Գլուխ 3 Դաս 1

Հիսուս Քրիստոսի ավետարանի վերականգնման ուղերձը

Առաջին Տեսիլքը

Մարդիկ կարող են մտածել

• Արդյո՞ք Աստված գոյություն ունի։

• Ինչպե՞ս կարող եմ ավելի մոտ լինել Աստծուն:

• Ինչպե՞ս կարող եմ ճշմարտությունը սովորել այսօրվա շփոթեցնող աշխարհում:

• Ինչպե՞ս կարող է կրոնն օգնել ինձ:

• Ինչո՞ւ այդքան շատ եկեղեցիներ կան։

• Ինչու՞ ես այդքան շատ մարտահրավերներ ունեմ:

• Ինչպե՞ս կարող եմ խաղաղություն գտնել անհանգիստ ժամանակներում:

• Ես ինչպե՞ս կարող եմ ավելի երջանիկ լինել։

• Ինչպե՞ս կարող է մարգարեն օգնել աշխարհին այսօր:

Աշխարհի ստեղծման պահից Աստված հայտնել է ավետարանն Իր զավակներին մարգարեների միջոցով: Նա դա արել է Իր Որդու՝ Հիսուս Քրիստոսի միջոցով: Հին ժամանակներում Հիսուսը հայտնեց ավետարանն այնպիսի մարգարեներին, ինչպիսիք են Ադամը, Նոյը, Աբրահամը և Մովսեսը: Բայց շատերը մերժեցին այն։

Երկու հազար տարի առաջ Հիսուս Քրիստոսն Ինքն ուսուցանեց Իր ավետարանը և հաստատեց Իր Եկեղեցին: Մարդիկ նույնիսկ Հիսուսին մերժեցին: Նրա մահից անմիջապես հետո տեղի ունեցավ համատարած հեռացում Տիրոջ ճշմարտությունից և Եկեղեցուց: Ավետարանի լրիվությունը և քահանայության իշխանությունն այլևս երկրի վրա չէին:

Դարեր անց Աստված կանչեց մեկ այլ մարգարեի՝ Ջոզեֆ Սմիթին: Աստված նրա միջոցով վերականգնեց ավետարանի լրիվությունը և հանձնարարեց նրան կրկին կազմավորել Հիսուս Քրիստոսի Եկեղեցին:

Երկրի վրա Հիսուս Քրիստոսի ավետարանի լրիվությունն ունենալը մեր օրերի մեծ օրհնություններից մեկն է: Ավետարանն օգնում է մեզ պատասխանել կյանքի ամենաբարդ հարցերին: Ապրող մարգարեները մեզ առաջնորդում են դժվար ժամանակներում: Աստծո քահանայության իշխանությունը կրկին երկրի վրա է՝ Իր զավակներին օրհնելու համար։

միսիոներներն ուսուցանում են ընտանիքին

Առաջարկներ ուսուցման համար

Այս բաժինը տրամադրում է ծրագրի օրինակ, որը կօգնի ձեզ պատրաստվել ուսուցանելու: Այն նաև ներառում է հարցերի և հրավերների օրինակներ, որոնք դուք կարող եք օգտագործել:

Երբ պատրաստվում եք ուսուցանել, աղոթքով մտածեք յուրաքանչյուր անձի իրավիճակի ու հոգևոր կարիքների մասին: Որոշեք, թե որն է առավել օգտակար ուսուցանելու համար: Պատրաստվեք սահմանել եզրույթներ, որոնք մարդիկ կարող են չհասկանալ: Ծրագրեք ըստ ձեր հատկացրած ժամանակի, հիշելով դասերի հակիրճ լինելու մասին:

Ընտրեք սուրբ գրություններ, որոնք ուսուցանելիս օգտագործելու եք: Դասի «Վարդապետական հիմունքներ» բաժինը ներառում է բազմաթիվ օգտակար սուրբ գրությունների հատվածներ:

Մտածեք, թե ինչ հարցեր եք տալիս, երբ ուսուցանում եք: Ծրագրեք հրավերներ, որոնք կխրախուսեն յուրաքանչյուր անձի գործել:

Շեշտեք Աստծո խոստացած օրհնությունները և կիսվեք ձեր վկայությամբ այն մասին, ինչ ուսուցանում եք:

Ինչ կարող եք ուսուցանել մարդկանց 15–25 րոպեում

Ուսուցանելու համար ընտրեք հետևյալ սկզբունքներից մեկը կամ մի քանիսը։ Յուրաքանչյուր սկզբունքի վարդապետական հիմունքները տրված են այս համառոտ շարադրանքից հետո:

Աստված մեր սիրող Երկնային Հայրն է

• Աստված մեր երկնային Հայրն է, և մենք Նրա զավակներն ենք: Նա ստեղծեց մեզ Իր պատկերով:

• Աստված ճանաչում է մեզ անձամբ և սիրում է մեզ:

• Աստված ունի մսից ու ոսկորներից կազմված կատարյալ, փառավորված մարմին:

• Աստված ցանկանում է օրհնել մեզ խաղաղությամբ և ուրախության լիությամբ, որոնք կտևեն հավերժ:

• Քանի որ Աստված սիրում է մեզ, Նա ուղարկեց Իր Որդուն՝ Հիսուս Քրիստոսին, որ փրկագնի մեզ մեղքից և մահից:

Աստված մարգարեների միջոցով բացահայտում է Ավետարանը յուրաքանչյուր տնտեսության մեջ

• Աստված կանչում է մարգարեներին՝ լինելու Իր ներկայացուցիչները երկրի վրա:

• Հին ժամանակներում Աստված կանչել է այնպիսի մարգարեների, ինչպիսիք են Ադամը, Նոյը, Աբրահամը և Մովսեսը:

• Ապրող մարգարեն հայտնություն ստացավ Աստծուց՝ ուսուցանելու և առաջնորդելու մեզ այսօր:

Հիսուս Քրիստոսի երկրային ծառայությունը և Քավությունը

• Հիսուս Քրիստոսն Աստծո Որդին է։

• Իր երկրային ծառայության ընթացքում Հիսուսն ուսուցանեց Իր ավետարանը և հաստատեց Իր Եկեղեցին:

• Հիսուսը կանչեց Տասներկու Առաքյալներին և նրանց իշխանություն տվեց առաջնորդելու Իր Եկեղեցին:

• Իր կյանքի վերջում Գեթսեմանիի այգում Հիսուսը Խաչելության ժամանակ Իր տառապանքով քավեց մեր մեղքերերը: Հիսուսի մահից հետո Նա հարություն առավ։

• Հիսուսի քավիչ զոհաբերության շնորհիվ մենք կարող ենք ներվել և մաքրվել մեր մեղքերից, երբ ապաշխարենք: Սա մեզ խաղաղություն է պարգևում և հնարավորություն է տալիս մեզ վերադառնալ դեպի Աստծո ներկայություն և ստանալ ուրախության լիություն:

• Հիսուսի Հարության շնորհիվ մենք բոլորս հարություն կառնենք մահից հետո: Սա նշանակում է, որ յուրաքանչյուր մարդու հոգին և մարմինը կվերամիավորվեն և կապրեն հավերժ:

Անկում

• Հիսուսի Առաքյալների մահից հետո տեղի ունեցավ համատարած հեռացում Հիսուս Քրիստոսի ավետարանից և եկեղեցուց:

• Այս ընթացքում մարդիկ փոխեցին ավետարանի շատ ուսմունքներ: Մարդիկ փոխեցին նաև քահանայության արարողությունները, օրինակ՝ մկրտությունը: Քահանայության իշխանությունը և Եկեղեցին, որը հաստատել էր Հիսուսը, այլևս երկրի վրա չէին:

