“ບົດທີ 3: ການເຊື້ອເຊີນໃຫ້ຮັບບັບຕິສະມາ ແລະ ການຢືນຢັນ,” ຈົ່ງສັ່ງສອນພຣະກິດຕິຄຸນຂອງເຮົາ: ຄູ່ມືຕໍ່ການແບ່ງປັນພຣະກິດຕິຄຸນຂອງພຣະເຢຊູຄຣິດ (2023)
“ການເຊື້ອເຊີນໃຫ້ຮັບບັບຕິສະມາ ແລະ ການຢືນຢັນ,” ຈົ່ງສັ່ງສອນພຣະກິດຕິຄຸນຂອງເຮົາ
ບົດທີ 3
ການເຊື້ອເຊີນໃຫ້ຮັບບັບຕິສະມາ ແລະ ການຢືນຢັນ
ພື້ນຖານຄຳສອນ
ເຮົາທຸກຄົນເປັນລູກຂອງພຣະບິດາເທິງສະຫວັນ. ເຮົາໄດ້ມາສູ່ໂລກເພື່ອມີໂອກາດທີ່ຈະຮຽນຮູ້, ເຕີບໂຕ, ແລະ ກາຍເປັນເໝືອນດັ່ງພຣະອົງ ເພື່ອວ່າເຮົາຈະສາມາດກັບຄືນໄປຫາທີ່ປະທັບຂອງພຣະອົງ (ເບິ່ງ ໂມເຊ 1:39). ເຮົາບໍ່ສາມາດກາຍເປັນເໝືອນດັ່ງພຣະອົງ ຫລື ກັບໄປຫາພຣະອົງປາດສະຈາກການຊ່ວຍເຫລືອຈາກສະຫວັນ. ພຣະບິດາເທິງສະຫວັນຂອງເຮົາໄດ້ສົ່ງພຣະບຸດຂອງພຣະອົງ, ພຣະເຢຊູຄຣິດ, ມາເພື່ອຊົດໃຊ້ແທນເຮົາ ແລະ ທຳລາຍສາຍຮັດແຫ່ງຄວາມຕາຍ (ເບິ່ງ 3 ນີໄຟ 27:13–22).
ເຮົາເຂົ້າເຖິງອຳນາດແຫ່ງການໄຖ່ຂອງພຣະຄຣິດໂດຍການໃຊ້ສັດທາໃນພຣະອົງຈົນເຖິງການກັບໃຈ, ການຮັບບັບຕິສະມາ, ການຮັບຂອງປະທານແຫ່ງພຣະວິນຍານບໍລິສຸດ ຜ່ານທາງການຢືນຢັນ, ແລະ ການອົດທົນຈົນເຖິງທີ່ສຸດ. ການຮັກສາພັນທະສັນຍາແຫ່ງການບັບຕິສະມາເປັນຂັ້ນຕອນທຳອິດໃນການຜູກມັດຕົວເຮົາເອງກັບພຣະເຈົ້າ ເພື່ອວ່າພຣະວິນຍານບໍລິສຸດຈະສາມາດຊຳລະລ້າງ, ເສີມສ້າງ, ແລະ ປ່ຽນແປງທຳມະຊາດຂອງເຮົາໃຫ້ດີຂຶ້ນໄດ້. ການປະສົບກັບອິດທິພົນແຫ່ງການຊຳລະໃຫ້ສະອາດນີ້ເອີ້ນວ່າ ການເກີດໃໝ່ທາງວິນຍານ. (ເບິ່ງ 2 ນີໄຟ 31:7, 13–14, 20–21; ໂມໄຊຢາ 5:1–7; 18; 27:24; 3 ນີໄຟ 27:20; ໂຢຮັນ 3:5.)
ການເກີດໃໝ່ທາງວິນຍານເລີ່ມຕົ້ນເມື່ອເຮົາຮັບບັບຕິສະມາດ້ວຍນ້ຳ ແລະ ພຣະວິນຍານ. ການບັບຕິສະມາເປັນພິທີການທີ່ມີຄວາມສຸກ ແລະ ຄວາມຫວັງ. ເມື່ອເຮົາຮັບບັບຕິສະມາດ້ວຍໃຈທີ່ຊອກຊ້ຳ ແລະ ວິນຍານທີ່ສຳນຶກຜິດ, ເຮົາເລີ່ມຕົ້ນຊີວິດໃໝ່ດ້ວຍພະລັງທີ່ຄ້ຳຈູນຂອງພຣະເຈົ້າ. ຫລັງຈາກທີ່ເຮົາໄດ້ຮັບບັບຕິສະມາ ແລະ ຮັບການຢືນຢັນແລ້ວ, ເຮົາສາມາດເຂັ້ມແຂງຕໍ່ໄປ ໂດຍການຮັບສ່ວນສິນລະລຶກຢ່າງມີຄ່າຄວນ. (ເບິ່ງ 2 ນີໄຟ 31:13; ໂມໄຊຢາ 18:7–16; ໂມໂຣໄນ 6:2; ຄຳສອນ ແລະ ພັນທະສັນຍາ 20:37.)
