Kapitulo 3

Ang Katuyoan sa Simbahan

Ang Simbahan, uban sa kompleto nga organisasyon niini, nagtanyag og pag-alagad ug inspirasyon ngadto sa tanan.¹

Pasiuna

Si Presidente David O. McKay adunay dakong gugma alang sa Simbahan ug usa ka lig-on nga pagpamatuod sa iyang misyon niini sa pagpangandam alang sa katapusang pagtukod sa gingharian sa Dios. Samtang nag-alagad sa Korum sa Napulog Duha ka mga Apostoles, nahinumdom siya sa mosunod nga kasinatian:

“Diha gayud sa ibabaw sa pulpito sa balay-tigumanan diin sa akong pagkabata ako motambong sa mga miting sa Dominggo, dihay nagbitay nga dakong litrato ni kanhi Presidente John Taylor sulod sa daghang mga tuig, ug sa ubos niini, nga sa akong pagtuo bulawanong mga pulong, mao kini nga pulong:

“ ‘Ang Gingharian sa Dios o Wala’

“Kini nga pagbati nakadani kanako isip usa pa ka bata sa wala pa ako makasabut sa tinuod nga kaimportante niini. Ingon og akong nahibaloan nianang higayona sa bata pa nga walay laing simbahan o organisasyon nga paingon sa kahingpitan o naghupot sa pagkabalaan nga maoy makita sa simbahan ni Jesukristo. Sa pagkabata gihinuktukan ko kini; sa pagkabatan-on, nahimong kombinsido ako niini; ug karon gimahal ko kini isip lig-on nga pagtuo sa akong kalag. …

“Ang pagkabalaan sa Ang Simbahan ni Jesukristo sa mga Santos sa Ulahing mga Adlaw makita sa organisasyon niini ingon man usab sa mga pagtulun-an niini. Ang pagkadios, panag-inigsoonay, pagserbisyo—kining tulo ka naggiya nga mga baruganan … mipuno sa atong tanang kalihokan sa Simbahan.”²

Ang pagpangulo ni Presidente McKay nagpakita sa iyang ligong pagtuo. Sa panahon sa iyang pangalagad isip Presidente, ang Simbahan nakasinati og dakong pagtubo ug kauswagan sa tibuok kalibutan, nga ang mga miyembro mitubo gikan sa mga usa ka milyon ngadto sa hapit moabut og tulo ka milyon. Naghulagway sa papel ni Presidente McKay niini nga pagtubo, duha ka mga historyan misulti sa mosunod:

“Sayo sa iyang administrasyon si Presidente David O. McKay, ang unang nakabiyahe og daghan kaayong lugar isip Presidente sa Simbahan, milibot sa mga misyon sa Europe, Latin America, Africa, ug Habagatang Pasipiko, nagpahinungod sa duha ka mga templo didto sa Europe ug nagpahibalo nga usa ka templo pagatukuron didto sa New Zealand. Niadtong 1955 mipahayag siya nga ang Simbahan kinahanglang ‘maningkamot pag-ayo subay sa makatarunganon ug praktikal nga mga limitasyon aron mapaduol sa mga miyembro sa Simbahan niining lagyo nga mga misyon ang tanang … espirituhanong kahigayunan nga ikahatag sa Simbahan’ [sa Conference Report, Abr.1955, 25]. Ang pagtukod og mga templo, pagdugang sa gidaghanon sa mga misyon, pagorganisar sa mga stake sa tibuok kalibutan, pag-awhag sa mga Santos sa pagtukod sa Zion sa ilang kaugalingong mga dapit kay sa mobalhin ngadto sa Amerika, ug sa katapusan ang pagtugyan sa pagpangulo sa Simbahan ngadto sa mga kamot sa lumad nga mga tawo sa matag nasud mao ang mahinungdanong mga lakang ngadto sa katumanan niana nga tumong.”³

