“ບົດທີ 3: ບົດຮຽນທີ 3—ພຣະກິດຕິຄຸນຂອງພຣະເຢຊູຄຣິດ,” ຈົ່ງສັ່ງສອນພຣະກິດຕິຄຸນຂອງເຮົາ: ຄູ່ມືຕໍ່ການແບ່ງປັນພຣະກິດຕິຄຸນຂອງພຣະເຢຊູຄຣິດ (2023)
“ບົດທີ 3: ບົດຮຽນທີ 3,” ຈົ່ງສັ່ງສອນພຣະກິດຕິຄຸນຂອງເຮົາ
ບົດທີ 3: ບົດຮຽນທີ 3
ພຣະກິດຕິຄຸນຂອງພຣະເຢຊູຄຣິດ
ຜູ້ຄົນອາດສົງໄສ
-
ພຣະເຢຊູຄຣິດແມ່ນໃຜ? ພຣະອົງຈະຊ່ວຍຂ້ອຍກັບຄອບຄົວຂອງຂ້ອຍໄດ້ແນວໃດ?
-
ການມີສັດທາໃນພຣະເຢຊູຄຣິດໝາຍຄວາມວ່າແນວໃດ? ການມີສັດທາໃນພຣະອົງຈະເປັນພອນໃຫ້ແກ່ຊີວິດຂອງຂ້ອຍໄດ້ແນວໃດ?
-
ການກັບໃຈໝາຍຄວາມວ່າແນວໃດ?
-
ຂ້ອຍຈະຮູ້ສຶກເຖິງສັນຕິສຸກ ແລະ ການໃຫ້ອະໄພຂອງພຣະເຈົ້າ ຫລັງຈາກຂ້ອຍໄດ້ເລືອກເຮັດສິ່ງທີ່ບໍ່ດີໄດ້ແນວໃດ?
-
ແມ່ນຫຍັງຄືຈຸດປະສົງຂອງການບັບຕິສະມາ?
-
ແມ່ນຫຍັງຄືຂອງປະທານແຫ່ງພຣະວິນຍານບໍລິສຸດ?
-
ການອົດທົນຈົນເຖິງທີ່ສຸດໝາຍຄວາມວ່າແນວໃດ?
ພຣະກິດຕິຄຸນຂອງພຣະເຢຊູຄຣິດຄືວິທີທີ່ເຮົາມາຫາພຣະຄຣິດ. ມັນງ່າຍດາຍພຽງພໍທີ່ເດັກນ້ອຍກໍສາມາດເຂົ້າໃຈມັນໄດ້. ບົດຮຽນນີ້ສຸມໃສ່ພຣະກິດຕິຄຸນ ແລະ ຄຳສອນຂອງພຣະຄຣິດ, ລວມທັງສັດທາໃນພຣະເຢຊູຄຣິດ, ການກັບໃຈ, ການບັບຕິສະມາ, ຂອງປະທານແຫ່ງພຣະວິນຍານບໍລິສຸດ, ແລະ ການອົດທົນຈົນເຖິງທີ່ສຸດ. ມັນກໍຍັງສຸມໃສ່ວິທີທີ່ພຣະກິດຕິຄຸນເປັນພອນໃຫ້ແກ່ລູກໆທຸກຄົນຂອງພຣະເຈົ້ານຳອີກ.
ຄຳວ່າ ພຣະກິດຕິຄຸນ ຕາມຈິງແລ້ວໝາຍເຖິງ “ຂ່າວປະເສີດ.” ພຣະກິດຕິຄຸນຂອງພຣະເຢຊູຄຣິດເປັນຂ່າວປະເສີດ ເພາະມັນໃຫ້ຄຳສອນ—ຄວາມຈິງນິລັນດອນ—ທີ່ເຮົາຕ້ອງການເພື່ອມາຫາພຣະອົງ ແລະ ໄດ້ຮັບຄວາມລອດ (ເບິ່ງ 1 ນີໄຟ 15:14). ພຣະກິດຕິຄຸນສິດສອນເຮົາເຖິງວິທີການດຳລົງຊີວິດທີ່ດີ ແລະ ມີຄວາມໝາຍ. ຂ່າວປະເສີດຂອງພຣະກິດຕິຄຸນຈັດກຽມຫົນທາງໃຫ້ເຮົາເພື່ອຈະໄດ້ຮັບການໃຫ້ອະໄພບາບ, ການຊຳລະໃຫ້ບໍລິສຸດ, ແລະ ການກັບຄືນໄປຫາທີ່ປະທັບຂອງພຣະເຈົ້າ.
ຄຳແນະນຳສຳລັບການສິດສອນ
ພາກນີ້ມີໂຄງຮ່າງຕົວຢ່າງ ເພື່ອຊ່ວຍໃຫ້ທ່ານກະກຽມທີ່ຈະສິດສອນ. ມັນຍັງມີຕົວຢ່າງຂອງຄຳຖາມ ແລະ ຄຳເຊື້ອເຊີນທີ່ທ່ານອາດໃຊ້ນຳອີກ.
ຂະນະທີ່ທ່ານກຽມພ້ອມທີ່ຈະສິດສອນ, ໃຫ້ພິຈາລະນາດ້ວຍການອະທິຖານກ່ຽວກັບສະຖານະການ ແລະ ຄວາມຕ້ອງການທາງວິນຍານຂອງບຸກຄົນ. ຕັດສິນໃຈວ່າອັນໃດຈະເປັນປະໂຫຍດຫລາຍທີ່ສຸດທີ່ຈະສິດສອນ. ກຽມນິຍາມສັບທີ່ຜູ້ຄົນອາດບໍ່ເຂົ້າໃຈ. ວາງແຜນຕາມເວລາທີ່ທ່ານຈະມີ, ຈື່ຈຳໄວ້ວ່າໃຫ້ບົດຮຽນສັ້ນໆ.
ເລືອກຂໍ້ພຣະຄຳພີເພື່ອໃຊ້ຂະນະທີ່ທ່ານສິດສອນ. ພາກ “ພື້ນຖານຄຳສອນ” ຂອງບົດຮຽນປະກອບດ້ວຍຂໍ້ພຣະຄຳພີທີ່ເປັນປະໂຫຍດຫລາຍຂໍ້.
ພິຈາລະນາວ່າຈະຖາມຄຳຖາມໃດຂະນະທີ່ທ່ານສິດສອນ. ວາງແຜນເຊື້ອເຊີນທີ່ຈະຊຸກຍູ້ແຕ່ລະຄົນໃຫ້ປະຕິບັດ.
ເນັ້ນພອນທີ່ພຣະເຈົ້າໄດ້ສັນຍາໄວ້, ແລະ ແບ່ງປັນປະຈັກພະຍານຂອງທ່ານກ່ຽວກັບສິ່ງທີ່ທ່ານສິດສອນ.
ສິ່ງທີ່ທ່ານອາດຈະສິດສອນຜູ້ຄົນພາຍໃນ 15-25 ນາທີ
ເລືອກຫລັກທຳຂໍ້ໜຶ່ງ ຫລື ຫລາຍກວ່ານັ້ນດັ່ງຕໍ່ໄປນີ້ເພື່ອສິດສອນ. ພື້ນຖານຄຳສອນສຳລັບແຕ່ລະຫລັກທຳແມ່ນມີໃຫ້ຫລັງຈາກໂຄງຮ່າງນີ້.
ພາລະກິດແຫ່ງສະຫວັນຂອງພຣະເຢຊູຄຣິດ
-
ພຣະເຈົ້າໄດ້ສົ່ງພຣະບຸດທີ່ຮັກຂອງພຣະອົງ, ພຣະເຢຊູຄຣິດ, ມາສູ່ໂລກ ເພື່ອໄຖ່ເຮົາຈາກບາບ ແລະ ຄວາມຕາຍ.
-
ເພາະການເສຍສະລະຊົດໃຊ້ຂອງພຣະເຢຊູ, ເຮົາຈຶ່ງສາມາດຖືກຊຳລະໃຫ້ສະອາດຈາກບາບຂອງເຮົາ ແລະ ຖືກເຮັດໃຫ້ບໍລິສຸດເມື່ອເຮົາກັບໃຈ.
-
ຫລັງຈາກພຣະເຢຊູໄດ້ຖືກຄຶງ, ພຣະອົງໄດ້ຟື້ນຄືນພຣະຊົນ. ເພາະການຟື້ນຄືນພຣະຊົນຂອງພຣະອົງ, ເຮົາທຸກຄົນຈະຟື້ນຄືນຊີວິດຫລັງຈາກເຮົາຕາຍ. ນີ້ໝາຍຄວາມວ່າ ວິນຍານ ແລະ ຮ່າງກາຍຂອງແຕ່ລະຄົນຈະກັບມາລວມກັນອີກຄັ້ງ, ແລະ ເຮົາແຕ່ລະຄົນຈະມີຊີວິດຕະຫລອດໄປ ໃນຮ່າງກາຍທີ່ສົມບູນແບບ ແລະ ຟື້ນຄືນຊີວິດແລ້ວ.
ສັດທາໃນພຣະເຢຊູຄຣິດ
-
ສັດທາແມ່ນຫລັກທຳຂໍ້ທຳອິດແຫ່ງພຣະກິດຕິຄຸນຂອງພຣະເຢຊູຄຣິດ.
-
ສັດທາໃນພຣະເຢຊູຄຣິດແມ່ນລວມທັງການມີຄວາມໝັ້ນໃຈທີ່ພຣະອົງເປັນພຣະບຸດຂອງພຣະເຈົ້າ ແລະ ການໄວ້ວາງໃຈໃນພຣະອົງ ໃນຖານະພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ.
-
ສັດທາໃນພຣະເຢຊູຄຣິດເປັນຫລັກທຳຂອງການກະທຳ ແລະ ພະລັງ.
-
ເຮົາເພີ່ມຄວາມເຂັ້ມແຂງໃຫ້ແກ່ສັດທາຂອງເຮົາໂດຍການອະທິຖານ, ການສຶກສາພຣະຄຳພີ, ແລະ ການເຊື່ອຟັງພຣະວິນຍານ.
ການກັບໃຈ
-
ສັດທາໃນພຣະເຢຊູຄຣິດນຳເຮົາໄປສູ່ການກັບໃຈ. ການກັບໃຈແມ່ນຂະບວນການທີ່ຫັນມາຫາພຣະເຈົ້າ ແລະ ຫັນຫລັງໃຫ້ບາບ. ເມື່ອເຮົາກັບໃຈ, ການກະທຳ, ຄວາມປາດຖະໜາ, ແລະ ຄວາມຄິດຂອງເຮົາຈະປ່ຽນໄປ ເພື່ອໃຫ້ສອດຄ່ອງກັບພຣະປະສົງຂອງພຣະເຈົ້າຫລາຍຂຶ້ນ.
-
ເມື່ອເຮົາກັບໃຈຢ່າງຈິງໃຈ, ພຣະເຈົ້າໃຫ້ອະໄພແກ່ເຮົາ. ການໃຫ້ອະໄພເປັນໄປໄດ້ເພາະພຣະເຢຊູຄຣິດໄດ້ຊົດໃຊ້ແທນບາບຂອງເຮົາ.