ການສະເໜີຄຳເຊື້ອເຊີນ
ເມື່ອທ່ານຮູ້ສຶກຖືກນຳພາໂດຍພຣະວິນຍານ, ໃຫ້ເຊື້ອເຊີນຜູ້ຄົນໃຫ້ຮັບບັບຕິສະມາ ແລະ ການຢືນຢັນ. ສິ່ງນີ້ອາດເກີດຂຶ້ນລະຫວ່າງບົດຮຽນໃດກໍໄດ້.
ສິດສອນຄຳສອນຂອງການບັບຕິສະມາ ແລະ ຊ່ວຍໃຫ້ຜູ້ຄົນເຂົ້າໃຈຄຳສອນຂອງພຣະຄຣິດ (ເບິ່ງ ບົດຮຽນທີ 3). ສິດສອນກ່ຽວກັບຄວາມສຳຄັນ ແລະ ຄວາມຊື່ນຊົມຂອງພັນທະສັນຍາແຫ່ງການບັບຕິສະມາ, ເຖິງການໄດ້ຮັບການປົດບາບ, ແລະ ເຖິງການຮັບເອົາຂອງປະທານແຫ່ງພຣະວິນຍານບໍລິສຸດຜ່ານທາງການຢືນຢັນ.
ກະກຽມຜູ້ຄົນສຳລັບຄຳເຊື້ອເຊີນໃຫ້ຮັບບັບຕິສະມາ ໂດຍການໃຫ້ແນ່ໃຈວ່າ ເຂົາເຈົ້າເຂົ້າໃຈສິ່ງທີ່ທ່ານໄດ້ສິດສອນ ແລະ ພັນທະສັນຍາທີ່ເຂົາເຈົ້າຈະເຮັດ. ພັນທະສັນຍາແຫ່ງການບັບຕິສະມາ ມີດັ່ງຕໍ່ໄປນີ້:
-
ເຕັມໃຈທີ່ຈະຮັບເອົາພຣະນາມຂອງພຣະເຢຊູຄຣິດ.
-
ຮັກສາພຣະບັນຍັດຂອງພຣະເຈົ້າ.
-
ຮັບໃຊ້ພຣະເຈົ້າ ແລະ ຄົນອື່ນ.
-
ອົດທົນຈົນເຖິງທີ່ສຸດ. (ເບິ່ງ ບົດຮຽນທີ 4.)
ທ່ານອາດແບ່ງປັນສິ່ງຕໍ່ໄປນີ້:
“ເມື່ອເຮົາຮັບບັບຕິສະມາ, ເຮົາ ‘ເປັນພະຍານຕໍ່ [ພຣະເຈົ້າ] ວ່າ [ເຮົາ] ເຂົ້າເຮັດພັນທະສັນຍາກັບພຣະອົງ, ວ່າ [ເຮົາ] ຈະຮັບໃຊ້ພຣະອົງ ແລະ ຮັກສາພຣະບັນຍັດຂອງພຣະອົງ.’ ເມື່ອເຮົາເຮັດພັນທະສັນຍານີ້, ພຣະອົງສັນຍາວ່າ ພຣະອົງຈະ ‘ເທພຣະວິນຍານຂອງພຣະອົງລົງມາເທິງ [ເຮົາ] ຢ່າງຫລວງຫລາຍ’ (ໂມໄຊຢາ 18:10).”
ຄຳເຊື້ອເຊີນໃຫ້ຮັບບັບຕິສະມາຂອງທ່ານຄວນເຈາະຈົງ ແລະ ກົງໄປກົງມາ. ທ່ານອາດເວົ້າວ່າ:
“ເຈົ້າຈະເຮັດຕາມຕົວຢ່າງຂອງພຣະເຢຊູຄຣິດຫລືບໍ່ ໂດຍການຮັບບັບຕິສະມາຈາກຜູ້ທີ່ໄດ້ຮັບການແຕ່ງຕັ້ງໃຫ້ປະຕິບັດພິທີການນີ້? ພວກເຮົາຈະຊ່ວຍເຈົ້າກະກຽມສຳລັບການບັບຕິສະມາ. ພວກເຮົາເຊື່ອວ່າເຈົ້າສາມາດກຽມພ້ອມໃນ [ວັນທີ]. ເຈົ້າຈະກຽມຮັບບັບຕິສະມາໃນວັນນັ້ນບໍ?”
ເຊັ່ນດຽວກັບຄຳເຊື້ອເຊີນໃດໆທີ່ທ່ານສະເໜີ, ສັນຍາວ່າຜູ້ຄົນຈະໄດ້ຮັບພອນອັນຍິ່ງໃຫຍ່ ເມື່ອເຂົາເຈົ້າຮັບເອົາຄຳເຊື້ອເຊີນໃຫ້ຮັບບັບຕິສະມາ ແລະ ຮັກສາພັນທະສັນຍາທີ່ກ່ຽວຂ້ອງ. ແບ່ງປັນປະຈັກພະຍານຂອງທ່ານກ່ຽວກັບພອນເຫລົ່ານີ້.
ສິດສອນວ່າການບັບຕິສະມາ ແລະ ການຢືນຢັນບໍ່ແມ່ນຈຸດໝາຍປາຍທາງສຸດທ້າຍ. ແຕ່, ເປັນຈຸດຢູ່ໃນເສັ້ນທາງຂອງການປ່ຽນໃຈເຫລື້ອມໃສ ທີ່ນຳຄວາມຫວັງ, ຄວາມຊື່ນຊົມ, ແລະ ອຳນາດຂອງພຣະເຈົ້າມາສູ່ຊີວິດຂອງບຸກຄົນຢ່າງເຕັມທີ່ຫລາຍຂຶ້ນ (ເບິ່ງ ໂມໄຊຢາ 27:25–26). ຫລັງຈາກຜູ້ຄົນຮັບບັບຕິສະມາ ແລະ ການຢືນຢັນແລ້ວ, ເຂົາເຈົ້າສາມາດຫວັງທີ່ຈະໄດ້ຮັບການເຮັດໃຫ້ບໍລິສຸດຈາກພຣະວິນຍານ ເມື່ອເຂົາເຈົ້າເດີນໄປຕາມເສັ້ນທາງແຫ່ງພັນທະສັນຍາ.
ຖ້າເປັນໄປໄດ້, ໃຫ້ເຊື້ອເຊີນຜູ້ທີ່ທ່ານກຳລັງສິດສອນໃຫ້ໄປຮ່ວມພິທີບັບຕິສະມາ ແລະ ກອງປະຊຸມສິນລະລຶກ ໃນລະຫວ່າງທີ່ຄົນໃດຄົນໜຶ່ງໄດ້ຮັບການຢືນຢັນ.
ແນວຄິດສຳລັບຄຳເຊື້ອເຊີນໃຫ້ຮັບບັບຕິສະມາ
ພິຈາລະນາການອ່ານເລື່ອງລາວໃນພຣະຄຳພີກ່ຽວກັບພຣະເຢຊູໄດ້ຮັບບັບຕິສະມາ (ເບິ່ງ ມັດທາຍ 3:13–17). ທ່ານກໍສາມາດສາຍ Bible video ທີ່ບັນຍາຍກ່ຽວກັບການບັບຕິສະມາຂອງພຣະຜູ້ຊ່ວຍໃຫ້ລອດ ຫລື Book of Mormon video ກ່ຽວກັບການບັບຕິສະມາຂອງສານຸສິດຂອງພຣະຜູ້ຊ່ວຍໃຫ້ລອດນຳອີກ.
ທ່ານກໍຍັງສາມາດອ່ານເລື່ອງລາວຂອງນີໄຟກ່ຽວກັບການບັບຕິສະມາຂອງພຣະເຢຊູນຳອີກ (ເບິ່ງ 2 ນີໄຟ 31:4–12). ການອ່ານເລື່ອງລາວກ່ຽວກັບການບັບຕິສະມາຂອງພຣະເຢຊູຄຣິດ ສາມາດເພີ່ມຄວາມເຂັ້ມແຂງໃຫ້ແກ່ຜູ້ທີ່ກຳລັງຮັບການສິດສອນໄດ້.
ການສຶກສາພຣະຄຳພີ
ສຶກສາຂໍ້ພຣະຄຳພີດັ່ງຕໍ່ໄປນີ້:
ຂຽນສະຫລຸບສິ່ງທີ່ທ່ານໄດ້ຮຽນຮູ້.