Parau tumu nō te aupurura’a, Tēnuare 2019

Te tumu e taui ai tā tātou aupurura’a

Noa atu e rave rahi fā tō te aupurura’a, e ti’a i tā tātou ’aupurura’a ’ia arata’ihia e te hō’ē hina’aro e tauturu ia vetahi ’ē ’ia tāpae i te hō’ē fa’afāriura’a hōhonu o te ta’ata hō’ē ’e ’ia riro hau atu mai te Fa’aora.

’Ia here ana’e tātou ia vetahi ’ē mai tā te Fa’aora, e hina’aro tātou e tauturu ia rātou mai tāna i rave. Mai te tīai mamoe maita’i, o ’oia te hi’ora’a hope nō te aupurura’a faufa’a rahi.

I roto i te fa’ahōho’ara’a i tā tātou aupurura’a i muri mai iāna, e mea faufa’a roa ’ia ha’amana’o ē tāna mau tauto’ora’a nō te here, te fa’ateitei, te tāvini, ’e te ha’amaita’i tē vai ra hō’ē fā teitei a’e i te pāhonora’a i te mau hina’aro rū. Pāpū roa, ’ua ’ite ’oia tō rātou mau hina’aro i te mau mahana ato’a ’e tē aroha nei nō tō rātou mau māuiui. Nō reira, e fa’aora ’oia, e fa’a’amu, e fa’a’ore ’e e ha’api’i mai. ’Ua hina’aro rā ’oia e rave hau atu i te ha’apa’ora’a i tei po’ihā i teie mahana (hi’o Ioane 4:13–14). ’Ua hina’aro ’oia i te feiā ati a’e iāna ’ia pe’e iāna (hi’o Luka 18:22 ; Ioane 21:22), ’ia ’ite iāna (hi’o Ioane 10:14, ; Te Parau Ha’api’ira’a ’e te mau Parau Fafau 132:22–24), ’e ’ia roa’a tō rātou fāito pūai hanahana (hi’o Mataio 5:48). E parau mau te reira i teie mahana (hi’o Te Parau Ha’api’ira’a ’e te mau Parau Fafau 67:13).

E rave rahi rāve’a nō te ha’amaita’i ia vetahi ’ē, mai te mea rā te fā hope o tā tātou aupurura’a o te tauturura’a ia vetahi ’ē ’ia ’ite i te Fa’aora ’e ’ia riro hau atu mai iāna te huru, e ’ohipa ïa tātou i te mahana i reira e ’ore tātou e ha’api’i fa’ahou i tō tātou ta’ata tupu ’ia ’ite i te Fatu nō te mea e ’ite pā’āto’a tātou iāna (hi’o Ieremia 31: 34).

Tei ni’a a’e te tūtonura’a a te Fa’aora i te mau hina’aro rū.

E rave rahi ta’ata tei tauto’o pūai nō te ’āfa’i mai i tō rātou mau hoa ia Iesu ra ’ia fa’aorahia rātou i te hāpepa. I te hope’a ’ua fa’aora te Fa’aora i te ta’ata, ’ua hau atu tōna ’ana’anatae e fa’a’ore i tāna mau hara (hi’o Luka 5:18–26).
I tō te mau ta’ata ’āfa’ira’a i te Fa’aora te vahine tei mauhia e fa’aturi ra, nā tāna fa’autu’a ’ore i fa’aora i te vahine i te pae tino. ’Ua hina’aro ato’a rā ’oia e fa’aora i te vahine i te pae vārua ma te parau iāna « ’a haere, ’eiaha e hara fa’ahou » (hi’o Ioane 8:2–11).
’Ua ’āfa’i o Maria ’e o Mareta i te parau ia Iesu e ani iāna ’ia haere mai e fa’aora i tōna hoa ia Lazaro. Iesu, tei fa’aora i te tahi mau ta’ata e rave rahi taime, ’ua fa’ataime i tōna haerera’a atu e tae roa ’ua pohe Lazaro. ’Ua ’ite Iesu e aha tā te ’utuāfare e hina’aro, nā roto rā i te fa’ati’afa’ahoura’a mai ia Lazaro, ’ua ha’apūai ’oia i tō rātou ’itera’a pāpū nō tōna hanahana (hi’o Ioane 11:21–27).

E aha te tahi atu mau hi’ora’a tā ’outou e nehenehe e tu’u atu i teie tāpura ?

E aha tā tātou e nehenehe e rave ?

