?Olsem wanem nao mi save filim se mi stap kolosap long God?
?Olsem wanem nao mi save lanem trutok long wol tedei i stap mekem tingting blong man i fasfas?
?Long wanem wei nao relijin i save helpem mi?
?From wanem i gat plante jos?
?From wanem mi gat tumas jalenj?
?Olsem wanem nao mi save faenem pis long taem we i tumas wari?
?Olsem wanem nao mi save stap hapi moa?
?Olsem wanem nao wan profet i save helpem wol tedei?
Long stat blong wol, God i bin talemaot gospel long ol pikinini blong Hem tru long ol profet. Hem i bin mekem hemia tru long Pikinini blong Hem, Jisas Kraes. Long taem bifo, Jisas i talemaot gospel long ol profet olsem Adam, Noa, Ebraham mo Moses. Be plante pipol oli no akseptem.
Tu taosen yia i pas, Jisas Kraes Hemwan i bin tijim gospel blong Hem mo stanemap Jos Ia blong Hem. Iven ol pipol oli no akseptem Jisas. I no longtaem afta long ded blong Hem, trutok mo Jos blong Lod i bin foldaon raonem evri ples. Gospel we i fulwan mo prishud atoriti, i nomo stap long wol.
Wan handred yia pas, God i singaotem wan narafala profet, Josef Smit. God i putumbak we i fulwan tru long hem mo givim atoriti long hem blong oganaesem Jos Ia blong Jisas Kraes bakegen.
Blong gat gospel blong Jisas Kraes we i fulwan long wol i wan long ol bigfala blesing blong dei blong yumi. Gospel i helpem yumi blong ansarem ol laef blong laef we yumi stap lukaotem oltaem. Ol profet we oli stap laef oli helpem yumi blong go tru long ol taem blong jalenj. Prishud atoriti blong God i kambak wan moa taem long wol blong blesem ol pikinini blong Hem.
Pikja
ol misinari oli stap tijim wan famli
Sam Tingting blong Stap Tij
Seksen ia i stap givim wan eksampol aotlaen we oli givim blong helpem yu rere blong tij. I tekem tu ol eksampol blong ol kwestin mo ol invitesen we yu save yusum.
Taem yu rere blong tij, prea mo tingting long situesen mo blong wanwan man o woman mo ol nid blong olgeta long saed blong spirit. Jusum wanem we bae yu tijim we i save help bigwan. Rere blong talem mining blong ol toktok we ol pipol bae oli no save andastanem. Plan folem hamas taem bae yu gat, tingbaot blong mekem lesen i sot.
Jusum ol skripja we bae yu yusum taem yu stap tij. Seksen blong “Doktrin Fandesen” blong lesen i tekem tu plante long skripja we oli save help.
Tingting long ol kwestin we bae yu askem taem yu stap tij. Mekem plan blong ol invitesen we bae yu givimaot we bae i leftemap tingting blong wanwan man o woman blong tekem aksen folem.
Tokbaot bigwan ol promes blesing blong God, mo serem testemoni blong yu abaot wanem we yu tijim.
Wanem we Yu Save Tijim long Ol Pipol blong 15–25 Minit
Jusum wan o moa long ol prinsipol ia blong tijim. Fandesen doktrin blong wanwan prinsipol oli stap afta long aotlaen ia.
God I Papa blong Yumi Long Heven we i Lavem Yumi
Go i Papa blong yumi long Heven, mo yumi ol pikinini blong Hem. Hem i krietem yumi folem pikja blong Hem.
God i save yumi wanwan mo lavem yumi.
God i gat wan bodi we i fulap long glori mo blong mit mo bun.
God i wantem blong blesem yumi wetem pis mo glad we i fulwan we bae i stap blong taem we i no save finis.
From se God i lavem yumi, Hem i sendem Pikinini blong Hem, Jisas Kraes, blong pemaot yumi long sin mo ded.
God I Talemaot Gospel blong Hem tru long Ol Profet blong Evri Dispensesen
God i singaotem ol profet blong ol ripresentem Hem long wol.
Long taem bifo, God i singaotem ol profet olsem, Adam, Noa, Ebraham mo Moses.
Wan profet we i stap laef i stap kasem revelesen we i kam long God blong tijim mo lidim yumi tedei.
Atonmen mo Seves blong Jisas Kraes long Wol
Jisas Kraes i Pikinini blong God.
Long taem blong seves blong Hem long wol, Jisas i tijim gospel blong Hem mo stanemap Jos Ia blong Hem.
