10:

Magpakita ng Integridad

Magreport:Ibahagi sandali sa grupo ang sagot sa isang panalangin noong nakaraang linggo.

Pag-isipang mabuti:Bakit mahal ng Panginoon ang mga taong may “integridad [ang puso]”?

Panoorin:“What Shall a Man Give in Exchange for His Soul?” available sa srs.lds.org/videos. (Walang video? Basahin sa pahina 25.)

Anong Ibibigay ng Tao na Katumbas sa Kaniyang Buhay?

Kung hindi ninyo mapapanood ang video, basahin ang script na ito.

still from What Shall a Man Give in Exchange for His Soul

Elder Robert C. Gay: Minsa’y itinanong ito ng Tagapagligtas sa Kanyang mga disipulo: “Anong ibibigay ng tao na katumbas sa kaniyang buhay?”

Ito ay tanong na itinuro sa akin ng aking ama na pag-isipan kong mabuti maraming taon na ang nakalilipas. Habang lumalaki ako, binigyan ako ng mga magulang ko ng mga gawaing-bahay at binigyan ako ng allowance para sa gawaing iyon. Madalas kong gamitin ang perang iyon, na mahigit 50 cents kada linggo, para manood ng sine. Ang halaga ng tiket sa sinehan noon ay 25 cents para sa isang batang 11-taong-gulang. May natitira pa akong 25 cents para ipambili ng kendi, na tig-5 cents ang isa. May sine na, may kendi pa! Ang sarap ng buhay ko noon.

Maayos ang lahat hanggang sa mag-12 anyos ako. Habang nakapila isang hapon, nalaman ko na ang halaga ng tiket para sa 12-anyos ay 35 cents, at ibig sabihin niyan ay mababawasan ng dalawa ang kendi. Dahil hindi ako handang isakripisyo iyon, ikinatwiran ko na, “Tulad pa rin noong isang linggo ang hitsura mo.” Pagkatapos ay lumapit ako at humingi ng tiket na halagang 25 cents. Hindi nagduda ang kahera, at lima pa rin ang nabili kong kendi sa halip na tatlo.

Sa tuwa sa nagawa ko, nagmadali akong umuwi para ikuwento kay Itay ang malaking tagumpay ko. Habang ikinukuwento ko ang mga detalye, wala siyang imik. Pagkatapos ko, tumingin lang siya sa akin at sinabing, “Anak, ipagbibili mo ba ang kaluluwa mo sa halagang singko?” Tumimo ang sinabi niya sa batang puso ko. Hinding-hindi ko nalimutan ang aral na ito.

(“Anong Ibibigay ng Tao na Katumbas sa Kaniyang Buhay?” Ensign o Liahona, Nob. 2012, 34)

Bumalik sa pahina 24.

Talakayin:Ano ang ibig sabihin ng magkaroon ng integridad? Paano ipinagpapalit ng mga tao ang kanilang kaluluwa para makuha ang gusto nila sa buhay na ito?

Basahin:Mga Saligan ng Pananampalataya 1:13 at Job 27:5 (sa kanan)

“Naniniwala kami sa pagiging matapat.”

Mga Saligan ng Pananampalataya 1:13

“Hanggang sa ako’y mamatay ay hindi ko aalisin sa akin ang aking pagtatapat.”

Job 27:5

Aktibidad

Bigyan ng marka o grado ang iyong sarili sa sumusunod na mga aspeto.

Maglagay ng Numero sa Unahan ng Bawat Item para Ipakita Kung Gaano Kadalas Mo Ginagawa Ito
1 = hindi kailanman, 2 = paminsan-minsan, 3 = madalas, 4 = palagi
___1. Tinutupad ko ang lahat ng aking pangako at tipan.
___2. Tapat ako sa sinasabi ko at sa mga rekord na iniingatan ko.
___3. Hindi ako nagsasalita nang labis-labis para magmukhang mas maganda ang mga bagay-bagay.
___4. Ibinabalik ko ang lahat ng hiniram ko at hindi ko kinukuha ang mga bagay na hindi akin.
___5. Lubos ang katapatan ko sa aking asawa sa salita at sa gawa.
___6. Hindi ako nandaraya kahit kailan, kahit alam kong hindi ako mahuhuli.
___7. Kapag may napulot akong isang bagay na hindi akin, isinasauli ko ito sa may-ari.
___8. Lagi kong binabayaran ang perang hinihiram ko.

Talakayin:Basahin ang Mosias 4:28 (sa kanan) at ang sinabi ni Elder Joseph B. Wirthlin (sa pahina 25). Bakit kailangan ng personal na integridad sa pagbabayad ng utang o negosyo o student loan (tulad ng PEF loan)?

“At nais kong inyong pakatandaan, na sinuman sa inyo ang manghiram sa kanyang kapitbahay ay nararapat na isauli ang bagay na kanyang hiniram, alinsunod sa kanyang pinakipagkasunduan, o kung hindi, kayo ay magkakasala; at marahil, inyong papapangyarihin ang inyong kapitbahay na magkasala rin.”

Mosias 4:28

“Ang ibig sabihin ng integridad ay palaging paggawa ng tama at mabuti, anuman ang ibunga nito. Ibig sabihin ay pagiging mabuti mula sa kaibuturan ng ating kaluluwa, hindi lamang sa ating mga kilos kundi, ang mas mahalaga, sa ating puso’t isipan. … Ang kaunting pagsisinungaling, pandaraya, o pananamantala ay hindi kalugud-lugod sa Panginoon. … Ang pinakadakilang gantimpala ng integridad ay ang palaging pagsama ng Espiritu Santo, … [na] gagabay sa lahat ng ating ginagawa.”

Joseph B. Wirthlin, “Personal Integrity,” Ensign, Mayo 1990, 30, 32, 33

Mangakong Gawin:Mangakong gawin ang mga sumusunod sa linggong ito. Lagyan ng tsek ang box kapag nakumpleto mo ang bawat gawain:

• Paghusayin ang isa sa walong aspetong minarkahan mo sa itaas.

• Ibahagi ang natutuhan mo ngayon tungkol sa integridad sa iyong pamilya o mga kaibigan.