Aupurura’a nā roto i te purera’a ’ōro’a

Tē hōro’a nei te purera’a ’ōro’a i te mau rāve’a nō te ’āparau ’e nō te aupuru ia vetahi ’ē.

’Ua riro te purera’a ’ōro’a ’ei taime nō te fāri’ira’a i te mā’a vārua ’e te ferurira’a i te Fa’aora ’e i tāna tāra’ehara. ’Ia rave tātou i te ’ōro’a mo’a i te hepetoma tāta’itahi, e fa’ateitei-’āmui-hia tātou (a hi’o i Te Parau Ha’api’ira’a ’e te mau Parau Fafau 84:110). Terā rā, i roto i tā tātou mau pāroita ’e mau ’āma’a, tē amo nei te tahi pae i te mau hōpoi’a teimaha ’aore rā, ’aita roa atu e tae mai nei.

Teie te tahi mau rāve’a e nehenehe tātou e fa’a’ohipa i taua hora mo’a ra nō te aupuru ia vetahi ’ē ’e nō te fa’atupu i te hō’ē ta’a-’ē-ra’a i roto i tō rātou orara’a.

Tauturu ’ia fa’ariro i te purera’a ’ōro’a ’ei purera’a maita’i a’e nō te feiā tā ’outou e aupuru nei.

Te ta’ahira’a mātāmua nō te ha’api’i nāhea ’ia aupuru, maori rā, e ’imi ’ia mātau i te ta’ata ’aore rā, te ’utuāfare ’e ’ia ’ite i tō rātou mau hina’aro. Tē vai ra te mau rāve’a e nehenehe ’outou e tauturu ’ia fa’atupu i tā rātou ha’amorira’a ’ei ’itera’a maita’i atu nā roto noa i te fa’arahira’a i tō ’outou ’itera’a nō ni’a ia rātou.

Nō Mindy, hō’ē metua vahine ’āpī nō nā tamari’i na’ina’i maeha’a, ’ua fa’atupu te mau tauto’ora’a ’ōhie a tōna tuahine aupuru i te hō’ē ta’a-’ē-ra’a rahi i roto i tōna ’itera’a nō ni’a i te purera’a ’ōro’a i te hepetoma tāta’itahi.

« Nō te tārena ’ohipa a tā’u tāne, nā’u iho e ’āfa’i i tā’u nā tamāhine maeha’a i te purera’a i te mau hepetoma ato’a », te parau ïa a Mindy. « E mea teimaha mau ’ia pārahi i roto i te roara’a o te purera’a ’ōro’a ’e e piti nā tamari’i na’ina’i ha’uti noa, ’aua’a a’e rā, ’ua tauturu mai tō’u tuahine aupuru iā’u.

« E pārahi ’oia i pīha’i iho ia mātou ’e e tauturu mai ’oia iā’u ’ia ha’apa’o i tā’u nā tamāhine i te mau hepetoma ato’a. E mea faufa’a roa ’ia ’ite ē, tei pīha’i iho ’oia iā’u, ’e e marū roa tō’u mana’o pe’ape’a i roto i tō rāua mau taime ’āehuehu. Tē mana’o nei au ē, e’ita roa atu ’oia e ’ite i te faufa’a rahi o tā tāna ’ohipa i fa’atupu i ni’a i tō’u orara’a i teie taime. ’Ua ’ite ’oia i tō’u hina’aro ’ei metua vahine ’āpī tei ’ī roa i te pe’ape’a, ’e tē tauturu nei ’oia ’ia fa’ariro i te fare purera’a ’ei vāhi hau ’e te ’oa’oa nō tātou pā’āto’a ».

