Japta 3: Lesen 4

Stap Kam Ol Disaepol blong Jisas Kraes long Ful Laef Taem

Stap Tijim Lesen Ia

Baptaes i wan odinens blong bigfala glad blong hop. Taem yumi kasem baptaes, yumi soem tingting blong hat blong yumi blong folem God mo kam insaed long rod ia we i lid i go from laef we i no save finis. Mo tu, yumi soem komitmen blong yumi blong stap kam ol disaepol blong Jisas Kraes long ful laef taem.

Lesen ia oli oganaesem folem ol kavenan we yumi mekem long taem blong baptaes. Hem i gat ol stamba seksen ia, we wanwan long olgeta i gat ol sab heding:

• Kavenan blong Yumi blong Wantem blong Tekem long Yumi Nem blong Jisas Kraes

• Kavenan blong Yumi blong Kipim Ol Komanmen blong God

• Kavenan blong Yumi blong Givim Seves long God mo Ol Narawan

• Kavenan blong Yumi blong Stanap Strong Kasem En

Helpem ol pipol blong andastanem se ol prinsipol mo ol komanmen we yu tijim oli pat blong kavenan we bae oli mekem taem oli baptaes. Soem long olgeta olsem wanem wanwan pat blong lesen ia bae i helpem olgeta blong “bae [oli] kam long Kraes, … mo tekem pat long fasin blong hem blong sevem man,” (Omnae 1:26; luk tu long 1 Nifae 15:14).

Bae yu wantem blong tijim lesen ia long sam visit. Blong stap tijim wan lesen, bae i no go ova long 30 minit. Oltaem bae i moa gud blong mekem i sot, gat moa visit we bae i save kavremap ol smosmol pat blong lesen.

Mekem plan blong wanem bae yu tijim, long wanem taem bae yu tijim mo hamas taem bae yu nidim. Tingting long ol nid blong ol pipol we yu stap tijim, mo lukaotem daereksen blong Spirit. Yu save mekem jenis long ol tijing blong yu folem wanem we bae i bes blong helpem ol pipol oli rere blong baptaes mo konfemesen.

Sam seksen insaed long lesen ia i tekem tu ol spesel invitesen. Lukaotem insperesen blong save jusum olsem wanem mo wanem taem blong givimaot ol invitesen. Tingting gud long hamas level blong andastaning we man o woman ia i gat. Helpem hem blong laef folem gospel wan afta narawan.

Kavenan blong Yumi blong Wantem blong Tekem long Yumi Nem blong Jisas Kraes

Taem yumi kasem baptaes, yumi mekem kavenan blong folem Jisas Kraes “wetem evri tingting blong hat.” Yumi witnesem tu se “[yumi] glad blong tekem long [yumi] nem blong Kraes” (2 Nifae 31:13; luk tu long Doktrin mo Ol Kavenan 20:37).

Blong tekem nem blong Jisas Kraes long yumi i minim se yumi tingbaot Hem mo traehad blong laef olsem ol disaepol blong Hem long ful laef taem blong yumi. Yumi letem laet blong Hem i saen tru long yumi blong ol narawan oli luk. Yumi lukluk yumiwan olsem, yumi blong Hem, mo putum Hem faswan long laef blong yumi.

Ol seksen ia oli tokbaot tu wei we bae yumi tingbaot blong folem Jisas Kraes.

Prea Oltaem

Prea i save kam olsem wan simpol storian wetem Papa long Heven we i kam tru long hat blong yumi. Tru long prea, yumi toktok nomol wetem Hem, mo wetem ones fasin. Yumi soem lav blong yumi long Hem mo tangkyu long Hem from ol blesing blong yumi. Mo tu, yumi askem help, proteksen mo daereksen. Taem yumi klosem prea blong yumi, yumi mas tekem taem blong stop mo lisin.

Jisas i bin tijim, “Yufala i mas prea oltaem long Papa long nem blong mi” (3 Nifae 18:19, Oli ademap italik; luk tu long Moses 5:8). Taem yumi prea tru long nem blong Jisas Kraes, yumi tingbaot tugeta Hem mo Papa long Heven.

Jisas i putum wan eksampol blong yumi blong folem taem yumi prea. Yumi save lanem plante samting abaot prea taem yumi stap stadi long prea blong Sevya insaed long ol skripja (luk long Matiu 6:9–13; Jon 17).

Ol prea blong yumi i mas gat ol pat ia:

• Singaotem nem blong Papa long Heven long stat.

• Talemaot ol filing blong hat blong yumi, olsem fasin blong talem tangkyu from ol blesing we yumi bin kasem.

• Askem ol kwestin, lukaotem daereksen we i kam tru long Hem, mo askem ol blesing.

• Endem wetem ol toktok ia, “long nem blong Jisas Kraes, amen.”

Ol skripja oli wonem yumi blong prea long moning mo long naet. Be, yumi save prea eni taem mo long eni ples. Blong ol prea blong yumiwan mo ol famli prea, bae i gat moa mining taem yumi nildaon blong prea. Oltaem yumi mas gat wan prea insaed long hat blong yumi. (Luk long Alma 34:27; 37:36–37; 3 Nifae 17:13; 19:16.)

Yumi mas tingting gud blong mekem prea mo bae i mas kam long hat blong yumi. Taem yumi prea, yumi mas stop blong stap talem ol semmak samting long ol semmak wei.

Yumi prea wetem fet, wetem tru tingting mo tekem aksen folem ol ansa we yumi kasem. Taem yumi mekem hemia, God bae i lidim yumi mo helpem yumi blong mekem ol gudfala desisen. Bae yumi filim se yumi stap kolosap long Hem. Bae Hem i givim andastaning mo trutok long yumi. Hem bae i blesem yumi wetem kamfot, pis mo paoa.

Stadi long Ol Skripja

• 2 Nifae 32:8–9

• Inos 1:1–12

• Alma 6:6; 13:28; 34:17–28; 37:36–37

• 3 Nifae 18:20

• Moronae 10:3–5

• Doktrin mo Ol Kavenan 6:22–23; 8:2–3; 9:7–9; 10:5; 19:28; 42:14

Lanem Moa abaot Prinsipol Ia

• Gaed long Ol Skripja: “Prea”

• Bible Dictionary: “Prayer”

• Gospel Topik: “Prea”

Invitesen

?Bae yu prea evri dei i go long Papa long Heven?

Stadi Ol Skripja

Nifae i tijim, “Kakae gud long ol toktok blong Kraes; from luk, ol toktok blong Kraes bae i talem long [yufala] evri samting we yufala i mas mekem” (2 Nifae 32:3; luk tu long 31:20).

Blong stap stadi long skripja hem i wan impoten wei blong tingbaot mo folem Jisas Kraes. Insaed long ol skripja yumi lanem abaot laef blong Hem, seves blong Hem, mo ol tijing blong Hem. Mo tu, yumi lanem abaot ol promes blong Hem. Taem yumi ridim ol skripja, yumi kasem eksperiens long saed blong lav blong Hem. Sol blong yumi i open moa, fet blong yumi long Hem i kam antap, mo maen blong yumi i kam moa waes. Testemoni blong yumi abaot tabu misin blong Hem bae i kam moa strong.

Yumi tingbaot mo folem Jisas taem yumi yusum ol toktok blong Hem long laef blong yumi. Yumi mas stadi ol skripja evri dei, speseli Buk blong Momon.

Ol skripja blong Jos Ia blong Jisas Kraes blong Ol Lata-dei Sent, oli singaotem, Tabu Baebol, Buk blong Momon, Doktrin mo Ol Kavenan, mo Perel we I Gat Bigfala Praes. Hemia oli singaotem tu, “ol tabu standet wok.”

Stadi long Ol Skripja

• 1 Nifae 19:22–23

• 2 Nifae 9:50–51; 25:26; 29:1–13; 31:19–20; 32:3

• Alma 32:28–30

• Doktrin mo Ol Kavenan 1:37–38; 18:34–36

• Jon 20:31

• Seken Timoti 3:14–17

• 2 Pita 1:20–21

Lanem Moa abaot Prinsipol Ia

• Gaed long Ol Skripja: “Ol Skripja”

• Gospel Topik: “Ol Skripja”

Invitesen

?Bae yu ridim ol skripja evri dei? (Tingting blong stap invaetem ol pipol blong ridim sam spesel japta.)

