Kapitulo 11

Pagsunod sa Pulong sa Kaalam

Ang Pulong sa Kaalam usa ka mahinungdanong bahin sa ebanghelyo, nga mao “ang gahum sa Dios alang sa kaluwasan”––pisikal nga kaluwasan ingon man usab espirituhanong kaluwasan.¹

Pasiuna

Si Presidente McKay nagtudlo ug nagpamatuod nga ang Pulong sa Kaalam usa ka sugo nga gihatag sa Ginoo sa pagpanalangin kanato sa pisikal ug sa espirituhanong paagi. Sa iyang mga pagtulun-an ingon man usab sa iyang mga aksyon, estrikto siyang mosunod niini nga sugo. Sa pagbisita sa rayna sa Netherlands niadtong 1952, si Presidente ug Sister McKay nakasinati sa usa ka makapaikag nga kasinatian. Ang rayna miiskedyul sa pagpakigsulti kanila sud sa 30 minutos. Si Presidente McKay nagbantay sa oras, ug sa dihang nahuman na ang tunga sa oras, matinahuron siyang nagpasalamat sa rayna ug molakaw na unta. “Mr. McKay, ” miingon siya, “lingkod! Nalingaw ako niining traynta minutos labaw sa bisan haing traynta minutos sulod sa dugay nang panahon. Gusto unta ko nga ipadayon pa nato ang atong panag-istorya.” Milingkod siya pagbalik. Dayon usa ka lamesa sa kape ang miabut, ug ang rayna miipis og tulo ka mga tasa sa tsa, mihatag og usa ngadto ni Presidente McKay, usa ngadto ni Sister McKay, ug mibilin og usa alang sa iyang kaugalingon. Sa dihang ang rayna nakamatikod nga walay usa sa iyang mga bisita ang miinom sa tsa, siya nangutana, “Dili ba kamo moinom og gamayng tsa uban sa Rayna?” Si Presidente McKay mipasabut, “Kinahanglang sultihan ko ikaw nga ang among mga tawo dili moinom og mga stimulants, ug nagtuo kami nga ang tsa usa ka stimulant.” Miingon siya, “Ako ang Rayna sa Netherlands. Buot nimong ipasabut sa pagsulti kanako nga dili ka moinom og tsa, bisan uban sa Rayna sa Netherlands?” Si Presidente McKay mitubag, Ang Rayna ba sa Netherlands mosugo sa lider sa usa ka milyon ug tulo ka gatus ka libo ka mga tawo sa pagbuhat sa butang nga iyang gitudlo sa iyang mga katawhan nga dili nila buhaton?” “Usa ka ka halangdong tawo, Presidente McKay, ” siya miingon. “Dili ko mosugo nimo sa pagbuhat niana.”²

Mga Pagtulun-an ni David O. McKay

Ang Pulong sa Kaalam usa ka klaro nga kasugoan nga gihatag pinaagi sa pagpadayag gikan sa Ginoo.

Niadtong ika-27 sa Pebrero, 1833, nakadawat si Propeta Joseph Smith og pagpadayag nga narekord diha sa ika-89 nga seksyon sa Doktrina ug mga Pakigsaad. … Gusto kong mobasa og pipila ka [mga bersikulo] gikan niana nga seksyon:

“Tan-awa, sa pagkatinuod, sa ingon miingon ang Ginoo nganha kaninyo, agi og sangputanan sa mga dautan ug sa mga laraw nga anaa ug motungha diha sa mga kasingkasing sa dautan nga mga tawo sa katapusang mga adlaw, Ako nagpasidaan kaninyo, pinaagi sa paghatag nganha kaninyo niini nga pulong sa kaalam pinaagi sa pagpadayag.

“Tungod kay si bisan kinsa nga tawo, nga moinom og bino o isug nga ilimnon taliwala kaninyo, tan-awa kini dili maayo, ni angay sa panan-aw sa inyong Amahan, mahimo lamang kini sa panagtigum sa inyong mga kaugalingon sa paghalad sa inyong mga sakramento sa iyang atubangan.