Mai te mea tā tātou fā ’o te tauturura’a ’ia vetahi ’ē ’ia riro mai te Fa’aora te huru, e taui te reira nāhea tātou e aupuru. Teie te tahi mau rāve’a ’o tā teie hāro’aro’ara’a e nehenehe e arata’i i tā tātou mau tauto’ora’a nō te aupuru.

Mana’o 1: Tū’ati i te tāvinira’a e te Faaora

E ho’ona tā tātou mau tauto’ora’a ato’a nō te rave i te maita’i, e ti’a rā ia tātou e ’imi i te mau rāve’a nō te ha’amaita’i i tā tātou tāvinira’a ma te tū’ati atu i te Fa’aora. ’Ei hi’ora’a, mai te mea ’ua ma’ihia te ’utuāfare tā ’outou e aupuru ra, e hina’arohia te mā’a, e fa’arahi rā tō ’outou fa’a’itera’a ’ōhie i te here nā roto i tō ’outou ’itera’a pāpū nō te here o te Fa’aora nō rātou. E auhia tā ’outou ’ohipa i roto i te ’āua, e nehenehe rā te reira e ha’afaufa’ahia ma te hōro’ara’a i te hō’ē ha’amaita’ira’a autahu’ara’a.

’Ua ha’api’i mai Elder Neil L. Andersen nō te pupu nō te Tino Ahuru ma Piti ’āpōsetolo : « Te hō’ē ta’ata ’ā’au maita’i e nehenehe e tauturu i te hō’ē ta’ata ’ia tāta’i i te hō’ē huira, e ’āfa’i i te hō’ē hoa i te taote, e tāmā’a e te hō’ē ta’ata ’oto, ’aore rā e ’ata’ata ’e e parau iāna ’ia ora na nō te fa’a’oa’oa hō’ē mahana.

« E ’āmui ’ōhie rā te hō’ē ta’ata pe’e i te fa’auera’a mātāmua i roto i tāna mau ravera’a i te tāvinira’a faufa’a roa ».¹

Mana’o 2 : Fa’atumu i ni’a i te ’ē’a nō te fafaura’a

I muri iho i te paraparaura’a i te mau melo nō te taime mātāmua ’ei peresideni nō te ’Ēkālesia, ’ua parau te peresideni Russell M. Nelson ē : « E tāmau noa i ni’a i te ’ē’a nō te fafaura’a ». Nā te ravera’a ’e te ha’apa’ora’a i te mau fafaura’a « e ’īriti i te ’ōpani nō te mau ha’amaita’ira’a pae vārua ’e te faufa’a e vai ra ».²

’Ei feiā mo’a i te mau mahana hope’a nei, ’ua bāpetizohia tātou, ’ua ha’amauhia, ’e ’ua fāri’i i te hōro’a o te Vārua Maita’i. Te mau melo tāne ti’amā ’ua fāri’i i te autahu’ara’a. Tē haere nei tātou i te hiero nō tō tātou ’ōro’a hiero ’e ’ia tā’atihia ’ei ’utuāfare e a muri noa atu. E mea faufa’a roa teie mau ’ōro’a fa’aorara’a ’e ’āpitihia e tō rātou mau fafaura’a nō tātou nō te riro mai mai iāna te huru, ’ia ti’a ho’i ia tātou e pārahi iāna ra.

E ti’ara’a faufa’a roa tō tātou nō te tauturu ia vetahi ’ē i ni’a i teie ’ē’a ma te tauturu ’ia rātou ’ia ha’apa’o i tā rātou fafaura’a ’e te fa’aineinera’a nō te tahi atu.³ Nāhea ’outou e nehenehe ai e tauturu i te mau ta’ata ’aore rā, i te mau ’utuāfare tā ’outou e tāvini nei nō te fāri’i i te ’ōro’a i muri iho, e hina’arohia nō rātou ? Te aura’a o te reira e tauturu ’ia fa’aineine i te hō’ē metua tāne ’ia bāpetizo i tāna tamāhine, ’ia ha’amāramarama i te mau ha’amaita’ira’a nō te fafaura’a e rave a muri a’e, ’aore rā, e fa’a’ite i te mau rāve’a nō te fāri’i i te hō’ē ’itera’a faufa’a rahi a’e ma te fa’a’āpīra’a i tā tātou mau fafaura’a ma te ravera’a i te ’ōro’a mo’a.

