Parau tumu nō te aupurura’a

Tītauraʼa i te tauturu nō te tauturu ia vetahi ʼē

Nāhea tātou i te faʼaʼohipa ia vetahi ʼē ’ia hinaʼaro anaʼe tātou i te tauturu i roto i tā tātou mau tūtavaraʼa ʼia aupuru ? ’A haere atu i roto i te mau uiuiraʼa aupururaʼa ʼe i te mau ʼāpoʼoraʼa nō te sābati mātāmua.

I tō te ma’i uaua tītaura’a ia Kathy ’ia fa’a’ohipa i te hōʼē pere’o’o tūraʼi, ’ua ’ite ’a’era ’oia e hina’aro ’oia i te tauturu nō te fa’ahaere iāna i ni’a i tōna ro’i mai roto mai i te pere’o’o tūraʼi, i te mau pō atoʼa. E ʼohipa rahi roa nō te hōʼē melo. Nō reira ʼua tuatāpapa te pupu peresibutero nō niʼa i tōna huru oraraʼa ʼe ʼua faʼaoti i te hāmani i te hōʼē tālena nō te tauturu iāna i te mau pō atoʼa.¹

’Ia ʼite anaʼe tātou i te mau hinaʼaro ʼe te mau pūai o te feiā tā tātou e tāvini nei, ʼe ʼite paha tātou ē e hinaʼaro tātou i te tauturu nō te pāhono i tō rātou mau hinaʼaro. Te mau uiuiraʼa aupururaʼa ʼe te mau ʼāpoʼoraʼa i te sābati mātāmua ’o nā rāveʼa ïa e piti nō te tuatāpapa e nāhea i te faʼa’ohipa i te tahi atu mau taʼata.

Mau uiuira’a aupurura’a

Teie mau uiuiraʼa i rotopū i te mau tuahine aupuru ʼe te peresideniraʼa Sōtaiete Tauturu ʼaore rā te mau taeaʼe aupuru ʼe te peresideniraʼa nō te pupu Peresibutero ʼo tera anaʼe te parau faʼataʼaraʼa mana tā tātou e rave nō niʼa i te feiā tā tātou e aupuru ra. Te uiuiraʼa ʼo te hōʼē ïa rāveʼa i te mau toru ʼāvaʼe atoʼa (1) nō te ’apārau nō ni’a i te mau pūai, te mau hina’aro ’e te mau fifi o te mau ’utuāfare ’e te mau ta’ata tei fa’ata’ahia, (2) nō te hi’o e aha te mau hina’aro tā te pupu autahu’ara’a, te Sōtaiete Tauturu ’aore rā te ʼāpoʼoraʼa pāroita e nehenehe e tauturu atu ’e (3) te ha’api’ira’a mai nā roto mai i te feiā fa’atere ’e ’ia fa’aitoitohia te mau tauto’ora’a aupurura’a.

E faʼaʼite tiʼa atu te peresideni o te pupu peresibutero ʼe te peresideni Sōtaiete Tauturu i te mau hinaʼaro faufaʼa rahi i te ʼepisekōpo ʼe e fāriʼi rāua i te aʼo ʼe te arataʼiraʼa nō ō mai iāna ra.

E nehenehe tā ʼoutou e ʼite i te tahi atu ā haʼamāramaramaraʼa nō niʼa i te mau uiuiraʼa aupururaʼa i niʼa i te ministering.lds.org.