Ang hugot nga pagtuo ni Presidente McKay sa balaang misyon ug sa kapalaran sa Simbahan nagpadayon hangtud sa katapusan sa iyang kinabuhi. Sa usa ka pakigpulong sa kinatibuk-ang komperensya nga kulang dyutay sa usa ka tuig sa wala pa ang iyang kamatayon, siya nagtudlo: “Ang Dios mitukod sa iyang Simbahan nga dili na gayud malumpag pa ni ihatag ngadto sa laing mga tawo. Ug samtang ang Dios buhi, ug ang iyang mga katawhan matinud- anon ngadto kaniya ug sa usag usa, dili kita kinahanglang mabalaka mahitungod sa katapusang kadaugan sa kamatuoran.”⁴

Mga Pagtulun-an ni David O. McKay

Ang misyon sa Simbahan mao ang pagpangandam alang sa katapusang pagtukod sa gingharian sa Dios.

Ang misyon sa Simbahan mao ang pagpangandam alang sa katapusang pagtukod sa Gingharian sa Dios dinhi sa yuta. Ang katuyoan niini mao, una, ang pagpalambo og Kristohanong mga hiyas diha sa mga kinabuhi sa mga tawo; ug, ikaduha, ang pagusab sa katilingban aron nga ang kalibutan mahimong usa ka mas maayo ug mas malinawon nga dapit nga kapuy-an.⁵

Unsa ang [gihatagan og gibug-aton] sa pagtulun-an ni Kristo sa dihang mianhi siya taliwala sa mga tawo? Ang unang mahinungdanong pamahayag mao ang pagpahibalo nga ang gingharian sa Dios haduol na. “Paghinulsol kay ang gingharian sa Dios haduol na.” [Tan-awa sa Marcos 1:15.] Ang nag-una, nga si Juan Bautista, misangyaw niana. Siya misangyaw sa pag-anhi sa Ginoo. Iyang gipakita ang katungdanan nga huptan sa Ginoo niana nga gingharian ug ang Manluluwas misaksi niini ug misangyaw sa mao gihapon. Ug unsa nga gingharian? Dili usa ka tinumutumo, pero usa ka tinuod nga gingharian; dili lamang usa ka pagbati sa kaugalingon, pero usa usab ka dayag nga ekspresyon sa pagkamatarung. Balaan kini nga pangagamhanan taliwala sa mga tawo. Mao kana ang anaa sa hunahuna sa Manluluwas, ang pagtukod sa usa ka balaan nga pangagamhanan taliwala sa mga tawo.⁶

Ang pulong [gingharian sa Dios] nagpasabut sa balaan nga lagda diha sa mga kasingkasing ug sa mga kabubut-on sa mga tawo ug sa katilingban. Ang tawo miila og usa ka gahum ug awtoridad nga labaw pa kay sa iyaha. “Dili kini malupigon nga lagda sa usa ka madaugdaugon nga Dios, pero gibase sa boluntaryong pagtugyan sa tawo sa iyang kabubut-on ngadto niana nga Dios.” Sa usa ka higayon si Jesus miingon, “Ang gingharian sa Dios anaa ra sa taliwala ninyo.” [Lucas 17:21.] Tinuod kana, kay anaa diha sa kasingkasing sa tawo magsugod ang pagkamiyembro sa gingharian. … Ang mao lamang nga grupo nga nagkahiusa sa pagtanaw ngadto sa langit alang sa giya sa katapusan makausab sa tawhanong katilingban.

Ang Gingharian sa Dios nagpasabut usab sa kinatibuk-ang panag- inigsoonay diin ang tanang mga lalaki miila sa Dios nga ilang Labing Gamhanang Magmamando ug magmahal sa tinguha sa pagsunod sa Iyang balaang kabubut-on.⁷

Adunay mga tawo sa kalibutan kinsa moingon nga ang kasina, pagdumot, [ug] kahakog diha sa mga kasingkasing sa mga tawo makapugong kanunay sa pagtukod sa sumbanan nga katilingban nga nailhan nga ang Gingharian sa Dios. Bisan unsa pay isulti sa mga walay pagtuo ug mga matamayon, ang misyon sa Simbahan ni Kristo mao ang pagwagtang sa sala ug pagkadautan gikan sa mga kasingkasing sa mga tawo, ug sa ingon mag-usab sa katilingban aron ang kalinaw ug kaayo mopatigbabaw niini nga yuta.⁸

Ang mga korum sa priesthood ug mga organisasyon sa auxiliary gihimo aron sa pagtabang nga matuman ang misyon sa Simbahan.