Հիսուս Քրիստոսի ավետարանի վերականգնումը Ջոզեֆ Սմիթի միջոցով

• Ջոզեֆ Սմիթը ձգտում էր իմանալ, թե որ եկեղեցին է Աստծո ճշմարիտ Եկեղեցին, որպեսզի կարողանա միանալ դրան: Երկնային Հայրը և Հիսուս Քրիստոսը հայտնվեցին նրան 1820 թվականին: Այս իրադարձությունը կոչվում է Առաջին Տեսիլք:

• Աստված կանչեց Ջոզեֆ Սմիթին որպես մարգարե, ինչպես որ նա մարգարեներ էր կանչել ավելի վաղ ժամանակներում:

• Հիսուս Քրիստոսի ավետարանը վերականգնվել է Ջոզեֆ Սմիթի միջոցով:

• Այլ երկնային սուրհանդակներ վերականգնեցին քահանայությունը, և Ջոզեֆը լիազորված էր կազմավորելու Հիսուս Քրիստոսի Եկեղեցին:

• Հիսուս Քրիստոսն այսօր շարունակում է առաջնորդել է Իր Եկեղեցին ապրող մարգարեների ու առաքյալների միջոցով:

Մորմոնի Գիրքը. Եվս մեկ վկայություն Հիսուս Քրիստոսի մասին

• Մորմոնի Գիրքը սուրբ գրությունների հատոր է, որը գրվել է հին ժամանակներում Ամերիկա մայրցամաքի մարգարեների կողմից: Ջոզեֆ Սմիթը թարգմանեց այն Աստծո պարգևով և զորությամբ:

• Աստվածաշնչի հետ միասին Մորմոնի Գիրքը վկայում է Հիսուսի ծառայության, ուսմունքների և որպես մեր Փրկիչ Նրա առաքելության մասին:

• Մենք կարող ենք ավելի մոտենալ Աստծուն՝ կարդալով Մորմոնի Գիրքը և ապրելով ըստ դրա ցուցումների:

• Մենք կարող ենք իմանալ, որ Մորմոնի Գիրքն Աստծո խոսքն է՝ կարդալով այն, խորհելով դրա մասին և աղոթելով դրա մասին: Այս գործընթացը նաև կօգնի մեզ հասկանալ, որ Ջոզեֆ Սմիթը մարգարե էր:

Աղոթեք՝ Սուրբ Հոգու միջոցով ճշմարտությունն իմանալու համար

• Աղոթքը երկկողմանի շփում է Աստծո և Նրա զավակների միջև:

• Անկեղծ աղոթքի միջոցով մենք կարող ենք իմանալ, որ Հիսուս Քրիստոսի ավետարանի Վերականգնման ուղերձը ճշմարիտ է:

• Երբ մենք աղոթում ենք, Սուրբ Հոգին ուսուցանում և հաստատում է մեզ ճշմարտությունը։

միսիոներներն ուսուցանում են երիտասարդ տղամարդկանց

Հարցեր, որոնք կարող եք տալ մարդկանց

Հետևյալ հարցերն օրինակներ են, թե ինչ կարող եք հարցնել մարդկանց: Այս հարցերը կարող են օգնել ձեզ բովանդակալից զրույցներ վարել և հասկանալ մարդու կարիքներն ու տեսակետը:

• Ի՞նչին եք հավատում Աստծո վերաբերյալ:

• Ինչպե՞ս կօգներ ձեզ Աստծուն ավելի մոտ լինելը:

• Ի՞նչ գիտեք Հիսուս Քրիստոսի մասին։ Ինչպե՞ս է նրա կյանքն ու ուսմունքներն ազդել ձեզ վրա։

• Ինչպե՞ս եք հուսալի պատասխաններ գտնում այսօրվա շփոթեցնող աշխարհում:

• Ինչպե՞ս կօգներ ձեզ իմանալն այն, որ այսօր երկրի վրա կա ապրող մարգարե:

• Լսե՞լ եք Մորմոնի Գրքի մասին: Կարո՞ղ ենք կիսվել, թե ինչու է դա կարևոր:

• Կկիսվե՞ք աղոթքի վերաբերյալ ձեր համոզմունքներով: Կարո՞ղ ենք կիսվել աղոթքի վերաբերյալ մեր համոզմունքներով:

Հրավերներ, որոնք կարող եք ուղղել

• Կխնդրե՞ք Աստծուն աղոթքով օգնել ձեզ իմանալ, որ այն, ինչ մենք ուսուցանում ենք, ճշմարիտ է: (Տես «Ուսուցման գաղափարներ. Աղոթք»՝ այս դասի վերջում):

• Այս կիրակի եկեղեցի կհաճախե՞ք՝ ավելին իմանալու մեր ուսուցանածի մասին:

• Կկարդա՞ք Մորմոնի Գիրքը և կաղոթե՞ք՝ իմանալու համար, որ դա Աստծո խոսքն է: (Դուք կարող եք առաջարկել որոշակի գլուխներ կամ հատվածներ):

• Կհետևե՞ք Հիսուսի օրինակին և կմկրտվե՞ք։ (Տես «Մկրտվելու և հաստատվելու հրավեր», որն անմիջապես նախորդում է այս դասին)։

• Կարո՞ղ ենք մեր հաջորդ այցի համար ժամանակ սահմանել:

Վարդապետական հիմունքներ

Այս բաժինը տրամադրում է վարդապետություն և սուրբ գրություններ, որոնք դուք պետք է ուսումնասիրեք, որպեսզի ամրապնդեք ձեր գիտելիքներն ու վկայությունն ավետարանի մասին և որը կօգնի ձեզ ուսուցանել:

ընտանիք

Աստված մեր սիրող Երկնային Հայրն է

Աստված մեր երկնային Հայրն է, և մենք Նրա զավակներն ենք: Նա ստեղծեց մեզ Իր պատկերով: Նա ունի փառավորված, կատարյալ «մսից ու ոսկորից մարմին, այնպես շոշափելի, ինչպես մարդունը» (Վարդապետություն և Ուխտեր 130.22):

Աստված մեզ անձամբ ճանաչում է, և Նա սիրում է մեզ ավելին, քան մենք կարող ենք հասկանալ: Նա հասկանում է մեր փորձությունները, վշտերը և թուլությունները և Իր աջակցությունն է առաջարկում մեզ դրանցում: Նա ուրախանում է մեր առաջընթացով և կօգնի մեզ ճիշտ ընտրություն կատարել: Նա ցանկանում է խոսել մեզ հետ, և մենք կարող ենք խոսել Նրա հետ աղոթքի միջոցով:

Աստված մեզ տվել է այս փորձառությունը երկրի վրա, որպեսզի մենք կարողանանք սովորել, աճել և ավելի նմանվել Նրան: Կատարյալ սիրով Նա ցանկանում է, որ մենք մահից հետո վերադառնանք Իր մոտ: Այնուամենայնիվ, մենք չենք կարող դա անել ինքնուրույն: Քանի որ Աստված սիրում է մեզ, Նա ուղարկեց Իր Որդուն՝ Հիսուս Քրիստոսին, որ փրկագնի մեզ: «Որովհետև Աստված այնպես սիրեց աշխարհը, որ իր միածին Որդուն տվեց, … որպեսզի նրա միջոցով աշխարհը փրկվի» (Հովհաննես 3.16–17):

Աստված ցանկանում է օրհնել մեզ խաղաղությամբ և ուրախության լիությամբ, որոնք կտևեն հավերժ: Նա ծրագիր է տրամադրել, որը մեզ հնարավորություն է տալիս ստանալու այս օրհնությունները: Այս ծրագիրը կոչվում է փրկության ծրագիր (տես դաս 2):