Jisas i singaotem Ol twelef Aposol mo givim atoriti long olgeta blong lidim Jos blong Hem.
Long en blong laef blong Hem, Jisas i ded mo safa from ol sin blong yumi long garen blong Getsemane mo long taem we oli Hangem Hem long Kros. Afta long ded blong Jisas, Hem i laef bakegen long ded.
From atonmen mo sakrifaes blong Jisas, yumi save kasem fogivnes mo kam klin aot long ol sin blong yumi taem yumi sakem sin. Hemia i givim pis long yumi mo i mekem i posibol blong yumi gobak long ples we God i stap long hem mo kasem glad we i fulwan.
From Laef Bakegen long Ded blong Jisas Kraes, bae yumi evriwan i laef bakegen afta long ded. Hemia i minim se wanwan spirit mo bodi blong wan man o woman bae oli joen bakegen mo laef blong oltaem.
Taem we Gospel mo Jos I Foldaon
Afta we Ol Aposol blong Jisas oli ded, i gat wan bigfala foldaon blong gospel mo Jos Ia blong Jisas Kraes we i go raon.
Long taem ia, ol pipol oli jenisim plante long ol tijing blong gospel. Ol pipol oli jenisim tu ol odinens blong prishud, olsem fasin blong baptaes. Prishud atoriti mo Jos we Jisas i stanemap i nomo stap long wol long tetaem ia.
Restoresen blong Gospel blong Jisas Kraes tru long Josef Smit
Josef Smit i lukaotem blong save wijwan jos i tru Jos Ia blong God mekem se hem i save joenem. Papa long Heven mo Jisas Kraes i kamkamaot long hem long 1820. Samting we i hapen ia oli singaotem Fas Visen.
God i singaotem Josef Smit blong stap wan profet, semmak olsem ol profet blong taem bifo.
Gospel blong Jisas Kraes i bin kambak bakegen tru long Josef Smit.
Ol narafala mesenja blong heven oli putumbak prishud, mo Josef i kasem atoriti blong oganaesem Jos Ia blong Jisas Kraes.
Jisas Kraes i gohed blong lidim Jos Ia blong Hem tedei tru long ol profet we oli stap laef mo ol aposol.
Buk blong Momon: Wan Narafala Testeman blong Jisas Kraes
Buk blong Momon i wan buk blong ol skripja we oli raetem bifo tru long ol profet long Ol Amerika. Josef Smit i transletem tru long presen mo paoa blong God.
Wetem Baebol, Buk blong Momon i talemaot wan witnes blong seves blong Jisas, ol tijing mo misin blong Hem olsem Sevya blong yumi.
Yumi save kam kolosap long God taem yumi stap ridim Buk blong Momon mo stap folem ol tijing blong hem.
Yumi save save se Buk blong Momon i toktok blong God taem yumi stap ridim, tingting hevi long hem, mo stap prea from. Wei ia bae i save helpem yumi tu blong kam blong save se Josef Smit i wan profet.
Prea blong Save Trutok tru long Tabu Spirit
Prea i wan tu wei blong toktok bitwin God mo ol pikinini blong Hem.
Tru long prea we i kam long tru hat, yumi save save se mesej blong Restoresen blong Gospel blong Jisas Kraes i tru.
Taem yumi prea, Tabu Spirit i tijim mo konfemem trutok long yumi.
Pikja
ol misinari oli stap tijim ol yang man
Ol Kwestin we Yu Save Askem long Ol Pipol
Ol kwestin ia oli ol eksampol blong wanem we yu save askem long ol pipol. Ol kwestin ia oli save helpem yu blong gat ol storian we i gat moa mining mo save andastanem ol nid blong wan man o woman mo lukluk blong olgeta.
?Wanem nao biliv blong yu abaot God?
?Olsem wanem nao taem yu stap filim se yu stap kolosap long God i helpem yu?
?Wanem nao yu save abaot Jisas Kraes? ?Olsem wanem nao laef mo ol tijing blong Hem i jenisim laf blong yu?
?Olsem wanem nao yu save faenem ol ansa we yu save dipen long olgeta long wol tedei we i mekem man i gat tumas wari?
Blong save se i gat wan profet we i stap laef, ?Olsem wanem nao hemia i helpem yu?
?Yu bin harem abaot Buk blong Momon? ?I oraet sapos mifala i serem from wanem hem i impoten?
?Bae yu save serem ol bilif blong yu abaot prea? ?I oraet sapos mifala i save serem ol bilif blong mifala abaot prea?
