“Kapitulo 3: Leksiyon 1—Ang Mensahe sa Pagpahiuli sa Ebanghelyo ni Jesukristo,” Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo (2023)

“Kapitulo 3: Leksiyon 1,” Isangyaw ang Akong Ebanghelyo

Kapitulo 3: Leksiyon 1

Ang Mensahe sa Pagpahiuli sa Ebanghelyo ni Jesukristo

Ang mga Tawo Mahimong Maghunahuna

Aduna bay Dios?
Unsaon nako nga mobati nga mas mapaduol ngadto sa Dios?
Unsaon nako sa pagkat-on sa kamatuoran sa makalibog nga kalibotan karon?
Sa unsang paagi nga ang relihiyon makatabang kanako?
Nganong aduna may daghan kaayong simbahan?
Nganong daghan kaayo ang akong mga hagit?
Unsaon nako pagkaplag og kalinaw sa mga panahon sa kasamok?
Sa unsang paagi nga ako mahimong mas malipayon?
Sa unsang paagi nga ang usa ka propeta makatabang sa kalibotan karon?

Gikan sa sinugdanan sa kalibotan, ang Dios mipadayag sa ebanghelyo ngadto sa Iyang mga anak pinaagi sa mga propeta. Gihimo Niya kini pinaagi sa Iyang Anak, si Jesukristo. Sa karaang panahon, si Jesus mipadayag sa ebanghelyo ngadto sa mga propeta sama nilang Adan, Noe, Abraham, ug Moises. Apan daghang mga tawo ang misalikway niini.

Duha ka libo ka tuig na ang milabay, si Jesukristo Mismo nagtudlo sa Iyang ebanghelyo ug mi-establisar sa Iyang Simbahan. Ang mga tawo misalikway pa gani ni Jesus. Sa wala madugay human sa Iyang kamatayon, dihay halapad nga pagbiya gikan sa kamatuoran ug sa Simbahan sa Ginoo. Ang kahingpitan sa ebanghelyo ug ang awtoridad sa pagkapari wala na dinhi sa yuta.

Mga siglo ang milabay, ang Dios mitawag og laing propeta, si Joseph Smith. Ang Dios mipahiuli sa kinatibuk-an sa ebanghelyo pinaagi kaniya ug mihatag kaniya og awtoridad sa pag-organisar pag-usab sa Simbahan ni Jesukristo.

Ang pagbaton sa kahingpitan sa ebanghelyo ni Jesukristo sa yuta mao ang usa sa talagsaong mga panalangin sa atong panahon. Ang ebanghelyo motabang kanato nga matubag ang labing mahinungdanong mga pangutana sa kinabuhi. Ang buhi nga mga propeta mogiya kanato latas sa malisod nga panahon. Ang awtoridad sa pagkapari sa Dios sa makausa pa ania na sa yuta aron mapanalanginan ang Iyang mga anak.

Mga Sugyot alang sa Pagtudlo

Kini nga seksiyon naghatag og usa ka sampol nga latid aron sa pagtabang kanimo nga makaandam sa pagtudlo. Naglakip usab kini sa mga ehemplo sa mga pangutana ug mga imbitasyon nga mahimo nimong gamiton.

Samtang mangandam ka sa pagtudlo, mainampoon nga mokonsidear sa sitwasyon ug sa mga espirituhanong panginahanglan sa matag tawo. Desisyoni kon unsa ang labing makatabang nga itudlo. Pag-andam sa paghatag og kahulogan sa mga termino nga lagmit dili masabtan sa mga tawo. Pagplano sumala kon unsa ka taas ang imong oras, maghinumdom nga himoong mubo ang mga leksiyon.

Pagpili og mga kasulatan nga magamit samtang kamo magtudlo. Ang seksiyon nga “Sukaranan nga Doktrina” sa leksiyon naglakip og daghang makatabang nga mga kasulatan.

Ikonsiderar kon unsa ang mga ipangutana samtang ikaw magtudlo. Planoha ang mga imbitasyon nga ihatag nga makadasig sa matag tawo sa pagbuhat.

Hatagi og gibug-aton ang gisaad nga mga panalangin sa Dios, ug ipakigbahin ang inyong pagpamatuod sa unsay inyong gitudlo.

Unsa Kaha ang Inyong Itudlo sa mga Tawo sulod sa 15–25 Minutos

Pagpili og usa o dugang pa sa mosunod nga mga baroganan nga itudlo. Ang sukaranan nga doktrina alang sa matag baroganan gihatag human niini nga latid.

Ang Dios Mao ang Atong Mahigugmaon nga Langitnong Amahan

Ang Dios mao ang atong Langitnong Amahan, ug kita ang Iyang mga anak. Siya milalang kanato sa Iyang panagway.
Ang Dios personal nga nakaila kanato ug nahigugma kanato.
Ang Dios adunay nahimaya, nahingpit nga lawas nga unod ug mga bukog.
Gusto sa Dios nga mopanalangin kanato sa kalinaw ug kahingpitan sa kalipay nga molungtad sa kahangtoran.
Tungod kay ang Dios nahigugma kanato, Siya mipadala sa Iyang Anak, si Jesukristo, sa pagtubos kanato gikan sa sala ug kamatayon.

Gipadayag sa Dios ang Ebanghelyo pinaagi sa mga Propeta diha sa Matag Dispensasyon

Ang Dios nagtawag og mga propeta aron mahimo Niyang mga representante dinhi sa yuta.
Sa karaan nga panahon, ang Dios mitawag og mga propeta sama nilang Adan, Noe, Abraham, ug Moises.
Ang buhing propeta makadawat og pagpadayag gikan sa Dios aron motudlo ug mogiya kanato karon.

Yutan-ong Pagpangalagad ug Pag-ula ni Jesukristo

Si Jesukristo mao ang Anak sa Dios.
Atol sa Iyang yutan-ong pagpangalagad, si Jesus mitudlo sa Iyang ebanghelyo ug mitukod sa Iyang Simbahan.
Mitawag si Jesus og napulog duha ka Apostoles ug mihatag kanila og awtoridad aron sa pagdumala sa Iyang Simbahan.
Sa kataposan sa Iyang kinabuhi, si Jesus miula alang sa atong mga sala pinaagi sa Iyang pag-antos didto sa Tanaman sa Getsemani ug atol sa Pagpalansang sa Krus. Human sa kamatayon ni Jesus, Siya nabanhaw.
Tungod sa maulaon nga sakripisyo ni Jesus, kita mahimong mapasaylo ug malimpyohan sa atong mga sala kon kita maghinulsol. Kini makahatag kanato og kalinaw ug makapahimo kini kanato nga makabalik ngadto sa presensya sa Dios ug makadawat og kahingpitan sa kalipay.
Tungod sa Pagkabanhaw ni Jesus, kitang tanan mabanhaw human kita mamatay. Kini nagpasabot nga ang matag espiritu ug lawas sa tawo mahiusa pag-usab ug mabuhi hangtod sa kahangtoran.

