Akonaki ʻa e Kau Palesitení
Vahe 6: Ko e Fetu‘utaki ‘i he vaha‘a ‘o e ‘Otuá mo e Tangatá

Vahe 6

Ko e Fetu‘utaki ‘i he vaha‘a ‘o e ‘Otuá mo e Tangatá

Na‘e akonaki‘aki ‘a Pilikihami ‘Iongi ‘o pehē ko hotau “ ‘uluaki mo hotau tefito‘i fatongiá [ke] fekumi ki he ‘Eikí kae ‘oua leva kuo tau fakaava ‘a e founga ke fetu‘utaki mai ai ‘a e ‘Otuá ki hotau laumālié.” Fuofuoloa si‘i pē mei he pekia ‘a e Palōfita ko Siosefa Sāmitá, na‘e fakamatala ‘a Pilikihami ‘Iongi ki ha‘ane misi ‘a ia na‘e ha‘u ai ‘a Siosefa ‘o ‘oange ha fakahinohino kiate ia, ‘o peheni: “Na‘e ha‘u fakahangatonu ‘a Siosefa kiate kimautolu peá ne lea fakamātoato mai ‘i he le‘o mokomoko: “Fakahā ki he kakaí ke nau loto fakatōkilalo mo faitotonu, pea fakapapau‘i foki ‘oku nau tauhi ma‘u ‘a e Laumālie ‘o e ‘Eikí pea te ne tataki kinautolu ki he me‘a totonú. Ke nau tokanga pea ‘oua na‘a tuli meiate kinautolu ‘a e le‘o si‘í; he te ne ako‘i kiate kinautolu ‘a e me‘a ke nau faí pea mo e feitu‘u ke nau ‘alu ki aí; te ne ‘omi ‘e ia ‘a e ngaahi fua ‘o e Pule‘angá… . Fakahā ki he kāingá (Brethren) kapau te nau muimui ki he Laumālie ‘o e ‘Eikí, te nau fou ki he feitu‘u totonú.” (JH). ‘Oku ma‘u ‘e he fānau kotoa ‘a e ‘Otuá ha faingamālie ke fakamaama kinautolu ‘e he Laumālie ‘o Kalaisí pea mo ha fakahā fakafo‘ituitui ‘o fakafou mai ‘i he Laumālie Mā‘oni‘oní ‘o kapau te nau fekumi fakamātoato ki he ‘Eikí.

Ko e Ngaahi Akonaki ‘a Pilikihami ‘Iongí

‘Oku foaki ‘a e Laumālie ‘o Kalaisí ki he fānau kotoa pē ‘a e ‘Otuá koe‘uhí ke fakamaama mo tokoni‘i kinautolu ke nau ‘ilo‘i ‘a e leleí mei he koví.

‘Oku fakamaama ‘e he Laumālie ‘o e ‘Eikí ‘a e tangata kotoa pē ‘oku fanau‘i mai ki he māmaní. ‘Oku ‘ikai ha taha ‘e mo‘ui ‘i he māmaní ‘e ta‘e fakamaamangia kinautolu ‘i ha fa‘ahinga founga ‘e he Laumālie ‘o e ‘Eiki ko Sīsuú. ‘Oku pehē ko e maama ia ‘o māmaní. ‘Okú ne fakamaama ‘a e tangata kotoa pē ‘oku fanau‘i mai ki he māmaní, pea ‘oku ‘i ai pē ha taimi ‘oku ma‘u ai ‘e he tokotaha kotoa ‘a e maama ‘o e laumālie ‘o e mo‘oní [vakai, Sione 1:9; 8:12; Molonai 7:16; T&F 84:46] (DBY, 32).

‘Oku ‘ikai ha taimi ai te u tui ai kuo ‘i ai ha tangata pe fefine ‘i he funga ‘o e māmaní, talu mei he kuonga ‘o ‘Ātamá ‘o a‘u mai ki he ‘ahó ni, na‘e ta‘e fakamaama mo fakahinohino‘i, mo ako‘i ‘aki ‘a e ngaahi fakahā ‘a Sīsū Kalaisí. “ ‘A e hā? ‘A e tangata hīteni ‘oku ‘ikai ke ne ‘ilo ha me‘á?” ‘Io, ‘a e tangata mo‘ui kotoa pē na‘á ne ma‘u ha ‘atamai lelei. ‘Oku ‘ikai pē ke u teitei tui au na‘e ta‘e ‘oange ki he fānau ‘a e tangatá ha faingamālie ke nau ma‘u ‘a e Laumālie ‘o e ‘Eikí ke ako‘i ai kinautolu ke nau ‘ilo‘i ‘a e me‘a totonú mei he me‘a ‘oku halá (DBY, 32).

‘Oku ou … tui fakapapau ‘oku ‘ikai ke ‘ilo‘i ‘e he tangatá ha me‘a tuku kehe pē ‘i he fakahā ‘a e ‘Eiki ko Sīsū Kalaisí, ‘o tatau ai pē ‘i he me‘a fakalotú, fakasaienisí pe faka‘ātí (DBY, 38).

