Jebta 3: Katak 1

Ennaan eo an Jepļaaktok eo an Gospel eo an Jisōs Kraist

Armej Remaron̄ Ļōmņak

• Anij emour ke?

• Ekōjkan aō maron̄ en̄jake epakeļo̧k Anij?

• Ekōjkan aō maron̄ katak kōn m̧ool eo ilo laļ eo rainin etarpok?

• Ekōjkan an kabun̄ jipan̄ eō?

• Etke ekanooj in lōn̄ kabun̄ ko?

• Etke ekanooj lōn̄ aō apan̄ ko?

• Ekōjkan aō maron̄ lo aenōm̧m̧an ilo iien aen̄wān̄wā ko?

• Ekōjkan aō maron̄ m̧ōņōņōļo̧k?

• Ekōjkan an juon rikanaan maron̄ jipan̄ laļ in rainin?

Jān jinoin laļ in, Anij ekar kwaļo̧k gospel eo an n̄an ajri ro Nejin kōn rikanaan ro. E ekar kōm̧m̧ane menin kōn Nejin, Jisōs Kraist. Etto, Jisōs ekar kwaļo̧k gospel eo an n̄an rikanaan ro āinwōt Adam, Noa, Ebream, im Moses. Bōtaab elōn̄ armej raar jab bōke.

Taujin iiō ko remootļo̧k, Jisōs Kraist Make ekar katakin gospel eo An im kar kajutak Kabun̄ eo An. Em̧ool armej ro raar jab bōk Jisōs. Ejjab to ālkin mej eo An, ekar wōr juon ajeded in bun̄ jān tōmak eo jān gosepl eo im Kabun̄ eo an Irooj. Tarlep in gospel eo im mālim eo an priesthood eo raar jako ioon laļ in.

Buki iiō tokālik, Anij ekar kūr bar juon rikanaan, Josep Smith Anij ekar kōjepļaaktok tarlep in gospel eo kōn e im kar kōmālimi n̄an ejake Kabun̄ eo an Jisōs Kraist bar juon alen.

An pād tarlep in gospel eo an Jisōs Kraist ioon laļ in ej juon iaan kōjeraam̧m̧an ko reļļap an tōre in ad. Gospel eo ej jipan̄ kōj uwaaki kajjitōk ko reļļap tata pukōti ilo mour in. Rikanaan ro remour rej tōl kōj ilo iien ko reppen. Mālim eo an priesthood eo an Anij ej bar juon alen pād ioon laļ in n̄an kōjeraam̧m̧an ajri ro Nejin.

Elmakot ko n̄an Katakin

Jekjōn in ej letok juon jon̄ak in kōllaajrak n̄an jipan̄ eok kōppopo n̄an katakin. Ej barāinwōt kobaik waanjon̄ak in kajjitōk ko im kūr ko kwomaron̄ kōjerbali.

Ilo am̧ kōppopo n̄an katakin, jar ilo ļōmņak kōn kajjojo jekjek an armej eo im aikuj ko ilo jetōb. Jokāālet ta eo ejipan̄ tata n̄an katakin. Kōppopo n̄an kōmeļeļeik naan ko me armej ro remaron̄ jab meļeļe. Karōk ekkar n̄an ewi jon̄an iien eo enaaj wōr ippam̧, keememej n̄an kōkaduki katak ko.

Kāālet eoon ko n̄an kōjerbali ilo am̧ katakin. Jekjōn eo an “Pedped an Katak” eo an katak eo ekitbuuj elōn̄ eoon in jipan̄ ko.

Ļōmņak ewi wōt kajjitōk ko n̄an kajjitōk ilo am̧ katakin. Karōk kūr ko n̄an liļo̧k me renaaj kōketak kajjojo armej n̄an jerbale.

Kwaļo̧k kōjeraam̧m̧an ko kar kallim̧ur kaki an Anij, im kwaļo̧k naan in kam̧ool eo am̧ kōn ta eo kwoj katakin.

Ta Kwomaron̄ Katakin Armej ro ilo 15–25 Minit ko

Kāālet juon ak elōn̄ļo̧k pedped in katak kein n̄an katakin. Pedped in katak eo n̄an kajjojo pedped in katak ej leļo̧k ālkin laajrak in.

Anij ej Jemedwōj Ilan̄ eo ej Iakwe

• Anij ej Jemedwōj Ilan̄, im jej ajri ro Nejin. E ekar kōm̧anm̧an kōj ilo nememe eo An.

• Anij ejeļā kōj kajjojo im ej iakwe kōj.

• Anij ewōr juon an ābwinin kanniōk im dii ko aiboojoj, weppān.

• Anij ej kōņaan kōjeraam̧m̧an kōj kōn aenōm̧m̧an im tarlep in lan̄lōn̄ eo me enaaj n̄an indeeo.

• Kōnke Anij ej iakwe kōj, E ekar jilkintok Nejin, Jisōs Kraist, n̄an lo̧mo̧o̧ren kōj jān jerawiwi im mej.

Anij ej kwaļo̧k Gospel eo kōn Rikanaan ro ilo Aolep Tōre in Iien Bōk Eddo

• Anij ej kūr rikanaan ro bwe ren An ribōk jikin ioon laļ in.

• Etto, Anij ekar kūr rikanaan ro āinwōt Adam, Noa, Ebream, im Moses.

• Juon rikanaan emour ej bōk revelesōn jān Anij n̄an katakin im tōl kōj rainin.

Jerbal in Karejar eo Ilaļ in an Jisōs Kraist im Pinmuur eo

• Jisōs Kraist ej Nejin Anij.

• Ilo tōre in jerbal in karejar eo An ilaļ in, Jisōs ekar katakin gospel eo An im kar kajutak Kabun̄ eo An.

• Jisōs ekar kūr Jon̄oulruo Rijilōk ro im leļo̧k n̄an er mālim n̄an tōl Kabun̄ eo An.

• Ilo jem̧ļo̧k in mour eo An, Jisōs ekar pinmuur kōn jerawiwi ko ad kōn An en̄taan ilo Jikin Kallib Gethsemane im ilo iien Debwāāl eo. Ālkin mej an eo an Jisōs, E ekar jerkakpeje.

• Kōn wōt en̄taan in pinmuur eo an Jisōs, jemaron̄ jeorļo̧k ad bōd im erreo jān jerawiwi ko ad ilo ad ukweļo̧k. Menin ej bōktok n̄an kōj aenōm̧m̧an im kōm̧m̧an bwe en pidodo n̄an ad bar ro̧o̧lļo̧k n̄an im̧aan mejān Anij im bōk juon tarlep in lan̄lōn̄.

• Kōn wōt Jerkakpeje eo an Jisōs, jenaaj aolep jerkakpeje ālkin ad mej. Ej meļeļe in bwe kajjojo jetōb im ānbwin an armej renaaj bar koba ippān doon n̄an mour indeeo.

Bun̄ Jān Tōmak

• Ālkin an Rijilōk ro an Jisōs kar mej, ekar wōr juon ajeded in bun̄ jān tōmak jān gosepl eo im Kabun̄ eo an Jisōs Kraist.

• Ilo tōre in, armej ro raar ukōt elōn̄ katak ko an gospel eo. Armej ro raar barāinwōt ukōt kain̄i ko an priesthood eo, eo āinwōt peptaij. Mālim eo an priesthood eo im Kabun̄ eo me Jisōs ekar kajutake raar jako ioon laļ in.