-
ເມື່ອເຮົາກັບໃຈ, ເຮົາຮູ້ສຶກສະຫງົບ ຂະນະທີ່ຄວາມຮູ້ສຶກຜິດ ແລະ ຄວາມໂສກເສົ້າຂອງເຮົາຖືກປິ່ນປົວ.
-
ການກັບໃຈເປັນຂະບວນການຕະຫລອດຊີວິດ. ພຣະເຈົ້າຍິນດີຕ້ອນຮັບເຮົາກັບມາ ທຸກເທື່ອທີ່ເຮົາກັບໃຈ. ພຣະອົງຈະບໍ່ມີວັນຍອມແພ້ກັບເຮົາ.
ການບັບຕິສະມາ: ພັນທະສັນຍາທຳອິດຂອງເຮົາກັບພຣະເຈົ້າ
-
ການບັບຕິສະມາແມ່ນວິທີທີ່ເຮົາເຂົ້າສູ່ຄວາມສຳພັນໃນພັນທະສັນຍາກັບພຣະເຈົ້າເປັນຄັ້ງທຳອິດ.
-
ການບັບຕິສະມາມີສອງສ່ວນ: ການບັບຕິສະມາດ້ວຍນ້ຳ ແລະ ດ້ວຍພຣະວິນຍານ. ເມື່ອເຮົາຮັບບັບຕິສະມາ ແລະ ການຢືນຢັນ, ເຮົາໄດ້ຮັບການຊຳລະຈາກບາບຂອງເຮົາ, ແລະ ເຮັດໃຫ້ເຮົາເລີ່ມຕົ້ນໃໝ່ໃນຊີວິດ.
-
ເຮົາຮັບບັບຕິສະມາໂດຍການລົງໄປໃນນ້ຳໝົດທັງຕົວ, ເຮັດຕາມຕົວຢ່າງຂອງພຣະເຢຊູ.
-
ເດັກນ້ອຍບໍ່ຕ້ອງຮັບບັບຕິສະມາ ຈົນກວ່າເຂົາມີອາຍຸແປດປີ. ເດັກນ້ອຍຜູ້ໄດ້ຕາຍກ່ອນອາຍຸນັ້ນ ໄດ້ຖືກໄຖ່ຜ່ານທາງການຊົດໃຊ້ຂອງພຣະເຢຊູຄຣິດ.
-
ເຮົາຮັບສ່ວນສິນລະລຶກທຸກອາທິດໃນການລະນຶກເຖິງການເສຍສະລະຂອງພຣະເຢຊູ ແລະ ເພື່ອຕໍ່ພັນທະສັນຍາຂອງເຮົາກັບພຣະເຈົ້າ.
ຂອງປະທານແຫ່ງພຣະວິນຍານບໍລິສຸດ
-
ພຣະວິນຍານບໍລິສຸດເປັນສະມາຊິກອົງທີສາມໃນຝ່າຍພຣະເຈົ້າ.
-
ຫລັງຈາກທີ່ເຮົາໄດ້ຮັບບັບຕິສະມາແລ້ວ, ເຮົາກໍໄດ້ຮັບຂອງປະທານແຫ່ງພຣະວິນຍານບໍລິສຸດຜ່ານທາງພິທີການແຫ່ງການຢືນຢັນ.
-
ເມື່ອເຮົາຮັບຂອງປະທານແຫ່ງພຣະວິນຍານບໍລິສຸດ, ເຮົາສາມາດມີຄວາມເປັນເພື່ອນຂອງພຣະອົງ ຕະຫລອດຊີວິດຂອງເຮົາ ຖ້າຫາກເຮົາຊື່ສັດ.
-
ພຣະວິນຍານບໍລິສຸດຊຳລະເຮົາໃຫ້ບໍລິສຸດ, ນຳພາເຮົາ, ປອບໂຍນເຮົາ, ແລະ ຊ່ວຍໃຫ້ເຮົາຮູ້ຄວາມຈິງ.
ອົດທົນຈົນເຖິງທີ່ສຸດ
-
ການອົດທົນແມ່ນລວມທັງການສືບຕໍ່ໃຊ້ສັດທາໃນພຣະຄຣິດທຸກວັນ. ເຮົາສືບຕໍ່ຮັກສາພັນທະສັນຍາຂອງເຮົາກັບພຣະເຈົ້າ, ສະແຫວງຫາຄວາມເປັນເພື່ອນຂອງພຣະວິນຍານບໍລິສຸດ, ແລະ ຮັບສ່ວນສິນລະລຶກ.
-
ເມື່ອເຮົາສະແຫວງຫາທີ່ຈະຕິດຕາມພຣະເຢຊູຄຣິດຢ່າງຊື່ສັດ, ພຣະເຈົ້າສັນຍາວ່າ ເຮົາຈະມີຊີວິດນິລັນດອນ.
ພຣະກິດຕິຄຸນຂອງພຣະເຢຊູຄຣິດເປັນພອນແກ່ລູກໆທຸກຄົນຂອງພຣະເຈົ້າ
-
ການດຳລົງຊີວິດຕາມພຣະກິດຕິຄຸນເຮັດໃຫ້ເຮົາມີຄວາມຊື່ນຊົມຫລາຍຂຶ້ນ, ເປັນແຮງບັນດານໃຈໃນການກະທຳຂອງເຮົາ, ແລະ ເສີມສ້າງຄວາມສຳພັນຂອງເຮົາ.
-
ເຮົາມັກຈະມີຄວາມສຸກ—ທັງສ່ວນຕົວ ແລະ ເປັນຄອບຄົວ—ເມື່ອເຮົາດຳລົງຊີວິດຕາມຄຳສອນຂອງພຣະເຢຊູຄຣິດ.
-
ຜ່ານທາງພຣະກິດຕິຄຸນຂອງພຣະເຢຊູຄຣິດ, ຄອບຄົວໄດ້ຮັບພອນໃນຊີວິດນີ້ ແລະ ສາມາດຢູ່ນຳກັນຊົ່ວນິລັນດອນ ໃນທີ່ປະທັບຂອງພຣະເຈົ້າ.
ຄຳຖາມທີ່ທ່ານອາດຈະໃຊ້ຖາມຜູ້ຄົນ
ຄຳຖາມດັ່ງຕໍ່ໄປນີ້ແມ່ນຕົວຢ່າງຂອງສິ່ງທີ່ທ່ານອາດຈະຖາມຜູ້ຄົນ. ຄຳຖາມເຫລົ່ານີ້ສາມາດຊ່ວຍໃຫ້ທ່ານມີການສົນທະນາທີ່ມີຄວາມໝາຍ ແລະ ເຂົ້າໃຈຄວາມຕ້ອງການ ແລະ ທັດສະນະຂອງບຸກຄົນ.
-
ເຈົ້າຮູ້ຫຍັງແດ່ກ່ຽວກັບພຣະເຢຊູຄຣິດ?
-
ການມີສັດທາໃນພຣະເຢຊູຄຣິດໝາຍຄວາມວ່າແນວໃດຕໍ່ເຈົ້າ?
-
ເຈົ້າຢາກປ່ຽນຫຍັງແດ່ໃນຊີວິດຂອງເຈົ້າ?
-
ເຈົ້າເຂົ້າໃຈຫຍັງແດ່ກ່ຽວກັບການກັບໃຈ?
-
ເຈົ້າເຂົ້າໃຈຫຍັງແດ່ກ່ຽວກັບການບັບຕິສະມາ? ຕອນນີ້ເຈົ້າສາມາດເຮັດຫຍັງແດ່ ເພື່ອກຽມພ້ອມສຳລັບການບັບຕິສະມາ?
-
ພຣະວິນຍານບໍລິສຸດຈະສາມາດຊ່ວຍເຈົ້າໃນການເດີນທາງຂອງເຈົ້າກັບໄປຫາທີ່ປະທັບຂອງພຣະເຈົ້າໄດ້ແນວໃດ?
-
ມີການທ້າທາຍໃດແດ່ທີ່ເຈົ້າ ຫລື ຄອບຄົວຂອງເຈົ້າກຳລັງປະເຊີນຢູ່? ຂໍໃຫ້ພວກເຮົາແບ່ງປັນບາງວິທີທີ່ພຣະກິດຕິຄຸນຂອງພຣະເຢຊູຄຣິດສາມາດຊ່ວຍເຫລືອຊິໄດ້ບໍ?
ຄຳເຊື້ອເຊີນທີ່ທ່ານອາດຈະໃຊ້
-
ເຈົ້າຈະທູນຖາມພຣະເຈົ້າໃນຄຳອະທິຖານຫລືບໍ່ ເພື່ອຊ່ວຍໃຫ້ເຈົ້າຮູ້ວ່າສິ່ງທີ່ພວກເຮົາສິດສອນນັ້ນເປັນຄວາມຈິງ? (ເບິ່ງ “ຄວາມຮູ້ແຈ້ງດ້ານການສິດສອນ: ການອະທິຖານ” ໃນພາກສຸດທ້າຍຂອງບົດຮຽນທີ 1.)
-
ເຈົ້າຈະໄປໂບດໃນວັນອາທິດນີ້ຫລືບໍ່ ເພື່ອຮຽນຮູ້ເພີ່ມເຕີມກ່ຽວກັບສິ່ງທີ່ພວກເຮົາໄດ້ສິດສອນ?
-
ເຈົ້າຈະອ່ານພຣະຄຳພີມໍມອນ ແລະ ອະທິຖານຫລືບໍ່ ເພື່ອຈະໄດ້ຮູ້ວ່າມັນເປັນພຣະຄຳຂອງພຣະເຈົ້າ? (ທ່ານອາດຈະແນະນຳບົດ ຫລື ຂໍ້ສະເພາະໃດໜຶ່ງ.)
-
ເຈົ້າຈະເຮັດຕາມຕົວຢ່າງຂອງພຣະເຢຊູ ແລະ ຮັບບັບຕິສະມາຫລືບໍ່? (ເບິ່ງ “ການເຊື້ອເຊີນໃຫ້ຮັບບັບຕິສະມາ ແລະ ການຢືນຢັນ,” ຊຶ່ງຢູ່ກ່ອນໜ້າບົດຮຽນທີ 1 ທັນທີ.)
-
ພວກເຮົາຈະກຳນົດເວລາສຳລັບການຢ້ຽມຢາມຄັ້ງຕໍ່ໄປຂອງພວກເຮົາຊິໄດ້ບໍ?
ພຶ້ນຖານຄຳສອນ
ພາກນີ້ມີຄຳສອນ ແລະ ຂໍ້ພຣະຄຳພີໃຫ້ທ່ານສຶກສາເພື່ອເສີມສ້າງຄວາມຮູ້ ແລະ ປະຈັກພະຍານຂອງທ່ານກ່ຽວກັບພຣະກິດຕິຄຸນ ແລະ ເພື່ອຊ່ວຍທ່ານສິດສອນ.