‘Oku ‘i ai ha kau tangata ‘oku nau mohu talēniti, mohu fakakaukau, pea lahi ‘enau ‘ilo ki ha fanga ki‘i founga ngāue kehekehe. ‘Oku nau mataotao ‘i he ngaahi me‘á ni ka ‘oku ‘ikai ke nau ‘ilo‘i ‘e kinautolu pe ko ‘enau ma‘u ‘a honau potó mei fē. ‘Oku te‘eki ai pē ke ‘osi ‘a e fengāue‘aki ‘a e Laumālie Mā‘oni‘oní mo kinautolú. ‘Okú ne kei hokohoko fakahā pē, mo fakahinohino ‘i, ako‘i, pea mo tataki kinautolu (DBY, 33).

‘Oku ‘i heni ‘a e ‘Otuá. ‘Oku fakafonu ‘e hono mālohí ‘a e māmaní. ‘Oku ‘i ai ha‘ane kau talafekau ‘i he ngaahi feitu‘u kotoa pē na‘e fakatupu ‘e hono to‘ukupú. ‘Okú ne hāngaifofonga hifo ki he tangata kotoa pē na‘á ne ma‘ú, pea mo ‘enau ngaahi fakakaukaú; he ‘oku fakafonu ‘e hono potó pea mo hono mālohí ‘a e māmaní hono kotoa [vakai, T&F 88:6–13]. ‘O ‘ikai pehē ‘okú ne ‘i he māmaní kotoa ‘i he sinó, ka ‘i hono Laumālié. ‘Okú ne ‘i heni ke ako‘i, fakahinohino mo tataki ‘a e ngaahi pule‘anga ‘o e māmaní (DBY, 32).

‘Oku folofola ‘a e ‘Otuá ki He‘ene fānaú ‘o fakafou mai ‘i he fakahā.

‘Oku tui ‘a e kakaí ni ki he fakahaá. Na‘e tui ‘a e kakaí ni pea ‘oku nau tui kuo folofola mai ‘a e ‘Eikí mei he langí. Na‘a nau tui pea ‘oku nau tui na‘e fekau‘i mai ‘e he ‘Otuá ‘a e kau ‘āngeló ke fakahā ki māmani ‘a e Ongoongolelei ta‘e ngatá ‘o fakatatau ki he fakamo‘oni ‘a Sioné [vakai, Fakahā 14:6–7] (DBY, 38).

‘Oku tau fa‘a fanongo ki hono lea‘aki ‘o pehē kuo pau pē ke ma‘u ‘e he Siasí ha “kau fakahoko fono mo‘uí” kae lava ke fokotu‘u mo tupulaki ‘a e Pule‘anga ‘o e ‘Otuá ‘i he māmaní. Te u toe ‘oatu hano fakalea ‘e taha ‘o e fakamatala ko ‘ení. Te u pehē kuo pau ke ‘i he toko taha fakafo‘ituitui kotoa pē ‘a e ngaahi fakahā mo‘oni ‘a e ‘Otuá, pe ko e Laumālie ‘o e fakahaá, ka ne ‘ilo‘i ‘a e palani ‘o e fakamo‘uí pea ke muimui ‘i he hala te ne tataki atu kinautolu ki he ‘afio‘anga ‘o e ‘Otuá (DBY, 38).

‘Oku ‘ikai ke ‘i he feitu‘u kotoa pē ‘a e ‘Eikí ‘i he sinó; ka ‘oku ‘i ai ‘a ‘ene kau ngāue ‘oku nau lea mo fakahoko e ngāué ma‘ana. Kuo fili pea fakamafai‘i ‘a ‘ene kau ‘āngeló, kau talafekaú, kau ‘aposetoló pea mo ‘ene kau tamaio‘eikí ke nau ngāue ‘i hono huafá. Pea ‘oku fakamafai‘i foki ‘a ‘ene kau tamaio‘eikí ke nau akonaki mo tu‘utu‘uni ‘i he ngaahi me‘a mahu‘inga tahá, pea ke nau ako‘i, tataki mo fakahinohino ‘a hono Kāingalotú (DBY, 41).

He ‘ikai ha tangata te ne lava ke ma‘u ha mafai ‘i he Pule‘anga ko ‘ení, pea ne kei nofo ma‘u pe ‘i ai, mo fakamā‘oni‘oni‘i ‘a hono uiui‘í ta‘e te ne ma‘u ‘a e mālohi ‘o e ‘Otuá. Kuo pau ke mo‘ui taau ‘a e kakaí ke nau lava ‘o ma‘u mo fiefia ‘i he maama ‘o e Laumālie Mā‘oni‘oní, he ka ‘ikai, ‘e ‘ikai ke nau kei ongo‘i falala kiate kinautolu pē, pe ki he‘enau tui fakalotú pe ki honau ‘Otuá, pea ‘e ‘ikai fuoloa kuo nau tafoki mei he tuí (DBY, 33).

