Kapitulo 1

Jesukristo: “Ang Dalan, ang Kamatuoran, ug ang Kinabuhi”

Kon siya nagtinguha sa tinuod nga katuyoan sa kinabuhi, ang usa ka tawo kinahanglang magpuyo alang sa usa ka butang nga mas taas pa sa iyang kaugalingon. Madungog niya ang tingog sa Manluluwas nga nag-ingon, “Ako mao ang dalan, ang kamatuoran, ug ang kinabuhi. … ” (Juan 14:6.)¹

Pasiuna

Niadtong 4 sa Disyembre 1920, si Elder David O. McKay ug ang iyang kauban sa biyahe, nga si Hugh J. Cannon, usa ka presidente sa stake ug editor sa magasin sa Simbahan nga Imrovement Era, misugod sa paghimo sa buluhaton nga gisangon sa Unang Kapangulohan sa pagbisita ug sa paglig-on sa mga miyembro sa Simbahan sa tibuok kalibutan. Milungtad og usa ka tuig ang ilang biyahe ug mibiyahe sila og mga 100, 000 ka kilometro, sobra sa katunga nagbiyahe sila agi sa kadagatan. Pagkagabii niadtong 10 sa Mayo 1921, samtang sila naglawig padulong sa lugar nga karon mao ang Kasadpang Samoa, si Elder McKay nakasinati sa mosunod:

“Sa nagsingabot ang kagabhion, ang dan-ag sa kahapunon sa matahum nga pagsalop sa adlaw hilabihan kaanindot!. … Namalandong gihapon niining matahum nga talan-awon, naghigda ako sa mga alas dies ang takna sa kagabhion. … Nakatulog ako, ug nakita ang sa usa ka panan-awon sa usa ka butang nga balaan sa kahangturan. Sa layo-layo akong nakita ang usa ka maanindot nga puting siyudad. Bisan og kini layo, pero ingon og akong makita nga daghan kaayong mga kahoy nga dunay lamian nga prutas, gagmayng mga kahoy nga adunay mabulukon nga mga dahon, ug mga bulak nga hingpit na nga namuswak bisan asa. Ang tin-aw nga panganod sa ibabaw ingon og midan-ag niining matahum nga mga landong sa mabulukong mga dahon. Dayon ako nakakita og dakong pundok sa mga katawhan nga nagpaingon sa siyudad. Ang matag usa nagsul-ob og puti nga kupo ug puti nga tabon sa ulo. Diha-diha ang akong pagtagad ingon og natumong diha sa ilang lider, ug bisan og makita lamang nako ang porma sa iyang pagkatawo ug ang iyang lawas, nakaila dayon ako kaniya nga mao ang akong Manluluwas! Ang bulok ug kasilaw sa iyang panagway mahimayaong tan-awon. Adunay kalinaw sa iyang pagkatawo nga halangdon—balaan kini!

“Ang siyudad, sa akong nasabtan, iyaha. Mao kini ang Mahangturong Siyudad; ug ang mga tawo nga nagsunod kaniya mopuyo didto sa kalinaw ug sa mahangturong kalipay.

“Pero kinsa sila?

“Daw ang Manluluwas nakabasa sa akong mga hunahuna, siya mitubag pinaagi sa pagtudlo ngadto sa semicircle nga mitunga sa ilang ibabaw, ug diin ang mga pulong gisulat sa bulawan:

“Mao Kini Sila Kinsa Nakabuntog sa Kalibutan—

Kinsa sa Tinud-anay Natawo Pag-usab!”²

Sa iyang unang pakigpulong sa kinatibuk-ang komperensya isip Presidente sa Simbahan, si Presidente McKay mipanghimatuod pag-usab sa iyang pagpamatuod bahin sa Manluluwas ug sa mga panalangin nga moabut ngadto niadtong kinsa mosunod Kaniya:

“Walay usa nga makadumala niini nga Simbahan gawas kon siya mahiuyon una sa pangulo sa Simbahan, ang atong Ginoo ug Manluluwas, nga si Jesukristo. Siya ang atong pangulo. Kini mao ang iyang Simbahan. Kon wala ang iyang balaan nga giya ug ang kanunay nga pagdasig, dili kita magmalampuson. Uban sa iyang giya, uban sa iyang pagdasig, dili kita mapakyas. …

“…Nasayud ako nga anaa siya, nga siya andam sa paggiya ug sa paghatag og direksyon sa tanan kinsa moserbisyo kaniya.”³

Mga Pagtulun-an ni David O. McKay

Si Kristo mao ang Kahayag sa katawhan.