ພາລະກິດແຫ່ງສະຫວັນຂອງພຣະເຢຊູຄຣິດ
ພຣະບິດາເທິງສະຫວັນໄດ້ສົ່ງພຣະບຸດທີ່ຮັກຂອງພຣະອົງ, ພຣະເຢຊູຄຣິດ, ມາສູ່ໂລກ ເພື່ອເຮັດໃຫ້ເປັນໄປໄດ້ສຳລັບເຮົາທຸກຄົນ ທີ່ຈະປະສົບກັບຄວາມສຸກຢູ່ໃນໂລກນີ້ ແລະ ຊີວິດນິລັນດອນໃນໂລກທີ່ຈະມາເຖິງ. “ແລະ ນີ້ຄືພຣະກິດຕິຄຸນ, ຂ່າວອັນໜ້າຊື່ນຊົມ, … ວ່າ [ພຣະເຢຊູຄຣິດ] ໄດ້ມາສູ່ໂລກ … ເພື່ອຮັບເອົາບາບຂອງໂລກ, ແລະ ເພື່ອເຮັດໃຫ້ໂລກບໍລິສຸດ, ແລະ ເພື່ອຊຳລະລ້າງມັນຈາກຄວາມບໍ່ຊອບທຳທັງໝົດ” (ຄຳສອນ ແລະ ພັນທະສັນຍາ 76:40–42).
ໂດຍທີ່ເປັນມະຕະ, ເຮົາທຸກຄົນຈະເຮັດບາບ, ແລະ ເຮົາທຸກຄົນຈະຕາຍ. ບາບ ແລະ ຄວາມຕາຍຈະກີດກັນເຮົາຈາກການມີຊີວິດນິລັນດອນກັບພຣະເຈົ້າ ເວັ້ນເສຍແຕ່ເຮົາຈະມີພຣະຜູ້ໄຖ່ (ເບິ່ງ 2 ນີໄຟ 9). ກ່ອນໂລກໄດ້ຖືກສ້າງຂຶ້ນ, ພຣະບິດາເທິງສະຫວັນໄດ້ເລືອກເອົາພຣະເຢຊູຄຣິດເພື່ອໄຖ່ເຮົາ. ໃນການສະແດງຄວາມຮັກອັນສູງສົ່ງ, ພຣະເຢຊູໄດ້ມາສູ່ໂລກ ແລະ ສຳເລັດພາລະກິດອັນສູງສົ່ງນີ້. ພຣະອົງໄດ້ເຮັດໃຫ້ເປັນໄປໄດ້ສຳລັບເຮົາທີ່ຈະຖືກໄຖ່ຈາກບາບຂອງເຮົາ, ແລະ ພຣະອົງໄດ້ຮັບຮອງວ່າ ເຮົາຈະຟື້ນຄືນຊີວິດຫລັງຈາກເຮົາຕາຍ.
ພຣະເຢຊູໄດ້ມີຊີວິດທີ່ບໍ່ມີບາບ. ໃນຕອນທ້າຍຂອງການປະຕິບັດສາດສະໜາກິດຂອງພຣະອົງໃນຊ່ວງມະຕະ, ພຣະອົງໄດ້ຮັບເອົາບາບຂອງເຮົາ ໂດຍການຮັບທຸກທໍລະມານຢູ່ໃນເຄັດເຊມາເນ ເມື່ອພຣະອົງໄດ້ເສຍສະລະ (ເບິ່ງ 1 ນີໄຟ 11:33). ຄວາມທຸກທໍລະມານຂອງພຣະເຢຊູຍິ່ງໃຫຍ່ ຈົນເຮັດໃຫ້ພຣະອົງ “ຕ້ອງສັ່ນເພາະຄວາມເຈັບປວດ, ແລະ ເລືອດໄຫລອອກຈາກທຸກຂຸມຂົນ” (ຄຳສອນ ແລະ ພັນທະສັນຍາ 19:18). ຫລັງຈາກການຄຶງຂອງພຣະອົງ, ພຣະເຢຊູໄດ້ຟື້ນຄືນພຣະຊົນ, ຮັບໄຊຊະນະເໜືອຄວາມຕາຍ. ຮ່ວມກັນ, ເຫດການເຫລົ່ານີ້ເປັນການຊົດໃຊ້ຂອງພຣະເຢຊູຄຣິດ.
ບາບຂອງເຮົາເຮັດໃຫ້ເຮົາບໍ່ສະອາດທາງວິນຍານ, ແລະ “ສິ່ງທີ່ເປິເປື້ອນຈະບໍ່ສາມາດຢູ່ກັບພຣະເຈົ້າໄດ້” (1 ນີໄຟ 10:21). ນອກເໜືອຈາກນີ້, ກົດແຫ່ງຄວາມຍຸດຕິທຳຮຽກຮ້ອງຜົນສະທ້ອນສຳລັບບາບຂອງເຮົາ.
ການເສຍສະລະຊົດໃຊ້ຂອງພຣະເຢຊູຈັດຫາວິທີໃຫ້ເຮົາເພື່ອຮັບການຊຳລະໃຫ້ສະອາດຈາກບາບ ແລະ ຖືກເຮັດໃຫ້ບໍລິສຸດເມື່ອເຮົາກັບໃຈ. ມັນຍັງຈັດຫາວິທີຕອບສະໜອງການຮຽກຮ້ອງຂອງຄວາມຍຸດຕິທຳນຳອີກ (ເບິ່ງ ແອວມາ 42:15, 23–24). ພຣະຜູ້ຊ່ວຍໃຫ້ລອດໄດ້ກ່າວວ່າ, “ເຮົາ … ໄດ້ທົນທຸກທໍລະມານກັບສິ່ງເຫລົ່ານີ້ແທນທຸກຄົນ, ເພື່ອວ່າພວກເຂົາຈະບໍ່ໄດ້ທົນທຸກທໍລະມານຖ້າຫາກພວກເຂົາຈະກັບໃຈ; ແຕ່ຖ້າຫາກພວກເຂົາບໍ່ກັບໃຈ ພວກເຂົາຈະຕ້ອງທົນທຸກທໍລະມານແມ່ນແຕ່ເໝືອນດັ່ງເຮົາ” (ຄຳສອນ ແລະ ພັນທະສັນຍາ 19:16–17). ຖ້າຫາກບໍ່ແມ່ນເພາະພຣະເຢຊູຄຣິດ, ບາບຈະຢຸດຕິຄວາມຫວັງທັງໝົດສຳລັບການດຳລົງຢູ່ໃນອະນາຄົດກັບພຣະບິດາເທິງສະຫວັນ.
ໃນການຖວາຍພຣະອົງເອງເປັນເຄື່ອງບູຊາແທນເຮົາ, ພຣະເຢຊູບໍ່ໄດ້ກຳຈັດໜ້າທີ່ຮັບຜິດຊອບສ່ວນຕົວຂອງເຮົາ. ເຮົາຕ້ອງມີສັດທາໃນພຣະອົງ, ແລະ ພະຍາຍາມເຊື່ອຟັງພຣະບັນຍັດ. ເມື່ອເຮົາກັບໃຈ, ພຣະເຢຊູຈະທວງເອົາສິດທິແຫ່ງຄວາມເມດຕາຂອງພຣະອົງຈາກພຣະບິດາແທນເຮົາ (ເບິ່ງ ໂມໂຣໄນ 7:27–28). ເພາະການອ້ອນວອນຂອງພຣະຜູ້ຊ່ວຍໃຫ້ລອດ, ພຣະບິດາເທິງສະຫວັນຈະໃຫ້ອະໄພແກ່ເຮົາ, ຜ່ອນຄາຍເຮົາຈາກພາລະ ແລະ ຄວາມຮູ້ສຶກຜິດຈາກບາບຂອງເຮົາ (ເບິ່ງ ໂມໄຊຢາ 15:7–9). ເຮົາຖືກຊຳລະໃຫ້ສະອາດທາງວິນຍານ ແລະ ໃນທີ່ສຸດສາມາດຖືກຕ້ອນຮັບເຂົ້າໃນທີ່ປະທັບຂອງພຣະເຈົ້າ.
ພາລະກິດທີ່ສູງສົ່ງຂອງພຣະເຢຊູກໍເພື່ອຊ່ວຍເຮົາໃຫ້ລອດຈາກຄວາມຕາຍນຳອີກ. ເພາະພຣະອົງໄດ້ຟື້ນຄືນພຣະຊົນ, ເຮົາທຸກຄົນຈະຟື້ນຄືນຊີວິດຫລັງຈາກເຮົາຕາຍ. ນີ້ໝາຍຄວາມວ່າ ວິນຍານ ແລະ ຮ່າງກາຍຂອງແຕ່ລະຄົນຈະກັບມາລວມກັນອີກຄັ້ງ, ແລະ ເຮົາແຕ່ລະຄົນຈະມີຊີວິດຕະຫລອດໄປ ໃນຮ່າງກາຍທີ່ສົມບູນແບບ ແລະ ຟື້ນຄືນຊີວິດແລ້ວ. ຖ້າຫາກບໍ່ແມ່ນເພາະພຣະເຢຊູຄຣິດ, ຄວາມຕາຍຈະຢຸດຕິຄວາມຫວັງທັງໝົດສຳລັບການດຳລົງຢູ່ໃນອະນາຄົດກັບພຣະບິດາເທິງສະຫວັນ.
ການສຶກສາພຣະຄຳພີ
ພຣະເຈົ້າໄດ້ສົ່ງພຣະບຸດຂອງພຣະອົງມາ
ຄວາມລອດຜ່ານທາງພຣະເຢຊູຄຣິດ
ຮຽນຮູ້ຕື່ມອີກກ່ຽວກັບຫລັກທຳນີ້
-
ຄູ່ມືພຣະຄຳພີ: “ພຣະເຢຊູຄຣິດ”
-
Gospel Topics: “Jesus Christ”
ສັດທາໃນພຣະເຢຊູຄຣິດ
ຫລັກທຳຂໍ້ທຳອິດແຫ່ງພຣະກິດຕິຄຸນແມ່ນສັດທາໃນອົງພຣະເຢຊູຄຣິດເຈົ້າ. ສັດທາເປັນພື້ນຖານສຳລັບຫລັກທຳພຣະກິດຕິຄຸນອື່ນໆທັງໝົດ.
ສັດທາໃນພຣະເຢຊູຄຣິດແມ່ນລວມທັງການມີຄວາມໝັ້ນໃຈວ່າ ພຣະອົງເປັນພຣະບຸດອົງດຽວທີ່ຖືກຳເນີດຂອງພຣະເຈົ້າ. ມັນລວມທັງການໄວ້ວາງໃຈໃນພຣະອົງໃນຖານະພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ—ວ່າພຣະອົງເປັນພຽງທາງດຽວເທົ່ານັ້ນຂອງເຮົາທີ່ຈະກັບຄືນໄປຫາທີ່ປະທັບຂອງພຣະເຈົ້າ (ເບິ່ງ ກິດຈະການ 4:10–12; ໂມໄຊຢາ 3:17; 4:6–8). ເຮົາຖືກເຊື້ອເຊີນໃຫ້ໃຊ້ “ສັດທາອັນບໍ່ສັ່ນສະເທືອນໃນພຣະອົງ, ໄວ້ວາງໃຈຢ່າງເຕັມທີ່ໃນພຣະຄຸນຄວາມດີຂອງພຣະອົງ ຜູ້ຊົງອານຸພາບເພື່ອຊ່ວຍໃຫ້ລອດ” (2 ນີໄຟ 31:19).
