« តើព្រះស្រឡាញ់ខ្ញុំដែរឬទេ ? » ការប្រតិព័ទ្ធភេទដូចគ្នា ៖ បុគ្គលម្នាក់ៗ ( ឆ្នាំ ២០២០ )
« តើព្រះស្រឡាញ់ខ្ញុំដែរឬទេ ? » ការប្រតិព័ទ្ធភេទដូចគ្នា ៖ បុគ្គលម្នាក់ៗ
តើព្រះស្រឡាញ់ខ្ញុំដែរឬទេ ?
ព្រះស្រឡាញ់អ្នកយ៉ាងពេញបរិបូរ
ប្រធាន ឌៀថើរ អេហ្វ អុជដូហ្វ បានពិពណ៌នាពីសេចក្ដីស្រឡាញ់របស់ព្រះដូច្នេះ ៖
« ព្រះមិនបានទតមើលមនុស្សតែសំបកក្រៅនោះទេ ។ ខ្ញុំជឿជាក់ថា ទ្រង់មិនខ្វល់ឡើយ ទោះជាយើងរស់នៅក្នុងវិមាន ឬខ្ទម ទោះជាយើងមានរូបរាងសង្ហា ឬមិនស្រស់ស្អាត ទោះបីជាយើងជាមនុស្សល្បីឈ្មោះ ឬគ្មានកេរ្តិ៍ឈ្មោះក្ដី ។ ទោះជាយើងគ្មានលក្ខណៈសម្បត្តិគ្រប់គ្រាន់ក្ដី ក៏ព្រះស្រឡាញ់យើងអស់ពីព្រះទ័យទ្រង់ដែរ ។ ទោះជាយើងមិនបានល្អឥតខ្ចោះក្ដី ក៏ព្រះស្រឡាញ់យើងយ៉ាងល្អឥតខ្ចោះដែរ ។ ទោះជាយើងមានអារម្មណ៍ថាវង្វេងផ្លូវ ហើយគ្មានត្រីវិស័យនាំផ្លូវក្ដី ក៏សេចក្ដីស្រឡាញ់របស់ព្រះឱបក្រសោបយើងទាំងស្រុងដែរ ។
« ទ្រង់ស្រឡាញ់យើង ដោយសារទ្រង់ពោរពេញដោយទំហំនៃសេចក្ដីស្រឡាញ់ដ៏បរិសុទ្ធ សុទ្ធសាធ និងពុំអាចពិពណ៌នាបានឡើយ ។ យើងសំខាន់ចំពោះព្រះ ពុំមែនដោយសារតែប្រវត្តិរូបរបស់យើងនោះទេ ប៉ុន្ដែដោយសារយើងគឺជាបុត្រាបុត្រីរបស់ទ្រង់ ។ ទ្រង់ស្រឡាញ់យើងគ្រប់ៗគ្នា » ( « The Love of God » Liahona ខែ វិច្ឆិកា ឆ្នាំ ២០០៩ ទំព័រ ២២–២៣ ) ។
ព្រះស្រឡាញ់យើងទាំងអស់គ្នា ។ ទ្រង់ស្រឡាញ់ទាំងអ្នកដែលមានជំនឿផ្សេង និងអ្នកដែលគ្មានជំនឿ ។ ទ្រង់ស្រឡាញ់អ្នកដែលរងទុក្ខ ។ ទ្រង់ស្រឡាញ់អ្នកមាន ក៏ដូចជាអ្នកក្រីក្រ ។ ទ្រង់ស្រឡាញ់មនុស្សគ្រប់ជាតិសាសន៍ និងវប្បធម៌ ទាំងអ្នករៀបការរួច ឬនៅលីវ និងអ្នកដែលមានជាប់ទាក់ទងនឹងការប្រតិព័ទ្ធភេទដូចគ្នា ឬស្គាល់ថាជាខ្ទើយប្រុស ខ្ទើយស្រី ឬខ្ទើយទាំងពីរភេទ ។ ហើយព្រះអម្ចាស់រំពឹងឲ្យយើងធ្វើតាមគំរូទ្រង់ ។
ព្រះបានប្រទានព្រះរាជបុត្រារបស់ទ្រង់ឲ្យអ្នក
« ដ្បិតព្រះទ្រង់ស្រឡាញ់មនុស្សលោកដល់ម្ល៉េះបានជាទ្រង់ប្រទានព្រះរាជបុត្រាទ្រង់តែ១ ដើម្បីឲ្យអ្នកណាដែលជឿដល់ព្រះរាជបុត្រា នោះមិនត្រូវវិនាសឡើយ គឺឲ្យមានជីវិតអស់កល្បជានិច្ចវិញ » ( យ៉ូហាន ៣:១៦ ) ។
គ្មានអ្វីដែលបង្ហាញពីជម្រៅនៃសេចក្ដីស្រឡាញ់ និងការជួយរបស់ព្រះបានពេញលេញជាងព្រះឆន្ទៈ ដើម្បីលះបង់ព្រះរាជបុត្រារបស់ទ្រង់ដើម្បីឲ្យយើង ដែលជាបុត្រាបុត្រីរបស់ទ្រង់ អាចយកឈ្នះលើសេចក្ដីស្លាប់ ហើយទទួលបានជីវិតដ៏អស់កល្បជានិច្ចនោះទេ ។
គ្មានអ្វីដែលបង្ហាញពីសេចក្ដីស្រឡាញ់របស់ព្រះយេស៊ូវគ្រីស្ទប្រសើរជាងព្រះឆន្ទៈលះបង់ព្រះជន្មរបស់ទ្រង់ ដើម្បីធ្វើឲ្យធួននឹងអំពើបាបរបស់មនុស្សលោក បង់ថ្លៃសងរាល់ការរងទុក្ខ និងភាពអយុត្តិធម៌ ហើយផ្ដាច់ចំណងនៃសេចក្ដីស្លាប់របស់មនុស្សទាំងអស់នោះទេ ( សូមមើល អាលម៉ា ៧:១១–១៣ ) ។