Jepļaaktok eo an Gospel eo an Jisōs Kraist kōn Josep Smith

• Josep Smith ekar kappukōt n̄an jeļā ewi wōt kabun̄ eo ekar Kabun̄ eo em̧ool an Anij bwe en maron̄ kabaļo̧k ie. Jemedwōj Ilan̄ im Jisōs Kraist rekar waļo̧kļo̧k n̄an e ilo 1820 eo. Iien in ej ņa etan Visōn eo M̧oktata.

• Anij ekar kūr Josep Smith n̄an erom juon rikanaan, ejja āinwōt An kar kūr rikanaan ro ilo tōre ko m̧oktaļo̧k.

• Gospel eo an Jisōs Kraist ekar bar jepļaaktok kōn Josep Smith.

• Rikwōj meļan in lan̄ ro jet raar kōjepļaaktok priesthood eo, im Josep ekar mālim n̄an kajutak Kabun̄ eo an Jisōs Kraist.

• Jisōs Kraist ej wōnm̧aanļo̧k wōt in tōl Kabun̄ eo An rainin kōn rikanaan ro im rijilōk ro remour.

Bok in Mormon: Bar Juon Kallim̧ur kōn Jisōs Kraist

• Bok in Mormon ej bar juon bok in jeje ko rekwojarjar kar jeje ilo tōre ko etto jān rikanaan ro ilo Amedka. Josep Smith ekar ukōte kōn menin letok im kajoor an Anij.

• Ippān Baibōļ eo, Bok in Mormon ej letok juon kam̧ool kōn jerbal in karejar eo an Jisōs, katak ko, im mijen eo āinwōt ad Rilo̧mo̧o̧r.

• Jemaron̄ epakeļo̧k Anij jān riiti Bok in Mormon im mour ekkar n̄an katak ko ie.

• Jemaron̄ jeļā bwe Bok in Mormon ej naan an Anij jān riiti, kejekļo̧kjeņ kake, im jar kake. Jekjek in enaaj barāinwōt jipan̄ kōj itok n̄an jeļā bwe Josep Smith ekar juon rikanaan.

Jar kōn jeļā M̧ool eo kōn Jetōb Kwojarjar

• Jar ej juon wāween kōnono ruo-iaļan ikōtaan Anij im ajri ro Nejin.

• Kōn jar em̧ool, jemaron̄ jeļā bwe ennaan eo an Jepļaaktok eo an gospel eo an Jisōs Kraist ej m̧ool.

• Ilo ad jar, Jetōb Kwojarjar ej katakin im kapen m̧ool eo n̄an kōj.

Kajjitōk ko Kwomaron̄ Kajjitōk Ippān Armej ro

Kajjitōk kein rej waanjon̄ak ko kōn ta eo kwomaron̄ kajjitōk ippān armej ro. Kajjitōk kein remaron̄ jipan̄ eok bōk bwebwenato ko im meļeļe ko eļap meļeļeier kōn aikuj ko im kōļmenļo̧keņ an armej eo.

• Ta eo kwoj tōmak kōn Anij?

• Ekōjkan an en̄jake epakeļo̧k Anij jipan̄ eok?

• Ta eo kwojeļā kōn Jisōs Kraist? Ekōjkan an mour eo im katak ko An kar kareel eok?

• Ekōjkan am̧ lo uwaak ko pedped ioer ilo laļ eo rainin etarpok?

• Ekōjkan an jipan̄ eok n̄an jeļā bwe ewōr juon rikanaan emour ioon laļ rainin?

• Kwonan̄in ke kar ron̄ kōn Bok in Mormon? Kōm maron̄ ke kwaļo̧k etke ej aorōk?

• Kwomaron̄ ke kwaļo̧k tōmak ko am̧ kōn jar? Kōm̧ maron̄ ke kwaļo̧k tōmak ko am kōn jar?

Kūr ko Kwomaron̄ Liļo̧k

• Kwonaaj ke kajjitōk ippān Anij ilo jar n̄an jipan̄ eok jeļā bwe ta eo kōm kar katakin ej m̧ool? (Lale “Kōļmenļo̧kjeņ in Katak ko: Jar” ilo jekjōk eo āliktata an katak in).

• Kwonaaj ke etal n̄an jar Jabōt in n̄an ekkatak eļapļo̧k kōn ta eo kōm kar katakin?

• Kwonaaj ke riiti Bok in Mormon im jar n̄an jeļā bwe ej naan an Anij? (Kwomaron̄ elmakote jebta ko ak eoon ko rejenolo̧k.)

• Kwonaaj ke ļoor waanjon̄ak eo an Jisōs im peptaij? (Lale “Kūr eo n̄an Peptaij im Kapen,” eo em̧ōkaj an jino katak in)

• Jemaron̄ ke karōk juōn iien n̄an am bar lotok?

Pedped in Katak eo

Jekjōn in ej letok katak eo im eoon ko n̄an am̧ ekkatak n̄an kōkajoorļo̧k jeļā im naan in kam̧ool eo am̧ kōn gospel eo im n̄an jipan̄ eok katakin.

Anij ej Jemedwōj Ilan̄ eo ej Iakwe

Anij ej Jemedwōj Ilan̄, im jej ajri ro Nejin. E ekar kōm̧anm̧an kōj ilo nememe eo An. E ewōr juon an “ānbwinnin kanniōk im di ko āinwōt maron̄ un̄ūr wōt ānbwinnin armej” aiboojoj (Katak im Bujen Ko 130:22).

Anij ejeļā kōj kajjojo, im E ej iakwe kōj eļapļo̧k jān ad maron̄ meļeļe kake. E emeļeļe kōn mālijjon̄ ko ad, būrom̧ōj ko, im m̧ōjņo̧ ko, im E ej letok jipan̄ eo n̄an kōj kōn er. E ej lan̄lōn̄ ilo eddōkļo̧k eo ad im enaaj jipan̄ kōj kōm̧m̧ani kāālet ko rejim̧we. E ej kōņaan kōnono ippād, im jemaron̄ kōnono Ippān ilo jar.

Anij ekar letok n̄an kōj jeļā in ioon laļ in bwe jen maron̄ katak, eddōkļo̧k, im eromļo̧k āinwōt E. Kōn iakwe eweppān, E ekōņaan bwe jen bar ro̧o̧l n̄an Ippān ālkin ad mej. Ijo ke, jejjab maron̄ kōm̧m̧ane menin kōn kōj make. Kōnke Anij ej iakwe kōj, E ekar jilkintok Nejin, Jisōs Kraist, n̄an lo̧mo̧o̧ren kōj. “Bwe kōn an Anij yokwe laļ, Ear letok juo wōt Nejin Ear keotak, … bwe laļ en mour kōn E” (Jon 3:16–17).

Anij ej kōņaan kōjeraam̧m̧an kōj kōn aenōm̧m̧an im tarlep in lan̄lōn̄ eo me enaaj n̄an indeeo. E ekar letok juon karōk me ej letok n̄an kōj iien em̧m̧an n̄an bōk kōjeraam̧man kein. Karōk in en ņa etan karōk in lo̧mo̧o̧r (lale katka 2).

