Te aupurura’a
Te aupurura’a nā roto i te ’ā’amu ’utuāfare
Mau parau tumu

Mau Parau tumu nō te aupurura’a, Fepuare 2020

Te aupurura’a nā roto i te ’ā’amu ’utuāfare

ministering

Fa’ahōho’ara’a nā Joshua Dennis ; hōho’a muri ’e te hōho’a pata nā Getty Images

Parau tumu nō te aupurura’a, Fepuare 2020

’Ua riro te tauturura’a i te ta’ata i roto i tā rātou ’ā’amu ’utuāfare ’ei rāve’a pūai rahi nō te aupuru. ’Ia fa’atū’ati ’outou i te ta’ata ’e tō rātou mau tupuna nā roto i te ’ā’amu ’utuāfare ’e te tahi ato’a mau parau ri’i nō ni’a i te reira, e riro ’outou i te fa’a’ī i te hō’ē ’āpo’o i roto i tō rātou ’ā’au ’o tā rātou i ’ore i ’ite i te tahi taime (hi’o Malaki 4:5–6).

E melo ānei tei fa’aea i roto i te ’Ēkālesia i tōna orara’a tā’āto’a, ’aore rā e ta’ata ānei tei ’ore a’enei i fa’aro’o nō ni’a i te ’evanelia a Iesu Mesia tei fa’aho’ihia mai, tē vai nei i roto i te mau tamari’i ato’a a te Atua te hia’ai ’ia ’ite nō hea mai rātou.

Pinepine, ’aita e maoro nō te vaiho i te hō’e mana’o hōhonu ’e te vai tāmau, mai tei fa’a’itehia i roto i te mau ’ā’amu i muri nei.

Te ’itera’a i tōna fēti’i 9 km i roto i te reva

’Aita i maoro a’enei tei roto vau i te manureva nō te ho’i i te fare, ’ua pārahi au i pīha’i iho ia Steve, tei fa’a’ite mai iā’u i te hō’ē pae o tōna ’ā’amu. ’Ua noa’a tāna parau tū’ite nō te ha’api’ira’a tuarua ’e ’ua fa’aō iāna i roto i te nu’u fa’ehau Marite ’ei ta’ata ’aravihi nō te tūreiara’a, 18 matahiti tōna, ’āria ihora, ’ua ha’amata ’oia i te rave i te ’ohipa i te Fare ’uo’uo, i roto i te ’ohipa tūreiara’a nō te Peresideni o te Fenua Marite. Mai tōna 18ra’a matahiti ē 26 atu, ’ua tāvini ’oia e piti Peresideni nō te Fenua Marite. E mea fa’ahiahia mau tāna mau ’ā’amu !

’Ua nā ’ō atu vau : « ’Ua ’ite ’oe Steve, e pāpa’i ’oe i teie mau ’ā’amu nō tō ’oe hua’ai ! E mea tano roa ’ia fāna’o rātou i teie mau ’ā’amu mai ia ’oe iho, mai tā ’oe iho hi’ora’a ». ’Ua fāri’i ’oia i te reira.

Fa’auru ihora te Vārua iā’u ’ia ui iāna i tāna i ’ite nō ni’a i tōna mau tupuna. ’Ua ’ite maita’i ’o Steve i tōna fēti’i i te pae o tōna metua vahine, ’e tae noa atu te hō’ē ’ā’amu nō te tāmā’ara’a tōna tupuna i te hō’ē taime ’e ’o Abraham Lincoln ’a horo ai ’oia nā te reira mau pae nō te mā’itira’a peresideni nō te Fenua Marite i te matahiti 1860.

Terā rā ; ’aita ’oia i mātau roa i tōna mau fēti’i i te pae o tōna metua tāne. ’Ua hina’aro rā ’oia ’ia ’ite rahi atu ā nō rātou. Rave a’era vau i tā’u niuniu ’e tāumi a’era i ni’a i te fa’anahora’a FamilySearch. « ’Ua ’ite ’oe Steve, e nehenehe tāua e hi’o i tō ’oe tupuna i teienei ā taime ! »

Haere a’era vau i ni’a i te Wi-Fi o te manureva. Tu’u ihora vau i tā’u niuniu i ni’a i te ’iri ’aira’amā’a i mua iā’u, ’ia ’ite ato’a mai ’oia. ’Ua ’imi māua i roto i te Tumu rā’au ’utuāfare. Ma’a minuti noa, tē ’ite ra māua i te parau fa’aipoipora’a a te pāpā o tōna pāpā rū’au ’e tāna vahine.

« ’O rāua terā ! », ’ua nā ’ō mai ’oia. « Tē ha’amana’o nei au i tōna pa’era’a i teienei ! »

E vārua ’ana’anatae tei ha’amata i roto ia māua to’opiti. 45 minuti tō māua ’imira’a i te ha’aputu i te parau nō ni’a i tōna mau tupuna tāna i ’ore i mātau. ’Ua ani mai ’oia iā’u e tāmau ā māua i te mau mā’imira’a ’ia tae māua i Colorado. Tē fa’aineine ra te manureva i te tau i ni’a i te fenua, ’ua hōro’a vau i tā’u nūmera niuniu, ’ua hōro’a mai ’oia tāna.

Teie ïa māua nei, 9 km i roto i te reva, ’e terā mātini na’ina’i i roto i tō’u rima, tē ’imi ra i te hō’ē ta’ata ’e te hō’ē vahine tei fa’aipoipo ’a 100 matahiti i teienei, tei mo’ehia e āna ’e tōna ’utuāfare. E ’ohipa māere mau ! ’Ua ’ite rā māua ia rāua. ’Ua fa’atū’atihia te mau ’utuāfare. ’Ua fa’aha’amana’ohia te mau ’ā’amu. ’Ua tupu te mana’o māuruuru nō te mau rāve’a ’āpī ’e teie mau mauiha’a. E ’ere i te semeio nei.