Համոզմունք Աստծո մասին

Իմացեք, թե ինչ է հավատում Աստծո վերաբերյալ այն անձը, ում դուք ուսուցանում եք: Մարդկանց մեծ մասը հավատում է ինչ-որ Գերագույն Էակի, թեև Աստվածության մասին շատ ընկալումներ կան: Այնուամենայնիվ, շատ մարդիկ Աստծու մասին պատկերացում չունեն:

Մորմոնի Գրքի երկու միսիոներներ՝ Ամմոնը և Ահարոնը, ուսուցանեցին քրիստոնեական ծագում չունեցող մարդկանց: Նրանք ուսուցանում էին պարզ ճշմարտություններ և մարդկանց առաջարկում աղոթել: Արդյունքում Լամոնին և նրա հայրը դարձի եկան: Ուսումնասիրեք Ալմա 18.24–40 և 22.4–23։ Այնուհետև պատասխանեք ստորև տրվող հարցերին․

• Ի՞նչ ուսուցանեցին այս միսիոներներն աստծո էության վերաբերյալ:

• Ինչպե՞ս կարող եք հետևել նրանց օրինակներին։

Լրացուցիչ տեղեկությունների համար տես «Ուսուցանել քրիստոնեական ծագում չունեցող մարդկանց» գլուխ 10-ում։

Սուրբ գրությունների ուսումնասիրություն

• 1 Նեփի 17․36

• Մոսիա 4.9

• 3 Նեփի 14․9–11

• Վարդապետություն և Ուխտեր 93․29, 130․22

• Մովսես 1.39

• Աբրահամ 3.25

• Գործք Առաքելոց 17․27–29

• Հռովմեացիս 8․16

• Եբրայեցիս 12.9

• Ծննդոց 1.26–27

Իմացեք ավելին այս սկզբունքի մասին

• Սուրբ գրքերի ուղեցույց. «Երկնային Հայր», «Աստված, Աստվածագլուխ»

• Ավետարանական թեմաներ՝ «Հայր Աստված»

Մովսեսը և տախտակները, Ջերի Հարսթոն

Աստված մարգարեների միջոցով բացահայտում է Ավետարանը յուրաքանչյուր տնտեսության մեջ

Մարգարեներն աստծո ներկայացուցիչներն են երկրի վրա

Կարևոր եղանակներից մեկը, որով Աստված ցույց է տալիս Իր սերը մեր հանդեպ, մարգարեներ կանչելն է, նրանց քահանայության իշխանություն տալը և ոգեշնչելը նրանց խոսել Իր անունից: Մարգարեներն աստծո ներկայացուցիչներն են երկրի վրա։ Հին Կտակարանի մարգարե Ամովսն արձանագրել է, որ «Որովհետև Տեր Աստված ոչինչ չի անի, մինչև որ իր խորհուրդը չհայտնի իր ծառաներին՝ մարգարեներին» (Ամովս 3․7)։ Որոշ օրհնություններ, որոնք մենք ստանում ենք ապրող մարգարեներից, ներկայացված են ստորև:

Հիսուս Քրիստոսի վկաներ։ Մարգարեները Հիսուս Քրիստոսի հատուկ վկաներն են, որոնք վկայում են Նրա՝ որպես մեր Փրկիչ և Քավիչ լինելու մասին:

Ուսմունքներ։ Մարգարեներն Աստծուց ուղղորդում են ստանում, որպեսզի օգնեն մեզ տարբերել ճիշտը սխալից: Նրանք ուսուցանում են մեզ հնազանդվել Աստծո պատվիրաններին և ապաշխարել, երբ թերանում ենք: Նրանք նախազգուշացնում են մեղքից և դրա հետևանքներից:

Մարգարեների ուսմունքները մոտեցնում են մեզ Աստծուն և օգնում մեզ ստանալ օրհնությունները, որոնք Նա ցանկանում է մեզ համար: Տիրոջ մարգարեների միջոցով տրված խոսքին հետևելը մեր ամենամեծ ապահովությունն է:

Քահանայության Իշխանություն։ Ներկայիս մարգարեն նախագահող քահանայություն կրողն է երկրի վրա։ Քահանայությունն Աստծո իշխանությունն ու զորությունն է: Մարգարեն իշխանություն ունի խոսելու և գործելու Աստծո անունով՝ Իր զավակների փրկության համար:

Եկեղեցու ղեկավարում Հիսուս Քրիստոսի Եկեղեցին կառուցված է մարգարեների և առաքյալների հիմքի վրա (տես Եփեսացիս 2.19–20, 4.11–14):

Մարգարեները հին ժամանակներում

Ադամն առաջին մարգարեն էր երկրի վրա: Աստված հայտնեց նրան Հիսուս Քրիստոսի ավետարանը և նրան քահանայության իշխանություն տվեց: Ադամն ու Եվան ուսուցանեցին իրենց երեխաներին այս ճշմարտությունները և խրախուսեցին նրանց զարգացնել հավատքը և ապրել ավետարանով:

Ի վերջո, Ադամի և Եվայի սերունդներն ապստամբեցին և հեռացան ավետարանից: Դա հանգեցրեց մի վիճակի, որը կոչվում էր ուրացություն կամ հեռացում։ Երբ համատարած ուրացություն է տեղի ունենում, Աստված հեռացնում է Իր քահանայության իշխանությունը, որն անհրաժեշտ է ավետարանի արարողություններն ուսուցանելու և սպասավորելու համար:

Հին Կտակարանը նկարագրում է համատարած ուրացության բազմաթիվ դեպքեր: Այս ժամանակաշրջաններին վերջ դնելու համար Աստված օգնության ձեռք մեկնեց Իր զավակներին՝ կանչելով մեկ այլ մարգարեի: Նա ավետարանի ճշմարտությունները նորովի հայտնեց այս մարգարեներին և նրանց քահանայության իշխանություն տվեց: Այս մարգարեներից ոմանք էին Նոյը, Աբրահամը և Մովսեսը: Ցավոք, ժամանակի ընթացքում մարդիկ ի վերջո կրկին մերժեցին մարգարեներին և հեռացան:

Ուսուցման գաղափարներ

Մարգարեներ

Իմացեք, թե ինչ է հասկանում մարգարեների վերաբերյալ այն անձը, ում դուք ուսուցանում եք: Մարդիկ մշակույթների մեծ մասում հավատում են, որ սուրբ կամ ոգեշնչված մարդիկ Աստվածությունից առաջնորդություն և ուղղություն են ստանում: Այնուամենայնիվ, ոչ բոլոր ներշնչված անհատներն են Աստծո մարգարեներ:

Բացատրեք, որ անգամ համատարած ուրացությունից հետո Աստված վերականգնում էր ավետարանը մարգարեի միջոցով: Նա քահանայության իշխանություն տվեց այդ մարգարեին։ Մարգարեն օգնեց մարդկանց հասկանալ իրենց հարաբերություններն Աստծո հետ, ներառյալ այն, թե ինչպես հավերժական կյանք ստանալ Հիսուս Քրիստոսի ավետարանի միջոցով:

Տնտեսություններ

Հիսուս Քրիստոսի ավետարանի տնտեսությունը մի ժամանակահատված է, երբ երկրի վրա կա Տիրոջ առնվազն մեկ լիազորված ծառա, ով կրում է քահանայության բանալիները: Երկնային Հոր փրկության ծրագիրը նորովի է բացահայտվել յուրաքանչյուր տնտեսության ժամանակ:

Գոյություն են ունեցել ավետարանական բազմաթիվ տնտեսություններ: Ադամը, Ենովքը, Նոյը, Աբրահամը, Մովսեսը, Հիսուս Քրիստոսը, Ջոզեֆ Սմիթը և ուրիշները ղեկավարել են տնտեսություն: Ջոզեֆ Սմիթով սկսված տնտեսությունը հայտնի է որպես «ժամանակների լրիվության տնտեսություն» (Եփեսացիս 1.10): Տես Bible Dictionary, «Տնտեսություն» և Սուրբ գրությունների ուղեցույց, «Տնտեսություն»։