Kavenan blong Yumi blong Kipim Ol Komanmen blong God

Not: i gat plante wei blong tijim ol komanmen long seksen ia. Eksampol, yu save tijim olgeta long samfala visit. O yu save tijim sam long olgeta olsem pat blong fas trifala lesen. Taem yu stap tijim ol komanmen, mekemsua blong konektem olgeta i go wetem kavenan blong baptaes mo plan ia blong fasin blong sevem man.

Taem yumi kasem baptaes, yumi mekem kavenan wetem God se bae yumi “obei ol komanmen blong hem” (Mosaea 18:10; Alma 7:15).

God i bin givim ol komanmen long yumi from se Hem i lavem yumi. Hem i wantem gud blong yumi, tugeta blong naoia mo taem we i no save finis. Olsem Papa blong yumi long Heven, Hem i save wanem we yumi nidim blong gud blong yumi long saed blong spirit mo blong bodi. Mo tu, Hem i save wanem bae i givim bigfala glad long yumi. Wanwan komanmen i wan tabu presen, we oli givim blong lidim ol desisen blong yumi, protektem yumi, mo helpem yumi blong gro.

Wan risen yumi kam long wol i blong lan mo gro tru taem yumi yusum fridom blong mekem joes wetem waes tingting (luk long Ebraham 3:25). Stap jusum blong obei ol komanmen blong God—mo blong sakem sin taem yumi foldaon—helpem yumi blong faenem wei aot long ol jalenj blong evri dei wokbaot blong laef blong yumi long wol ia.

Ol komanmen blong God oli stamba blong paoa mo ol blesing (luk long Doktrin mo Ol Kavenan 82:8–9). Taem yumi obei ol komanmen, yumi lanem se oli no ol rul blong tekem se i hevi long yumi, we i stap blokem fridom blong yumi. Tru fridom i kam taem yumi stap obei long ol komanmen. Fasin blong stap obei hem i wan ples blong kasem paoa we i givim laet long yumi mo save tru long Tabu Spirit. Hem i givim bigfala glad long yumi mo helpem yumi kasem tabu paoa blong yumi olsem ol pikinini blong God.

God i promes blong blesem yumi taem yumi obei ol komanmen blong Hem. Sam blesing oli spesel we i go wetem sam komanmen. Ol blesing blong Hem long en, hem i pis long laef ia mo long laef we i no save finis long wol we bae i kam. (Luk long Mosaea 2:41; Alma 7:16; Doktrin mo Ol Kavenan 14:7; 59:23; 93:28; 130:20–21.)

Tugeta ol blesing blong God oli kam long saed blong spirit mo long ol samting blong wol ia. Wanwan taem, yumi nid blong gat fasin blong save wet longtaem from olgeta, trastem se bae oli kam folem taem mo tingting blong Hem (luk long Mosaea 7:33; Doktrin mo Ol Kavenan 88:68). Blong luksave sam blesing, yumi nid blong stap wekap mo lukluk gud long saed blong spirit. Hemia, speseli i tru abaot ol blesing we oli kam long ol simpol mo nomol wei.

Sam blesing oli klia blong man i luksave nomo afta we oli andastanem. Bae ol narawan bae oli save kam nomo afta long laef ia. Nomata ol blesing bae oli kam folem taem mo fasin blong God, yumi save gat hop se bae oli kam taem yumi traehad blong laef folem gospel blong Jisas Kraes (luk long Doktrin mo Ol Kavenan 82:10).

God i lavem evri pikinini blong Hem i stret evriwan. Hem i save gat fasin blong save wet longtaem wetem ol samting we yumi no strong long olgeta, mo Hem i stap fogiv taem yumi sakem sin.

Tufala Bigfala Komanmen

Taem wan man i bin askem Jisas: “Masta, ?Wanem loa blong God nao i hae moa long ol narafala loa?” Hem i ansa, “Yu mas lavem Hae God ya we i God blong yu long olgeta hat blong yu, mo long olgeta laef blong yu, mo long olgeta tingting blong yu.”

Jisas i talem afta se nambatu bigfala komanmen i semmak long faswan: “Yu mas lavem ol man we oli stap raonabaot long yu, yu mas mekem i gud long olgeta, olsem we yu stap mekem i gud long yu” (Matiu 22:36–39). “I no gat sam narafala loa we i hae moa long tufala ya” (Mak 12:31).

Olsem ol spirit pikinini blong God, yumi gat wan bigfala paoa blong lav. Hem i pat blong laef blong yumi we i spesel blong yumi long saed blong spirit. Blong stap laef folem tufala bigfala komanmen—blong lavem God faswan mo blong lavem neba blong yumi—i wan level we i soem stret fasin blong ol disaepol blong Jisas Kraes.

Lav blong God

I gat plante wei we yumi save soem lav blong yumi long God. Yumi save obei ol komanmen blong Hem (luk long Jon 14:15, 21). Yumi save putum Hem faswan long laef blong yumi, folem stret tingting blong Hem. Yumi save putum Hem long medel blong ol samting we yumi wantem, ol tingting mo hat blong yumi (luk long Alma 37:36). Yumi save laef wetem fasin blong talem tangkyu from ol blesing we Hem i bin givim long yumi—mo stap rere oltaem blong serem ol blesing ia (luk long Mosaea 2:21–24; 4:16–21). Tru long prea mo seves long ol narafala man, yumi save soem mo mekem lav blong yumi long Hem i kam moa bigwan.

Olsem ol narafala komanmen, komanmen blong lavem God hem i blong gud blong yumiwan. Wanem we yumi lavem bae i soem wanem we yumi lukaotem. Wanem we yumi lukaotem i soem wanem yumi tingting long hem mo mekem. Mo wanem we yumi tingting mo mekem i talemaot huia yumi—mo huia bae yumi kam.

Lav blong Ol Narawan

Blong lavem ol narawan bae i soem moa lav we yumi gat long God. Sevya i tijim yumi plante wei blong lavem ol narawan (luk long, eksampol, Luk 10:25–37 mo Matiu 25:31–46). Yumi givhan mo welkamem olgeta i kam insaed long hat mo laef blong yumi. Yumi soem lav taem yumi stap givim seves—blong givim yumiwan iven long ol smosmol wei. Yumi lavem ol narawan taem yumi stap yusum ol talen we God i bin givim long yumi blong blesem olgeta.

Blong lavem ol narawan i tekem tu, fasin blong save wet longtaem, stap kaen, mo ones. Hemia ia tekem tu fasin blong stap fogiv we yu mekem fri. I minim blong tritim evri pipol wetem respek.

Taem yumi lavem wan, yumi mo man ia, tugeta yumi kasem blesing. Hat blong yumi i gro, laef blong yumi i gat moa mining, mo glad blong yumi i kam antap moa.

Ol Blesing

Tu bigfala komanmen—blong lavem God mo neba blong yumi—oli stamba blong evri komanmen blong God (luk long Matiu 22:40). Taem yumi lavem God faswan, mo tu, lavem ol narawan, evri samting long laef blong yumi bae oli muv i go long stret ples blong olgeta. Lav ia bae i mekem jenis long ol samting we yumi stap lukluk long olgeta, hamas taem yumi stap yusum, ol samting we yumi wantem mekem mo wok from wetem strong tingting, mo wanem yumi putum oli kam faswan.

Stadi long Ol Skripja

• 2 Nifae 31:20

• Mosaea 2–5

• Moronae 7:45–48; 10:32

• Matiu 22:36–40; 25:31–46

• Mak 12:28–33

• Luk 10:25–37

• Jon 13:34–35; 14:15, 21

• 1 Jon 4:7–8, 20–21; 5:3

• Josua 22:5

Lanem Moa abaot Prinsipol Ia

• Gaed long Ol Skripja: “Jareti,” “Lav”

• Gospel Topik: “Jareti,” “Lav”

Folem Profet

God i singaotem ol profet blong oli ripresentem Hem long wol. Tru long ol profet blong Hem, Hem i taltalemaot ol trutok mo givim daereksen mo ol woning.

God i singaotem Josef Smit blong stap olsem fas profet blong ol las dei (luk long lesen 1). Olgeta we bae oli kam afta long Josef Smit long semmak fasin God i bin singaotem olgeta blong lidim Jos blong Hem, we i tekem tu profet we i lidim tedei. Yumi mas kasem wan bilif abaot tabu koling blong profet we i stap laef tedei mo folem ol tijing blong hem.