Si Kristo mao ang kahayag sa katawhan. Niana nga kahayag ang tawo makakita sa iyang agianan nga klaro kaayo; kon kini isalikway, ang kalag sa tawo magkapandol-pandol sa kangitngit. Walay tawo, walay grupo, walay nasud nga makakab-ot og tinuod nga kalampusan nga dili mosunod kaniya kinsa miingon:

“Ako mao ang kahayag sa kalibutan: siya nga magasunod kanako dili gayud magalakaw sa kangitngit, hinonoa magabaton siya sa kahayag nga magahatag og kinabuhi” (Juan 8:12).

Subo nga paladungon kon ang tagsa-tagsa ug ang mga nasud mopalong niana nga kahayag—kon si Kristo ug ang iyang ebanghelyo pulihan sa balaod sa kalasangan ug sa kusog sa espada. Ang labing dako nga trahedya sa kalibutan karon mao ang dili pagtuo sa kaayo sa Dios ug sa kakulang sa hugot nga pagtuo sa mga pagtulun-an ug sa mga doktrina sa ebanghelyo.⁴

Ang Simbahan ni Jesukristo sa mga Santos sa Ulahing mga Adlaw nagtuo nga sa iyang kinabuhi ug mga pagtulun-an si Jesukristo nagpakita og sumbanan sa personal nga pagpuyo ug sa sosyal nga relasyon sa ubang tawo nga, kon tinud-anay nga gamiton diha sa tagsa-tagsa ka mga kinabuhi ug sa mga institusyon sa tawo, dili lamang maarang-arang ang mga katilingban karon, pero makahatag usab og kalipay ug kalinaw sa katawhan.

Kon ikasulti man nga … ang gitawag nga Kristohanong mga nasud napakyas sa pagkab-ot sa mao nga tumong, kita motubag nga ang tanang kapakyasan makita diha sa kamatuoran nga sila napakyas sa paggamit sa mga baruganan ug mga pagtulun-an sa tinuod nga Kristiyanismo. …

… Ang tawhanong pamilya nag-antus gikan sa walay pugongpugong nga ekspresyon ug pagpakita sa pagkahakog, kasilag, kasina, kadawo—sama sa daw hayop nga pagbati nga maoy nakaingon sa gubat, kalaglagan, kamatay, ug kamatayon. Bisan kon ang labing yano lang nga mga baruganan sa mga pagtulun-an sa Manluluwas maoy gisunod, ang kasaysayan nausab na unta.⁵

Sa panahon nga ang mga Kristiyanos sa tibuok kalibutan magbaton niini nga pagtuo [diha ni Kristo] diha gayud sa ilang mga kasingkasing, sa panahon nga sila mobati og pagkamaunungon diha sa ilang mga kasingkasing ngadto sa nabanhaw nga Kristo, ug ngadto sa mga baruganan nga anaa niini, ang katawhan nakahimo na unta sa unang dakong lakang ngadto sa mahangturong kalinaw nga atong giampo matag adlaw: Isalikway Siya ug ang kalibutan mapuno sa kasilag, ug matabunan sa dugo sa nagbalikbalik nga gubat.⁶

Ang ebanghelyo ni Jesukristo maoy paagi sa pagbuntog sa kasilag, kasina, ug kahakog, ug ang kaayo, kamabination, ug gugma magpabilin nga maoy hilom nga mga tinguha sa tinuoray nga pagpakabuhi ug pag-uswag sa tawo.

