aravihi ’ia ’oa’oa

Te vāhi ’ino rā i te tahi taime, e nehenehe ia tātou ’ia tā’ōti’a i tō tātou iho ’aravihi ’ia ’oa’oa ’e vetahi ’ē, i te taime iho ā rā e tae mai te mana’o pāpū ’ore nō ni’a i te mea tā tātou e pūpū atu ’aore rā nō ni’a i tō tātou vaira’a i roto i te orara’a. E nehenehe ho’i tātou e ’oa’oa i te pōpou o vetahi ’ē, ’aita rā, e topa tātou i roto i te marei nō te fa’aauaura’a. ’E mai tā Elder Quentin L. Cook nō te pupu nō te Tino ’Ahuru Ma Piti ’āpōsetolo i ha’api’i : « E riro mau iho ā te fa’aauaura’a i te mau ha’amaita’ira’a i te tīahi i te ’oa’oa ». E’ita e nehenehe te mana’o ha’amāuruuru ’e te mana’o fa’ahina’aro i te hō’ē ā taime ».³

« Nāhea tātou i te upo’oti’a i ni’a i terā peu mātau maita’i fātata i roto i te mau ta’ata ato’a ? », ’ua ui Elder Jeffrey R. Holland nō te pupu nō te Tino ’Ahuru Ma Piti ’āpōsetolo. « E nehenehe tā tātou e tai’o i tō tātou mau maita’i ’e e nehenehe tātou e pōpō i te mau manuiara’a a vetahi ’ē. Te mea hau roa atu, e nehenehe tātou e tāvini ia vetahi ’ē, te ’ohipa maita’i roa a’e tei hōro’ahia nō te rapa’au i te ’ā’au ».⁴ E nehenehe tā tātou e fa’aauau ia tātou, ’aita rā, e ha’afa’ahiahia tātou i te feiā tā tātou e aupuru nei. E parau hua tātou i te mea tā tātou e au nei nō ni’a ia rātou ’e te mau melo o tō rātou ’utuāfare.

Mai tā Paulo i fa’aha’amana’o ia tātou, e mau melo ana’e tātou nō te tino o te Mesia, « ’e ’ia fa’ateiteihia te hō’ē melo ra, e ’oa’oa ïa te mau melo ato’a ra » (1 Korinetia 12:26). Nā roto i te tauturu a te Metua i te Ao ra, e ti’a ia tātou ’ia vai ara i te ’ohipa e tupu ra nō vetahi ’ē, ’ia fa’ahanahana i te mau manuiara’a, te rahi ’e te na’ina’i, ’ia tauturu ia rātou ’ia ’ite i te rima o te Fatu ’e ’ia upo’oti’a i ni’a i te pohehae, ’ia ’oa’oa ’āmui mau tātou i te mau ha’amaita’ira’a, te mau tārēni ’e te ’oa’oa o vetahi ’ē.

Fa’ata’ara’a

1. Bonnie H. Cordon, « ’Ia riro ’ei tīa’i māmoe », Liahona, Nov. 2018, 75.

2. Bonnie H. Cordon, « ’Ia riro ’ei tīa’i māmoe », 75.

3. Quentin L. Cook, « Rejoice! » Ensign, Nov. 1996, 30.

4. Hi’o Jeffrey R. Holland, « Te tahi huru puhurara’a », Liahona, Tiurai 2002, 64.

Te hi’ora’a o te Fa’aora

’Ua ’oa’oa pinepine Iesu Mesia i te poupou o vetahi ’ē. ’Ua haere ’oia i te fa’aipoipora’a nō Cana, i reira tōna fa’ahanahanara’a i te reira, e ’ere noa rā, ’ua taui ato’a ’oia i te pape ’ei uaina (hi’o Ioane 2:1–11). E nehenehe ato’a tā tātou e fa’aitoito i te haere i te mau ’ōro’a ta’a ’ē o te mau ta’ata tā tātou e aupuru nei.

Tē ’ite ato’a nei tātou i te Fa’aora i te ’oa’oara’a i te parau ti’a o vetahi ’ē. I tōna fārereira’a i te mau ’āti Nephi, ’ua nā ’ō ’oia ia rātou : « E ao tō ’outou nō tō ’outou fa’aro’o. ’E teienei, inaha, ’ua tae tō’u ’oa’oa i te rahi ra » (3 Nephi 17:20).

Anira’a ’ia ’ohipa

’A feruri i te ta’ata tā ’outou e aupuru nei. E aha tā rātou mau tārēni ’e te mau pūai ? E aha te mau taime ta’a ’ē ’aore rā te mau manuiara’a i tupu nō rātou ? Nāhea ’outou nō te ’oa’oa ’e ’o rātou, nō te parau ha’apōpou ia rātou ’aore rā nō te fa’aitoito ia rātou ?

’A fa’a’ite i tō ’outou ’itera’a

’A hāpono mai i tō ’outou mau ’itera’a ’a aupuru ai ’outou ia vetahi ’ē. Haere i ni’a ia liahona.ChurchofJesusChrist.org ’e tāumi i ni’a « Submit an Article or Feedback ».