Ol tijing blong ol profet we oli laef tedei mo ol aposol oli olsem wan angka long trutok we i no save finis long wan wol we ol tingting oli save stap jenis. Taem yumi folem ol profet blong God, ol tu tingting mo raorao blong wol bae oli no save winim yumi. Bae yumi faenem bigfala glad long laef ia mo kasem daereksen blong pat blong wokbaot blong yumi we i no save finis.

Stadi long Ol Skripja

• Mosaea 15:11–12

• 3 Nifae 12:1–2

• Doktrin mo Ol Kavenan 1:4, 37–38; 21:1–7; 136:37–38

• Ol Wok 10:34–43

• Efesas 2:19–20; 4:11–14

• Amos 3:7

Lanem Moa abaot Prinsipol Ia

• Gaed long Ol Skripja: “Profet,” “Profet We I Woman,” “Profesi, Profesae”

• Gospel Topik: “Ol Profet,” “Profesi”

Invitesen

?Bae yu folem kaonsel blong profet we i stap laef?

Ol Kwestin blong Intaviu blong Baptaes We i Go Stret Wetem Topik

?Yu yu biliv se [ Presiden blong Jos we i laef i stap naoia] hem i wan profet blong God? ?Hemia i minim wanem long yu?

Obei Ol Ten Komanmen

God i talemaot Ol Ten Komanmen long wan profet blong bifo we nem blong hem, Moses blong lidim ol pipol blong hem. Ol komanmen ia oli yusum i semmak nomo olsem long dei blong yumi. Oli tijim yumi blong wosip mo soem respek long God. Oli tijim yumi tu olsem wanem blong tritim ol narafala man.

• “Bambae yufala i no mas mekem wosip long ol narafala god, yufala i mas mekem wosip long mi nomo” (Eksodas 20:3 Ol narafala “god” i save tekem tu plante samting olsem, ol samting we yumi gat, paoa o gat wan popula nem.

• “Bae yufala i no mas mekem pikja blong wan samting blong wosip long hem” (Eksodas 20:4).

• “Bambae yufala i no yusum nem blong mi long fasin we i no ona long mi, from we mi mi Hae God, mi God blong yufala” (Eksodas 20:7).

• “Tingbaot Sabat dei blong holem i tabu” (Eksodas 20:8).

• “Oltaem bambae yufala i mas ona long papa mo mama blong yufala” (Eksodas 20:12).

• “Bambae yufala i no mas kilim man i ded” (Eksodas 20:13).

• “Bambae yufala i no mas mekem adaltri” (Eksodas 20:14).

• “Bambae yufala i no mas stil” (Eksodas 20:15).

• “Bambae yufala i no mas mekem giaman toktok agensem ol man we i stap raonabaot long yufala” (Eksodas 20:16).

• “Bambae yufala i no mas letem tingting blong yufala i stap long ol samting blong narafala man blong tekem i blong yufala” (Eksodas 20:17).

Niufala Tingting blong Stap Tij: Yu No Mas Mekem Wosip long Narafala God

Ol pipol long plante kalja oli gat respek long ol samting we i stap mekem olgeta oli tingbaot God o ol bubu blong olgeta. Samtaem ol samting ia, olsem ol aedol, ol saen blong relijin, o ol smol tabu ples, i save stap olsem samting we bae oli wosipim. Helpem olgeta we yu tijim blong mekem fet mo wosip blong olgeta i lukluk nomo long Papa long Heven mo Jisas Kraes.

Stadi long Ol Skripja

• Mosaea 13:11–24

• Doktrin mo Ol Kavenan 35:24; 59:5–6

• Eksodas 20:1–17

• Dutronome 5:6–21

Lanem Moa abaot Prinsipol Ia

• Gaed long Ol Skripja: “Ten Komanmen, Ol”

• Gospel Topik: “Ol Ten Komanmen”

Invitesen

?Bae yu obei long Ol Ten Komanmen?

Laef folem Loa blong Jastiti

Loa blong stap klin long saed blong seks i wan impoten pat long plan blong God blong yumi save sef mo kam olsem god. God i odenem fasin blong stap tugeta bitwin hasban mo waef long saed blong seks blong krietem ol pikinini mo blong save soem lav insaed long mared. Fasin ia blong stap tugeta ia mo paoa blong krietem wan laef, oli blong mekem laef i naes mo tabu.

Loa blong God blong fasin blong klin long saed blong seks i blong no gat eni rilesen long saed blong seks aotsaed long wan mared we i folem loa bitwin wan man mo wan woman. Loa i minim tu blong stap fetful fulwan mo gat respek long wan narafala patna afta long mared.

Blong helpem yumi blong obei long loa blong jastiti, ol profet oli bin wonem yumi blong stap klin long ol tingting mo ol toktok blong yumi. Yumi mas stap longwe long ponografi long eni kaen (rabis pikja mo vidio kaset mo ol narawan). Blong stap obei long loa blong jastiti, yumi mas stap klin long ol fasin blong yumi mo long wei we ol narafala man bae oli luk long yumi.

Olgeta we bae oli baptaes, oli mas laef folem loa blong jastiti.

Fasin blong Sakem Sin mo Fogivnes

Long ae blong God, fasin blong stap brekem loa blong jastiti hem i series tumas (luk long Eksodas 20:14; Efesas 5:3). Hemia i stap lidim rong tabu paoa ia we Hem i bin givim blong krietem laef. Be Hem i gohed blong lavem yumi iven yumi bin brekem loa ia. Hem i invaetem yumi blong sakem sin mo kam klin tru long atonmen mo sakrifaes blong Jisas Kraes. Fogivnes blong God we i swit, mo givim pis, i save tekem ples blong harem nogud from sin (luk long Doktrin mo Ol Kavenan 58:42–43).

Ol Blesing

God i bin givim loa blong jastiti blong blesem yumi mo ol spirit pikinini we Hem i stap sendem olgeta i kam long wol. Blong stap obei long loa ia hem i impoten blong save kasem pis blong yuwan mo blong stap gat lav, tras mo yuniti insaed long ol famli rilesensip blong yumi.

Taem yumi laef folem loa blong jastiti, bae yumi kasem proteksen long ol samting we i save spolem yumi long saed blong spirit we i hapen tru long fasin blong gat seks aotsaed long mared. Bae yumi stap longwe tu long ol problem long saed blong filing mo bodi we oltaem i kam wetem ol kaen rilesensip olsem. Tras blong yumi bae i gro i kam strong long fored blong God (luk long Doktrin mo Ol Kavenan 121:45). Bae yumi moa open long paoa blong Tabu Spirit. Bae yumi rere moa gud blong mekem ol tabu kavenan insaed long tempol we bae i mekem yumi kam wan wetem ol famli blong yumi blong taem we i no save finis.

Ol Kapol we Oli Stap Laef Tugeta

Wan kapol we tufala i stap laef tugeta mo no mared folem loa bitwin wan man mo wan woman bae oli no save kasem baptaes kasem taem we oli laef folem loa blong jastiti. Hemia i minim blong tufala i nomo stap tugeta wan ples—nomata olsem wan man mo woman o man wetem man o woman wetem woman—o blong wan man wetem wan woman, i minim blong kasem mared. Hemia i tekem tu blong stap praktisim fet blong save sakem sin, olsem we i stap long Doktrin mo Ol Kavenan 20:37. Mared bitwin wan man mo wan woman i stamba tingting blong God long plan blong Hem we i no save finis.

Invitesen blong laef folem loa blong jastiti bae i save kam ol had jalenj long sam long ol pipol we yu stap tijim. Stap prea mo luksave situesen blong wanwan man o woman we yu tijim. Folem kwaet voes blong Spirit taem yu stap tij. Tingting gud bifo yu toktok mo no toktok raon long ol spesel infomesen. Olsem we i nid, lukaotem kaonsel long misin presiden blong yu long ol spesel situesen.

Stadi long Ol Skripja

• 3 Nifae 12:27–30

• Doktrin mo Ol Kavenan 42:22; 59:6; 63:16

• Matiu 5:27–28

• Efesas 5:3–5

Lanem Moa abaot Prinsipol Ia

• Gaed long Ol Skripja: “Fasin blong Stap Klin”

• Gospel Topik: “Fasin blong Stap Klin”

Ol Invitesen

?Bae yu traehad blong stap laef long klin fasin long ol tingting mo long ol aksen blong yu? ?Bae yu stap laef folem loa blong jastiti?