Na‘e fehu‘i mai ha tangata kiate au pe na‘á ku tataki fēfee‘i ‘a e kakaí ‘aki ‘a e fakahaá. ‘Oku ou ako‘i kinautolu ke nau mo‘ui‘aki ‘a e fa‘ahinga mo‘ui ‘a ia ‘e lava ke fakahā mahino ange ai kiate kinautolu ‘e he Laumālie ‘o e fakahaá, ‘a honau fatongiá koe‘uhí ke nau lava pē ‘e kinautolu ‘o tataki pē kinautolu. ‘Oku fie ma‘u foki ke mo‘ui taau ‘a e kakaí ke ma‘a ‘a honau laumālié ‘o tatau mo e la‘i pepa ‘oku te‘eki ai ke tohitohi‘íi, ‘a ia ‘oku hilifaki ‘i he funga tēpile ‘i mu‘a ‘i he [tokotaha ‘oku te u ke tohi aí], kuo maau ke hiki ai ha fa‘ahinga me‘a pē ‘oku fie tohi‘i ai ‘e he tokotaha ko iá (DBY, 41).

‘Oku ‘ikai ha faka‘uhinga ‘a e māmaní te ne lava ke fakaava ‘a e ngaahi fakakaukau ‘a e kakai ‘atamai potó mo fakahā kiate kinautolu ‘a e ngaahi me‘a ‘o e langí; ‘e toki lava pē ke fai ‘eni ‘e he Laumālie ‘o e fakahaá [vakai, 1 Kolinitō 2:9–14] (DBY, 37).

‘E lava ke tala ‘e he ngaahi fakahā ‘a e ‘Eiki ko Sīsū Kalaisí, ‘a ia ko e laumālie ‘o e mo‘oní, ‘a e me‘a kotoa pē, pea ko kinautolu kotoa pē ‘oku nau ma‘u iá, ‘e mahino kiate kinautolu ‘a e me‘a ‘oku mo‘oní mei he me‘a halá, ‘a e māmá mei he fakapo‘ulí, ‘a e ngaahi me‘a ‘a e ‘Otuá mei he ngaahi me‘a ‘oku ‘ikai ‘a e ‘Otuá. Ko e me‘a pē ia ‘e taha te ne lava ‘o ‘ai ke mahino kiate kitautolu ‘a e ongoongolelei ‘a e ‘Alo ‘o e ‘Otuá, ‘a e finangalo ‘o e ‘Otuá, pea mo e founga ‘e lava ke fakamo‘ui ai kitautolú. Muimui ki ai pea te ne tataki atu kitautolu ki he ‘Otuá ‘a ia ko e fauniteni ia ‘o e māmá, ‘e ava ai ‘a e matapaá, pea fakamaama hotau ‘atamaí pea te tau lava ke mamata, ‘ilo‘i, pea mahino kiate kitautolu ‘a e ngaahi me‘a ‘i honau tu‘unga lolotongá (DBY, 34).

He ‘ikai lava ke ‘ilo ‘e ha tangata ‘a Sīsū ko e Kalaisí tuku kehe pē ‘o ka fakahā ia kiate ia mei he langí [vakai, 1 Kolinitō 12:3] (DBY, 37).

Kapau he ‘ikai ma‘u ha fakahā fakahangatonu mei he langí, he ‘ikai ‘aupito lava ke mahino kakato ki ha taha ia ‘a e palani ‘o e fakamo‘uí (DBY, 38).

Kapau he ‘ikai ke ‘i ai ha ngaahi fakahā mei he ‘Otuá, he ‘ikai ke tau ‘ilo‘i pe ko hai koā kitautolu. Pe na‘a tau ha‘ú mei fē, pe ko hai na‘á ne fakatupu ‘a e māmaní, ‘o tau nofo, ngāue mo mo‘ui aí (DBY 37).

Ko e taimi ko ē ‘oku ue‘i ai ha tangata ‘e he Laumālie ‘o e fakahā mei he ‘Otuá, ‘oku fakaava ‘a hono ‘atamaí ke ne lava ‘o mamata ki hono faka‘ofo‘ofa, maau pea mo e nāunau ‘o hono fakatupu ‘o e māmaní pea mo e kakai ‘oku ‘i aí, ‘uhinga na‘e fakatupu ai kinautolú, pea mo e ‘uhinga na‘e fakakakai ai ia ‘e he Tokotaha na‘á ne Fakatupú ‘a ‘ene fānaú. ‘E toki mahino lelei leva kiate ia ko hono ‘uhinga pē ‘oku tau ‘i heni aí ke ma‘u ‘a hotau hakeaki‘í pea ke tau toe foki hake ki he ‘afio‘anga ‘o ‘etau Tamaí mo hotau ‘Otuá (DBY, 37).

‘Oku fie ma‘u ‘e he tangatá ‘a e Laumālie na‘e foaki mai ‘aki ‘a e kihi‘i konga kotoa pē ‘o e ngaahi fakahā ‘a e ‘Otuá, ‘o hangē ko ia ‘oku foaki ki he fānau ‘a e tangatá, pe ki ha toe taha pē ‘i he langí pe ‘i he māmaní koe‘uhí ke mahino lelei ‘a e ngaahi fakahaá kiate kinautolu, ‘a e Laumālie ‘okú ne fakahā mai ‘a e ngaahi me‘a ko iá, ke mahino ki he fakakaukaú, pea ‘ai ke ‘ilo‘i kinautolu ‘e he ‘atamaí (DBY, 39).