Hunahunaa ang priesthood sa Simbahan. Handurawa diha ang mga lalaki ug ang batang mga lalaki nga giorganisar sa nagkalainlaing seksyon o grupo sa pagtrabaho, gikan sa amahan nga nag-edad og nobyenta anyos, ngadto sa batang lalaki nga nagedad og dose anyos. Niining mga grupoha inyong makita ang ehemplo nga gipangita sa tanang tawhanong katilingban diha sa sosyal nga mga grupo ug sa mga katilingban. Adunay kahigayunan kining mga grupo sa korum sa pagpakigdait, panag-inigsoonay, ug sa organisado nga pagserbisyo. …

Kadtong kinsa mga aktibo nga nagtrabaho sa organisado nga paagi alang sa kaayohan sa usag usa, alang sa personal nga kaayohan sa mga miyembro ug alang sa kaayohan sa katilingban sa kinatibuk-an. Kon kita dili maghunahuna og labaw pa kay sa mga korum, dili ba kana usa ka halangdong talan-awon, diin ang mga lalaki ug ang mga batang lalaki mahimong magkatigum, magkauban, makatampo sa pagserbisyo sa katawhan, diin ang matag tawo moisip sa usag usa nga usa ka igsoon? Niana nga korum ang doktor molingkod tupad sa usa ka panday, interesado ang matag usa sa labing madungganong mga tinguha—ang pagsimba sa Dios ug ang matinabangon nga pagserbisyo ngadto sa katawhan!⁹

Ang responsibilidad sa Relief Society mao ang pagtabang sa priesthood sa pagtukod sa gingharian sa Dios, sa paghupay sa nag-antus ug sa pagtabang sa kabus, ug sa daghang mga paagi makasalmot ngadto sa kalinaw ug kalipay sa kalibutan. …

Usa sa labing makapadasig nga mga saad nga sukad gihatag ngadto sa mga tawo kinsa gustong moserbisyo mao kanang gisulti sa Manluluwas niini nga mga pulong, “Maingon nga gibuhat ninyo kini ngadto sa usa sa mga labing gagmay niining akong mga igsoon, gibuhat usab ninyo kini kanako.” (Mat. 25:40.)… Hingkod na ako sa dihang akong naamgohan ang kamahinungdanon sa serbisyo nga gihatag sa atong mga igsoong babaye niini nga Simbahan.¹⁰

Ang Simbahan, nga nakahibalo sa gahum sa laing mga impluwensya gawas sa panimalay diha sa nag-uswag nga kinabuhi sa bata sa dili pa siya mahimong responsable sa iyang kaugalingon, nagtanyag og relihiyoso nga kahimtang halos gikan sa panahon sa pagkahimugso. Ang Sunday School, ang Primary, ang [mga organisasyon sa Young Men ug Young Women] naghan-ay og tukma nga panudlo, kalingawan, ug tukma nga giya gikan sa pagkabata ngadto sa pagkahingkod.¹¹

Ang mga Santos sa Ulahing mga Adlaw sa tinud-anay usa gayud ka katawhan kinsa magtinabangay sa usag usa diha sa mabungahon nga kinabuhi, usa ka kinabuhi nga nagtagad sa kaluwasan sa tawo. Niana nga kaluwasan wala ako magpasabut lamang sa usa ka lugar human dinhi diin ang atong tanang mga kahingawa ug mga kabalaka matapos, pero usa ka kaluwasan nga magamit sa tagsa-tagsa, ngadto sa pamilya ug ngadto sa katilingban dinhi ug karon. Pinaagi sa Ebanghelyo ni Jesukristo, ug sa hingpit nga organisasyon sa Simbahan sumala sa gipadayag niini nga dispensayon ngadto ni Propeta Joseph Smith, nagtinabangay kita sa usag usa sa espirituhanong paagi pinaagi sa pagpahimulos sa daghang mga kahigayunan alang sa pagserbisyo dinhi sa Simbahan. Nagpalambo kita og panag-igsoonay pinaagi sa kalihokan ug pagpanag-uban diha sa mga korum sa priesthood, diha sa pagpanag-uban sa auxiliary ug sa atong sosyal nga panagpundok.¹²

Samtang ang Simbahan makatuman sa misyon niini, makapanalangin kini ug makahingpit sa tagsa-tagsa.

