Te aupurura’a
Aupuru i te ta’ata nā roto i te mau ’ohipa ri’i a te ’Ēkālesia
Mau parau tumu

« Aupuru i te ta’ata nā roto i te mau ’ohipa ri’i a te ’Ēkālesia », Liahona, Tiurai 2020

aupurura’a, tāvinira’a

Hōho’a nō te feiā ’āpī tē fa’ati’a ra i te hō’ē ti’ahapa nā Bud Corkin ; hōho’a nō te hō’ē tamāhine tē tu’u ra i te ’aira’amā’a nā Sherie Price McFarland ; Hōho’a nā Getty Images

Parau tumu nō te aupurura’a, Tiurai 2020

Aupuru i te ta’ata nā roto i te mau ’ohipa ri’i a te ’Ēkālesia

Fa’ata’ara’a a te ta’ata nene’i : ’Ua pāpa’ihia teie parau ve’a nā mua a’e i te pararera’a ma’i pohe COVID-19. E’ita paha te tahi o te mau mana’o i raro nei e tano no teie mau taime fa’aāteara’a ta’ata, e tano ra nō te taime e tupu fa’ahou ā te mau rurura’a ’e te mau ’ohipa ri’i a te ’Ēkālesia. Mai te mea e tītauhia, ’a fa’atano i teie mau mana’o i ni’a i te mau arata’ira’a nei a te ’Ēkālesia ’e a te fa’aterera’a hau.

Hō’ē rāve’a nō te aupuru i tō tātou mau melo o te pāroita, te mau ta’ata tupu ’e te mau hoa, ’o te mau ’ohipa ri’i ïa a te ’Ēkālesia. Tē fa’anaho ra ’oe i te tahi ’ohipa ri’i e au i te mau hina’aro ’e te ’ana’anataera’a o te ta’ata tā ’oe e aupuru nei, ’aore rā tē tītau manihi ra ia rātou ’ia ’āmui mai i te mau ’ohipa ri’i ’e te mau ’ohipa tāvinira’a, te mau ’ohipa ri’i a te pāroita, a te titi ’e a te titi rau, e nehenehe te reira e hōro’a i te rāve’a au ’e te ’ana’anatae nō te poihere i te tāhō’ē ’e nō te ha’apūai i te mau melo.

E nehenehe ato’a te mau ’ohipa ri’i a te ’Ēkālesia ’ia ’īriti i te mau ’ūputa nō te tahi atu mau rāve’a tāvinira’a. ’Ei hi’ora’a, e ti’a i te mau ’ohipa ri’i a te ’Ēkālesia ’ia hōro’a i te taime nō te ’āmui i te mau ’ōpuara’a tauturu ta’ata e ha’amaita’i i te ta’ata ’e e ha’amau i te mau tā’amura’a pāpū i roto i te huira’atira. E ti’a ato’a i te mau ’ohipa ri’i a te ’Ēkālesia ’ia riro ’ei rāve’a nō te toro atu i te rima i te mau melo ’aita e tae pinepine nei ’e i te mau hoa o te ’Ēkālesia ’aita tō rātou e ha’apa’ora’a fa’aro’o.

’Ia fa’a’ōhia te mau ta’ata e rave rahi i roto i te ’Ēkālesia, e fa’atupu te reira i te tahi rāve’a nō te Fatu nō te ha’amaita’i ’e nō te ha’apūai i tā tātou mau pāroita ’e mau ’āma’a, tō tātou mau ta’ata tupu ’e tō tātou huira’atira.

Fa’atupu i te mau tā’amura’a au

Tē fātata ra te tau to’eto’e, ’aita tā David Dickson e rāve’a nō te tāpe’a i tōna ’utuāfare i roto i te hō’ē vāhi māhanahana.

Nō taui noa atu ra David ’e tāna vahine ’e tāna e piti tamāhine i to rātou fa’aera’a i te mata’eina’a nō Fredonia, i Arizona, i Marite, e medebara i te mau vāhi teitei, ’atihia e te mau pa’ipa’i ’ute’ute nehenehe, te mau rā’au ri’i sauge ’e te mau rā’au rau’ere matie noa.

Te fare tā Dickson mā i tārahu, e umu vahie noa ïa nō te ha’amāhanahana i te fare. ’Oi’oi roa David i te ha’api’i ē, tītauhia te ’aravihi ’ia ha’aputuputu i te vahie, nō te mea te mau tau to’eto’e i Fredonia, ’ua pu’e noa te hiona ’e te pape pa’ari.

