Kapitulo 10

Ang Balaang Tawag ni Propeta Joseph Smith

Aduna akoy malungtarong pagpamatuod nga ang Amahan ug ang Anak nagpakita ngadto ni Propeta Joseph Smith ug mipadayag ngadto kaniya sa ebanghelyo ni Jesukristo, nga mao gayud, “ang gahum sa Dios alang sa kaluwasan.” [Mga Taga-Roma 1:16.]¹

Pasiuna

Si Presidente David O. McKay miingon, “Sukad sa pagkabata sayon ra kaayo nako ang pagtuo sa pagkatinuod sa mga pananawon ni Propeta Joseph Smith.”² Miingon siya nga ang iyang pagpamatuod mahitungod ni Propeta Joseph Smith nalig-on sa dihang iyang nadunggan ang usa ka kasinatian nga nasinati sa iyang amahan isip usa ka misyonaryo didto sa Scotland:

“Sa dihang ang [akong amahan] nagsugod sa pagsangyaw didto sa iyang yutang natawhan ug nagpamatuod sa pagpahiuli sa ebanghelyo ni Jesukristo, namatikdan niya nga ang mga tawo mipahilayo kaniya. Aduna silay kasilag diha sa ilang mga kasingkasing batok sa bisan unsang [kabahin sa Simbahan], ug ang ngalan ni Joseph Smith ingon og makahatag og pagdumot diha sa ilang mga kasingkasing. Usa ka adlaw niana siya miingon nga ang labing maayong paagi sa pagduol niining mga tawhana mao ang pagsangyaw sa yanong mga baruganan lamang, sa pag-ula ni Ginoong Jesukristo, sa unang baruganan sa ebanghelyo, ug dili ang pagpamatuod sa pagpahiuli. Paglabay sa usa ka bulan o sobra pa nabug-atan siya sa mangitngit, masulub-on nga pagbati, ug dili siya makaangkon sa espiritu sa iyang buhat. Wala gayud siya masayud unsay nahitabo, pero ang iyang hunahuna nababagan; ang iyang espiritu nawad-an og kadasig; siya nabug-atan ug nalangan; ug nga kanang pagbati sa kaguol nagpadayon hangtud nga kini nakapaluya kaniya pag-ayo nga siya miadto sa Ginoo ug miingon, ‘Gawas kon akong mapagawas kining pagbatia, mopauli na lang ko. Dili ako makapadayon nga malangan ang akong trabaho.’

“Ang pagkawala sa kadasig nagpadayon og taud-taud human niana, sa dihang usa ka buntag sa wala pa mosidlak ang adlaw, human sa walay kinatulgan nga gabii, nakahukom siya sa pag-adto sa usa ka langub, duol sa dagat, diin sa iyang hunahuna nga siya hingpit nga mahilayo sa kalibutan, ug didto iyang mabu-bu ang iyang kalag ngadto sa Dios ug mangutana nganong nabugatan siya niini nga pagbati, unsay iyang nabuhat, ug unsay iyang mahimo aron mawala kini ug makapadayon siya sa iyang trabaho. Misugod siya sa paglakaw samtang ngitngit pa padulong sa langub. Naghinamhinam siyang moabut na didto mao nga misugod siya sa pagdagan. Sa dihang migawas na siya sa lungsod, gitawag siya sa usa ka opisyal kinsa gustong makahibalo unsay nahitabo. Wala siyay gisulti pero mihatag og makatagbaw nga tubag ug gitugutan sa pagpadayon. Duna gayuy daw nagtukmod kaniya; kinahanglang makakuha siya og kahupayan. Misulod siya sa langub o sa gisalipdan ang ganghaan, ug miingon, ‘O, Amahan, unsay akong mahimo aron mawagtang kini nga pagbati? Kinahanglan nga mawala kini kanako o dili ako makapadayon niini nga buhat;’ ug nakadungog siya og tingog, sama ka klaro sa tono nga karon akong gisulti, nga nag-ingon, ‘Ipamatuod nga si Joseph Smith usa ka propeta sa Dios.’ Nahinumdom unsay iyang nahukman sa hilom mga unom na ka semana o sobra, ug nadaog sa hunahuna, ang tanan iyang naamgohan nga siya diha alang sa usa ka espesyal nga misyon, ug wala siya makahatag niana nga misyon sa pagtagad nga angay niini. Dayon naguol ang iyang kasingkasing, ‘Ginoo, sakto na, ’ ug migawas gikan sa langub.”

