Mau parau tumu nō te aupurura’a, Māti 2020

Aupurura’a nā roto i te tāvinira’a hiero

’Ia tauturu ana’e tātou ia vetahi ’ē ’ia ’oa’oa i te mau ha’amaita’ira’a o te hiero, tē aupuru ra tātou.

Hōho’a

ministering

Nā muri mai i te mau hōho’a na Getty ; hōho’a nō te hiero nō Tegucigalpa Honduras

Parau tumu nō te aupurura’a, Mati 2020

Te haerera’a i te hiero e mau’ara’a maita’i te tauto’ora’a. ’Ua ha’api’i mai te peresideni Russell M. Nelson ē, « e mea faufa’a rahi roa ’ino te hiero nō tō tātou fa’aorara’a ’e tō tātou fa’ateiteira’a, nā reira ato’a nō tō tātou ’utuāfare…

« … Tītauhia nō tātou tāta’itahi te ha’apūaira’a pae vārua tāmau ’e te ha’api’ira’a tāmau e noa’a noa i roto i te fare o te Fatu ».¹

E tītau te haerera’a i te hiero i te ti’a’aura’a i tō tātou taime, tā tātou mau hōpoi’a, ’e tā tātou mau rāve’a, tae noa atu ’ia ineine tātou i te pae vārua. E aupuru tātou ’ia ’ite ana’e tātou i te mau pāruru e tāpe’a nei i tō tātou mau taea’e ’e mau tuahine ’ia tae i te hiero ’e ’ia tauturu ia rātou ’ia ’ite mai i te mau rāve’a.

E ha’amaita’ira’a te hiero ’o tā te mau ta’ata ato’a e nehenehe e fana’o.

Hō’ē misiōnare tei ho’i mai ’aita i maoro a’enei, ’o Meg, ’o tē haere ra i te ’ūputa o te hiero nō Kona Hawaii, ’ua ’ite atu i te hō’ē tamāhine ’āpī e pārahi ra ’ōna ana’e i ni’a i te pārahira’a i rāpae. ’Ua tae mai te mana’o ia Meg e ti’a iāna e paraparau i te tamāhine ’āpī, ’aita rā ’oia i pāpū e aha te parau atu. Nō reira, ’ua ani atu ’oia iāna i te aura’a o te hō’ē tātau i ni’a i te mōmoa ’āvae o te tamāhine ’āpī. Te reira te ha’amatara’a te tāu’ara’a parau tei fa’ati’a i te tamāhine ’āpī, ’o Lani, ’ia fa’a’ite mai i tōna ’ā’amu.

’Ua parau ’o Lani ia Meg i tōna fifi nō te ho’i mai ’ia ’āmui tā’āto’a mai i roto i te ’Ēkālesia, te mau mero maita’i ’o tei tauturu iāna, ’e i tōna ti’aturi ’ia tā’atihia ’oia i tāna tamāhine iti i te hō’ē mahana.

’Ua ani Meg ia Lani ’ia haere mai e pārahi i piha’i iho iāna i roto i te piha tīa’ira’a i roto i te hiero. ’Aita rāua e nehenehe e haere ātea atu i roto i te hiero, e nehenehe rā rāua e tomo atu nā te ’ūputa. ’Ua fāri’i Lani, ’e ’ua tomo ’āmui atu rāua nā te ’ūputa tumu. ’Ua fa’a’ite atu te hō’ē rave ’ohipa hiero i te hō’ē pārahira’a i raro a’e i te hō’ē hōho’a pēni o te Fa’aora.

’A pārahi ai rāua, ’ua muhumuhu atu Lani, « ’ua hina’aro mau vau e tomo i roto i te hiero i teie mahana, ’ua ’iriā rā vau ». Nō te mea ’ua pe’e Meg i te Vārua, ’ua tauturu ’oia ’ia pāhono i te pure muhu ’ore a Lani.

Mau mana’o nō te tauturu i te feiā ’aita e parau fa’ati’a.

’Oia ato’a te feiā ’aita ā tā rātou e parau fa’ati’a nō te hiero, e nehenehe rātou e ha’amaita’ihia e te hiero.