Ka ‘oku totonu ke tau mo‘ui‘aki kakato ‘a e tō‘onga mo‘ui ‘e lava ke tala mai mo tohi ai ‘e he Laumālie ‘o e fakahaá ki he lotó ‘a e me‘a ‘oku totonu ke tau faí, kae tuku ‘a e ngaahi talatupu‘a ‘a ‘etau ngaahi mātu‘á pea mo ‘etau kau faiakó. Ka kuo pau ke tau hoko ‘o tatau mo e fānau īkí ka tau toki lava ke fai ‘eni; pea ‘oku folofola ‘a Sīsū ‘o pehē kapau he ‘ikai ke tau pehē, he ‘ikai ke tau lava ‘o hū ki he pule‘anga ‘o e langí. Me‘a faingofua mo‘oni! Faka‘ata‘ataa‘i ho‘omou mo‘uí mei he loto meheká, loto koví, ‘itá, feke‘ike‘í, ‘a e ngaahi ongo‘i loto tāufehi‘á, pea mo e lea kovi ‘i hotau ngaahi fāmilí, ngaahi kaungā‘apí, ngaahi mahení pea mo e kakai kotoa pē ‘o e māmaní, ‘o tatau ai pē pe ko e fē ha feitu‘u te tau fetaulaki ai mo kinautolu. Tau mo‘ui‘aki ‘a e tō‘onga mo‘ui ‘e tau‘atāina, ma‘a mo ‘ata‘atā ai hotau konisēnisí (DBY, 36).

Kapau te mou ma‘u ha me‘a-hā-mai pe ha fakahā mei he ‘Otua Māfimafí, ha fakahā ‘oku foaki mai ‘e he ‘Eikí fekau‘aki mo kimoutolu pē, pe ko e kakaí ni, ka ‘oku ‘ikai fie ma‘u ke ke fakahā ia koe‘uhí he ‘oku ‘ikai ko e tokotaha totonu koe, pe koe‘uhí ‘oku ‘ikai totonu ke ‘ilo ki ai ‘a e kakaí he taimí ni, ‘oku totonu ke ke tāpuni‘i mo fakama‘u ia ke malu, pea ‘ai ke puli ia mo malu ‘o hangē ko e malu ‘a e fa‘itoká. ‘Oku ‘ikai ke falala ‘a e ‘Eikí kiate kinautolu ‘oku nau fakahā ‘a e ngaahi me‘a ‘oku fakapulipulí koe‘uhí he ‘e ‘ikai lava ke ne fakahā ia ‘e ia ki he fa‘ahinga pehení pea nau tauhi ia ke malu (DBY, 40–41).

‘Oku tau ‘ilo‘i fēfē na‘e hiki ‘e he kau palōfitá ‘a e folofola ‘a e ‘Eikí? ‘I he fakahaá. ‘Oku tau ‘ilo‘i fēfē na‘e uiui‘i ‘e he ‘Otuá ‘a Siosefa Sāmita ke ne fokotu‘u ‘a hono Pule‘angá ‘i he funga ‘o e māmaní? ‘I he fakahaá. ‘Oku tau ‘ilo‘i fēfē ‘oku akonaki‘aki ‘e he kau taki ‘o e kakaí ni ‘a e mo‘oní? ‘I he fakahaá (DBY, 38).

Te ke ‘ilo fēfē ‘oku mo‘oni ‘a e ngāue ‘a e Siasí? ‘Oku fai fakahangatonu mai mei he langí. Ko e hā e me‘a na‘á ne fakamo‘oni‘i atu kiate koe ‘oku mo‘oni ‘a e ngāué ni … Ikai na‘e fakamo‘oni‘i atu ia ‘e he Laumālie ‘o e fakahā na‘á ne nofo‘ia koé? … ‘Oku totonu ke ke tānaki faka‘aho atu ki ai. ‘Oku totonu ke ke tānaki ‘a e ngaahi me‘a ko ia ‘oku foaki mai ‘e he ‘Eikí … ko ha konga si‘i ‘i heni mo e konga si‘i ‘i hena, pea tauhi ‘a e mo‘oni ko iá ‘i ho‘o tuí pea mo e mahino ‘okú ke ma‘ú, kae ‘oua leva kuó ke hoko ‘o haohaoa ‘i he ‘ao ‘o e ‘Eikí pea ke mateuteu ai ke ma‘u mo e ngaahi toe me‘a lahi ange ‘oku kau ki he Pule‘anga ‘o e ‘Otuá (DBY, 36).

