Punaoa
O Le Faiga o le Teutusi
O le faiga o le teutusi o le tinoitupe e faigofie lava: o le taimi lava e maua ai lou totogi, ona e tuuina lea o le aofai o le tupe ua e atofaina e faaalu i vaega taitasi o le paketi i totonu o lona lava teutusi.
Mo se faataitaiga, faapea la ua e paketiina le 400 mo le vaega o “meaai ma mea e faaaoga i le fale” i le masina lenei. A maua lou totogi mo le masina po o isi vaiaso e sosoo ai, ia teu le aofaiga lena (o le tinoitupe) i totonu o se teutusi ua faailogaina “Meaai ma Mea e Faaaoga i le Fale.” E leai se tupe—o le uiga o lenei mea e leai se tupe—e aluese mai i lena teutusi sei vagana e totogi ai mo meaai. Afai e te alu i le maketi ae e iloa ane o loo i le fale le teutusi, toe alu i le fale e aumai le teutusi! Ia tausia se faamaumauga tusitusiga (i se tamai api) o faatauga uma, ina ia e iloiloina mulimuli ane i le taimi o le tou fonotaga faaleaiga e faamanatu atu ai le mea o loo alu ai au tupe.
I se isi teutusi, tuu i ai le aofaiga na paketiina mo tupe faaalu i feoaiga. O le a e aumaia mai le teutusi lona lua lenei pe a talafeagai ai, le vaega e manaomia mo le totogi o na mea, ma ia mataitu ia tupe faaalu taitasi i lau tamai api.
Vaevae ia vaega taitasi o lau paketi i lenei auala e tasi: peimeni o le lisi po o le mokesi i se teutusi e tasi; paoa, suavai, kesi i se isi teutusi; sefuluai ma taulaga anapogi i se isi; tausiga faafomai; inisiua; ma isi mea faapena—ia tofu ma lana lava teutusi.
O taimi uma lava e maua ai lou totogi, ia tuu le vaega talafeagai o le aofaiga na e paketiina mo masina taitasi i totonu o teutusi taitasi, ina ia i ai le aofaiga lea na muai fuafuaina i lau paketi tusitusia i totonu o teutusi taitasi mo masina taitasi.
Aua nei sili atu le aofai e faaalu nai lo le mea ua e paketiina. A ua leai se mea i totonu o le teutusi, ua uma foi oe! Afai e tatau lava ona sili atu le aofai e te faaaluina i lena vaega, e tatau la ona e aveeseina mai i fafo o se isi teutusi. Mo nai uluai masina o le a e manaomia ai ni fetuunaiga. I totonu o lena periota, e tatau ona e maua ai se ata sao pe mata o sao fuainumera na faapaketiina muamua—o se mea o le lua masina o le a e iloa ai le averesi sao.
O nisi latou te faaaogaina le metotia o le teutusi mo mea uma lava. O isi e faaaogaina lenei faiga nao-le-tinoitupe mo vaega na e tele ina faaosoosoina ai i latou e ova faaalu, pe mo mea e faigofie ona le maitauina pe le puleaina, e pei o meaai, faleaiga, mea faafiafia, penisini, ma lavalava. Soo se tupe lava e totoe e tatau ona alu i le mea e ave i ai le faamuamua i mea tautupe.
Toe foi i le itulau 77.
Faiga Faafuainumera
Afai o le vaaia o tinoitupe faasili e faaosoosoina ai oe e ova faaalu nai lo o le mea e tatau ona i ai, atonu lava o lau filifiliga sili ona lelei o le faaaoga o se kata faifaatau. E pei o le metotia o le teutusi o tinoitupe, o se kata faifaatau e to mai ai le tupe o loo i ai i lau tusitupe.
A faaaoga se kata faifaatau, e taua tele le mataituina o au tupe faaalu, ona, e le pei o le faiga o le teutusi, o se kata faifaatau e le tuuina mai ai ni tuaoi malolosi i le va o vaega o le paketi. E mafai ona e faamaumauina au tupe faaalu i se peni ma se pepa, pe o se telefoni feaveai foi po o se polokalama komepiuta.
E tele polokalama o le puleaina o mea tautupe o loo maua mo telefoni feaveai po o isi masini feaveai. O nei polokalama e mafai ona teuina ma faatulaga ai faamatalaga mo oe, ma e mafai ona e faaaogaina mai lau komepiuta i le fale po o isi foi masini.
Ia faaalu se taimi i lenei vaiaso e suesue ai polokalama sili ona lelei o loo maua i lau gagana ma le eria, e faaaoga ai le “puleaina o tupe,” “meafaigaluega mo mea tautupe patino,” po o “polokalama o le paketiina” o ni faaupuga e sue ai. E tele polokalama lelei lava e mauafua pe itiiti foi ni tau.
Ia manatua, ina ia malu ou faamatalaga, ia tau lava o au oe lava masini, e te faaaogaina mo au faamatalaga patino tautupe, ae le o komepiuta faitele.
Toe foi i le itulau 78.