Ipapunting sa mga lalaki ug mga babaye bisan asa ang ilang mga mata diha kaniya kinsa nagdan-ag isip ang Kahayag sa tibuok kalibutan—kay si Kristo mao ang Dalan, ang Kamatuoran, ang Kinabuhi, ang bugtong luwas nga Giya ngadto nianang dangpanan sa kalinaw diin ang mga katawhan sa lapad nga kalibutan matinguhaong nag-ampo.⁷

Si Kristo nagtudlo ug mipakita sa agianan ngadto sa sulundon nga kinabuhi taliwala sa atong mga isigkatawo.

“Unsaon man namo sa pagkatultol sa dalan?” nangutana si Tomas, samtang siya naglingkod uban sa iyang mga isig ka apostol ug sa ilang Ginoo diha sa lamesa human sa panihapon sa halandumon nga gabii sa pagluib, ug ang balaang tubag ni Kristo mao: “Ako mao ang dalan, ang kamatuoran, ug ang kinabuhi. … ” (John 14:5–6.) Ug siya mao gayud! Siya ang tinubdan sa atong kahupayan, ang inspirasyon sa atong kinabuhi, ang tuburan sa atong kaluwasan. Kon kita gusto nga makahibalo sa atong relasyon ngadto sa Dios, moadto kita kang ni Jesukristo. Kon kita gustong masayud sa kamatuoran sa pagka-imortal sa kalag, makita nato kini diha sa pagkabanhaw sa Manluluwas.

Kon kita magtinguha nga makat-on sa sulundon nga kinabuhi nga sundon sa atong mga isigkatawo, atong makita ang hingpit nga ehemplo diha sa kinabuhi ni Jesus. Bisan unsa ang atong bililhong mga tinguha, ang atong taas nga mga pangandoy, ang atong mga sumbanan sa bisan unsang bahin sa kinabuhi, kita makatan-aw ngadto ni Kristo ug makakaplag og kahingpitan. Busa, sa pagpangita og sumbanan alang sa moral nga pagkatawo, moduol lamang kita ngadto sa Tawo sa Nazaret ug kaniya makita ang gihulagway nga mga hiyas nga makapahimo sa hingpit nga tawo.

Ang mga hiyas nga gihiusa aron sa paghimo niining hingpit nga kinaiya mao ang kamatuoran, hustisya, kaalam, pagkamanggiloy-on, ug pagkontrol sa kaugalingon. Ang iyang matag hunahuna, pulong, binuhatan nahiuyon sa balaan nga balaod ug, busa, tinuod. Ang paagi sa komunikasyon tali kaniya ug sa Amahan kanunay nga bukas, mao nga ang kamatuoran, nga nagagad sa pagpadayag, kanunay niyang nahibaloan.⁸

Gidawat sa Ang Simbahan ni Jesukristo sa mga Santos sa Ulahing mga Adlaw ingon nga tinuod gayud ang mga pulong ni Jesus: “Ako mianhi aron sila makabaton og kinabuhi, ug sa pagpakabaton niini sa madagayaon gayud.” (Juan 10:10.) Kita nagtuo, hinoon, nga kining madagayaong kinabuhi maangkon dili lamang gikan sa espirituhanong kahimayaan, pero pinaagi usab sa matag adlaw nga paggamit sa mga baruganan nga gitudlo ni Jesus.

Kini nga mga baruganan diyutay ra ug yano ug hinaut, kon gitinguha, pagagamiton sa matag normal nga tawo. Ang una niini, ug ang pundasyon diin ang tinuod nga katilingban gitukod, mao: “Ug higugmaa ang Ginoo nga imong Dios sa tibuok mong kasingkasing, ug sa tibuok mong kalag, ug sa tibuok mong salabutan, ug sa tibuok mong kusog. … ” (Marcos 12:30.) Ang pagtuo sa usa ka Gamhanang Binuhat kinsa buhi ug nahigugma sa iyang mga anak—usa ka pagtuo nga makahatag og gahum ug kalagsik sa kalag. Usa ka kasiguroan nga siya kaduolan alang sa giya, ug nga siya mopakita sa iyang kaugalingon ngadto niadtong kinsa nangita kaniya.