Hili ha‘a mou ngāue fai velenga ‘i ha ngaahi ta‘u lahi, te mou ‘ilo mei ai ‘a e fo‘i mo‘oni ko ‘ení–kapau ‘oku mou anga-tonu ‘i homou lotó, pea mou kei hokohoko talangofua ai pē, kei tauhi hokohoko atu ai pē ki he ‘Otuá, pea kei lotu hokohoko atu ai pē, ‘e nofo‘ia kimoutolu ‘e he Laumālie ‘o e fakahaá ‘o hangē ko ha vai ‘oku mapunopuna hake ki he mo‘ui ta‘e ngatá [vakai, T&F 19:38; 63:23]. ‘Oua na‘a tuku ‘e ha tangata ‘a ‘ene lotú koe‘uhí he ‘oku ‘ikai ke ne ma‘u ‘a e laumālie ‘o e lotú pea ‘oua na‘a tuku ke hanga ‘e ha fa‘ahinga me‘a fakaemāmani ‘o fakavavevave‘i koe lolotonga ‘okú ke fakahoko ‘a e fatongia mahu‘inga ko ‘ení. ‘I ho‘o punou hifo ‘i he ‘ao ‘o e ‘Eikí, ‘o kole kiate ia ke ne tāpuaki‘i koé, te ke ‘ilo ai ‘a e me‘á ni–‘e liunga lahi ‘a e ngaahi tāpuaki fakatu‘asino mo fakalaumālie ‘e foaki kiate koe ‘e he ‘Otuá (DBY, 46).

Ko e taha ‘o hotau fatongia mahu‘inga tahá ko e fekumi ki he finangalo ‘o e ‘Otuá ‘i he lotu faka‘ahó.

Kapau ‘e tuku mai ke u fakafaikehekehe‘i ‘a e ngaahi fatongia kotoa ko ia ‘oku fie ma‘u ke fakahoko ‘e he fānau ‘a e tangatá, ‘o kamata pē mei he fika ‘uluakí ki he muimui tahá, te u fakamu‘omu‘a taha pē ‘a e fatongia ‘o e fekumi ke ‘ilo‘i ‘a e ‘Eikí ko hotau ‘Otuá kae ‘oua leva kuo fakaava ‘a e hala ‘oku fai ai ‘a e fetu‘utaki mei he langí ki he māmaní–mei he ‘Otuá ki hotau ngaahi laumālié. Tauhi ke ma‘a mo haohaoa ‘a e vā‘i hala kotoa pē ‘o homou lotó ‘i hono ‘aó (DBY, 41).

Kapau te tau ‘unu‘unu ofi atu kiate ia, te ne ‘unu‘unu mai kiate kitautolu, kapau te tau tomu‘a kumi kiate ia, te tau ‘ilo ia; kapau te tau faka‘aonga‘i totonu mo fakapotopoto ‘a hotau ‘atamaí ‘i he ‘aho ki he ‘aho, ke tau ‘ilo‘i pea mahino kiate kitautolu ‘a e fakakaukau mo e finangalo ‘o e ‘Otuá, ‘e faingofua ange ‘aupito ia ‘i hano ‘ilo‘i ‘o e fakakaukau ‘a e tangatá taki taha (DBY, 42).

Tuku mu‘a ke tau loto mā‘ulalo, anga fakatōkilalo, pea tau fakavaivai‘i kitautolu ki he finangalo ‘o e ‘Eikí, pea te tau ma‘u leva ‘a hono Laumālié ke tataki kitautolu ‘i he taimi ‘o e faingata‘á. Kapau te tau fakaava ‘a hotau ngutú ‘o ui ki he‘etau Tamai Hēvaní ‘i he huafa ‘o Sīsuú, te tau ma‘u ‘a e laumālie ‘o e lotú (DBY, 44).

‘Oku folofola ‘e he ‘Eikí, ‘e fekumi kiate au ‘a hoku kakaí ke ma‘u ‘a e ngaahi tāpuaki ‘oku nau fie ma‘ú. Ko ia, ‘oku totonu ke ‘oua na‘a tau lau fakataha ‘a e lotú mo e ngaahi fatongia kehe ‘oku tuku mai ke tau fua ko e Kāingalotu ‘o e Siasí, ka tau mo‘ui‘aki ke hoko ia ko e taha ‘o e ngaahi monū kuo foaki mo‘otautolú; he ka ne ta‘e ‘oua ‘a e ‘aonga ‘o e lotú, ko e hā nai e me‘a na‘e mei hoko kiate kitautolu fakafo‘ituituí mo fakakātoa ko e kakaí? (DBY, 43).

Ko e fatongia ia ‘o e kakai Siasí ke nau lotu ta‘e tuku, pea fakafeta‘i ‘i he me‘a kotoa pē ‘oku nau ma‘ú, pea mo nau fakahā ‘oku ‘i ai e kaunga ‘a e to‘ukupu ‘o e ‘Eikí he me‘a kotoa pē, pea fakaongoongo ki he ngaahi me‘a ‘okú ne finangalo ke nau faí (DBY, 42).

Tuku ke lotu ‘a e tangata mo e fefine kotoa pē ‘i he huafa ‘o e ‘Eikí, ‘i he loto ‘oku ma‘a, lolotonga ‘oku nau ‘i he‘enau ngaahi ngāue‘angá pe ‘i honau lokí; lolotonga ‘enau ‘i he ngaahi potu fakapule‘angá pe ‘i honau ngaahi potu liló, ‘o nau kole ki he Tamaí ‘i he huafa ‘o Sīsuú ke tāpuaki‘i kinautolu, ke fakamo‘ui mo tataki mo akonekina kinautolu ‘i he hala ‘o e mo‘uí mo e fakamo‘uí pea ke nau mo‘ui‘aki e founga te nau ma‘u ai ‘a e fakamo‘oni ta‘e ngata ko ‘eni ‘oku tau feinga ki aí (DBY, 44).