Ang Pagbiya sa Kamatuoran

Human mamatay ang Apostoles ni Jesus, adunay halapad nga pagbiya sa kamatuoran gikan sa ebanghelyo ug sa Simbahan ni Jesukristo.
Atol niining panahona, ang mga tawo miusab sa daghang pagtulon-an sa ebanghelyo. Ang mga tawo miusab sa mga ordinansa sa pagkapari, sama sa bunyag. Ang awtoridad sa pagkapari ug ang Simbahan nga gitukod ni Jesus wala na sa yuta.

Ang Pagpahiuli sa Ebanghelyo ni Jesukristo pinaagi ni Joseph Smith

Si Joseph Smith nagtinguha nga masayod kon hain nga simbahan ang tinuod nga Simbahan sa Dios aron siya mopasakop niini. Ang Langitnong Amahan ug si Jesukristo mipakita kang Joseph Smith niadtong 1820. Kini nga panghitabo gitawag nga ang Unang Panan-awon.
Ang Dios mitawag ni Joseph Smith aron mamahimong usa ka propeta, sama sa Iyang pagtawag og mga propeta sa nahauna nga mga panahon.
Ang Ebanghelyo ni Jesukristo gipahiuli pinaagi ni Joseph Smith.
Ang ubang langitnong mga mensahero mipahiuli sa pagkapari, ug si Joseph gihatagan og katungod sa pag-organisar sa Simbahan ni Jesukristo.
Gipadayon ni Jesukristo ang pagpangulo sa Iyang Simbahan karon pinaagi sa buhi nga mga propeta ug apostoles.

Ang Basahon ni Mormon: Lain nga Tugon ni Jesukristo

Ang Basahon ni Mormon usa ka bolyum sa kasulatan nga sinulat sa karaan nga mga panahon pinaagi sa mga propeta sa Amerika. Gihubad kini ni Joseph Smith pinaagi sa gasa ug gahom sa Dios.
Uban sa Biblia, ang Basahon ni Mormon naghatag og pagsaksi sa pagpangalagad, mga pagtulon-an, ug misyon ni Jesus isip atong Manluluwas.
Kita mas makapaduol ngadto sa Dios pinaagi sa pagbasa sa Basahon ni Mormon ug sa pagsunod sa mga lagda niini.
Kita makahibalo nga ang Basahon ni Mormon mao ang pulong sa Dios pinaagi sa pagbasa niini, pagpamalandong niini, ug pag-ampo mahitungod niini. Kini nga proseso makatabang usab kanato nga makahibalo nga si Joseph Smith usa ka propeta.

Pag-ampo aron Mahibalo sa Kamatuoran pinaagi sa Espiritu Santo

Ang pag-ampo mao ang pagbinayloay og komunikasyon tali sa Dios ug sa Iyang mga anak.
Pinaagi sa sinsero nga pag-ampo, kita makahibalo nga ang mensahe sa Pagpahiuli sa ebanghelyo ni Jesukristo tinuod.
Kon kita mag-ampo, ang Espiritu Santo motudlo ug mokompirmar sa kamatuoran ngari kanato.

Mga Pangutana nga Mahimo Ninyong Ipangutana sa mga Tawo

Ang mosunod nga mga pangutana mao ang mga ehemplo sa unsay mahimo ninyong ipangutana sa mga tawo. Kini nga mga pangutana makatabang kanimo nga makabaton og makahuluganon nga mga panag-estoryahanay ug makasabot sa mga panginahanglan ug panglantaw sa tawo.

Unsa ang imong gituohan mahitungod sa Dios?
Sa unsang paagi nga ang pagbati og kasuod ngadto sa Dios makatabang kanimo?
Unsa ang imong nahibaloan mahitungod ni Jesukristo? Sa unsang paagi nga ang Iyang kinabuhi ug mga pagtulon-an nakaimpluwensya kanimo?
Unsaon nimo sa pagkaplag og kasaligan nga mga tubag sa makalibog nga kalibotan karon?
Unsaon niini pagtabang kanimo nga masayod nga adunay usa ka buhi nga propeta sa yuta karon?
Nakadungog ka ba kabahin sa Basahon ni Mormon? Mahimo ba kami nga mopakigbahin nganong importante kini?
Mahimo ba nimong ipakigbahin ang imong mga gituohan mahitungod sa pag-ampo? Mahimo ba kami nga mopakigbahin sa among mga gituohan mahitungod sa pag-ampo?

Mga Imbitasyon nga Mahimo Ninyong Ipadangat

Ipangutana ba nimo sa Dios pinaagi sa pag-ampo aron matabangan ka nga masayod nga ang unsay among gitudlo tinuod? (Tan-awa sa “Mga Panabot sa Pagtudlo: Pag-ampo” sa kataposan nga seksiyon niini nga leksiyon.)
Mosimba ka ba karong Dominggo aron makakat-on og dugang mahitungod sa unsay among gitudlo?
Basahon ba nimo ang Basahon ni Mormon ug mag-ampo aron masayod nga kini mao ang pulong sa Dios? (Mahimo nimong isugyot ang piho nga mga kapitulo o mga bersikulo.)
Sundon ba nimo ang ehemplo ni Jesus ug magpabunyag? (Tan-awa sa “Ang Imbitasyon aron Mabunyagan ug Makompirmahan,” nga mosunod dayon niini nga leksiyon.)
Mahimo ba kami nga motakda og panahon alang sa among sunod nga pagbisita?

Sukaranan nga Doktrina

Kini nga seksiyon naghatag sa doktrina ug mga kasulatan nga imong tun-an aron sa pagpalig-on sa imong kahibalo ug pagpamatuod sa ebanghelyo ug sa pagtabang kanimo sa pagtudlo.

Ang Dios Mao ang Atong Mahigugmaon nga Langitnong Amahan

Ang Dios mao ang atong Langitnong Amahan, ug kita ang Iyang mga anak. Siya milalang kanato sa Iyang panagway. Siya adunay nahimaya, nahingpit nga “lawas nga unod ug mga bukog nga mahikap [ma]ingon sa tawo” (Doktrina ug mga Pakigsaad 130:22).

Ang Dios personal nga nakaila kanato, ug Siya nahigugma kanato labaw pa sa atong masabot. Siya nakasabot sa atong mga pagsulay, mga kagul-anan, ug mga kahuyang, ug Siya nagtanyag sa pagsuporta kanato latas niini. Siya magmaya sa atong pag-uswag ug motabang kanato sa paghimo og husto nga mga pagpili. Gusto Siya nga makigsulti kanato, ug kita mahimong makigsulti uban Kaniya pinaagi sa pag-ampo.

Ang Dios naghatag kanato niining kasinatian sa yuta aron kita makakat-on, molambo, ug mamahimong sama Kaniya. Uban sa hingpit nga gugma, gusto Siya nga kita makabalik ngadto Kaniya human kita mamatay. Apan, kita dili makahimo niini nga kita ra. Tungod kay ang Dios nahigugma kanato, Siya mipadala sa Iyang Anak, si Jesukristo, sa pagtubos kanato. “Kay gihigugma pag-ayo sa Dios ang kalibotan ug tungod niini gihatag niya ang iyang bugtong Anak, … nga ang kalibotan maluwas pinaagi kaniya” (Juan 3:16–17).