Ol Kwestin blong Intaviu blong Baptaes We i Go Stret Wetem Topik

• ?Wanem nao yu andastanem abaot loa blong jastiti, we i stap blokem blong wan i slip wetem narawan aotsaed long mared bitwin man mo woman, we loa i luksave? ?Yu wantem blong stap obei long loa ia bifo mo afta long baptaes blong yu?

• ?Yu yu bin tekpat o gat wan abosen finis? [Not: Wan man o woman we i ansa yes long kwestin ia, misin presiden i mas intaviu long hem o wan kaonsela we oli asaenem hem, bifo oli kasem raet ia blong baptaes.]

Obei long Loa blong Taeting

Wan long ol spesel blesing blong membasip insaed long Jos, i janis ia blong pem taeting. Taem yumi pem taeting, yumi help blong mekem wok blong God i go moa fored mo blesem ol pikinini blong Hem.

Loa blong taeting i stat long ol taem blong OlTesteman. Eksampol. Profet Ebraham i pem evri taeting blong hem aot long evri samting we hem i gat olsem taeting blong hem (luk long Alma 13:15; Jenesis 14:18–20).

Toktok ia taeting i minim stret se, wan pat aot long ten. Taem yumi pem taeting, yumi givim wan aot long ten, long mane we yumi kasem i go long Jos (luk long Doktrin mo Ol Kavenan 119:3–4; intres i minim mane we oli kasem). Evri samting we yumi gat oli wan presen we i kam long God. Taem yumi pem taeting, yumi soem tangkyu blong yumi long Hem taem yumi givimbak wan pat blong wanem we Hem i givim long yumi.

Taem yumi pem taeting blong yumi i wan wei blong soemaot fet. Mo tu, hem i wan wei blong givim ona long God. Jisas i tijim se yumi mas “lukaotem … fastaem kingdom blong God” (Matiu 6:33), mo taeting i wan wei blong mekem hemia.

Yus blong Mane blong Taeting

Ol mane blong taeting, oli tabu. Yumi givim taeting blong yumi long wan memba blong bisoprik, o long plante ples we yumi save pem onlaen. Taem we bisoprik i kasem taeting, oli transferem i go long ol hedkwota blong Jos.

Wan kaonsel blong Fas Presidensi, Kworom blong Olgeta Twelef mo Prisaeding Bisoprik oli disaed long olsem wanem blong yusum ol mane blong taeting long wok blong God (luk long Doktrin mo Ol Kavenan 120:1). Olgeta samting ia i tekem:

• Blong bildimap mo stap mekem gud ol tempol mo ol miting haos.

• Blong transletem mo pablisim ol skripja.

• Stap sapotem ol aktiviti mo ol wanem we i stap hapen long ol kongregesen blong ol lokol Jos.

• Stap sapotem misinari wok truaot long wol.

• Stap sapotem famli histri wok.

• Stap givim donesen long ol skul mo edukesen.

Oli no yusum taeting blong pem ol lokol lida blong Jos. Oli volontia blong givim seves mo oli no pem olgeta from.

Ol Blesing

Taem yumi pem taeting, ol promes blesing blong God we oli moa bigwan bitim wanem we yumi givim. Bae Hem i “openem … ol windo blong heven mo kapsaetem… wan blesing we bae i no gat inaf rum blong tekem” (Malakae 3:10; luk long ol ves 7–12). Ol blesing ia, tugeta oli blong saed long spirit mo long saed blong ol samting long wol.

Stadi long Ol Skripja

• Doktrin mo Ol Kavenan 119; 120

• Matiu 6:33

• Hibrus 7:1–2

• Jenesis 14:18–20

• Levitikas 27:30–33

• Malakae 3:7–12

Lanem Moa abaot Prinsipol Ia

• Gaed long Ol Skripja: “Taeting”

• Gospel Topik: “Taeting”

Invitesen

?Bae yu laef folem loa blong taeting afta we yu kasem baptaes?

Ol Kwestin blong Intaviu blong Baptaes We i Go Stret Wetem Topik

?Wanem nao yu andastanem abaot loa blong taeting? ?Yu glad blong stap obei long loa ia?

Donesen blong Taeting mo Ol Narafala Ofring

Soem long ol niu memba olsem wanem blong givim ol taeting mo ol ofring i go long wan memba blong bisoprik (yusum wan donesen fom) o onlaen (luk long donations.ChurchofJesusChrist.org).

Eksplenem se bisoprik mo wan klak oli rekodem mo lukaotem gud ol taeting mo ol narafala ofring. Evri infomesen ia blong faenens oli sikret evriwan.

Kolosap evri en blong yia, ol memba oli mit wetem bisop blong mekem dikleresen blong taeting. Long praevet miting ia, oli talemaot hamas oli stap fetful blong pem taeting blong olgeta mo kasem wan ripot blong ol donesen blong olgeta.

Obei long Tok blong Waes

Loa blong Lod blong Helt

Bodi blong yumi oli wan tabu presen we i kam long God. Wanwan long yumi i nidim wan bodi blong kam moa olsem Hem. Ol bodi blong yumi oli impoten tumas mekem se ol skripja oli komperem olgeta wetem ol tempol (luk long 1 Korin 6:19–20).

Lod i wantem yumi blong tritim bodi blong yumi wetem respek. Blong helpem yumi blong mekem hemia, Hem i talemaot wan loa blong helt we oli singaotem Tok blong Waes. Revelesen ia i tijim yumi abaot fasin blong stap kakae helti kaekae mo no yusum ol samting we i save spolem bodi blong yu—speseli, alkol, tabak, mo ol hot drink (minim ti [lipton] mo kofi).

Long spirit blong Tok blong Waes, ol profet blong tedei oli bin givim woning agensem fasin blong stap yusum ol narafala samting we oli save spolem bodi, we oli no folem loa, o oli had blong man i kontrolem. Mo tu, ol profet oli givim woning agensem fasin blong abiusum ol ol raet we dokta i givim blong mekem oda long ol drag. (Misin presiden blong yu bae i ansarem ol kwestin abaot ol samting long eria blong yu we bae yu save mo no save yusum.)

Ol Blesing

Lod i givim Tok blong Waes blong gud blong yumi long saed blong bodi mo spirit blong yumi. Hem i promesem ol bigfala blesing we bae i kam taem yumi obei long komanmen ia. Ol blesing oli tekem tu, helt, waes tingting, ol bigfala rij save, mo proteksen (luk long Doktrin mo Ol Kavenan 89:18–21).

Fasin blong stap obei long Tok blong Waes bae i helpem yumi blong akseptem moa ol kwaet toktok blong Tabu Spirit. Nomata se yumi eksperiensem ol jalenj long saed blong helt, blong stap obei long loa ia bae i helpem yumi blong kam helti moa long bodi, tingting mo spirit.

Olgeta we bae oli baptaes, oli mas obei long Tok blong Waes.

Blong faenem daereksen abaot olsem wanem blong helpem ol pipol we oli stap traehad wetem ol samting we oli no save kontrolem, luk long japta 10.

Stadi long Ol Skripja

• Doktrin mo Ol Kavenan 59:15–20; 88:124; 89

• 1 Korin 6:19–20

Lanem Moa abaot Prinsipol Ia

• Gaed long Ol Skripja: “Tok blong Waes”

• Gospel Topik: “Helt,” “Tok blong Waes”

• Help blong Laef: “Ol Samting we Oli No Save Kontrolem”

Invitesen

?Bae yu obei long Tok blong Waes?

Ol Kwestin blong Intaviu blong Baptaes We i Go Stret Wetem Topik

?Wanem tingting blong yu abaot fasin blong stap laef folem Tok blong Waes? ?Yu glad blong obei long Tok blong Waes bifo mo afta long baptaes?

Kipim Sabat Dei I Tabu

Wan Dei blong Spel mo Wosip

Sabat i wan tabu dei we God i jusum blong yumi evri wik blong spel long ol evri wok blong yumi mo wosipim Hem. Wan long Ol Ten Komanmen we God i givim long Moses i blong “tingbaot sabat dei, blong holem i tabu” (Eksodas 20:8; luk tu long ol ves 9–11).

Long wan revelesen blong taem naoia, Lod i talem strong wan moa taem se Sabat: “i wan dei we mi jusum blong yu spel long ol wok blong yu, mo blong yu mekem wosip blong leftemap nem blong Hae God we I Hae Olgeta” (Doktrin mo Ol Kavenan 59:10 Hem i talem tu se Sabat i mas kam wan dei blong stap glad, prea mo stap talem tangkyu (luk long ol ves 14–15).