Tōmak kōn Anij

Katak ta eo armej eo kwoj katain ej tōmak kōn Anij. Eitōn aolep armej rej tōmak bwe ej juon kain Armej Eļap men̄e elōn̄ kōmeļeļe ko kōn Anij. Ijo ke, elōn̄ armej ejjeļo̧k aer jeļā kōn Anij.

Ruo mijenede ro ilo Bok in Mormon, Amōn im Aron, raar katakin armej ro me ekar ejjeļo̧k aer jekjek an Rikūrijin. Raar katakin m̧ool ko reļem waan im karuwaineneik armej ro n̄an jar. Āinwōt juon jem̧ļo̧k, Lamonai im jemen raar oktak. Ekkatak Alma 18:24–40 im 22:4–23. Innām uwaaki kajjitōk ko itulaļ:

• Ta eo mijinede rein rekar katakin kake kōn paotokin Anij?

• Ewi wāween ad maron̄ in ļoor waanjon̄ak ko aer?

N̄an meļeļe ko rellōn̄ļo̧k, lale “Katakin Armej ro Me Ejjeļo̧k juon Aer Jekjek an Rikūrijin” ilo jebta 10.

Ekkatak Jeje ko Rekwojarjar

• 1 Nipai 17:36

• Mosaia 4:9

• 3 Nipai 14:9–11

• Katak im Bujen Ko 93:29; 130:22

• Moses 1:39

• Ebream 3:25

• Jerbal 17:27–29

• Rom 8:16

• Hibru 12:9

• Jenesis 1:26–27

Katak Eļapļo̧k kōn Pedped in Katak in

• Unin Tōl eo n̄an Jeje Ko Rekwōjarjar: “Jemād ilo Lan̄,” “Anij, Doulul in Anij”

• Gospel Topics: “God the Father”

Anij ej kwaļo̧k Gospel eo kōn Rikanaan ro ilo Aolep Tōre in Iien Bōk Eddo

Rikanaan ro Rej Ribōk Jikin Anij ioon Laļ in

Juon wāween eaorōk me Anij ej kwaļo̧k An iakwe kōj ej n̄an kūr rikanaan ro, leļo̧k n̄an er mālim eo an priesthood, im im̧we er n̄an kōnono n̄an E, Rikanaan ro rej ribōk jikin Anij ro ioon laļ in. Rikanaan Amos ilo Kallim̧ur M̧okta ekar rekoote bwe “ilo m̧ool Irooj Jeova ej jab kōm̧m̧an jabdewōt n̄e ab Ej kwaļo̧k pepe eo An n̄an ro ri karijeran, rikanaan ro” (Amos 3:7 Jet iaan kōjeraam̧m̧an ko jej būki jān rikanaan ro remour rej ellaajrak itulaļ.

Rikam̧ool ro an Jisōs Kraist. Rikanaan ro rej rikam̧ool ro rejenolo̧k an Jisōs Kraist, kam̧ool kōn E āinwōt ad Rilo̧mo̧o̧r im Ripinmuur.

Katak ko. Rikanaan ro rej bōk tōl jān Anij n̄an jipan̄ kōj jeļā m̧ool jān bōd. Rej katakin kōj n̄an pokake kien ko an Anij im n̄an ukweļo̧k n̄e jej likjab. Rej ba enana jerawiwi im kakkōl kōn kaje ko an.

Katak ko an rikanaan ro rej ļōn̄ajļo̧k kōj n̄an Anij im jipan̄ kōj bōk kōjeraam̧m̧an ko E ej kōņaan n̄an kōj. Kōjparok eo ad em̧m̧an tat aej pād ilo ļoor naan eo an Irooj kar letok kōn rikanaan ro An,

Mālim eo an Priesthood. Rikanaan eo kiiō ej rikabwijer eo ej tōl an priesthood eo ioon laļ in. Priesthood ej mālim eo im kajoor eo an Anij. Rikanaan eo epād ippān mālim eo n̄an kōnono im jerbal ilo etan Anij n̄an lo̧mo̧o̧r eo an ajri ro Nejin.

Iaļ an Kabun̄ in. Kabun̄ eo an Jisōs Kraist ej ekkal ioon foundesōn an rikanaan ro im rijilōk ro (lale Epesōs 2:19–20; 4:11–14).

Rikanaan ro ilo Tōre ko Etto

Adam ekar rikanaan eo jinoin ioon laļ in. Anij ekar kwaļo̧k gospel eo an Jisōs Kraist n̄an e im kar leļo̧k n̄an e mālim eo an priesthood eo. Adam im Iv kar katakin ajri ro nejierro m̧ool kein im kar kōketak er n̄an ejake tōmak im n̄an mour kōn gospel eo.

Āliktata ro ineen Adam im Iv raar jum̧ae im oktakļo̧k jān gospel eo. Menin ekar tōlļo̧k n̄an juon jekjek kar ņa etan maroklep, ak bun̄ jān tōmak eo. Ke ajeded in bun̄ jān tōmak eo ej waļo̧k, Anij ekar bōk mālim eo an priesthood eo An, eo ej menin aikuj n̄an katakin im kōm̧m̧ani kain̄i ko an gospel eo.

Kallim̧ur M̧okta ej je elōn̄ jekjek ko kōn ajeded in maroklep eo. Ilo jem̧ļo̧k in tōre kein, Anij ekar pukōtļo̧k ajri ro Nejin n̄an kūr bar juon rikanaan. E ekar kwaļo̧k m̧ool ko an gospel eo bar juon alen n̄an rikanaan rein im kar leļo̧k n̄an er mālim eo an priesthood. Jet iaan rikanaan rein raar Noa, Ebream, im Moses. Ejerata, ilo juon jon̄ak ej waļo̧k im bar waļo̧k ilo iien ko, āliktata armej ro raar kowaan rikanaan ro im bun̄ jān tōmak.

Katakin Kōļmenļo̧kjeņ ko

Rikanaan ro

Katak kōn ta eo armej eo kwoj katakin rej meļeļe kōn rikanaan ro. Armej ro ilo elōn̄ m̧anit ko rej tōmak bwe armej ro rekwojarjar im im̧we rej bōk jet kain jineet im tōl jān Anij. Ijoke, ejjab aolep kajjojo armej kar im̧we rej rikanaan ro an Anij.

Kōmeļeļeik bwe ālkin kajjojo iien ko an ajedeed in maroklep eo, Anij ekar kōjepļaaktok gospel eo kōn juon rikanaan. E ekar leļo̧k n̄an rikanaan jab eo mālim eo an priesthood. Rikanaan eo ekar jipan̄ armej ro meļeļe kadkad eo aer n̄an Anij, ekoba ekōjkan bōk mour indeeo kōn gospel eo an Jisōs Kraist.

Tōre in Bōk Eddo ko

Juon tōre in bōk eddo an gospel eo an Jisōs Kraist ej juon tōre in iien me ewōr dik tata juon rikarejeran Irooj kar kōmālim ioon laļ in me ej kabwijer ki ko an priesthood eo. Karōk in lo̧mo̧o̧r eo an Jemedwōj Ilan̄ kar kwaļo̧ke bar juon alen ilo aolep tōre in bōk eddo.