Gusto sa Dios nga mopanalangin kanato sa kalinaw ug kahingpitan sa kalipay nga molungtad sa kahangtoran. Siya naghatag og usa ka plano nga maghatag kanato og oportunidad sa pagdawat niining mga panalangin. Kini nga plano gitawag og plano sa kaluwasan (tan-awa sa leksiyon 2).

Pagtuo kabahin sa Dios

Pagkat-on sa unsay mga gituohan sa imong gitudloan mahitungod sa Dios. Kadaghanan sa mga tawo nagtuo sa usa ka matang sa usa ka Labing Gamhanan nga Binuhat bisan kon adunay daghang mga panlantaw bahin sa Dios. Apan, daghan sa mga tawo nga walay konsepto kabahin sa Dios.

Ang duha ka misyonaryo sa Basahon ni Mormon, sila si Ammon ug Aaron, nanudlo og mga tawo nga walay Kristiyanong kagikan. Nagtudlo sila og yano nga mga kamatuoran ug miimbitar sa mga tawo sa pag-ampo. Isip resulta, si Lamoni ug ang iyang amahan nakabig. Pagtuon sa Alma 18:24–40 ug 22:4–23. Dayon tubaga ang mga pangutana sa ubos:

Unsa man ang gitudlo niini nga mga misyonaryo kabahin sa kinaiya sa Dios?
Unsaon nimo pagsunod ang ilang mga ehemplo?

Alang sa dugang nga impormasyon, tan-awa sa “Pagtudlo sa mga Tawo nga Walay Kristiyanong Kagikan” sa kapitulo 10.

Pagtuon sa Kasulatan

Pagkat-on og Dugang mahitungod Niini nga Baroganan

Ang Giya ngadto sa mga Kasulatan, “Amahan sa Langit,” “Dios, Dios nga Kapangulohan”
Gospel Topics: “God the Father”

Gipadayag sa Dios ang Ebanghelyo pinaagi sa mga Propeta diha sa Matag Dispensasyon

Ang mga Propeta Mao ang mga Representante sa Dios dinhi sa Yuta

Usa sa importante nga paagi nga ang Dios mopakita sa Iyang gugma alang kanato mao ang pagtawag og mga propeta, paghatag kanila sa awtoridad sa pagkapari, ug pagdasig kanila sa pagpamulong alang Kaniya. Ang mga propeta mao ang mga representante sa Dios dinhi sa yuta. Ang Daang Tugon nga propeta nga si Amos misulat nga, “ang Ginoong Dios dili magabuhat sa bisan unsa, gawas kon ang iyang tinago ipadayag niya sa iyang mga alagad ang mga propeta” (Amos 3:7). Ang pipila sa mga panalangin nga atong madawat gikan sa buhi nga mga propeta gilatid sa ubos.

Mga Saksi ni Jesukristo. Ang mga propeta mao ang espesyal nga mga saksi ni Jesukristo, nagpamatuod Kaniya isip atong Manluluwas ug Manunubos.

Mga Pagtulon-an. Ang mga propeta makadawat og direksyon gikan sa Dios aron sa pagtabang kanato nga masabtan ang kamatuoran gikan sa sayop. Sila motudlo kanato sa pagtuman sa mga sugo sa Dios ug sa paghinulsol kon kita magkulang. Sila nanghimaraot sa sala ug nagpasidaan sa mga sangpotanan niini.

Ang mga pagtulon-an sa mga propeta mobayaw kanato ngadto sa Dios ug motabang kanato sa pagdawat sa mga panalangin nga Iyang gitinguha alang kanato. Ang atong labing dako nga kahilwasan anaa sa pagsunod sa pulong sa Ginoo nga gihatag pinaagi sa Iyang mga propeta.

Awtoridad sa Pagkapari. Ang kasamtangan nga propeta mao ang nagdumala nga naghupot sa pagkapari dinhi sa yuta. Ang pagkapari mao ang awtoridad ug gahom sa Dios. Ang propeta adunay awtoridad sa pagpamulong ug pagbuhat sa ngalan sa Dios alang sa kaluwasan sa Iyang mga anak.

Direksiyon sa Simbahan. Ang Simbahan ni Jesukristo gitukod diha sa pundasyon sa apostoles ug mga propeta (tan-awa sa Mga Taga-Efeso 2:19–20; 4:11–14).

Mga propeta sa Karaan nga Panahon

Si Adan mao ang unang propeta sa yuta. Ang Dios mipadayag sa ebanghelyo ni Jesukristo ngadto kaniya ug mihatag kaniya sa awtoridad sa pagkapari. Si Adan ug si Eva mitudlo sa ilang mga anak niini nga mga kamatuoran ug miawhag kanila sa pagpalambo og hugot nga pagtuo ug sa pagsunod sa ebanghelyo.

Sa kadugayan ang kaliwatan ni Adan ug ni Eva misupak ug mibiya gikan sa ebanghelyo. Kini misangpot ngadto sa usa ka kahimtang nga gitawag og apostasiya, o usa ka pagbiya sa kamatuoran. Sa dihang ang halapad nga apostasiya mitumaw, ang Dios mibawi sa Iyang awtoridad sa pagkapari, nga mao ang gikinahanglan sa pagtudlo ug pagpangalagad sa mga ordinansa sa ebanghelyo.

Sa Daang Tugon nakarekord ang daghang higayon sa halapad nga apostasiya. Sa pagtapos niining mga panahona, ang Dios mitabang sa Iyang mga anak pinaagi sa pagtawag og laing propeta. Siya mipadayag na usab sa mga kamatuoran sa ebanghelyo ngadto niining mga propeta ug mihatag kanila sa awtoridad sa pagkapari. Ang pipila niining mga propeta mao sila si Noe, Abraham, ug Moises. Subo lang, sa nagbalik-balik nga panghitabo paglabay sa panahon, ang mga tawo sa kadugayan misalikway sa mga propeta ug mibiya sa kamatuoran.

Mga Panabot sa Pagtudlo

Mga Propeta

Pagkat-on sa unsay nasabtan sa tawo nga imong gitudloan mahitungod sa mga propeta. Ang mga tawo sa kadaghanan nga mga kultura nagtuo sa balaan o dinasig nga mga tawo nga makadawat og matang sa giya ug direksiyon gikan sa Dios. Hinuon, dili tanang dinasig nga mga indibidwal mga propeta sa Dios.

Ipasabot nga human sa matag higayon sa halapad nga apostasiya, ang Dios mipahiuli sa ebanghelyo pinaagi sa usa ka propeta. Siya mihatag niana nga propeta og awtoridad sa pagkapari. Ang propeta motabang sa mga tawo nga makasabot sa ilang relasyon ngadto sa Dios, lakip na kon unsaon sa pagdawat og kinabuhi nga dayon pinaagi sa ebanghelyo ni Jesukristo.

Mga Dispensasyon

Ang usa ka dispensasyon sa ebanghelyo ni Jesukristo mao ang usa ka hugna sa panahon diin adunay labing ubos usa ka awtorisado nga sulugoon sa Ginoo dinhi sa yuta kinsa naghupot sa mga yawe sa pagkapari. Ang plano sa Langitnong Amahan sa kaluwasan napadayag na pag-usab sa matag dispensasyon.

