Te mau parau tumu nō te aupurura’a

Aupurura’a nā roto i te ’Āmuira’a rahi

Nā roto i te mau fa’ahitira’a parau fa’ateitei, te mau peu tumu ’utuāfare, ’e te mau ha’api’ira’a nā roto mai i te mau tāvini o te Fatu, tē hōro’a mai nei te ’āmuira’a rahi ia tātou e rave rahi rāve’a nō te aupuru—nā mua a’e, i roto, ’e i muri a’e i te hope’a hepetoma o te ’āmuira’a rahi !

Parau tumu nō te aupurura’a, Eperera 2020

’Ei ’orometua nō te piha fa’aineinera’a misiōni, ’e fa’aue ’o Susie ’e ’o Tom Mullen i te mau melo o tā rāua piha ha’api’ira’a ’ia ani manihini i te hō’ē ta’ata ’ia māta’ita’i i te ’āmuira’a rahi.

« Te anira’a i te hō’ē ta’ata ’ia rave i te hō’ē mea, e tuha’a ’ohipa pāpū te reira nō te ’ohipa misiōnare, ’e e au ato’a te reira nō te aupurura’a », tāna ïa i parau. « E fa’aho’i tāmau mai te mau pīahi i te parau fa’a’ite nō ni’a i te tupu-maita’i-ra’a te reira nō rātou ’e nō te ta’ata ato’a tā rātou i ani manihini ».

Teie te tahi mau huru tā tā rāua mau pīahi i fa’a’ite mai nō ni’a i te fa’atorora’a i te rima :

« ’Ua aupuru mātou i te hō’ē hoa e fārerei nei i te tahi mau fifi. ’Ua ani mātou iāna ’ia fa’aro’o i te ’āmuira’a rahi nō te fāri’i i te mau pāhonora’a. I tō mātou ho’ira’a e fārerei iāna i muri a’e i te ’āmuira’a, ’ua parau mai ’oia ia mātou ē, ’ua fa’aro’o ’oia e rave rahi mana’o ’o tei tauturu iāna ».
« ’Ua fa’anaho mātou i te hō’ē fa’a’oa’oara’a ’āmuira’a rahi ’e ’ua hōpoi mai te mau ta’ata ato’a i te hō’ē mā’a ’amu’amu. E mea ’ārearea roa, ’e ’ua fa’aoti mātou e fa’atupu fa’ahou i te reira ».
« ’Ua ani au i te hō’ē hoa ’ia māta’ita’i māua i te ’āmuira’a rahi. ’A paraparau ai māua nō ni’a i te reira, ’ua fa’aoti māua e tere i te fare purera’a nō te hi’o ē, e nehenehe ānei ia māua ’ia māta’ita’i i reira. ’Ua nā reira māua, ’e e mea maita’i roa ïa !

Mai ia Mullen mā ’e tā rāua mau pīahi i ha’api’i mai, e rave rahi rāve’a nō te aupuru nā roto i te ’āmuira’a rahi. E rāve’a fa’ahiahia roa nō te fa’a’ite i te mau fa’ahitira’a parau fa’ateitei, te mau peu ’utuāfare, te mau ’āparaura’a faufa’a, ’e te mau ha’api’ira’a a te mau tāvini o te Fatu !

’A ani ia vetahi ’ē ’ia haere mai i tō ’outou fare

« ’Ua fa’aue te Fa’aora i tāna mau pipi ’ia ’here te tahi ’e te tahi ; mai iā’u i here ia ’outou’ (Ioane 13:34). Nō reira, e hi’o tātou nāhea ’oia i te here ia tātou… Mai te mea e fa’ariro tātou iāna ’ei hi’ora’a nō tātou, e ti’a ïa ia tātou ’ia tāmata i te mau taime ato’a ’ia toro i te rima nō te ’āpiti mai i te mau ta’ata ato’a. » —Peresideni Dallin H. Oaks¹