‘Oku tatau ai pē pe ‘okú ke ongo‘i fie lotu pe ‘oku ou ongo‘i fie lotu, ka ko e hokosia pē ‘a e taimi ke ke lotu aí peá ke lotu. Pea kapau ‘oku ‘ikai ke tau ongo‘i ‘oku tau fie lotu, pea ‘oku totonu leva ke tau lotu kae ‘oua leva pē kuo tau ongo‘i fie lotu (DBY, 44).

‘Oku ha‘u ha ni‘ihi ‘o e kāingalotú kiate au mo nau pehē, “ ‘E Pilikihami, ko haku fatongia nai ia ke u lotu lolotonga ko iá ‘oku ‘ikai ke u ma‘u ‘e au ha momo‘i laumālie ‘o e lotú ‘iate au?” Ko e mo‘oni ia, ‘oku ‘i ai e taimi ‘e ni‘ihi ‘oku puputu‘u ‘a e tangatá pea fonu ‘ene fakakaukaú ‘i he hoha‘a, maumau ‘enau ngaahi palaú pea mo ‘enau ngaahi me‘a ngāué, mole ‘enau fanga monumanú pea puputu‘u ‘enau fakakaukaú ‘i ha ngaahi me‘a kehekehe lahi; ka ‘oku ako‘i kitautolu ‘e he‘etau fakakaukau leleí ko hotau fatongia ia ke lotu, ‘o tatau ai pē pe ‘oku tau ongo‘i fie lotu pe ‘ikai. Ko ‘eku akonakí ‘eni, ko ho fatongia ia ‘o‘ou ke ke lotu; pea ko ‘ene hokosia ko ia ‘a e taimi lotú, ‘oku totonu leva ke pehē ‘e Sione, “Ko e feitu‘u ‘eni pea mo e taimi ke fai ai ‘a e lotú; tū‘ulutui kotoa ki lalo he taimí ni” Ka na‘e peheni ‘a e lea ia ‘a Sioné, “ ‘Oku ‘ikai ke u fie lotu au; ‘oku ‘ikai pē ke u ongo‘i fie lotu au.” Te u lea atu, tū‘ulutui ki lalo; pea ‘e peluki leva ‘a e ngaahi tuí, pea kamata ke fakakaukau mo fakalaulauloto. Te ke lava ‘o lea‘aki ha me‘a? Me‘a ní he ‘ikai ke ke lava ‘o pehē, ‘E ‘Otua, ke ke alo‘ofa mai kiate au ko e angahala? ‘Io, te ke lava ke fai ‘eni, he kapau ‘okú ke lava ke tu‘u hake ‘o lea kovi ki ho kaungā‘apí koe‘uhí ko ha ngāue hala na‘e hoko, te ke lava pē ke fai ‘eni. Ko ia Sione, fakaava ho ngutú he taimí ni peá ke lea ‘o pehē, ‘E ‘Eiki. ‘alo‘ofa mai kiate au. “He ‘oku ‘ikai ke u ongo‘i ‘a e laumālie ‘o e lotú.” ‘Oku ‘ikai ko ha ‘uhinga lelei ia, he ‘okú ke ‘osi ‘ilo‘i pē ho fatongiá (DBY, 45).

Kapau ‘oku pehē atu ‘e he Tēvoló ‘oku ‘ikai ke ke lava koe ‘o lotu ‘i he taimi ‘okú ke ‘ita aí, tala ange ki ai ‘oku ‘ikai ke kau ia ai, pea ke lotu kae ‘oua leva pē kuo mato‘o atu ‘a e fa‘ahinga fakakaukau ko iá mo toe foki mai ‘a e nongá ki ho‘o fakakaukaú (DBY, 45).

‘I ho‘omou ‘ā hake ‘i he pongipongí, ki mu‘a pea mou toki ma‘u ha me‘atokoní, hanga ‘o ui fakataha mai ho uaifí pea mo ho‘o fānaú, pea mou punou ‘i he ‘ao ‘o e ‘Eikí ‘o kole kiate ia ke fakamolemole‘i ho‘omou ngaahi angahalá, mo malu‘i kimoutolu ‘i he ‘aho ko iá, ke fakahaofi kimoutolu mei he ‘ahi‘ahí mo e mālohi kotoa pē, pea ke tataki totonu kimoutolu ‘i homou halá, mo mou fai he ‘aho ko iá ha me‘a ‘a ia ‘e ‘aonga ki he Pule‘anga ‘o e ‘Otuá ‘i he māmaní. ‘Oku ‘i ai nai hamou taimi ke fai ai ‘eni? ‘E kau tangata‘eiki mo e hou‘eiki fāfine, ‘oku ‘i ai nai hamou taimi ke mou lotu ai?