Olsem pat blong Sabat wosip blong yumi, yumi kam long sakramen miting evri wok. Long miting ia, yumi wosipim mo kaekae sakramen blong tingbaot Jisas Kraes mo Atonmen blong Hem. Taem yumi tekpat long sakramen, yumi mekem i kam niu ol kavenan blong yumi wetem God mo soem se yumi wantem blong sakem ol sin blong yumi. Odinens blong sakramen i stamba samting blong yumi tingting mo lukluk long hem.

Long Jos, yumi tekpat tu long ol klas we bae yumi lanem moa abaot gospel blong Jisas Kraes. Fet blong yumi i gro taem yumi stadi long ol skripja tugeta. Lav blong yumi i gro taem yumi givim seves mo helpem yumi wanwan blong kam strong.

Blong ademap long taem blong spel blong yumi long Sabat, yumi mas no mas go long stoa o ol narafala aktiviti we bae i mekem yumi filim olsem se i wan nomol dei nomo. Yumi putum long saed ol aktiviti blong wol mo putum tingting mo aksen blong yumi i stap nomo long ol samting long saed blong spirit.

Wan Dei blong Stap Mekem Gudfala Samting

Blong stap mekem ol gudfala samting long Sabat dei i impoten olsem wanem we yumi stop blong stap mekem, blong kipim i tabu. Yumi lanem gospel, mekem fet i kam strong, bildimap ol rilesensip, givim seves, mo tekpat long ol narafala aktiviti we i save leftemap tingting blong famli mo ol fren.

Ol Blesing

Blong stap obei long Sabat dei i tabu i wan wei blong soem hamas yumi stap fetful long Papa long Heven mo Jisas Kraes. Taem yumi mekem ol aktiviti blong yumi long Sabat i go stret wetem tingting blong God long dei ia, bae yumi filim glad mo pis. Bae yumi fulap long saed blong spirit mo bodi bae i strong mo kam niu. Mo tu, bae yumi filim moa kolosap long God mo rilesensip blong yumi wetem Sevya bae i kam mo strong. Bae yumi “lukaot gud blong ol samting blong wol oli no spolem [yumi]” moa fulwan (Doktrin mo Ol Kavenan 59:9). Sabat bae i kam “wan glad” (Aesea 58:13; luk tu long ves 14).

Stadi long Ol Skripja

• 3 Nifae 18:1–12

• Doktrin mo Ol Kavenan 59:9–19

• Moses 3:1–3

• Matiu 12:10–13

• Eksodas 20:8–11; 31:12–13, 16–17

• Aesea 58:13–14

Lanem Moa abaot Prinsipol Ia

• Gospel Topik: “Sabat Dei”

• Gaed long Ol Skripja: “Sabat Dei”

Ol Invitesen

• ?Bae yu kipim Sabat dei i tabu mo kam long Jos evri wik?

• ?Bae yu traehad blong stap fetful mo tekpat long sakramen afta we yu kasem baptaes?

• ?Bae yu kam wetem mifala blong mitim bisop (o branj presiden) we i lukaot long kongregesen long eria blong mifala?

Ol Kwestin blong Intaviu blong Baptaes We i Go Stret Wetem Topik

?Wanem nao yu andastanem abaot fasin blong obei long Sabat dei i tabu, we tekem tu fasin blong stap tekem sakramen evri wik mo stap givim seves long ol narawan? ?Bae yu wantem blong stap obei long ol loa ia bifo mo afta long baptaes blong yu?

Stap Wok long Sabat

Samtaem ol memba blong Jos oli mas wok long Sabat from bos blong olgeta i wantem o blong oli save givhan long ol nid blong olgeta o nid blong komuniti blong olgeta. Long ol situesen ia, ol memba oli traem evri bes blong olgeta blong holemtaet spirit blong Sabat. Ol memba oli save kaonsel wetem ol lida blong olgeta abaot situesen blong olgeta.

Obei mo Ona long Ol Loa

Ol Lata-dei Sent oli biliv blong stap obei long loa mo stap ol gudfala sitisen (luk long Doktrin mo Ol Kavenan 134; Ol Toktok blong Bilif 1:12). Oli leftemap tingting blong ol memba blong givim seves blong mekem ol komuniti mo nesen blong olgeta i kam antap. Mo tu, oli leftemap tingting blong olgeta blong stap wan we i save mekem jenis blong talemaot ol gaedlaen insaed long sosaeti mo gavman.

Oli invaetem ol memba blong tekpat long ol wok long saed blong gavman mo politik we i folem loa. Ol memba we oli holem ol posisen insaed long gavman oli mekem samting folem ol paoa we oli gat olsem wan sitisen, be i no olsem wan we ripresentem Jos.

Stadi long Ol Skripja

• Doktrin mo Ol Kavenan 58:21; 134

• Ol Toktok blong Bilif 1:12

Lanem Moa abaot Prinsipol Ia

• “Ol Politik o Gavman Aktiviti” long seksen 38.8 blong Jeneral Hanbuk

• Gospel Topik: “Sitisen”

Invitesen

?Bae yu obei long ol loa blong kantri we yu stap laef long hem?

Ol Kwestin blong Intaviu blong Baptaes We i Go Stret Wetem Topik

?Yu yu bin mekem wan bigfala kraem bifo? Sapos yes, ?Yu yu stap folem sam probesen blong loa o yu aot long kalabus folem kondisen we Kot i putum yu long hem? [Not: Wan man o woman we i ansa yes long kwestin ia, misin presiden i mas intaviu long hem o wan kaonsela we oli asaenem hem, bifo oli kasem raet ia blong baptaes.]

Kavenan blong Yumi blong Givim Seves long God mo Ol Narafala Man

Seves

Taem yumi baptaes, yumi mekem kavenan blong stap wok blong God, mo wok blong ol narafala man. Blong stap givim seves long ol narawan i ol fas wei blong givim seves long God (luk long Mosaea 2:17). Profet Alma i tijim se olgeta we oli wantem blong kasem baptaes, oli mas “wantem blong karem ol hevi samting blong wanwan long yufala, blong mekem se oli nomo hevi …, krae sore wetem olgeta we oli krae sore … , mo leftemap tingting blong olgeta we oli nidim fasin blong leftemap tingting” (Mosaea 18:8–9).

Stret afta long baptaes, ol niu memba bae oli kasem wan koling we i stret long olgeta blong givim seves insaed long Jos. Ol koling ia oli blong volontia nomo mo i no blong oli pem man from. Taem yumi akseptem olgeta mo givim seves wetem strong tingting, yumi kam antap long saed blong fet, developem ol talen mo blesem ol narawan.

Wan narafala pat blong seves blong yumi insaed long Jos i blong stap olsem wan “givhan brata” o wan “givhan sista.” Long responsabiliti ia, yumi givim seves long wanwan man o woman we oli asaenem long yumi mo ol famli.

Olsem ol disaepol blong Jisas Kraes, yumi lukaotem ol janis blong givim seves evri dei. Olsem Hem, yumi go “olbaot long evri ples blong mekem gudfala wok” (Ol Wok 10:38). Yumi givim seves long ol neba mo insaed long komuniti blong yumi. Yumi save tekpat long ol janis blong givim seves tru long JustServe long ples we i gat. Yumi save sapotem ol wok blong Jos yumaniterian mo tekpat long risal blong ol trabol taem.

Stadi long Ol Skripja

• Mosaea 2:17; 4:15–16, 26; 18:8–10; 23:18

• Doktrin mo Ol Kavenan 42:38

• Matiu 25:31–46

• Luk 10:25–37

• Jemes 1:27; 2:17

Lanem Moa abaot Prinsipol Ia

• Gaed long Ol Skripja: “Seves”

• Gospel Topik: “Seves”

Invitesen

?Bae yu akseptem wan koling o wan asaenmen sapos oli talem long yu (we i tekem tu, wan asaenmen olsem givhan brata o givhan sista)?

Stap Serem Gospel

Olsem pat blong baptaes kavenan blong yumi, yumi mekem promes blong “stanap olsem ol witnes blong God” (Mosaea 18:9). Wan wei i blong stanap olsem ol witnes i blong stap serem gospel blong Jisas Kraes. Taem yumi stap helpem ol narawan blong kasem gospel i wan seves we i gud tumas we yumi save givim (luk long Doktrin mo Ol Kavenan 18:15–16). Hem i wan wei i gat paoa blong soem lav blong yumi.