Aduna nay daghang dispensasyon sa ebanghelyo. Adan, Enoc, Noe, Abraham, Moises, Jesukristo, Joseph Smith, ug ang uban pa nga ang matag usa migiya og usa ka dispensasyon. Ang dispensasyon nga gisugdan ni Joseph Smith giila isip ang “[dispensasyon] sa tukma nga panahon” (Mga Taga-Efeso 1:10). Tan-awa sa Ang Giya ngadto sa mga Kasulatan, “Kapaigoan.” scriptures.ChurchofJesusChrist.org.”

Pagtuon sa Kasulatan

Pagkat-on og Dugang mahitungod Niini nga Baroganan

Ang Giya ngadto sa mga Kasulatan, “Propeta”
Gospel Topics: “Prophets,” “Restoration of the Church”

Yutan-ong Pagpangalagad ug Pag-ula ni Jesukristo

Si Jesukristo mao ang Anak sa Dios. Si Jesus ug ang Iyang Pag-ula mao ang sentro sa plano sa Dios alang kanato. Ang Iyang Pag-ula naglakip sa Iyang pag-antos didto sa Tanaman sa Getsemani ug sa Iyang pag-antos ug kamatayon diha sa krus, ug sa Iyang Pagkabanhaw.

Gikan sa panahon ni Adan ug ni Eva, ang mga tawo naglantaw sa pag-abot ni Jesukristo isip ilang Manluluwas ug Manunubos. Ang Langitnong Amahan mipadala ni Jesus sa yuta kapin na sa 2,000 ka tuig ang milabay.

Si Jesus nagpuyo og perpekto, walay sala nga kinabuhi. Siya mitudlo sa Iyang ebanghelyo ug mitukod sa Iyang Simbahan. Mitawag siya og napulog duha ka Apostoles ug mihatag kanila sa awtoridad sa pagkapari aron sa pagtudlo ug pagpahigayon sa sagradong mga ordinansa, sama sa bunyag. Mihatag usab siya kanila og awtoridad nga pangulohan ang Iyang Simbahan.

Sa kataposan sa Iyang kinabuhi, si Jesus miula alang sa atong mga sala pinaagi sa Iyang pag-antos didto sa Tanaman sa Getsemani ug atol sa Iyang Pagpalansang sa Krus. Tungod sa maulaon nga sakripisyon ni Jesus, kita mahimong malimpyohan sa atong mga sala kon kita maghinulsol. Kini nakapahimo niining posible nga kita makabalik ngadto sa presensiya sa Dios ug madawat ang kahingpitan sa kalipay.

Human gilansang si Jesus, Siya nabanhaw, nakabaton og kadaogan batok sa kamatayon pinaagi sa gahom sa Langitnong Amahan. Tungod sa Pagkabanhaw ni Jesus, kitang tanan mabanhaw human kita mamatay. Kini nagpasabot nga ang matag espiritu ug lawas sa tawo mahiusa pag-usab, ug ang matag usa kanato mabuhi hangtod sa kahangtoran diha sa usa ka hingpit, nabanhaw nga lawas. (Tan-awa sa “Ang Pag-ula ni Jesukristo” sa Leksiyon 2.)

Ang Propeta nga si Joseph Smith nagtudlo, “Ang sukaranan nga mga baroganan sa atong relihiyon mao ang pagpamatuod sa Apostoles ug sa mga Propeta, mahitungod ni Jesukristo, nga Siya namatay, gilubong, ug mibangon sa ikatulong adlaw, ug mikayab ngadto sa langit; ug ang ubang mga butang nga may kalabotan sa atong relihiyon sumpay lamang niini” (Mga Pagtulon-an sa mga Presidente sa Simbahan: Joseph Smith [2007], 58).

Pagtuon sa Kasulatan

Pagkat-on og Dugang mahitungod Niini nga Baroganan

Ang Giya ngadto sa mga Kasulatan: “Jesukristo,” “Pag-ula, Pag-ula sa Dugo”
Gospel Topics: “Jesus Christ,” “Atonement of Jesus Christ”

Ang Pagbiya sa Kamatuoran

Human sa kamatayon ni Jesukristo, ang Iyang Apostoles nagtinguha nga magpabilin ang putli nga doktrina ni Kristo ug ipabilin nga magmentinar han-ay sa Simbahan. Hinuon, daghang mga miyembro sa Simbahan ang mibiya sa kamatuoran gikan sa Apostoles ug gikan sa doktrina nga gitudlo ni Jesus.

Human mamatay ang Apostoles, adunay halapad nga pagbiya sa kamatuoran gikan sa ebanghelyo ug sa Simbahan ni Jesukristo. Kini nga pagbiya sa kamatuoran usahay gitawag nga ang Dakong Apostasiya. Tungod niini, ang Dios mibawi sa awtoridad nga pagkapari gikan sa yuta. Kini nga pagkawala naglakip sa awtoridad nga gikinahanglan sa pagdumala sa Simbahan. Isip resulta, ang Simbahan nga gitukod ni Jesus wala na sa yuta.

Atol niining panahona, ang mga tawo miusab sa daghang pagtulon-an sa ebanghelyo. Kadaghanan sa kasayoran sa tinuod nga kinaiyahan sa Langitnong Amahan, ni Jesukristo, ug sa Espiritu Santo gituis o nangawala. Ang mga tawo miusab sa mga ordinansa sa pagkapari, sama sa bunyag.

Mga siglo ang milabay, ang mga kalalakin-an ug kababayen-an nga nagpangita sa kamatuoran misulay sa pagreporma sa mga pagtulon-an ug mga buhat nga nausab na. Nagtinguha sila og mas dako nga espirituwal nga kahayag, ug daghan ang naghisgot mahitungod sa panginahanglan alang sa usa ka pagpahiuli sa kamatuoran. Ang ilang mga paningkamot misangpot ngadto sa pag-organisar sa daghang simbahan.

Kini nga yugto sa panahon miresulta sa naglambo nga paghatag og gibug-aton kabahin sa kagawasan sa relihiyon, diin mibukas sa dalan alang sa pagpahiuli sa kamatuoran ug awtoridad gikan sa Dios.

Mga propeta ug apostoles nanagna mahitungod sa pagbiya sa kamatuoran (tan-awa sa 2 Mga Taga- Tesalonica 2:1–3). Gipanagna usab nila nga ang ebanghelyo ug ang Simbahan ni Jesukristo mapahiuli sa yuta (tan-awa sa Mga Buhat 3:20–21). Kon wala pa untay pagbiya sa kamatuoran, ang pagpahiuli dili na unta gikinahanglan.

Panabot sa Pagtudlo: Ang Pagbiya sa Kamatuoran

Itudlo sa mga tawo ang mahitungod sa pagbiya sa kamatuoran sumala sa ilang gikinahanglan ug kaagi. Tabangi sila nga masabtan ang panginahanglan alang sa Pagpahiuli sa ebanghelyo ni Jesukristo.