Mau mana’o nō te tauturu i te feiā e hina’aro ta’a ’ē tō rātou

’A fa’a’ite i te feiā fa’atere nō te pupu peresibutero ’e te Sōtaiete Tauturu i te mau hina’aro o te mau melo.
E fa’anaho te feiā fa’atere i te mau a’ora’a nō te purera’a ’ōro’a nō te tauturu i te pāhonora’a i te mau hina’aro o te mau melo. Mai te mea ē, e fāna’o te mau ta’ata tā ’outou e aupuru ra ’ia fa’aro’o i te hō’ē parau poro’i, ’a fa’a’ite atu i te reira mana’o i tō ’outou feiā fa’atere.
Mai te mea ē, e ’ite ’outou ē, e fifi tō te hō’ē ta’ata, ’aore rā, e tōmea mā’a, ’e ’aita e nehenehe iāna ’ia fāna’o i te mau ha’amaita’ira’a o te ’ōro’a mo’a, ’a ani ia rātou i te mau ha’apāpūra’a, ’e e aha te mau fa’atanotanora’a e nehenehe e rave nō te ha’amaita’i i tā rātou ’ohipa ha’amorira’a. ’A fa’a’ite i teie mau ha’amāramaramara’a i tō ’outou feiā fa’atere.
Mai te mea ē, te ta’ata tā ’outou e aupuru nei ’aore rā, tā ’outou i mātau, tē mau nei ’oia i te fare, nō te hō’ē tau roa ’aore rā, nō te hō’ē tau poto, ’a ani i tō ’outou ’episekōpo, e nehenehe ānei e hōpoi i te ’ōro’a mo’a nā rātou i tō rātou fare. E nehenehe ato’a ’outou e tāpa’opa’o i te mau parau i roto i te purera’a ’ōro’a ’e e fa’a’ite atu ia rātou nā roto i te niuniu, nā roto i te rata uira, ’aore rā, e haere tino roa e fārerei.
Mai te mea ē, e tamari’i ’āpī tā te hō’ē ta’ata tā ’outou e aupuru nei, e nehenehe ’outou e pūpū i te tauturu ia rātou i roto i te purera’a ’ōro’a.
Mai te mea ē, te feiā tā ’outou e aupuru nei, ’aita rātou e haere pinepine mai i te purera’a ’ōro’a, ’a tāmata ’ia māramarama ’e ’ia feruri i te mau rāve’a e nehenehe ’outou e tauturu. Mai te mea ē, tē fifi ra rātou nō te utara’a, e nehenehe ’outou e pūpū ’ia fa’auta ia rātou. Mai te mea ē, te mana’o ra rātou ē, ’aita tō rātou fēti’i e turu mai nei ia rātou, e nehenehe ’outou e ani ia rātou ’ia pārahi i pīha’i iho ia ’outou. E nehenehe ’outou e fa’atae i te mau anira’a ta’a ’ē nō te tauturu ia rātou ’ia ’ite ē, tē fāri’i-poupou-hia nei rātou ’e tē hina’arohia nei rātou i roto i te purera’a ’ōro’a.

’A ha’amana’o ē, e vai maoro te mau ’ohipa ’ōhie.

Nō ni’a i te aupurura’a, ’ua ha’api’i mai te tuahine Jean B. Bingham, peresideni rahi nō te Sotaiete Tauturu : « I te tahi mau taime, e mana’o tātou ē, ’o te mau ’ohipa teitei ’e te tu’iro’o tē ‘tai’ohia’ ’ei tāvinira’a i tō tātou mau ta’ata tupu. Teie rā, ’o te mau tāvinira’a ha’iha’i te fa’atupu i te mau hope’ara’a pūai i ni’a ia vetahi ’ē—’e i ni’a ato’a ia tātou iho.»¹

I roto i te hō’ē pāroita na’ina’i i te fenua Peretita, pinepine ’o Evita i te ani ’ia ’auvaha nō te mau rātere ’e te mau melo paraparau pāniora i roto i te mau purera’a a te ’Ēkālesia. I te hō’ē taime, ’ua fa’a’itehia atu ’o Evita i te hō’ē ta’ata nō te Repūpirita Dominika, ’o tē ’imi ra ’ia ’ite nō ni’a i te ’Ēkālesia. ’Ua ta’a ri’i iāna te reo Peretāne, terā rā, e pāniora tōna reo tumu. Nō reira ’ua fāri’i ’o Evita ’ia ’auvaha marū noa iāna i roto i te purera’a ’ōro’a, ’ia nehenehe ’oia ’ia vai au māite noa.

« I te tahi taime, e nehenehe te ’auvahara’a e fa’a’āehuehu ri’i i tā’u sābati », te reo ïa o Evita. « Terā rā, nā roto i te pe’era’a i te fa’aurura’a ’ia ani ia vetahi ’ē e hina’aro ānei rātou i te hō’ē ta’ata ’auvaha, nā te reira e hōro’a mai iā’u i te ’oa’oa ’e te māhanahana ’ia ’ite ē, e nehenehe au e tauturu ia rātou ’ia fāri’i i te Vārua ’e ’ia ’oa’oa i tā rātou purera’a ».