Ekar lōn̄ tōre in iien bōk eddo ko an gospel eo. Adam, Inōk, Noa, Ebream, Moses, Jisōs Kraist, Josep Smith, im ro jet kar kajjojo tōl juon tōre in bōk eddo. Tōre in bōk eddo eo me ekar ijjino ippān Josep Smith jeļā kake āinwōt “jerbal an ien ko re jejjet (tōre in bōk eddo an tarlep in iien ko)” (Epesōs 1:10). Lal Bible Dictionary, “Dispensations,” im Unin Tōl eo n̄an Jeje Ko Rekwōjarjar “Tōrean Bōk Eddo.”

Ekkatak Jeje ko Rekwojarjar

• Jekab 4:4, 6

• Mosaia 8:13–18

• Katak im Bujen Ko 1:37–38

• Luk 1:68–70

• Jerbal 10:34–43

• Epesōs 4:11–14

• Amos 3:7

Katak Eļapļo̧k kōn Pedped in Katak in

• Unin Tōl eo n̄an Jeje Ko Rekwōjarjar: “Rikanaan”

• Gospel Topics: “Prophets,” “Restoration of the Church”

Jerbal in Karejar eo i an Jisōs Kraist ilo Mour in im Pinmuur eo

Jisōs Kraist ej Nejin Anij. Jisōs im Pinmuur eo An rej dilepān karōk eo an Anij n̄an kōj. Pinmuur eo An ekar kitbuuj en̄taan eo An ilo Jikin Kallūb Gethsemane, en̄taan im mej eo An ioon debwāāl eo, im Jerkakpeje eo An.

Jān iien eo an Adam im Iv, armej ro raar reim̧aanļo̧k n̄an itok eo an Jisōs Kraist āinwōt aer Rilo̧mo̧o̧r im Ripinmuur. Jemedwōj Ilan̄ ekar jilkintok Jisōs n̄an laļ in elōn̄ļo̧k jān 2,000 iiō ko remootļo̧k.

Jisōs ekar mour juon mour eweppān, ejjeļo̧k jerawiwi. E ekar katakin gospel eo An im kar kajutak Kabun̄ eo An. E ekar kūr jon̄oulruo Rijilōk ro im leļo̧k n̄an er mālim eo an priesthood n̄an katakin im n̄an kōm̧m̧ani kain̄i ko rekwojarjar, eo āinwōt peptaij. E ekar barāinwōt leļo̧k n̄an er mālim n̄an tōl Kabun̄ eo An.

Ilo jem̧ļo̧k in mour eo An, Jisōs ekar pinmuur kōn jerawiwi ko ad kōn An en̄taan ilo Gethsemane im ilo iien Debwāāl eo An. Kōnke kōn en̄taan in pinmmur eo an Jisōs, jemaron̄ in erreo jān jerawiwi ko ad ilo ad ukweļo̧k. Menin ej kōm̧m̧an an pidodo n̄an ad bar ro̧o̧l n̄an im̧aan mejān Anij im bōk tarlep in lan̄lōn̄ eo.

Ālkin debwāāl eo an Jisōs, E ekar jerkakjepe, bōk anjo̧ ioon mej kōn kajoor eo an Jemedwōj Ilan̄. Kōnke kōn Jerkakpeje eo an Jisōs, aoleped wōj naaj jerkakpeje ālkin ad mej. Menin ej meļeļe in bwe kajjojo jetōb im ānbwin an armej renaaj bar koba, im kajjojo iaad enaaj mour indeeo ilo juon ānbwin eweppān, jerkakjepe. (Lale “Pinmuur eo an Jisōs Kraist” ilo katak 2.)

Rikanaan Josep Smith ekar kwaļo̧k, “Pedped in katak ko an kabun̄ eo ad rej naan in kam̧ool eo an Rijilōk ro im Rikanaan ro, kōn Jisōs Kraist, bwe Eaar mej, kar kalbwini, im kar jerkak bar juon alen ilo raan eo kein kajilu, im wanlōn̄ļo̧k n̄an lan̄; im aolep men ko jet rej ekkar n̄an kabun̄ eo ad rej wōt men ko reddik n̄an e” (Teachings of Presidents of the Church: Joseph Smith [2007], 49).

Ekkatak Jeje ko Rekwojarjar

• 2 Nipai 2:6–8; 9:1–24; 31

• Alma 7:11–13; 11:40; 34:8–10

• 3 Nipai 11:31–41; 27:1–22

• Katak im Bujen Ko 19:15–19; 45:3–5

• Jon 3:16–17

• 1 Korint 15:1–4, 20–22

• 1 Jon 1:7

Katak Eļapļo̧k kōn Pedped in Katak in

• Unin Tōl n̄an Jeje Ko Rekwōjarjar: “Jisōs Kraist,” “Kōllaajrak, Pinmuur”

• Bible Dictionary: “Atonement”

• Gospel Topics: “Jesus Christ,” “Atonement of Jesus Christ”

Bun̄ Jān Tōmak e

Ālkin mej eo an Jisōs Kraist, Rijilōk ro An raar kajjieon̄ in kōjparok katak erreo eo an katak eo an Kraist im n̄an dāpij wōt ellaajrak eo ilo Kabun̄ eo. Ijo ke, elōn̄ membōr in Kabun̄ eo raar oktakļo̧k jān Rijilōk ro im jān katak eo me Kraist ekar katakin.

Ālkin kar m̧an Rijilōk ro An, ekar wōr juon ajeded in bun̄ jān tōmak jān gospel eo im Kabun̄ eo an Jisōs Kraist. Bun̄ jān tōmak in ej jet iien ņan etan Maroklep eo Eļap. Kōnke kōn e, Anij ekar bōk mālim eo an priesthood eo jān laļ in. Jako in ekar koba mālim eo kar aikuji n̄an tōl Kabun̄ in. Āinwōt juon jem̧ļo̧k, Kabun̄ eo me Jisōs ekar kajutake ekar jako ioon laļ in.

Ilo tōre in, armej ro raar ukōt elōn̄ katak ko an gospel eo. Eļap wōt ijo an jeļā eo kōn m̧ool in paotok eo an Jemedwōj Ilan̄, Jisōs Kraist, im Jetōb Kwojarjar eo kar irlo̧k ak jako. Armej ro raar barāinwōt ukōt kain̄i ko an priesthood eo, eo āinwōt peptaij.

Buki iiō ko tokālik, em̧m̧aan ro im kōrā rikappok-m̧ool eo raar kajjieon̄ in bar ejake katak ko im iminene ko me kar ukōti. Raar kajjieon̄ pukōt eļapļo̧k meram in jetōb, im jet iaer raar kōnono aikuj eo kōn juon kōjepļaaktok an m̧ool. Kijejeto ko aer kar tōlļo̧k n̄an ejake eo an elōn̄ kabun̄ ko.

Tōre en iien in kar tōprak in juon ļapļo̧k in kōmejaja eo kōn anemkwoj in kabun̄, eo ekar kōpeļļo̧k iaļ eo n̄an jepļaaktok eo an m̧ool eo im mālim eo jān Anij.

Rikanaan ro im Rijilōk ro raar kanaan kōn bun̄ jān tōmak eo (lale 2 Tessalonika 2:1–3). Raar barāinwōt kanaan bwe gospel eo im Kabun̄ eo an Jisōs Kraist naaj bar kōjepļaaktok n̄an laļ in (lale Jerbal 3:20–21). Eļan̄n̄e ekar jab kōn bun̄ jān tōmak eo, jepļaaktok eo eban kar aikuji.