Ol Invitesen we Yu Save Givimaot
?Bae yu save askem tru long prea blong helpem yu blong save se wanem we mifala i bin tijim oli tru? (Luk long “Ol Niufala Tingting blong Stap Tij: Prea” long las seksen blong lesen ia.)
?Bae yu kam long jos long Sandei ia blong lanem moa abaot wanem we mifala i bin tijim long yu?
?Bae yu ridim Buk blong Momon mo prea blong save se hem i toktok blong God? (Yu save givim sam spesel japta mo ol ves.)
Bae mifala save putum wan taem blong nekis visit blong mifala?
Doktrin Fandesen
Seksen ia givim doktrin mo ol skripja blong yu blong stadi blong mekem save mo testemoni blong yu i kam strong long gospel mo helpem yu blong tij.
Pikja
famli
God I Papa blong Yumi Long Heven we i Lavem Yumi
Go i Papa blong yumi long Heven, mo yumi ol pikinini blong Hem. Hem i krietem yumi folem pikja blong Hem. Hem i gat wan “bodi blong mit mo bun we oli save tajem semmak olsem hemia blong man” (Doktrin mo Ol Kavenan 130:22).
God i save yumi wanwan, mo Hem i lavem yumi moa bitim we yumi save tingting long hem. Hem i andastanem ol hadtaem blong yumi, ol harem nogud mo ol samting we yumi no strong long olgeta, mo Hem i wantem blong sapotem yumi blong yumi save kamaot long olgeta. Hem i glad taem yumi stap kam antap mo bae Hem i helpem yumi blong mekem ol raet joes. Hem i wantem blong toktok wetem yumi, mo yumi save toktok wetem Hem tru long prea.
God i givim eksperiens ia long yumi long wol mekem se yumi save lan, gro mo kam moa olsem Hem. Wetem lav we i stret evri wan, Hem i wantem yumi blong gobak long Hem afta we yumi ded. Be, yumi no save mekem hemia yumiwan. From lav blong God, Hem i sendem Pikinini blong Hem, Jisas Kraes, blong pemaot yumi. “God i lavem tumas ol man long wol, nao hem i givim mi, mi stret Pikinini blong hem, … blong olgeta man we oli bilif long mi bambae oli no save lus, oli gat laef we i no save finis” (Jon 3:16–17).
God i wantem blong blesem yumi wetem pis mo glad we i fulwan we bae i stap blong taem we i no save finis. Hem i mekem wan plan we i givim janis long yumi blong kasem ol blesing ia. Plan ia oli singaotem plan ia blong fasin blong sevem man (luk long lesen 2).
Moses mo Ol Ston blong Ol Komanmen i kam long Jerry Harston
God I Talemaot Gospel blong Hem tru long Ol Profet blong Evri Dispensesen
Ol Profet Oli Olgeta we Oli Ripresentem God long Wol
Wan impoten wei we God i soem lav blong Hem long yumi i taem Hem i singaotem ol profet, i givim prishud atoriti long olgeta, mo givim insperesen long olgeta blong toktok long bihaf blong Hem. Ol profet i olgeta we Oli ripresentem God long wol. Profet Amos insaed long OlTesteman i rekodem se “Masta blong yumi, mo ol profet oli man blong wok blong hem, mo oltaem, sipos hem i wantem mekem wan samting, hem i stap soemaot ol plan blong hem fastaem long olgeta” (Amos 3:7). Sam long blesing we yumi kasem long ol profet we oli stap laef, oli stap long aotlaen andanit ia.
Ol Witnes blong Jisas Kraes. Ol profet oli ol spesel witnes blong Jisas Kraes, we oli stap testifae abaot Hem olsem Sevya mo Ridima blong yumi.
Ol Tijing. Ol profet oli kasem daereksen we i kam long God blong helpem yumi blong luksave trutok aot long rong samting. Oli tijim yumi blong obei long ol komanmen blong God mo blong sakem sin taem yumi mekem mistek. Oli talemaot wanem we hem i sin mo givim ol woning abaot ol risal blong sin.
Ol tijing blong ol profet oli leftemap yumi i go long God mo helpem yumi blong kasem ol blesing we Hem i wantem blong givim long yumi. Bigfala proteksen blong yumi i stap long ol toktok ia blong Lod oli givim tru long ol profet blong Hem.
Prishud Atoriti. Profet we i stap laef tedei, hem nao prisaeding lida we i gat prishud long wol ia. Prishud hem i atoriti mo paoa blong God. Profet i atoriti blong toktok mo mekem samting long nem blong God blong sevem ol pikinini blong Hem.