Si Presidente McKay nahinumdom sa iyang pagkabata, naglingkod ako ug nakadungog niana nga pagpamatuod gikan sa usa nga akong gimahal ug gitahud sa inyong kasayuran walay laing tawo nga akong gimahal sa kalibutan, ug kana nga kasiguroan nasilsil sa akong pagkabatan-on.”³

Mga Pagtulun-an ni David O. McKay

Ang Unang Panan-awon ni Joseph Smith nagpadayag sa mahimayaong mga kamatuoran mahitungod sa Dios Amahan ug ni Jesukristo.

Layo na kaayo ang naabtan ug importante ang talagsaong mga nadiskobrehan ug naimbento sa ulahing tunga sa [ikadisenuybe] nga siglo nga kini nakapatingala kanato. … Pero walay usa niini ang nakatubag sa labing dakong panginahanglan sa tawo ug sa pinakadakong tinguha sa tawo. Wala pay usa nga nakapadayag nianang gitinguha sa tawo sa dugay nang panahon. Kana nga panginahanglan—nga kanunay nga diha sa kasingkasing sa tawo—mao ang pagkahibalo sa Dios, ug sa relasyon sa tawo ngadto kaniya.… Usa lamang ka hitabo sa ikadisenuybe nga siglo ang miangkon nga nakahatag ngadto sa tawhanong kalag niini nga tubag. Kon niana nga hitabo ang tawo makakaplag sa kamatuoran nga gipangita sa tawo masukad, nan kini sa pagkatinuod angay sa pasidungog sa labing dakong hitabo sa ikadisenuybe nga siglo!

Kana nga hitabo mao ang pagpakita sa duha ka langitnong mga Binuhat ngadto sa batan-ong Propeta nga si Joseph Smith, nga nagpadayag sa personal nga pagkatawo sa Dios ang Amahan sa Kahangturan ug sa iyang Anak nga si Jesukristo.⁴

Diseotso ka gatus ka mga tuig gikan mamatay si Jesus diha sa krus, si Propeta Joseph Smith mipahayag nga ang nabanhaw nga Ginoo nagpakita ngadto kaniya. [Siya miingon]: “… Ako nakakita og duha ka Personahe, kansang kahayag ug himaya dili mahulagway, nagtindog ibabaw kanako diha sa kawanangan. Usa kanila misulti ngari kanako, nagtawag kanako sa akong ngalan ug miingon, nagtudlo ngadto sa lain—Kini mao ang Akong Hinigugmang Anak. Paminaw Kaniya!” [Joseph Smith—Kasaysayan 1:17.]⁵

Ang iyang deklarasyon yano pero positibo; ug nasurprisa siya sa dihang ang mga tawo nagduhaduha niini nga kamatuoran. Alang kaniya ang iyang gisulti usa lang ka pamahayag sa usa ka yanong kamatuoran; alang sa Kristohanong kalibutan kini usa ka liti sa kilat nga makapahikurat, makapahuyang sa ilang relihiyoso nga estraktura gikan sa ibabaw hangtud sa pundasyon.

