Parau tumu nō te aupurura’a, Tetepa 2018
Paraparau nō ni’a i tō rātou mau hina’aro
’Eiaha ’outou e rave i te reira ’outou ana’e. E nehenehe te paraparaura’a e hōro’a mai i te tauturu ’o tā ’outou e hina’aro nō te taururu ia vetahi ’ē.
’Ua ani te Atua ia ’outou ’ia aupuru i te hō’ē ta’ata ’aore rā te hō’ē ’utuāfare i roto i te pāroita ’aore rā te ’āma’a mai te au i tō rātou mau hina’aro. Nāhea ’outou ’ia ’ite e aha tō rātou mau hina’aro ? Te parau tumu nō te paraparaura’a, tei riro ’ei hō’ē niu i roto i te ’Ēkālesia, e mea faufa’a roa.
I muri a’e i te ’āparaura’a e aha tā tātou e mana’o ra e paraparau, e hi’o ana’e tātou :
-
Paraparau ’e te Metua i te Ao ra.
-
Paraparau ’e te ta’ata ’e te ’utuāfare tei fa’ata’ahia.
-
Paraparau ’e tō tātou hoa hāhaere.
-
’E paraparau ’e te feiā tei fa’ata’ahia nō te hō’ē ā ta’ata ’aore rā hō’ē ā ’utuāfare.
E mea faufa’a ato’a te paraparau ’e tō tātou feiā fa’atere. E hi’o i te hō’ē tuha’a parau nō te Parau tumu nō te aupurura’a i muri nei i roto i te Liahona te paraparaura’a ’e te feiā fa’atere ’oia ato’a te ti’ara’a nō te mau uiuira’a aupurura’a i roto i taua fa’anahora’a ra.
E aha te mea tā tātou e paraparau
E mea tītauhia ’ia ta’a maita’i i te mau hina’aro nō te aupuru i te tahi ’e te tahi. E aha rā te hōho’a tā te reira mau hina’aro e fa’atupu, ’e tē vai rā ānei te tahi mea hau atu i te mau hina’aro ’o tā tātou e ti’a ’ia ’ite mai ?
E rave rau hōho’a tō te mau hina’aro. E nehenehe te feiā tā tātou e tāvini nei e fa’aruru i te mau tāmatara’a i te pae ’āehuehu, te pae moni, te pae tino, te pae ha’api’ira’a ’e te tahi atu. E mea mātāmeha’i vetahi mau hina’aro i te tahi atu. Te tahi ’ua ineine tātou nō te tauturu atu ; vetahi e tītauhia tātou ’ia tihepu mai nō te tauturu ia tātou. I roto i tā tātou tauto’ora’a nō te pāhono i te mau hina’aro pae tino, ’eiaha ’ia mo’ehia ia tātou ē, tō tātou pi’ira’a ’ia aupuru ’o te tauturu-ato’a-ra’a ïa ia vetahi ’ē ’ia mānu’u rahi atu i ni’a i te ’ē’a nō te fafaura’a, ’ia fa’aineine ’e ’ia fāri’i i te mau ’ōro’a autahu’ara’a e tītauhia nō te fa’ateiteira’a.
Hau atu i roto i te rurura’a nō ni’a i te mau hina’aro ’o te hō’ē ta’ata ’aore rā te ’utuāfare, ’e ti’a ia tātou ’ia ha’api’i mai nō tō rātou pūai. Nō te aha ’aita rātou e hina’aro i te tauturu ? E aha tō rātou mau ’aravihi ’e mau tāreni ’o te nehenehe e ha’amaita’i ia vetahi ’ē ? Nāhea tō rātou fa’atano-’ōtahi-ra’a nō te tauturu i te patu i te bāsileia o te Atua ? E mea faufa’a ato’a ’ia māramarama i te mau pūai o te hō’ē ta’ata i tōna mau hina’aro.