Daereksen blong Jos. Jos ia blong Jisas Kraes oli bildimap antap long fandesen blong ol profet mo ol aposol (luk long Efesas 2:19–20; 4:11–14).
Ol Profet long Taem blong Bifo
Adam i bin fas profet long wol ia. Go i talemaot tru long revelesen gospel blong Jisas Kraes long hem mo givim prishud atoriti long hem. Adam mo Iv, tufala i tijim ol pikinini blong tufala abaot trutok ia mo leftemap tingting blong olgeta blong bildimap fet mo blong laef folem gospel.
Long en, ol laen blong Adam mo Iv oli go agensem mo tanem olgeta aot i go longwe long gospel. Hem i lid i go long wan situesen we oli singaotem apostasi, o foldaon. Taem bigfala apostasi i tekem ples, God bae i tekemaot prishud atoriti blong Hem we i hem i impoten blong tijim mo givimaot ol odinens blong gospel
OlTesteman i rekodem plante eksampol blong apostasi we i go raon long evri ples long tetaem ia. Blong endem ol taem ia, God i givhan long ol pikinini blong hem taem Hem i singaotem wan narafala profet. Hem i talemaot trutok blong gospel bakegen long ol profet ia mo givim prishud atoriti long olgeta. Sam long ol profet long taem ia, i gat Noa, Ebraham mo Moses. Sore tumas, long wan paten we oli ripripitim plante taem, long en, ol pipol ol no akseptem ol profet mo oli foldaon.
Gospel Topics: “Prophets,” “Restoration of the Church”
Pikja
O Papa blong Mi, i kam long Simon Dewey
Atonmen mo Seves blong Jisas Kraes long Wol
Jisas Kraes i Pikinini blong God. Jisas mo Atonmen blong Hem oli stamba long plan blong God long yumi. Atonmen blong Hem i tekem safaring blong Hem long Garen blong Getsemane, safaring blong Hem mo ded blong Hem long kros, mo Taem we Hem i bin Laef Bakegen long Ded.
Stat long taem blong Adam mo Iv, ol pipol oli lukluk i go fored from taem we Jisas Kraes bae i kam olsem Sevya mo Ridima blong olgeta. Papa long Heven i sendem Jisas Kraes i kam long wol, ova long 2000 yia i pas.
Hem i laef long wan laef we i stret gud evriwan, wan laef we i no sin. Hem i bin tijim gospel blong Hem mo Hem i bin stanemap Jos blong Hem. Hem i singaotem Ol twelef Aposol mo givim prishud atoriti long olgeta blong tij mo mekem ol tabu odinens, olsem baptaes. Mo tu, Hem i givim atoriti long olgeta blong lidim Jos Ia blong Hem.
Long en blong laef blong Hem, Jisas i ded mo safa from ol sin blong yumi long garen blong Getsemane mo long taem we oli Hangem Hem long Kros. From Jisas Kraes, yumi save kam klin aot long ol sin blong yumi. Hemia i mekem i posibol blong yumi blong gobak long ples we God i stap long hem mo kasem glad we i fulwan.
Afta we oli hangem Jisas long kros, Hem i laef bakegen long ded, i winim ded tru long paoa blong Papa long Heven. From se tru long Laef bakegen long ded blong Jisas Kraes, evri wan long yumi bae i laef bakegen afta we yumi ded. Hemia i minim se spirit mo bodi blong wanwan man o woman bae oli kam joen, mo wanwan long yumi bae i laef blong oltaem long wan bodi we i stret gud evriwan mo laef bakegen. (Luk long “Atonmen blong Jisas Kraes” long lesen 2.)
Pikja
Profet Josef Smit
Profet Josef Smit i bin tijim se, “Ol stamba prinsipol blong relijin blong yumi oli ol testemoni blong ol Aposol mo ol Profet, long saed blong Jisas Kraes, se Hem i bin ded, oli bin berem Hem, mo Hem i bin girap long nambatri dei, mo i bin go long heven; mo evri narafala samting abaot relijin blong yumi, oli go wetem hemia” (Teachings of Presidents of the Church: Josef Smit [2007], 49).
Gospel Topics: “Jesus Christ,” “Atonement of Jesus Christ”
Taem we Gospel mo Jos I Foldaon
Afta long ded blong Jisas Kraes, Ol Aposol blong Hem oli lukaotem blong kipim doktrin blong Kraes i klin gud mo holemtaet oda long Jos. Be, plante long ol memba blong Jos oli tanem olgeta i go longwe long Ol Aposol mo long doktrin we Jisas i bin tijim.