Importante nga mga Punto nga Lagmit Imong Itudlo

Kadaghanan sa mga tawo misalikway ni Jesukristo ug sa Apostoles (tan-awa sa Mateo 24:9; 1 Nephi 11:32–34; 2 Nephi 27:5). Human sa mga kamatayon sa Apostoles, ang pagkapari nawala gikan sa yuta. Wala nay awtoridad sa pagbunyag o sa pagdumala sa Simbahan.
Ang Imperyo sa Roma, nga sa sinugdanan midaug-daog sa mga Kristiyano, sa kadugayan mihangop sa Kristiyanismo. Ang importante nga mga pangutana sa relihiyon gihusay pinaagi sa pagdebate diha sa konseho imbes sa pagpadayag gikan sa Dios. Gidebatihan ang doktrina ug mga ordinansa ug giusab aron sa pagpahiuyon ngadto sa kalibotanong mga pilosopiya. Ang mga sumbanan sa pagtuo, o mga pamahayag sa tinuohan, gihimo base sa mga desisyon niining mga konseho (tan-awa sa Joseph Smith—Kasaysayan 1:19).
Ang pipila sa mga tawo misulay sa pagreporma sa Kristiyanismo pinaagi sa pagkorehir sa unsay anaa nang daan. Apan, tungod kay ang awtoridad sa pagkapari sa Dios wala na sa yuta, ang pagpahiuli sa awtoridad ug kamatuoran gikinahanglan aron maestablisar pag-usab ang Simbahan ni Jesukristo.

Pagtuon sa Kasulatan

2 Nephi 28
Mateo 24:9–11
Mga Buhat 20:28–30
Mga Taga-Galacia 1:6–9
2 Mga Taga-Tesalonica 2:1–12 (Hubad ni Joseph Smith, mga bersikulo 2, 3, 7–9)
2 Timoteo 4:3–4
2 Pedro 2:1–2
Amos 8:11–12

Pagkat-on og Dugang mahitungod Niini nga Baroganan

Ang Giya ngadto sa mga Kasulatan, “Hingpit nga Pagbiya”
Gospel Topics, “Apostasy”

Ang Pagpahiuli sa Ebanghelyo ni Jesukristo pinaagi ni Joseph Smith

Ang Unang Panan-awon ug ang Pagtawag ni Joseph Smith isip usa ka Propeta

Atol sa mga siglo sa dihang ang kahingpitan sa ebanghelyo ni Jesukristo wala na sa yuta, ang Langitnong Amahan mipadayon sa pagtabang sa Iyang mga anak. Paglabay sa panahon, Siya miandam sa dalan aron sila mahimong mapanalanginan pag-usab uban sa kahingpitan sa Iyang ebanghelyo. Sa dihang ang mga kahimtang tukma na, Siya mitawag ni Joseph Smith isip usa ka propeta kang kinsa ang ebanghelyo ug ang Simbahan ni Jesukristo mahimong ipahiuli.

Si Joseph Smith nagpuyo sa silangang bahin sa Estados Unidos sa usa ka panahon sa dakong kasamok sa relihiyon. Ang mga sakop sa iyang pamilya mahalaron ngadto sa Dios ug nangita sa kamatuoran. Daghang simbahan ang miangkon nga adunay kamatuoran, ug si Joseph nagtinguha sa pagkahibalo kon hain niini ang sakto (tan-awa sa Joseph Smith—Kasaysayan 1:18). Ang Biblia nagtudlo nga adunay “usa lamang ka Ginoo, usa ka pagtuo, usa ka bunyag” (Mga Taga-Efeso 4:5). Samtang si Joseph mitambong og lain-laing mga simbahan, naglibog siya kon hain niini ang iyang apilan. Sa kadugayan miingon siya:

“Hilabihan ang kalibog ug kagubot taliwala sa nagkalain-lain nga mga tinuohan, nga imposible alang sa usa ka batan-on sama kanako … sa pagkab-ot sa usa ka piho na paghukom kinsa ang tinuod ug kinsa ang sayop. …

“Diha sa taliwala niini nga gubat sa mga pulong ug kagubot sa mga opinyon, ako sa kanunay miingon sa akong kaugalingon: Unsa kaha ang buhaton? Kinsa sa tanan niini nga mga pundok ang tinuod; o, sila bang tanan mga sayop? Kon adunay usa kanila nga sakto, hain niini, ug sa unsa nga paagi ako masayod niini?” (Joseph Smith—Kasaysayan 1:8, 10).

Sama sa daghang tawo, si Joseph Smith usab adunay mga pangutana mahitungod sa kaluwasan sa iyang kalag. Siya gusto nga mapasaylo ang iyang mga sala ug mahimong limpyo sa atubangan sa Dios. Samtang nangita siya sa kamatuoran taliwala sa nagkalain-laing simbahan, nabasa niya sa Biblia, “Kon aduna man kaninyoy nakulangan og kaalam, papangayoa siya sa Dios nga nagapanghatag ngadto sa tanang mga tawo sa madagayaon gayod ug sa walay pagpamoyboy, ug kini igahatag kaniya” (Santiago 1:5).

Tungod niining mao nga tudling, si Joseph nakahukom nga mangutana sa Dios sa unsay angay niyang buhaton. Sa tingpamulak niadtong 1820, si Joseph miadto sa kakahoyan duol sa iyang balay ug miluhod sa pag-ampo. Dihay upat ka asoy sa panan-awon nga misunod, gisulat ni Joseph Smith o pinaagi sa eskriba ubos sa iyang direksiyon (tan-awa sa Gospel Topics Essays, “First Vision Accounts [Mga Asoy sa Unang Panan-awon]”). Diha sa asoy nga gihatagan og katungod isip kasulatan, siya mihulagway sa iyang kasinatian sa mosunod:

Ang Unang Panan-awon, pinaagi ni Linda Christensen ug Michael Malm

“Ako nakakita og usa ka dako nga gilis sa kahayag ibabaw gayod sa akong ulo, labaw sa kahayag sa adlaw, nga nag-anam og paubos hangtod kini midapat kanako. … Sa diha nga ang kahayag midapat kanako ako nakakita og duha ka Personahe, kansang kahayag ug himaya dili mahulagway, nagtindog ibabaw kanako diha sa kawanangan. Usa kanila misulti ngari kanako, nagtawag kanako sa akong ngalan ug miingon, nagtudlo ngadto sa lain—Kini mao ang Akong Hinigugmang Anak. Paminaw Kaniya!” (Joseph Smith—Kasaysayan 1:16–17).

Dinhi niini nga panan-awon, ang Dios Amahan ug si Jesukristo, nagpakita ngadto kang Joseph Smith. Ang Manluluwas misulti kaniya nga dili moapil sa bisan hain nga mga simbahan.

Sa lain nga asoy niining panan-awon, si Joseph mipakigbahin nga ang Manluluwas misulti kaniya: “Gipasaylo na ang imong mga sala. … Tan-awa Ako ang Ginoong Dios sa himaya. Ako gilansang sa krus alang sa kalibotan, aron kadtong tanan nga motuo sa akong ngalan makaangkon og kinabuhi nga dayon.”