Սուրբ գրությունների ուսումնասիրություն

• Հակոբ 4․4, 6

• Մոսիա 8․13–18

• Վարդապետություն և Ուխտեր 1.37–38

• Ղուկաս 1․68–70

• Գործք Առաքելոց 10․34–43

• Եփեսացիս 4.11–14

• Ամովս 3.7

Իմացեք ավելին այս սկզբունքի մասին

• Սուրբ գրությունների ուղեցույց․ «Մարգարե»։

• Ավետարանական թեմաներ․ «Մարգարեներ», «Եկեղեցու վերականգնում»

Ով Իմ Հայր, Սայմոն Դյուվեյ

Հիսուս Քրիստոսի երկրային ծառայությունը և Քավությունը

Հիսուս Քրիստոսն Աստծո Որդին է։ Մեզ համար Աստծո ծրագրում Հիսուսը և Նրա Քավությունն առանցքային են: Նրա Քավությունը ներառում էր Նրա տառապանքը Գեթսեմանիի պարտեզում, Նրա տառապանքն ու մահը խաչի վրա և Նրա Հարությունը:

Ադամի և Եվայի ժամանակներից մարդիկ անհամբեր սպասում էին Հիսուս Քրիստոսի գալուստին՝ որպես իրենց Փրկիչ և Քավիչ: Երկնային Հայրը Հիսուսին երկիր ուղարկեց ավելի քան 2000 տարի առաջ:

Հիսուսն ապրեց կատարյալ, անմեղ կյանքով: Նա ուսուցանեց Իր ավետարանը և հաստատեց Իր Եկեղեցին: Նա կանչեց տասներկու Առաքյալների և նրանց քահանայության իշխանություն տվեց ուսուցանելու և կատարելու սրբազան արարողություններ, ինչպիսին է մկրտությունը: Նա նաև իշխանություն տվեց նրանց առաջնորդելու Իր Եկեղեցին:

Իր կյանքի վերջում Գեթսեմանիում Հիսուսը Խաչելության ժամանակ Իր տառապանքով քավեց մեր մեղքերերը: Հիսուսի քավիչ զոհաբերության շնորհիվ մենք կարող ենք մաքրվել մեր մեղքերից, երբ ապաշխարենք։ Սա հնարավորություն է տալիս մեզ վերադառնալ դեպի Աստծո ներկայություն և ստանալ ուրախության լիություն:

Հիսուսի խաչվելուց հետո Նա հարություն առավ՝ Երկնային Հոր զորությամբ հաղթանակ տանելով մահվան նկատմամբ: Հիսուսի Հարության շնորհիվ մենք բոլորս հարություն կառնենք մահից հետո: Սա նշանակում է, որ յուրաքանչյուր մարդու հոգին և մարմինը նորից կմիավորվեն, և մեզանից յուրաքանչյուրը հավերժ կապրի կատարյալ, հարություն առած մարմնում: (Տես «Հիսուս Քրիստոսի Քավությունը» դաս 2-ում)։

Մարգարե Ջոզեֆ Սմիթ

Մարգարե Ջոզեֆ Սմիթն ուսուցանել է․ «Մեր կրոնի հիմնական սկզբունքներն են Առաքյալների և Մարգարեների վկայությունը Հիսուս Քրիստոսի մասին, որ Նա մահացավ, թաղվեց և բարձրացավ երրորդ օրը և համբարձվեց երկինք, իսկ բոլոր մյուս բաները, որոնք կապված են մեր կրոնի հետ, միայն դրա հավելումներն են» (Teachings of Presidents of the Church: Joseph Smith [2007], 49)։

Սուրբ գրությունների ուսումնասիրություն

• 2 Նեփի 2․6–8, 9․1–24, 31

• Ալմա 7․11–13, 11․40, 34․8–10

• 3 Նեփի 11․31–41, 27․1–22

• Վարդապետություն և Ուխտեր 19․15–19, 45․3–5

• Հովհաննես 3.16–17

• Ա Կորնթացիս 15․1–4, 20–22

• Ա Հովհաննես 1․7

Իմացեք ավելին այս սկզբունքի մասին

• Սուրբ գրությունների ուղեցույց. «Հիսուս Քրիստոս», «Քավել, Քավություն»

• Bible Dictionary, “Քավություն»։

• Ավետարանական թեմաներ․ «Հիսուս Քրիստոս», Հիսուս Քրիստոսի Քավությունը»

Անկում

Հիսուս Քրիստոսի մահից հետո Նրա Առաքյալները ձգտում էին անարատ պահել Քրիստոսի վարդապետությունը և կարգուկանոն պահպանել Եկեղեցում: Այնուամենայնիվ, Եկեղեցու շատ անդամներ հեռացան Առաքյալներից և Հիսուսի ուսուցանած վարդապետությունից:

Առաքյալների մահից հետո տեղի ունեցավ համատարած հեռացում Հիսուս Քրիստոսի ավետարանից և եկեղեցուց: Այս հեռացումը երբեմն կոչվում է Մեծ ուրացություն: Դրա պատճառով Աստված հեռացրեց քահանայության իշխանությունը երկրից: Այս կորուստը ներառում էր Եկեղեցին առաջնորդելու համար անհրաժեշտ իշխանությունը: Արդյունքում Հիսուսի հիմնած Եկեղեցին այլևս երկրի վրա չէր:

Այս ընթացքում մարդիկ փոխեցին ավետարանի շատ ուսմունքներ: Երկնային Հոր, Հիսուս Քրիստոսի և Սուրբ Հոգու ճշմարիտ էության մասին գիտելիքների մեծ մասն աղավաղվել կամ կորել է: Մարդիկ փոխեցին նաև քահանայության արարողությունները, օրինակ՝ մկրտությունը:

Դարեր անց ճշմարտությունը փնտրող տղամարդիկ և կանայք փորձեցին բարեփոխել փոխված ուսմունքներն ու սովորույթները: Նրանք ավելի մեծ հոգևոր լույս էին փնտրում, և նրանցից ոմանք խոսում էին ճշմարտության վերականգնման անհրաժեշտության մասին: Նրանց ջանքերը հանգեցրին բազմաթիվ եկեղեցիների կազմավորմանը:

Այս ժամանակահատվածում կրոնական ազատության վրա եղած մեծ շեշտադրումը ճանապարհ հարթեց Աստծու կողմից ճշմարտության և իշխանության վերականգնման համար։

Մարգարեներն ու առաքյալները կանխագուշակել էին հեռացումը (տես Բ Թեսաղոնիկեցիս 2.1–3): Նրանք նաև կանխագուշակել էին, որ Հիսուս Քրիստոսի ավետարանը և Եկեղեցին կվերականգնվեն երկրի վրա (տես Գործք Առաքելոց 3.20–21): Եթե չլիներ հեռացում, չէր լինի նաև վերականգնման կարիք։

Ուսուցման գաղափարներ. Հեռացում

Մանրամասն ուսուցանեք մարդկանց հեռացման մասին այնպես, որը համապատասխանում է նրանց ծագմանն ու կարիքներին: Օգնեք նրանց հասկանալ Հիսուս Քրիստոսի ավետարանի Վերականգնման անհրաժեշտությունը:

Հիմնական կետերը, որոնք դուք կարող եք ուսուցանել

• Մարդկանց մեծ մասը մերժեց Հիսուս Քրիստոսին և Նրա Առաքյալներին (տես Մատթեոս 24.9, 1 Նեփի 11.32–34, 2 Նեփի 27.5): Առաքյալների մահից հետո քահանայությունը կորսվեց երկրից: Մկրտելու կամ Եկեղեցին առաջնորդելու իշխանություն այլևս չկար:

• Հռոմեական կայսրությունը, որը սկզբում հալածում էր քրիստոնյաներին, հետագայում ընդունեց քրիստոնեությունը։ Կարևոր կրոնական հարցերը հաստատվում էին խորհուրդներում բանավեճով, այլ ոչ թե Աստծո հայտնությամբ: Վարդապետությունն ու արարողությունները քննարկվեցին և փոխվեցին աշխարհիկ փիլիսոփայություններին համապատասխանելու համար: Հավատքի խորհրդանիշները կամ դրույթները ստեղծվել են այս խորհուրդների որոշումների հիման վրա (տես Ջոզեֆ Սմիթ—Պատմություն 1.19):

• Որոշ մարդիկ փորձեցին բարեփոխել քրիստոնեությունը՝ ուղղելով այն, ինչ արդեն գոյություն ուներ: Այնուամենայնիվ, քանի որ Աստծո քահանայության իշխանությունը երկրի վրա չէր, անհրաժեշտ էր իշխանության և ճշմարտության վերականգնում Հիսուս Քրիստոսի Եկեղեցին վերահաստատելու համար:

Սուրբ գրությունների ուսումնասիրություն

• 2 Նեփի 28

• Մատթեոս 24․9–11

• Գործք Առաքելոց 20․28–30

• Գաղատացիս 1․6–9

• Բ Թեսաղոնիկեցիս 2.1–12 (Ջոզեֆ Սմիթի Թարգմանություն, հատվածներ 2, 3, 7–9)

• Բ Տիմոթեոս 4․3–4

• Բ Պետրոս 2.1–2

• Ամովս 8.11–12

Իմացեք ավելին այս սկզբունքի մասին

• Սուրբ գրությունների ուղեցույց․ «Ուրացություն»

• Թեմաների ուղեցույց․ «Վաղ քրիստոնեական եկեղեցու ուրացությունը»

• Ավետարանական թեմաներ, «Ուրացություն»

Հիսուս Քրիստոսի ավետարանի վերականգնումը Ջոզեֆ Սմիթի միջոցով

Առաջին տեսիլքը և Ջոզեֆ Սմիթի մարգարեական կոչումը

Դարեր շարունակ, երբ Հիսուս Քրիստոսի ավետարանի լրիվությունը երկրի վրա չէր, Երկնային Հայրը շարունակում էր օգնության ձեռք մեկնել Իր զավակներին: Ժամանակի ընթացքում Նա ճանապարհ հարթեց, որպեսզի նրանք կարողանան կրկին օրհնվել Իր ավետարանի լրիվությամբ: Օգտագործելով հարմար պահը, Նա կանչեց Ջոզեֆ Սմիթին որպես մարգարե, որի միջոցով պետք է վերականգնվեին ավետարանը և Հիսուս Քրիստոսի Եկեղեցին:

Ջոզեֆ Սմիթն ապրում էր Միացյալ Նահանգների արևելքում կրոնական մեծ ոգևորության ժամանակ: Նրա ընտանիքի անդամները նվիրված էին Աստծուն և ճշմարտություն էին փնտրում: Շատ եկեղեցիներ պնդում էին, որ ունեն ճշմարտությունը, և Ջոզեֆը ցանկանում էր իմանալ, թե դրանցից որն է ճիշտ (տես Ջոզեֆ Սմիթ-Պատմություն 1.18): Աստվածաշունչն ուսուցանում է, որ կա «մեկ Տեր, մեկ հավատք, մեկ մկրտություն» (Եփեսացիս 4.5): Քանի որ Ջոզեֆը հաճախում էր տարբեր եկեղեցիներ, նա շփոթված էր և չգիտեր թե որ մեկին միանար: Ապա նա ասաց.

«Այնքան մեծ էին տարբեր դավանանքների միջև եղած տարաձայնություններն ու վիճաբանությունները, որ … այնպիսի մի երիտասարդի համար, ինչպիսին ես էի, անհնար էր որոշակի եզրակացության գալ, թե ով է ճիշտ, և ով է սխալ։ …

Խոսքերի պատերազմի և տարաձայնությունների այդ աղմուկի մեջ, ես հաճախ ինքս ինձ հարց էի տալիս. Ի՞նչ անել: Այս բոլոր խմբակցություններից ո՞րն է ճիշտ. կամ, միգուցե նրանք բոլորը սխա՞լ են: Եթե դրանցից որևէ մեկը ճիշտ է, ապա ո՞րն է այն, և ի՞նչպես կարող եմ դա իմանալ»: (Ջոզեֆ Սմիթ—Պատմություն 1․8, 10)։

Շատ մարդկանց նման, Ջոզեֆ Սմիթը նույնպես հարցեր ուներ իր հոգու փրկության վերաբերյալ: Նա ցանկանում էր, որպեսզի ներվեին իր մեղքերը և նա մաքուր լինել Աստծո առաջ: Տարբեր եկեղեցիներում ճշմարտությունը փնտրելիս նա կարդաց Աստվածաշնչում. «Եթե ձեզանից որևէ մեկն իմաստության պակաս ունի թող խնդրի Աստծուն, ով բոլորին տալիս է առատորեն և չի նախատում, և կտրվի նրան» (Հակոբոս 1․5)։

Այս հատվածի պատճառով Ջոզեֆը որոշեց հարցնել Աստծուն, թե ինքն ինչ պետք է անի: 1820 թվականի գարնանը նա գնաց իր տան մոտ գտնվող ծառերի պուրակը և ծնկի իջավ աղոթելու: Գոյություն ունի հաջորդ տեսիլքի վերաբերյալ չորս պատմություն, որոնք արձանագրվել են Ջոզեֆ Սմիթի կամ նրա ղեկավարության տակ գտնվող դպիրների կողմից (տես Ավետարանական թեմաների ակնարկները, «Առաջին տեսիլքի պատմություններ»): Կանոնական սուրբ գրություն համարվող պատմության մեջ նա նկարագրեց իր փորձառությունը հետևյալ կերպ.

Առաջին տեսիլքը, Լինդա Քրիսչենսեն և Մայքլ Մալմ

«Ես տեսա արևի պայծառությունը գերազանցող լույսի մի սյուն, որն աստիճանաբար իջնում էր ցած, մինչև որ ընկավ ինձ վրա: … Երբ լույսը հանգչեց ինձ վրա, ես տեսա երկու Անձնավորություն, ինձանից վեր՝ օդի մեջ կանգնած, որոնց պայծառությունն ու փառքն ամեն նկարագրությունից վեր էր: Նրանցից մեկը խոսեց ինձ հետ, դիմելով ինձ անունով և ասաց՝ մատնացույց անելով մյուսին. Սա է Իմ Սիրելի Որդին: Լսիր Նրան»։ (Ջոզեֆ Սմիթ—Պատմություն 1.16–17):

Այս տեսիլքում Հայր Աստվածը և Նրա Որդին՝ Հիսուս Քրիստոսը, հայտնվեցին Ջոզեֆ Սմիթին: Փրկիչը նրան ասաց, որ նա չպետք է միանա եկեղեցիներից որևէ մեկին:

Այս տեսիլքի մեկ այլ պատմության մեջ Ջոզեֆը կիսվեց, որ Փրկիչն ասաց իրեն նաև. «Քո մեղքերը ներված են քեզ: … Ահա, ես եմ փառավոր Աստվածը: Ես խաչվեցի աշխարհի համար, որպեսզի բոլոր նրանք, ովքեր հավատում են իմ անվանը, կարողանան ունենալ հավերժական կյանք»:

Տեսիլքից հետո Ջոզեֆը խորհում էր. «Իմ հոգին լցվեց սիրով, և երկար ժամանակ ես շատ ուրախ էի, և Տերն ինձ հետ էր» (Պատմություն, մոտավորապես 1832 թվականի ամառ, 3, josephsmithpapers.org, արդիականցված ուղղագրությամբ և կետադրությամբ):