“Ug, tan-awa, kinahanglan nga kini gayud bino, oo, lunsay nga bino sa ubas, nga inyong kaugalingon nga binuhat.” [D&P 89:4–6.]…

Ang tudling nga gusto nakong hatagag pagtagad mao kini: “Tungod kay si bisan kinsa nga tawo, nga moinom og bino o isug nga ilimnon … tan-awa kini dili maayo, ni maayo sa panan-aw sa inyong Amahan.” Mao kini ang pulong sa Dios ngadto sa mga katawhan niining kaliwatan. Nagabarug kini sama ka gamhanan sa mga pulong sa Manluluwas, “Kon tuyoon ni bisan kinsa ang pagbuhat sa kabubut-on sa Dios, nan, iyang mahibaloan kon ang akong gitudlo gikan ba sa Dios o nagsulti ba lamang ako sa kinaugalingong kon pagbulut-an.” [Juan 7:17.] Mga Santos sa Ulahing mga Adlaw, nasayud kamo nga tinuod kining pamahayag sa Manluluwas; kita mopamatuod nga kon si bisan kinsang tawo nga mobuhat sa kabubut-on sa Dios makaangkon siya og pagpamatuod, sa iyang kasingkasing ug sa iyang kinabuhi, nga ang Ebanghelyo ni Jesukristo tinuod. Atong gidawat ang mga pulong sa Manluluwas, “Gawas kon maghinulsol kamo, kamong tanan mangamatay usab [Lucas 13:3.] Kanang mahangturong mga kamatuoran, nga sakto kaayo pagkahatag, atong gidawat nga tinuod. Mahimong dili kita makasunod niini sa hingpit, pero isip mga tawo ato kining gidawat, tungod kay kini pulong sa Dios. Lig-on kaayo, mahangturon kaayong nagbarug kini nga kamatuoran …, “Isug nga ilimnon dili maayo alang sa tawo.” [Tan-awa sa D&P 89:7.] Pero [daghang mga tuig] ang milabay, ug nianang higayona kini nga doktrina gisangyaw matag semana, kon dili kada adlaw, sa pipila ka katiguman sa Israel, ug sa gihapon sa atong palibot adunay pipila kinsa moingon, pinaagi sa ilang mga buhat, maayo kini alang sa tawo.

Malipay ako kon ako magtuon niini nga tudling, nga nakahibalo nga ang Ginoo wala moingon, “Isug nga ilimnon kon pasobrahan dili maayo;” ni “Ang pagkahubog dili maayo.” Pananglit Iyang paubsan kana nga ekspresyon pinaagi sa pag-usab niini ug moingon, “Isug nga ilimnon nga sobra, o kon moinom og daghan, dili maayo, ” pagkadali kaha natong mangatarungan nga maayo ra kon gamay lang ang imnon. Pero sama sa ubang mahangturong mga kamatuoran kini nagbarug nga hingpit; isug nga ilimnon dili maayo.³

Ako nagtuo nga ang tabako usa ka bisyo nga kinahanglan nga likayan sama sa pinaakan sa usa ka bitin. … Ang Ginoo miingon nga ang tabako dili maayo alang sa tawo. Igo na kana alang sa mga Santos sa Ulahing mga Adlaw.⁴

Ang mga miyembro sa Simbahan kinsa naanad sa tabako o sa tsa ug kape, o niining duha, malagmit mangatarungan sa ilang paggamit sa mga butang nga klarong giingon sa Ginoo nga dili maayo alang sa tawo. Sa panahon nga sila mohimo sa ingon, ila lamang gipakita ang kahuyang sa ilang pagtuo sa mga pulong sa Ginoo, nga gihatag isip pasidaan ug “kaalam, ” ug ang pagsunod niini makahatag og panalangin ingon ka sigurado ug ka tinuod sama nga siya miingon, “Ayaw ninyo buhata.”⁵

Ang dili pagsunod sa Pulong sa Kaalam makahatag og pisikal ug espirituhanong mga kadaot.