Haʼafaufaʼaraʼa i te mau uiuiraʼa aupururaʼa

ʼEi pātururaʼa i te parau a te peresideni Russell M. Nelson ē e riro te faʼanahoraʼa aupururaʼa ʼei hīnere i niʼa i te reira e ’ohu ai te terera’a o te ʼĒkālesia, ʼua haʼapiʼi ’o Elder Gary E. Stevenson nō te Pupu nō te Tino ʼAhuru ma Piti ʼÂpōsetolo ē, « e nehenehe te tupuraʼa o teie ʼorama … e faʼatumuhia i niʼa i te haʼapiʼi-maitaʼi-raʼa-hia te mau taeaʼe ʼe te mau tuahine aupuru ʼe tō rātou haʼapaʼo-maitaʼi-raʼa i te uiuiraʼa aupururaʼa ».²

E maha rāve’a tauturu nā te mau taeaʼe ʼe te mau tuahine aupuru :

E haere atu i te uiuiraʼa ma te ʼimi i te tauturu. ʼIa ʼineine i te haʼapiʼi mai.
ʼIa ineine i te tuatāpapa i te mau hinaʼaro ʼo tā ʼoutou e hinaʼaro e tauturu ʼia pāhono atu.
E tūtonu i niʼa i te mau pūai ʼe te mau ʼaravihi o te taʼata tātaʼitahi, ʼeiaha noa i niʼa i te mau hinaʼaro.
Mai te mea e hinaʼarohia ʼa fārerei atu i te peresideniraʼa nō te fa’atupu i te tahi ʼapārauraʼa hau atu i rōpū i te mau uiuiraʼa toru ʼāvaʼe.

E pae rāve’a tauturu nā te feiā faʼatere :

ʼAita te mau uiuiraʼa roa i tītauhia, e faʼataʼa rā ʼia navaʼi te taime nō te fārerei i te hōʼē vāhi e nehenehe ai te hōʼē ʼapārauraʼa faufaʼa rahi e tupu.
E rave i te taime nō te aupuru i te taeaʼe aore rā te tuahine aupuru.
ʼEiaha e ui i te mau uiraʼa ʼo te hōroʼa i te manaʼo e tē taiʼo noa nei ʼoutou i te mau fārereiraʼa ʼaore rā te tāpaʼoraʼa ʼua fārereihia te taʼata (« Ua rave ānei ʼoe i tā ʼoe aupururaʼa ? »). E ui i te mau uiraʼa ʼo te haʼapūai i te mau peu hinaʼarohia (« E aha te muhumuhu tā ʼoutou i ʼite ʼa pure ai ʼoutou nō te ʼutuāfare ? E aha tei tupu ’a haʼa ai ʼoutou mai te au i taua mau muhumuhu ra ? »).
E faʼaroʼo māite ʼe ʼa pāpaʼi i te mau parau.
E tāu’aparau ʼāmui. ʼUa tiʼa i te mau pupu aupururaʼa ’ia fāriʼi i te heheuraʼa nō te feiā tei faʼataʼahia ia rātou ’ia aupuru atu.

Mau uiraʼa ʼe mau pāhonoraʼa nō niʼa i te mau uiuiraʼa aupururaʼa

E aha te uiuira’a aupurura’a ?

ʼO te hōʼē ïa ’apārauraʼa i rotopū i te mau taeaʼe aupuru ʼe te hōʼē melo nō te peresideniraʼa nō te pupu peresibutero ʼaore rā i rotopu i te mau tuahine aupuru ʼe te hōʼē melo nō te peresideniraʼa Sōtaiete Tauturu i roto i te hōʼē faʼanahoraʼa ’o te faʼatiʼa ia rātou ’ia ʼimi ʼe ’ia fāriʼi i te faʼaururaʼa a te Vārua Maitaʼi. ʼEi hopeʼaraʼa, e nehenehe te mau taeaʼe ʼe te mau tuahine aupuru e faʼauruhia ʼia tīaʼi, ʼia here, ʼia haʼapiʼi, ʼe ’ia tāmahanahana ’ia au i te rāveʼa a te Faʼaora.

E tiʼa ānei i teie mau uiuiraʼa i te mau toru ʼāvaʼe atoʼa ’ia faʼaterehia i mua i te taʼata iho ?