Duha ka importante nga mga elemento sa iyang unang mensahe mao kini: una, nga ang Dios usa ka personal nga Binuhat, kinsa mosulti sa iyang kabubut-on ngadto sa tawo; ug ikaduha, nga walay tinuohan sa Kristiyanos nga adunay tinuod nga plano sa kaluwasan.⁶

Ang pagpakita sa Amahan ug sa Anak ngadto ni Joseph Smith mao ang pundasyon niini nga Simbahan. Ania dinhi ang sekreto sa kalig-on ug kalagsik niini. Tinuod kini, ug ako mosaksi niini. Kanang usa ka pagpadayag nakatubag sa tanang mga pangutana bahin sa siyensya mahitungod sa Dios ug sa iyang balaang personalidad. Nakakita ba kamo unsay gipasabut niana? Unsa ang Dios, natubag na. Ang iyang relasyon ngadto sa iyang mga anak klaro. Ang iyang tinguha sa mga tawo pinaagi sa awtoridad nga gitugyan ngadto sa tawo tataw. Ang kaugmaon sa buhat sigurado. Kini ug ang ubang mahimayaong mga kamatuoran giklaro nianang mahimayaong panan-awon.⁷

Ang kalibutan sa gihapon dili makasabut sa pagkaimportante niini; pero ingon nga usa ka nakatabang nga bahin sa kahibalo sa tawo sa iyang relasyon ngadto sa Dios ug sa iyang dapit sa kalibutan; ingon nga usa ka paagi sa pag-establisar sa husto nga mga relasyon tali sa mga tawo isip nga indibidwal ug mga grupo sa mga tawo isip mga nasud; isip usa ka pagpadayag nga nagtudlo sa paagi ngadto sa kalipay sa tawo ug kalinaw sa yuta ingon man usab sa mga kahangturan nga moabut, ang pagpakita sa Amahan ug sa Anak ngadto ni Joseph Smith ug sa misunod nga pagpahiuli sa priesthood ug sa pagkaestablisar sa Simbahan ni Jesukristo sa kahingpitan niini, pagailhon pa nga dili lamang ang labing dakong hitabo sa ikadisenuybe nga siglo, pero isip usa sa labing dakong hitabo sa tibuok kapanahunan.⁸

Ang Ginoo mipahiuli sa mga kamatuoran sa ebanghelyo pinaagi ni Propeta Joseph Smith.

Bahin kini ni Joseph Smith dili lamang isip usa ka bantugang tawo, pero isip usa ka dinasig nga sulugoon sa Ginoo nga maoy akong gustong ipamulong. … Sa pagkatinuod, ang kabantug ni Joseph Smith gilangkob sa balaang inspirasyon. …

Walay tawo nga magtuon sa matukion ug sa inutok nga paagi mahitungod sa gipahiuli nga ebanghelyo ni Jesukristo nga dili makadayeg pag-ayo sa pagkatukma sa mga pagtulun-an niini ngadto sa gihatag sa Ginoo ug sa Manluluwas Mismo sa dihang siya dinhi pa sa yuta uban sa Iyang mga tinun-an. Hunahunaa, pananglit, ang pagpadayag sa Propeta mahitungod sa Tiglalang—ang Dios ingon nga usa ka intelehente nga Binuhat, usa kinsa, sama sa gitudlo ni Jesus, “Atong Amahan sa langit.” [Tan-awa sa Mateo 6:9.] …

Ang doktrina ni Joseph Smith nga si Jesukristo mao ang Bugtong Anak sa Amahan, ang Manluluwas sa kalibutan, pareho sa mga pagtulun-an ni Jesus Mismo ug sa Iyang mga apostoles.

Mao usab ang iyang doktrina sa pagpadayon sa personalidad human sa kamatayon. …

Ang samang panag-uyon makita diha sa mga pagtulun-an sa ubang mga baruganan sa ebanghelyo sama sa hugot nga pagtuo, paghinulsol, bunyag, pagpandong sa mga kamot alang sa gasa sa Espiritu Santo, ordinasyon ngadto sa priesthood, sa iyang mga pagtulun-an bahin sa “kahibalo, pagkamapugnganon, pagkadiosnon, inigsoong pagkamabination, gugma nga putli, ” uban pa. [Tan-awa sa 2 Pedro 1:5–7; D&P 4:6.] …

… Ang nagpasiugda sa bunyag sa masuso nagtudlo bahin sa gagmay nga mga bata: “Ang gagmayng mga bata nga moanhi sa kalibutan dili lamang walay hingpit nga kahibalo, pagkamatarung, ug pagkabalaan, pero adunay natural nga kahilig ngadto sa dautan ug sa dautan lamang.”