Ang lain mao ang pagdawat sa kamatuoran nga ang kinabuhi usa ka gasa sa Dios ug busa balaan. Ang husto nga paggamit niini nga gasa nag-awhag sa tawo nga mahimong agalon, dili ulipon, sa kinaiyahan. Ang iyang mga gana kinahanglan nga kontrolahon ug pagagamiton alang sa kaayohan sa iyang panglawas ug sa pagpatunhay sa kinabuhi. Ang iyang mga kahinam kinahanglan nga masteron ug kontrolahon alang sa kalipay ug sa mga panalangin sa uban ug sa pagpalungtad sa kaliwatan.

Ang ikatulong baruganan mao ang personal nga kaligdong. Niini ako nagpasabut sa yano, matag adlaw nga pagkamatinuoron, kaligdong, ug pagtahud sa mga katungod sa uban, sa ingon makuha ang pagsalig sa isigkatawo. Kini nga kinaiya mahimong ipasidungog ngadto sa mga nasud ingon man usab sa tagsa-tagsa. Sayop alang sa usa ka nasud, tungod kay gamhanan, nga mangawat sa uban ug manglupig niini sama sa usa ka indibidwal nga mangawat ug mopatay sa iyang silingan.

Ang ikaupat nga importanting butang mao ang makatilingbanong pagpakabana nga makapaamgo sa matag indibidwal nga iyang katungdanan ang paghimo sa kalibutan nga maanindot tungod kay nagpuyo siya niini.⁹

Ang kinabuhi sa Manluluwas gigiyahan labaw sa tanan sa … Tagsa-tagsa nga Kaputli ug sa Pagserbisyo. Iyang giampingan ang iyang kaugalingon nga dili mahugawan gikan sa mga sala sa kalibutan, ug mihalad sa iyang kinabuhi aron mahatagan og konsiderasyon ang uban, ngadto sa kaluwasan sa tawhanong pamilya. Kanunay siyang nanalipod sa linupigan, naghupay sa masakiton, nag-ayo sa mga bakol ug mga baldado, naghatag sa iyang kinabuhi alang sa kalibutan.¹⁰

Adunay dinalian nga panginahanglan sa usa ka dako nga kausaban sa mga relasyon sa mga tawo sa usag usa. Wala gayud mahitabo masukad sa kasaysayan sa kalibutan nga ang kausaban alang sa maayo mas gikinahanglan. Ug tungod sa pagsalikway sa mga pagtulun-an ni Kristo miresulta ang nagbalikbalik nga kalisdanan, nga adunay temporaryo lamang nga mga panahon sa pagpahulay ug kalinaw ug kauswagan, ngano gayud kaha nga ang mga tawo dili andam nga pulihan ang hinakog nga pagpaimportante sa kaugalingon sa mga baruganan ni Kristo, sa inigsoong konsiderasyon, sa makiangayon nga relasyon, sa kabililhon ug ka sagrado sa tawhanong kinabuhi, sa hiyas sa pagpasaylo, sa pagkondenar sa sala sa kamaut ug sa pagkamasinahon, sa makaluwas nga gahum sa gugma.¹¹

Ang mga miyembro sa Simbahan ni Kristo anaa ubos sa obligasyon sa paghimo nga ilang sumbanan ang walay sala nga Anak sa Tawo. Siya ang usa ka Hingpit nga Tawo nga sukad nagpakabuhi dinhi sa yuta; ang labing halangdong ehemplo sa pagkadungganan; sama sa Dios ang kinaiya; hingpit sa iyang gugma; ang atong Manunubos; ang atong Manluluwas; ang putli nga Anak sa atong Mahangturong Amahan; ang Kahayag, ang Kinabuhi, ang Dalan.¹²

Akong gidawat si Jesukristo nga maoy panig-ingnan sa tawhanong kahingpitan.¹³

Ang mga pagtulun-an ni Kristo magamit sa matag adlaw nga kinabuhi.