Katakin Kōļmenļo̧kjeņ eo: Būn Jān Tōmak eo

Katakin armej ro kōn bun̄ jān tōmak eo ilo juon jon̄ak etipdikdik ejetjet n̄an aikuj ko im bwebwenato eo aer. Jipan̄ er meļeļe kōn aikuj eo n̄an Jepļaaktok eo an gospel eo an Jisōs Kraist.

Men ko Raorōk Kwomaron̄ Katakin

• Elōn̄ wōt armej ro raar kowaan Jisōs Kraist im Rijilōk ro An (lale Matu 24:9; 1 Nipai 11:32–34; 2 Nipai 27:5). Ālkin mej ko an Rijilōk ro, priesthood eo ekar jako jān laļ in. Ekar ejjeļo̧k bar mālim n̄an peptaij ak n̄an tōl Kabun̄ eo.

• Laļ eo an Rom, eo ilo jino in ekar kakkure Rikūrijin ro, tokālik ekar kaorōk Christanity. Kajjitōk ko raorōk an kabun̄ raar ņa mejļaer kōn kōbauwe ilo ko̧o̧njeļ ko ijello̧kin kōn revelesōn jān Anij. Katak eo im kain̄i ko raar kōbauwe kaki im kar ukōti n̄an ļoor tōmak ko an laļ in. Tōmak ko, ak ennaan ko kōn tōmak, raar ejaak pedped ioon jokāālet ko an ro ilo ko̧o̧ņjeļ ko (lale Josep Smith—Bwebwenato 1:39).

• Jet armej raar kajjieon̄ bar ejake Christianity kōn kajim̧we ta eo ekar pād. Ijo ke, kōnke kōn mālim eo an priesthood eo an Anij ekar jab pād ioon laļ in, juon jepļaaktok an mālim eo im m̧ool eo kar aikuj in bar kajutak Kabun̄ eo an Jisōs Kraist.

Ekkatak Jeje ko Rekwojarjar

• 2 Nipai 28

• Matu 24:9–11

• Jerbal 20:28–30

• Galetia 1:6–9

• 2 Tessalonika 2:1–12 (Josep Smith Ukok, eoon ko 2, 3, 7–9)

• 2 Timote 4:3–4

• 2 Piter 2:1–2

• Amos 8:11–12

Katak Eļapļo̧k kōn Pedped in Katak in

• Unin Tōl eo n̄an Jeje Ko Rekwōjarjar: “Maroklep”

• Topical Guide: “Apostasy of the Early Christian Church”

• Gospel Topics: “Apostasy”

Jepļaaktok eo an Gospel eo an Jisōs Kraist kōn Joseph Smith

Visōn eo Kein Kajuon im Kūr eo an Josep Smith āinwōt juon Rikanaan

Ilo buki iiō ko ke tarlep eo an gospel eo an Jisōs Kraist kar jab pād ioon laļ in, Jemedwōj Ilan̄ ekar wōnm̧aanļo̧k wōt in pukōtļo̧k ajri ro Nejin. Jidik kōn jidik, E ekar kōpooj iaļ eo bwe ren maron̄ jeraam̧m̧an bar juon alen kōn tarlep in gospel eo An. Ke jekjek ko raar jetjet, E ekar kūr Josep Smith āinwōt juon rikanaan bwe kōn e gospel eo im Kabun̄ eo an Jisōs Kraist naaj kar jepļaaktok.

Josep Smith ekar jokwe iturōk in United States ilo juon tōre an lim̧otak eļap kōn kabun̄. Ro uwaan baam̧le eo an raar wujlepļo̧k n̄an Anij im kar pukōt m̧ool eo. Elōn̄ kabun̄ ko raar ba epād m̧ool eo ippāer, im Josep ekar kōņaan jeļā ewi wōt eo ekar jim̧we (lale Josep Smith—Bwebwenato 1:18). Baibōļ eo ej katak bwe ewōr “juon Irooj, juon tōmak, juon peptaij” (Epesōs 4:5). Ke Josep ekr etal n̄an kabun̄ ko rooktak jān doon, ekar tarpok kōn ewi wōt n̄an kobaļo̧k. Tokālik ekar ba:

“A jon̄an ļap in kar pok im akwāālel eo ilubwiljin tōmak kein, jon̄an ekar jab maron̄ bwe juon armej ej inono wōt āinwōt kar n̄a … tn̄an itok n̄an juon jem̧ļo̧k kōn wōn ekar jim̧we im wōn ekar bōd. …

“Ilo ioļapļap in tariņae in naan ko im lim̧otak in ļōmņak kein, ekkā aō ba n̄an n̄a make: Ta ej aikuj in kōm̧m̧an? Wōn iaan aolep jar kein rejim̧we; ak, aolepāer wōj im bōd ke? Eļan̄n̄e juon iaer ejim̧we, ewi in iaer, im ewi wāween aō naaj jeļā e?” (Josep Smith—Bwebwenato 1:8, 10).

Āinwōt elōn̄ armej ro, Josep Smith ekar barāinwōt lōn̄ an kajjitōk ko kōn lo̧mo̧o̧r an jetōb eo an. Ekar kōņaan bwe jerawiwi ko an ren jeorļo̧k im erom erreo im̧aan mejān Anij. Ke ekar pukōt m̧ool eo ibwilijin kabun̄ ko rooktak jān doon, ekar riiti ilo Baibōļ: “A eļan̄n̄e jabdewōt iaami ej aikuj mālōtlōt, en kajjitōk kōn e ippān Anij, eo Ej wujlep n̄an amrej otemjej, im jab eņo̧uk kake, im Enaaj leļo̧k n̄an e” (James 1:5).

Kōnke kōn ennaan in, Josep ekar kāālet n̄an kajjitōk ippān Anij ta eo ej aikuj kōm̧m̧ane. Ilo spring in 1820 eo, ekar ilo̧k n̄an juon bukin wōjke epake m̧weo im̧ōn im bukwelōlō im jar. Ewōr emen bwebwenato ko kōn visōn eo me raar waļo̧k, kar rekoote jān Josep Smith ak jān rijeje ro ium̧win tōl eo an, “First Vision Accounts”). Ilo bwebwenato eo kar kean̄ kake āinwōt jeje ko rekwojarjar, ekar kōmeļeļeik en̄jake eo an āinwōt in:

“Iaar lo juon joor in meram ilōn̄ in wōt bōra, eo meram eo an emeram ļo̧k jān al ilo raelep, eo eaar jidik wōt an wanlaļtak m̧ae iien eo ej pād ejjak eō. … Ke meram eo ar pād ioō iaar lo ruo Armej, ro meram im aiboojoj eo aer eaar eļļāļo̧k jān aolep wāween kōmmeļeļe, rej jutak ilōn̄ū ilo mejatoto. Juon iair ear konono n̄ōn iō, ear kir io kin et eo eta, jitonlok eo juon im ba—En̄in Nejū Jiten bōro. Ron̄jake E!” (Josep Smith—Bwebwenato 1:16–17).

Ilo visōn in, Anij Jemen im Nejin, Jisōs Kraist, raar waļokļo̧k n̄an Josep Smith. Rilo̧mo̧o̧r eo ekar jiron̄ e n̄an jab kobaļo̧k ilo jabdewōt kabun̄ ko.