… Sa maisugon ug sa walay kahadlok, ug nagsulti isip adunay kasiguroan nga siya husto, si Propeta Joseph Smith miingon: “Ang gagmay nga mga bata mga balaan ug gisantos pinaagi sa pag-ula ni Jesukristo.” [Tan-awa sa D&P 74:7.]⁹

Ang balaan nga inspirasyon gipakita … diha sa mahimayaong pahibalo ni [Joseph Smith] sa mahangturong kahimtang sa mga pakigsaad ug mga seremonya ug sa kahigayunan sa kaluwasan alang sa matag tawo. Ang Simbahan walay gipili pero alang sa tanang kalag kinsa modawat sa mga baruganan niini. … Ang tanang mga katawhan mahimong maluwas pinaagi sa pagsunod sa mga balaod ug mga ordinansa sa ebanghelyo. Bisan sila kinsa namatay nga walay balaod pagahukman nga walay balaod. Tungod niini ang ordinansa sa kaluwasan alang sa mga patay gipadayag.

Ang kahangturan sa pakigsaad sa kaminyoon usa ka mahimayaong pagpadayag, naghatag og kasiguroan ngadto sa mga kasingkasing nga nahiusa tungod sa bulawanong bugkos sa gugma ug gisealed pinaagi sa katungod sa balaang Priesthood nga ang ilang panaghiusa mohangtud.

Ang ubang mga pakigsaad magpadayon usab uban sa mahangturong kauswagan sa tibuok kapanahunan sa kahangturan.

Si Joseph Smith dili unta makatuman niining tanan sa iyang kaugalingong kaalam, salabutan, ug impluwensya. Dili unta niya kini mahimo.¹⁰

Ang Ginoo mipadayag niining panahona sa Plano sa Kaluwasan, diin dili mokapin o mokulang kay sa paagi ngadto sa espirituhanong kahimtang pinaagi sa pag-ugmad og kinaiya nga takus makasulod sa iyang gingharian. Ang Plano mao ang ebanghelyo ni Jesukristo ingon nga gipahiuli ngadto ni Propeta Joseph Smith, ug kini maayo ug masangkaron.¹¹

Ang gipahiuli nga Simbahan ni Jesukristo maoy ebidensya sa balaang inspirasyon ni Propeta Joseph.

Mga 1820, ang relihiyosong kaguliyang maoy nakapaagni ni Joseph Smith sa pagpangita sa sakto nga simbahan, sa tukma nga paagi sa pagsimba, sa husto nga paagi sa pagpuyo. Ang tinguha nga makahibalo nakapaikag sa batan-on sa pagduol sa Ginoo diha sa mainitong pag-ampo. Usa sa resulta sa tubag sa iyang pagampo mao ang pagkaorganisar sa Simbahan diha sa panimalay ni Peter Whitmer niadtong … Abril 6, 1830. Niana nga organisasyon makita ang pagsabut sa tibuok plano sa kaluwasan sa tawo.

