Parau tumu nō te aupurura’a, Tiunu 2019

Te aupurura’a ’o te hi’ora’a ia vetahi ’ē mai tā te Fa’aora e hi’o ra

’Ua rave Iesu i te rahira’a o tōna taime i piha’i iho i te feiā tei hi’ohia e mea ta’a ’ē rātou, ’ua ’ite ’oia i tō rātou fāito pūai hanahana.

I roto i tā tātou mau tauto’ora’a nō te aupuru mai tā te Fa’aora, e anihia paha tātou e aupuru i te hō’ē ta’ata e mea ta’a ’ē ’oia ia tātou. E rāve’a te reira nō tātou ’ia ’apo mai ’e ’ia tupu i te rahi.

E nehenehe te mau haere’a i te pae o te ta’ere, te ha’api’ira’a, te ti’ara’a ta’ata, te terera’a faufa’a, te matahiti, tei ma’iri ’aore rā tō teienei, ’aore rā te tahi atu mau ta’a-’ē-ra’a e ha’avā ’ōhie atu i te hō’ē ta’ata hou ’a mātau maita’i ai iāna. Teie huru ha’avāra’a tei roto roa ïa i te fa’ahapara’a ’e ’ua fa’aara mai te Fa’aora i te reira (hi’o 1 Samuela 16:7; Ioane 7:24).

E nehenehe ānei tātou e tu’u i te mau ta’a-’ē-ra’a i muri ’e e hi’o mai tā te Fa’aora ? Nāhea tātou ’ia ha’api’i mai i te here ia vetahi ’ē nō tō rātou huru i teienei ’e tō rātou huru a muri a’e ?

Hi’ora’a ’e te herera’a

Tē fa’ati’a nei te Bibilia i te ’ā’amu matarohia nō te ta’ata tao’a rahi, ’o tei ani nāhea e noa’a ai te ora mure ’ore : « ’Ua hi’o atura Iesu iāna e ’ua aroha atura iāna, nā ’ō atura, tē toe ra te hō’ē mea ia ’oe : ’a haere ’a ho’o atu i tā ’oe ra e hope roa ’e ’a hōpo’i atu ai nā te ta’ata ri’i, ’e e tao’a tā ’oe i te ao i reira ; ’a haere mai ai ’a rave ai i tō sātauro ’a pe’e mai ai iā’u » (Mareko 10:21).

I tō Elder S. Mark Palmer, nō te Hitu ’Ahuru tuatāpapara’a i teie pāpa’ira’a mo’a e tau matahiti i teienei, ’ua fā tā’ue mai te hō’ē tuha’a ’āpī o te ’ā’amu iāna.

‘’Ua hi’o atu ra Iesu iāna ’e ’ua aroha atu ra iāna’

« ’A fa’aro’o ai au i teie mau parau, ’ua fa’a’ī te hō’ē hōho’a ora i tō’u ferurira’a nō tō tātou Fatu tei fa’aea ri’i ’e ’ua hi’o teie ta’ata ’āpī. Hi’o—ma te hi’ora’a hōhonu ’e te tomo-roa-ra’a atu i roto i tōna vārua, te ’itera’a i tōna maita’i ’e tōna fāito pūai hanahana, ’oia ato’a te ’itera’a i tōna hina’aro rahi a’e.

« I muri iho te mau parau ’ōhie—’Ua here Iesu iāna. ’Ua fāri’i ’oia i te here ’e te aroha fāito ’ore nō teie ta’ata maita’i ’e nō teie here ’e ma teie aroha, ’ua ani hau atu Iesu iāna. ’Ua feruri au e aha ra te huru nō teie ta’ata ’ia vehihia i roto teie huru here ma te tītaura’a ’ia rave i te hō’ē ’ohipa fifi ’ia ho’o atu i tāna mau tao’a ’e ’ia hōro’a i te reira i te mau ta’ata veve …

