Parau tumu nō te aupurura’a, Tetepa 2019

Nāhea te Vārua e nehenehe ai (’e e hina’aro ai) e tauturu ia ’outou ’ia aupuru

Te fa’auera’a ’ohipa a te autahu’ara’a nō te aupuru, ’o tei hōro’ahia i te tāne ’e te vahine, tei roto te ti’ara’a ’ia fāri’i i te heheura’a.

Parau tumu nō te aupurura’a, Setepa 2019

Fa’ahōho’ara’a nō roto mai i te mau hōho’a a Getty

Te pi’ira’a nō te aupuru, ’e nō te tāvini ’e ’oia ato’a ’ia here mai tā te Fa’aora, e riro i te tahi taime e mea fifi—i te taime ihoā ra ’ia toro ana’e i te rima i te feiā tā tātou i ’ore paha i mātau maita’i. Ma te hō’ē mirioni mau rāvea nō te aupuru, e uiui tātou e nāhea e ti’a ai ’ia tātou ’ia ’ite mai i te mau rāve’a maita’i a’e nō te toro i te rima i te feiā tei fa’ata’ahia nā tātou.

’Eiaha tātou e māere maoro, nō te mea e nehenehe tā tātou mau tauto’ora’a hina’aro mau e arata’ihia e te Vārua Maita’i.

« Nā tā ’outou fa’auera’a ’ohipa aupurura’a mo’a e hōro’a ’ia ’outou i te ti’ara’a hanahana ’ia fāri’i i te fa’aurura’a », ’ua parau te tuahine Bonnie H. Cordon, peresideni rahi nō te Feiā ’Āpī Tamāhine. « E nehenehe ’outou e ’imi i taua fa’aurura’a ra ma te ti’aturi ».¹

’Ia ’imi ana’e tātou i te tāvini mai tā te Fa’aora i rave, e nehenehe tātou e arata’ihia e te hō’ē ā Vārua tei arata’i iāna. E parau mau ta’a ’ē mau teie i roto i te mau fa’auera’a ’ohipa nō te tāvinira’a, mai te aupurura’a, e ravehia i raro a’e i te mana fa’atere o te mau tāviri autahu’ara’a a te ’episekōpo. Tei i’ō nei e ono mau mana’o tauturu nō te aupurura’a ma te Vārua.

Nāhea e roa’a ai iā’u te Vārua ’ia aupuru ana’e au ?

• Ani i te arata’ira’a. Tē hina’aro nei te Metua i te Ao ra ia tātou ’ia paraparau iāna nā roto i te pure. ’Aita te pure e fa’ati’a noa ia tātou ’ia ha’afātata atu iāna, e hōro’a ato’a mai rā « i te mau ha’amaita’ira’a tā te Atua i ineine i te hōro’a mai, ’o tei tītauhia rā nā roto i tā tātou anira’a ».² « Mai te mea ē, e pure tātou ’e e ’imi tātou ’ia hāro’aro’a i tō rātou ’ā’au », ’ua parau te tuahine Cordon, « tē fa’a’ite pāpū atu nei au ē, e arata’i te Metua i te ao ra ia tātou ’e e haere tōna Vārua nā muri iho ia tātou ».³

• ’Eiaha e tīa’i i te hō’ē anira’a. ’Ia vai ara noa. ’Ia vai te « ’ana’anatae » (Te Parau Ha’api’ira’a ’e te mau Parau Fafau 58:27), ’e e ’ite ’outou ē e riro tā ’outou mau tauto’ora’a ’ei mea arata’ihia ’e te fa’arahihia. « Te haerera’a i mua mā tā tātou tāvinira’a ’e te ohipa ’ua riro te reira ’ei hō’ē rāve’a faufa’a roa nō te fa’ati’a ia tātou nō te heheura’a » ’ua parau te peresideni Dallin H. Oaks, tauturu hō’ē i roto i te Peresidenira’a Mātāmua. « I roto i tā’u tuatāpapara’a i te mau pāpa’ira’a mo’a, ’ua ’ite mai au ē te rahira’a o te mau heheura’a i te mau tamari’i a te Atua e tae mai te reira ’ia rātere haere rātou, ’eiaha ra ’ia pārahi rātou i roto i tō rātou mau nohora’a ’e ’ia tīa’i ’ia parau mai te Fatu ia rātou ’ia tu’u i te ta’ahira’a mātāmua ».⁴

Nāhea vau ’ia ’ite i te mau fa’aurura’a nō te aupuru ?