Ilo bwebwenato eo juon kōn visōn in, Josep ekar kwaļo̧k ta eo Rilo̧mo̧o̧r eo ekar barāinwōt jiron̄ e: Lo, N̄a Irooj in aiboojoj. Iaar debwāāl kōn laļ in bwe aolep ro rej tōmak ilo eta maron̄ bōk Mour indeeo.”

Ālkin visōn eo, Josep ekar kejekļo̧kjeņ, “Aō ekar obrak kōn iakwe, im ium̧win elōn̄ raan ko imaron̄ kar m̧ōņōņō kōn lan̄lōn̄ eo eļap im Irooj ekar pād ippa” (Joseph Smith History, circa Summer 1832, 3, josephsmithpapers.org; spelling and punctuation modernized).

Jān visōn in, Josep Smith ekar erom juon rikam̧ool kōn Jisōs Kraist im kar katak m̧ool ko raorōk kōn Doulul in Anij. N̄an waanjon̄ak, ekar katak bwe Jemedwōj Ilan̄ im Jisōs Kraist rej armej ro rejenolo̧k. Ke Er raar kūr e kōn etan, ekar katak bwe Er raar jeļā kajjien make. Ke kar jiron̄ Josep bwe emōj jeorļo̧k an bōd, ekar katak bwe Anij ekar tūriam̧okake. En̄jake in ekar kobrak e kōn lan̄lōn̄.

Āinwōt an kar Anij kōm̧m̧ane n̄an elōn̄ rikanaan ro m̧oktakļo̧k, E ekar kūr Josep Smith n̄an erom juon rikanaan bwe kōn e tarlep in gospel eo ekar jepļaaktok n̄an laļ in. Jepļaaktok n enaaj kar jipan̄ ajri ro nejin Anij lo lan̄lōn̄ ilo laļ in im mour indeeo ilo laļ eo ej itok—aolep kōn Jisōs Kraist.

Kakkilōklōke Josep Smith—Bwebwenato 1:16–17

Kakkilōklōke kōmeļeļe eo an Josep Smith kōn lo Jemen im Nejin (Josep Smith—Bwebwenato 1:16–17). Iien otemjej pojak n̄an kōmeļeļeik Visōn eo Kein Kajuon kōjerbal naan ko make an Josep Smith. Kwaļo̧k juon naan in kam̧ool em̧ool kōn m̧ool ko an im etke ej aorōk n̄an kwe.

Jepļaaktok eo an Priesthood eo im Priesthood Kii ko

Ālkin waļokļo̧k eo an Jemen im Nejin, rikwoj meļan in lan̄ ro jet kar jilkinļo̧k er n̄an Josep Smith im eo m̧ōttan Oliver Cowdery. Jon Peptaij ekar waļokļo̧k āinwōt juon armej jerkakpeje im kar leļo̧k Priesthood eo an Aron im kii ko an n̄an er. Priesthood eo an Aron ekitbuuj mālim eo n̄an peptaij.

Ejjab tok ālkin, Piter, Jemes, im Jon—Jilu iaan Rijilōk ro im̧aan tata an Kraist—kar waļokļo̧k āinwōt armej jerkakpeje ro im kar leļo̧k Priesthood eo an Melkesidek im kii ko an ioon Josep Smith im Oliver Cowdery. Priesthood in ejja āinwōt mālim eo me Kraist ekar leļo̧k n̄an Rijilōk ro An ettol.

Ilo Kirtland Tampeļ, Moses, Elias, im Ilaija raar waļokļo̧k n̄an Josep Smith im Oliver Cowdery im leļo̧k n̄an er eļapļo̧k mālim im priesthood kii ko remenin aikuj n̄an kōttōprak jerbal eo an Anij ilo raan ko āliktata. Moses ekar leļo̧k ki ko an aintok Israel. Elias ekar leļo̧k tōre in iien bōk eddo eo an gospel eo an Ebream. Ilaija ekar leļo̧k ki ko an kajoor in liāp. Lale Katak im Bujen Ko 110:11–16; lale barāinwōt Bok in Bōk Meļeļe Eļap, 3.1.)

Ejake eo an Kabun̄ in

Josep Smith ekar tōl ejake eo an Kabun̄ eo an Jisōs Kraist bar juon alen ion laļ in. Kōn e, Jisōs Kraist ekar kūr jon̄oulruo Rijilōk ro.

Rikanaan ro ilo tōre ko an Baibōļ eo raar kōnono kōn tōre eo me jej mour āinwōt raan eo āliktata ak raan ko āliktata. Ej iien eo em̧ōkaj m̧okta jān Itok eo Kein Karuo an Jisōs Kraist. En̄in ej etke Kabun̄ in ej ņan etan Kabun̄ eo an Jisōs Kraist im Armej ro Rekwojarjar ilo Raan-ko Āliktata (lale Katak im Bujen Ko 115:3–4; lale barāinwōt 3 Nipai 27:3–8).

Rikanaan ro im Rijilōk ro Remour Rainin

Ejja āinwōt an Jisōs kar kūr Rijilōk ro an ilo tōre in jerbal in karejar eo An ilo mour in n̄an tōl Kabun̄ eo An, E ekar kūr Rijilōk ro n̄an tōl e rainin. Būreejtōnji eo Kein Kajuon im Doulul eo an Jon̄oulruo Rijilōk ro rej rikanaan ro, rilolo ro, im ribōk revelesōn ro.

Rijilōk eo wōt eto tata an jerbal ej kūr rikanaan eo kōnke ej tōl ioon aolep Kabun̄ in im kar kōmālimi n̄an kōnono n̄an Irooj. E eo emālim ribōk jikin Josep Smith. E im Rijilōk ro kiiō rej ļoor likļo̧k mālim eo aer n̄an Jisōs Kraist ilo juon korak in kain̄i ko ejjab bōjrak me ekar ijjino ke Josep Smith ekar ekkapit ium̧win pā ko pein rikwōj meļan in lan̄ ro.

Ekkatak Jeje ko Rekwojarjar

• 2 Nipai 3

• 3 Nipai 27:3–8

• Katak im Bujen Ko 27:12–13; 112t:30–32; 115:4

• Josep Smith—Bwebwenato 1:68–72

• Jerbal 3:19–22

• Epesōs 4:5

• Jemes 1:5

Katak Eļapļo̧k kōn Pedped in Katak in

• Unin eo Tōl n̄an Jeje Ko Rekwōjarjar: “Jepļaaktok eo an Gospel eo”

• “Jepļaaktok eo an Tarlep in Gospel eo an Jisōs Kraist: Juon Naan Kean̄ n̄an Laļ in kōn Rūbuki Iiō in Jepļaaktok eo”

• Gospel Topics: “Restoration of the Church,” “Restoration of the Priesthood”

Bok in Mormon: Bar Juon Kallim̧ur kōn Jisōs Kraist

Bok in Mormon ej juon bok in etto an jeje ko rekwojarjarjar āinwōt Baibōļ eo. Baibōļ eo ej juon kam̧ool kōn Jisōs Kraist, im Bok in Mormon ej rikam̧ool eo kein karuo kōn jerbaļ iņ karejar eo An, katak ko An, im mijen eo An āinwōt ad Rilo̧mo̧o̧r.