Paraparau ’e te Metua i te Ao ra
Hō’ē o te mau parau tumu niu o tō tātou fa’aro’o ’oia ho’i, e paraparau te Metua i te Ao ra i tāna mau tamari’i (hi’o Te mau Hīro’a Fa’aro’o 1:9). ’Ia fāri’i ana’e tātou i te hō’ē fa’ata’ara’a ’āpī nō te aupuru i te tahi ta’ata, e ti’a ia tātou ’ia paraparau ’e te Metua i te Ao ra nā roto i te pure, ma te ’imi i te ’aravihi ’e i te māramarama o tō rātou mau hina’aro ’e mau pūai. E ti’a i teie fa’anahora’a nō te paraparaura’a nā roto i te pure ’ia tāmau noa i te roara’a o tā tātou ’ohipa aupurura’a.
Paraparau ’e te mau ta’ata ’e te mau ’utuāfare.
A hea ’e nāhea tātou ’ia ha’afātata atu i te mau ta’ata ’e i te mau ’utuāfare ’o tei fa’ata’ahia nā tātou e tāvini, ’ua rau te huru orara’a, e mea faufa’a ’ia paraparau ’e te ta’ata ’aore rā te ’utuāfare nō te fa’atupu i te aura’a ’e ’ia ta’a maita’i i tō rātou mau hina’aro, ’oia ato’a nāhea rātou i te hina’aro ’ia tauturuhia rātou. E nehenehe te tahi mau uira’a e tītauhia ’ia tia’i ri’i ē atu i te tupura’a te hō’ē aura’a pāpū. Noa atu ē ’aita e rāve’a tano i ’itehia nō te rave i te reira, ’a feruri i te mau mea i muri nei :
-
’A ’imi nāhea ’e a hea rātou e au ai ’ia fārereihia.
-
’A ’apo mai nō ni’a i tō rātou mau ’ana’anataera’a ’e tō rātou huru.
-
Haere mai e te mau mana’o nō te tauturu ia ’outou ’e ’a ani atu i tō rātou mau mana’o.
’A fa’atupu ai ’outou i te ti’aturira’a, ’a feruri ’ia ’āparau nō te mau hina’aro o te ta’ata ’aore ra o te ’utuāfare. ’A ui i te mau uira’a mai tā te Vārua Maita’i e muhumuhu mai.1 ’Ei hiʻora’a :
-
E aha te mau tāmatara’a tā rātou e fa’aruru nei ?
-
E aha te mau fā o te ta’ata iho ’aore rā o te ’utuāfare ? ’Ei hi’ora’a, hina’aro ānei rātou e fa’atupu maita’i a’e i te hō’ē purera’a pō ’utuāfare tāmau, ’aore rā ’ia mā’iti rātou ’iho ?
-
Nāhea ’outou i te tauturu ia rātou i tā rātou mau fā ’e mau tāmatara’a ?
-
E aha te mau ’ōro’a o te ’evanelia e tae mai i roto i tō rātou orara’a ? Nāhea ’outou e tauturu ia rātou ʼia faʼaineine ?
’Eiaha ’ia mo’ehia i te pūpū atu i te hō’ē tauturu ta’a ’ē, ’ei hi’ora’a, « e aha te pō e nehenehe māua e ’āfa’i mai i te mā’a i teie hepetoma ? » Hō’ē pūpūra’a mātauhia, mai teie, « e ’ohipa ānei tā māua e nehenehe e rave » ’aita te reira e tauturu atu.
Paraparau ’e tō ’outou hoa hāhaere.
Nō te mea ’aita ’outou ’e tō ’outou hoa hāhaere e mea pinepine nō te haere ’āmui i te ta’ata ’aore rā i te ’utuāfare, e mea faufa’a ’ia fa’aau ’e ’ia paraparau ’ōrua, ’a ’imi ai ’ōrua i te fa’aurura’a ’ei hoa hāhaere. Teie te tahi uira’a nō te feruri :
-
E aha te pinepinera’a e tāu’aparau ’outou te tahi ’e te tahi ’ei hoa hāhaere ?
-
Nāhea ’ōrua tāta’itahi e fa’a’ohipa ai i tō ’ōrua iho pūai nō te pāhono i te mau hina’aro o te ta’ata ’aore rā o te ’utuāfare ?
-
E aha te mea tā ’ōrua i ha’api’i mai, e aha te mau ’itera’a tā ’ōrua i fāri’i, ’e e aha te mau fa’aitoitora’a tā ’ōrua i fāri’i i te taime hope’a ’a paraparau ai ’ōrua e te ta’ata ’aore rā e te ’utuāfare ?