ສັດທາໃນພຣະເຢຊູຄຣິດແມ່ນລວມທັງການເຊື່ອວ່າ ພຣະອົງໄດ້ຮັບທຸກທໍລະມານແທນບາບຂອງເຮົາ ໃນການເສຍສະລະຊົດໃຊ້ຂອງພຣະອົງ. ເພາະການເສຍສະລະຂອງພຣະເຢຊູ, ເຮົາຈຶ່ງສາມາດຖືກເຮັດໃຫ້ສະອາດ ແລະ ຖືກໄຖ່ເມື່ອເຮົາກັບໃຈ. ການຊຳລະລ້າງນີ້ຊ່ວຍໃຫ້ເຮົາພົບສັນຕິສຸກ ແລະ ຄວາມຫວັງໃນຊີວິດນີ້. ມັນຍັງຊ່ວຍໃຫ້ເຮົາໄດ້ຮັບຄວາມສົມບູນແຫ່ງຄວາມຊື່ນຊົມ ຫລັງຈາກເຮົາຕາຍນຳອີກ.
ສັດທາໃນພຣະເຢຊູຄຣິດແມ່ນລວມທັງການໄວ້ວາງໃຈວ່າ ຜ່ານທາງພຣະອົງ, ເຮົາທຸກຄົນຈະຟື້ນຄືນຊີວິດຫລັງຈາກເຮົາຕາຍ. ສັດທານີ້ສາມາດສະໜັບສະໜູນ ແລະ ປອບໂຍນເຮົາໃນເວລາທີ່ສູນເສຍ. ຄວາມໂສກເສົ້າຂອງການຕາຍສາມາດຖືກກຳຈັດອອກໄປໂດຍຄຳສັນຍາຂອງການຟື້ນຄືນຊີວິດ.
ສັດທາໃນພຣະເຢຊູຄຣິດແມ່ນລວມທັງການເຊື່ອ ແລະ ການໄວ້ວາງໃຈວ່າ ພຣະອົງໄດ້ຮັບເອົາຄວາມທຸກ ແລະ ຄວາມອ່ອນແອຂອງເຮົາໄວ້ກັບພຣະອົງເອງ (ເບິ່ງ ເອຊາຢາ 53:3–5). ພຣະອົງຮູ້ໂດຍປະສົບການຂອງພຣະອົງວ່າຈະສະໜັບສະໜູນເຮົາຢ່າງມີເມດຕາຜ່ານການທ້າທາຍໃນຊີວິດໄດ້ແນວໃດ (ເບິ່ງ ແອວມາ 7:11–12; ຄຳສອນ ແລະ ພັນທະສັນຍາ 122:8). ເມື່ອເຮົາໃຊ້ສັດທາ, ພຣະອົງຈະຊ່ວຍເຮົາໃຫ້ກ້າວໄປໜ້າຜ່ານຜ່າຄວາມຫຍຸ້ງຍາກ.
ຜ່ານທາງສັດທາຂອງເຮົາໃນພຣະອົງ, ພຣະເຢຊູສາມາດປິ່ນປົວເຮົາທາງກາຍ ແລະ ທາງວິນຍານ. ພຣະອົງພ້ອມສະເໝີທີ່ຈະຊ່ວຍເຮົາ ເມື່ອເຮົາຈື່ຈຳຄຳເຊື້ອເຊີນຂອງພຣະອົງ ທີ່ຈະ “ເບິ່ງທີ່ເຮົາໃນຄວາມນຶກຄິດທຸກຢ່າງ, ຢ່າສົງໄສ, ຢ່າສູ່ຢ້ານ” (ຄຳສອນ ແລະ ພັນທະສັນຍາ 6:36).
ຫລັກທຳຂອງການກະທຳ ແລະ ພະລັງ
ສັດທາໃນພຣະເຢຊູຄຣິດນຳພາໄປສູ່ການກະທຳ. ເຮົາສະແດງສັດທາຂອງເຮົາໂດຍການເຊື່ອຟັງພຣະບັນຍັດ ແລະ ການເຮັດຄວາມດີທຸກວັນ. ເຮົາກັບໃຈຈາກບາບຂອງເຮົາ. ເຮົາຈົງຮັກພັກດີຕໍ່ພຣະອົງ. ເຮົາພະຍາຍາມກາຍເປັນເໝືອນດັ່ງພຣະອົງ.
ເມື່ອເຮົາໃຊ້ສັດທາ, ເຮົາສາມາດປະສົບກັບອຳນາດຂອງພຣະເຢຊູໃນຊີວິດປະຈຳວັນຂອງເຮົາ. ເຮົາຈະຂະຫຍາຍຄວາມພະຍາຍາມທີ່ດີທີ່ສຸດຂອງເຮົາເອງ. ພຣະອົງຈະຊ່ວຍເຮົາໃຫ້ເຕີບໂຕ ແລະ ຕ້ານທານກັບການລໍ້ລວງ.
ເພີ່ມພູນສັດທາຂອງເຮົາ
ສາດສະດາແອວມາໄດ້ສິດສອນວ່າ ການສ້າງສັດທາສາມາດເລີ່ມຕົ້ນດ້ວຍ “ຄວາມປາດຖະໜາທີ່ຈະເຊື່ອ” ທີ່ລຽບງ່າຍ (ແອວມາ 32:27). ແລ້ວ, ເພື່ອໃຫ້ສັດທາຂອງເຮົາໃນພຣະເຢຊູຄຣິດເຕີບໂຕ, ເຮົາຕ້ອງບຳລຸງລ້ຽງມັນໂດຍການຮຽນຮູ້ພຣະຄຳຂອງພຣະອົງ, ນຳໃຊ້ຄຳສອນຂອງພຣະອົງ, ແລະ ເຊື່ອຟັງພຣະບັນຍັດຂອງພຣະອົງ. ແອວມາໄດ້ສິດສອນວ່າ ເມື່ອເຮົາບຳລຸງລ້ຽງພຣະຄຳຂອງພຣະເຈົ້າຢູ່ໃນໃຈເຮົາດ້ວຍຄວາມອົດທົນ ແລະ ພາກພຽນ, “ມັນຈະແຕກຮາກ [ແລະ ກາຍເປັນ] ຕົ້ນທີ່ງອກງາມໄປສູ່ຊີວິດອັນເປັນນິດ”—ຈຶ່ງເຮັດໃຫ້ສັດທາຂອງເຮົາເຂັ້ມແຂງຂຶ້ນ (ແອວມາ 32:41; ເບິ່ງ ຂໍ້ທີ 26–43).
ການສຶກສາພຣະຄຳພີ
ສັດທາ, ພະລັງ, ແລະ ຄວາມລອດ
ຄຳສອນແຫ່ງສັດທາ
ຕົວຢ່າງແຫ່ງສັດທາ
ວຽກງານ ແລະ ການເຊື່ອຟັງ
ສັດທາໄປສູ່ການກັບໃຈ
ຮຽນຮູ້ຕື່ມອີກກ່ຽວກັບຫລັກທຳນີ້
-
ຄູ່ມືພຣະຄຳພີ: “ພຣະເຢຊູຄຣິດ,” “ຊົດໃຊ້, ການຊົດໃຊ້,” “ສັດທາ”
-
Bible Dictionary: “Faith”
-
Gospel Topics: “Jesus Christ,” “Atonement of Jesus Christ,” “Faith in Jesus Christ”
ການກັບໃຈ
ການກັບໃຈຄືຫຍັງ?
ການກັບໃຈ ຄືຫລັກທຳຂໍ້ທີສອງຂອງພຣະກິດຕິຄຸນ. ສັດທາໃນພຣະເຢຊູຄຣິດ ແລະ ຄວາມຮັກຂອງເຮົາທີ່ມີຕໍ່ພຣະອົງນຳເຮົາໄປສູ່ການກັບໃຈ (ເບິ່ງ ຮີລາມັນ 14:13). ການກັບໃຈແມ່ນຂະບວນການທີ່ຫັນມາຫາພຣະເຈົ້າ ແລະ ຫັນຫລັງໃຫ້ບາບ. ເມື່ອເຮົາກັບໃຈ, ການກະທຳ, ຄວາມປາດຖະໜາ, ແລະ ຄວາມຄິດຂອງເຮົາຈະປ່ຽນໄປ ເພື່ອໃຫ້ສອດຄ່ອງກັບພຣະປະສົງຂອງພຣະເຈົ້າຫລາຍຂຶ້ນ. ການໃຫ້ອະໄພຈາກບາບຖືກເຮັດໃຫ້ເປັນໄປໄດ້ຜ່ານທາງພຣະເຢຊູຄຣິດ ແລະ ການເສຍສະລະຊົດໃຊ້ຂອງພຣະອົງ.
ການກັບໃຈແມ່ນເປັນຫລາຍກວ່າພຽງແຕ່ການໃຊ້ຄວາມຕັ້ງໃຈເພື່ອປ່ຽນແປງພຶດຕິກຳ ຫລື ການເອົາຊະນະຄວາມອ່ອນແອເທົ່ານັ້ນ. ການກັບໃຈແມ່ນການຫັນມາຫາພຣະຄຣິດຢ່າງຈິງໃຈ, ຜູ້ປະທານພະລັງໃຫ້ເຮົາເພື່ອປະສົບກັບ “ການປ່ຽນແປງອັນຍິ່ງໃຫຍ່” ໃນໃຈຂອງເຮົາ (ແອວມາ 5:12–14). ເມື່ອເຮົາປະສົບກັບການປ່ຽນແປງນີ້ໃນໃຈ, ເຮົາໄດ້ເກີດໃໝ່ທາງວິນຍານ (ເບິ່ງ ໂມໄຊຢາ 27:24–26).
ຜ່ານທາງການກັບໃຈ, ເຮົາພັດທະນາມຸມມອງໃໝ່ກ່ຽວກັບພຣະເຈົ້າ, ຕົວເຮົາເອງ, ແລະ ໂລກ. ເຮົາຮູ້ສຶກໃໝ່ເຖິງຄວາມຮັກຂອງພຣະເຈົ້າທີ່ມີຕໍ່ເຮົາ ໃນຖານະລູກຂອງພຣະອົງ—ແລະ ຄວາມຮັກຂອງພຣະຜູ້ຊ່ວຍໃຫ້ລອດທີ່ມີຕໍ່ເຮົາ. ໂອກາດທີ່ຈະກັບໃຈເປັນໜຶ່ງໃນພອນທີ່ຍິ່ງໃຫຍ່ທີ່ສຸດ ທີ່ພຣະເຈົ້າໄດ້ປະທານໃຫ້ເຮົາຜ່ານທາງພຣະບຸດຂອງພຣະອົງ.
ຂະບວນການຂອງການກັບໃຈ
ເມື່ອເຮົາກັບໃຈ, ເຮົາຮັບຮູ້ບາບຂອງເຮົາ ແລະ ຮູ້ສຶກເສຍໃຈແທ້ໆ. ເຮົາສາລະພາບບາບຂອງເຮົາຕໍ່ພຣະເຈົ້າ ແລະ ທູນຂໍການໃຫ້ອະໄພຈາກພຣະອົງ. ເຮົາຍັງສາລະພາບບາບທີ່ຮ້າຍແຮງຕໍ່ຜູ້ນຳຂອງສາດສະໜາຈັກທີ່ໄດ້ຮັບສິດອຳນາດ, ຜູ້ຈະສະໜັບສະໜູນເຮົາເມື່ອເຮົາກັບໃຈ. ເຮົາເຮັດສິ່ງທີ່ເຮົາສາມາດເຮັດເພື່ອທົດແທນ, ຊຶ່ງໝາຍຄວາມວ່າ ການພະຍາຍາມແກ້ໄຂບັນຫາຂອງການກະທຳຂອງເຮົາ ທີ່ເຮົາໄດ້ເຮັດໄປນັ້ນ. ການກັບໃຈທີ່ແທ້ຈິງສະແດງໃຫ້ເຫັນໄດ້ດີທີ່ສຸດ ໂດຍການກະທຳທີ່ຊອບທຳໃນຊ່ວງໄລຍະໜຶ່ງ.
