« ហេតុអ្វីព្រះមិនឆ្លើយតបនឹងការអធិស្ឋានរបស់ខ្ញុំ ? » ការប្រតិព័ទ្ធភេទដូចគ្នា ៖ បុគ្គលម្នាក់ៗ ( ឆ្នាំ ២០២០ )
« ហេតុអ្វីព្រះមិនឆ្លើយតបនឹងការអធិស្ឋានរបស់ខ្ញុំ ? » ការប្រតិព័ទ្ធភេទដូចគ្នា ៖ បុគ្គលម្នាក់ៗ
ហេតុអ្វីព្រះមិនឆ្លើយតបនឹងការអធិស្ឋានរបស់ខ្ញុំ ?
ព្រះទ្រង់ស្ដាប់ឮការអធិស្ឋានរបស់អ្នក
នៅពេលខ្លះ ជីវិតអាចមើលទៅមិនយុត្តិធម៌ទេ ។ វាអាចមើលទៅហាក់ដូចជា ការអធិស្ឋានដ៏ស្មោះសររបស់យើងមិនទទួលបានចម្លើយសោះ ។ វាអាចមើលទៅហាក់ដូចជា យើងត្រូវបានគេបដិសេធមិនឲ្យមានឱកាសពេញលេញ និងពរជ័យដ៏មហិមារបស់ព្រះ ។ ប៉ុន្ដែគ្មានការអធិស្ឋានដ៏ស្មោះត្រង់ណាមួយដែលព្រះមិនស្ដាប់ឡើយ ។ ព្រះនឹងបំពេញសេចក្ដីសន្យារបស់ទ្រង់ទាំងអស់ ។ គ្មានពរជ័យណាមួយនឹងត្រូវបានបដិសេធមិនប្រទានដល់បុត្រាបុត្រីរបស់ទ្រង់ដែលគោរពប្រតិបត្តិ និងពោរពេញដោយសេចក្ដីជំនឿឡើយ ។ សក្ដានុពលដ៏ទេវភាពរបស់យើងគឺ ការអាចរស់នៅជាក្រុមគ្រួសារដ៏អស់កល្ប ហើយក្លាយដូចជាព្រះវរមាតាបិតាសួគ៌របស់យើង ។
ពេលខ្លះ ការសង្ស័យ ការភ័យខ្លាច និងការថប់អារម្មណ៍របស់យើងអាចមើលទៅដូចជាលើសលប់ខ្លាំង ។ ជីវិតអាចចោទជាសំណួរពិបាកៗ ហើយមានឧបសគ្គដ៏ធ្ងន់ធ្ងរ ។ ការមានសេចក្ដីជំនឿគឺមិនមែនត្រូវទទួលបានចម្លើយទាំងអស់នោះទេ ប៉ុន្ដែការជ្រើសរើសមានសេចក្ដីជំនឿលើការសង្ស័យ គឺជាជម្រើសមួយដើម្បីទុកចិត្តលើព្រះ ។ យើងជ្រើសរើសទុកចិត្តលើផែនការរបស់ទ្រង់ និងពេលវេលារបស់ទ្រង់ ទោះបីជាផ្នែកខ្លះនៃបទពិសោធន៍ជីវិតរមែងស្លាប់របស់យើងមិនមានន័យចំពោះយើងនៅពេលបច្ចុប្បន្នក្ដី ។ កាលយើងដាក់សេចក្ដីជំនឿ និងការទុកចិត្តរបស់យើងលើព្រះ ហើយមានសេចក្តីអត់ធ្មត់ដើម្បីស្ថាបនាសេចក្ដីជំនឿរបស់យើងពីមួយថ្ងៃទៅមួយថ្ងៃ នោះនៅទីបញ្ចប់ យើងនឹងមើលឃើញអ្វីៗទាំងអស់យ៉ាងច្បាស់លាស់ ។ ( សូមមើល កូរិនថូស ទី១ ១៣:១២ ) ។
ការមើលឃើញច្បាស់លាស់មិនមែនជាព្រឹត្តិការណ៍មួយនោះទេ ។ តែវាគឺជាដំណើរការមួយ ។ យើងមើលឃើញកាន់តែច្បាស់លាស់ នៅពេលយើងបំពេញសក្ដានុពលរបស់យើងក្នុងនាមជាបុត្រាបុត្រីរបស់ព្រះ ។ ចុះតើអ្វីទៅជាសក្ដានុពលរបស់យើង ? ប្រសិនបើយើងធ្វើឲ្យអស់ពីសមត្ថភាពរបស់យើង ដើម្បីកាន់តាមបទបញ្ញត្តិរបស់ទ្រង់ នោះទ្រង់បានសន្យានូវអំណរដ៏អស់កល្ប—ជាអំណរដ៏ពិត និងយូរអង្វែង ។