Taem yumi kasem eksperiens we i kam taem yumi kasem ol blesing blong stap laef folem gospel, i nomol blong bae yumi wantem blong serem ol blesing ia. Ol memba blong famli, ol fren mo olgeta we yumi jes save, oltaem bae oli gat intres taem yumi soem wan gudfala eksampol mo oli luk olsem wanem gospel i blesem laef blong yumi. Yumi save serem gospel long ol nomol wei mo nomol fasin Jeneral Hanbuk, japta 23).

Yumi invaetem ol narawan blong tekpat wetem yumi long seves, komuniti, ol aktiviti mo ol aktiviti blong Jos. Yumi save invaetem olgeta blong kam long wan Jos miting o wan baptaes seves. Yumi save invaetem olgeta blong wajem wan vidio onlaen we i stap eksplenem gospel blong Jisas Kraes, blong ridim Buk blong Momon, blong go long wan tempol open haos. I gat handred long ol invitesen we yumi save givimaot. Plante taem, blong invaetem wan, hem i minim nomo blong invaetem famli blong yumi, ol fren, mo ol neba blong yumi long wanem yumi stap mekem finis.

Sapos yumi askem, bae God i helpem yumi luksave ol janis blong serem gospel mo talem long ol narawan abaot olsem wanem i blesem laef blong yumi.

Blong kasem moa infomesen abaot wei blong stap yusum ol prinsipol blong lavem, serem mo invaetem, luk long “Wok Wan Wetem Ol Memba” long japta 9.

Stadi long Ol Skripja

• Doktrin mo Ol Kavenan 88:81

• Matiu 28:19–20

Lanem Moa abaot Prinsipol Ia

• Gaed long Ol Skripja: “Misinari Wok”

• Gospel Topik: “Misinari Wok”

Ol Invitesen

• ?Bae yu prea from ol misinari mo from ol janis blong serem gospel?

• ?Bae yu lukaotem blong yusum ol prinsipol blong stap lavem, serem mo stap invaetem ol fren, ol famli mo ol narafala man?

Fasin blong Livim Kakae mo Ol Fas Ofring

God i putum loa blong livim kakae olsem wan wei blong yumi developem paoa blong yumi long saed blong spirit mo blong helpem olgeta we oli gat nid.

Blong livim kakae i minim blong no kakae mo no dring blong wan amaon blong taem. Olsem oltaem, Jos i putum fas Sandei blong evri manis olsem wan dei blong fast. Wan dei blong livim kaekae, i minim tu blong gohed be no mas kakae wan kaekae mo dring blong 24 aoa sapos nomo yumi strong long saed blong bodi. Ol narafala impoten pat blong fast Sandei, i tekem tu, prea mo serem testemoni. Oli leftemap tingting blong yumi tu blong livim kaekae long ol narafala taem, taem yumi filim i gat nid.

Stap Bildimap Paoa long Saed blong Spirit

Fasin blong livim kaekae i save helpem yumi blong putum tingting i stap daon, kam moa kolosap long God, mo filim se yumi kam niu long saed blong spirit. Bifo Hem i statem seves blong Hem, Jisas Kraes i livim kaekae (luk long Matiu 4:1–2). Ol skripja oli rekodem plante stori blong ol profet mo ol narafala man we oli stap livim kaekae blong mekem se oli save kam strong long saed blong spirit mo lukaotem ol spesel blesing blong olgetawan mo ol narawan.

Blong livim kakae mo prea i go tugeta. Taem yumi livim kaekae mo prea wetem fet, yumi save rere inaf blong kasem revelesen blong yumiwan. Yumi save rere inaf tu blong luksave trutok mo andastanem tingting blong God.

Stap Helpem Olgeta we I Stap long Nid

Taem yumi livim kaekae, yumi mekem donesen blong mane i go long Jos blong helpem mo kea long ol pipol we oli gat nid. Oli singaotem hemia wan fast ofring. Oli stap invaetem yumi blong givim wan ofring we, plante taem, i semmak long mane we wan bae i spendem long ol kaekae we hem i no bin kaekae. Oli leftemap tingting blong yumi blong gat bigfala hat mo blong givim moa bitim amaon blong mane blong tufala taem blong kaekae ia, sapos oli save mekem. Blong stap givim fast ofring i wan wei blong givim seves long ol narafala man.

Oli yusum fast ofring blong givim kaekae mo ol narafala impoten samting i go long ol pipol we oli stap long nid, tugeta long ol lokol pipol mo raon long wol. Blong kasem infomesen long olsem wanem blong kontribiut long fast ofring, luk long “Donesen blong Ol Taeting mo Ol Fast Ofring” long lesen ia.

Stadi long Ol Skripja

Livim Kaekae

• Alma 5:45–46; 6:6; 17:2–3

• Moronae 6:5

• Doktrin mo Ol Kavenan 59:12–16; 88:76

• Aesea 58:6–11

Stap Kea long Olgeta long Nid

• Mosaea 4:16–27

• Alma 4:12–13

• Matiu 25:31–46

Lanem Moa abaot Prinsipol Ia

• Gaed long Ol Skripja: “Livim Kakae, Fasin blong Livim Kakae”

• Jeneral Hanbuk: 22.2.2

• Gospel Topik: “Fasin blong Livim Kaekae mo ol Fas Ofring”

Ol Invitesen

• ?Bae yu save livim kakae mo prea long nekis fas Sandei from wan spesel nid?

• ?Bae yu save givim wan fast ofring (afta we yu baptaes)?

Kavenan blong Yumi blong Stanap Strong Kasem En

Taem yumi kasem baptaes, yumi mekem kavenan wetem God blong “stap strong kasem en” blong stap laef folem gospel blong Jisas Kraes (2 Nifae 31:20; luk tu long Mosaea 18:13). Yumi traehad blong stap kam ol disaepol blong Jisas Kraes blong ful laef taem.

Profet Nifae long Buk blong Momon, i tokbaot baptaes olsem wan get we yumi mas gotru long hem blong kasem rod blong gospel (luk long 2 Nifae 31:17). Afta long baptaes, yumi gohed blong “wokbaot i go wetem strong bilif long Kraes” (2 Nifae 31:20).

Taem yumi “wokbaot fored” long rod blong kam olsem disaepol, yumi rere blong go long tempol. Long ples ia bae yumi mekem ol kavenan wetem God taem yumi kasem ol odinens blong tempol. Insaed long tempol, bae yumi kasem endaomen wetem paoa mo save sil olsem wan famli blong taem we i no save finis. Blong stap kipim ol kavenan we yumi mekem insaed long tempol, bae i openem doa blong kasem evri spesel samting long saed blong spirit mo blesing we God i gat i stap blong yumi.

Taem yumi gohed blong stap fetful long rod blong gospel, long en, bae yumi kasem bigfala presen blong God—presen blong laef we i no save finis (luk long 2 Nifae 31:20; Doktrin mo Ol Kavenan 14:7).

Ol seksen ia oli eksplenem sam pat blong wanem we God i bin givim blong helpem yumi blong stanap strong kasem en blong laef blong yumi long wol ia—mo faenem glad long hem.

Prishud mo Ol Jos Oganaesesen

Prishud hem i atoriti mo paoa blong God. Tru long prishud, Papa long Heven i mekem wok blong Hem oli kamtru blong “man i nomo save ded mo kasem laef we i no save finis” blong ol pikinini blong Hem (Moses 1:39). God i givim atoriti mo paoa long ol boe mo ol gel blong Hem we oli stap long wol blong save help blong karemaot wok ia.

Prishud i blesem yumi evriwan. Yumi kasem ol odinens olsem baptaes mo sakramen tru long olgeta we oli gat prishud. Yumi kasem tu ol blesing blong kam oraet bakegen long sik, blong kamfot, mo kaonsel.

Prishud mo Jos Lidasip mo Ol Koling

Ol profet mo ol aposol nao oli lidim Jos blong Jisas Kraes. God nao i singaotem ol lida ia, odenem olgeta, mo givim prishud atoriti long olgeta blong mekem samting long nem blong Sevya.

Long taem blong bifo, Kraes i givim semmak prishud atoriti ia long Ol Aposol blong Hem, we i givim raet long olgeta blong lidim Jos afta we Hem i gobak antap long heven. Long en, atoriti ia i lus taem ol pipol oli no akseptem gospel mo Ol Aposol oli ded.