« [Ua ui au iā’u iho] ‘nāhea e ti’a ai iā’u ’ia fa’a’īhia i te here huruMesia ’ia nehenehe [vetahi ’ē] ’ia fāri’i i te here o te Atua nā roto iā’u ’e te hina’aro e taui ? » Nāhea e nehenehe ai iā’u ’ia hi’o [i te mau ta’ata ati a’e iā’u] mai tā te Fatu i hi’o i te ta’ata tao’a rahi, ’ia hi’o ’o vai mau rātou ’e ’o vai tā rātou e riro mai, ’eiaha rā nō tā rātou ’ohipa e rave ra ’aore rā ’aita e rave ra ? Nāhea vau ’ia riro hau atu mai te Fa’aora te huru ? »¹

Ha’api’i mai ’ia hi’o ia vetahi ’ē

Ha’api’i mai ’ia hi’o ia vetahi ’ē mai tā te Fa’aora e hōro’a mai i te mau maita’i tao’a rahi. Teie te tahi mau mana’o e nehenehe e tauturu ’a ’ohipa ai tātou i ni’a i teie ’ōpuara’a.

E ha’amātau ia rātou
Rave i te tauto’ora’a nō te ha’amātau i te mau ta’ata hau atu i te mau mea e auhia. ’Ia ’ite ē, nō te patura’a i te mau aura’a tītauhia te taime ’e te tauto’ora’a ’ā’au tae. (H’io Te mau parau tumu nō te aupurura’a nō ’Ātete 2018 « Fa’atupura’a i te mau aura’a pāpū » ’ei tauturu).
Hi’opo’a ia ’outou iho
E ara i te mau ha’avāra’a tā ’outou e rave ra penei a’e e mea mana’ohia ’aore rā mea mana’o-’ore-hia. E tāpa’o i te mau tumu tā ’outou e rave nō vetahi ’ē ’e ’ia tamata i te feruri nō te aha ’outou e fāri’i ai e nā reira nō rātou.
Tāpe’a i te ha’avā
’Ia ’ite ē, ’aita te huru orara’a e fa’ata’a nei i te faufa’a o te hō’ē ta’ata. E tu’u nā ia ’outou i tō rātou vāhi, ’e e feruri ē nāhea ’outou e hina’aro ai ’ia hi’o mai te hō’ē ta’ata ia ’outou mai te mea tei roto ’outou i te hō’ē ā huru orara’a. E nehenehe te fa’ata’ara’a i te mau mā’itira’a ’e te mau haere’a o te hō’ē ta’ata i tōna iho faufa’a ’e i tōna fāito pūai hanahana e tauturu ia tātou ’ia hi’o iāna mai tā te Fa’aora e nā reira.
Pure ’ia here ia rātou
E pure tāmau noa nō rātou nā ni’a i tō rātou i’oa ’e te fa’a’oroma’i nō te fa’atupu i te hoara’a mau. E hi’o i tā ’outou tāvinira’a ma te ’ā’au pure. Tē vai ra ānei te hō’ē ārea i roto i te mea tā ’outou e rave nei ’e te mea tā rātou i hina’aro mau ?

’Ua rave Iesu i tōna taime nō te ti’a i piha’i iho i te mau ta’ata ta’a ’ē : te feiā moni, te feiā veve, te mau ti’a fa’atere ’e te feiā matarohia. Pinepine ’oia i te ha’avā-hape-hia e vetahi ’ē ’o tei fa’ariro ’iāna ’e tōna huru orara’a e au ra e mea veve ’aore rā faufa’a ’ore. « ’Aita ’ōna huru, ’e te nehenehe, ’ia ha’apa’o atu tātou iāna… I vahavahahia ’oia ’e ’aore ’oia i mana’o-maita’i-hia e tātou nei » (Isaia 53:2–3).