Afta we oli kilim ded Ol Aposol, i gat wan foldaon blong gospel mo Jos Ia blong Jisas Kraes we i go raon long evri ples long tetaem ia. Samtaem oli singaotem foldaon ia, Bigfala Apostasi. From hemia, God i tekemaot prishud atoriti long wol ia. Foldaon ia i tekemaot tu atoriti we oli nidim blong lidim Jos. Olsem wan risal, Jos Ia we Jisas i stanemap ia i nomo stap long wol ia.
Long taem ia, ol pipol oli jenisim plante long ol tijing blong gospel. Plante long ol save abaot tru fasin blong Papa long Heven, Jisas Kraes mo Tabu Spirit oli bin tantanem o oli lus. Ol pipol oli jenisim tu ol odinens blong prishud, olsem fasin blong baptaes.
Sam handred ia i pas, ol man mo woman oli stap traem blong mekem jenis long ol tijing mo long ol fasin we oli bin jenis. Oli bin lukaotem wan laet blong spirit we i moa bigwan, mo sam long olgeta oli bin toktok se bae i gat nid blong trutok i mas kambak. Ol hadwok blong olgeta i mekem se plante Jos oli bin stanap.
Olsem wan risal blong wanem we i stap hapen long taem ia, oli bin tokbaot bigwan fridom blong relijin, we i openem rod blong restoresen blong trutok mo atoriti blong we i kam long God.
Ol profet mo ol aposol oli bin talemaot bifo abaot stap foldaon i go longwe (luk long 2 Tesalonaeka 2:1–3). Oli bin talemaot tu bifo se gospel mo Jos blong Jisas Kraes bae i kambak bakegen long wol (luk long Ol Wok 3:20–21). Sapos i no bin gat wan foldaon blong gospel mo Jos, bae i no nid blong gat wan restoresen.
Restoresen blong Gospel blong Jisas Kraes tru long Josef Smit
Fas Visen mo Oli Singaotem Profet Josef Smit olsem wan Profet
Long taem blong ol handred yia we gospel blong Jisas Kraes we i fulwan i nomo stap long wol, Papa long Heven i gohed blong givhan long ol pikinini blong Hem. Taem i pas, Hem i mekem rere rod blong mekem se bae oli save kasem blesing bakegen wetem gospel blong Hem we i fulwan. Taem ol situesen i stret, Hem i singaotem Josef Smit olsem wan profet we tru long hem, gospel mo Jos Ia blong Jisas Kraes bae i kambak bakegen.
Josef Smit i stap long Is blong Yunaeted Stet long wan taem we i gat plante gudfala samting i stap hapen long ol relijin. Ol memba blong famli blong hem oli stap fetful long God mo lukaotem trutok. Plante jos oli talem se oli gat trutok, mo tingting long hat blong Josef i wantem blong save wijwan nao i tru (luk long Josef Smit—Histri 1:18). Baebol i tijim se i gat “wan Masta nomo, wan tok blong bilif nomo long hem, mo wan baptaes nomo” (Efesas 4:5). Taem Josef i stap go long ol defdefren jos, hem i gat tu tingting long wijwan bae hem i joenem. Hem i bin talem:
“Be i bin gat bigfala tingting we i fasfas mo hadwok long medel blong ol grup blong relijin, mekem se i no posibol blong wan we i yangfala olsem mi, … blong kam blong mekem wan stret tingting long huia i raet, mo huia i rong. …
“Long medel blong wo ia blong ol toktok mo raorao blong ol tingting, plante taem, mi bin askem long miwan: ?Wanem nao i nid blong mekem? ?Huia long ol grup ia i raet; o, ?olsem wanem? ?Ating evriwan long olgeta oli rong? Sapos i gat eniwan long olgeta we i raet, ?wijwan ia nao long olgeta, mo olsem wanem nao bambae mi save?” (Josef Smit—Histri 1:8, 10).