Te ti’ara’a mau e faʼaterehia te reira i mua i te taʼata iho, e nehenehe rā te reira e ravehia nā roto i te niuniu ʼaore rā i ni’a i te itenati mai te mea eʼita te fārereʼiraʼa mata ʼe mata e nehenehe ʼia ravehia. Te rahiraʼa o te taime e haere atu nā taeaʼe aupuru e piti i te uiuiraʼa mai te mea e nehenehe.

E aha te fā no te hōʼē uiuiraʼa aupururaʼa?

Te mau uiuiraʼa aupururaʼa ʼo te hōʼē ïa rāveʼa nā te mau taeaʼe ʼe te mau tuahine aupuru ’ia hiʼopoʼa i te huru oraraʼa, ʼia rave i te mau ʼōpuaraʼa nō ʼananahi, ʼe ’ia tītau i te tauturu e hina’arohia e te mau taʼata ʼe ʼaore rā te mau ʼutuāfare tā rātou e aupuru ra. ʼO te hōʼē taime nō te paraparau atu nō niʼa i te mau rāveʼa tā te pupu ʼaore rā te Sōtaiete Tauturu e nehenehe e hōroʼa.

Nāhea vau i te rave i te mau mea ʼōmoʼe ʼaore rā mau mea fifi ?

Mai te peu e ha’amāramaramaraʼa ʼōmoʼe, e faʼaʼite te mau taeaʼe ʼe te mau tuahine aupuru i te reira i te peresideni pupu peresibutero ʼaore rā i te peresideni Sōtaiete Tauturu anaʼe—ʼaore rā e haere ʼāfaro i te ʼepisekōpo ra. ʼEiaha roa e faʼaʼite i te ha’amāramaramara’a ʼōmoʼe ʼaore rā fifi i roto i te mau ʼāpoʼoraʼa i te sābati mātāmua.

ʼĀpo’ora’a nō te sābati mātāmua

Taʼa ʼē noa atu i te mau uiuiraʼa aupururaʼa, te mau ʼāpoʼoraʼa nō te sābati mātāmua ʼo te tahi atu ïa rāveʼa nō te faʼaʼohipa i te tahi atu mau taʼata i roto i te ʼohipa aupururaʼa. I roto i te mau ʼāpoʼoraʼa a te Sōtaiete Tauturu ʼe te pupu peresibutero, e nehenehe te faʼaururaʼa e tae mai i te feiā tei ’āmui mai nō ō mai i te Vārua ra ʼe mai roto mai i te tahi atu mau taʼata i roto i te pupu.

Te tumu nō te hōʼē ʼāpoʼoraʼa ʼo te :

« Tuatāpapara’a ʼāmui ïa i te mau hōpoiʼa, te mau rāveʼa ʼe te mau fifi ;
« Haʼapiʼiraʼa mai i te mau manaʼo ʼe te mau ʼite o te tahi ʼe te tahi ; ʼe
« Faʼanahora’a i te mau rāveʼa nō te rave i te ʼohipa ʼia au i te mau faʼaʼiteraʼa a te Vārua ».³

ʼUa hau atu te mau ʼapōʼoraʼa i te mau tuatāpaparaʼa noa : E arataʼi te mau ʼāpoʼoraʼa ia tātou ʼia haʼa ʼei taʼata iho ʼaore rā ʼei pupu mai tei faʼauruhia e te Vārua. E nehenehe te mau melo e ʼite i te hōʼē hinaʼaro ’ia faʼaoti i te ʼohipa a te Fatu ʼei hotu nō teie mau ʼāpoʼoraʼa.

Anira’a ’ia rave

ʼUa parau Elder Jeffrey R. Holland, « tē pure nei mātou i teie mahana ’ia haere atu te mau tāne ’e te mau vahine—’e te feiā ’āpī tamāroa ʼe tamāhine-pa’ari-ri’i— ma te fafaura’a hōhonu atu ā i roto i tō rātou ’ā’au ’ia aupuru te tahi i te tahi, ma te tūra’ihia e te here mau o te Mesia nō te rave i te reira ».⁴