« ’Aita tā’u e vahie, ’aore rā e mātini ’e’e, ’aore ato’a ho’i i ite i te fa’a’ohipa i te reira ! » Tē parau ra David. « ’Aita vau i ’ite e aha tā’u e rave ».

’Ua ui te tahi mau melo o te pāroita ia David, ’ua nava’i ānei tāna vahie ē hope roa atu te tau to’eto’e. « ’Oi’oi roa rātou i te ’ite ē, ’aita roa atu », tē parau ra David. « ’Aita ato’a i maoro, ’ua parau mai te pupu peresibutero e tauturu mai rātou iā’u ’ia ha’aputu i te vahie. Ma te māuruuru rahi, ’ua fāri’i au i tā rātou hōro’a ».

’Ite ’oi’oi a’era David ē, teie tere ha’aputu vahie, e ’ohipa mātau ïa a te pāroita, tei tārena-maita’i-hia, tei fa’anaho-maita’i-hia ’e tei tae rahi mai te ta’ata. I te hō’ē po’ipo’i mahana mā’a, ’ua haere ’o David rātou te pupu peresibutero ’e te tahi ato’a mau melo o te pāroita i roto i te mou’a, ’ua ’āpapa noa te mau pereo’o pāni ’e te mau fa’auta taiha’a.

« Hō’ē noa avatea, maoti tā rātou mau mauiha’a ’e tō rātou ’ite, ’ua ha’aputu te mau melo o te pāroita i te vahie nō tō’u ’utuāfare, ’ua nava’i roa nō e piti tau to’eto’e », tē parau ra David. « ’E hau atu, ’ua ha’api’ihia vau i te mau mea ato’a tei tītauhia ’ia ’ite nō te ha’aputu i tā’u iho vahie. I te fa’aru’era’a vau ia Fredonia, ’ua ’ite roa vau i te fa’a’ohipa i te mātini ’e’e, ’e ’ua haere au i te mau ’ohipa ha’aputura’a vahie a te pāroita, hau atu i tā’u e nehenehe e tai’o ».

’Ua patu teie mau ’ohipa ri’i a te pāroita i te tā’amura’a au i rotopū i te mau melo o te ’Ēkālesia, e ’ere noa rā terā, ’ua ha’amau ato’a i te mau tā’amura’a au i roto i te mau ta’ata o te huira’atira.

« Tē ha’amana’o ra vau i te hō’ē vahine, e ’ere i te melo nō te ’Ēkālesia, e mea ’āpī ’oia i terā vāhi », tē parau ra David. « ’Ua tae roa ’oia i te tahu i te mau rā’au o te ’apa’apa fare ’ia vai māhanahana noa te fare. I te ’itera’a mātou i tōna ’ati, ’ua fa’anaho mātou ’ia nava’i tāna vahie ē hope noa atu te tau to’eto’e. Nō tōna māuruuru rahi, ’aita fa’ahou tāna e nehenehe e paraparau ».

’Ua ha’apāpū te mau tauto’ora’a aupurura’a i Fredonia ’ia vai paruru noa te mau ta’ata ’e ’ia vai māhanahana noa ē hope noa atu te tau to’eto’e.

Toro i te rima i te ta’ata

I te tāvinira’a ’oia i tāna misiōni i Romania, ’ua hāhaere pinepine ’o Meg Yost ’e tōna hoa tuahine i te hō’ē ’utuāfare tei ’ore i haere mai i te purera’a e mea maoro i teienei. « Tei roto Stanica mā i te mau melo mātāmua roa o te ’Ēkālesia i Romania », tē parau ïa a Meg, « ’e ’ua here roa māua ia rātou ».

I te ’ōpuara’ahia ’e i te fa’anahora’ahia te hō’ē ’ohipa ri’i nā te ’āma’a, ’ua fa’aoti te feiā fa’atere ē,e fa’atupu i te hō’ē « ’Āru’i pionie » nō te ’āma’a. E ’āru’i nō te fa’ahanahana i te mau pionie itoito tei rātere nā te Fenua Marite nō te haere i te ’āfa’a nō Roto Miti. E riro ato’a te reira ’ei taime nō te fa’ahanahana i te mau pionie o te ’Ēkālesia i Romania.