Human sa panan-awon, si Joseph namalandong, “Ang akong kalag napuno sa gugma ug sulod sa daghang mga adlaw nagmaya ako uban sa hingpit nga kalipay ug ang Ginoo nag-uban kanako” (Joseph Smith History, circa Summer 1832, 3, josephsmithpapers.org; panitik ug panulbok gimoderno).

Pinaagi niini nga panan-awon, si Joseph Smith nahimong usa ka saksi ni Jesukristo ug nakat-on sa importante nga mga kamatuoran mahitungod sa Dios nga Kapangulohan. Pananglitan, siya nakakat-on nga ang Langitnong Amahan ug si Jesukristo managlahi nga binuhat. Sa dihang Siya mitawag kaniya pinaagi sa ngalan, iyang nahibaloan nga Sila personal nga nakaila kaniya. Sa dihang gisultihan si Joseph nga siya napasaylo na, iyang nahibaloan nga ang Dios maluluy-on. Kini nga kasinatian mipuno kaniya og kalipay.

Sama sa gibuhat sa Dios ngadto sa daghang nangagi nga mga propeta, Siya mitawag ni Joseph Smith nga mamahimong usa ka propeta diin pinaagi kaniya ang kahingpitan sa ebanghelyo gipahiuli sa yuta. Kini nga pagpahiuli makatabang sa mga anak sa Dios nga makakaplag og kalipay niining kalibotan ug kinabuhi nga dayon sa kalibotan nga umaabot—tanan pinaagi ni Jesukristo.

Pagpahiuli sa Pagkapari ug mga Yawe sa Pagkapari

Upon You My Fellow Servants [Diha Kaninyo nga Akong Kauban nga mga Sulugoon], ni Linda Curley Christensen ug Michael Malm

Human sa pagpakita sa Amahan ug sa Anak, ang ubang mga langitnong mensahero gipadala ngadto kang Joseph Smith ug sa iyang kauban nga si Oliver Cowdery. Si Juan Bautista mipakita isip usa ka nabanhaw nga binuhat ug mihatag sa Aaronic nga Pagkapari ug sa mga yawe niini. Ang Aaronic nga Pagkapari naglakip sa awtoridad sa pagbunyag.

The Voice of Peter, James, and John [Ang Tingog nila ni Pedro, Santiago, ug Juan], ni Welden C. Andersen

Sa wala madugay, sila si Pedro, Santiago, ug Juan—ang tulo sa orihinal nga Apostoles ni Kristo—mipakita isip nabanhaw nga mga binuhat ug gitugyan ang Melchizedek nga Pagkapari ug ang mga yawe niini ngadto nila ni Joseph Smith ug Oliver Cowdery. Kini nga pagkapari mao ang samang awtoridad nga gihatag ni Kristo sa Iyang Apostoles sa karaang panahon.

Image of Moses Elias and Elijah descending into the Kirtland temple and appearing to Joseph Smith.

Didto sa Kirtland Temple, sila si Moises, Elias, ug Elijah mipakita ngadto ni Joseph Smith ug ni Oliver Cowdery ug mitugyan nila sa dugang awtoridad ug mga yawe sa pagkapari nga gikinahanglan sa pagtuman sa buhat sa Dios sa ulahing mga adlaw. Si Moises mitugyan sa mga yawe sa pagpundok sa Israel. Si Elias mitugyan sa dispensasyon sa ebanghelyo ni Abraham. Si Elijah mitugyan sa mga yawe sa gahom sa pagselyo. (Tan-awa sa Doktrina ug mga Pakigsaad 110:11–16; tan-awa usab sa Kinatibuk-ang Tamdanan nga Basahon, 3.1.)

Organisasyon sa Simbahan

Si Joseph Smith gisugo sa pag-organisar pag-usab sa Simbahan ni Jesukristo dinhi sa yuta. Pinaagi kaniya, si Jesukristo mitawag og napulog duha ka Apostoles.

Ang mga propeta sa kapanahonan sa biblia mipasabot nga ang atong panahon karon mao ang kataposan nga mga adlaw o ang ulahing mga adlaw. Mao kini ang panahon nga hapit na ang Ikaduhang Pag-anhi ni Jesukristo. Mao kana kon nganong ang Simbahan ginganlan og Ang Simbahan ni Jesukristo sa mga Santos sa Ulahing mga Adlaw (tan-awa sa Doktrina ug mga Pakigsaad 115:3–4; tan-awa usab sa 3 Nephi 27:3–8).

Ang Buhi nga mga Propeta ug Apostoles Karon

Ingon nga si Jesus mitawag og Apostoles atol sa Iyang mortal nga pagpangalagad aron mangulo sa Iyang Simbahan, Siya mitawag og Apostoles aron mangulo niini karon. Ang Unang Kapangulohan ug ang Korum sa Napulog Duha ka Apostoles mga propeta, mga manalagna, ug mga tigpadayag.

Ang senior lang nga Apostol ang gitawag nga ang propeta tungod kay siya ang nagdumala sa tibuok Simbahan ug espesyal nga awtorisado sa pagpamulong alang sa Ginoo. Siya ang awtorisado nga sumusunod ngadto ni Joseph Smith. Siya ug ang kasamtangang Apostoles mosubay sa ilang mga awtoridad ngadto ni Jesukristo diha sa walay pagkaputol nga kadena sa mga ordinasyon nga nasugdan sa dihang si Joseph Smith giorden ubos sa mga kamot sa langitnong mga mensahero.

Pagtuon sa Kasulatan

Pagkat-on og Dugang mahitungod Niini nga Baroganan

Ang Giya ngadto sa mga Kasulatan,“Pagpahiuli sa Ebanghelyo”
“Ang Pagpahiuli sa Kahingpitan sa Ebanghelyo ni Jesukristo: Usa ka Pamahayag ngadto sa Kalibotan sa Ikaduhang Siglo nga Kasaulogan”
Gospel Topics: “Restoration of the Church,” “Restoration of the Priesthood”

Ang Basahon ni Mormon: Lain nga Tugon ni Jesukristo

Ang Basahon ni Mormon mao ang usa ka balaan nga bolyum sa balaan nga kasulatan sama sa Biblia. Ang Biblia mao ang usa ka saksi ni Jesukristo, ug ang Basahon ni Mormon mao ang ikaduha nga saksi sa Iyang pagpangalagad, sa Iyang mga pagtulon-an, ug sa Iyang misyon isip atong Manluluwas.

Si Joseph Smith gitudloan pinaagi sa langitnong mensahero nga ginganlan og Moroni ngadto sa usa ka bungtod diin ang karaan nga rekord gilubong sulod sa mga siglo. Kini nga rekord, gikulit diha sa bulawan nga mga palid (nipis nga palid sa metal), naglangkob sa mga sinulat sa mga propeta mahitungod sa pagkigsabot sa Dios ngadto sa mga karaan nga mga lumulupyo sa Amerika. Si Propeta Joseph Smith mihubad niini nga rekord pinaagi sa gahom sa Dios.