Hi’ora’a mai te Mesia te huru

’Ua fa’ati’a te hō’ē tuahine i teie ’ā’amu nō te ha’api’i mai ’ia hi’o i te hō’ē ta’ata tupu ma te mata o te Mesia :

« Tē ora ra Julia (’ua tauihia te i’oa) i tō’u mana’o ’e ’aita tōna e hoa. ’Ia hi’ohia e huru riri noa tōna ’e te ’īriā. Noa atu ra te reira, ’ua fa’aoti au ’ia riro ’ei hoa nōna. ’Eiaha noa ’ei hō’ē hoa pāpū ’ore ’ei hoa mau rā. E paraparau vau iāna i te mau taime ato’a e ’ite au iāna ’e e fa’a’ite au i te ’ana’anatae nō te mau mea ato’a tāna e rave ra. ’Ua fa’atupu marū noa vau i te hō’ē auhoara’a ’e ’ōna, tei fa’atupu i te ’oa’oa i tō’u ’ā’au.

« I te hō’ē mahana, ’ua fa’aoti au e haere e fārerei ia Julia ’e e ui iāna nō ni’a i tāna fa’aotira’a nō te ’orera’a e haere mai i te purera’a.

« ’Ua ha’api’i mai au ē, ’aita tōna e ’utuāfare ’aore rā e mau feti’i piri. Tōna ana’e taea’e, hō’ē taea’e e ora ra i te ātea ’ē, e paraparau noa rāua hō’ē taime i te matahiti nā roto i te niuniu. ’A fa’aro’o noa ai au i te fa’a’itera’a mai i tōna ’ino’ino, tōna riri ’e tōna fa’a’erera’a nō ni’a i tōna ’utuāfare ’e te ’Ēkālesia, ’ua fa’a’īhia vau i te mana’o tapitapi ’ore nō te aroha ’e te here pūai rahi nō teie tuahine. ’Ua ’ite au i tōna māuiui ’e te fa’a’erera’a. ’Ua ’ite au i te mo’emo’e o tōna orara’a. E au ra tē fa’aro’o ra vau i te hō’ē pereota mamahu i muri iā’u : « ‘’Ua here ato’a vau iāna. Here ’e fa’atura iāna.’

« ’Ua pārahi au ’e ’ua fa’aro’o e tae roa ’ua oti tāna mau parau. ’Ua fāri’i au i te here ’e te aroha nōna. E tuahine teie tei ’ore roa i ’ite e aha te aura’a ’ia herehia. I reira ’ua ta’a maita’i roa vau i tōna huru. ’Ua ha’amāuruuru vau iāna nō tōna fa’ati’ara’a iā’u ’ia haere mai e fārerei iāna ’e ’ua vaiiho atu vau iāna ma te tauahi ’e ma tō’u here ’e te fa’atura iāna. ’Aita roa ’oia i ’ite ē, ’ua ha’aputapū ’oia iā’u i roto i teie fa’arereira’a. ’Ua fa’a’ara’ara te Metua i te Ao ra i tō’u nā mata ’e ’ua ha’api’i iā’u ē e ’aravihi tō’u nō te here ma te aroha rahi atu. ’Ua fa’aoti ihora vau i roto i tā’u fa’aotira’a ’eiaha ’ia riro noa ’ei hoa nōna, ’ia riro ato’a rā ’ei hō’ē melo nō tōna ’utuāfare ».

’Ua riro te anira’a manihini i roto i te orara’a o te tahi ta’ata ’ei hō’ē ’ohipa mo’a. Nā roto i te pure, te fa’aoroma’i ’e te tauturu a te Vārua, e nehenehe tātou e ha’api’i mai i te rave i te reira ma te hō’ē ’itera’a e au i tō te Mesia te huru.

© 2019 nā Intellectual Reserve, Inc. All rights reserved. Nene’ihia i te Fenua Marite. Parau fa’ati’a nō te reo peretāne : 6/18. Parau fa’ati’a nō te ’īritira’a : 6/18. ’Īritira’a nō Ministering Principles, June 2019. Tahitian. 15767 895