Lesson 2 Materyal sa Paghahanda para sa Klase

Pagtugon sa mga Propeta ng Panginoon

Marahil nakakita ka na ng iba’t ibang tugon o reaksyon ng mga tao sa mga mensaheng ipinahayag ng mga propeta. Iba’t iba rin ang tugon ng mga tao sa Aklat ni Mormon. Ano ang matututuhan natin mula sa mga tao at mga propeta sa Aklat ni Mormon tungkol sa pagtugon sa Panginoon at sa Kanyang mga mensahe? Sa iyong pag-aaral, pag-isipan kung paano ka maaaring tumugon nang may higit na pananampalataya at pagsunod sa salita ng Diyos na ipinahayag sa pamamagitan ng Kanyang mga propeta.

Bahagi 1

Paano naipadarama ng mga babala ng mga propeta ang pagmamahal ng Panginoon para sa akin?

Sinabi ni Pangulong Henry B. Eyring ng Unang Panguluhan:

Dahil mabait ang Panginoon, tumatawag Siya ng mga tagapaglingkod para balaan ang mga tao sa panganib. Ang panawagang iyon na magbabala ay lalo pang pinag-igting at binigyang-halaga ng katotohanan na ang pinakamahahalagang babala ay tungkol sa mga panganib na hindi pa iniisip ng mga tao na totoo. (“Ating Iparinig ang Ating Tinig na Nagbababala,” Liahona, Ene. 2009, 3)

Mag-aral upang Makapaghanda para sa Klase

Basahin ang 1 Nephi 1:4, at alamin kung sino ang isinugo ng Panginoon upang balaan ang mga tao sa Jerusalem at kung anong mensahe ang ipinahayag niya.

Tulad ng maraming propetang nauna sa kanya, si Lehi ay nanalangin para sa mga tao sa Jerusalem. Pagkatapos ay napuspos siya ng Espiritu at nakita niya si Jesucristo sa pangitain. Ipinakita ng Panginoon ang isang aklat kay Lehi at ipinabasa Niya ito sa kanya. (Tingnan sa 1 Nephi 1:5–12.)

Mag-aral upang Makapaghanda para sa Klase

Basahin ang 1 Nephi 1:13–14, at alamin kung ano ang naunawaan ni Lehi tungkol sa Panginoon. Maaari mong markahan kung ano ang nalaman mo.

Itinuro ni Elder D. Todd Christofferson ng Korum ng Labindalawang Apostol:

Ang humihikayat na itaas ang tinig ng babala ay pag-ibig—pag-ibig sa Diyos at sa kapwa-tao. Ang magbabala ay ang magmalasakit. (“Ang Tinig ng Babala,” Liahona, Mayo 2017, 109)

Mag-aral upang Makapaghanda para sa Klase

Basahin ang 1 Nephi 1:19–20, at alamin kung paano tumugon ang mga tao sa Jerusalem sa mensaheng ibinahagi ni Lehi.

Sa ating panahon, tumawag ang Panginoon ng 15 kalalakihan (ang mga miyembro ng Unang Panguluhan at Korum ng Labindalawang Apostol) bilang mga propeta, tagakita, at tagapaghayag. Itinuro ni Elder Ulisses Soares ng Korum ng Labindalawang Apostol ang sumusunod tungkol sa pagkakaroon ng mga propeta sa mundo:

Ang pagkakaroon ng mga propeta ay pagpapamalas ng pagmamahal ng Diyos sa Kanyang mga anak. [Ipinapakita] nila ang mga pangako at tunay na katangian ng Diyos at ni Jesucristo sa Kanilang mga tao. (“Ang mga Propeta ay Nagsasalita sa Pamamagitan ng Kapangyarihan ng Espiritu Santo,” Liahona, Mayo 2018, 99)

Itinuro rin ni Nephi na ang Tagapagligtas ang pinakamahalaga sa itinuturo at isinusulat ng mga propeta.

Mag-aral upang Makapaghanda para sa Klase

Basahin ang 2 Nephi 25:26, at alamin kung bakit nagtuturo at nagpapatotoo ang mga propeta tungkol kay Jesucristo.

Magnilay-nilay upang Makapaghanda para sa Klase

Paano nakatulong ang mga propeta na lumakas ang iyong pananampalataya sa Tagapagligtas? Anong mga kamakailang mensahe ng mga propeta ang nakatulong sa iyo na mas maunawaan ang katangian ng Diyos at ni Jesucristo?

Bahagi 2

Paano ko malalaman na ang buhay na propeta ay kumakatawan sa Panginoon?

Isipin kung ano kaya ang pakiramdam kung isa ka sa mga anak ni Lehi nang sabihin niya sa kanila na nais ng Panginoon na lisanin nila ang kanilang tahanan at maglakbay sila sa ilang. Paano ka kaya tutugon sa mensaheng ito?