Ang mga propeta sa Basahon ni Mormon nasayod kabahin sa misyon ni Jesukristo ug mitudlo sa Iyang ebanghelyo. Human si Jesukristo nabanhaw, Siya mipakita ngadto niining mga tawo ug personal nga nangalagad ngadto kanila. Siya mitudlo kanila ug mitukod sa Iyang Simbahan.

Ang Basahon ni Mormon makatabang kanato nga mas maduol ngadto sa Dios samtang kita makakat-on, makasabot, ug mogamit sa mga pagtulon-an niini. Si Propeta Joseph Smith miingon nga “Ang tawo [o babaye] labi pa nga maduol sa Dios pinaagi pagsunod sa mga lagda [sa basahon], kay sa bisan hain nga basahon” (Mga Pagtulon-an: Joseph Smith, 75).

Aron masayod nga ang Basahon ni Mormon mao ang pulong sa Dios, kita kinahanglan nga mobasa niini, mamalandong niini, ug mag-ampo mahitungod niini. Ang usa ka propeta sa Basahon Mormon misaad nga ang Dios mopadayag sa kamatuoran sa basahon ngari kanato kon kita mag-ampo nga kinasingkasing, uban sa tinuod nga katuyoan, ug may hugot nga pagtuo kang Kristo (tan-awa sa Moroni 10:3–5). Ang pagtuon sa Basahon ni Mormon mahinungdanon aron molahutay ang pagkakabig.

Kon kita mobasa sa Basahon ni Mormon ug mag-ampo mahitungod niini, kita makakat-on sa mga kamatuoran mahitungod ni Jesukristo nga mopanalangin sa atong mga kinabuhi. Kita usab mahimong masayod nga si Josepht Smith usa ka propeta sa Dios ug nga ang ebanghelyo ug ang Simbahan ni Jesukristo gipahiuli pinaagi kaniya.

“Mosaad ko kaninyo nga kon mainampoon kamo nga magtuon sa Basahon ni Mormon kada adlaw, makahimo kamo og mas maayong mga desisyon—kada adlaw. Mosaad ako kaninyo nga kon mamalandong kamo unsay inyong gitun-an, ang mga bintana sa langit mobukas, ug makadawat kamo sa mga tubag sa inyong mga pangutana ug direksyon sa inyong kinabuhi. Mosaad ako nga kon inyong isub-sob ang inyong kaugalingon sa Basahon ni Mormon, mapanalipdan kamo batok sa mga daotan niining panahona, bisan ang grabing pagtakboy sa pornograpiya ug sa ubang matang sa adiksyon” (“Ang Basahon ni Mormon: Unsa Kaha ang Imong Kinabuhi Kon wala Kini?” Liahona, Nob. 2017, 62–63).

Mga Panabot sa Pagtudlo

Pagpaila sa Basahon ni Mormon ngadto sa mga Tawo

Kon magpaila sa Basahon ni Mormon ngadto sa mga tawo, ipasabot nga kini usa ka sagrado nga rekord sa pakighinabi sa Dios ngadto sa katawhan sa karaan nga Amerika kapin na sa liboan ka tuig. Gikan niini kita makakat-on og daghan nga magamit sa atong mga kinabuhi karon.

Ipasabot nga ang katuyoan sa Basahon ni Mormon mao ang pagkombinser sa tanang katawhan nga si Jesus mao ang Kristo (tan-awa ang ulohan nga pahina). Sama sa gisulti sa ubos nga ulohan niini, ang basahon mao ang “Laing Tugon ni Jesukristo.” Saari ang mga tawo nga sila mahimong mas makaila sa ilang Manluluwas kon ilaha kining basahon.

Kon ikaw mohatag sa tawo og usa ka kopya sa Basahon ni Mormon, sultihi sila mahitungod sa espirituwal nga gahom nga nahatag niini nganha sa imong kinabuhi. Pagpakigbahin og usa o duha ka tudling nga makahuluganon diha nimo o tingali mahimong makahuluganon ngadto kanila. Diha sa imong personal nga pagtuon ug pagtuon uban sa kompanyon, ang Espiritu motabang kanimo sa pagpangita sa mga bersikulo nga makabayaw ug makalig-on sa mga tawo.

Awhaga ang mga tawo sa pagbasa gikan sa Basahon ni Mormon sa matag adlaw. Samtang sila mobasa niini ug mogamit sa mga pagtulon-an, sila mapanalanginan ug mobati nga mas duol ngadto sa Dios.

Ang Basahon ni Mormon Mokompirmar sa Kamatuoran sa Pagpahiuli

Tingali magamit nimo ang mga pulong sama sa mosunod aron matabangan ang mga tawo nga makasabot kon sa unsang paagi nga ang Basahon ni Mormon mokompirmar sa kamatuoran sa Pagpahiuli sa ebanghelyo ni Jesukristo:

“Ang Basahon ni Mormon mao ang usa ka paagi nga ang Dios mikompirmar ngari kanako sa kamatuoran kon unsa ang among gisulti. Mahimo bang basahon nimo ang kataposang duha ka parapo nga anaa sa pasiuna sa mao nga libro?”

Ipasabot ang kahulogan sa matag konsepto sa duha ka parapo. Imbitara kadtong imong gitudloan sa pagbasa og porsiyon sa Basahon ni Mormon ug sa paggamit sa mga baroganan nga anaa niining mga parapo. Kon ilang mabati ang espiritu ug kamatuoran sa Basahon ni Mormon, sila makahibalo nga si Joseph Smith usa ka propeta sa Dios.

Pagtuon sa Kasulatan

Ulohan nga pahina sa Basahon ni Mormon
Pasiuna sa Basahon Mormon, mga parapo 1–7
Moroni 10:4–5
Doktrina ug mga Pakigsaad 1:17–23; 20:1–12
Joseph Smith—Kasaysayan 1:27–62

Pagkat-on og Dugang mahitungod Niini nga Baroganan

Ang Giya ngadto sa mga Kasultan: “Basahon ni Mormon”
Gospel Topics: “Book of Mormon”

Pag-ampo aron Mahibalo sa Kamatuoran pinaagi sa Espiritu Santo

Tungod kay ang Dios mao ang atong Amahan, Siya motabang kanato nga makaila sa kamatuoran. Kita mahimong masayod nga ang mensahe sa Pagpahiuli sa ebanghelyo ni Jesukristo tinuod kon kita mobasa sa Basahon ni Mormon ug mag-ampo ngadto sa Dios. Kon kita mag-ampo uban sa hugot nga pagtuo ug tinuod nga katuyoan, Siya motubag sa atong mga pangutana ug mogiya sa atong kinabuhi.

Ang Dios kasagaran motubag sa atong mga pag-ampo pinaagi sa Espiritu Santo. Kon kita mag-ampo, ang Espiritu Santo motudlo ug mokompirmar sa kamatuoran. Ang mga Komunikasyon gikan sa Espiritu Santo gamhanan. Kini sa kasagaran moabot isip usa ka hilom nga kaseguroan pinaagi sa atong mga pagbati, mga hunahuna, ug mga pag-aghat (tan-awa sa 1 Mga Hari 19:11–12; Helaman 5:30; Doktrina ug mga Pakigsaad 8:2).