Mituo ako sa matag pulong nga gisulti ni Jesus, ug alang kanako ang pagtulun-an magamit sa akong kinabuhi ug sa inyoha. Maghunahuna sa kamatuoran nga kita mga anak sa atong Amahan sa langit, kon kita mangita sa gingharian sa Dios, una, kita makahibalo sa usa ka bag-o nga tumong sa kinabuhi. … Diha lamang sa hingpit nga pagtugyan sa atong kaugalingong kinabuhi nga kita makabuntog sa kahakog, sa talamayon nga pagpamugos sa kinaiyahan. …

Hapit duha na ka libo ka mga tuig, ang mga tawo miisip [sa mga pagtulun-an ni Kristo] nga dili mapuslanon—sobra ra, sila miingon, pero kon kita sinserong motuo sa pagkabalaan ni Kristo, nga siya mao “ang dalan, ang kamatuoran, ug ang kinabuhi” (tanawa sa Juan 14:6), dili kita magduhaduha kanunay sa kamapuslanon sa iyang mga pagtulun-an sa matag adlaw nga kinabuhi.

Tinuod, adunay bug-at nga mga problema nga sulbaron—mga dautan sa hugaw nga lugar, ang nagbalikbalik nga mga panagbangi tali sa mamumuo ug sa kapitalista, paghuboghubog, prostitusyon, kasilag tali sa mga kanasuran, ug gatusan ka laing mga pangutana sa pagkakaron. Pero kon patalinghugan, ang hangyo ni Kristo sa personal nga kaligdong, dungog, pagpakig-angay, ug gugma mao ang sukaranan sa tukma nga kasulbaran sa tanan niining sosyal ug ekonomikanhong mga kalisud.

Labing siguro sa dili pa gani ang kalibutan mosulay sa pagsunod niining mga sumbanan, ang mga kasingkasing sa mga tawo kinahanglan nga mausab. Si Kristo mianhi sa kalibutan alang nianang maong katuyoan. Ang dakong katarungan sa pagsangyaw sa ebanghelyo mao ang pag-usab sa mga kasingkasing ug mga kinabuhi sa mga tawo. … Kadtong kinsa nakabig … makapamatuod sa unsang paagi nga ang pagkakabig nakapausab sa ilang mga kinabuhi. … Sa mao nga pagkakabig sila makahatag og kalinaw ug maayong pagsinabtanay ngadto sa kalibutan imbis panagbangi [ug] pag-antus.¹⁴

Isip unang lakang, … tumana sa tinud-anay ang yanong sugo sa pagbutang sa kaugalingon sa lugar sa laing tawo, ang labing siguro sa tanang mga paagi sa pagwagtang sa kasuko nga maoy nakaingon sa walay pagsinabtanay.

Walay tawo nga anaa sa maayong hunahuna nga tinud-anay nga makaingon nga ang paggamit niining yanong buhat kon gamiton sa tagsa-tagsa ug sa mga nasud dili makapahimo og usa ka nindot nga kalibutan!

Pareho nga epektibo ug mapuslanon mao ang Iyang mga pagtulun-an bahin sa hiyas ug ka sagrado sa tawhanong kinabuhi, sa hiyas sa pagpasaylo, sa panginahanglan sa pagpakig-angay, ang Iyang pagkondenar sa sala sa pagkamaut, ug sa pagkamasinahon, ang Iyang mga pagtulun-an kabahin sa makaluwas nga gahum sa gugma, ug sa pagka-imortal sa kalag.¹⁵

Ang pagsunod sa mga pagtulun-an ni Kristo mosangpot ngadto sa tinuod nga pagkabantugan ug kalipay.

Walay tawo nga sinserong nagtinguha sa paggamit sa mga pagtulun-an ni Jesus sa Nazaret sa iyang inadlaw nga kinabuhi nga dili makakita og kausaban sa iyang kinaiya. Ang hugpong sa mga pulong nga “natawo pag-usab” importante kaayo kay sa unsay pagtuo sa daghang mga tawo mahitungod niini. Kining nausab nga pagbati mahimong dili ikahulagway, pero kini tinuod.

