« តើខ្ញុំជាសមាជិកម្នាក់របស់សាសនាចក្រដែរឬទេ ? » ការប្រតិព័ទ្ធភេទដូចគ្នា ៖ បុគ្គលម្នាក់ៗ ( ឆ្នាំ ២០២០ )
« តើខ្ញុំជាសមាជិកម្នាក់របស់សាសនាចក្រដែរឬទេ ? » ការប្រតិព័ទ្ធភេទដូចគ្នា ៖ បុគ្គលម្នាក់ៗ
តើខ្ញុំជាសមាជិកម្នាក់របស់សាសនាចក្រដែរឬទេ ?
យើងចង់មានអ្នកនៅទីនេះ
« យើងបានធ្វើការពិចារណា និងខ្វល់ខ្វាយច្រើនដើម្បីយល់ដឹងកាន់តែច្បាស់ពីបទពិសោធន៍នៃការប្រតិព័ទ្ធភេទដូចគ្នា ។ ហើយការធ្វើឲ្យប្រាកដថា បុគ្គលម្នាក់ៗដែលមានអារម្មណ៍ប្រតិព័ទ្ធបែបនោះ ព្រមទាំងក្រុមគ្រួសាររបស់ពួកគេផងដែរ មានអារម្មណ៍ថាត្រូវបានគេស្វាគមន៍ និងជាផ្នែកមួយនៃគ្រួសារដ៏ធំទូទាំងពិភពលោកនេះ ពោលគឺសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។
« ឥឡូវនេះ ខ្ញុំសូមនិយាយដោយចំៗទៅកាន់សមាជិកសាសនាចក្រ ដែលមានអារម្មណ៍ប្រតិព័ទ្ធភេទដូចគ្នា ឬដែលកំណត់អត្តសញ្ញាណថាជាមនុស្សខ្ទើយប្រុស ខ្ទើយស្រី ឬខ្ទើយទាំងពីរភេទ ។ ពួកយើងចង់ឲ្យអ្នកដឹងថា យើងស្រឡាញ់អ្នក ។ យើងស្វាគមន៍អ្នក ។ យើងចង់ឲ្យអ្នកមកចូលរួមជាផ្នែកមួយនៃសាលាប្រជុំរបស់យើង ។ អ្នកមានទេពកោសល្យ និងសមត្ថភាពដ៏អស្ចារ្យដើម្បីផ្ដល់ជូនដល់នគររបស់ព្រះនៅលើផែនដី ហើយយើងទទួលស្គាល់ការរួមចំណែកដ៏មានតម្លៃជាច្រើនដែលអ្នកបានធ្វើ ។ ប្រសិនបើអ្នកណាម្នាក់ក្នុងចំណោមពួកអ្នកមិនច្បាស់ថា តើសាសនាចក្រមានគោលជំហរយ៉ាងណាស្ដីពីបញ្ហាទាំងនេះ នោះយើងសូមអញ្ជើញអ្នកឲ្យចំណាយពេលវេលា ដើម្បីអានឯកសារដែលបានចេញផ្សាយនៅ [ ជួយដល់ជីវិត និងភាពខ្លួនទីពឹងខ្លួន នៅលើគេហទំព័រ ChurchofJesusChrist.org ឬនៅលើកម្មវិធីបណ្ណាល័យដំណឹងល្អ ] ។ សូមស្វែងរកព្រះវិញ្ញាណនៅក្នុងការអធិស្ឋាន ដើម្បីទទួលបានចម្លើយទាំងឡាយដែលអ្នកស្វែងរក ។ ហើយសូមប្រាកដថា ព្រះស្រឡាញ់បុត្រាបុត្រីរបស់ទ្រង់ » ( អិល វិតនី ក្លេតុន « God Loveth His Children » នៅលើគេហទំព័រ ChurchofJesusChrist.org ) ។
តើខ្ញុំអាចចូលរួមបានយ៉ាងដូចម្ដេច ?