Այս տեսիլքի միջոցով Ջոզեֆ Սմիթը դարձավ Հիսուս Քրիստոսի վկան և կարևոր ճշմարտություններ սավորեց Աստվածագլխի մասին: Օրինակ, նա իմացավ, որ Երկնային Հայրը և Հիսուս Քրիստոսն առանձին էակներ են: Երբ Նրանք անունով դիմեցին նրան, նա իմացավ, որ Նրանք անձամբ ճանաչում էին իրեն: Երբ Ջոզեֆին ասացին, որ իր մեղքերը ներված են, նա իմացավ, որ Աստված ողորմած է։ Այս փորձառությունն ուրախությամբ լցրեց նրան։

Նախորդ մարգարեների նման Աստված կանչեց նաև Ջոզեֆ Սմիթին որպես մարգարե, որի միջոցով ավետարանի լրիվությունը կվերականգնվեր երկրի վրա: Այս վերականգնումը կօգներ Աստծո զավակներին ուրախություն գտնել այս աշխարհում և հավերժական կյանք գալիք աշխարհում, և այդ ամենը Հիսուս Քրիստոսի միջոցով:

Սովորեք անգիր Ջոզեֆ Սմիթ—Պատմություն 1.16–17

Սովորեք անգիր Հոր և Որդու հետ Ջոզեֆ Սմիթի հանդիպման նկարագրությունը (Ջոզեֆ Սմիթ—Պատմություն 1.16–17): Միշտ պատրաստ եղեք նկարագրելու Առաջին Տեսիլքը՝ օգտագործելով Ջոզեֆ Սմիթի բառերը: Անկեղծ վկայություն բերեք դրա ճշմարտացիության և այն մասին, թե ինչու է այն կարևոր ձեզ համար:

Քահանայության և քահանայության բանալիների վերականգնում

Իմ ընկերակի՛ց ծառաներ … ես շնորհում եմ ձեզ, Լինդա Քըրլի Քրիսչենսեն և Մայքլ Մալմ

Հոր և Որդու հայտնվելուց հետո այլ երկնային սուրհանդակներ ուղարկվեցին Ջոզեֆ Սմիթին և նրա համախոհ Օլիվեր Քաուդերիին: Հովհաննես Մկրտիչը հայտնվեց որպես հարություն առած էակ և շնորհեց նրանց Ահարոնյան Քահանայությունն ու դրա բանալիները: Ահարոնյան Քահանայությունը ներառում է մկրտելու իշխանությունը:

Պետրոսի, Հակոբոսի և Հովհաննեսի ձայները, Ուոլդեն Կ․ Անդերսեն

Դրանից անմիջապես հետո Պետրոսը, Հակոբոսը և Հովհաննեսը՝ Քրիստոսի առաջին Առաքյալներից երեքը, հայտնվեցին որպես հարություն առած էակներ և շնորհեցին Մելքիսեդեկյան քահանայությունն ու դրա բանալիները Ջոզեֆ Սմիթին և Օլիվեր Քաուդերիին: Այս քահանայությունը նույն իշխանությունն է, որը Քրիստոսը տվել էր Իր Առաքյալներին հին ժամանակներում:

Image of Moses Elias and Elijah descending into the Kirtland temple and appearing to Joseph Smith.

Կիրթլենդի տաճարում Մովսեսը, Եղիասը և Եղիան հայտնվեցին Ջոզեֆ Սմիթին և Օլիվեր Քաուդերիին և նրանց հանձնեցին իշխանության շարունակությունը և քահանության բանալիները, որոնք անհրաժեշտ էին վերջին օրերին Աստծո աշխատանքը կատարելու համար։ Մովսեսը հանձնեց Իսրայելի հավաքման բանալիները: Եղիասը հանձնեց Աբրահամի ավետարանի տնտեսությունը։ Եղիան հանձնեց կնքման զորության բանալիները: (Տես Վարդապետություն և Ուխտեր 110․11–16, տես նաև Ընդհանուր ձեռնարկ, 3.1):

Եկեղեցու կազմավորում

Ջոզեֆ Սմիթին հանձնարարվեց կրկին կազմավորել Հիսուս Քրիստոսի Եկեղեցին երկրի վրա: Նրա միջոցով Հիսուս Քրիստոսը կանչեց Տասներկու Առաքյալներին

Աստվածաշնչյան ժամանակներում մարգարեները մեր ապրած ժամանակն անվանում էին որպես վերջին օրեր: Սա Հիսուս Քրիստոսի Երկրորդ Գալուստին նախորդող ժամանակն է։ Ահա թե ինչու է Եկեղեցին կոչվում Հիսուս Քրիստոսի Վերջին Օրերի Սրբերի Եկեղեցի (տես Վարդապետություն և Ուխտեր 115.3–4, տես նաև 3 Նեփի 27.3–8):

Ապրող Մարգարեներն ու Առաքյալներն այսօր

Ինչպես որ Հիսուսը կանչեց Առաքյալներին առաջնորդելու Իր Եկեղեցին Իր մահկանացու ծառայության ժամանակ, այնպես էլ Նա կանչեց Առաքյալներին՝ առաջնորդելու այն այսօր: Առաջին Նախագահությունը և Տասներկու Առաքյալների Քվորումը մարգարեներ են, տեսանողներ և հայտնողներ:

Միայն ավագ Առաքյալն է կոչվում մարգարե, քանի որ նա նախագահում է ամբողջ Եկեղեցու վրա և ունի բացառիկ իշխանություն խոսելու Տիրոջ անունից: Նա Ջոզեֆ Սմիթի լիազորված իրավահաջորդն է: Նա և ներկա Առաքյալները կարգումների անխափան շղթայով իրենց իշխանությունը հետագծում են դեպի Հիսուս Քրիստոս, որը սկսվել էր այն ժամանակ, երբ Ջոզեֆ Սմիթը կարգվեց երկնային սուրհանդակների ձեռքերով:

Սուրբ գրությունների ուսումնասիրություն

• 2 Նեփի 3

• 3 Նեփի 27․3–8

• Վարդապետություն և Ուխտեր 27.12–13, 112․30–32, 115․4

• Ջոզեֆ Սմիթ—Պատմություն 1․68–72

• Գործք Առաքելոց 3․19–22

• Եփեսացիս 4․5

• Հակոբոս 1․5

Իմացեք ավելին այս սկզբունքի մասին

• Սուրբ Գրությունների ուղեցույց. «Ավետարանի վերականգնում»

• «Հիսուս Քրիստոսի ավետարանի լրիվության վերականգնումը. Երկուհարյուրամյա հռչակագիր աշխարհին»

• Ավետարանական թեմաներ․ «Եկեղեցու վերականգնում», «Քահանայության վերականգնում»

Մորմոնի Գիրքը. Եվս մեկ վկայություն Հիսուս Քրիստոսի մասին

Մորմոնի Գիրքն աստվածաշնչի նման սուրբ գրությունների հնագույն մի հատոր է: Աստվածաշունչը Հիսուս Քրիստոսի առաջին վկայությունն է, իսկ Մորմոնի Գիրքը Նրա ծառայության, Նրա ուսմունքների և որպես մեր Փրկիչ Նրա առաքելության երկրորդ վկայությունը:

Մորոնի անունով երկնային սուրհանդակը Ջոզեֆ Սմիթին ուղղորդեց դեպի մի բլուր, որտեղ դարեր շարունակ թաղված է եղել հնագույն հիշատակարանը: Ոսկե թիթեղների վրա գրված այս արձանագրությունը (մետաղից բարակ թիթեղներ) պարունակում էր Ամերիկա մայրցամաքի որոշ հին բնակիչների հետ Աստծո հարաբերությունների մասին մարգարեների գրառումները։ Ջոզեֆ Սմիթը թարգմանեց այդ հիշատակարանը աստծո զորությամբ ու պարգևով:

Մորմոնի Գրքի մարգարեները գիտեին Հիսուս Քրիստոսի առաքելության մասին և ուսուցանում էին Նրա ավետարանը: Իր հարություն առնելուց հետո Հիսուսը հայտնվեց այս մարդկանց և անձամբ ծառայեց նրանց: Նա ուսուցանեց նրանց և հաստատեց Իր Եկեղեցին:

Մորմոնի Գիրքն օգնում է մեզ ավելի մոտենալ Աստծուն, երբ մենք սովորում, հասկանում և կիրառում ենք դրա ուսմունքները: Մարգարե Ջոզեֆ Սմիթն ասել է, որ «ապրելով ըստ [գրքի] ցուցումների, տղամարդը [կամ կինը] ավելի շատ կմոտենա Աստծուն, քան ըստ որևէ այլ գրքի ցուցումների» (Ուսուցումներ. Ջոզեֆ Սմիթ, 64):

ընթերցող մարդը

Որպեսզի իմանանք, որ Մորմոնի Գիրքն Աստծո խոսքն է, մենք պետք է կարդանք այն, խորհենք դրա մասին և աղոթենք դրա մասին: Մորմոնի Գրքի մարգարեներից մեկը խոստացել է, որ Աստված մեզ կհայտնի գրքի մասին ճշմարտությունը, երբ մենք աղոթենք մաքուր սրտով, անկեղծ միտումով և հավատք ունենալով առ Քրիստոս (տես Մորոնի 10.3–5): Մորմոնի Գրքի ուսումնասիրությունը կարևոր է հաստատուն դարձի համար:

Կարդալով Մորմոնի Գիրքը և աղոթելով դրա մասին, մենք ճշմարտություններ կիմանանք Հիսուս Քրիստոսի մասին, որոնք կօրհնեն մեր կյանքը: Մենք նաև կիմանանք, որ Ջոզեֆ Սմիթն Աստծո մարգարեն էր, և որ Հիսուս Քրիստոսի ավետարանը և Եկեղեցին վերականգնվել են նրա միջոցով:

Նախագահ Ռասսել Մ. Նելսոն

«Ես խոստանում եմ, որ եթե դուք ամեն օր աղոթքով ուսումնասիրեք Մորմոնի Գիրքը, ավելի լավ որոշումներ կկայացնեք՝ ամեն օր: Ես խոստանում եմ, որ մինչ խորհում եք ձեր ուսումնասիրածի շուրջ, երկնքի պատուհանները կբացվեն, և դուք կստանաք ձեր հարցերի պատասխանները, նաև ուղղորդում՝ ձեր կյանքի համար: Ես խոստանում եմ, որ եթե դուք ամեն օր խորասուզվեք Մորմոնի Գրքի ընթերցանության մեջ, դուք կարող եք պաշտպանվել օրվա չարիքից» (Ռասել Մ. Նելսոն «Մորմոնի Գիրքը. Ինչպիսի՞ն կլիներ ձեր կյանքն առանց նրա» Լիահոնա, նոյեմբեր 2017, 62–63)։

Ուսուցման գաղափարներ

Ինչպես ներկայացնել Մորմոնի Գիրքը մարդկանց

Մարդկանց ներկայացնելով Մորմոնի Գիրքը, բացատրեք, որ այն Աստծո և Հին Ամերիկա աշխարհամասի որոշ մարդկանց ավելի քան հազար տարվա փախհարաբերությունների մի սուրբ հիշատակարան է: Դրանից մենք կարող ենք շատ բան սովորել, ինչը վերաբերում է մեր այսօրվա կյանքին:

Մորմոնի Գրքի նպատակն է համոզել մարդկանց, որ Հիսուսը Քրիստոսն է (տես տիտղոսաթերթը)։ Ինչպես ասվում է նրա ենթավերնագրում, գիրքը «Եվս մեկ վկայություն է Հիսուս Քրիստոսի մասին»։ Խոստացեք մարդկանց, որ այն կարդալիս նրանք կարող են ավելի լավ ճանաչել իրենց Փրկչին:

Երբ դուք մարդկանց տալիս եք Մորմոնի Գրքի օրինակը, պատմեք նրանց այն հոգևոր զորության մասին, որն այն բերել է ձեր կյանք: Կիսվեք մեկ կամ երկու հատվածով, որոնք կարևոր են ձեզ համար կամ կարող են նշանակալից լինել նրանց համար: Ձեր անհատական և զուգընկերոջ հետ ուսումնասիրության ընթացքում Հոգին կօգնի ձեզ գտնել հատվածներ, որոնք կարող են բարձրացնել և ամրացնել մարդկանց:

Խրախուսեք մարդկանց ամեն օր կարդալ Մորմոնի Գրքից։ Երբ նրանք կարդան այն և կիրառեն դրա ցուցումները, նրանք կօրհնվեն և ավելի մոտ կլինեն Աստծուն:

Մորմոնի Գիրքը հաստատում է Վերականգման ճշմարտությունը

Դուք կարող եք օգտագործել հետևյալ ձևակերպումները, որպեսզի օգնեք մարդկանց հասկանալ, թե ինչպես է Մորմոնի Գիրքը հաստատում Հիսուս Քրիստոսի ավետարանի Վերականգնման ճշմարտությունը.

«Մորմոնի Գիրքն այն եղանակներից մեկն է, որով Աստված հաստատել է ինձ մեր ասածների ճշմարտացիությունը: Չէի՞ք կարող կարդալ գրքի նախաբանի վերջին երկու պարբերությունները»։

Երկու պարբերությունում էլ բացատրեք յուրաքանչյուր հասկացության իմաստը: Առաջարկեք նրանց, ում ուսուցանում եք, կարդալ Մորմոնի Գրքի հատվածները և կիրառել այս պարբերությունների սկզբունքները: Զգալով Մորմոնի Գրքի ոգին և ճշմարտությունը, նրանք կարող են իմանալ, որ Ջոզեֆ Սմիթն աստծո մարգարեն էր:

Սուրբ գրությունների ուսումնասիրություն

• Մորմոնի Գրքի տիտղոսաթերթը

• Մորմոնի Գրքի նախաբան, պարբերություններ 1–7

• Մորոնի 10.4–5

• Վարդապետություն և Ուխտեր 1․17–23, 20․1–12

• Ջոզեֆ Սմիթ—Պատմություն 1․27–62

Իմացեք ավելին այս սկզբունքի մասին

• Սուրբ գրությունների ուղեցույց․ «Մորմոնի գիրք»

• Ավետարանական թեմաներ. «Մորմոնի գիրք»

աղոթող կինը

Աղոթեք՝ Սուրբ Հոգու միջոցով ճշմարտությունն իմանալու համար

Քանի որ Աստված մեր Հայրն է, Նա կօգնի մեզ ճանաչել ճշմարտությունը: Կարդալով Մորմոնի Գիրքը և աղոթելով Աստծուն մենք կարող ենք իմանալ, որ Հիսուս Քրիստոսի ավետարանի Վերականգնման ուղերձը ճշմարիտ է: Երբ մենք աղոթենք հավատքով և անկեղծ միտումով, Նա կպատասխանի մեր հարցերին և կառաջնորդի մեր կյանքը:

Աստված սովորաբար պատասխանում է մեր աղոթքներին Սուրբ Հոգու միջոցով: Երբ մենք աղոթում ենք, Սուրբ Հոգին ուսուցանում և հաստատում է ճշմարտությունը։ Սուրբ Հոգուց ստացված հաղորդակցությունները հզոր են: Դրանք սովորաբար գալիս են մտքերի և տպավորությունների միջոցով՝ որպես մեր զգացմունքների հանդարտ վստահություն (տես Գ Թագավորաց 19.11–12, Հելաման 5.30, Վարդապետություն և Ուխտեր 8.2):