Mau mana’o nō te tauturu nā roto i te mau ’ohipa ’ōhie

’A paraparau i tō ’outou feiā fa’atere ’ia hi’o ē, ’o vai te hina’aro i te tahi tauturu hau atu i roto i te purera’a ’ōro’a. ’Aore rā, mai te mea ē, tē ’ite ra ’outou i te hō’ē ta’ata e hina’aro i te tauturu, ’a ha’apāpū ē, ’ua ’ite tō ’outou feiā fa’atere i te reira mau ta’ata.
’A pārahi ma te māniania ’ore ’a tīa’i noa ai ’outou ’ia ha’amata te purera’a. E tauturu te reira i « te tahi atu mau ’ā’au tātarahapa ’e te vārua ’oto ’ati a’e ia tātou » ² ’o tē hina’aro i te hau, ’o tē tae mai nā roto i te fa’atura i roto i te hō’ē vāhi mo’a.
I te sābati ha’apaera’a mā’a, e nehenehe e fa’ata’a i tā ’outou ha’apaera’a ’e te mau pure nō te hō’ē ta’ata tā ’outou e utuutu nei, ’o tē hina’aro ra i te tāmāhanahana rahi atu.
’A pure nō te ’ite ē, tē vai ra ānei te hō’ē ta’ata e fāna’o ’ia pārahi ’outou i pīha’i iho ia rātou i roto i te purera’a ’ōro’a ’aore rā, tē vai ra ānei te tahi atu rāve’a e nehenehe ’outou e tauturu.

E nehenehe te purera’a ’ōro’a e riro ’ei vāhi fāri’i-poupou-ra’a nō te ta’ata ato’a.

’Ua ha’api’i te peresideni Joseph Fielding Smith (1876–1972), « ’O te purera’a ’ōro’a te purera’a mo’a roa a’e i te mau purera’a ato’a a te ’Ēkālesia ».³ Nō reira, e mea faufa’a roa ’ia ha’apāpū ē, ’ua fāri’i-maita’i-hia ānei te mau ta’ata ato’a tei tae mai i te purera’a ’ōro’a, ’e ’ua fāri’i maita’i ānei i te mā’a vārua— te mau melo ’āpī iho ā rā, ’e ’aore rā, te mau melo e mea maoro ’aita e haere fa’ahou mai nei i te purera’a.

’Ua fa’ahoa ’o Merania, nō New South Wales, Auteraria, i te hō’ē vahine e ha’api’i mai nei nō ni’a i te ’Ēkālesia, i roto i tāna pāroita. « ’Ua riro mai ’oia ’ei hō’ē o tō’u mau hoa rahi roa i teienei », tē nā reira ra ’o Merania. « E mea au roa nā’u ’ia pārahi i pīha’i iho iāna i roto i te purera’a ’ōro’a i te mau hepetoma ato’a, ’e e ani tāmau vau iāna ē, e aha tōna huru, ’e tē vai ra ānei hō’ē mea tā’u e nehenehe e rave nō te tauturu iāna ». I muri a’e, ’ua bāpetizohia te hoa o Merania. ’Ua riro te mau tauto’ora’a a te mau melo o te pāroita, ’e tae noa atu i te huru fāri’i i ’itehia i roto i te purera’a ’ōro’a, ’ei tuha’a rahi i roto i tāna fa’aotira’a.

Te mau mana’o nō te utuutu i te mau melo e ho’i mai nei ’aore rā, te mau melo ’āpī.

Mai te mea ē, e paraparau ’outou i roto i te purera’a ’ōro’a, e nehenehe ’outou e ani i tō ’outou mau hoa, te ’utuāfare, ’e vetahi ’ē ’ia haere mai e fa’aro’o i tā ’outou parau poro’i.
E nehenehe ’outou e ’imi ’e e fāri’i poupou ia rātou tei vai ’ōtahi ’aore rā, tei hina’aro i te tauturu. ’A ani e nehenehe ānei ’outou e pārahi i pīha’i iho ia rātou ’aore rā, ’a ani ia rātou ’ia pārahi mai i pīha’i iho ia ’outou.
’Ia fa’aoti te purera’a, e nehenehe ’outou e ani i te feiā tā ’outou e utuutu ra ’e ia vetahi ’ē atu, ’ia haere mai i te mau fa’a’oa’oara’a a te ’Ēkālesia, i te hiero, ’aore rā, i te hō’ē ’ohipa sōtiare.
Mai te mea ē, te hō’ē ta’ata tā ’outou e utuutu ra, e haere mai ’oia i te purera’a ’ōro’a, e mea maoro rā i teie nei ’aita ’oia i haere fa’ahou mai, e nehenehe ’outou e ani ia rātou ē, e uira’a ānei tā rātou nō ni’a i te mau mea i ha’api’ihia. ’A parau ia rātou ē, e fāri’i-poupou-hia rātou ’ia haere mai e fārerei ia ’outou mai te mea ē, tē vai ra te tahi ta’o, te tahi ’ā’amu, ’aore rā, te tahi ha’api’ira’a tumu ’aita rātou i hāro’aro’a maita’i. E nehenehe ’outou e ’imi ’āmui i te mau pāhonora’a, mai te mea ē, e tītauhia.

© 2020 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritira’a nō Ministering Principles, June 2020. Language. 16988 895