« ’Ua mana’o mātou e rāve’a rahi teie nō te tahi o te mau melo ’ia hōro’a i tō rātou ’itera’a pāpū nō ni’a i te fa’afāriura’ahia rātou ’e tō rātou ’itera’a i te ’Ēkālesia i te tupura’a i te rahi i Romania », tē parau ra Meg. « ’Oi’oi māua i te ferurira’a i te ’utuāfare Stanica nō te reira ’ohipa. ’Ua ani māua ia rātou ’ia haere mai, ’e ’ua ’ana’anatae roa rātou.

I te pō nō taua ’ohipa ri’i, ’aita ’o Stanica mā i tae mai atu ra, tē ha’amata ra.

« ’Ua pe’ape’a māua e’ita rātou e tae mai », tē ha’amana’o ra Meg. « Terā rā, i taua taime ra, ’ua tomo mai rātou. ’Ua hōro’a ’o Stanica mā i te hō’ē ’itera’a pāpū nehenehe mau nō ni’a i te ’evanelia ’e te ’Ēkālesia. ’Ua ’āmui ato’a rātou i te tahi atu mau melo ’o tā rātou i ’ore i ’ite e mea maoro i teienei ».

’Ua mahora te rima o te mau melo o te ’āma’a ’e ’ua fāri’i pōpou ia Stanica mā. I te sābati nō muri iho, ’ua ’oa’oa roa ’o Meg i te ’itera’a i te tuahine Stanica i te purera’a.

« I te haerera’a vau i terā ’āma’a tau ’āva’e i teienei, tē haere noa ra ’oia i te purera’a ! » Tē parau ra ’o Meg. « ’Ia mana’o vau, maoti te fāna’ora’a ’oia i te hōro’ara’a i tōna ’itera’a pāpū ’e te tītaura’ahia rātou, ’e terā mana’o ’ua hina’arohia rātou i roto i te ’āma’a, nā te reira i tauturu iāna ».

4 mana’o nō te aupurura’a i te ta’ata nā roto i te mau ’ohipa ri’i a te ’Ēkālesia

  • Fa’anaho i te mau ’ohipa ri’i e tano i te mau hina’aro : E rāve’a rahi roa te mau ’ohipa ri’i nō te pāhono i te hina’aro ’e’ē. E nehenehe te reira e fa’anahohia nō te pāhono i te mau hina’aro ta’a ’ē o te hō’ē ta’ata ’aore rā te hō’ē pupu. ’Ia pāhono-ato’a-hia i te mau hina’aro o te feiā e ’āmui mai, ’o te ha’amātau-maita’i-ra’a ānei i te tahi ’e te tahi, ’aore rā ’o te ha’api’i-rahi-atu-ā-ra’a i te ’evanelia, ’aore rā te putapūra’a i te Vārua.

  • Tītau manihini i te mau ta’ata ato’a : ’A fa’anaho ai ’outou i te mau ’ohipa ri’i, ’a fa’aitoito i te tītau manihini i te feiā e ha’amaita’ihia i te ’āmuira’a mai i teie ’ohipa. ’Ia vai noa i roto i te ferurira’a te mau melo ’āpī, te mau melo paruparu, te feiā ’āpī, te feiā ’āpī pa’ari, te mau ta’ata huma ’e te mau ta’ata nō te tahi fa’aro’o. E tītau manihini i te ta’ata ma te feruri i tō rātou maita’i, ’e ma te fa’a’ite i tō ’outou ’oa’oa ’ia tae mai rātou.

  • Fa’aitoito i te ta’ata ’ia rave i te hō’ē tuha’a : E ’āpī rahi a’e te feiā tā ’outou e tītau manihini i teie mau ’ohipa ri’i mai te mea e fāna’o rātou i te rave i te tahi ’ohipa. Hō’ē rāve’a nō te fa’aitoito i te ta’ata ’ia rave i te tahi ’ohipa, ’o te fa’a’ohipara’a ïa te ta’ata i tō rātou mau hōro’a, mau ’aravihi ’e te mau tārēni i roto i terā ’ohipa.

  • Fāri’i i te mau ta’ata ato’a : Mai te mea e tae mai te tahi hoa, e fa’aitoito roa i te aupuru ia rātou ’ia tupu tō rātou mana’o fāri’i pōpou. Nā reira ato’a, mai te mea e ’ite ’outou i te mau ta’ata ’aita ’outou i mātau, ’a fa’ahoa ia rātou ’e ’a fāri’i maita’i ato’a ia rātou !

© 2020 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritira’a nō Ministering Principles, July 2020. Tahitian. 16989 895