Paraparau ’e te tahi atu feiā tei fa’ata’ahia na
E mea maita’i ato’a ’ia ruru i te tahi taime ’e te feiā tei fa’ata’ahia nō te aupuru i teie ā ta’ata ’aore rā i teie ā ’utuāfare.
’Āparau nō te tātara i te mau tāfifira’a
’Ua fa’a’ohipa ’o Elder Chi Hong (Sam) Wong nō te Hitu ’Ahuru i te hō’ē ’ā’amu nō roto mai i te Mareko 2 nō te fa’ahōho’a i tō tātou nei tau, e nāhea te ruru-’āmui-ra’a i tauturu i nā ta’ata e maha ’ia māramarama nāhea i te fa’atae atu i te hō’ē ta’ata tei ro’ohia i te ma’i hāpepa i mua i te aro o Iesu.
« E nehenehe e tupu mai te reira », ’ua parau Elder Wong « E maha ta’ata e rave ra i te hō’ē ’ohipa i fa’auehia mai e tō rātou ’episekōpo ’ia hāhaere i tōna fare, i te hō’ē ta’ata tei ro’ohia i te hāpepa. I roto i te ’āpo’ora’a pāroisa hope’a i tupu a’enei, ’ia hope te tau’ara’a parau nō ni’a i te mau fifi i roto i te pāroisa, ’ua hōro’a a’era te ’episekōpo i te ’ohipa « fa’aorara’a ». ’Ua fa’ata’ahia teie nā ta’ata e maha ’ia tauturu i teie ta’ata …
« [I tō rātou taera’a i te fare tei reira o Iesu], ’ua ’ī te piha i te ta’ata. E’ita rātou e nehenehe e tomo nā te ’ūputa. ’Ua pāpū iā’u ē, ’ua tāmata rātou i te mau rāve’a ato’a tā rātou i feruri, ’aita ihoa rātou i ō. ’Ua paraparau a’era rātou e nāhea rā―e nāhea rātou i te hōpoi atu i teie ta’ata ia Iesu Mesia ra ’ia fa’aorahia. ’Ua fa’aoti a’era rātou i te hō’ē fa’anahoraa―e ’ere i te mea ’ōhie, ’ua fa’a’ohipa rā rātou i te reira.
« … ‘E ’aore a’era rātou i fātata mai i pīhaʻi iho iāna i te rahi o te ta’ata, ’ua ’īriti a’era rātou i te tāpo’i i te vāhi tei reira Iesu, e oti a’era i te ’īritihia, tu’u atu ra i taua hāpepa ra i raro ma te ro’i ato’a tāna e ta’oto ra’ (Mareko 2:4). …
« … ‘E ’ite atu ra Iesu i tō rātou fa’aro’o, ’ua parau atu ra i taua hāpepa ra, e ta’u tamaiti, ’ua fa’a’orehia tā ’oe hara’ (Mareko 2:5) ».2
Anira’a ’ia ’ohipa
’Ua fa’aitoito mai Elder Dieter F. Uchtdorf nō te Pupu nō te Tino ’Ahuru ma Piti ’āposetōlo, « ’ia paraparau ’āmui, fa’a’ohipa i te mau rāve’a ato’a e vai ra, ’imi i te fa’aurura’a a te Vārua Maita’i, ani i te Fatu i tāna ha’apāpūra’a, ’e i reira, ’a firi i te rima ’ahu i ni’a e a rave i te ’ohipa.
« E hōro’a atu vau i te hō’ē fafaura’a ia ’outou na : mai te mea e ha’apa’o ’outou i teie hōho’a, e fāri’i ’outou i te hō’ē arata’ira’a ta’a ’ē nō te ’ite ’o vai, e aha, ahea ’e i hea e rave ai nā roto i te rāve’a a te Fatu ».3
© 2018 nā Intellectual Reserve, Inc. Fatura’a pāruruhia. Nene’ihia i Marite. Parau fa’ati’a nō te reo peretāne : 6/17. Parau fa’ati’a nō te ’īritira’a : 6/17. ’Īritira’a nō Ministering Principles, June 2018. Tahitian. 15052 895