Adunay sagol nga anaa sa tsa ug sa kape nga kon isulod sa sistema sa tawo, ingon og mopakusog sa pagpitik sa kasingkasing; nga makapadugang sa kakusog sa sirkulasyon sa dugo ug sa pagginhawa. Kini maoy makaingon sa lawas nga mas moinit ug mas malagsik. Hinoon, sa paglabay sa panahon, kining temporaryo nga kaabtik molabay ra, ug ang lawas nagkinahanglan gayud og igong pahulay ug kabaskog kay sa wala pa imna ang ilimnon. Ang mga stimulant nga gigamit sa lawas sama ra sa latigo sa nag-aginod nga kabayo––kini makapalagsik pero dili makahatag og permanente nga kusog o natural nga kahimsog. Ang kanunay nga paglatigo makapatapul og maayo sa kabayo; ug ang kanunayng paggamit sa isug nga ilimnon, tabako, tsa, ug kape, mas makapaluya hinoon sa lawas ug magdepende na lang sa mga stimulant diin kini naadik.

Miingon ang Ginoo sa dili masayop nga mga pulong nga kining mga butang dili maayo alang sa tawo. Ang syensya mipahayag usab niini. Ang pulong sa Dios kinahanglang igo na alang sa matag tinuod nga Santos sa Ulahing mga Adlaw.⁶

Ang reaksyon sa usa ka tawo sa iyang mga gana ug kusganong mga pagbati kon kini moabut maoy sukod sa kinaiya nianang tawhana. Niini nga mga reaksyon mapakita ang gahum sa tawo sa pagdumala, o sa iyang pagtugyan ngadto sa pagkaulipon. Busa, kanang gisulti sa Pulong sa Kaalam, nga naghisgot sa mga butang nga makahubog, mga drugas, ug mga stimulant, adunay epekto nga mas grabe pa kaysa lawasnong kadaot, ug moataki sa gamut mismo sa pagpalambo sa kinaiya….

Sa milabay nga usa ka gatus ka mga tuig, ang makapahibulong nga kauswagan sa syensya nakahatag og dalan aron ang tawo makadeterminar pinaagi sa mga eksperimento unsay makadaot nga epekto sa mga makahubog ug mga drugas diha sa mga kaugatan ug mga tisyu sa lawas sa tawo. Ang obserbasyon ug eksperimento nakapakita sa mga epekto niini diha sa kinaiya. Kining tanang mga eksperimento ug obserbasyon nakaprobar sa kamatuoran sa … pamahayag: “Ang isug nga mga ilimnon ug tabako dili maayo alang sa tawo.”⁷

Samtang ako nahinumdom sa mga impluwesnya sa akong batan-ong kinabuhi, nagtuo ako nga ang labing maayo mao ang pagsag-ulo sa importante nga panultihon: “Ang akong espiritu dili mosulod sa usa ka mahugaw nga tabernakulo

Dayon duna pay uban, … ug kadtong tanan gipaagi sa mga pagpasidaan. Ang una miabut sa akong pagkabata samtang ako naglingkod sa kiliran sa akong amahan samtang kami nagpaingon ngadto sa Ogden. Sa hapit na kami motabok sa taytayan tabok sa Suba sa Ogden, adunay tawo nga bag-ohay lang migawas gikan sa usa ka tindahan, nga didto sa amihanang bahin sa suba. Nakaila ko niya. Nakadayeg ko niya tungod kay nakakita ko niya sa lokal nga entablado. Pero niana nga okasyon siya ubos sa impluwensya sa bino, ug sa akong pagtuo, dugay-dugay na.

Wala ako masayud … nga moinom siya, pero sa dihang midanguynguy siya ug mihilak ug nangayo ni papa og singkwenta sentimos aron mobalik ngadto sa tindahan, nakita nako siya nga misarasay. Sa dihang mitabok kami sa taytayan ang akong amahan miingon: “David, siya ug ako kanhi magkauban sa [home] teaching.”

Mao ra kadtong tanan niyang gisulti, pero usa kadto ka pasidaan ngari kanako nga wala gayud nako makalimti, mahitungod sa epekto sa pagpatuyang [o hilabihang pag-inom].

Sa wala madugay, usa ka magtutudlo [misugo] kanamo sa pagbasa og usa ka istorya mahitungod sa usa ka grupo sa mga batan-on nga milawig sa Suba sa St. Lawrence. … Dili ako makahatag kaninyo sa tagsulat, dili ako makasulti kaninyo sa ulohan, pero makasulti kaninyo sa panumduman nga nagpabilin kanako, mahitungod niadtong mga batan-on kinsa nanag-inom ug naghudyaka ug naglipay diha sa barko nga naglawig sa giingong suba. Pero usa ka tawo didto sa daplin, nakahibalo ug nakaamgo sa mga kakuyaw nga nagpaabut sa unahan, misinggit: “Hoy, sug kaayo sa inyong unahan.”