ການກັບໃຈເປັນຂະບວນການປະຈຳວັນຕະຫລອດຊີວິດຂອງເຮົາ. “ທຸກຄົນໄດ້ເຮັດຜິດບາບ, ແລະ ຂາດຈາກລັດສະໝີພາບຂອງພຣະເຈົ້າ” (ໂຣມ 3:23). ເຮົາຄວນສືບຕໍ່ກັບໃຈ, ຈື່ຈຳວ່າ ເຮົາ “ສາມາດສູ້ກັບທຸກສິ່ງໄດ້ໂດຍພຣະອົງຜູ້ຊົງຊູກຳລັງ” ເຮົາ (ຟີລິບປອຍ 4:13). ພຣະຜູ້ເປັນເຈົ້າໄດ້ຮັບຮອງເຮົາວ່າ “ເຖິງແມ່ນວ່າຜູ້ຄົນຂອງເຮົາຈະກັບໃຈເທົ່າໃດເທື່ອກໍຕາມ ເຮົາກໍຈະໃຫ້ອະໄພແກ່ເຂົາ” (ໂມໄຊຢາ 26:30).
ພອນຂອງການກັບໃຈ
ການກັບໃຈເປັນຫລັກທຳໃນທາງບວກ ທີ່ນຳຄວາມຊື່ນຊົມ ແລະ ສັນຕິສຸກມາໃຫ້. ມັນນຳເຮົາ “ໄປຫາອຳນາດຂອງພຣະຜູ້ໄຖ່, ໄປຫາຄວາມລອດຂອງຈິດວິນຍານ [ຂອງເຮົາ]” (ຮີລາມັນ 5:11).
ເມື່ອເຮົາກັບໃຈ, ຄວາມຮູ້ສຶກຜິດ ແລະ ຄວາມໂສກເສົ້າຂອງເຮົາໄດ້ຖືກປິ່ນປົວ ໃນຂະບວນການຂອງເວລາ. ເຮົາຈະຮູ້ສຶກເຖິງອິດທິພົນຂອງພຣະວິນຍານຢ່າງລົ້ນເຫລືອ. ຄວາມປາດຖະໜາຂອງເຮົາທີ່ຈະເຮັດຕາມພຣະເຈົ້າຈະເຕີບໂຕຂຶ້ນ.
“ຜູ້ຄົນຢ່າງຫລວງຫລາຍຄິດວ່າ ການກັບໃຈເປັນການລົງໂທດ—ເປັນບາງສິ່ງທີ່ຕ້ອງຫລີກເວັ້ນ. … ແຕ່ຄວາມຮູ້ສຶກວ່າຕົວເອງຖືກລົງໂທດແມ່ນມາຈາກຊາຕານ. ມັນພະຍາຍາມກີດກັນເຮົາບໍ່ໃຫ້ຫວັງເພິ່ງພຣະເຢຊູຄຣິດ, ຜູ້ຢືນວາແຂນຢູ່, ດ້ວຍຄວາມຫວັງ ແລະ ຄວາມເຕັມພຣະໄທ ທີ່ຈະປິ່ນປົວ, ໃຫ້ອະໄພ, ຊຳລະລ້າງ, ຊູກຳລັງ, ເຮັດໃຫ້ເຮົາສະອາດ, ແລະ ບໍລິສຸດ” (Russell M. Nelson, “We Can Do Better ແລະ Be Better,” Liahona, May 2019, 67).
ການສຶກສາພຣະຄຳພີ
ການກັບໃຈ
ການໄຖ່ ແລະ ການໃຫ້ອະໄພ
ຄວາມເມດຕາສຳລັບຜູ້ທີ່ກັບໃຈ
ຮຽນຮູ້ຕື່ມອີກກ່ຽວກັບຫລັກທຳນີ້
-
ຄູ່ມືພຣະຄຳພີ: “ກັບໃຈ, ການກັບໃຈ,” “ຊົດໃຊ້, ການຊົດໃຊ້”
-
Bible Dictionary: “Repentance”
-
ຄູ່ມືທົ່ວໄປ, 32.1
-
Gospel Topics: “Repentance,” “Atonement of Jesus Christ”
ການບັບຕິສະມາ: ພັນທະສັນຍາທຳອິດກັບພຣະເຈົ້າ
ສັດທາໃນພຣະເຢຊູຄຣິດ ແລະ ການກັບໃຈກະກຽມເຮົາສຳລັບພິທີການແຫ່ງການບັບຕິສະມາ ແລະ ການຢືນຢັນ. ການບັບຕິສະມາເປັນພິທີການຊ່ວຍໃຫ້ລອດຢ່າງທຳອິດແຫ່ງພຣະກິດຕິຄຸນຂອງພຣະເຢຊູຄຣິດ. ເມື່ອເຮົາຮັບເອົາພິທີການແຫ່ງຄວາມຫວັງອັນໜ້າຍິນດີນີ້, ເຮົາໄດ້ເຮັດພັນທະສັນຍາທຳອິດກັບພຣະເຈົ້າ.
ພິທີການແມ່ນການກະທຳ ຫລື ພິທີທີ່ສັກສິດ ທີ່ປະຕິບັດໂດຍສິດອຳນາດຂອງຖານະປະໂລຫິດ. ພິທີການບາງຢ່າງ, ເຊັ່ນ ການບັບຕິສະມາ, ແມ່ນຈຳເປັນຕໍ່ຄວາມລອດຂອງເຮົາ.
ຜ່ານທາງພິທີການ, ເຮົາເຮັດພັນທະສັນຍາກັບພຣະເຈົ້າ. ພັນທະສັນຍາເຫລົ່ານີ້ແມ່ນຄຳສັນຍາສັກສິດລະຫວ່າງເຮົາກັບພຣະເຈົ້າ. ພຣະອົງສັນຍາວ່າຈະອວຍພອນເຮົາ ເມື່ອເຮົາຮັກສາຄຳສັນຍາຂອງເຮົາກັບພຣະອົງ. ເຮົາຄວນມີຄວາມມຸ່ງໝັ້ນທີ່ເຂັ້ມແຂງ ທີ່ຈະຮັກສາຄຳສັນຍາຂອງເຮົາກັບພຣະເຈົ້າ.
ພຣະເຈົ້າໄດ້ຈັດຫາພິທີການ ແລະ ພັນທະສັນຍາ ເພື່ອຊ່ວຍເຮົາໃຫ້ມາຫາພຣະອົງ ແລະ ມີຊີວິດນິລັນດອນ. ເມື່ອເຮົາຮັບເອົາພິທີການຂອງຖານະປະໂລຫິດ ແລະ ຮັກສາພັນທະສັນຍາທີ່ກ່ຽວຂ້ອງ, ເຮົາສາມາດປະສົບກັບ “ອຳນາດຂອງຄວາມເປັນເໝືອນພຣະເຈົ້າ” ໃນຊີວິດຂອງເຮົາ (ຄຳສອນ ແລະ ພັນທະສັນຍາ 84:20).
ພັນທະສັນຍາແຫ່ງການບັບຕິສະມາ
ພຣະຜູ້ຊ່ວຍໃຫ້ລອດໄດ້ສິດສອນວ່າ ການບັບຕິສະມາແມ່ນຈຳເປັນສຳລັບເຮົາທີ່ຈະເຂົ້າໄປໃນອານາຈັກສະຫວັນ (ເບິ່ງ ໂຢຮັນ 3:5). ມັນກໍຍັງຈຳເປັນສຳລັບເຮົາທີ່ຈະກາຍເປັນສະມາຊິກຂອງສາດສະໜາຈັກຂອງພຣະເຢຊູຄຣິດນຳອີກ. ພຣະຜູ້ຊ່ວຍໃຫ້ລອດຂອງເຮົາໄດ້ຕັ້ງຕົວຢ່າງໂດຍການຮັບບັບຕິສະມາ (ເບິ່ງ ມັດທາຍ 3:13–17).
ເມື່ອເຮົາຮັບບັບຕິສະມາ ແລະ ຮັກສາພັນທະສັນຍາຂອງເຮົາ, ພຣະເຈົ້າສັນຍາວ່າຈະໃຫ້ອະໄພແກ່ບາບຂອງເຮົາ (ເບິ່ງ ກິດຈະການ 22:16; 3 ນີໄຟ 12:1–2). ພອນທີ່ຍິ່ງໃຫຍ່ນີ້ເປັນໄປໄດ້ຜ່ານທາງການເສຍສະລະຊົດໃຊ້ຂອງພຣະເຢຊູຄຣິດ, ຜູ້ທີ່ “ຮັກເຮົາ, ແລະ ໄດ້ຊົງປົດປ່ອຍພວກເຮົາຈາກການຜິດບາບ ດ້ວຍໂລຫິດຂອງພຣະອົງ” (ພຣະນິມິດ 1:5). ພຣະເຈົ້າກໍຍັງສັນຍາວ່າຈະອວຍພອນເຮົາດ້ວຍຄວາມເປັນເພື່ອນຂອງພຣະວິນຍານບໍລິສຸດນຳອີກ ເພື່ອວ່າເຮົາຈະຖືກຊຳລະໃຫ້ບໍລິສຸດ, ນຳພາ, ແລະ ປອບໂຍນ.
ໃນພາກສ່ວນຂອງເຮົາໃນພັນທະສັນຍາແຫ່ງການບັບຕິສະມາ, ເຮົາເປັນພະຍານວ່າ ເຮົາເຕັມໃຈທີ່ຈະຮັບເອົາພຣະນາມຂອງພຣະເຢຊູຄຣິດ. ເຮົາກໍຍັງສັນຍາວ່າຈະລະນຶກເຖິງພຣະອົງຕະຫລອດເວລາ ແລະ ຮັກສາພຣະບັນຍັດຂອງພຣະອົງ. ເຮົາສັນຍາທີ່ຈະຮັກ ແລະ ຮັບໃຊ້ຄົນອື່ນ, “ຈະເປັນທຸກກັບຄົນທີ່ເປັນທຸກ; … ຈະປອບໃຈຄົນທີ່ຕ້ອງການຄວາມປອບໃຈ, ແລະ ຈະຢືນເປັນພະຍານຂອງພຣະເຈົ້າໃນທຸກເວລາ ແລະ ໃນທຸກສິ່ງ, ແລະ ໃນທຸກບ່ອນ” (ໂມໄຊຢາ 18:9; ເບິ່ງ ຂໍ້ທີ 8–10, 13). ເຮົາສະແດງຄວາມມຸ່ງໝັ້ນທີ່ຈະຮັບໃຊ້ພຣະເຢຊູຄຣິດ ຈົນເຖິງທີ່ສຸດຂອງຊີວິດ (ເບິ່ງ ຄຳສອນ ແລະ ພັນທະສັນຍາ 20:37; ໂມໄຊຢາ 2:17).