Ngadto sa mga miyembro sa Ang Simbahan ni Jesukristo sa mga Santos sa Ulahing mga Adlaw, ang bili sa tagsa-tagsa adunay espesyal nga kahulugan. Ang mga korum, mga auxiliary, mga ward, mga stake, bisan ang Simbahan mismo giorganisar aron sa pagpadayon sa kaayohan sa tawo. Ang tanan mga paagi lamang sa pagkab-ot sa tumong, ug kana nga tumong mao ang kalipay ug mahangturong kaayohan sa matag anak sa Dios. Busa mohangyo ako sa tanang mga miyembro sa Simbahan, ug ilabi na ngadto sa mga presidente sa mga korum ug ngadto sa mga opisyales sa tanang mga auxiliary, nga maghiusa sa pagpaningkamot sa paghimo sa mga kinabuhi sa mga tawo nga mas maanindot.¹³

Anaa sa tawo dili lamang ang kahilig, apan usab ang pagkabalaan nga nag-awhag kaniya sa pagpadayon ug sa pagpatigbabaw. Gibati kini sa tanan, ug usahay sa iyang kinabuhi ang matag tawo nakahibalo nga anaa kini kaniya.

Uban niining espirituhanong pag-aghat mao ang tulo ka mahinungdanong mga panginahanglan nga wala gayud mausab sa nangaging mga katuigan: (1) Ang matag normal nga tawo nangandoy nga makahibalo og butang bahin sa Dios. Unsa may hitsura niya? Interesado ba siya sa tawhanong pamilya, o wala ba siya magtagad niini sa hingpit? (2) Unsa ang labing maayong kinabuhi nga puy-an niining kalibutana aron mas labing magmalampuson ug makaangkon sa tumang kalipay? (3) Unsa kanang dili kapugngan nga butang nga gitawag og kamatayon? Unsa may sunod niini?

Kon kamo gusto sa mga tubag niining mga pangandoy sa tawhanong kalag, kinahanglan nga kamo moadto sa simbahan sa pagkuha niini. Ang bugtong tinuod nga relihiyon lamang ang makatagbaw sa nangandoy nga kalag.¹⁴

Ngano nga kita magpahigayon niining mga miting sa komperensya ug sa tanang laing mga miting sa Simbahan? Gihimo kini alang sa kaayohan sa tagsa-tagsa—alang sa inyong anak nga lalaki ug sa akong anak nga lalaki, sa inyong anak nga babaye ug sa akoa. Ang Ginoo miingon, “… kon mahimo nga ikaw manlimbasog sa tanan nimo nga mga adlaw sa pagsangyaw og paghinulsol ngadto niini nga mga katawhan, ug magdala, bisan usa ka kalag ngari kanako, unsa ka dako ang imong hingpit nga kalipay uban kaniya diha sa gingharian sa akong Amahan!” [D&P 18:15.]…

Ang … katuyoan sa organisasyon niining nabantog nga Simbahan, nga kompleto kaayo, nga hingpit kaayo, mao ang pagpanalangin sa tagsa-tagsa.¹⁵