’A fa’a’ite atu i tō ’outou mau ’āehuehu e nāhea te Fatu i te ha’amaita’ira’a ia ’outou nā roto i te ’ohipa hiero.
’A ani i te hō’ē ta’ata ’ia haere mai i te hō’ē ’ōpani ’īriti o te hiero ’aore rā i te pū fāri’ira’a rātere. ’A ’ite mai i te mau ’ōpani ’īriti i te “temples.ChurchofJesusChrist.org.”
’A hi’o i te mau hōho’a ’e ’a ha’api’i rahi mai nō ni’a i te hiero i te “temples.ChurchofJesusChrist.org.”

’A fa’a’ōhie i te haerera’a i te hiero nō vetahi ’ē

’Oia ato’a nō te mau mero e parau fa’ati’a tā rātou nō te hiero, e ’ohipa fifi mau te haerera’a i te hiero. E tere ātea roa paha nō vetahi. Tō te tahi tē vai ra te mau tamari’i na’ina’i ’aore rā tē vai ra te mau mero ruhiruhiā o te ’utuāfare e tītauhia e ’atu’atu. E nehenehe tātou e ha’a ’āmui ’ia tupu te tāvinira’a hiero nō te tā’āto’ara’a.

’Ua tuauru roa ’o Leola Chandler i te ’atu’atura’a i tāna tāne fa’aipoipo ma’i ’e tā rāua e maha tamari’i. Nō reira, ’ua fa’aoti ’oia e fa’ata’a i te taime nō te haere i te hiero fātata mai i te mau mahana piti ato’a. ’Ua riro te reira ’ei puna nō te hau ’e te mana i roto i tōna orara’a.

I te hō’ē mahana ’ua fa’aro’o ’oia ē, tē hina’aro rahi nei te tahi mau tuahine ruhiruhiā i roto i tāna pāroita e haere i te hiero, ’aita rā tō rātou e pere’o’o. ’Ua pupu Leola e fa’ahoro ia rātou nā ni’a te pere’o’o. Nō nā e 40 matahiti i muri mai, e mea varavara roa ’oia i te haere ’ōna ana’e i te hiero.²

’Ua ha’amaita’ihia Leola, ’e ’ua ha’amaita’i ’oia ia vetahi ’ē ’a pupu ai ’oia i te ’āfa’i ia rātou nā muri iho iāna i te hiero.

Mau mana’o nō te tauturu ia vetahi ’ē ’ia haere i te hiero

Nāhea ’outou i te tauturu ia vetahi ’ē ’ia haere pinepine atu ā i te hiero ? E ’ite mai ’outou ē, e tauturu teie ā mau mana’o ia ’outou ato’a.

E haere ’āmui. E pupu e hōro’a ’aore rā e fa’anaho i te utara’a i te hō’ē ta’ata. E nehenehe te reira e fa’aitoito i te tahi atu ta’ata e haere ato’a i te hiero.
E ani i te mau mero o tō ’outou ’utuāfare ’aore rā, o tā ’outou pāroita ’ia tauturu mai ia ’outou i te ravera’a i te mau ’ōro’a nō tō ’outou mau tupuna, mai te mea iho ā ra e mea rahi tā ’outou mau i’oa ’utuāfare tei ineine nō te mau ’ōro’a.
E pupu e ha’apa’o i te mau tamari’i ’ia nehenehe i te mau metua e haere i te hiero. ’Aore rā, e ha’apa’o i te mau tamari’i te tahi i muri mai i te tahi.

E mea ātea ana’e te hiero

’Ua fa’aoti Chandradas « Roshan » ’e Sheron Antony nō Colombo, Sri Lanka, e tā’ati ia rāua i te hiero. ’Ua ’oa’oa roa tō rāua nā hoa ’o Ann ’e ’o Anton Kumarasamy nō rāua. ’Ua ’ite rā rātou ē, e ’ere i te mea ’ōhie ’aore rā i te mea māmā roa nō te haere i te hiero nō Manille i te fenua Philipino.