Pero mibaliwala sila sa iyang pasidaan, misalikway kaniya. “Maayo ra kami, ” ug nagpadayon sa ilang kasadya [o pangomedya] ug sa ilang pagpatuyang. Ug misinggit siya pag-usab. “Ang sug naa ra sa inyong unahan, ” ug sa gihapon wala sila maminaw sa iyang pasidaan.

Sa kalit nakabantay sila diha na sa mga sug. Dihadiha dayon nagsugod sila sa pagbugsay padulong sa daplin, pero ulahi na kaayo. Wala akoy nahinumduman gawas sa mga pulong lamang sa katapusang parapo, nga namalikas, nagsiyagit, diha sa sulog, diha sa busay nahulog sila.

Negatibo? Oo. Pero sultihan ko kamo nga adunay daghan diha sa suba sa kinabuhi kinsa namugsay sama niana. Wala gayud ako makalimot nianang istoryaha.⁸

Kita kinahanglan gayud nga magbantay batok sa “mga dautan ug sa mga laraw sa dautang mga tawo.”

Usa sa labing importanting sa mga pamahayag diha sa Doktrina ug mga Pakigsaad, usa nga nagdala sa ebidensya sa inspirasyon ni Propeta Joseph Smith, makita diha sa ika-89 nga Seksyon…:

“Agi og sangputanan sa mga dautan ug sa mga laraw nga anaa ug motungha diha sa mga kasingkasing sa dautan nga mga tawo sa katapusan nga mga adlaw, Ako nagpasidaan kaninyo, pinaagi sa paghatag nganha kaninyo niini nga pulong sa kaalam pinaagi sa pagpadayag …” (D&P 89:4.)

“Mga dautan ug mga laraw nga anaa ug sa sulod sa mga kasingkasing sa dautan nga mga tawo. …” Ang katuyoan niana nakapadani kanako sa ika-baynte, ug ika-traynta sa [ika- baynte] nga siglo. Mangutana ko ninyo … sa paghinumdom sa mga paagi nga gigamit sa pipila ka nagnegosyo sa tabako sa pagdani sa mga babaye sa pagpanigarilyo.

Nakahinumdom mo kon unsa sila ka malimbongon sa pagsugod sa ilang plano. Una, pinaagi sa pag-ingon nga kini makapakunhod sa timbang. Duna silay pagya: “Panigarilyo imbis mokaon og tam-is.”

Dayon, pipila kanato kinsa gustong motan-aw og sine, makamatikod nga sila mosugo sa usa ka batan-ong babaye sa pagdagkot sa sigarilyo sa usa ka lalaki. Human niini may kamot sa babaye nga ipakita diha sa dagkong mga karatula nga modagkot o manigarilyo. Paglabay sa usa ka tuig o duha ug sa wala madugay isug na kaayo sila nga mopakita sa babaye diha sa tilon o sa dakong karatula nga manigarilyo….

Sayop tingali ko, pero nagtuo ko nga ako nakakita sa timailhan nga ang nagkunsabo nga mga tawo karon adunay dautang mga plano sa atong mga kabatan-onan. Pagbantay gayud pag-ayo.⁹

Ang mga miyembro adunay katungdanan sa ilang mga kaugalingon ug sa Simbahan sa pagsunod ug sa pagtudlo sa Pulong sa Kaalam.

Ang matag lalaki, matag babaye, kinahanglan gayud nga mohimo sa bahin niana nga responsibilidad niini nga Simbahan.…Bisan asa pa kita, … bisan unsa pay atong kahimtang o mga kalihokan sa negosyo, maanaa man kini sa pangpang o bisan asa, kon kita tintalon, diha sa mabugnaw nga kabuntagon, sa paglapas sa Pulong sa Kaalam pinaagi sa pag-inom og duha o tulo ka tasa nga tsa o kape, bation dayon nato ang responsibilidad sa pagbuhat sa matarung.