Semmak olsem plante pipol, Josef Smit tu i gat ol kwestin olsem wanem sol blong hem i save sef. Hem i wanem kasem fogivnes long ol sin blong hem mo kam klin long fored blong God. Taem hem i lukaotem blong faenem trutok long medel blong ol defdefren jos, hem i ridim, “Sipos wan long yufala i no gat waes, hem i mas askem long God blong i givim waes long hem, nao God bambae i save givim long hem, from we fasin blong God, hem i no save tok nogud long man we i askem samting long hem, hem i stap givim ol samting long ol man long gladhat blong hem” (Jemes 1:5
From toktok ia, Josef i mekem tingting blong hem blong askem God wanem nao hem i mas mekem. Long spring blong 1820 hem i bin go long wan tabu bus blong ol tri we i stap kolosap long hom blong hem mo hem nildaon blong prea. I gat fo defren stori blong visen we i hapen, we Josef Smit raetemdaon o ol man blong raet anda long daereksen blong hem (luk long Gospel Topics Essays, “First Vision Accounts”) Insaed long stori we i olsem tabu skripja, hem i tokbaot eksperiens blong hem olsem ia:
Pikja
Fas Visen, i kam long Linda Christensen mo Michael Malm
“Mi bin luk wan laet, i saen antap i kamdaon, stret antap long hed blong mi, mo laet blong hem i saen bitim laet blong san, mo hem i saen i kamdaon gogo, i kasem mi. … Taem laet i bin stap antap long mi, mi bin luk tu Man, we i no gat wan toktok we i save tokbaot laet mo glori blong Tufala, mo Tufala i stap flot nomo long ea antap long mi. Wan long Tufala i toktok long mi, i singaotem nem blong mi, mo talem wetem fingga blong Hem i poenem narawan—Hem, Hem i Pikinini blong Mi we Mi Lavem Tumas. !Lisin gud long hem!” (Luk longJosef Smit—Histri 1:16–17
Long visen ia, God Papa mo Pikinini blong Hem, Jisas Kraes i bin kamkamaot long Josef Smit. Sevya i talem long hem blong no joenem eni wan long ol jos ia.
Long wan pat blong Fas Visen, Josef i serem se Sevya i talem long hem tu se: “Mi fogivim ol sin blong yu. … Luk mi mi Lod blong glori. Oli bin hangem mi long kros long bihaf blong wol ia, mo evriwan we bambae oli biliv long nem blong mi, bae oli gat laef we I No Save Finis.
Afta long visen, Josef i tingtingbak, “Sol blong mi i bin fulap wetem lav, mo blong plante dei, mi save glad wetem bigfala glad mo Lod i bin stap wetem mi” (Josef Smit History, circa Summer 1832, 3, josephsmithpapers.org; oli apdeitem speling mo ponktuesen).
Tru long visen ia, Josef Smit i kam wan witnes blong Jisas Kraes mo lanem ol impoten trutok abaot Godhed. Eksampol, hem i lanem se Papa long Heven mo Jisas Kraes, Tufala i tu Man. Taem Tufala i singaotem hem long nem blong hem, hem i lanem se Tufala i save gud hem. Taem Josef i save se hem i kasem fogivnes, hem i lanem se God i gat sore. Eksperiens ia i fulumap hem wetem glad.
Olsem we God i bin mekem wetem plante long ol profet blong bifo, Hem i bin singaotem Josef Smit blong stap olsem wan profet we tru long hem fulnes blong gospel i bin kambak long wol ia. Restoresen ia bae i save helpem ol pikinini blong God blong faenem glad long wol ia mo laef we i no save finis long wol we bae i kam—evri wan tru long Jisas Kraes.
Restoresen blong Prishud mo Ol Ki blong Prishud
Pikja
Antap long Hed blong Yufala, Ol Wokman we Yumi Wok Tugeta” i kam long Linda Curley Christensen mo Michael Malm
Afta we Papa mo Pikinini i bin kamaot, ol narafala mesenja blong heven, oli bin kam long Josef Smit mo fren blong hem, Oliva Kowdri. Jon Baptaes i kamaot olsem wan we i laef bakegen long ded mo givim Aronik Prishud mo ol ki blong hem long olgeta. Aronik prishud i tekem tu atoriti blong baptaes.
Pikja
Voes blong Pita, Jemes mo Jon, i kam long Welden C. Andersen
I no longtaem afta, Pita, Jemes mo Jon—tri long ol fas Aposol blong Kraes—oli kamaot olsem we laef bakegen long ded mo givim Melkesedek Prishud mo ol ki blong hem long Josef Smit mo Oliva Kaodri. Prishud ia hem semmak atoriti we Kraes i bin givim long Ol Aposol blong Hem long bifo.
Pikja
Image of Moses Elias and Elijah descending into the Kirtland temple and appearing to Joseph Smith.