Josep Smith kar tōlļo̧k e jān juon rikwōj meļan in lan̄ kar etan Moronai n̄an juon bat ijo rekoot in etto eo kar kalbūnin ium̧win buki iiō ko. Ļo̧o̧k in, kar je ioon pilie ko (metal emmeni), kar pād ie jeje ko an rikanaan ro kōn an Anij jerbal ippān jet iaan rijolet in etto ro an Amedka. Josep Smith ekar ukōt ļo̧o̧k in kōn menin letok eo im kajoor eo an Anij.

Rikanaan ro ilo Bok in Mormon raar jeļā kōn mijen eo an Jisōs Kraist im kar katakin gospel eo An. Ālkin an Jisōs kar jerkakpeje, E ekar waļokļo̧k n̄an armej rein im jerbal in karejar eļaptata n̄an er. E ekar katakin er im kajutak Kabun̄ eo An.

Bok in Mormon ej jipan̄ kōj epaakeļo̧k Anij ilo ad katak, meļeļe, im kōjerbal katak ko ie. Rikanaan Josep Smith ekar ba bwe “juon em̧m̧aan [ak kōrā] enaaj epaakeļo̧k Anij kōn mour kōn katak ko an [bok eo], jān jabdewōt bar bok” (Teachings: Joseph Smith, 64).

N̄an jeļā bwe Bok in Mormon ej naan an Anij, jej aikuji riiti, kejekļo̧kjeņ kake, im jar kake. Juon rikanaan ilo Bok in Momron ekar kallim̧ur bwe Anij enaaj kwaļo̧k m̧ool eo an bok eo n̄an kōj ilo ad jar kōn juon bōro em̧ool, kōn lukkuun kōttōpar, im kōn tōmak ilo Kraist (lale Moronai 10:3–5). Ekkatak Bok in Mormon ej aorōk n̄an oktak indeeo.

Ilo ad riiti Bok in Mormon im jar kake, jenaaj katak m̧ool ko kōn Jisōs Kraist me renaaj kōjeraam̧m̧an mour ko ad. Jenaaj barāinwōt itok n̄an jelā bwe Josep Smith ekar juon rikanaan an Anij im bwe gospel eo im Kabun̄ eo an Jisōs Kraist em̧ōj bar kōjepļaaktok kōn e.

“Ij kallim̧ur bwe ilo am̧ lukkuun ekkatak Bok in Mormon eo aolep raan, kwonaaj kōm̧m̧ani jokāālet ko rem̧m̧anļo̧k—aolep raan Ij kallim̧ur bwe ilo am̧ kejo̧kļo̧kjeņ kōn ta eo kwoj ekkatak, wintō ko an lan̄ enaaj peļļo̧k, im kwonaaj bōk uwaak ko n̄an kajjitōk ko am̧ make im tōl eo n̄an mour eo am̧ make. Ij kallim̧ur bwe ilo am̧ leļo̧k eok make aolep raan n̄an Bok in Mormon eo, kwomaron̄ lo kōjparok ņae men ko renana an raan kein” (Russell M. Nelson, “Bok in Mormon eo: Eļan̄n̄e en kar Ejjeļo̧k Elmen Nej Kar Mour eo Am̧? Liaona, Nob. 2017, 62–63).

Katakin Kōļmenļo̧kjeņ ko

Kwaļo̧k Kadkad in Bok in Mormon n̄an Armej ro

N̄e kwaļo̧k kadkad in Bok in Momron n̄an armej ro, kōmeļeļeik bwe ej juon ļo̧o̧k ekwojarjar in an Anij kōnono ippān jet iaan armej ro ilo laļ eo an Amedka elōn̄ļo̧k taujin iiō ko. Jān e jemaron̄ katak eļap bwe ej jerbal n̄an mour ko ad rainin.

Kōmeļeļeik bwe jibadbad eo an Bok in Mormon ej n̄an kareel aolep armej bwe Jisōs ej RiKraist eo (lale taitōļ peij eo). Āinwōt an taitōļ eo ba, bok eo ej “bar juon kallim̧ur kōn Jisōs Kraist.” Kallim̧uri armej ro bwe remaron̄ em̧m̧anļo̧k aer itok n̄an jeļā Rilo̧mo̧o̧r eo aer ilo aer riiti.

N̄e kwoj leļo̧k n̄an armej ro juon kape in Book in Mormon, jiron̄ er kōn kajoor in jetōb eo ekar bōkwaj n̄an mour eo am̧. Kwaļo̧k juon ak ruo eoon ko me eļap meļeļeier n̄an kwe me remaron̄ ļap meļeļeier n̄an er. Ilo ekkatak eo am̧ make im ippān kampānien eo m̧ōttam̧, Jetōb eo enaaj jipan̄ eok lo eoon ko me remaron̄ ļōn̄aj im kōkajoorļo̧k armej ro.

Kōketak armej ro n̄an riit jān Bok in Mormon aolep raan. Ilo aer riiti im kōjerbal katak ko an, renaaj jeraam̧m̧an im en̄jake aer epakeļo̧k Anij.

Bok in Mormon ej Kapen M̧ool eo an Jepļaaktok eo

Kwomaron̄ kōjerbal naan ko āinwōt kein n̄an jipan̄ armej ro meļeļe ekōjkan an Bok in Mormon kapen m̧ool ko an Jepļaaktok eo an gospel eo an Jisōs Kraist.

“Bok in Mormon ej juon wāween an Anij kar kapen n̄an eō m̧ool eo kōn ta eo kōm kar ba. Kwonaaaj ke jouj im riiti pārokūrāāp ko ruo āliktata an kadkad in bok eo?”

Kōmeļeļeik meļeļe eo an kajjojo katak ilo pārokūrāākp ko jim̧or. Kajjitōk ippān ro kwoj katakin n̄an riiti m̧ōttan ko an Bok in Mormon im n̄an kōjerbal pedped in katak ko ilo pārokūrāāp kein. Ilo aer en̄jake jetōb eo im m̧ool eo an Bok in Mormon, remaron̄ itok n̄an jeļā bwe Josep Smith ekar juon rikanaan an Anij.

Ekkatak Jeje ko Rekwojarjar

• Taitōļ peij eo an Bok in Mormon

• Kadkad in Bok in Mormon, pārokūrāāp 1–7

• Moronai 10:4–5

• Katak im Bujen Ko 1:17–23; 20:1–12

• Josep Smith—Bwebwenato 1:27–62

Katak Eļapļo̧k kōn Pedped in Katak in

• Unin Tōl eo n̄an Jeje Ko Rekwōjarjar: “Bok in Mormon”

• Gospel Topics: “Book of Mormon”

Jar kōn jeļā M̧ool eo kōn Jetōb Kwojarjar

Kōnke Anij ej Jemedwōj, E enaaj jipan̄ kōj kile m̧ool eo. Jemaron̄ jeļā bwe ennaan eo an Jepļaaktok an gospel eo an Jisōs Kraist ej m̧ool ilo ad riiti Bok in Mormon im jar n̄an Anij. N̄e jej jar kōn tōmak im lukkuun kōttōpar, E enaj uwaaki kajjitōk ko ad im tōl mour ko ad.

Ekkā an Anij uwaaki jar ko ad kōn Jetōb Kwojarjar eo. Il ad jar, Jetōb Kwojarjar eo ej katakin im kapen m̧ool eo. Kōnono ko jān Jetōb Kwojarjar eo rej kajoor. Ekkā aer itok ilo juon kam̧ool emera kōn en̄jake ko ad, ļōmņak ko, im im̧we ko (lale 1 Kiin̄ Ro 19:11–12; Hilamōn 5:30; Katak im Bujen Ko 8:2).