Fai ma‘u pē ho‘omou ngaahi lotú pea mou toki ‘alu ki he ngāué. ‘Oua ‘aupito na‘a ngalo ia. ‘Oku totonu ke ‘oua ‘aupito na‘a ngalo ‘i he tamaí, ko e ‘ulu ia ‘o e fāmilí, ke ne ui fakataha mai hono fāmilí pea fakatapui ia mo hono fāmilí ki he ‘Eiki ‘o e Ngaahi Kau Taú, ‘o kolea ‘a e fakahinohino ‘a hono Laumālie Mā‘oni‘oní ke ne tataki kinautolu ‘i he ‘aho ko iá. Tataki kimautolu he ‘ahó ni, fakahinohino kimautolu he ‘ahó ni, fakamo‘ui kimautolu he ‘ahó ni, fakahaofi kimautolu mei he‘emau faiangahala ki he ‘afioná pe ki ha taha pē ‘i he langí pe ‘i he māmaní, he ‘ahó ni! Kapau te tau fai ‘eni ‘i he ‘aho kotoa pē, te tau mateuteu ‘i he ‘aho faka‘osi ‘o ‘etau mo‘uí ke tau fiefia ‘i ha nāunau ‘oku toe mā‘olunga ange (DBY, 44).

‘Oku mou ‘ilo‘i ko e taha ia ‘o ‘etau tui fakalotú mo e me‘a ‘oku tau tui ki aí, ke ‘oua ‘aupito na’a tau kole ki he ‘Eikí ke ne fai ha fa’ahinga me’a he ‘ikai ke tau fie tokoni ai kiate ia ‘aki hotau lelei tahá; kae toki faka’osi ‘e he ‘Eikí hono toé (DBY, 43).

He ‘ikai te u kole ki he ‘Eikí ke ne fai ha me’a ‘oku ‘ikai te u fiemālie au ke u fakahoko (DBY, 43).

Kapau te u kole kiate ia ke foaki mai kiate au ha poto fekau’aki mo ha fa’ahinga me’a pē ‘i he mo’uí ni, pe ko hoku halá, pe ko ia ‘o hoku ngaahi kaungāme’á, hoku fāmilí, ‘eku fānaú, pe ko kinautolu ‘oku ou tokanga’í, pea ‘ikai pē ke u ma’u ha tali meiate ia, hili iá ‘oku ou fai pē ‘a hoku lelei tahá ki he me’a ‘oku ou ‘iló, kuopau ke ne faka’apa’apa’i ‘e ia ‘a e fealea’aki na’e fakahokó, pea te ne fai ‘eni ‘o fakatatau ki he ngaahi taumu’a kotoa pē na’e fai ai ‘a e lotú (DBY, 43).

Tuku ke kole ‘e he tokotaha Siasi kotoa pē ki he ‘Otuá ‘i he taimi ‘okú ne lotu aí, ‘a e ngaahi me‘a ko ia ‘okú ne fiema‘u ke langa hake ‘aki e anga mā‘oni‘oní ‘i he māmaní. Kapau leva ‘oku ‘ikai ke mou ‘ilo‘i ‘e me‘a ke mou kolé, tuku ke u fakahā atu ‘a e founga ‘o e lotú. Ko e taimi ko ē ‘oku mou lotu ai ‘i homou ngaahi fāmilí pea ‘ikai ke mou ‘ilo‘i e me‘a ke mou kolé, fakavaivai‘i kimoutolu ki he Tamai ‘i Hēvaní pea kole kiate ia ke ne tataki kimoutolu ‘aki ‘a e ngaahi ue‘i ‘a e Laumālie Mā‘oni‘oní, mo tataki ‘a e kakaí ni, pea mo e ngaahi ngāue ‘o hono Pule‘angá ‘i he māmaní, pea ‘osi ai. Kole pē ke ne fokotu‘u koe ‘i he feitu‘u ‘okú ne finangalo ke ke faí, mo ke ongo‘i ‘okú ke mateuteu ke fai ia (DBY, 45–46).

Tuku ke ongo‘i loto māfana ‘a e tokotaha kotoa pē ‘i he taimi ‘okú ne lotu aí kae ‘oua leva kuo nau ‘ilo‘i ‘iate kinautolu pē ‘a e ngaahi me‘a ‘a e ‘Otuá mo nau fakapapau‘i ‘oku nau ‘a‘eva ‘i he hala ‘oku fakatau atu ki he mo‘ui ta‘e ngatá; pea ‘e puli atu leva ‘a e loto meheká, ‘a ia ko e fanau tama ia ‘a e ta‘e ‘iló, pea ‘e ‘ikai ke ongo‘i ‘e ha tangata ‘okú ne mā‘olunga ange ia ha tokotaha kehe; he ‘oku ‘ikai tali ‘a e fa‘ahinga ongo pehení ia ‘i he fokotu‘u- tu‘u ‘o e langí. Na‘e ‘ikai ha taimi ‘e loto ai ‘a Sīsū Kalaisi ke ne kehe mei he‘ene Tamaí. Na‘á na taha pē pea ‘okú na kei taha pē. Kapau ‘oku ‘i ai ha kakai ‘oku tataki ‘aki ‘a e ngaahi fakahā ‘a Sīsū Kalaisí, pea ‘oku nau ‘ilo‘i ‘a e mo‘oni ko ‘ení koe‘uhí ko ‘enau mo‘ui anga-tonú, ‘oku ‘ikai ke nau manavahē ka te nau hoko ‘o taha pē ‘ia Sīsū Kalaisi, ‘o nau femahino‘aki (DBY, 42).