Himoa nga ang matag usa moingon sa iyang kaugalingon, “Ang responsibilidad sa pagkamiyembro dinhi sa Simbahan ania kanako; ako dili magpadala. Bisag walay usa nga nakakita kanako, nasayud ako ug ang Dios nasayud nga ako nagpadala, ug matag higayon nga ako magpadala sa kahuyang mas mahimong mahuyang ang akong kaugalingon ug wala ko motahud sa akong kaugalingon.” Kon kamo anaa sa negosyo, ug ang inyong mga kauban moingon, “Tana, manulod ta, ug mag-inom niining baratilyo, o niining baligya, ” ang inyong tubag kinahanglan nga, Dili, dili! Bisan og ang inyong giuhaw nga kahinam nagpangita niini, magpakalalaki kamo, magpaka-Santos sa Ulahing mga Adlaw, ug moingon, “Dili; ang responsibilidad sa pagkamiyembro sa Simbahan ania kanako.”¹⁰

Ang Simbahan ni Jesukristo sa mga Santos sa Ulahing mga Adlaw nagbarug nga walay pagduhaduha sa pag-ingon sa doktrina nga ang tsa, kape, tabako, ug ang mga makahubog dili maayo alang sa tawo. Ang tinuod nga mga Santos sa Ulahing mga Adlaw naglikay sa paggamit sa tabako ug ilimnon, sa mga stimulant o sa mga makahubog, ug pinaagi sa ehemplo ug lagda, motudlo sa uban sa pagbuhat sa ingon.¹¹

Ang pagsunod sa Pulong sa Kaalam makalig-on sa kinaiya ug makahatag og kalipay.

Ang Simbahan nag-awhag sa mga tawo sa pagmaster sa kaugalingon sa pagkontrol sa ilang mga kahinam, sa ilang mga taras, ug sa ilang sinultihan. Ang usa ka tawo wala sa iyang labing maayo kon siya usa ka ulipon sa pipila ka batasan. Ang usa ka tawo wala sa iyang labing maayo kinsa nagpakabuhi sa pagtagbaw sa iyang mga kahinam. Mao kana ang usa ka katarungan ngano nga ang Ginoo mihatag sa Simbahan sa pagpadayag sa Pulong sa Kaalam aron nga, bisan gikan pa sa pagkabata, ang mga batanong lalaki ug mga batan-ong babaye mahimong makat-on sa pagkontrol sa ilang mga kaugalingon. Dili kini sayon kanunay. Ang mga batan-on karon nag-atubang sa mga kaaway––mini nga mga idolohiya ug imoral nga mga binuhatan…. Ang maayong pagpangandam gikinahanglan aron makaatubang ug makabuntog niining mga kaaway.¹²

Ang matag batan-ong lalaki sa tibuok Zion, kon siya gikan na sa tubig sa bunyag, kinahanglan nga masayud nga kabahin sa iyang katungdanan ang pagpakigbatok sa pagpanigarilyo, bisan asa pa siya. Ang matag batan-on dinhi sa Simbahan kinahanglang tudloan, kon gikan na sa tubig sa bunyag, nga siya kinahanglan nga makigbatok sa mga makahubog kon ihatag kini diha sa sosyal nga panagpundok. Ang matag bag-ong miyembro niini nga Simbahan kinahanglang masayud nga ang tabako sa bisan unsang matang kinahanglang dili gamiton. Sila kinahanglang makigbatok niining tanang mga kinaiya, dili lamang tungod sa mga panalangin nga gisaad sa atong Amahan, pero usab tungod sa kalig-on nga maangkon sa pagpakigbatok sa mas dagkong mga tintasyon.¹³

Usa sa labing praktikal nga mga pagtulun-an sa Simbahan mahitungod sa [pagkontrol sa kaugalingon] mao ang Pulong sa Kaalam. Tinuod kini. May kalabutan kini labaw sa tanan mahitungod sa gana. Pakit-a ako og usa ka tawo kinsa kompletong mikontrol sa iyang gana, kinsa makabatok sa tanang tintasyon sa paggamit sa mga stimulant, bino, tabako, marijuana, ug laing makadaot nga mga drugas, ug ako mopakita kaninyo og usa ka batan-on o lalaki kinsa nakapalambo usab og gahum sa pagkontrol sa iyang mga kahinam ug mga tinguha.¹⁴