Kini nga Simbahan gitukod sa bugtong paagi diin ang Simbahan ni Kristo mahimong pagatukuron, pinaagi sa direkta nga awtoridad gikan sa Dios. Sa ingon nga kini natukod nagdapit kini sa tibuok kalibutan sa pagduol ngadto sa usa ka Simbahan nga giila sa Dios mismo, ug nagtanyag sa matag kahigayunan nga mosangkap sa hunahuna, sa emosyon ug sa mga tinguha sa tawo aron matuman ang tagsa-tagsa ka misyon niini nga yuta. “Usa kini ka nagkadako nga timailhan sa direkta nga personal nga impluwensya, gitagana gayud sa pagtandog ug pagusab sa tanang mga tawo, aron nga sila sama ni Jesus mahimong sama sa Dios.” “Ang Mormonismo, ” ingon nga tinuod nga Kristiyanismo, “mobuntog sa pagkahakog, mokontrol sa mga kahinam, mopaubos sa gana, mopaabtik sa salabutan, mobayaw sa mga pagbati. Kini mopalambo sa kakugi, kamatinuoron, kamatuoran, kaputli, kamabination. Mopaubos kini sa mapagarbuhon, mobayaw sa mapainubsanon, motuboy sa balaod, modapig sa kalingkawasan, mahinungdanon ngadto niini, ug mohiusa sa mga tawo diha sa usa ka halangdong panag-inigsoonay.”¹⁶

Samtang ang Simbahan makatuman sa misyon niini, makatampo kini ngadto sa kaayohan sa katawhan.

Daghang mga lumulupyo nabalaka pag-ayo sa pagsaka sa krimen, sa daghang diborsyo ug sa kadaghan sa mga nanganak nga wala maminyo, sa nagkadaghan nga venereal disease, ang mga eskandalo sa taas nga mga opisyales, ug ubang mga sintoma sa pagkadili matinuoron pribado ug publiko.

Aduna bay moral nga pagkaut-ot? Aduna bay katarungan nga maalarma? Ang kalibutan anaa sa atong palibot, ug ang estatistika nga atong mabasa makahahadlok gayud, ug kini usa gayud ka pagpasidaan. …

Ang misyon sa Simbahan mao ang pagpaminos niini ug, kon mahimo, wagtangon kining mga dautan gikan sa kalibutan. Tataw nga kita nagkinahanglan sa usa ka hiniusang pwersa sa pagwagtang niini nga mga dautan. Ang mao nga hiniusang pwersa, ang mao nga sumbanan mao ang ebanghelyo ni Jesukristo, nga gipahiuli pinaagi ni Propeta Joseph Smith. Kini nagpasabut sa kinabuhi sa tawo ug sa katuyoan niini ug anaa niini ang mahinungdanong makaluwas nga mga elemento, halangdong mga sumbanan, ug espirituhanong pagbayaw alang sa kasingkasing sa tawo nga nangandoy.

Ang mga tawo nga husto og panghunahuna, matarung nga mga tawo bisan asa matinguhaon nga mawagtang gikan sa atong mga katilingban ang dautang mga elemento nga kanunay nga nagbungkag sa katilingban—ang problema sa bino uban sa mga paghuboghubog, ang naanad sa narkotiko uban sa nagkuyog nga mga kadautan niini, imoralidad, kakabus, uban pa. Ang Simbahan naningkamot sa paghimo sa kahimtang sa panimalay ug komunidad nga mas maayo ug mas masanagon.¹⁷

Dinhi ug karon atong ipadayag ang atong pasalamat alang sa Simbahan ni Jesukristo uban sa mga korum ug mga auxiliary nga gituyo sa pag-organisar aron sa pagpakigsangka niining mga kadautan. Gitukod kini pinaagi sa balaan nga pagpadayag sa Dios nga Amahan ug sa iyang Anak nga si Jesukristo. Ang mahimayaong misyon niini mao ang pagpahayag sa kamatuoran sa gipahiuli nga ebanghelyo; sa pagbayaw sa katilingban aron ang mga tawo mas maghigalaay sa usag usa; sa paghimo sa atong mga komunidad og usa ka maayong kahimtang diin ang atong mga anak makakaplag og kalig-on sa pagbatok sa tintasyon ug kadasig sa pagpaningkamot alang sa kalampusan kultura ug espirituhanong mga butang.¹⁸