ព្រះសន្យាថា ប្រសិនបើយើងគោរពតាមក្រឹត្យវិន័យរបស់ទ្រង់ នោះយើងនឹងមានអំណរដ៏អស់កល្បជានិច្ច ហើយទ្រង់នឹងរក្សាការសន្យារបស់ទ្រង់ជានិច្ច ។ មនុស្សដែលមានអារម្មណ៍ប្រតិព័ទ្ធភេទដូចគ្នា ឬស្គាល់ថាជាមនុស្សខ្ទើយអាចធ្វើ និងរក្សាការសន្យាទាំងឡាយចំពោះព្រះបាន ។ ពួកគេអាចដើរនៅក្នុងពន្លឺរបស់ទ្រង់បាន ។ ពួកគេអាចចូលរួមនៅក្នុងសាសនាចក្រយ៉ាងពេញលេញបាន ។
« ប្រសិនបើសមាជិកមានអារម្មណ៍ប្រតិព័ទ្ធភេទដូចគ្នា ហើយពុះពារដើម្បីរស់នៅតាមច្បាប់ព្រហ្មចារីភាព នោះថ្នាក់ដឹកនាំគាំទ្រ និងលើកទឹកចិត្តពួកគេនៅក្នុងការខិតខំរបស់ពួកគេ ។ សមាជិកទាំងនេះអាចទទួលបានការហៅក្នុងសាសនាចក្រ កាន់ប័ណ្ណចូលព្រះវិហារបរិសុទ្ធ និងទទួលបានពិធីបរិសុទ្ធនៃព្រះវិហារបរិសុទ្ធ ប្រសិនបើពួកគេមានភាពស័ក្ដិសម ។ សមាជិកបុរសទាំងឡាយអាចទទួល និងប្រើប្រាស់បព្វជិតភាពបាន » ( « ការប្រតិព័ទ្ធលើភេទដូចគ្នា និងអាកប្បកិរិយានៃការប្រតិព័ទ្ធភេទដូចគ្នា » ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ៣៨.៦.១២ ) ។
ប្រធាន ហ្គរដុន ប៊ី ហ៊ិងគ្លី បានថ្លែងដូច្នេះ ៖
« យើងស្រឡាញ់ពួកគេជាបុត្រាបុត្រីរបស់ព្រះ ។ ពួកគេអាចមានទំនោរការល្បួងមួយចំនួន ដែលមានអានុភាព ហើយដែលអាចពិបាកនឹងគ្រប់គ្រង ។ មនុស្សភាគច្រើនមានការល្បួងប្រភេទនេះ ឬប្រភេទនោះ នៅពេលផ្សេងៗគ្នា ។ ប្រសិនបើពួកគេពុំទោរទន់ទៅតាមការល្បួងនោះទេ នោះពួកគេអាចឈានឆ្ពោះទៅមុខដូចជាសមាជិកដទៃទៀតនៅក្នុងសាសនាចក្រផងដែរ ។ ប្រសិនបើពួកគេល្មើសច្បាប់ព្រហ្មចារីភាព និងបទដ្ឋានសីលធម៌របស់សាសនាចក្រ នោះពួកគេស្ថិតនៅក្រោមការដាក់វិន័យរបស់សាសនាចក្រ ដូចជាអ្នកដទៃដែរ » ( « What Are People Asking about Us ? » Ensign ខែ វិច្ឆិកា ឆ្នាំ ១៩៩៨ ទំព័រ ៧១ ) ។
មនុស្សគ្រប់គ្នាមានអំណោយទាន
មិនថាមនុស្សម្នាក់នោះមានស្ថានភាពយ៉ាងណាទេ គាត់ ឬនាងអាចរួមចំណែកចំពោះបុព្វហេតុរបស់ព្រះអម្ចាស់នៅក្នុងពេលបច្ចុប្បន្នបាន ហើយអាចរំពឹងទុកថា ភាពស្មោះត្រង់របស់គាត់ ឬនាងនឹងនាំមកនូវពរជ័យដូចគ្នា ទាំងនៅទីនេះ និងនៅពេលខាងមុខ ដែលព្រះបានសន្យាដល់មនុស្សណាដែលមានភាពស្មោះត្រង់ស្រដៀងគ្នានេះ ។ អែលឌើរ ឌី ថត គ្រីស្តូហ្វឺសិន បានសង្កេតមើលឃើញថា
« មនុស្សគ្រប់រូបមានអំណោយទាន មនុស្សគ្រប់រូបមានទេពកោសល្យ មនុស្សគ្រប់រូបអាចរួមចំណែកដើម្បីបើកបង្ហាញអំពីផែនការរបស់ព្រះនៅក្នុងជំនាន់នីមួយៗ ។ មានអ្វីជាច្រើនដែលល្អ ហើយសំខាន់—ទោះពេលខ្លះអ្វីៗទាំងអស់នោះចាំបាច់ក្នុងពេលនេះក្ដី—ក៏យ៉ាងហោចណាស់ វាអាចសម្រេចបានដែរ ទោះស្ថិតក្នុងស្ថានភាពមិនសូវល្អក្ដី ។ ដូច្នេះបងប្អូនជាច្រើនកំពុងខិតខំអស់ពីសមត្ថភាពហើយ ។ ហើយនៅពេលបងប្អូនដែលរែកបន្ទុកដ៏ធ្ងន់នៃជីវិតរមែងស្លាប់ ក្រោកឈរឡើងការពារផែនការរបស់ព្រះ ដើម្បីតម្កើងបុត្រាបុត្រីទ្រង់ នោះយើងទាំងអស់គ្នាត្រៀមខ្លួនដើម្បីគាំទ្រ ។ យើងសូមថ្លែងទីបន្ទាល់ដោយមានទំនុកចិត្តថា ដង្វាយធួននៃព្រះយេស៊ូវគ្រីស្ទបានរំពឹងរង់ចាំជាមុន ហើយនៅទីបំផុត នឹងបង់សងរាល់ការខូចខាត និងការខ្វះខាត និងការបាត់បង់ទាំងអស់ចំពោះអ្នកទាំងឡាយដែលងាកទៅរកទ្រង់ ។ គ្មាននរណាម្នាក់ត្រូវបានកំណត់វាសនាមកឲ្យទទួលតិចជាងអ្វីៗទាំងអស់ ដែលព្រះវរបិតាមានសម្រាប់បុត្រាបុត្រីរបស់ទ្រង់នោះទេ » ( « Why Marriage, Why Family » Liahona ខែ ឧសភា ឆ្នាំ ២០១៥ ទំព័រ ៥២ ) ។