E rave rahi matahiti i ma’iri a’e nei, ’ua ’ite tō mātou taea’e hahaere ’utuāfare maita’i ’o Mike ē, hō’ē ana’e rorouira na’ina’i tā mātou, e toru tamari’i ’e ’o vau, nō te māta’ita’i i te ’āmuira’a rahi i ni’a iho. ’Ua ani manihini ’oi’oi mai ’oia ia mātou ’ia haere i tōna fare nō te māta’ita’i ’e ’ōna ’e tāna vahine, ’o Jackie, ma te ha’apāpū mai ē, e au roa rāua ’ia haere mātou. E ’oa’oa rahi tō te mau tamari’i ’ia haere e māta’ita’i i te ’āmuira’a i ni’a i te hō’ē ’āfata teata mau ; ’ua māuruuru vau nō te tauturu ; ’e ’ua au roa mātou pā’āto’a i taua ha’aputuputura’a ra.

I muri iho, ’ua riro mai te māta’ita’i-’āmui-ra’a i te ’āmuira’a rahi ’ei peu tumu. Noa atu ’ua noa’a mai tā mātou iho ’āfata teata, e ’oa’oa noa mātou ’ia haere iō Mike ’e ’o Jackie ’e tō mātou mau tūru’a, te mau buka pāpa’i, ’e te mau mā’a ’amu’amu nō te ’āmuira’a rahi. Te fa’aro’o-’āmui-ra’a i te mau parau a te mau peropheta, ’ua riro ïa ’ei mea ta’a ’ē a’e. ’Ua riro mai mātou mai te hō’ē ’utuāfare. ’Ua riro mai ’o Mike ’e ’o Jackie te tahi o tō’u mau hoa maita’i a’e ’e ’ei mau metua rū’au nō tā’u mau tamari’i. ’Ua riro tō rāua here ’e te hoara’a ’ei ha’amaita’ira’a fa’ahiahia nō tō’u ’utuāfare. E māuruuru rahi tō’u nō tō rāua hina’aro ’ia ’īriti mai i tō rāua fare ’e tō rāua ’ā’au ia mātou.

Suzanne Erd, California, USA

Mau parau tumu e tāpe’a mai

« ’Ite atu »

Ma te here, ’ua rave te Fa’aora i te taime nō te ’ite i te mau hina’aro o vetahi ’ē ’e i muri iho ’ua pāhono i te reira mau hina’aro (hi’o Mataio 9:35–36 ; Ioane 6:5 ; 19:26–27). E nehenehe tātou e nā reira ato’a.

« ’A ani manihini i reira iho »

I muri a’e i te ’itera’a tātou i te mau hina’aro o te feiā tā tātou e aupuru, te ta’ahira’a i muri iho, ’o te ravera’a ïa.« Fa’aro’ora’a i te mau parau a te mau peropheta »

E ti’a ia tātou ’ia « putuputu pinepine » (Moroni 6:5) nō te ha’api’i ’āmui, nō te tupu ’āmui i te rahi, ’e nō te paraparau nō ni’a i te mau mea pae vārua tei riro ’ei mau mea faufa’a nō tō tātou vārua.

« Haere mai, e fa’aro’o i te reo o te hō’ē peropheta, ’e ’ia fa’aro’o i te parau a te Atua »,² ’o te hō’ē ïa o te mau anira’a manihini faufa’a roa a’e tā tātou e nehenehe e hōro’a i te feiā tā tātou e aupuru.

« Here ’e fa’ahoa »

Nō te tauturu ’e nō te ha’aputapū mau ia vetahi ’ē, tītauhia ia tātou ’ia ha’amau i te mau auta’atira’a ma te aroha ’e « te here ha’avare ’ore » (hi’o Te Parau Ha’api’ira’a ’e te mau Parau Fafau 121:41).