Ngaahi Fokotu‘u ki hono Akó

‘Oku foaki ‘a e Laumālie ‘o Kalaisí ki he fānau kotoa pē ‘a e ‘Otuá koe‘uhí ke fakamaama mo tokoni‘i kinautolu ke nau ‘ilo‘i ‘a e leleí mei he koví.

  • Fakakaukau ki he ngaahi ngāue ‘a e Maama ‘a Kalaisí pe ko e Laumālie ‘o e ‘Eikí. (Vakai foki, Bible Dictionary, “Light of Christ,” 725; T&F 88:6–13; Molonai 7:12–19. ‘Oku ‘uhinga ki he hā ‘a e “fakamāma‘i ‘e he Laumālie ‘o e ‘Eiki ko Sīsuú”?

  • Te tau ‘ilo‘i fēfē ‘a e ngaahi tu‘unga ‘ulungāanga ta‘e ngata ‘o e me‘a ‘oku totonú mo e me‘a halá”?

  • Fakatatau ki he lau ‘a Palesiteni ‘Iongí, ko e hā e ngaahi founga ‘oku “kei fengāue‘aki ai ‘a e Laumālie ‘o e ‘Eikí mo e kakaí”?

  • Ko e hā ‘a e mālohi “ ‘okú ne fakafonu ‘a e māmaní” ‘a ia ‘oku tākiekina ‘aki ‘e he ‘Eikí ‘a ‘Ene fānaú ki he leleí? ‘Oku ‘uhinga fēfē ‘a e pehē ko ia ‘oku ‘ikai ke fu‘u mama‘o ‘a e ‘Otuá meiate kitautolu taki tahá? (Vakai foki, Ngāue 17:27.) Ko e hā e fakamo‘oni ‘okú ke lava ‘o mamata mo tala mei ai ‘oku ‘i ai e kaunga ‘a e ‘Otuá ki he ngaahi me‘a kotoa pē ‘oku hoko ‘i he māmaní?

‘Oku folofola ‘a e ‘Otuá ki He‘ene fānaú ‘o fakafou mai ‘i he fakahaá.

  • Ko hai ‘oku fakamafai‘i ‘e he ‘Eikí ke ne ma‘u ‘a e fakahā ma‘á e Siasí fakakātoa? (Vakai foki, T&F 21:4–5; 28:2; 43:3–4; 90:3–5.) Ko hai ‘a e kau fakahoko fono mo‘uí”? Ko e hā hotau fatongia fekau‘aki mo e kau fakahoko fonó?

  • Na‘e pehē ‘e Palesiteni ‘Iongi ‘e toki lava pē ke ‘ilo‘i ‘a e ngaahi akonaki ‘o e fakamo‘uí ‘i he fakahaá. Ko e hā nai e ngaahi fakahā ‘e tuku mai ‘e he ‘Eikí kiate kitautolu fakafo‘ituituí? (Vakai foki, 2 Nīfai 32:5; Nōmipa 11:29).

  • Fakatatau mo e lau ‘a Palesiteni ‘Iongí, te tau ‘ilo‘i fēfē ‘oku tataki kitautolu ‘o fakatatau mo e finangalo ‘o e ‘Otuá? Ko e hā e ngaahi me‘a te tau fai ka tau ma‘u ai ‘a e fakahaá ke ne tataki kitautolu “ ‘i he ‘aho ki he ‘aho ‘i he‘etau mo‘uí?

  • Ko e hā e tala‘ofa ‘oku fai kiate kinautolu “kuo ta‘u lahi ‘enau ngāue faive- lenga” ‘i he fa‘a lotu, talangofua, pea mo e ngāue tokoní? Ko e hā ha ngaahi me‘a kuó ke a‘usia ‘i ho‘o mo‘uí fekau‘aki mo e lotú, ‘a ia ne tokoni ki hono ‘omai ‘o e Laumālié ki ho‘o mo‘uí?

Ko e taha ‘o hotau ngaahi fatongia mahu‘inga tahá ko e fekumi ki he finangalo ‘o e ‘Otuá ‘i he lotu faka‘ahó.

  • Ko e hā ‘a hotau fatongia “ ‘uluaki mo mu‘omu‘a taha” ‘i he‘etau hoko ko e mēmipa ‘o e Siasí, fakatatau ki mo e lau ‘a Palesiteni ‘Iongí?

  • Ko e hā ‘a e ngaahi me‘a kuo pau ke tau fai kae toki lava ke tau ma‘u ai ‘a e “Laumālié ke ne tataki kitautolu?” (Vakai foki, 3 Nīfai 19:9, 24.)

  • Ko e hā e ekinaki na‘e fai ‘e Palesiteni ‘Iongi ‘o fekau‘aki mo e lotú?

  • Ko e hā ‘a e na‘ina‘i mālohi na‘e fai ‘e Palesiteni ‘Iongi kiate kinautolu ‘oku ‘ikai ke nau ongo‘i fie lotú?