Jonathan Petty, Colorado, Fenua Marite

Hā’atihia e te ’utuāfare ’āpī

’Ua hau i te 20 matahiti tō Maria ha’apaera’a i te haere i te purera’a. Tau ’āva’e i ma’iri, ’ua rave māua e piti hora i tōna fare nō te tuatāpapa i te parau nō tōna ’utuāfare, nā roto i te mau parau tai’ora’a huira’atira ’e te tahi ato’a mau parau. ’E i te hō’ē taime, ’ua nā ’ō mai ’oia ma te roimata ē : « ’Ua hau atu tā’u i ’’apo mai nō ni’a i tō’u mau tupuna i roto i nā hora e piti, i tā’u i ’apo mai i roto i tō’u orara’a tā’āto’a ! »

I te otira’a, ’ua fa’a’ite māua iāna i te fa’anahora’a ’imira’a i tō’u mau fēti’i ’ati a’e iā’u. ’Ua ’itehia mai ē, e fēti’i ātea ato’a māua tā’u tāne nō Maria. Ta’i fa’ahou mai nei ’oia ma te parau ē, ’ua mana’o roa ’oia ’o ’ōna ana’e tōna vaira’a. ’Aita ’oia i mana’o ē, e fēti’i tōna nā reira. Ma’a hepetoma i muri mai, ’ua fārerei Maria i tō mātou ’episekōpo. Tē fa’aineine ra ’oia i teienei nō te haere i te hiero, ’e ’ua rahi atu ā te mau taea’e ’e te mau tuahine fēti’i tāna i ’ite i roto i te pāroita !

Carol Riner Everett, North Carolina, Fenua Marite

Buka hāmanira’a mā’a nō te aupurura’a

’O Ashley ’e ’o vau nei tōna tuahine aupuru, e buka hāmanira’a mā’a tā māua mai roto mai i tō māua mau tupuna vahine. Tāna buka, mai roto mai ïa i te māmā o tōna māmā rū’au, ’e tā’u nei, nā’u ïa i hāmani ’ei buka i te noa’ara’a mai iā’u te ’āfata pu’e parau hāmanira’a mā’a a tō’u māmā rū’au Greenwood i te pohera’a ’oia.

’Ua mā’iti māua Ashley i te hō’ē mā’a i roto i tā māua nā buka hāmanira’a mā’a, ’e ’ua fārerei māua i muri iho i te ’ohipa, i te hō’ē pō, nō te tāmata i te tunu i te reira. E mā’a ri’i hope’a [dessert] tāna i rave, nō reira ’ua rave nā mua māua i te reira ’a tu’u atu ai i roto i te umu. Tā’u mā’a i rave, e mā’a parai ïa nō te chips—e mā’a mātauhia i roto i te mau rurura’a fēti’i Greenwood. ’Ua tauturu mai te tamāhine a Ashley ia māua nō te tāmatamata i te mā’a. Nō te mea rā, ’aita ’o Ashley i hina’aro ’ia pau te mā’a ri’i hope’a i te ’amuhia e tāna mau tamari’i, ’ua ’āfa’i ’oia i te tahi nā te mau tuahine tāna e aupuru nei.

Te mea tā’u i au roa i terā pō hāmanira’a mā’a tā māua, ’oia ho’i, ’ua tunu māua i te mā’a, ’ua paraparau māua nō ni’a i te mau tumu parau ato’a e au i te aupurura’a—tōna mau fifi ’e tō’u nei. ’Ua paraparau ato’a rā māua nō ni’a i tō māua nau māmā rū’au ’e te mau māmā, ’o tā māua ho’i e poihere nei.

Jenifer Greenwood, Utah, Fenua Marite

Rāve’a ta’a ’ē nō te tauturu atu

E nehenehe te ’ā’amu ’utuāfare e ha’amatara i te mau ’ūputa nō te aupurura’a i te taime e au ē, ’aita e rāve’a. Teie te tahi nau mana’o tā ’outou ’e nehenehe e tāmata.

  • Tauturu ia rātou ’ia haruharu i te mau ’ā’amu ’utuāfare ’e ’ia fa’ahaere i ni’a i te fa’anahora’a natirara, terā iho ā rā mau ’ā’amu e tū’ati i te mau hōho’a.

  • Hāmani i te hō’ē tuatāpapara’a ’utuāfare ha’amenemene ’aore rā te tahi parau mai te reira ’o tē nehenehe e hōro’a ’ei tāo’a hōro’a.

  • Ha’api’i i te tahi mau rāve’a nō te haruharu i tō rātou iho ’ā’amu nā roto i te tāpe’ara’a i te hō’ē buka ’ā’amu e ’oa’oa atu rātou. E buka ’ā’amu reo haruharu ānei ? E buka ’ā’amu hōho’a ānei ? E ha’aputura’a video ānei ? E rave rahi rāve’a nō rātou ’aita i hina’aro roa i te mau buka ’ā’amu mātau.

  • Haere ’āmui i te hiero nō te rave i te mau ’ōro’a nō te mau tupuna. ’Aore rā, e pūpū i tō ’oe taime nō te rave i te mau ’ōro’a nō tā rātou mau i’oa ’utuāfare mai te mea ’ua rahi roa tā rātou.

  • E putuputu nō te fa’a’ite i te peu tumu o terā ’e terā ’utuāfare.

  • Haere ’āmui i te hō’ē piha ’ā’amu ’utuāfare.

© 2020 Intellectual Reserve, Inc. All rights reserved. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritira’a nō Ministering Principles, February 2020. Tahitian. 16995 895