Karon gusto akong moisip niana nga organisasyon isip usa ka ebidensya sa iyang inspirasyon. … [Kini] nakalahutay sa mga problema sa panalapi, sa sosyal nga kagubot, ug sa relihiyoso nga kasamok; ug karon nagbarug isip usa ka paagi sa paghatag sa labing gikinahanglan sa tawo. …

… “Ang Simbahan ni Jesukristo giorganisar sumala sa kapunongan sa Simbahan nga girekord diha sa Bag-ong Tugon, ” miingon si Joseph Smith [tan-awa sa History of the Church, 1:79]. Ang praktikal ug maayong mga binuhatan niini nga organisasyon nagmatuod sa balaang pagkatinuod niini.¹²

Daghang mga tuig na ang milabay si Joseph Smith, usa lang ka bata nga tunga-tunga sa katorse ug kinse ka tuig ang pangidaron, mipahayag nga, agig tubag sa pag-ampo, nakadawat siya og usa ka pagpadayag gikan sa Dios. … Ang resulta niini nga pamahayag mao ang iyang pagbiya gikan sa relihiyoso nga kalibutan. Sa wala madugay iyang nakaplagan ang iyang kaugalingon nga naginusarang nagbarug.

Nag-inusara—ug walay kasinatian sa kahibalo ug sa pilosopiya sa iyang panahon!

Nag-inusara—ug wala makaeskwela sa arts ug mga siyensya!

Nag-inusara—nga walay pilosoper nga motudlo kaniya, walay ministro nga mogiya kaniya! Sa ka yano ug ka mabination siya nagdali paingon ngadto kanila uban sa iyang mahimayaong mensahe; sa pagtamay ug pagbiay-biay sila mipahibalo gikan kaniya nga nag-ingon nga kadtong tanan iya sa yawa; nga wala na kuno kanang mga butang sama sa mga panan-awon o mga pagpadayag niini nga mga adlaw; nga kanang mga butanga wala na pagkawala sa mga Apostoles; ug nga wala nay moabut nga bisan unsa pa niini [tan-awa sa Joseph Smith—Kasaysayan 1:21].

Sa ingon siya nag-inusara sa paglawig diha sa lawod sa relihiyoso nga buluhaton, human niya isalikway ang matag nahibaloan nga barko nga kasakyan ug wala pa gayud makabuhat og barko o bisan makakita sa pagbuhat og ang barko mismo sa iyang kaugalingon. Sa pagkatinuod kon usa pa ka impostor, ang barko nga iyang mabuhat dili gayud maayo.

Sa laing bahin, kon kana nga iyang gibuhat labaw pa ka maayo kay sa nahatag sa maalamong mga propesor ug mga pilosoper ngadto sa kalibutan sa miaging gatusan ka mga tuig, ang mga tawo mapugos, bisag gamay lang, sa pag-ingon diha sa katingala, diin man gikan ang kaalam niining tawhana!

Atong makita, nga bisan og siya nag-inusara, siya nag-inusara lamang sama kang Moises didto sa Sinai; sama ni Jesus didto sa Bukid sa mga Oliba. Sama sa Manluluwas, mao usab sa propeta, ang iyang mga instruksyon miabut dili pinaagi sa hinimo sa tawo nga nga paagi pero direkta gikan sa Dios, ang tinubdan sa tanang kaalam. Siya miingon: “Ako usa ka sagalsalon nga bato. Ang tingog sa martilyo ug tigib wala gayud madungog gikan kanako hangtud ang Ginoo migunit kanako sa kamot. Nagtinguha ako sa kahibalo ug kaalam sa langit lamang.” [History of the Church, 5:423.] …

Ang iyang giangkon nga pagpadayag nga gikan sa Dios, kon maestablisar, makapawala sa pagduhaduha sa iyang awtoridad sa pag-organisar sa Simbahan ni Jesukristo dinhi sa yuta, ug sa pagpangalagad nga may pagtugot sa mga baruganan ug sa mga ordinansa niini. Mao nga sa sinugdanan gayud niining mahinungdanong buhat sa ulahing mga adlaw gipahimutang ang dili mabalhin nga tukurang bato sa Simbahan ni Kristo niini nga dispensasyon, [sa ato pa], ang awtoridad sa pagpahigayon pinaagi sa ngalan ni Jesukristo sa mga butang nga may kalabutan sa iyang Simbahan.¹³