Mesenja we oli kam long Heven oli putumbak prishud long 1829 tru long Profet Josef Smit, mo bakegen, Lod i stanemap Jos blong Hem wetem ol aposol mo ol profet. (Luk long lesen 1.)

Long level blong lokol, ol bisop mo ol stek presiden oli gat prishud atoriti blong lidim ol kongregesen blong Jos.

Taem oli singaotem ol man mo woman mo setem apat olgeta blong givim seves insaed long Jos, oli kasem atoriti we i kam long God blong wok long koling ia. Atoriti ia oli givim long ol misinari, ol lida, ol tija, mo ol narafala man kasem taem we oli rilis long ol koling blong olgeta. Oli asaenem olgeta anda long daereksen blong olgeta we oli gat prishud ki.

Man i save yusum atoriti blong prishud long stret mo gud fasin nomo (luk long Doktrin mo Ol Kavenan 121:34–46). Atoriti ia i wan tabu tras blong ripresentem Sevya mo mekem wok long nem blong Hem. Oltaem wok blong hem i blong wantem blong blesem mo givim seves long ol narafala man.

Aronik Prishud mo Melkesedek Prishud

Long Jos, prishud i tekem tu, Aronik Prishud mo Melkesedek Prishud. Anda long daereksen blong olgeta we oli holem ol ki blong prishud, oli stap givim Aronik Prishud mo Melkesedek Prishud long olgeta man we oli klin inaf, mo oli memba blong Jos. Afta we oli givim stret prishud, oli odenem man ia i go long wan ofis insaed long prishud ia, olsem wan dikon o wan elda. Wan we i gat atoriti i mas odenem hem.

Taem wan man o wan yang man i kasem prishud, hem i mekem kavenan wetem God blong mekem gud ol tabu diuti blong hem, givim seves long ol narawan mo help blong bildimap Jos.

Ol yang man oli save kasem Aronik Prishud mo oli odenem olgeta i kam ol dikon, stat long Jenuware blong yia we oli kasem 12 yia. Oli save odenem olgeta i kam ol tija long yia we oli kasem 14 yia mo kam pris long yia we oli kasem 16 yia. Ol man we oli konvet mo gat ol yia ia, oli save kasem Aronik Prishud stret afta long baptaes mo konfemesen blong olgeta. Olgeta we oli gat Aronik Prishud oli givhan long ol odinens olsem sakramen mo baptaes.

Afta we wan i givim seves olsem wan pris long Aronik Prishud, wan man we i klin inaf we i mas gat 18 yia, bae i save kasem Melkesedek Prishud mo bae oli odenem hem i kam wan elda. Ol man we oli kasem Melkesedek Prishud oli save mekem ol prishud odinens olsem givim blesing blong hiling mo kamfot long ol memba blong famli mo ol narawan.

Luk long Jeneral Hanbuk, 38.2.9.1, blong kasem ol infomesen abaot ol niufala memba blong kasem prishud.

Ol Kworom mo Ol Jos Oganaesesen

Ol Kworom blong Prishud. Wan kworom i wan grup blong ol brata we oli holem prishud, mo oli oganaesem olgeta. Wanwan wod i gat wan kworom blong ol elda blong ol adalt man. Ol dikon, ol tija, mo ol kworom blong ol pris oli blong ol yang man.

Rilif Sosaeti. Rilif Sosaeti i gat ol woman we yia blong olgeta i 18 mo ova. Ol memba blong Rilif Sosaeti oli mekem ol famli mo wanwan long olgeta mo komuniti i kam strong.

Ol Yang Woman. Ol yang woman oli joenem Yang Woman oganaesesen, stat long Jenuware blong yia we bae oli kasem 12 yia.

Praemeri. Ol pikinini we yia blong olgeta i 3 kasem 11, oli pat blong Praemeri Oganaesesen.

Sandei Skul. Evri adalt mo ol yut oli kam long Sandei Skul, long ples ia oli mit blong stadi long ol skripja.

Blong kasem moa infomesen abaot prishud, luk long Jeneral Hanbuk, japta 3.

Blong kasem moa infomesen abaot ol kworom blong prishud mo oganaesesen blong Jos, luk long Jeneral Hanbuk, ol japta 8–13.

Stadi long Ol Skripja

• Mosaea 18:17

• Alma 13:1–19

• Doktrin mo Ol Kavenan 20:38–65; 84:19–20; 107; 121:34–46

• Ol Toktok blong Bilif 1:5.

• Luk 9:1–6

• Jon 15:16

• Jemes 5:14–15

Lanem Moa abaot Prinsipol Ia

• Jeneral Hanbuk, japta 3: “Ol Prinsipol blong Prishud””

• Gospel Topik: “Aronik Prishud,” “Melkesedek Prishud,” “Prishud”

Ol Invitesen

• ?Bae yu rere blong kasem Aronik Prishud? (Blong ol man we yia blong olgeta 11 yia mo ova)

• ?Bae yu rere blong kasem Melkesedek Prishud? (Blong ol adalt man)

• ?Bae yu tekpat fulwan insaed long ol Jos oganaesesen we bae yu stap long hem?

Mared mo Ol Famli

Mared

Mared bitwin wan man mo wan woman, God nao i odenem. Hem i stamba long plan blong Hem blong ol samting we i save lidim ol pikinini blong Hem blong kasem laef we i no save finis.

Fasin blong wok wan, blong wan hasban mo waef long mared i mas stap olsem nambawan rilesensip blong tufala blong lukaotem gud long wol ia. Tufala i gat wan tabu responsabiliti blong stap tru long tufala wanwan mo stap fetful long mared kavenan blong tufala.

Wan hasban mo wan waef, tufala i ikwol long ae blong God. I no gat wan i rul ova long narawan. Desisen blong tufala, tufala i mas mekem wetem yuniti mo lav, mo tufala tugeta i mas tekpat long ol desisen ia.

Olsem wan hasban mo waef tufala i lavem tufala mo wok tugeta, mared blong tufala i save stap olsem ples blong kasem bigfala glad blong tufala. Tufala i save helpem wanwan long tufala mo ol pikinini blong tufala blong muv i go fored blong kasem laef we i no save finis.

Famli

Olsem mared, God i odenem famli, mo famli i stap long medel blong plan blong Hem blong kasem glad blong yumi we i no save finis. Famli blong yumi bae i save stap glad taem yumi laef folem ol tijing blong Jisas Kraes. Ol papa mo mama oli tijim ol pikinini blong olgeta abaot gospel blong Jisas Kraes mo soem eksampol taem tufala i laef folem. Ol famli i ples we yumi gat janis blong save lavem mo givim seves long wanwan long yumi.

Ol papa mo mama oli mas mekem se famli blong olgeta i fas mo hae samting blong tingting long hem. Hem i wan tabu spesel janis mo responsabiliti blong papa mo mama, blong tufala i kea long ol pikinini we tufala i save tekem i kam long wol ia, o tufala i save adoptem.

Evri famli oli gat ol jalenj. Taem yumi lukaotem sapot we i kam long God mo obei ol komanmen blong Hem, ol jalenj blong ol famli oli save helpem yumi blong lan mo gro. Samtaem ol jalenj ia oli helpem yumi blong lanem blong sakem sin mo fogiv.

Ol lida blong Jos oli bin leftemap tingting blong ol memba blong gat ol haos naet evri wik. Ol papa mo mama oli yusum taem ia blong tijim ol pikinini blong olgeta abaot gospel, mekem ol rilesensip wetem famli i kam strong, mo gat gudfala taem tugeta. Ol lida blong Jos tu oli bin givimaot wan ofisol toktok we i tijim ol impoten trutok abaot famli (luk long “Famli: Wan Ofisol Toktok I Go long Wol,” ChurchofJesusChrist.org).

Ol narafala wei blong mekem famli i kam strong i gat, famli prea, skripja stadi mo stap wosip tugeta long jos. Yumi save lukaotem tu famli histri, karem i kam tugeta ol famli stori, mo givim seves long ol narafala man.

Plante pipol oli no gat tumas janis blong mared o gat wan famli we i lavem olgeta o gat gudfala rilesensip. Plante oli bin eksperiensem divos mo ol narafala had situesen blong famli. Be, gospel i blesem yumi wanwan nomata i gat ol situesen blong famli. Mo taem yumi stap fetful, bae God i mekem wan wei blong yumi kasem ol blesing blong gat ol famli we oli lavem yumi, nomata se long laef ia o long laef we i stap kam.