Fa’a’ite i ni’a i te natirara

« Te mau rāve’a ha’apararera’a tōtiare e mau mauha’a te reira nō te ao nei ’o te nehenehe e ha’aputapū maita’i i te mau ta’ata ’e i te mau ’utuāfare. ’E tē ti’aturi nei au ē, ’ua tae i te taime e fa’a’ohipa ai tātou, te mau pipi a te Mesia, i teie mau mauha’a fa’auruhia ma te maita’i nō te fa’a’ite pāpū nō ni’a i te Atua te Metua mure ’ore, tāna fa’anahora’a nō te ’oa’oa nō tāna mau tamari’i, ’e tāna tamaiti, o Iesu Mesia, ’ei Fa’aora nō te ao nei. » —Elder David A. Bednar³

E nehenehe tātou e fa’a’ite i te ’evanelia i te ao tā’āto’a nei nā roto i te natirara. Mea au nā’u tera ! E fa’a’ite atu vau i te tahi mau ’ohipara’a nō te ’āmuira’a rahi, te rahira’a rā o te taime, tē tāmata nei au i te tauturu ia vetahi ’ē ’ia fa’atupu i te hō’ē tāu’aparaura’a nō ni’a i te mau a’ora’a o te ’āmuira’a rahi. E nehenehe te ’itera’a i te mau uira’a nō roto mai ia vetahi ’ē, e tauturu pinepine ia tātou ’ia hi’o i te mau mea i roto i te hō’ē hi’ora’a ’āpī, ’e e nehenehe te reira e riro ’ei tahua nō tā tātou iho mau uira’a nō te tāu’aparaura’a.

’Ua ’itehia iā’u ē, mai te mea ē, e fa’a’ohipa ’outou i te mau uira’a nō te tāu’aparau i te mau a’ora’a o te ’āmuira’a ’e tā ’outou mau ’utuāfare e aupuru ra, e tauturu ïa te reira ia ’outou ’ia ’ite i tō rātou pūai ’e tō rātou ato’a mau hina’aro. Hō’ē o tā’u mau uira’a au roa e ani, ’oia ho’i, i tō ’outou mana’o, e aha te parau tumu o te ’āmuira’a rahi i ma’iri a’e nei ?

Fātata i te mau taime ato’a, e fa’a’ite mai te pāhonora’a ia ’outou e aha tē tupu nei i roto i tō rātou orara’a, ’e e aha te mea faufa’a nō rātou. E tauturu te reira ia ’outou ’ia riro ’ei taea’e ’aore rā, ’ei tuahine aupuru maita’i a’e nō te mea, e ’ite māramarama atu ’outou i te reira.

Camille Gillham, Colorado, USA

Mau parau tumu e tāpe’a mai

« Fa’a’ite i te ’evanelia »

’Ua fafau tātou « ’ia ti’a ’ei ’ite o te Atua i te mau mahana ato’a, ’e i te mau mea ato’a, ’e i roto i te mau vāhi ato’a » (Mosia 18:9).

« Fa’atupu i te hō’ē tāu’aparaura’a »

E nehenehe te mau parau poro’i nō te ’āmuira’a rahi e fa’auru i te mau paraparaura’a fa’ahiahia, te tano maita’i, ’e te pae vārua. ’E e nehenehe teie huru tāu’aparaura’a e ha’apūai i tō ’outou mau autā’atira’a, e tauturu i tō ’outou ’itera’a pāpū ’ia tupu i te rahi, ’e e hōro’a mai i te ’oa’oa ia ’outou ! (hi’o Te Parau Ha’api’ira’a ’e te mau Parau Fafau 50:22).

« Fa’a’ohipa i te mau uira’a »

« E tauturu te mau uira’a maita’i ia ’outou ’ia hāro’aro’a i te ’ana’anatae, te māna’ona’o, ’aore rā, te mau uira’a a vetahi ’ē. E nehenehe te reira e ha’amaita’i i tā ’outou ha’api’ira’a, e ani manihini i te Vārua, ’e e tauturu i te ta’ata ’ia ha’api’i mai. »⁴