Ekkatak jeje ko rekwojarjar eo ejjab m̧ūjkōk (eļap tata Bok in Mormon), pād ilo kweilo̧k in kwojkwoj eo wiik otemjeļo̧k, im m̧ool in jar rej jipan̄ kōj en̄jake kajoor eo an Jetōb Kwojarjar im lo m̧ool eo.

Katakin Kōļmenļo̧kjeņ ko

Jar

Āinwōt Josep Smith, elōn̄ armej ro rej kappukōt uwaak ko n̄an kajjitōk ko raorōk im kōn juon ekkejel n̄an Anij. Kwaļo̧k ekōjkan an jar kar jipan̄ eok en̄jake epakeļo̧k Anij. Kwaļo̧k ekōjkan am̧ kar bōk uwaak ko im tōl eo kōn ekkatak im jar.

Kōmeļeļeik bwe jar ej ruo-m̧wen̄an kōnono ippān Anij. Kajjitōk ippān ro kwoj katakin n̄an kajjitōk ippān Anij n̄an jipan̄ im tōl. Kajjitōk ippān armej ro n̄an jar ej juon iaan kūr ko raorōk tata kwomaron̄ leļo̧k. Ilo aer bōk uwaak ko, renaaj itok n̄an jeļā bwe er rej ajri jitōnbōro ro nejin Anij im bwe E enaaj jipan̄ er.

Elōn̄ iaan armej ro kwoj katakin naaj jabwe aer jeļā kōn jar. Ej juon iien em̧m̧an n̄an kwe n̄an jipan̄ er katak jar im bōktok kōjeraam̧m̧anko an jar n̄an mour ko aer. Jar ej wāween eo jej bōk juon kam̧ool kōn m̧ool ko ilo jetōb.

Katakin armej ro bwe jar ekkā an koba m̧ōttan kein:

• Ijjino kōn kile JemedwōjIlan̄.

• Kwaļo̧k en̄jake ko an būruōm̧, eo āinwōt kam̧m̧oolol kōn kōjeraam̧m̧an ko kwar būki.

• Kajjitōk kajjitōk ko, kappukōt tōl, im kajjitōk kōn kōjeraam̧m̧an ko kwoj aikuji.

• Kōjem̧ļo̧ke kōn ba, “Ilo etan Jisōs Kraist, amen.”

Kajjitōk ippān armej ro n̄an jar ilo aer riiti Bok in Mormon n̄an jipan̄ er meļeļe bwe ej naan an Anij im ej kam̧ool kōn Jisōs Kraist.

N̄e katakin armej ro n̄an jar, kōjerbal kajin eo epidodo bwe ren maron̄ barāinwōt kōjerbale n̄e rej jar. Kōkaduki jar kein.

Kajjitōk ippān armej eo kwoj katakin n̄an ba juon jar ilo jem̧ļo̧k in katak eo. Kam̧ool bwe Anij ej ron̄jake im ej uwaake jar ko ad.

Lukkuun Kōttōpar

Riiti kōn lukkuun kōttōpar ej meļeļe in m̧ōņōņō in jerbale katak eo im kobaik n̄an mour raan otemjeļo̧k. Jar kōn lukkuun kōttōpar ej meļeļe in m̧ōņōņō in jerbale uwaak ko jej būki jān Anij.

Ekkatak Jeje ko Rekwojarjar

• Moronai 10:3–5

• Alma 5:45–46

• Katak im Bujen Ko 8:2–3

• Jon 14:26

• Kadkad in Bok in Mormon, pārokūrāāp 8–9

Katak Eļapļo̧k kōn Pedped in Katak in

• Unin Tōl eo n̄an Jeje Ko Rekwōjarjar: “Jar”

• Bible Dictionary: “Prayer”

• Gospel Topics: “Prayer”

Laajrakin in Katak eo Ekadu

Ļoor kōllaajrak eo ej juon jon̄ak kōn ta eo kwomaron̄ katakin juon eļan̄n̄e ewōr wōt jidik am̧ iien. Kōjerbal kōllaajrak in, kāālet juon ak elōn̄ļo̧k pedped in katak ko n̄an katakin. Pedped eo an katak eo n̄an kajjojo pedped in katak ko kar letok im̧aanļo̧k ilo katak eo.

Ilo am̧ katakin, kajjitōk kajjitōk ko im ron̄jake. Leļo̧k kūr ko me renaaj jipan̄ armej ro katak ekōjkan eddōk epakeļo̧k Anij. Juon iaan kūr ko raorōk ej n̄an an armej eo bar ioon kom̧. Aitokan katak eo enaaj pedped ioon kajjitōk ko kwoj kajjitōk im ron̄jake eo kwoj kōm̧m̧ane.

Ta eo Kwomaron̄ Katakin Armej ro ilo 3–10 Minit ko

• Anij ej Jemedwōj Ilan̄, im E eaar kōm̧anm̧an kōj ilo nememein wōt E. E ejeļā kōj kajjojo im ej iakwe kōj. E ej kōņaan kōjeraam̧m̧an kōj kōn aenōm̧m̧an im tarlep in lan̄lōn̄ eo me enaaj pād n̄an Indeeo.

• Jisōs Kraist ej Nejin Anij. Mijen eo An ekar n̄an kōm̧m̧an bwe en pidodo n̄an kōj n̄an erreo jān jerawiwi ko ad, anjo̧ ioon mej, im bōk mour indeeo.

• Anij ej kūr rikanaan ro bwe ren An ribōk jikin ioon laļ in. Etto, E ekar kūr rikanaan ro āinwōt Adam, Noa, Ebream, im Moses. Juon rikanaan emour ej bōk revelesōn jān Anij n̄an katakin im tōl kōj rainin.

• Ilo tōre in jerbal in karejar eo ilo mour in an Jisōs, E ekar kajutak Kabun̄ eo An. Ālkin an Rijilōk ro an Jisōs kar mej, ekar wōr juon ajeded in bun̄ jān tōmak eo jān gosepl eo im Kabun̄ eo an Jisōs Kraist. Armej raar ukōt elōn̄ katak ko an gospel eo im kain̄i ko an priesthtood eo, eo āinwōt peptaij.

• Anij ekar kūr Josep Smith n̄an erom juon rikanaan, ejja āinwōt An kar kūr rikanaan ro ilo tōre ko m̧oktaļo̧k. Jemedwōj Ilan̄ im Jisōs Kraist raar waļokļo̧k n̄an e. Gospel eo an Jisōs Kraist kar kōjepļaaktok kōn e.

• Bok in Mormon ej juon bok in jeje ko rekwojarjar. Āinwōt Baibōļ eo, ej juon kallim̧ur kōn Jisōs Kraist im ej jipan̄ kōj epakeļo̧k Anij ilo ad riiti im kōjerbal katak ko ie. Josep Smith ekar ukōte kōn menin letok im kajoor an Anij.

• Kōn jar em̧ool, jemaron̄ kōnono ippān Anij. Jemaron̄ jeļā bwe ennaan eo an Jepļaaktok eo an gospel eo an Jisōs Kraist ej m̧ool.