Insaed long Ketlan Tempol, Moses, Elaeas mo Elaeja oli bin kamkamaot long Josef Smit mo oli bin givim long olgeta moa atoriti mo ol ki blong prishud ia we i nid blong gat blong mekem ol wok blong God long ol las dei ia. Moses i bin givim ol ki blong kam tugeta blong Isrel. Elaeas i bin givim dispensesen blong gospel blong Ebraham. Elaeja i bin givim ol ki blong siling paoa. (Luk long Doktrin mo Ol Kavenan 110:11–16; luk tu long Jeneral Hanbuk, 3.1.)
Oganaesesen blong Jos
Josef Smit i bin kasem daereksen blong oganaesem Jos blong Jisas Kraes bakegen long wol ia. Tru long hem, Jisas Kraes i bin singaotem twelef Aposol.
Ol profet long Baebol taem oli minim taem we yumi stap laef long hem olsem ol las dei o ol lata-dei. Hem i taem we i no longtaem afta bae Seken Kaming blong Jisas Kraes. Hemia i from wanem oli singaotem nem blong Jos, Jos Ia blong Jisas Kraes blong Ol Lata-dei Sent (luk long Doktrin mo Ol Kavenan 115:3–4; luk tu long 3 Nifae 27:3–8).
Ol Profet we Oli Stap Laef mo Ol Aposol
Semmak olsem we Jisas i bin singaotem Ol Aposol long taem blong seves blong Hem long wol ia blong lidim Jos blong Hem, Hem i singaotem Ol Aposol blong lidim tedei. Fas Presidensi mo Kworom blong Olgeta Twelef Aposol oli ol profet, sia, mo reveleta.
Senia Aposol nomo oli singaotem hem i kam profet from se hem nao i prisaed ova long ful Jos mo oli gat spesel atoriti blong toktok long bihaf blong Lod. Hem i wan we i gat atoriti we i kam afta long Josef Smit. Hem wetem Ol Aposol we oli stap tedei oli folem atoriti blong olgeta i go long Jisas Kraes i wan jen we i no brok blong ol odinens we i stat taem Josef Smit we ol mesenja blong heven oli odenem hem.
Gospel Topics: “Restoration of the Church,” “Restoration of the Priesthood”
Buk blong Momon: Wan Narafala Testeman blong Jisas Kraes
Buk blong Momon i wan buk blong taem bifo blong tabu skripja olsem Baebol. Baebol i wan witnes blong Jisas Kraes, mo Buk blong Momon i wan nambatu witnes abaot seves blong Hem, ol tijing blong Hem, mo misin blong Hem olsem Sevya blong yumi.
Wan mesenja blong heven we nem blong hem Moronae i lidim Josef Smit long wan hil we long ples ia i gat wan rekod blong ol man bifo we oli bin berem blong plante handred yia. Rekod ia, we oli mekem long ol buk we oli mekem long gol (aean we i tintin), i gat insaed ol raeting blong ol profet abaot ol wok blong wetem sam long ol pipol we oli stap laef long Ol Amerika. Josef Smit i bin transletem ol histri ia tru long presen mo paoa blong God.
Ol profet insaed long Buk blong Momon oli bin save abaot misin blong Jisas Kraes mo oli bin tijim gospel blong Hem. Afta we Jisas i laef bakegen long ded, Hem i kamkamaot long ol pipol ia mo givhan long olgeta wanwan. Hem i bin tijim olgeta mo stanemap Jos blong Hem.
Buk blong Momon i helpem yumi blong kam moa kolosap long God taem yumi lanem samting, andastanem, mo yusum ol tijing blong hem. Profet Josef Smit i talem se “wan man o [woman] bae i kam moa kolosap long God sapos hem i folem ol tijing blong hem, bitim eni narafala buk” (Teachings: Joseph Smith, 64).
Pikja
man i stap rid
Blong save se Buk blong Momon i toktok blong God, yumi nid blong ridim, tingting hevi long hem, mo prea from. Wan profet blong Buk blong Momon i promesem se God bae i taltalemaot trutok abaot buk long yumi taem yumi prea wetem wan tru hat, wetem strong tingting, mo wetem fet long Kraes (luk long Moronae 10:3–5). Blong stap stadi long Buk blong Momon i impoten blong gat fasin blong jenisim laef we i stap strong kasem en.
Taem yumi ridim Buk blong Momon mo prea from, bae yumi lanem ol trutok abaot Jisas Kraes we bae i blesem laef blong yumi. Bae yumi kam blong save tu se Josef Smit i wan profet blong God mo we gospel mo Jos Ia blong Jisas Kraes i bin kambak tru long hem.