• Rave i te a’o a Moromona. ’Eiaha tātou ’ia ha’ape’ape’a nō te ’ite mai ē ’ua riro te hō’ē mana’o ’ei fa’aurura’a ’aore rā ’aita. ’Aita ana’e tā tātou te tāviri ’ōhie a Moromona nō te ’itera’a : Mai te mea e mana’o tō ’outou o te fa’auru ia ’outou ’ia rave i te maita’i ’e ’ia ti’aturi ’aore rā ’ia tauturu ia vetahi ’ē ’ia ti’aturi i te Mesia, e nehenehe ’outou e ’ite ē nō ’ō mai te reira i te Atua ra (hi’o Moroni 7:16).

• ’Eiaha e ha’ape’ape’a nō te reira. « ’A ’ōu’a i roto i te pape ’e ’a ’au » ’ua parau Elder Jeffrey R. Holland nō te pupu nō te Tino ’Ahuru ma Piti ’Āposetōlo. « ’A ’au atu i te ta’ata i roto i te ’ati. ’Eiaha e fa’aea noa ma te feruri ē, mea nāhea, e ’au ānei i ni’a i te tua ’aore rā mai te ’ūrī te huru. Mai te mea e pe’e tātou i te mau parau tumu niu i ha’api’ihia, ’oia ho’i e fa’atū’ati i ni’a i te mau tāviri o te autahu’ara’a ’e e ’imi i te Vārua Maita’i nō te arata’i ia tātou, e’ita tātou e ’ō’ore (échouer) ».⁵

E aha te rāve’a maita’i a’e nō te pe’e i te fa’aurura’a ?

• I terā iho taime. ’Ua riro te tuahine Susan Bednar (te vahine a Elder David A. Bednar nō te pupu nō te Tino ’Ahuru ma Piti ’Āposetōlo) ’ei hō’ē hi’ora’a rahi nō te pe’era’a i te fa’aurura’a. I muri a’e i te purera’a « nā roto i te mata pae vārua nō te hi’o i te feiā e hina’aro i te tauturu » e hi’o ’oia nā roto i te ’āmuira’a ’e mea pinepine « e tupu te hō’ē hina’aro pae vārua e haere e fārerei ’aore rā e niuniu i te hō’ē ta’ata ta’a ’ē », ’ua fa’a’ite mai ’o Elder Bednar. « ’E ’ia fāri’i ana’e te tuahine Bednar i te hō’ē mana’o pūai, e ’oi’oi ’oia i te pāhono ’e i te rave. E mea pinepine te reira i te tupu ’ia « ’āmene » ana’e te pure, e paraparau ’oia i te hō’ē feiā ’āpī ’aore rā e tauahi i te hō’ē tuahine ’aore rā ’ia ho’i i te fare, e rave ’oia i te niuniu i terā iho taime ’e e pi’i i te hō’ē ta’ata ».⁶

• Ma te itoito. Te mata’u ’ia pāto’ihia mai ’e te mau mana’o mamahu, te ’aravihi ’ore ’aore rā, te tano ’ore e nehenehe e tāpe’a ia tātou ’ia pe’e i te fa’aurura’a ’ia aupuru. ’Ua parau Elder Gerrit W Gong ē « i te mau taime ’e nā te mau rāve’a huru rau, e mana’o pā’āto’a tātou ē ’aita i tano, mea pāpū ’ore e penei a’e e mea parau-ti’a ’ore ». « I roto rā i tā tātou mau tautoʼoraʼa itoito ’ia here i te Atua ʼe ʼia aupuru i tō tātou taʼata tupu, e ʼite paha tātou i te here o te Atua ’e te faʼaururaʼa hinaʼarohia nō tō rātou ’e tō tātou oraraʼa nā roto i te mau rāveʼa ʼāpī ʼe te moʼa aʼe ».⁷