Samtang kita maghunahuna sa importanting mga kalampusan [ni Joseph Smith] sa mubo nga panahon sa katorse ka mga tuig taliwala sa pagka-organisar sa Simbahan ug sa iyang pagkamartir; samtang kita mamalandong tali sa hingpit nga panag-uyon sa gipahiuli nga ebanghelyo uban sa unang simbahan nga gitukod ni Jesus ug sa Iyang mga apostoles; samtang atong hunahunaon ang iyang makapadani nga pagpasabut ngadto sa mga baruganan ug mga ordinansa; ug samtang atong makita ang dili ikatandi nga plano ug kahanas sa Simbahan nga natukod pinaagi sa inspirasyon ni Kristo kansang pangalan kini nagdala—ang tubag sa pangutana, diin gikan ang kaalam niining tawhana? gihatag diha sa makapatandog nga estansa:

Pagdayeg sa nakigsulti kang Jehova!
Jesus midihug “anang Propeta”—
Miabli niining kapaigoan;
Hari, nasud siya pasidunggan.

[Tan-awa sa Mga Himno ug mga Awit sa mga Bata, p. 50]¹⁴

Si Propeta Joseph Smith nagpakabuhi ug nagpakamatay sa pagpanalipod sa mga kamatuoran nga gipadayag ngadto kaniya.

Ang bantugang mga tawo adunay abilidad sa pagtan-aw pagayo ngadto sa kinatung-an sa mga butang. Makaila sila sa kamatuoran. Nagkinaugalingon silang maghunahuna. Halangdon silang naglihok. Ilang giimpluwensyahan ang lig-ong mga tawo sa pagsunod kanila. Ang walay bili nga mga tawo mobiay-biay kanila, motamay kanila, mogukod kanila, pero ang mga manaway mamatay ug mahikalimtan, ug ang bantugang mga tawo magpakabuhi sa kahangturan.

Ang pipila sa mga kadungan ni Joseph Smith mitamay kaniya; ang uban midayeg kaniya; ang iyang mga sumusunod mitahud kaniya. …

Walay usa nga matinud-anon sa iyang paghukom ang makatuon sa kinabuhi niining relihiyoso nga lider nga dili makadayeg sa kamatuoran nga siya nagbaton sa usa ka buhong nga matang sa mga kalidad sa tinuod nga pagkabantugan, ang tinubdan niini makaplagan pinaagi sa tinguha sa pag-ila sa kabubut-on sa Dios, ug pinaagi sa determinasyon, kon kini makaplagan, sa pagsunod niini.¹⁵

Sa kinatibuk-ang bahin sa mga panahon ang mga kamatuoran unang nasabtan sa bayanihong mga lider kinsa, sa pagpanalipod niini, sa kasagaran misakripisyo sa ilang mga kinabuhi. Tungod sa klaro nga pagsabut ug kaisug niining maisug nga mga lider miabut ang kauswagan sa mga katawhan. Adunay panahon, nga sila kinahanglang mohimo og usa ka pagpili sa paglimud, pag-usab, o sa pagpanalipod sa kamatuoran—usa ka pagpili tali sa personal nga kahayahay ug kauswagan, o hinginlan, silotan, o bisan kamatayon. Ang mao nga pagpili miabut ngadto nila ni Pedro ug Juan samtang nagbarug sila nga binilanggo sa atubangan ni Anas, ang labawng sacerdote. Gikinahanglan ang tinuod nga kaisug gikan kanila nga mosaksi bahin ni Kristo sa atubangan gayud sa mga tawo nga mihukom kaniya sa kamatayon. [Tan-awa sa Mga Buhat 4.]

Nagkinahanglan og kaisug si Pablo, usa ka kinadinahan nga binilanggo sa atubangan ni Haring Agripa ug sa iyang halangdong mga kauban, sa pagsaksi nga si Kristo nag-antus, ug nga siya mao ang una nga mabanhaw gikan sa mga patay, ug magpakita og kahayag ngadto sa mga katawhan, ug ngadto sa mga hentil. [Tanawa sa Mga Buhat 26.]