Malipayon ang tawo kinsa sa tinud-anay nakamatikod sa makabayaw, makapausab nga gahum tungod sa pagkaduol ngadto sa Manluluwas, kining pagkakabanay ngadto sa buhing Kristo. Mapasalamaton ako nga ako nasayud nga si Kristo mao ang akong Manunubos.¹⁶

Ang labing taas sa tanang mga sumbanan mao ang mga pagtulun-an ug ilabi na sa kinabuhi ni Jesus sa Nazaret, ug nga ang tawo labing halangdon kon siya labing sama ni Kristo.

Kon unsa gayuy inyong gihunahuna diha sa inyong kasingkasing kabahin ni Kristo maoy modeterminar kinsa kamo, mao usab ang modeterminar unsay inyong pagabuhaton. Walay tawo nga makatuon niining balaang pagkatawo, nga makadawat sa iyang mga pagtulun-an nga dili makahibalo sa usa ka makabayaw ug makalunsay nga impluwensya diha sa iyang kaugalingon.¹⁷

Pinaagi sa pagpili kaniya isip atong sumbanan, naghimo kita sa atong mga kaugalingon og usa ka tinguha nga mahisama kaniya, sa pagpakigdait uban kaniya. Atong masabtan ang kinabuhi kon unsa gayud ang angay niini ug kon unsay posibling makab-ot niini.¹⁸

Wala Siya mosaad og materyal nga mga ganti, pero misaad siya og hingpit, balaan nga pagkatawo. … “Busa, kamo kinahanglan nga magmahingpit ingon nga hingpit ang inyong Amahan nga langitnon.” [Tan-awa sa Mateo 5:48.] Ug uban nianang balaang pagkatawo moabut ang kalipay, tinuod nga kalipay.¹⁹

Ang ebanghelyo, ang malipayon nga mga balita sa dako nga kalipay, mao ang tinuod nga giya alang sa katawhan; ug nga ang lalaki o babaye mas labing magmalipayon ug labing makontento kon nagsunod sumala sa mga pagtulun-an niini, nga mao ang kaatbang sa kasilag, pagpanggukod, panglupig, pagdominar, pagkawalay hustisya—mga butang nga nagpasiugda sa kalisdanan, kalaglagan, ug kamatayon sa tibuok kalibutan. Kon sa unsang paagi nga ang adlaw sa kalangitan mipainit sa katugnaw sa yuta, mao usab ang ebanghelyo ni Jesukristo nga mohupay sa magulanong mga tawo nga nangita sa mas taas ug mas maayo nga wala pa makita sa yuta.

Usa ka mahimayaong kondisyon ang maania niining karaang kalibutan kon sa tinud-anay kini moingon ngadto ni Kristo, ang Manunubos sa katawhan, “Ang tanan nangita kanimo.” (Marcos 1:37.) Ang kahakog, kasina, kasilag, pamakak, pangawat, panikas, dili pagsunod, panag-away, ug panaggubat sa mga nasud mawala na unya!²⁰

Atong gisaulog ang iyang pagkahimugso nga tungod sa iyang misyon sa yuta (1) ang Dios nahimaya; (2) ang yuta gisaaran og kalinaw; (3) ang tanang mga tawo gihatagan sa kasiguroan sa maayong kabubut-on sa Dios ngadto kanila!

Kon ang matag tawo nga matawo sa kalibutan adunay banwag sa iyang kinabuhi niining tulo ka mahimayaong mga sumbanan—pagkanindot ug pagkamalipayon ang kinabuhi! Uban sa maong tumong, ang tanan magtinguha sa tanang butang nga putli, makiangayon, madungganon, mahiyason, ug matinudanon—ang tanang paingon ngadto sa kahingpitan. … Siya molikay nianang dili putli, dili madungganon, o dautan. Kon ang matag tawo magtinguha sa pagpakita og maayong buot ngadto sa iyang isig ka tawo ug maningkamot sa pagpahayag niana nga tinguha sa liboan ka maayong mga panultihon ug ginagmay nga mga binuhatan nga magpakita sa pagkadili hakog ug pagsakripisyo sa kaugalingon, unsa kaha kaanindot nga salmot ang mahatag sa matag usa ngadto sa kinatibuk-ang kalinaw sa yuta ug kalipay sa katawhan!²¹