ຄຳໝັ້ນສັນຍາຂອງພັນທະສັນຍາຂອງເຮົາທີ່ກ່ຽວຂ້ອງກັບການບັບຕິສະມາ ແມ່ນໜ້າທີ່ຮັບຜິດຊອບອັນຍິ່ງໃຫຍ່. ມັນກໍຍັງເປັນການດົນໃຈ ແລະ ຊື່ນຊົມນຳອີກ. ມັນສ້າງຄວາມສຳພັນພິເສດລະຫວ່າງເຮົາກັບພຣະບິດາເທິງສະຫວັນ ຊຶ່ງຜ່ານທາງນັ້ນພຣະອົງໄດ້ຂະຫຍາຍຄວາມຮັກຂອງພຣະອົງຕະຫລອດໄປ.
ການບັບຕິສະມາໂດຍການລົງໄປໃນນ້ຳໝົດທັງຕົວ
ພຣະເຢຊູໄດ້ສິດສອນວ່າ ເຮົາຕ້ອງຮັບບັບຕິສະມາໂດຍການລົງໄປໃນນ້ຳໝົດທັງຕົວເພື່ອການປົດບາບຂອງເຮົາ (ເບິ່ງ ຄຳສອນ ແລະ ພັນທະສັນຍາ 20:72–74). ການບັບຕິສະມາໂດຍການລົງໄປໃນນ້ຳໝົດທັງຕົວເປັນສັນຍາລັກຂອງການສິ້ນພຣະຊົນ, ການຖືກຝັງ, ແລະ ການຟື້ນຄືນພຣະຊົນຂອງພຣະເຢຊູຄຣິດ (ເບິ່ງ ໂຣມ 6:3–6).
ການບັບຕິສະມາໂດຍການລົງໄປໃນນ້ຳໝົດທັງຕົວກໍມີສັນຍາລັກທີ່ມີພະລັງສຳລັບເຮົາເປັນການສ່ວນຕົວ. ມັນເປັນຕົວແທນຂອງການຕາຍຂອງຊີວິດເກົ່າ, ການຝັງສົບຂອງຊີວິດນັ້ນ, ແລະ ການຂຶ້ນມາຂອງເຮົາ ໃນການເກີດໃໝ່ທາງວິນຍານ. ເມື່ອເຮົາຮັບບັບຕິສະມາ, ເຮົາເລີ່ມຕົ້ນຂະບວນການຂອງການເກີດໃໝ່ ແລະ ກາຍເປັນບຸດ ແລະ ທິດາທາງວິນຍານຂອງພຣະຄຣິດ (ເບິ່ງ ໂມໄຊຢາ 5:7–8; ໂຣມ 8:14–17).
ເດັກນ້ອຍ
ເດັກນ້ອຍຈະບໍ່ຮັບບັບຕິສະມາຈົນກວ່າເຂົາເຖິງອາຍຸຂອງການຮັບຜິດຊອບ, ຊຶ່ງມີອາຍຸແປດປີ (ເບິ່ງ ຄຳສອນ ແລະ ພັນທະສັນຍາ 68:27). ເດັກນ້ອຍຜູ້ໄດ້ຕາຍໄປກ່ອນອາຍຸນັ້ນ ຖືກໄຖ່ຜ່ານທາງການຊົດໃຊ້ຂອງພຣະເຢຊູຄຣິດ (ເບິ່ງ ໂມໂຣໄນ 8:4–24; ຄຳສອນ ແລະ ພັນທະສັນຍາ 137:10). ກ່ອນເດັກນ້ອຍຈະຮັບບັບຕິສະມາ, ພວກເຂົາຄວນໄດ້ຮັບການສິດສອນພຣະກິດຕິຄຸນ ເພື່ອວ່າພວກເຂົາຈະພ້ອມສຳລັບຂັ້ນຕອນທີ່ສຳຄັນນີ້ໃນຊີວິດຂອງພວກເຂົາ ເພື່ອເຮັດພັນທະສັນຍາກັບພຣະເຈົ້າ.
ສິນລະລຶກ
ພຣະບິດາເທິງສະຫວັນຂອງເຮົາຕ້ອງການໃຫ້ເຮົາຊື່ສັດຕໍ່ພັນທະສັນຍາທີ່ເຮົາໄດ້ເຮັດກັບພຣະອົງ. ເພື່ອຊ່ວຍເຮົາເຮັດສິ່ງນີ້, ພຣະອົງໄດ້ບັນຊາເຮົາໃຫ້ພົບກັນເລື້ອຍໆເພື່ອຮັບສ່ວນສິນລະລຶກ. ສິນລະລຶກເປັນພິທີການຂອງຖານະປະໂລຫິດ ທີ່ພຣະເຢຊູໄດ້ແນະນຳຕໍ່ອັກຄະສາວົກຂອງພຣະອົງ ກ່ອນການຊົດໃຊ້ຂອງພຣະອົງ.
ການຮັບສ່ວນສິນລະລຶກເປັນຈຸດປະສົງຫລັກຂອງກອງປະຊຸມສິນລະລຶກໃນແຕ່ລະອາທິດ. ເຂົ້າຈີ່ ແລະ ນ້ຳຖືກອວຍພອນ ແລະ ຢາຍໃຫ້ຜູ້ຄົນຢູ່ໃນບ່ອນຊຸມນຸມ. ເຂົ້າຈີ່ເປັນຕົວແທນໃຫ້ແກ່ການເສຍສະລະພຣະກາຍຂອງພຣະຜູ້ຊ່ວຍໃຫ້ລອດເພື່ອເຮົາ. ນ້ຳເປັນຕົວແທນໃຫ້ແກ່ໂລຫິດຂອງພຣະອົງ, ຊຶ່ງໄດ້ຫລັ່ງເພື່ອເຮົາ.
ການຮັບສ່ວນເຄື່ອງໝາຍເຫລົ່ານີ້ ແມ່ນເພື່ອການລະນຶກເຖິງການເສຍສະລະຂອງພຣະຜູ້ຊ່ວຍໃຫ້ລອດ ແລະ ເພື່ອຕໍ່ພັນທະສັນຍາຂອງເຮົາກັບພຣະເຈົ້າ. ເຮົາຮັບເອົາຄຳສັນຍາໃໝ່ວ່າ ພຣະວິນຍານຈະສະຖິດຢູ່ກັບເຮົາ.
ການສຶກສາພຣະຄຳພີ
ຕົວຢ່າງຂອງພຣະຄຣິດ
ພັນທະສັນຍາແຫ່ງການບັບຕິສະມາ
ຄຸນສົມບັດສຳລັບການບັບຕິສະມາ
ພອນທີ່ສັນຍາໄວ້ຂອງການບັບຕິສະມາ
ຄວາມຈຳເປັນສຳລັບສິດອຳນາດ
ພຣະເຢຊູໄດ້ຈັດຕັ້ງສິນລະລຶກ
ຄຳອະທິຖານສຳລັບສິນລະລຶກ
ການຮັບສ່ວນສິນລະລຶກ
ຮຽນຮູ້ຕື່ມອີກກ່ຽວກັບຫລັກທຳນີ້
-
ຄູ່ມືພຣະຄຳພີ: “ບັບຕິສະມາ, ການບັບຕິສະມາ,” “ສິນລະລຶກ”
-
Gospel Topics: “Baptism,” “Sacrament”
ຂອງປະທານແຫ່ງພຣະວິນຍານບໍລິສຸດ
ການຮັບຂອງປະທານແຫ່ງພຣະວິນຍານບໍລິສຸດ
ການບັບຕິສະມາມີສອງສ່ວນ. ພຣະເຢຊູໄດ້ສິດສອນວ່າ ເຮົາຕ້ອງໄດ້ “ບັງເກີດຈາກນ້ຳ ແລະ ຈາກພຣະວິນຍານ” ເພື່ອເຂົ້າໄປໃນອານາຈັກຂອງພຣະເຈົ້າ (ໂຢຮັນ 3:5; ເນັ້ນຄຳເນີ້ງ). ໂຈເຊັບ ສະມິດ ໄດ້ສິດສອນວ່າ, “ການບັບຕິສະມາດ້ວຍນ້ຳ ເປັນພຽງເຄິ່ງໜຶ່ງຂອງການບັບຕິສະມາ, ແລະ ບໍ່ມີປະໂຫຍດຫຍັງເລີຍ ຖ້າປາດສະຈາກອີກເຄິ່ງໜຶ່ງ—ນັ້ນຄື, ການບັບຕິສະມາດ້ວຍພຣະວິນຍານບໍລິສຸດ” (Teachings of Presidents of the Church: Joseph Smith [2007], 95).
ການບັບຕິສະມາດ້ວຍນ້ຳຈະຕ້ອງຕິດຕາມດ້ວຍການບັບຕິສະມາດ້ວຍພຣະວິນຍານຈຶ່ງຈະສົມບູນ. ເມື່ອເຮົາໄດ້ຮັບການບັບຕິສະມາທັງສອງຄັ້ງນີ້, ເຮົາໄດ້ຮັບການຊຳລະໃຫ້ສະອາດຈາກບາບ ແລະ ເກີດໃໝ່ທາງວິນຍານ. ແລ້ວເຮົາເລີ່ມຕົ້ນຊີວິດທາງວິນຍານໃໝ່ ໃນຖານະສານຸສິດຂອງພຣະຄຣິດ.
ເຮົາໄດ້ຮັບການບັບຕິສະມາທາງວິນຍານຜ່ານທາງພິທີການທີ່ເອີ້ນວ່າ ການຢືນຢັນ. ພິທີການນີ້ຖືກປະຕິບັດໂດຍຜູ້ດຳລົງຖານະປະໂລຫິດໜຶ່ງຄົນ ຫລື ຫລາຍກວ່ານັ້ນ ຜູ້ວາງມືໃສ່ເທິງຫົວຂອງເຮົາ. ທຳອິດ ພວກເພິ່ນຢືນຢັນເຮົາເປັນສະມາຊິກຂອງສາດສະໜາຈັກ, ແລະ ແລ້ວພວກເພິ່ນຈະມອບຂອງປະທານແຫ່ງພຣະວິນຍານບໍລິສຸດໃຫ້ເຮົາ. ນີ້ເປັນພິທີການອັນດຽວກັນທີ່ອ້າງເຖິງໃນພຣະຄຳພີໃໝ່ ແລະ ພຣະຄຳພີມໍມອນ (ເບິ່ງ ກິດຈະການ 8:14–17; 3 ນີໄຟ 18:36–37).
ພຣະວິນຍານບໍລິສຸດເປັນສະມາຊິກອົງທີສາມໃນຝ່າຍພຣະເຈົ້າ. ພຣະອົງເຮັດວຽກງານເປັນໜຶ່ງກັບພຣະບິດາເທິງສະຫວັນ ແລະ ພຣະເຢຊູຄຣິດ. ເມື່ອເຮົາຮັບເອົາຂອງປະທານແຫ່ງພຣະວິນຍານບໍລິສຸດ, ເຮົາສາມາດມີຄວາມເປັນເພື່ອນຂອງພຣະອົງຕະຫລອດຊີວິດຂອງເຮົາ ເມື່ອເຮົາຊື່ສັດ.