Սուրբ գրությունների (մասնավորապես Մորմոնի Գրքի) հետևողական ուսումնասիրությունը, յուրաքանչյուր շաբաթ հաղորդության ժողովին հաճախելը և անկեղծ աղոթքն օգնում են մեզ զգալ Սուրբ Հոգու զորությունը և բացահայտել ճշմարտությունը:

Ուսուցման գաղափարներ

Աղոթք

Ինչպես Ջոզեֆ Սմիթը, այնպես էլ շատ մարդիկ փնտրում են կարևոր հարցերի պատասխաններ և կապն Աստծո հետ: Կիսվեք, թե աղոթքն ինչպես է օգնել ձեզ, որպեսզի մոտ զգաք Աստծուն: Կիսվեք, թե ինչպես եք պատասխաններ և առաջնորդություն ստացել ուսումնասիրության և աղոթքի միջոցով:

Բացատրեք, որ աղոթքը երկկողմանի հաղորդակցություն է Աստծո հետ: Առաջարկեք նրանց, ում ուսուցանում եք, օգնություն և առաջնորդություն խնդրել Աստծուց: Հրավիրելով մարդկանց աղոթել, կարող է լինել ձեր ամենակարևոր հրավերներից մեկ, որը դուք կարող եք անել: Երբ նրանք պատասխաններ ստանան, նրանք կիմանան, որ իրենք Աստծո սիրելի զավակներն են, և որ Նա կօգնի իրենց:

Մարդկանցից շատերը, ում ուսուցանում եք, աղոթքի փորձի պակաս կունենան: Ձեզ համար արտոնություն է օգնել նրանց սովորել աղոթել և աղոթքի օրհնությունները բերել իրենց կյանք: Աղոթքն այն է, թե ինչպես ենք մենք վկայություն ստանում հոգևոր ճշմարտությունների մասին:

Ուսուցանեք մարդկանց, որ աղոթքը սովորաբար բաղկացած է հետևյալ մասերից.

• Սկսեք՝ դիմելով ձեր Երկնային Հորը:

• Արտահայտեք ձեր սրտի զգացմունքները, օրինակ՝ երախտագիտություն ձեր ստացած օրհնությունների համար:

• Հարցեր տվեք, առաջնորդություն փնտրեք և խնդրեք ձեզ անհրաժեշտ օրհնությունները:

• Ավարտեք ասելով. «Հիսուս Քրիստոսի անունով, ամեն»։

Առաջարկեք մարդկանց աղոթել Մորմոնի Գիրքը կարդալիս, որպեսզի օգնեք նրանց հասկանալ, որ դա Աստծո խոսքն է և վկայում է Հիսուս Քրիստոսի մասին:

Մարդկանց աղոթել սովորեցնելիս օգտագործեք պարզ արտահայտություններ, որոնք նրանք կարող են օգտագործել նաև աղոթելիս: Ցանկալի է, որ այս աղոթքները հակիրճ լինեն:

Հրավիրեք նրան, ում ուսուցանում եք, աղոթել դասի վերջում: Վկայեք, որ Աստված լսում և պատասխանում է մեր աղոթքներին։

Անկեղծ միտում

Կարդալ անկեղծ միտումով նշանակում է գործել վարդապետության համաձայն և այն կիրառել առօրյա կյանքում: Անկեղծ միտումով աղոթելը նշանակում է գործել համաձայն Աստծո կողմից ստացված պատասխանների:

Սուրբ գրությունների ուսումնասիրություն

• Մորոնի 10.3–5

• Ալմա 5.45–46

• Վարդապետություն և Ուխտեր 8․2–3

• Հովհաննես 14.26

• Մորմոնի Գրքի նախաբան, պարբերություններ 8–9

Իմացեք ավելին այս սկզբունքի մասին

• Սուրբ գրությունների ուղեցույց․ «Աղոթք»

• Bible Dictionary․ «Աղոթք»

• Ավետարանական թեմաներ․ «Աղոթք»

Կարճ և միջին տևողությամբ դասի համառոտ շարադրանքը

Հետևյալ համառոտ շարադրանքն այն օրինակն է, երբ դուք, ունենալով քիչ քանակությամբ ժամանակ կարող եք ուսուցանել որևէ մեկին: Ուսուցանելու համար այս համառոտ շարադրանքն օգտագործելիս ընտրեք մեկ կամ մի քանի սկզբունքներ: Յուրաքանչյուր սկզբունքի համար վարդապետական հիմունքները ներկայացված են դասի սկզբում:

Երբ ուսուցանում եք, հարցեր տվեք և լսեք: Հրավերներ հղեք, որոնք կօգնեն մարդկանց սովորել, թե ինչպես ավելի մոտենալ Աստծուն: Կարևոր հրավերներից մեկն այն է, որ մարդը նորից հանդիպի ձեզ: Դասի տևողությունը կախված կլինի ձեր տված հարցերից և նրանից, թե ինչ եք լսել։

տղամարդու հետ խոսող միսիոներները

Ինչ կարող եք ուսուցանել մարդկանց 3–10 րոպեում

• Աստված մեր Երկնային Հայրն է, և Նա ստեղծել է մեզ Իր պատկերով։ Նա ճանաչում է մեզ անձամբ և սիրում է մեզ: Նա ցանկանում է օրհնել մեզ խաղաղությամբ և ուրախության լիությամբ, որոնք կտևեն հավերժ:

• Հիսուս Քրիստոսն Աստծո Որդին է։ Նրա առաքելությունն էր հնարավոր դարձնել, որ մենք մաքրվենք մեր մեղքերից, հաղթահարենք մահը և հավերժական կյանք ստանանք:

• Աստված կանչում է մարգարեներին՝ լինելու Իր ներկայացուցիչները երկրի վրա: Հին ժամանակներում Նա կանչել է այնպիսի մարգարեների, ինչպիսիք են Ադամը, Նոյը, Աբրահամը և Մովսեսը: Ապրող մարգարեն հայտնություն ստացավ Աստծուց՝ ուսուցանելու և առաջնորդելու մեզ այսօր:

• Իր մահկանացու ծառայության ընթացքում Հիսուսը հաստատեց Իր Եկեղեցին: Հիսուսի Առաքյալների մահից հետո տեղի ունեցավ համատարած հեռացում Հիսուս Քրիստոսի ավետարանից և եկեղեցուց: Մարդիկ փոխեցին ավետարանի շատ ուսմունքներ և քահանայության արարողություններ, ինչպիսիք են մկրտությունը:

• Աստված կանչեց Ջոզեֆ Սմիթին որպես մարգարե, ինչպես որ նա մարգարեներ էր կանչել ավելի վաղ ժամանակներում: Երկնային Հայրը և Հիսուս Քրիստոսը հայտնվեցին նրան: Հիսուս Քրիստոսի ավետարանը վերականգնվել է նրա միջոցով:

• Մորմոնի Գիրքը սուրբ գրությունների մի հատոր է: Ինչպես Աստվածաշունչը, այն նույնպես Հիսուս Քրիստոսի վկայությունն է և օգնում է մեզ ավելի մոտենալ Աստծուն, երբ մենք կարդում ենք այն և կիրառում դրա ցուցումները: Ջոզեֆ Սմիթը թարգմանեց այն Աստծո պարգևով և զորությամբ:

• Անկեղծ աղոթքի միջոցով մենք կարող ենք հաղորդակցվել Աստծո հետ: Մենք կարող ենք իմանալ, որ Հիսուս Քրիստոսի ավետարանի Վերականգնման ուղերձը ճշմարիտ է: