Parau tumu nō te aupurura’a, Tiurai 2019

Nāhea tātou ’ia fa’atupu i te hō’ē hīro’a tumu nō te fa’aōra’a i te ’Ēkālesia ?

’Ia hi’o haere ana’e tātou i tā tātou mau pāroita ’e tā tātou mau ’āma’a, tē ’ite nei tātou i te mau ta’ata e au ra e mea ’ōhie i te fa’aōra’a mai. Te mea tā tātou e ’ore e ’ite nei, ’oia ho’i i rotopū i te feiā e fa’aō mai nei, e rave rahi o rātou e mana’o ra ’ua vaiihohia rātou i te hiti. ’Ei hi’ora’a, tē fa’a’ite nei te hō’ē hi’opo’ara’a ’aita i maoro a’e nei ē, fātata te ’āfara’a o te feiā pa’ari marite e parau nei ē tē ’ite nei rātou i te vai-’ōtahi-ra’a, te tāu’a-’ore-ra’a, ’aore rā te mo’emo’era’a a vetahi ’ē.¹

E mea faufa’a roa ’ia ’ite ’ua fa’aōhia i roto. ’O te hō’ē hina’aro ta’ata faufa’a rahi roa, ’e ’ia ’ite ana’e tātou i te vaiihora’a i te hiti, mea māuiui mau. ’Ia vaiiho-ana’e-hia tātou i te hiti, e tupu mai te mau ’āehuehu o te ’oto ’e te ’iriā.² ’Ia ’ite ana’e tātou ’aita tō tātou e tā’amura’a, e haere tātou e ’imi i te hō’ē vāhi i reira tātou e fāna’o ai. E ti’a ia tātou ’ia tauturu i te mau ta’ata ato’a ’ia ’ite ē e tā’amura’a tō rātou i te ’ēkālesia.

’Oia ato’a mai te Fa’aora ra te huru

’O te Fa’aora te hi’ora’a maita’i roa nō te ha’afaufa’ara’a ’e te fa’aōra’a mai ia vetahi ’ē. I tōna mā’itira’a i tāna mau ’āpōsetolo, ’aita ’oia i ha’apa’o i te ti’ara’a, te tao’a rahi ’aore rā te tōro’a teitei. ’Ua ha’afaufa’a ’oia i te vahine nō Samaria i te ’āpo’o pape, i te fa’a’ite-pāpū-ra’a ’iāna i tōna [te Mesia] hanahana, noa atu te vahavaha o te mau ’āti Iuda i te mau ta’ata nō Samaria (hi’o Ioane 4). E hi’o ’oia i te ’ā’au, ’e ’aita e ha’apa’o i te huru o te ta’ata (hi’o 1 Samuela 16:7 ; Te Parau Ha’api’ira’a ’e te mau Parau Fafau 38:16, 26).

Tē nā ’ō mai ra te Fa’aora :

« E tu’u atu vau i te parau ’āpī nā ’outou, e aroha ’outou ia ’outou iho, mai iā’u e aroha atu ia ’outou na, e aroha ato’a ho’i ’outou ia ’outou iho.

« O te mea teie e ’ite ai te ta’ata ato’a ē, e pipi ’outou na’u, ’ia aroha ’outou ia ’outou iho » (Ioane 13:34–35).

E aha tā‘u e nehenehe e rave ?

I te tahi taime e mea fifi roa ’ia parau mai te peu tē mana’o ra te hō’ē ta’ata tei rāpae’au ’oia. ’Aita te rahira’a o te mau ta’ata e parau mai---’eiaha ra ma te māramarama roa. Ma te ’ā’au aroha rā, te arata’ira’a a te Vārua Maita’i, ’e hō’ē tauto’ora’a ’ia vai ara noa, e nehenehe tātou e ’ite ē i te hō’ē ta’ata e mana’o ra e ’aita e fa’aō mai ra i roto i te mau purera’a ’e te mau fa’a’oa’oara’a a te ’Ēkālesia.

Mau tāpa’o pāpū tē mana’o ra te hō’ē ta’ata ’ua vaiihohia i te hiti :

• ’Ua piri te parau tino, mai te mau rima tufene ’aore rā, te mau mata taūpe.

• E pārahi ra i muri i roto i te piha ’aore rā, tē pārahira’a ōna ana’e.

• ’Aita e haere mai nei i te purera’a ’aore rā varavara roa ’ia haere mai.

• E ho’i ’oi’oi ’ia oti te mau purera’a ’aore rā te mau fa’a’oa’oara’a.

• ’Aita e ’āmui mai i roto i te tau’ara’a parau ’aore rā te ha’api’ira’a.

E riro ato’a teie ’ei mau tāpa’o nō te tahi atu mau urupu’upu’u, ’oia ho’i mai te ’ōpiripiri, te ahoaho, ’aore ra, te au ’ore. E nehenehe te mau melo e ’ite i te « ta’a-’ē-ra’a » ’ia riro mai rātou ’ei mau melo ’āpī nō te ’Ēkālesia, nō roto mai i te tahi ’ē atu fenua ’aore rā te tahi ’ē atu hīro’a tumu, ’aore rā, ’ua ’ite i te hō’ē tauira’a ’āhitahita o te orara’a, mai te fa’ata’ara’a, te pohe o te hō’ē melo o te ’utuāfare, ’aore rā te ho’i-’oi’oi-raa mai nā te misiōni.

Noa atu te huru o te tumu, ’eiaha tātou e fea’a nō te hōro’a i te here. Te mea tā tātou e parau ’e te mea tā tātou e rave e fa’atupu i te hō’ē ’āehuehu ē e fāri’i-poupou-hia te tā’āto’ara’a ’e e mea hina’aro-mau-hia rātou.

Te tahi mau rāve’a nō te fa’aō mai i roto ’e te fāri’i-poupou-ra’a :

• ’Eiaha e pārahi noa i piha’i iho i taua mau ta’ata noa nei ā.

• E hi’o i ō atu i te hōho’a o te ta’ata nō te ’ite mai i te ta’ata mau. (Nō te fa’ananea roa atu i teie tumu parau, hi’o « Aupurura’a ’o te hi’ora’a ia vetahi ’ē mai tā te Fa’aora e rave ra », Liahona, Tiunu 2019, 8 – 11).

• Fa’aō mai ’ia vetahi ’ē i roto i te mau ’āparaura’a.

• Ani manihini ’ia vetahi ’ē ’ia riro ’ei tufa’a nō tō ’outou orara’a. E nehenehe ’outou e fa’aō ia rātou i roto i te mau fa’a’oa’oara’a tā ’outou i fa’anaho a’ena.

• ’Imi ’e patu i te hō’ē ā fa’a’ana’anataera’a.

• ’Eiaha e pāto’i i te fa’ahoara’a nō te mea noa ’aita hō’ē ta’ata e pāhono i tā ’outou mau tīa’ira’a.

• ’Ia ’ite ’outou i te hō’ē ’ohipa ta’a ’ē nō ni’a i te hō’ē ta’ata, ’ia ’ana’anatae atu i te reira, ’eiaha e tāu’a ’ore ’aore rā e ’āpe atu.

• Fa’a’ite i te here ’e ’ia parau ha’amāuruuru ma te ’ā’au tae.

• Rave i te taime nō te feruri i te aura’a mau ’ia parau tātou ē nō te mau ta’ata ato’a te ’Ēkālesia, noa atu te huru o tō rātou huru ta’a ’ē. Nāhea tātou ’ia fa’ariro i te reira ’ei parau mau ?

E ’ere i te mea ’ōhie noa ’ia ’ite i te au maita’i ’e te mau ta’ata ta’a ’ē atu ia tātou. Nā roto rā i te ravera’a, e nehenehe tātou e ’ite maita’i mai i te faufa’a i roto i te ta’a-’ē-ra’a ’e ’ia māuruuru i te tauturura’a hō’ē a te ta’ata tāta’itahi. Mai tā Elder Dieter F. Uchtdorf nō te pupu nō te Tino ’Ahuru ma Piti ’āpōsetolo i ha’api’i, e nehenehe tō tātou mau ta’a-’ē-ra’a e tauturu ’ia tātou ’ia riro ’ei mau ta’ata maita’i a’e ’e te ’oa’oa a’e : « Haere mai, ’a tauturu ia mātou ’ia patu ’e ’ia ha’apūai i te hō’ē peu rāpa’aura’a ’e te hāmani maita’i ’e te aroha i te mau tamari’i a te Atua ».³

Ha’amaita’ihia nā roto i te fa’aōra’a mai

’Ua fa’anu’u atu ’o Christl Fechter i roto i te tahi atu fenua i muri a’e i te tama’i tei ha’aparari i tōna fenua ’āi’a. ’Aita ’oia e parau pāpū maita’i i te reo ’e ’aita i mātau noa a’e hō’ē ta’ata i roto i tōna nohora’a ’āpī, ’ua ha’amata ’oia i te ’ite i te ’ōtahira’a ’e te mo’emo’e.

’Ei melo nō te ’Ēkālesia, ’ua fa’a’ite ’oia i te itoito ’e ’ua ha’amata i te haere pinepine i tāna pāroita ’āpī. ’Ua pe’ape’a ri’i ’oia ē, e ha’afifi tāna huru paraparau i te mau ta’ata e hina’aro e paraparau iāna ’aore rā e ha’avāhia ’oia nō tōna vai-’ōtahi-ra’a.

’Ua fārerei rā ’oia i te tahi mau ta’ata tei tāu’a ’ore i tōna mau ta’a-’e-ra’a ’e tei fāri’i poupou iāna i roto i tā rātou ’āmui-tahi-ra’a hoa. ’Ua fa’atoro rātou i te rima o te here, ’e ’aita i maoro roa ’ua ’itehia ’oia e tē ha’api’i ra i te hō’ē piha nō te Paraimere. ’Ua riro te mau tamari’i ’ei mau hi’ora’a maita’i nō te fāri’ira’a ’e te ’āehuehu ’ua herehia ’ōna ’e te hina’aro ’ia ha’apūai i tōna fa’aro’o ’e te tauturu ’ia fa’aoraorahia tōna itoito tāmau i te Fatu.

© 2019 nā Intellectual Reserve, Inc. All rights reserved. Nene’ihia i te Fenua Marite. Parau fa’ati’a nō te reo peretāne : 6/18. Parau fa’ati’a nō te ’īritira’a : 6/18. ’Īritira’a nō Ministering Principles, July 2019. Tahitian. 15768 895

Fa’ata’ara’a

1. Hi’o Alexa Lardieri, « Study: Many Americans Report Feeling Lonely, Younger Generations More So », U.S. News, 1 nō Mē 2018, usnews.com.

2. Hi’o Carly K. Peterson, Laura C. Gravens, ’e Eddie Harmon-Jones, « Asymmetric Frontal Cortical Activity and Negative Affective Responses to Ostracism », Social Cognitive and Affective Neuroscience, buka 6, nūmera 3 (June 2011), 277–85.

3. Dieter F. Uchtdorf, « Tē ti’aturi nei, tē here, e rave », Liahona, Novema 2018, 48.

E ’ite hau atu ā

Nō te mau mana’o hau atu, e tai’o « We Can Do Better: Welcoming Others into the Fold », Liahona, Tetepa 2017.

Fa’a’ite mai i tō ’outou mau ’itera’a

Hāpono mai i tō ’outou mau ’itera’a ’a aupuru ai ’outou ia vetahi ’ē ’aore rā ’a aupuruhia ai ’outou. Haere i ni’a liahona.lds.org ’e ’a pata i te « ’Āfa’i te parau pāpa’i ’aore rā, te hō’ē mana’o ».

Tu’ura’a i te reira i roto i te fa’a’ohipara’a

Te tuahine Linda K. Burton, peresideni tahito o te Sōtaiete Tauturu, ’ua ha’api’i ē, « A hi’o nā mua, i muri iho ’a tāvini » (Liahona, Novema 2012, 78). E nehenehe te pe’era’a i teie mau arata’ira’a e tauturu ia tātou ’ia fa’atupu i te mau pāroita ’e te mau ’āma’a i reira te mau ta’ata ato’a e fa’aōhia mai ’e e hina’arohia ai. Teie fa’ahou te tahi mau mana’o ’ia feruri :

• ’Ia tomo mai tātou i roto i te fare purera’a o tā tātou ’ēkālesia, e nehenehe tātou e hi’o ha’ere ’e ’ia ’ite ’o vai te ta’ata tā te Fatu e tītau ia tātou ’ia hōpoi mai i roto i tā tātou pupu hoara’a i taua mahana ra.

• I te tahi taime e ’āpe tātou i te feiā tei ta’a ’ē ia tātou ’aore rā, ’o tē fifi nei i roto i te orara’a nō te mea ’ua mata’u tātou ’ia parau atu i te hō’ē ’ohipa hape. E nehenehe te reira e vaiiho ia rātou ’ia mana’o i te vai-’ōtahi-ra’a, ’e i te ui ē nō te aha ’aita te ta’ata e paraparau ia rātou…Pārahi i piha’i iho ia rātou, fa’a’ite i te here, ’e e ui i te mau uira’a ma te ’ā’au tae. Ani ia rātou i tō rātou mau ’itera’a ’e tō rātou mau tamatara’a ’e nāhea ’outou ’ia tauturu atu ia rātou.

• I roto i tā tātou mau a’ora’a, ’e i roto i tā tātou mau ha’api’ira’a Sābati, e nehenehe tātou e mā’iti e fa’a’ohipa i te mau hi’ora’a e fa’a’ite ra i te mau ta’ata ’e te mau ’utuāfare i roto i te mau orara’a huru rau e ora nei i te ’evanelia ’e ’o tē ’oa’oa nei i tāna mau ha’amaita’ira’a.

• E nehenehe te mau pīahi o te piha e ha’amaita’i-rahi-hia ’ia fa’aō ana’e mai te mau ’orometua ha’api’i i te mau melo nō te mau matahiti rau, te mau nuna’a ato’a, ’e te huru orara’a o te ’utuāfare. E rave rahi mau mea tā tātou e ’apo mai nā roto mai i te mau melo ha’apa’o maita’i rau o te ’Ēkalesia tei fāri’i i te mau ’itera’a ta’a ’ē i tō tātou.

• E fa’atupu te mau ’orometua ha’api’i i te hō’ē aura’a pāpū i reira te tā’āto’ara’a e fa’a’ite mai ai i tō rātou mau ’itera’a nō te orara’a i te ’evanelia. I te mau taime ato’a e e fa’a’itehia mai te hō’ē parau fa’ata’a, e nehenehe te hō’ē ’orometua ha’api’i e pāhono ma te maita’i i te hō’ē mea tei pūpūhia mai. I reira te mau pīahi o te piha e ’ite ai i te au maita’i ’e te pāpū nō te fa’a’ite mai i tō rātou mau mana’o.