Ang makanunayon nga pagtuon sa mga kasulatan (ilabi na sa Basahon ni Mormon), sinemana nga pagtambong sa miting sa sakramento, ug sinsero nga pag-ampo motabang kanato nga mobati sa gahom sa Espiritu Santo ug madiskobre ang kamatuoran.

Mga Panabot sa Pagtudlo

Pag-ampo

Sama ni Joseph Smith, daghang tawo ang nangita sa mga tubag sa importante nga mga pangutana ug sa koneksiyon ngadto sa Dios. Ipakigbahin kon sa unsang paagi nga ang pag-ampo nakatabang nimo nga mobati nga duol sa Dios. Ipakigbahin kon giunsa nimo sa pagkadawat sa mga tubag ug giya pinaagi sa pagtuon ug pag-ampo.

Ipasabot nga ang pag-ampo mao ang panagbayloay sa komunikasyon ngadto sa Dios. Imbitara kadtong imong gitudloan sa paghangyo og tabang ug giya sa Dios. Ang pag-imbitar sa mga tawo nga mag-ampo mao ang usa sa labing importante nga imbitasyon nga imong mahatag. Kon sila makadawat og mga tubag, ilang mahibaloan nga sila gihigugma nga mga anak sa Dios ug nga Siya motabang kanila.

Daghang tawo ang imong matudloan ang nagkulang og kasinatian sa pag-ampo. Kini usa ka pribilehiyo alang kanimo sa pagtabang kanila nga makakat-on sa pag-ampo ug mahatag ang mga panalangin sa pag-ampo ngadto sa ilang mga kinabuhi. Ang pag-ampo mao ang paagi nga kita makabaton og usa ka pagsaksi sa espirituwal nga mga kamatuoran.

Tudloi ang mga tawo nga ang pag-ampo sagad maglangkob sa mosunod nga mga bahin:

Sugdi pinaagi sa pagtawag sa imong Langitnong Amahan.
Ipadayag ang mga pagbati sa imong kasingkasing, sama sa pagpasalamat sa mga panalangin nga imong nadawat.
Mangutana, mangayo og giya, ug mangayo sa mga panalangin nga imong gikinahanglan.
Taposa pinaagi sa pag-ingon og, “Sa ngalan ni Jesukristo, amen.”

Imbitara ang mga tawo sa pag-ampo samtang mobasa sila sa Basahon ni Mormon aron matabangan sila nga makasabot nga kini ang pulong sa Dios ug nagpamatuod ni Jesukristo.

Kon magtudlo sa mga tawo sa pag-ampo, paggamit og yano nga pinulongan nga mahimo usab nilang gamiton kon sila mag-ampo. Himoa kini nga mga pag-ampo nga mubo.

Imbitara ang tawo nga imong gitudloan sa paghalad og usa ka pag-ampo sa pagtapos sa leksiyon. Pagpamatuod nga ang Dios maminaw ug motubag sa atong mga pag-ampo.

Tinuod nga Katuyoan

Ang pagbasa nga adunay tinuod nga katuyoan nagpasabot sa pagkaandam sa pagbuhat sa doktrina ug sa paglakip niini ngadto sa inadlaw adlaw nga kinabuhi. Ang pag-ampo nga adunay tinuod nga katuyoan nagpasabot sa pagkaandam sa pagbuhat sa mga tubag nga atong madawat gikan sa Dios.

Pagtuon sa Kasulatan

Moroni 10:3–5
Alma 5:45–46
Doktrina ug mga Pakigsaad 8:2–3
Juan 14:26
Pasiuna sa Basahon ni Mormon mga parapo 8–9

Pagkat-on og Dugang mahitungod Niini nga Baroganan

Ang Giya ngadto sa mga Kasulatan, “Pag-ampo”
Ang Giya ngadto sa mga Kasulatan: “Pag-ampo”
Gospel Topics, “Prayer

Mubo ngadto sa Kasarangan nga Latid sa Leksiyon

Ang mosunod nga latid mao ang usa ka sampol sa unsay mahimo ninyong itudlo sa tawo kon kamo adunay mubo lang nga oras. Kon mogamit niini nga latid, pagpili og usa o dugang pa nga mga baroganan nga itudlo. Ang sukaranan nga doktrina alang sa matag baroganan gihatag nang daan diha sa leksiyon.

Sa inyong pagtudlo, pangutana ug paminaw. Ihatag ang mga imbitasyon nga makatabang sa mga tawo nga makakat-on kon unsaon nga mas mapaduol ngadto sa Dios. Usa ka importante nga imbitasyon mao nga ang tawo makighimamat kaninyo pag-usab. Ang gitas-on sa leksiyon magdepende sa inyong mga ipangutana ug sa pagpaminaw nga inyong buhaton.

Unsa ang Mahimo Ninyong Itudlo sa mga Tawo sulod sa 3-10 Minutos

Ang Dios mao ang atong Langitnong Amahan, ug Siya milalang kanato sa Iyang panagway. Siya personal nga nakaila ug nahigugma kanato. Siya gusto nga mopanalangin kanato sa kalinaw ug kahingpitan sa kalipay nga molungtad sa kahangtoran.
Si Jesukristo mao ang Anak sa Dios. Ang Iyang misyon mao ang paghimong posible alang kanato nga mamahimong malimpyohan sa atong mga sala, mabuntog ang kamatayon, ug makadawat sa kinabuhi nga dayon.
Ang Dios nagtawag og mga propeta aron mahimo Niyang mga representante dinhi sa yuta. Sa karaang panahon, Siya mitawag og mga propeta sama nila ni Adan, Noe, Abraham, ug Moises. Ang buhing propeta makadawat og pagpadayag gikan sa Dios aron motudlo ug mogiya kanato karon.
Atol sa mortal nga pagpangalagad ni Jesus, Siya mitukod sa Iyang Simbahan. Human mamatay ang Apostoles ni Jesus, adunay halapad nga pagbiya sa kamatuoran gikan sa ebanghelyo ug sa Simbahan ni Jesukristo. Ang mga tawo miusab sa daghang mga pagtulon-an sa ebanghelyo ug sa mga ordinansa sa pagkapari, sama sa bunyag.
Ang Dios mitawag ni Joseph Smith aron mamahimong usa ka propeta, sama sa Iyang pagtawag og mga propeta sa nahauna nga mga panahon. Ang Langitnong Amahan ug si Jesus mipakita ngadto kaniya. Ang ebanghelyo ni Jesukristo gipahiuli pinaagi ni kaniya.
Ang Basahon ni Mormon usa ka bolyum nga basahon sa kasulatan. Sama sa Biblia, kini mao ang tugon ni Jesukristo ug motabang kanato nga mas maduol ngadto sa Dios samtang kita mobasa niini ug mogamit sa mga pagtulon-an niini. Gihubad kini ni Joseph Smith pinaagi sa gasa ug gahom sa Dios.
Pinaagi sa sinsero nga pag-ampo, kita makahinabi uban sa Dios. Kita mahimong masayod nga ang mensahe sa Pagpahiuli sa ebanghelyo ni Jesukristo tinuod.