Gikinahanglan ni Joseph Smith ang kaisug sa pagpamatuod ngadto sa dili matuohon ug masuk-anong kalibutan sa kamatuoran nga ang Dios ug ang iyang Hinigugmang Anak nagpakita diha sa panan-awon ngadto kaniya.¹⁶

Ang tanang mga tawo kinsa nakahatag og kauswagan sa kalibutan nahimong mga tawo nga mobarug nga matinud-anon sa ilang konsensya—ang mao nga mga tawo sama nila ni Pedro, Santiago, ug Pablo, ug ang ilang mga kaigsoonan sa karaang mga apostoles, ug ang uban usab. Sa dihang ang mga relihiyoso nga mga lider sa Palmyra, New York, mibatok sa batan-on nga si Joseph Smith tungod sa unsay iyang nakita ug nadungog didto sa Sagrado nga Kakahoyan, siya miingon, nga adunay pagpamatuod ni Ginoong Jesus sa iyang kasingkasing: “Ako nakakita og usa ka panan-awon; ako nasayud niini, ug ako nasayud nga ang Dios nasayud niini, ug ako dili makalimud niini, ni ako mangahas sa pagbuhat niini. …” [Joseph Smith—Kasaysayan 1:25].

Si Joseph Smith nagmatinud-anon sa iyang pagpamatuod hangtud sa katapusan.¹⁷

Ang resulta sa balaang giya ni [Joseph Smith] maoy usa ka kasiguroan sa pagkamatarung sa unsay iyang gitudlo ug sa walay kukahadlok sa pagsangyaw niini. Sa dihang si Joseph Smith nagtudlo og usa ka doktrina, gitudlo niya kini nga may awtoridad. Para niya wala siya mag-agad kon uyon ba kini sa hunahuna sa tawo o dili, uyon ba kini sa gitudlo sa orthodox nga mga simbahan o kini direkta bang nahisupak. Kon unsay gihatag ngadto kaniya iyang gihatag ngadto sa kalibutan bisan pa og nahiuyon o wala, nahiuyon o nagakasumpaki sa gituohan sa mga simbahan, o sa sagad nga mga sumbanan sa mga tawo; ug karon, samtang kita mahinumdom sa kasaysayan sa milabay nga usa ka gatus ka mga tuig, aduna kitay usa ka maayong kahigayunan sa paghukom sa hiyas sa iyang mga pagtulun-an, ug sa pagsulti sa tinubdan sa iyang panudlo. …

Dili lamang nga siya nakadawat og giya ug panudlo gikan sa balaang Pangulo, pero, sa dihang nadawat, nanalipod niini sa walay pagkabuntog nga tinguha.¹⁸

Agi sa mga pagbiay-biay, mga pagtamay, mga pag-atake, mga pang-aresto, mga pagbilanggo, mga pagpanggukod nga misangpot sa pagkamartir, si Joseph Smith sama nila ni Pedro ug ni Pablo nga nag-una kaniya, naningkamot kanunay sa iyang tanang abilidad sa pagsunod sa kahayag nga nakapahimo kaniya nga “mag-aambit sa diosnong kinaiya.” [Tan-awa sa 2 Pedro 1:4.]¹⁹

Ang labing maayong dugo niini nga nasud gipaagas nga inosente. [Si Propeta Joseph] nasayud nga siya inosente. Nasayud siya sa iyang mga katungod. Mao usab ang iyang igsoon nga si Hyrum, si John Taylor ug Willard Richards nga didto uban kaniya. Pero tungod sa mga bakak, maitom ug talamayon, si Propeta Joseph ug ang iyang igsoon nga si Hyrum gimartir.