ວິທີທີ່ພຣະວິນຍານບໍລິສຸດອວຍພອນເຮົາ
ຂອງປະທານແຫ່ງພຣະວິນຍານບໍລິສຸດເປັນໜຶ່ງໃນຂອງປະທານທີ່ຍິ່ງໃຫຍ່ທີ່ສຸດຂອງພຣະບິດາເທິງສະຫວັນ. ພຣະວິນຍານບໍລິສຸດໄດ້ຊຳລະເຮົາໃຫ້ສະອາດ ແລະ ເຮັດໃຫ້ເຮົາບໍລິສຸດ, ເຮັດໃຫ້ເຮົາບໍລິສຸດຫລາຍຂຶ້ນ, ສົມບູນຫລາຍຂຶ້ນ, ແລະ ເປັນເໝືອນດັ່ງພຣະເຈົ້າຫລາຍຂຶ້ນ (ເບິ່ງ 3 ນີໄຟ 27:20). ພຣະອົງຊ່ວຍເຮົາໃຫ້ປ່ຽນແປງ ແລະ ເຕີບໂຕທາງວິນຍານ ເມື່ອເຮົາສະແຫວງຫາທີ່ຈະເຮັດຕາມຄຳສັ່ງສອນຂອງພຣະເຈົ້າ.
ພຣະວິນຍານບໍລິສຸດຊ່ວຍເຮົາຮຽນຮູ້ ແລະ ຮັບຮູ້ຄວາມຈິງ (ເບິ່ງ ໂມໂຣໄນ 10:5). ພຣະອົງຍັງຢືນຢັນຄວາມຈິງຕໍ່ຫົວໃຈ ແລະ ຈິດໃຈຂອງເຮົານຳອີກ. ນອກເໜືອຈາກນີ້, ພຣະວິນຍານບໍລິສຸດຍັງຊ່ວຍເຮົາຮຽນຮູ້ຄວາມຈິງ (ເບິ່ງ ຄຳສອນ ແລະ ພັນທະສັນຍາ 42:14). ເມື່ອເຮົາຮຽນຮູ້ ແລະ ສິດສອນຄວາມຈິງໂດຍອຳນາດຂອງພຣະວິນຍານບໍລິສຸດ, ພຣະອົງຈະນຳມັນເຂົ້າສູ່ຫົວໃຈຂອງເຮົາ (ເບິ່ງ 2 ນີໄຟ 33:1).
ເມື່ອເຮົາສະແຫວງຫາການຊີ້ນຳຈາກພຣະວິນຍານບໍລິສຸດດ້ວຍຄວາມຖ່ອມຕົວ, ພຣະອົງຈະນຳພາເຮົາ (ເບິ່ງ 2 ນີໄຟ 32:5). ສິ່ງນີ້ແມ່ນລວມທັງການກະຕຸ້ນເຮົາໃນວິທີທີ່ເຮົາສາມາດຮັບໃຊ້ຄົນອື່ນ.
ພຣະວິນຍານບໍລິສຸດໃຫ້ຄວາມເຂັ້ມແຂງທາງວິນຍານ ເພື່ອຊ່ວຍໃຫ້ເຮົາເອົາຊະນະຄວາມອ່ອນແອ. ພຣະອົງຊ່ວຍໃຫ້ເຮົາຕ້ານທານກັບການລໍ້ລວງ. ພຣະອົງສາມາດເຕືອນເຮົາເຖິງສິ່ງອັນຕະລາຍທາງວິນຍານ ແລະ ທາງຮ່າງກາຍ.
ພຣະວິນຍານບໍລິສຸດຈະຊ່ວຍເຮົາຜ່ານຜ່າການທ້າທາຍຂອງຊີວິດ. ພຣະອົງຈະປອບໂຍນເຮົາລະຫວ່າງເວລາທີ່ມີການທົດລອງ ຫລື ໂສກເສົ້າ, ເຕີມເຕັມເຮົາດ້ວຍຄວາມຫວັງ (ເບິ່ງ ໂມໂຣໄນ 8:26). ຜ່ານທາງພຣະວິນຍານບໍລິສຸດ, ເຮົາສາມາດຮູ້ສຶກເຖິງຄວາມຮັກຂອງພຣະເຈົ້າທີ່ມີຕໍ່ເຮົາ.
ການສຶກສາພຣະຄຳພີ
ລັກສະນະຂອງພຣະວິນຍານບໍລິສຸດ
ພອນ ແລະ ອິດທິພົນຈາກພຣະວິນຍານບໍລິສຸດ
ຄວາມສຳຄັນຂອງ ຂອງປະທານແຫ່ງພຣະວິນຍານບໍລິສຸດ
ຮຽນຮູ້ຕື່ມອີກກ່ຽວກັບຫລັກທຳນີ້
-
ຄູ່ມືພຣະຄຳພີ: “ພຣະວິນຍານບໍລິສຸດ,” “ຂອງປະທານແຫ່ງພຣະວິນຍານບໍລິສຸດ”
-
Bible Dictionary: “Holy Ghost”
-
Gospel Topics: “Holy Ghost,” “Spiritual Gifts”
ອົດທົນຈົນເຖິງທີ່ສຸດ
ເມື່ອເຮົາຮັບບັບຕິສະມາ ແລະ ການຢືນຢັນ, ເຮົາໄດ້ເຂົ້າເຮັດພັນທະສັນຍາກັບພຣະເຈົ້າ. ໃນບັນດາສິ່ງອື່ນໆ, ເຮົາສັນຍາວ່າຈະຮັກສາພຣະບັນຍັດຂອງພຣະອົງ ແລະ ຮັບໃຊ້ພຣະອົງຕະຫລອດຊີວິດທີ່ເຫລືອຢູ່ຂອງເຮົາ (ເບິ່ງ ໂມໄຊຢາ 18:8–10, 13; ຄຳສອນ ແລະ ພັນທະສັນຍາ 20:37).
ຫລັງຈາກເຮົາໄດ້ເຂົ້າໄປໃນເສັ້ນທາງແຫ່ງພຣະກິດຕິຄຸນຜ່ານທາງການບັບຕິສະມາ ແລະ ການຢືນຢັນແລ້ວ, ເຮົາຈະເຮັດທຸກວິທີທາງເພື່ອຢູ່ໃນເສັ້ນທາງນັ້ນ. ເມື່ອເຮົາອອກໄປຈາກເສັ້ນທາງ ແມ່ນແຕ່ເລັກນ້ອຍ, ເຮົາຈະໃຊ້ສັດທາໃນພຣະຄຣິດເພື່ອກັບໃຈ. ພອນຂອງການກັບໃຈເຮັດໃຫ້ເຮົາໄດ້ກັບຄືນສູ່ເສັ້ນທາງແຫ່ງພຣະກິດຕິຄຸນ ແລະ ຮັກສາພອນແຫ່ງພັນທະສັນຍາກັບພຣະເຈົ້າ. ເມື່ອເຮົາກັບໃຈຢ່າງຈິງໃຈ, ພຣະເຈົ້າຈະເຕັມພຣະໄທສະເໝີ ທີ່ຈະໃຫ້ອະໄພ ແລະ ຕ້ອນຮັບເຮົາກັບຄືນ.
ການອົດທົນຈົນເຖິງທີ່ສຸດໝາຍເຖິງການຊື່ສັດຕໍ່ພຣະເຈົ້າ ຈົນເຖິງທີ່ສຸດຂອງຊີວິດເຮົາ—ຜ່ານຊ່ວງເວລາທີ່ດີ ແລະ ຊ່ວງເວລາທີ່ຫຍຸ້ງຍາກ, ຜ່ານຄວາມຈະເລີນຮຸ່ງເຮືອງ ແລະ ຄວາມຍາກລຳບາກ. ເຮົາຍອມໃຫ້ພຣະຄຣິດຫລໍ່ຫລອມເຮົາ ແລະ ເຮັດໃຫ້ເຮົາເປັນເໝືອນພຣະອົງຫລາຍຂຶ້ນ. ເຮົາຫວັງເພິ່ງພຣະຄຣິດດ້ວຍສັດທາ, ຄວາມໄວ້ວາງໃຈ, ແລະ ຄວາມຫວັງ ບໍ່ວ່າແມ່ນຫຍັງຈະເກີດຂຶ້ນໃນຊີວິດຂອງເຮົາກໍຕາມ.
ການອົດທົນຈົນເຖິງທີ່ສຸດບໍ່ໄດ້ໝາຍເຖິງພຽງແຕ່ຍຶດໝັ້ນຈົນເຖິງມື້ເຮົາຕາຍ. ແຕ່, ມັນໝາຍເຖິງການສຸມຊີວິດ, ຄວາມຄິດ, ແລະ ການກະທຳຂອງເຮົາໄວ້ທີ່ພຣະເຢຊູຄຣິດ. ມັນລວມທັງການສືບຕໍ່ໃຊ້ສັດທາໃນພຣະຄຣິດໃນແຕ່ລະວັນ. ເຮົາຍັງສືບຕໍ່ກັບໃຈ, ຮັກສາພັນທະສັນຍາຂອງເຮົາກັບພຣະເຈົ້າ, ແລະ ສະແຫວງຫາຄວາມເປັນເພື່ອນຂອງພຣະວິນຍານບໍລິສຸດນຳອີກ.
ການອົດທົນຈົນເຖິງທີ່ສຸດແມ່ນລວມທັງ “[ການ] ມຸ້ງໜ້າດ້ວຍຄວາມໝັ້ນຄົງໃນພຣະຄຣິດ, ໂດຍມີຄວາມສະຫວ່າງຢ່າງບໍລິບູນຂອງຄວາມຫວັງ, ແລະ ຄວາມຮັກຂອງພຣະເຈົ້າ ແລະ ຂອງມະນຸດທັງປວງ.” ພຣະບິດາເທິງສະຫວັນຂອງເຮົາສັນຍາວ່າ ເມື່ອເຮົາອົດທົນຈົນເຖິງທີ່ສຸດ, ເຮົາ “ຈະມີຊີວິດນິລັນດອນ” (2 ນີໄຟ 31:20).
ການສຶກສາພຣະຄຳພີ
ອົດທົນຈົນເຖິງທີ່ສຸດ
ພອນສຳລັບຜູ້ທີ່ອົດທົນ
ຮຽນຮູ້ຕື່ມອີກກ່ຽວກັບຫລັກທຳນີ້
-
Gospel Topics: “Adversity”
-
ຄູ່ມືພຣະຄຳພີ: “ອົດທົນ,” “ຄວາມຍາກລຳບາກ”
ພຣະກິດຕິຄຸນຂອງພຣະເຢຊູຄຣິດເປັນພອນແກ່ລູກໆທຸກຄົນຂອງພຣະເຈົ້າ
ພຣະກິດຕິຄຸນຂອງພຣະເຢຊູຄຣິດມີໃຫ້ສຳລັບລູກໆທຸກຄົນຂອງພຣະເຈົ້າ. ພຣະຄຳພີສິດສອນວ່າ “ທຸກຄົນເທົ່າທຽມກັນໝົດຕໍ່ພຣະເຈົ້າ” ບໍ່ວ່າພື້ນຖານ ຫລື ສະຖານະການຂອງເຮົາຈະເປັນແບບໃດກໍຕາມ. ພຣະອົງເຊື້ອເຊີນ “ທັງໝົດໃຫ້ເຂົ້າມາຫາພຣະອົງ ແລະ ຮັບສ່ວນພຣະກະລຸນາທິຄຸນຂອງພຣະອົງ; ແລະ ພຣະອົງບໍ່ປະຕິເສດຜູ້ໃດທີ່ມາຫາພຣະອົງເລີຍ” (2 ນີໄຟ 26:33).