Ang Simbahan ug ang kalibutan sa kinatibuk-an nanginahanglan gayud nga makadungog kanunay mahitungod sa Pulong sa Kaalam. Usa kini ka doktrina nga gihatag ngadto sa tawo alang sa kalipay ug kaayohan sa tawo. Kabahin kini sa pilosopiya sa pagpuyo. … Siya kinsa napakyas sa pagpuyo niini naghikaw sa iyang kaugalingon sa kalig-on sa lawas ug sa kalig-on sa kinaiya nga siya may katungod. Ang kamatuoran mao ang pagkamaunungon ngadto sa matarung sumala sa atong pagsabut niini; mao kini ang maisugong pagpuyo sa atong mga kinabuhi nga nagsubay sa atong mga sumbanan; gahum gayud kini.¹⁵

Mga Sugyot alang sa Pagtuon ug Panaghisgutan

Sa unsa nga mga paagi nga ang Pulong sa Kalaam mas nag-una sa iyang panahon?
Ngano nga ang mga tawo usahay mosulay sa pagpangatarungan sa paggamit sa mga butang nga gidili diha sa Pulong sa Kaalam? Unsa ang pipila ka mga kakuyaw niining matanga sa panghunahuna? (Tan-awa sa mga pahina 127–29.)
Ngano nga importante man ang pag-atiman sa atong mga lawas? Unsa ang pipila ka negatibong pisikal nga mga epekto sa pagsupak sa Pulong sa Kaalam? (Tan-awa sa mga pahina 127–29.) Sa unsa nga paagi nga ang pagsupak niini nga sugo makaapekto kanato sa espirituhanong paagi? (Tan-awa sa mga pahina 127–29.)
Si Presidente McKay naghisgot bahin sa mga taktika sa pahinumdom sa tabako nga gigamit niadtong mga 1930 (tan-awa sa mga pahina 129–30). Unsa nga mga ehemplo ang atong makita karon sa “dautan nga mga tawo” nga nag-agni sa paggamit sa makadaut nga mga butang? Sa unsa nga paagi nga kita makatabang sa mga batan-on nga makaila sa mga kaayohan sa pagsunod sa Pulong sa Kaalam?
Sa unsa nga paagi nga ang Pulong sa Kaalam usa ka pisikal ug usa ka espirituhanong kasugoan? (Tan-awa sa mga pahina 127–29, 132–33.) Unsa nga mga panalangin ang gisaad ngadto niadtong kinsa mosunod niini nga sugo? (Tan-awa sa D&P 89:18–21.) Unsa ang pinakaimportanting mga panalangin nga nadawat ninyo ug sa inyong pamilya sa pagsunod sa Pulong sa Kaalam?
Unsay atong mabuhat aron madugangan ang atong kalig-on sa pagpakigbatok sa mga tintasyon sa pagsupak sa Pulong sa Kaalam? Sa unsa nga paagi nga ang pagsunod sa Pulong sa Kaalam makatabang sa pagpanalipod ug paglig-on sa kinaiya? (Tan-awa sa mga pahina 132–33.)
Unsa ang makadaot ug makaadik nga mga butang ang ania karon nga wala mahisguti sa D&P 89? Sa unsa nga paagi nga ang mga pagtulun-an sa D&P 89 ug ang mga pulong sa mga propeta sa ulahing mga adlaw makatabang kanato sa paggiya ug paglig-on kanato batok niining mga butanga?

May Kalabutan nga mga Kasulatan:Daniel 1:3–20; 1 Mga Taga- Corinto 3:16–17; D&P 89:1–21

President McKay — Pinaagi sa iyang mga pagtulun-an ug sa iyang ehemplo, si Presidente McKay mipakita sa mga panalangin sa pagsunod sa Pulong sa Kaalam.

mother and son blessing food — Si Presidente McKay miawhag sa mga Santos sa Ulahing mga Adlaw sa pagtudlo sa ilang mga anak ug sa uban sa Pulong sa Kaalam “pinaagi sa ehemplo ug sa lagda.”