… Taliwala niining tanan unsa ang kinaiya sa Propeta? Kalma, Kristohanon nga kinaiya. Miingon siya, sa dihang nagpaingon siya ngadto sa Carthage nianang gabhiona:

“Ako moadto sama sa usa ka karnero ngadto sa ihawan, apan ako malinawon ingon sa kabuntagon sa ting-init. Ako adunay tanlag nga walay sala ngadto sa Dios ug ngadto sa tanan nga mga tawo. Kon ilang kuhaon ang akong kinabuhi ako mamatay nga walay sala, ug kini ikasulti mahitungod kanako, siya gituyo pagbuno sa walay kalooy.” [Tan-awa sa D&P 135:4.]²⁰

Ang mga kinabuhi sa Propeta, sa iyang igsoon, nga si Hyrum, ang patriyarka, ug gatusan ka liboan pang uban kinsa midawat sa kamatuoran sa [Unang Panan-awon] naghatag og ebidensya nga ang plano sa kaluwasan, ingon nga kini giangkon ni Jesukristo nga mipadayag niini, sigurado gayud nga modala mosangpot ngadto sa Kristohanong kinaiya. Tinuod kaayo ang pagpadayag ngadto sa Propeta ug sa iyang igsoon, nga si Hyrum, nga sila wala magduhaduha sa pagsilyo sa ilang pagpamatuod uban sa ilang dugo.²¹

Mga Sugyot alang sa Pagtuon ug Panaghisgutan

Si Presidente McKay miistorya og kasinatian sa iyang amahan nga nasinati sa iyang misyon mahitungod sa panginahanglan sa pagpamatuod bahin ni Joseph Smith (tan-awa sa mga pahina 109–11.) Ngano nga ang tubag nga nadawat sa iyang amahan mahinungdanon kanato karon?
Ngano nga gikinahanglan alang sa Ginoo nga motawag og usa ka propeta sa ulahing mga adlaw? (Tan-awa sa mga pahina 112–14.) Ngano nga ang usa ka pagpamatuod bahin ni Joseph Smith usa ka mahinungdanong bahin sa pagpamatuod sa ebanghelyo? Sa unsa nga paagi nga ang pagpakita sa Amahan ug sa Anak ngadto ni Joseph Smith mao ang “pundasyon niini nga Simbahan”?
Unsa ang pipila ka mga kamatuoran nga gipadayag pinaagi sa Unang Panan-awon? (Tan-awa sa mga pahina 112–14.) Sa unsang mga paagi nga ang inyong kahibalo sa Unang Panan-awon nakaimpluwensya sa inyong pagpamatuod sa Langitnong Amahan ug ni Jesukristo?
Unsa ang ubang mga doktrina nga gipadayag sa Ginoo ngadto ni Popeta Joseph Smith? (Tan-awa sa mga pahina 113–15.) Sa unsa nga paagi nga kamo napanalanginan samtang kamo nagtuon ug naggamit niining mga doktrina?
Sa unsa nga mga paagi nga ang Simbahan ug ang mga pagtulun-an niini usa ka testamento nga si Joseph Smith usa ka propeta sa Dios? (Tan-awa ang mga pahina 115–19.)
Unsa ang pipila ka Kristohanong mga kinaiya ang gipakita ni Propeta Joseph Smith? (Tan-awa ang mga pahina 118–21.) Unsa ang inyong mabuhat sa pagsunod sa iyang ehemplo?
Unsa nga mga responsibilidad ang ania kanato kon kita adunay pagpamatuod bahin ni Joseph Smith ug sa pagpahiuli sa ebanghelyo?

May Kalabutan nga mga Kasulatan:Amos 3:7; 2 Nephi 3:6–15; D&P 135; Joseph Smith—Kasaysayan 1:1–75

First Vision — “Ang pagpakita sa Amahan ug sa Anak ngadto ni Joseph Smith mao ang pundasyon niini nga Simbahan. Ania dinhi ang sekreto sa kalig-on ug kalagsik niini.”