’Ua ha’aputu Roshan ’e ’o Sheron i tā rāua moni ’e ’ua tāpe’a e rave rahi ’āva’e te mau rerera’a manureva nō te fāri’i i te hō’ē rerera’a manureva e mara’a ia rāua. I te pae hope’a, ʼua tae mai te mahana. Terā rā, i te roara’a o tō rāua fa’aeara’a i Malaisia, ’ua ’ite mai rāua ē nō te haere i te fenua Philipino, e ti’a ia rāua e fāri’i i te hō’ē parau fa’ati’a tomora’a ’aore rā e rave i te hō’ē manureva nō te hō’ē taiete ’ē atu. ’Aita e nehenehe e fāri’i i te hō’ē parau fa’ati’a tomora’a, ’e ’aita e ti’a ia rāua ’ia ho’o mai i te mau tīteti nō te tahi atu taiete manureva ’ē. ’Aita rā i nehenehe ia rāua ’ia fa’aoroma’i i te mana’o ē e ho’i i te fare ma te ’ore i tā’atihia.

Ma te pāpū ’ore e aha te rave, ’ua niuniu Roshan ia Anton. ’Ua hina’aro rahi mau Anton ’e ’o Ann e taururu. ’Ua riro rāua ’ei hō’ē o te mau ta’ata fa’aipoipo varavara mau nō Sri Lanka tei tā’atihia i roto i te hiero, e ’ua ’ite rāua e aha te ha’amaita’ira’a nō te reira. Teie rā, ’ua fa’a’ohipa iho nei rāua i tā rāua moni ha’aputu nō te tauturu i te hō’ē mero o te ’utuāfare i roto i te fifi, ’e ’aita e nava’i tā rāua moni nō te tauturu ia Roshan ’e ia Sheron ’ia ho’o mai i te mau tīteti nō te hō’ē tere manureva ’āpī.

I Sri Lanka, e peu matauhia nō te tāne fa’aipoipo ’ia ho’o mai nō te vahine fa’aipoipo i te hō’ē fifi ’arapo’a ’auro. ’ia nehenehe i te vahine ’ia fāri’i i te moni ’ia pohe ana’e tāna tāne. ’Ua fa’aoti ’o Ann e ho’o i tōna fifi ’arapo’a nō te tauturu i te ho’o mai i te mau tīteti ’āpī. ’Ua fa’ati’a tāna tao’a hōro’a mau ia Roshan ’e ia Sheron ’ia rave i tā rāua fārereira’a i te hiero nō Manille.

« ’Ua ’ite au i te faufa’a o te tā’atira’a i te hiero », ’ua parau ’o Ann. « ’Ua ’ite au ē e riro ’o Sheron ’e ’o Roshan ’ei hō’ē pūai rahi nō te ’āma’a. ’Aita roa vau e hina’aro ’ia ’ere rāua i teie maita’i ».³

Mau mana’o nō te tauturu i te feiā ’aita e nehenehe e haere mai i te hiero

E nehenehe ’outou e pi’ihia e aupuru i te feiā ’aita e nehenehe e haere pinepine i te hiero ’aore rā ’aita roa atu e haere nō te ātea ’aore rā nō te mau ha’amau’ara’a. Terā rā, e nehenehe ’outou e ’ite mai i te mau rāve’a nō te tauturu ia rātou ’ia au maita’i i te mau ha’amaita’ira’a o te hiero.

E ha’api’i ’aore rā, e ’āmui tāhō’ē atu i roto i te hō’ē piha nō te fa’aineinera’a nō te hiero ’aore rā ’ā’amu ’utuāfare.
E hōro’a nā rātou i te hō’ē hōho’a nō te hō’ē hiero nō te tu’u i roto i tō rātou fare.
Mai te mea ’ua haere ’outou i te hiero, ’a fa’a’ite atu i tō ’outou mau ’āehuehu nō tō ’outou mau ’itera’a rau ’e tō ’outou ’itera’a pāpū nō te mau ’ōro’a o te hiero.
E tauturu ia rātou ’ia ha’api’i rahi mai nō ni’a i te mau fafaura’a tā rātou i rave ’e nāhea rātou ’ia ha’apa’o i te reira. ’A feruri i te fa’a’ohipa i « Te ta’a-maita’i-ra’a i tā tātou mau fafaura’a ’e te Atua : Hō’ē hi’ora’a nō tā tātou mau fafaura’a rahi roa a’e », i roto i te Liahona. nō Tiurai 2012

© 2020 nā Intellectual Reserve, Inc. All rights reserved. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritira’a nō Ministering Principles, March 2020. Tahitian.16985 895