« តើពរជ័យដែលបានសន្យារបស់ព្រះមានចំពោះមនុស្សខ្ទើយដែរឬទេ ? » ការប្រតិព័ទ្ធភេទដូចគ្នា ៖ បុគ្គលម្នាក់ៗ ( ឆ្នាំ ២០២០ )
« តើពរជ័យដែលបានសន្យារបស់ព្រះមានចំពោះមនុស្សខ្ទើយដែរឬទេ ? » ការប្រតិព័ទ្ធភេទដូចគ្នា ៖ បុគ្គលម្នាក់ៗ
តើពរជ័យដែលបានសន្យារបស់ព្រះមានចំពោះមនុស្សខ្ទើយដែរឬទេ ?
ពរជ័យរបស់ព្រះមានសម្រាប់មនុស្សគ្រប់គ្នា
« ពួកយើងទាំងអស់គ្នាក្រឡេកទៅមើលជីវិតរបស់យើងនៅពេលខ្លះ ហើយព្យាយាមវាយតម្លៃថា ‹ តើយើងនៅត្រង់ណា ? តើខ្ញុំស្ថិតនៅត្រង់ណាក្នុងជីវិតខ្ញុំ ? › ខ្ញុំតែងតែនិយាយថា ពេលអ្នកចាប់ផ្ដើមប្រៀបធៀបខ្លួនអ្នកទៅនឹងគ្នាទៅវិញទៅមក នោះវានឹងនាំទៅរកការបាក់ទឹកចិត្ត ឬវាដឹកនាំទៅរកអំនួត ។ ចំណុចទាំងពីរគឺមិនល្អទេ ប៉ុន្ដែជារឿយៗ នោះជាអ្វីដែលកើតឡើង នៅពេលមនុស្សចាប់ផ្ដើមប្រៀបធៀបគ្នា ។ ពួកគេចាប់ផ្ដើមគិតថា ‹ វាសនាខ្ញុំល្អជាងក្នុងជីវិតនេះ › ឬ ‹ វាសនាខ្ញុំកាន់តែអាក្រក់ក្នុងជីវិតនេះ › ។ ហេតុដូច្នេះហើយ វាមិនមែនជារឿងស្ថាបនានោះទេ ដែលយើងត្រូវប្រៀបធៀបកាលៈទេសៈរបស់យើងទៅនឹងកាលៈទេសៈរបស់អ្នកដទៃនោះ ។ ពរជ័យខ្លះនឹងកើតមានក្នុងពេលខ្លីខាងមុខ ហើយពរជ័យខ្លះទៀតនឹងកើតមានក្នុងពេលដ៏យូរខាងមុខ ។ ខ្ញុំជឿថា ពេលខ្លះពរជ័យនានាកំពុងរង់ចាំយើង បន្ទាប់ពីយើងឆ្លងកាត់វាំងនននោះ នៅក្នុងជីវិតក្រោយឆាកជីវិតនេះរបស់យើង ។ ហើយជីវិតបច្ចុប្បន្នរបស់យើងគឺខ្លីខ្លាំងណាស់បើប្រៀបធៀបនឹងភាពអស់កល្បនោះ ហើយនៅក្នុងជីវិតដ៏ខ្លីនេះ វាគ្មានប្រយោជន៍ទេ ដែលយើងព្យាយាមប្រៀបធៀបឧបសគ្គដែលយើងបានឆ្លងកាត់ ឬព្យាយាមប្រៀបធៀបពរជ័យដែលយើងមាននោះ ។
« យើងចាំពីពេលដែលលោកអ័ដាម និងនាងអេវ៉ាបានចាកចេញពីសួនច្បារអេដែន រឿងមួយដែលត្រូវបានណែនាំ នៅពេលពួកលោកបានចាកចេញគឺអំពីបន្លា និងអញ្ចាញ ហើយយើងទាំងអស់គ្នាមានបន្លា និងអញ្ចាញនោះនៅក្នុងជីវិតរបស់យើង ។ ប៉ុន្ដែយើងអាចមានទំនុកចិត្តថា យើងអាចយកឈ្នះលើឧបសគ្គទាំងអស់នោះបាន មិនថាវាអាចជាអ្វីដែលនៅចំពោះមុខយើងនោះទេ ។ ព្រះអម្ចាស់មានបន្ទូលមកយើងថា យើងនឹងមានឧបសគ្គនៅតាមផ្លូវ ហើយទ្រង់ថែមទាំងមានបន្ទូលប្រាប់យើងថា សេចក្ដីទុក្ខវេទនារបស់យើងនឹងបានទៅជាផលប្រយោជន៍ដល់យើងវិញ ។ ឥឡូវនេះ ពេលខ្លះយើងត្រូវរង់ចាំប៉ុន្មានឆ្នាំសិនសម្រាប់ការណ៍នេះ ប៉ុន្ដែទីបំផុត យើងអាចជឿជាក់ថា ការសន្យានៃជីវិតដ៏អស់កល្បគឺសម្រាប់មនុស្សគ្រប់គ្នា ។ មនុស្សគ្រប់គ្នានឹងទទួលបានរង្វាន់សម្រាប់ភាពស្មោះត្រង់របស់ពួកគេស្មើៗគ្នា ។ ប្រសិនបើអ្នកស៊ូទ្រាំរហូតដល់ទីបញ្ចប់ នោះអ្នកនឹងមានពរជ័យ ។ វាអាចលំបាកនៅថ្ងៃនេះ និងថ្ងៃស្អែក និងខែក្រោយ ប៉ុន្ដែវានឹងមិនលំបាករហូតឡើយ ។ អ្នកអាចធ្វើការណ៍នេះបាន កាលណាអ្នកអនុវត្តសេចក្ដីជំនឿរបស់អ្នកលើព្រះយេស៊ូវគ្រីស្ទ លើដង្វាយធួនរបស់ទ្រង់ ។
« ពេលខ្លះយើងនឹងមានឧបសគ្គ និងការសាកល្បង ដែលនឹងកើតមានចំពោះយើង ដែលមើលទៅហាក់ដូចជាពិបាកខ្លាំងណាស់ ស្ទើរតែមិនអាចទ្រាំបាន ។ ប៉ុន្ដែ ទ្រង់មានបន្ទូលថា ‹ ចូរសង្ឃឹមឡើង ដ្បិតយើងនឹងដឹកនាំអ្នករាល់គ្នា › ។ នោះគឺជាការសន្យាមួយមកពីព្រះអម្ចាស់ ។ ចូរសង្ឃឹមឡើង ។ នៅកណ្ដាលឧបសគ្គរបស់អ្នក ចូរសង្ឃឹមឡើង ដ្បិតយើងនឹងដឹកនាំអ្នករាល់គ្នា ។ ហើយខ្ញុំសូមថ្លែងទីបន្ទាល់ថា ព្រះយេស៊ូវគ្រីស្ទនឹងដឹកនាំអ្នករាល់គ្នាឲ្យឆ្លងកាត់ឧបសគ្គទាំងឡាយ ដែលអ្នករាល់គ្នាមាន » ( ហ្គែរី អ៊ី ស្ទីវ៉ែនសុន « No Blessings Denied the Faithful » នៅលើគេហទំព័រ ChurchofJesusChrist.org ) ។