Pikja
Presiden Russell M. Nelson
“Mi promesem yufala se taem yufala i stap stadi long Buk blong Momon wetem prea evri dei, bambae yufala i save mekem ol moa gud desisen—evri dei. Mi promesem yufala se taem yufala i stap tingting hevi long wanem yu stap stadi long Buk blong Momon, bambae ol windo blong heven oli open, mo bae yu kasem ol ansa blong kwestin blong yu, mo bae Hem i soem rod blong laef blong yu. Mi promes se, taem we, evri dei, yu draonem yuwan long Buk blong Momon, bae yu gat proteksen long ol ivel blong tedei” (Russell M. Nelson, “The Book of Mormon: What Would Your Life Be Like without It?” Liahona, Nov. 2017, 62–63).
From se God i Papa blong yumi, Hem bae i helpem yumi blong luksave trutok. Bae yumi save save se mesej blong Restoresen blong gospel blong Jisas Kraes i tru taem yumi ridim Buk blong Momon mo prea long God. Taem yumi prea wetem fet mo strong tingting, Hem bae i ansa long ol kwestin blong yumi mo lidim laef blong yumi.
Oltaem God i stap ansarem ol prea blong yumi tru long Tabu Spirit. Taem yumi prea, Tabu Spirit i tijim mo konfemem trutok. Ol toktok we i kam tru long Tabu Spirit oli gat paoa. Oltaem oli kam long yumi olsem wan kwaet filing blong hop, ol tingting mo ol filing (luk long 1 King 19:11–12; Hileman 5:30; Doktrin mo Ol Kavenan 8:2).
Blong stadi long ol skripja oltaem (speseli Buk blong Momon), go long jos evri wik, mo prea wetem trutok hat bae i helpem yumi blong filim paoa blong Tabu Spirit mo faenemaot ol trutok.
Ol aotlaen ia i wan eksampol blong wanem we yu save tijim long wan sapos yu gat wan sot taem nomo i stap. Taem yu stap yusum aotlaen, jusum wan o moa prinsipol blong tijim. Doktrin fandesen blong wanwan prinsipol oli putum i stap bifo long lesen.
Taem yu tij, askem ol kwestin mo lisin. Givimaot ol invitesen we bae i helpem ol pipol blong lanem olsem wanem blong kam antap blong kam moa kolosap long God. Wan impoten invitesen i blong man o woman ia i mit wetem yu bakegen. Longfala blong lesen bae i dipen long ol kwestin we yu askem mo hamas taem yu stap lisin.
Pikja
ol misinari oli stap toktok long wan man
Wanem we Save Tijim long Ol Pipol blong 3-10 Minit
God hem i Papa blong yumi long Heven, mo hem i krietem yumi folem fasin blong Hem. Hem i save gud yumi wanwan mo lavem yumi. Hem i wantem blong blesem yumi wetem pis mo glad we i fulwan we bae i stap blong taem we i no save finis.
Jisas Kraes i Pikinini blong God. Misin blong Hem i blong mekem se i posibol blong yumi blong kam klin aot long ol sin blong yumi, winim ded mo kasem laef we i no save finis.
God i singaotem ol profet blong ol ripresentem Hem long wol. Long taem bifo, Hem i singaotem ol profet olsem Adam, Noa, Ebraham mo Moses. Wan profet we i stap laef i stap kasem revelesen we i kam long God blong tijim mo lidim yumi tedei.
Long taem blong seves blong Jisas long wol ia, Hem i stanemap Jos Ia blong Hem. Afta we Ol Aposol blong Jisas oli ded, i gat wan bigfala foldaon blong gospel mo Jos Ia blong Jisas Kraes we i go raon. ol pipol oli jenisim plante tijing blong gospel mo ol odinens blong prishud olsem baptaes.
God i singaotem Josef Smit blong stap wan profet, semmak olsem ol profet blong taem bifo. Papa long Heven mo Jisas Kraes i bin kamkamaot long hem. Gospel blong Jisas Kraes i kambak tru long Hem.
Buk blong Momon hem i wan buk blong ol skripja. Semmak olsem Baebol, hem i wan testeman blong Jisas Kraes mo i helpem yumi blong kam moa kolosap long God taem yumi ridim mo yusum ol tijing blong hem. Josef Smit i transletem tru long presen mo paoa blong God.
Tru long prea we i kam long hat, yumi save toktok wetem God. Yumi save save se mesej blong Restoresen blong gospel blong Jisas Kraes i tru.