Mana’o 3 : E ani ’e e fa’aitoito

Mai te mea e tano, e paraparau i te feiā tā ’outou e aupuru nei nō ni’a i tō rātou fa’afāriura’a ’e tā rātou mau tauto’ora’a ’ia riro hau atu mai te Mesia te huru. Fa’a’ite ia rātou i te mau pūai ’e te fa’ahiahia tā ’outou e ’ite ra i roto ia rātou. E ’imi i hea rātou e mana’o nei e ha’amaita’i atu ’e e fa’ata’a nāhea ’outou e tauturu atu. (Nō te ’ite rahi atu nō ni’a i te ’āparau-’āmui-ra’a e te feiā tā ’outou e aupuru ra, hi’o « Paraparau nō ni’a i tō rātou mau hina’aro », Liahona, Tetepa 2018, 6–9).

’Eiaha e taiā ’ia ani ia rātou ’ia pe’e i te Fa’aora ’e ’ia fa’ati’a iāna ’ia tauturu ia rātou ’ia tītau i tō rātou fāito pūai hanahana. E nehenehe teie anira’a e taui i tō rātou orara’a, ’ia ’āpiti-ana’e-hia i te fa’a’itera’a i tō ’outou ti’aturi ia rātou ’e i tō ’outou fa’aro’o nōna.

E ono rāve’a tā tātou e nehenehe e tauturu ia vetahi ’ē ’ia haere i mua i te Mesia ra.

Teie i muri nei te mau mana’o nō te turu ’ia vetahi ’ē ’ia ha’amaita’i atu ā i te orara’a ’e nō te haerera’a i mua i ni’a i te ’ē’a nō te fafaura’a. (Hi’o ’Ia Poro Haere i Ta’u nei ’Evanelia, pene 11, nō te tahi atu mau mana’o).

Fa’a’ite. Fa’a’ite i te huru mau ’e ma te itoito nāhea te Fa’aora i te tauturura’a ia ’outou ’a tamata ai ’outou i te ha’afatata atu iāna ma te pe’era’a i te mau parau tumu o te ’evanelia, noa atu te mau fifi.
Mau ha’amaita’ira’a i fafauhia. E tītau te ta’ata i te hō’ē tumu nō te taui ’ia hau atu ā i te fa’a’amu’amura’a ’eiaha e taui. Fa’ata’a atu i te mau ha’amaita’ira’a tei ’āpitihia i te hō’ē ’ohipa e nehenehe e hōro’a i te tūra’ira’a pūai (hi’o Te Parau Ha’api’ira’a ’e te mau Parau Fafau 130: 20–21).
Ani. E hopoi mai te orara’a i te hō’ē parau tumu o te ’evanelia i te hō’ē ’itera’a pāpū e parau mau te reira (hi’o Ioane 7:17) ’e e arata’i i te fa’afāriura’a hōhonu.⁴ Fātata te mau ’ohipara’a ato’a e fa’aotihia e te hō’ē anira’a ’ōhie nō te rave i te hō’ē mea o te tauturu ia rātou ’ia haere i mua.
Fa’anaho ’āmui. E aha te ’ohipa e hina’arohia ’ia tupu ’ia vai noa tā rātou fafaura’a nō te taui ? Nāhea e ti’a ai ia ’outou ’ia tauturu ? Tē vai ra ānei te hō’ē tai’o mahana ?
Turura’a. Mai te mea e hina’arohia, fa’atupu i te hō’ē pupu tauturu e mau ta’ata e nehenehe e tauturu i te ta’ata ’ia vai itoito noa ’e ’ia manuia. E hina’aro tātou pā’āto’a i te hō’ē ta’ata fa’a’ana’anatae.
’Āpe’e. Fa’a’ite tāmau i te haerera’a i mua. Fa’atumu noa i ni’a i te fa’anahora’a, e ha’amaita’i rā i te reira ’ia tītauhia. E fa’a’oroma’i, ’ia tu’utu’u ’ore ’e e fa’aitoito. E rave te tauira’a i te taime.

Anira’a ’ia ’ohipa

’A feruri i te mau rāve’a nō tā ’outou mau tauto’ora’a i te aupurura’a—te rahi ’e te na’ina’i—e nehenehe e tauturu ia vetahi ē ’ia fa’ahōhonu i tō rātou fa’afāriura’a ’e ’ia riro hau atu mai te Fa’aora te huru.

© 2019 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/18. Parau fa’ati’a nō te ’īritira’a : 6/18. ’Īritira’a nō Ministering Principles, January 2019. Tahitian. 15762 895