Ang Simbahan, gitukod pinaagi sa balaan nga inspirasyon ngadto sa walay kahibalo nga kabatan-onan, nagtanyag ngadto sa kalibutan sa solusyon sa tanang sosyal nga mga problema niini. Malampuson kining nakalahutay sa pagsulay sa unang siglo. Sa taliwala sa maalamong mga konsepto sa mga tawo niining ika-baynte nga siglo, kinsa naningkamot pag-ayo sa sosyal nga reporma ug kinsa wala makakita sa umaabot aron basahon ang kapalaran sa tawo, ang Simbahan misanag sama sa adlaw sa kalangitan, libot niini ang ubang langitnong mga butang nga nagtuyok ingon nga mga satellite nga dili kaayo importante. Sa tinud-anay kini mao ang tiglalang ug tigpatunhay sa labing taas nga mga hiyas sa tawo. Ang tinuoray nga buluhaton niini, mao ang katubsanan sa atong kalibutan. “Mao kini ang kahayag sa kamatuoran nga nagdan-ag bisan asa sa kalibutan, ug kini nga kahayag dili mapakyas sa pagpadayag ngadto sa tawo, sa madugay o sa madali, sa balaan nga mga sumbanan diin ang tawo kinahanglang magpakabuhi.”¹⁹

Ang Simbahan, uban sa kompleto nga organisasyon niini, nagtanyag og pag-alagad ug inspirasyon ngadto sa tanan. … Imbis kuhaon ang mga tawo gikan sa kalibutan, naningkamot kini sa pagpalambo og hingpit, mga tawo nga sama sa Dios taliwala sa katilingban, ug pinaagi kanila sulbaron ang mga problema sa katilingban.²⁰

Mga Sugyot alang sa Pagtuon ug Panaghisgutan

Base sa mga pagtulun-an ni Presidente McKay, unsaon ninyo paghulagway ang katuyoan sa Simbahan? (Tan-awa ang mga pahina 27–28.) Nganong magpahigayon kita og mga miting ug mga komperensya sa Simbahan? (Tan-awa ang mga pahina 30–31.)
Sa unsa nga paagi nga ang Simbahan motabang sa pagpangandam alang sa katapusang pagtukod sa gingharian sa Dios? (Tanawa sa mga pahina 28–32.) Sa unsa nga mga paagi nga ang Simbahan nahisama ug naghulagway sa gingharian sa Dios nga pagatukuron pa? (Tan-awa ang mga pahina 27–28.)
Unsa ang gihatag sa Simbahan nga makagiya sa matinudanong mga miyembro ngadto sa kinabuhing dayon? (Tan-awa ang mga pahina 28–32.) Sa unsa nga paagi nga inyong nakitan nga ang organisasyon sa Simbahan, uban sa mga korum ug mga auxiliary niini, nakatabang sa paghingpit sa tagsa-tagsa? (Tan-awa usab sa Mga Taga-Efeso 4:11–13.)
Unsa ang pipila ka mga problema nga giatubang sa mga katilingban karon? (Tan-awa ang pahina 31.) Sa unsa nga mga paagi nga ang paggamit sa mga baruganan sa ebanghelyo makatabang sa pagsulbad niini nga mga problema? (Tan-awa ang mga pahina 30–31.)
Sa unsa nga mga paagi nga ang pagkamiyembro diha sa Simbahan nakapanalangin sa inyong kinabuhi? Unsa ang mahimo ninyo ug sa inyong pamilya aron mas hingpit nga makaangkon og kaayohan gikan sa unsay ikatanyag sa Simbahan?
Unsa ang atong mahimo sa pagtabang sa Simbahan nga mapadayon ang mga responsibilidad niining ulahing mga adlaw?

May Kalabutan nga mga Kasulatan: Mga Taga-Efeso 2:19–22; 4:11–15; Moroni 6:4–9; D&P 10:67–69; 65:1–6

President Mckay holding a sister — “Ang … katuyoan sa organisasyon niining nabantog nga Simbahan, nga kompleto kaayo, nga hingpit kaayo, mao ang pagpanalangin sa tagsa-tagsa.”