Mag-aral upang Makapaghanda para sa Klase

Basahin ang 1 Nephi 2:11–13, 16–17, at alamin kung paano tumugon ang mga anak ni Lehi sa kanya at sa mensahe ng Panginoon na lisanin ang Jerusalem. Maaari mong markahan kung ano ang nalaman mo.

Ipinaliwanag ni Pangulong Eyring:

Sa pamilya ni Lehi, ang mga nanampalataya lamang at nakatanggap mismo ng nagpapatibay na paghahayag ang nakakita kapwa sa panganib at sa landas tungo sa kaligtasan. Sa mga taong walang pananampalataya, ang pagpunta sa ilang ay hindi lamang tila kahangalan kundi mapanganib [din]. (“Kaligtasan sa Payo,” Liahona, Hunyo 2008, 5)

Isulat ang Iyong mga Naisip

Maaari mong isulat sa iyong journal ang mga sagot sa mga sumusunod na tanong: Ano ang matututuhan mo mula sa mga halimbawa ng mga anak ni Lehi na makatutulong sa iyong pagtugon sa mga turo ng mga propeta? Kailan ka nakatanggap ng patotoo tungkol sa tungkulin ng propeta o sa mensahe ng propeta?

Bahagi 3

Ano ang matututuhan ko mula sa paraan kung paano tumugon ang mga tao sa Aklat ni Mormon sa mga mensahe ng Panginoon na ipinahayag sa pamamagitan ng mga propeta?

Mag-aral upang Makapaghanda para sa Klase

Pumili ng isa o higit pa sa mga sumusunod na halimbawa ng isang propeta na nagpapahayag ng mensahe mula sa Panginoon. Sa iyong pag-aaral, alamin kung paano tumugon ang mga tao. Tukuyin ang mga alituntuning natutuhan mo tungkol sa pagtugon sa mga propeta. Maaari mong isulat ang mga alituntuning nahanap mo at dalhin ito sa klase.

• Haring Benjamin: Mga Salita ni Mormon 1:17–18; Mosias 2:9; 4:1–3

• Abinadi: Mosias 12:1, 9; 13:1–3; 15:11; 17:11–20

• Alma: Mosias 17:1–4; 18:1–3, 14–16

• Nephi, anak ni Helaman: Helaman 7:11–13, 17–20; 8:4, 7–9

• Samuel: Helaman 13:2–5, 8, 11; 16:1–3, 6–7, 15–18

Habang naglilingkod bilang Unang Tagapayo sa Young Women General Presidency, itinuro ni Sister Carol F. McConkie ang sumusunod:

Maaari tayong magpasiya. Maaari nating pagpasiyahang balewalain, lapastanganin, yapakan, o maghimagsik laban sa mga salita ni Cristo na sinabi ng Kanyang inordenang mga tagapaglingkod. Ngunit itinuro ng Tagapagligtas na ang mga taong gagawa nito ay itatakwil mula sa Kanyang mga pinagtipanang tao [tingnan sa 3 Nephi 20:23]. …

… Nawa’y pagpasiyahan nating manindigan kasama ng mga propeta at mamuhay ayon sa kanilang mga salita hanggang sa tayo ay magkaisa sa pananampalataya, mapadalisay kay Cristo, at mapuno ng kaalaman tungkol sa Anak ng Diyos. (“Mamuhay Ayon sa mga Salita ng mga Propeta,” Liahona, Nob. 2014, 79)

Gusto Mo Bang Matuto Pa? (Opsiyonal)

Ano ang itinuturo ng mga titulong tagakita at Apostol tungkol sa tungkuling ginagampanan ng propeta?

Para malaman ang iba pa tungkol sa tungkuling ginagampanan ng propeta bilang tagakita, pag-aralan ang Mosias 8:16–18.

Paano ko makikilala at matatamo ang sarili kong patotoo tungkol sa mga makabagong propeta?

Panoorin ang video ng Aklat ni Mormon na “Nanalangin si Nephi para kina Laman at Lemuel (1 Nephi 2:8–24)” (6:02) upang makita kung paano nakatanggap si Nephi ng pagpapatunay na nagsasabi ng katotohanan ang kanyang ama.

Nanalangin si Nephi para kina Laman at Lemuel | 1 Nephi 2:8–24

Tumanggap ng patunay si Nephi mula sa Panginoon na totoo ang sinabi ng kanyang ama, at nanalangin din siya para kina Laman at Lemuel.

Sa kanyang mensaheng “Ang Propeta ng Diyos” (Liahona, Mayo 2018, 24–27), itinuro ni Elder Neil L. Andersen ng Korum ng Labindalawang Apostol ang tungkol sa tungkuling ginagampanan ng mga propeta, ang kanilang hangarin na dalhin tayo sa Tagapagligtas, at ang ating kakayahan na malaman para sa ating sarili na sila ay tinawag ng Diyos.