Pagkanindot unta niining kalibutana kon, ang tawo maningkamot sa pagsunod sa tambag ni Kristo: “ “Kon may gikasuk-an ka batok sa imong igsoon, umadto ka.” [Tan-awa sa Mateo 5:23–24.] O, usab, ang Iyang pahimangno: “unaha ninyo pagpangita ang gingharian ug ang pagkamatarung” [tan-awa sa Mateo 6:33], nga nagpasabut sa yanong paagi, nga dili mabalaka mahitungod sa kalibutanong mga butang ingon nga mas bililhon pa sa espirituhanong kalampusan.²²

Mibati ako, ug nasayud, nga pinaagi kaniya ug pinaagi lamang kaniya, ug pinaagi sa pagsunod sa ebanghelyo ni Jesukristo, atong makaplagan ang kalipay ug kaluwasan niini nga kalibutan ug kinabuhing dayon sa kalibutan nga moabut.²³

Mga Sugyot alang sa Pagtuon ug Panaghisgutan

Unsa ang pipila ka dagkong mga problema nga giatubang sa mga katawhan karon? Unsa nga piho nga mga baruganan ang gitudlo ni Jesukristo nga makatabang sa pagsulbad niining mga problemaha? Sa unsang paagi kini makatabang sa pagsulbad?
Ngano nga ang hugot nga pagtuo kang Jesukristo mahinungdanon sa pagpalambo sa mga kahimtang sa kalibutan karon? Unsay gipasabut niini nganha kaninyo nga si Jesukristo mao “ang dalan, ang kamatuoran, ug ang kinabuhi”?
Unsay makapugong sa mga tawo karon sa paggamit sa mga pagtulun-an sa Manluluwas sa ilang mga kinabuhi? Sa unsa nga mga paagi nga kita isip usa ka Simbahan ug isip tagsa-tagsa makapalambo sa Iyang mga sumbanan dinhi sa kalibutan?
Si Jesukristo miingon nga Siya mianhi sa kalibutan aron kita “makabaton og kinabuhi, ug [kita] makabaton niini sa madagayaon gayud” (Juan 10:10; tan-awa sa pahina 5). Sa unsa nga mga paagi nga ang Manluluwas nakatabang kaninyo nga makabaton og madagayaon nga kinabuhi?
Si Presidente McKay mipamatuod kabahin ni Jesukristo isip ang “panig-ingnan sa tawhanong kahingpitan” (pahina 7). Unsa ang pipila ka mga kinaiya ni Jesukristo nga nakapahimo Kaniya nga ehemplo sa kahingpitan? (Tan-awa sa mga pahina 5–6.) Hangtud asa kutob kini nga mga kinaiya sa tinud-anay makab-ot nato sa atong mga kinabuhi? Unsay atong mahimo aron ang atong tagsa-tagsa ka mga kinabuhi mahimong mas Kristohanon?
Si Presidente McKay mitudlo nga kadtong kinsa mogamit sa mga pagtulun-an sa Manluluwas makamatikod og kausaban sa ilang mga kaugalingon (tan-awa sa pahina 7). Sa unsang paagi nga nakita kini ninyo nga tinuod sa inyong kinabuhi o sa mga kinabuhi sa uban? Unsa ang kahulugan sa paggamit ni Presidente McKay sa mga pulong nga “natawo pag-usab”? (Tan-awa sa mga pahina 8–9.)

May Kalabutan nga mga Kasulatan:Mateo 11:28–30; Juan 13:15–17; 3 Nephi 27:21–22, 27; D&P 84:49–54

Christ — Kitang tanang mga lalaki ug mga babaye bisan asa kitang dapita atong ipunting ang mga mata diha kaniya kinsa nagdan-ag isip ang Kahayag sa tibuok kalibutan—kay si Kristo mao ang Dalan, ang Kamatuoran, ug ang Kinabuhi.”