ພຣະກິດຕິຄຸນເປັນພອນໃຫ້ແກ່ເຮົາຕະຫລອດຊີວິດມະຕະ ແລະ ຕະຫລອດນິລັນດອນ. ເຮົາມັກຈະມີຄວາມສຸກ—ທັງສ່ວນຕົວ ແລະ ເປັນຄອບຄົວ—ເມື່ອເຮົາດຳລົງຊີວິດຕາມຄຳສອນຂອງພຣະເຢຊູຄຣິດ (ເບິ່ງ ໂມໄຊຢາ 2:41; “ຄອບຄົວ: ການປະກາດຕໍ່ໂລກ,” ChurchofJesusChrist.org). ການດຳລົງຊີວິດຕາມພຣະກິດຕິຄຸນເຮັດໃຫ້ເຮົາມີຄວາມຊື່ນຊົມຫລາຍຂຶ້ນ, ເປັນແຮງບັນດານໃຈໃນການກະທຳຂອງເຮົາ, ແລະ ເສີມສ້າງຄວາມສຳພັນຂອງເຮົາ.
ການດຳລົງຊີວິດຕາມພຣະກິດຕິຄຸນຂອງພຣະເຢຊູຄຣິດ ຍັງສາມາດປົກປ້ອງເຮົາຈາກການເລືອກທີ່ຈະທຳຮ້າຍເຮົາທາງຮ່າງກາຍ ຫລື ທາງວິນຍານ. ມັນຊ່ວຍເຮົາພົບຄວາມເຂັ້ມແຂງ ແລະ ປອບໂຍນໃນເວລາທີ່ມີການທົດລອງ ແລະ ໂສກເສົ້າ. ມັນໃຫ້ຫົນທາງສູ່ຊີວິດນິລັນດອນທີ່ຊື່ນຊົມ.
ຂ່າວສານສຳຄັນຢ່າງໜຶ່ງຂອງພຣະກິດຕິຄຸນທີ່ຖືກຟື້ນຟູຄື ເຮົາທຸກຄົນເປັນພາກສ່ວນໜຶ່ງຂອງຄອບຄົວຂອງພຣະເຈົ້າ. ເຮົາເປັນບຸດ ແລະ ທິດາທີ່ຮັກຂອງພຣະອົງ. ບໍ່ວ່າສະຖານະການໃນຄອບຄົວຂອງເຮົາຢູ່ເທິງໂລກນີ້ຈະເປັນແນວໃດກໍຕາມ, ເຮົາແຕ່ລະຄົນກໍເປັນສະມາຊິກໃນຄອບຄົວຂອງພຣະເຈົ້າ.
ພາກສ່ວນໜຶ່ງທີ່ຍິ່ງໃຫຍ່ອີກຢ່າງໜຶ່ງຂອງຂ່າວສານຂອງເຮົາຄື ຄອບຄົວສາມາດຢູ່ນຳກັນຊົ່ວນິລັນດອນ. ຄອບຄົວແມ່ນຖືກແຕ່ງຕັ້ງຂຶ້ນໂດຍພຣະເຈົ້າ. ແຜນແຫ່ງຄວາມສຸກຂອງພຣະບິດາເທິງສະຫວັນເຮັດໃຫ້ຄວາມສຳພັນຂອງຄອບຄົວຍືນຍົງຕໍ່ໄປຫລັງຈາກຄວາມຕາຍ. ພິທີການພຣະວິຫານທີ່ສັກສິດ ແລະ ພັນທະສັນຍາເຮັດໃຫ້ເປັນໄປໄດ້ສຳລັບຄອບຄົວທີ່ຈະຢູ່ນຳກັນຕະຫລອດໄປ.
ຜ່ານທາງຄວາມສະຫວ່າງຂອງພຣະກິດຕິຄຸນ, ຄອບຄົວສາມາດແກ້ໄຂຄວາມເຂົ້າໃຈຜິດ, ການຂັດແຍ້ງ, ແລະ ການທ້າທາຍໄດ້. ຄອບຄົວທີ່ແຕກແຍກໂດຍຄວາມບໍ່ລົງລອຍກັນ ສາມາດໄດ້ຮັບການປິ່ນປົວຜ່ານທາງການກັບໃຈ, ການໃຫ້ອະໄພ, ແລະ ສັດທາໃນອຳນາດຂອງການຊົດໃຊ້ຂອງພຣະເຢຊູຄຣິດ.
ພຣະກິດຕິຄຸນຂອງພຣະເຢຊູຄຣິດຊ່ວຍໃຫ້ເຮົາພັດທະນາຄວາມສຳພັນຂອງຄອບຄົວໃຫ້ແໜ້ນແຟ້ນຍິ່ງຂຶ້ນ. ບ້ານເປັນສະຖານທີ່ ທີ່ດີທີ່ສຸດເພື່ອສິດສອນ ແລະ ຮຽນຮູ້ຫລັກທຳພຣະກິດຕິຄຸນ. ບ້ານທີ່ຕັ້ງຢູ່ເທິງຫລັກທຳພຣະກິດຕິຄຸນ ຈະເປັນບ່ອນຫລົບໄພ ແລະ ປອດໄພ. ມັນຈະເປັນສະຖານທີ່ ທີ່ພຣະວິນຍານຂອງພຣະຜູ້ເປັນເຈົ້າສາມາດສະຖິດຢູ່.
ການສຶກສາພຣະຄຳພີ
ຮຽນຮູ້ຕື່ມອີກກ່ຽວກັບຫລັກທຳນີ້
-
ຄູ່ມືພຣະຄຳພີ: “ພຣະກິດຕິຄຸນ”
-
ຄູ່ມືທົ່ວໄປ, ບົດທີ 2 ແລະ 16
-
Gospel Topics: “Gospel,” “Family”
ໂຄງຮ່າງບົດຮຽນສັ້ນຫາປານກາງ
ແນວທາງຊີ້ນຳດັ່ງຕໍ່ໄປນີ້ເປັນຕົວຢ່າງຂອງສິ່ງທີ່ທ່ານອາດຈະສິດສອນຄົນໃດຄົນໜຶ່ງ ຖ້າຫາກທ່ານມີເວລາໜ້ອຍ. ເມື່ອໃຊ້ໂຄງຮ່າງນີ້, ໃຫ້ເລືອກຫລັກທຳໜຶ່ງຂໍ້ ຫລື ຫລາຍກວ່ານັ້ນເພື່ອສິດສອນ. ພື້ນຖານຄຳສອນສຳລັບຫລັກທຳແຕ່ລະຂໍ້ແມ່ນມີໃຫ້ກ່ອນໜ້ານີ້ ໃນບົດຮຽນ.
ຂະນະທີ່ທ່ານສິດສອນ, ໃຫ້ຖາມຄຳຖາມ ແລະ ຟັງ. ສະເໜີຄຳເຊື້ອເຊີນທີ່ຈະຊ່ວຍໃຫ້ຜູ້ຄົນຮຽນຮູ້ວິທີທີ່ຈະເຂົ້າໃກ້ພຣະເຈົ້າຫລາຍຂຶ້ນ. ຄຳເຊື້ອເຊີນທີ່ສຳຄັນຢ່າງໜຶ່ງຄືການໃຫ້ບຸກຄົນນັ້ນໄດ້ພົບກັບທ່ານຕື່ມອີກ. ຄວາມຍາວຂອງບົດຮຽນຈະຂຶ້ນກັບຄຳຖາມທີ່ທ່ານຖາມ ແລະ ການຟັງທີ່ທ່ານເຮັດ.
ສິ່ງທີ່ທ່ານອາດຈະສິດສອນຜູ້ຄົນພາຍໃນ 3–10 ນາທີ
-
ພຣະເຈົ້າໄດ້ສົ່ງພຣະບຸດທີ່ຮັກຂອງພຣະອົງ, ພຣະເຢຊູຄຣິດ, ມາສູ່ໂລກ ເພື່ອໄຖ່ເຮົາຈາກບາບ ແລະ ຄວາມຕາຍ.
-
ສັດທາໃນພຣະເຢຊູຄຣິດເປັນຫລັກທຳຂອງການກະທຳ ແລະ ພະລັງ. ສັດທາຊ່ວຍໃຫ້ເຮົາປະສົບກັບອຳນາດທີ່ເສີມສ້າງຄວາມເຂັ້ມແຂງຂອງພຣະຜູ້ຊ່ວຍໃຫ້ລອດໃນຊີວິດຂອງເຮົາ.
-
ສັດທາໃນພຣະເຢຊູຄຣິດນຳເຮົາໄປສູ່ການກັບໃຈ. ການກັບໃຈແມ່ນຂະບວນການທີ່ຫັນມາຫາພຣະເຈົ້າ ແລະ ຫັນຫລັງໃຫ້ບາບ. ເມື່ອເຮົາກັບໃຈ, ການກະທຳ, ຄວາມປາດຖະໜາ, ແລະ ຄວາມຄິດຂອງເຮົາຈະປ່ຽນໄປ ເພື່ອໃຫ້ສອດຄ່ອງກັບພຣະປະສົງຂອງພຣະເຈົ້າຫລາຍຂຶ້ນ.
-
ເມື່ອເຮົາກັບໃຈ, ພຣະເຈົ້າໃຫ້ອະໄພແກ່ເຮົາ. ການໃຫ້ອະໄພເປັນໄປໄດ້ເພາະພຣະເຢຊູຄຣິດໄດ້ຊົດໃຊ້ແທນບາບຂອງເຮົາ.
-
ການບັບຕິສະມາມີສອງສ່ວນ: ການບັບຕິສະມາດ້ວຍນ້ຳ ແລະ ດ້ວຍພຣະວິນຍານ. ເມື່ອເຮົາຮັບບັບຕິສະມາ ແລະ ການຢືນຢັນ, ເຮົາໄດ້ຮັບການຊຳລະຈາກບາບຂອງເຮົາ, ແລະ ເຮັດໃຫ້ເຮົາເລີ່ມຕົ້ນໃໝ່ໃນຊີວິດ.
-
ຫລັງຈາກທີ່ເຮົາໄດ້ຮັບບັບຕິສະມາດ້ວຍນ້ຳແລ້ວ, ເຮົາກໍໄດ້ຮັບຂອງປະທານແຫ່ງພຣະວິນຍານບໍລິສຸດ ຜ່ານທາງພິທີການແຫ່ງການຢືນຢັນ.
-
ເມື່ອເຮົາເດີນຕາມເສັ້ນທາງພຣະກິດຕິຄຸນຢ່າງຊື່ສັດຈົນເຖິງທີ່ສຸດຂອງຊີວິດເຮົາ, ພຣະເຈົ້າສັນຍາວ່າ ເຮົາຈະມີຊີວິດນິລັນດອນ.