Mga Kapanguhaan
Dili Kana Akong Problema
Pagpili og mga tahas ug i-drama ang mosunod.
JOSEPH (ANG AGALON): Gloria, tulo ka ka oras nga late.
GLORIA: Pasensya kaayo, Joseph. Nagkinahanglan ko og dugang katulog. Ang akong anak nagkasakit gabii ug dugay ko kaayo nakatulog.
JOSEPH: Dili kana akong problema.
GLORIA: Dayon ang akong alarm clock wala mokiring karong buntag.
JOSEPH: Dili kana akong problema.
GLORIA: Busa, sa dihang andam nako, wala ko kasakay sa unang bus.
JOSEPH: Usab, dili kana akong problema.
GLORIA: Sa pag-abut nako sa bus stop, nakaamgo ko nga wala koy plite.
JOSEPH: Gihapon, dili kana akong problema.
GLORIA: Busa wala ko kasakay sa ikaduha nga bus tungod kay kinahanglan ko nga mouli aron mokuha og kwarta.
ANTHONY: Pasensya sa pagsamok, apan ang makina naguba ug nanggawas ang asite.
JOSEPH: Unsa nga makina?
ANTHONY: Wala ko kabalo unsay ngalan niini. Apan, kini ang naa sa luyo sa kilid sa mga estante. Si Thomas wala karon, ug siya kasagaran ang mopaandar sa makina.
JOSEPH: Dili kana akong problema.
ANTHONY: Busa gisugdan nako paggamit ang makina ug kini naguba.
JOSEPH: Ahh. Dili kana akong problema.
ANTHONY: Ug tingali kini adunay manwal, apan wala ko kahibalo kon asa kini.
JOSEPH: Okey, okey. Kamong duha, hunong! Anthony, Gloria, sulbara ninyo ang mga problema!
Balik sa pahina 98
Kana Ang Akong Problema
Pagpili og mga tahas ug i-drama ang mosunod.
JOSEPH: Anthony, mahimo bang imong tawagan si Thomas aron masayud kon kanus-a siya mobalik gikan sa pagbisita sa kliyente? Kita nagkinahanglan og dugang asite para nianang makina.
ANTHONY: Kahibalo ko nga nagkinahanglan kita og asite. Mipalit na ko ug gibutang kini sa makina.
JOSEPH: Unsa? Wala ka makapaabut ni Thomas? Dili ko gusto nga imong maguba ang makina pag-usab.
ANTHONY: Karon kahibalo na ko sa makina. Akong nakit-an ang manwal, gidala sa balay, gitun-an kini, ug mibalik ug miayo sa makina. Karon makamaniubra na ko kon si Thomas mogawas para mobisita og kustomer.
JOSEPH: Maayo kana.
ANTHONY: Dili lang kay kana. Nagbuhat ko og maintenance schedule para niini aron kapugngan ang mga problema sa umaabut.
JOSEPH: Salamat, Anthony. Mapasalamaton ko kon giunsa nimo kini pagdumala.
ANTHONY: Siyempre. Ako kanang problema.
JOSEPH: [Sa iyang kaugalingon] Wow, si Anthony milambo na gyud. Sulit kaayo siya sa iyang sweldo karon.
JOSEPH: O, Gloria. Giunsa nimo nga nakaabut ka dinhi? Nanawag si Angela ug miingon nga dili siya makatrabaho karon tungod sa strike sa mga drayber sa bus. Abi nako nga ikaw ug si Benjamin dili sab makatrabaho.
GLORIA: Nasayud ko nga naghisgot ang mga drayber sa bus nga mag-strike, busa sa duha ka adlaw nga milabay nakigsabut ko ni Benjamin nga mosakay ko sa iyang sakyanan kon adunay strike.
JOSEPH: Nindot nga naghunahuna ka na niana.
GLORIA: Naghunahuna usab ko nga taas ang linya sa gasolinahan karon, busa akong gihatagan og kwarta si Benjamin ug mihangyo niya nga magpagasolina kagahapon sa wala pa mag-strike.
JOSEPH: Aduna kay igong kwarta para ana?
GLORIA: Oo, nagtigum ko, maoy akong gigamit sa pagbayad sa gasolina. Si Benjamin ug ako mihapit ni Angela ug anaa ming tanan.
JOSEPH: Gloria, salamat nga gihunahuna nimo daan nga mahitabo kini. Ang atong mga kustomer nagkinahanglan gyud ninyong tulo karong adlawa.
GLORIA: Siyempre, Joseph, kana akong problema.
JOSEPH: [Sa iyang kaugalingon] Ug nagplano ko nga ako siyang taktakon? Siya katumbas og tulo ka empleyado karon.
Balik sa pahina 98
Siya Nagtukod og Palasyo
Pagpili og usa ka tawo nga mobasa sa mosunod.
“Hunahunaa nga ikaw usa ka balay. Ang Dios miabut aron pagtukod og balik nianang balay. Sa sinugdanan, tingali, makasabut ka unsay Iyang gibuhat. Iyang giayo ang agianan sa tubig ug giayo ang mga tulo sa atop ug uban pa; nakahibalo ka nga kadto nga mga trabaho kinahanglang buhaton ug busa ikaw wala matingala. Apan karon Siya nagsugod sa pag-usab sa balay ug daw wala na ka kasabut. Unsa man ni ang Iyang gibuhat? Ang eksplinasyon mao nga Siya nagtukod og lahi kaayo nga balay kaysa imong gihunahuna—nagdugang og bag-ong pasilyo, nagdugang og salog, nagtukod og mga tore, naghimo og mga courtyard. Abi nimo nga himoon ka nga usa ka desenteng gamay nga payag: apan Siya nagtukod og palasyo” (C. S. Lewis, Mere Christianity [1960], 160).
Balik sa pahina 103
Unsaon Nako Pagpangita og Mentor nga Motabang Nako nga Magmalampuson? (Opsyonal nga Kalihokan)
-
Basaha:Ang bililhong empleyado nasayud sa mga balaod ug ekspektasyon sa employer. Apan walay “manwal sa kompaniya” kanunay aron ihulagway kadto nga mga ekspektasyon. Ug ang kada trabahoan managlahi.
-
Praktisa:Hunahunaa kon unsaon kaha nimo pagkasayud sa wala masulat nga mga balaod ug mga ekspektasyon sa trabahoan. Mahimo ka nga mangutana sa mga sakop sa pamilya, mga higala, o mga sakop sa grupo para sa ilang mga ideya.
-
Basaha:Pipila sa mga ekspektasyon komon ra. Ang uban maobserbaran. Apan para sa uban, magkinahanglan ka og mentor. Ang mentor usa ka tawo nga imong kasaligan kinsa nasayud sa mga ekspektasyon ug balaod sa kompaniya ug andam nga motabang nimo aron makat-on.
-
Praktisa:Sa dili pa ang atong sunod nga miting, pagpili og mentor sa imong kasamtangang trabahoan ug hangyoa siya sa pagtabang nimo nga masayud sa mga balaod ug ekspektasyon sa kompaniya.
O ihulagway ang matang sa tawo nga gusto nimo nga mahimong mentor sa imong trabahoan sa umaabut.