  ’Ua fa’a’ite te hō’ē taea’e ē nāhea ’oia i te taiāra’a i te fa’atoro i te rima i te tāne fa’aipoipo a te hō’ē vahine o te hina’aro e ’ōnohi iāna. ’Ua ani rā ’oia i te pae hope’a i te tāne ’ia tāmā’a rāua i te avatea. « I tō’u paraura’a ē, ’ua tāmata tā ’oe vahine i te ’ōnohi iāna. E mea fifi paha te reira nō ’oe. E hina’aro ānei ’oe e paraparau tāua nō te reira ?’ ’ua ta’i a’era ’oia ». « ’Ua ’āparau a’era māua ma te marū ’e te piri roa ’e ’ua fa’atupu māua i te hō’ē ha’afātatara’a ’e te ti’aturira’a fa’ahiahia i roto i te tahi tau minuti noa ».⁸

© 2019 by Intellectual Reserve, Inc. All rights reserved. Nene’ihia i te Fenua Marite. Parau fa’ati’a nō te reo peretāne : 6/18. Parau fa’ati’a nō te ’īritira’a : 6/18. ’Īritira’a nō Ministering Principles, September 2019. Tahitian. 15770 895

Fa’ata’ara’a

1. Bonnie H. Cordon, « ’Ia riro ’ei tīa’i māmoe », Liahona, Novema 2018, 75.

2. Bible Dictionary, « Prayer »

3. Bonnie H. Cordon, « ’Ia riro ’ei tīa’i māmoe », 76.

4. Dallin H. Oaks, « In His Own Time, in His Own Way », Liahona, ’Ātete. 2013, 24.

5. Jeffrey R. Holland, « Te tāvinira’a fa’afāitera’a », Liahona, Novema 2018, 77.

6. David A. Bednar, « Quick to Observe », Liahona, Titema 2006, 17.

7. Gerrit W. Gong, « Te auahi ura o te fa’aro’o », Liahona, Novema 2018, 42.

8. Bonnie H. Cordon, « ’Ia riro ’ei tīa’i māmoe », 76.

Te hi‘ora’a maita’i o te Fa’aora

’Ua ineine te Fa’aora nō tāna aupurura’a. « ’Ua fa’atahinu te Atua ia Iesu nō Nazareta i te Varua Maita’i », ’e i muri iho ’ua haere te Mesia e « hāmani maita’i haere ra » (Te ’Ohipa 10:38). « E rahi [’oia] i te Vārua Maita’i » ’e ’ua pinepine i te « arata’ihia e te Vārua » (Luka 4:1). Pāpū roa ē, ’ua rave te Mesia i te ’ohipa maita’i hou ’oia i fa’atāhinuhia ai i te Vārua Maita’i, te fāri’ira’a rā i te Vārua Maita’i ’e te roa’ara’a i te ti’ara’a ’ia fa’auruhia ’ua riro ’ei hō’ē tuha’a faufa’a roa nō tāna aupurura’a---mai te hō’ē tuha’a faufa’a roa nō tātou.

Anira’a ’ia ’ohipa

’A rave tāmau noa ai ’outou i tā ’outou aupurura’a, ’a ’imi nā roto i te pure ’e ’a pāhono i te mau muhumuhura’a a te Vārua Maita’i. ’A ha’amana’o ē, e ha’amaita’ihia ’outou e te Metua i te Ao ra ’e te feiā tā ’outou e aupuru ra ’a nā reira ai ’outou !