Stadi long Ol Skripja

Mared

• Doktrin mo Ol Kavenan 42:22; 49:15

• Efesas 5:25

• Jenesis 2:18, 24

Famli

• Mosaea 4:14–15

• Alma 56:47; 57:21

• 3 Nifae 18:21

• Doktrin mo Ol Kavenan 68:25–28

• Efesas 6:4

• Ol Proveb 22:6

• Famli: Wan Ofisol Toktok I Go long Wol

Lanem Moa abaot Prinsipol Ia

• Gaed long Ol Skripja: “Famli,” “Mared”

• Jeneral Hanbuk, japta 2: “Stap Sapotem Wanwan Man, Woman mo Famli insaed long Wok Ia blong Fasin blong Sevem Man mo Mekem Olgeta Oli Kam Olsem Wan God”

• Gospel Topik: “Mared,” “Famli,” “Lukaot long Pikinini Olsem wan Papa o Mama”

Ol Invitesen

Mekem jenis long ol invitesen ia folem situesen blong wanwan man o woman.

• ?Bae yu save stap gat famli haos naet evri wik, famli prea evri dei, famli skripja stadi evri dei?

• ?Bae yu wosip long Sabat olsem wan famli?

Tempol mo Famli Histri Wok blong Ol Bubu we Oli Ded Finis

Papa long Heven i lavem evri pikinini blong Hem mo wantem sevem olgeta mo blong oli kam olsem ol god. Be yet, bilian long ol pipol oli bin ded mo no harem gospel blong Jisas Kraes o kasem ol odinens blong sevem olgeta we i blong gospel. Ol odinesen ia i gat, baptaes, konfemesen, prishud odinesen blong ol man, mo tempol endaomen, mo mared we i no save finis.

Tru long gladhat mo sore blong Hem, Lod i bin mekem wan nara wei blong ol pipol ia blong kasem gospel mo ol odinens blong hem. Long spirit wol, oli prijim gospel long olgeta we oli bin ded be oli no kasem (luk long Doktrin mo Ol Kavenan 138). Insaed long ol tempol, yumi save mekem ol odinens long bihaf blong ol bubu blong yumi we oli ded finis mo ol narawan. Ol pipol ia we oli ded finis we oli stap long spirit wol bae oli save akseptem o no akseptem gospel mo ol odinens we oli mekem blong olgeta.

Bifo yumi save mekem ol odinens ia, yumi mas faenemaot ol bubu blong yumi we oli no bin kasem olgeta. Faenemaot ol memba blong famli blong yumi, blong mekem se oli save kasem ol odinens we oli stamba blong famli histri wok. Taem yumi faenem ol infomesen abaot olgeta, yumi ademap i go long databes blong Jos FamilySearch.org. Afta yumi, (o ol narawan) i save mekem proksi odinens long bihaf blong olgeta insaed long tempol.

Taem yumi faenemaot ol bubu blong yumi we blong bifo mo mekem ol odinens blong olgeta, famli blong yumi i save kam tugeta blong taem we i no save finis.

Famli Histri Wok mo Blong Stap Go long Tempol

Introdiusum ol niufala memba mo olgeta we yu stap tijim long tempol mo famli histri lida long wod (o long wan narafala memba we i save gud tempol mo famli histri wok). Lida ia i save helpem olgeta blong faenemaot ol famli blong olgeta we oli ded finis we oli nidim blong mekem ol odinens blong tempol blong olgeta. Yusum kodinesen miting blong evri wik blong mekem plan blong olsem wanem blong helpem ol niu misinari blong stat blong mekem famli histri mo tempol wok.

Ol niu memba mo ol narafala memba oli save kasem wan tempol rekomen long bisop blong olgeta mo mekem ol proksi baptaes mo konfemesen blong ol bubu mo ol narawan we oli ded finis. Wan memba i save kasem rekomen ia stat long Jenuware blong yia we bae i kasem 12 yia. Ol man tu oli nid blong gat Aronik Prishud blong oli save mekem ol wok ia. Leftemap tingting blong ol niu memba blong kasem wan rekomen kwiktaem sapos i gat nid.

Sapos i gat wan tempol we i stap kolosap, go wetem ol niu memba sapos i posibol. Tekpat wetem olgeta long ol odinens blong tempol.

Stadi long Ol Skripja

• Doktrin mo Ol Kavenan 128; 138

• 1 Korin 15:29

• 1 Pita 3:18–21; 4:6

Lanem Moa abaot Prinsipol Ia

• Jeneral Hanbuk, japta 28: “Ol Tempol Odinens blong Olgeta we Oli Ded”

• Gospel Topik: “Baptisms for the Dead,” “FamilyHistory”

Ol Invitesen

• ?Bae yu save rere blong yu kasem ol tempol odinens blong ol bubu we oli ded finis?

• ?Bae yu save tekpat long wok blong famli histri mo givim ol nem blong ol bubu blong yu blong oli save kasem ol proksi tempol odinens?

Ol Tempol, Endaomen, Mared we I No Save Finis, Ol Famli we I No Save Finis

Ol Tempol

Tempol hem i haos blong Lod. Hem i wan tabu ples we yumi save mekem ol kavenan wetem God taem yumi kasem ol tabu odinens blong Hem. Taem yumi kipim ol kavenan ia, bae yumi gat paoa we i olsem hemia blong God, i kam tru long laef blong yumi (luk long Doktrin mo Ol Kavenan 84:19–22; 109:22–23).

Endaomen

Wan long ol odinens we yumi kasem insaed long tempol, oli singaotem endaomen. Toktok ia endaomen i minim “wan presen.” Presen ia blong save mo paoa, i kam long God. Long taem blong endaomen, yumi mekem ol kavenan wetem God we i fasem yumi wetem Hem mo Pikinini blong Hem, Jisas Kraes (luk long japta 1).

Ol adalt bae oli save kasem tempol endaomen blong olgetawan afta we oli kasem membasip blong wan yia taem. Blong kasem moa infomesen abaot endaomen, luk long Jeneral Hanbuk, 27.2.

Mared mo Ol Famli we I No Save Finis

Plan blong God blong stap hapi, i mekem se fasin blong holem taet ol famli tugeta i save gohed afta long ded. Insaed long tempol yumi save stap mared blong taem mo kasem taem we i no save finis. Hemia i mekem i posibol blong ol famli oli stap tugeta blong oltaem.

Afta we ol kapol we oli mared mo kasem tempol endaomen blong olgeta, oli save sil o mared blong taem we i no save finis. Ol pikinini blong olgeta bae oli save sil wetem olgeta.

Wan hasban mo waef we oli bin sil long tempol, oli mas kipim ol kavenan we oli bin mekem blong kasem ol blesing blong mared we i no save finis.

Gat Fasin Ia blong Andastanem Nid, Taem Yu Stap Tijim abaot Famli we Bae I No Save Finis

Sam pipol bae oli save gat ol famli situesen we i mekem se bae oli no save stap tugeta blong oltaem. Ol narawan oli no gat wan patna o pikinini long laef ia.

Rimaenem olgeta we yu stap tijim se plan blong God i wan plan blong stap hapi. Helpem olgeta blong luksave se, blong stap laef folem gospel naoia, bae i save helpem olgeta blong kam wan famli we i no save finis long fiuja, iven sapos hemia i kam afta long laef ia.

Nomata long situesen blong famli blong wan o long saed blong olgeta we oli mared, ol adalt oli mas rere blong kasem tempol endaomen blong olgetawan. Blong kasem endaomen blong olgeta, bae i givim bigfala paoa long olgeta. Mo tu, helpem olgeta blong luk se oli gat janis blong joen wetem ol bubu we oli ded finis tru long tempol wok.

Stadi long Ol Skripja

• Doktrin mo Ol Kavenan 43:16; 95:8–9; 97:10–16; 109; 131:1–4

Lanem Moa abaot Prinsipol Ia

• Jeneral Hanbuk, japta 27: “Ol Tempol Odinens blong Olgeta we Oli Stap Laef”

• Gospel Topik: “Tempol, Haos blong Lod,” “Endaomen,” “Mared”

• temples.ChurchofJesusChrist.org

Invitesen

?Bae yu rere blong go long tempol mo kasem ol odinens blong tempol?