Kapitulo 17

Usa ka Pagpamatuod sa Kamatuoran

Ang pagpamatuod sa ebanghelyo ni Jesukristo mao ang pinakasagrado, ang pinakabililhong gasa sa atong mga kinabuhi, mabatunan lamang pinaagi sa pagsunod sa mga baruganan sa ebanghelyo, dili pinaagi sa pagsunod sa mga dalan sa kalibutan.¹

Pasiuna

Si Presidente David O. McKay sa kasagaran nagtudlo mahitungod sa kamahinungdanon sa pag-angkon og personal nga pagpamatuod sa ebanghelyo, nagsaad nga “ang Ginoo dili gayud mosalikway niadtong kinsa nagtinguha kaniya.” Sa iyang pagkabatan-on, si David O. McKay nagtinguha nga makaangkon sa iyang kaugalingong pagsaksi sa kamatuoran. Nahinumdom nianang higayona sa iyang kinabuhi, misulat siya:

“Sa akong pagkabatan-on ingon og ako dunay hunahuna nga dili kita makaangkon og pagpamatuod gawas kon kita makakita og langitnong butang. Nakabasa ko sa unang panan-awon ni Propeta Joseph Smith, ug nasayud ko nga nasayud siya nga unsay iyang nadawat iya sa Dios. Nakadungog ko sa pagpamatuod sa akong amahan sa usa ka tingog nga miabut ngadto kaniya, ug ingon og ako nakadawat og impresyon nga kadto mao ang tinubdan sa tanang pagpamatuod. Nahibaloan nako sa akong pagkabatan- on nga ang labing bililhong butang nga maangkon sa tawo niining kinabuhia mao ang usa ka pagpamatuod sa ka balaan niini nga buhat. Nagtinguha ako niini, gibati nako nga kon ako makaangkon og pagpamatuod, ang lain pang mga butang ingon nga dili na importante.

“Wala nako ibaliwala ang pag-ampo. Mibati ako kanunay nga ang sekreto nga pag-ampo, sa kwarto o adto sa kakahoyan o sa kabungturan, mao ang dapit diin kana nga pagpamatuod moabut. Busa, sa dihang ako bata pa miluhod ko aron mag-ampo sobra sa makausa sa may punoan sa lumboy samtang ang akong kabayo nagbarug sa daplin sa dalan.

“Nahinumdom ko nga nagsakay didto sa mga bungtod sa Huntsville usa ka hapon niana, nga naghunahuna niining mga butanga ug miingon nga didto sa kahilom sa mga kabungturan mao ang labing maayong dapit aron makaangkon niana nga pagpamatuod. Gipahunong nako ang akong kabayo, miitsa sa renda sa ibabaw sa iyang ulo, mipalayo og pipila lang ka mga lakang, ug miluhod sa kilid sa usa ka kahoy. Ang hangin limpyo ug labas, ang init sa adlaw makapahimuot; ang kalunhaw sa mga tanom ug ang mga kabulakan mialimyon sa kahanginan. …

“Miluhod ako ug uban sa tumang kainit sa akong kasingkasing mibu-bu sa akong kalag ngadto sa Dios ug mihangyo kaniya alang sa usa ka pagpamatuod niini nga ebanghelyo. Naghunahuna ko nga adunay magpakita; nga makadawat kog transpormasyon nga maoy makapawala sa akong pagduhaduha.

“Mibarug ko, mikuha sa akong kabayo, ug sa pagpauli na namo agi sa dalan-dalan, nakahinumdom ko nga namalandong hinoon sa akong kauglingon ug nagpanglingo, nga nag-ingon sa akong kaugalingon, ‘Wala, sir, walay kausaban; pareha ra ako sa wala pa ako moluhod.’ Ang gipaabut nga pagpakita wala moabut.”²

Bisan og wala siya makadawat dayon sa pagpakita nga iyang gipaabut, si Presidente McKay padayong nagtinguha og personal nga pagsaksi. Unya misulti siya nga “ang espirituhanong pagpakita nga akong giampo sa akong pagkabata sa tin-edyer pa ko miabut isip natural nga sangputanan sa pagbuhat sa katungdanan.”³

Gikan sa iyang kaugalingong kasinatian nagtudlo si Presidente McKay nga ang pagsunod sa mga baruganan sa ebanghelyo mao ang yawe aron makadawat og pagpamatuod. Mipamatuod siya: “Kon maningkamot kamo sa pagdawat sa mga baruganan sa walay katapusang kinabuhi, inyong mahibalon nga kini naghatag sa inyong kalag sa panalangin sa Espiritu Santo nga makahatag kaninyo og pagpamatuod sa wala gayuy pagduhaduha nga ang Dios buhi, nga siya gayud ang atong Amahan, ug nga mao kini ang iyang buhat nga gitukod pinaagi ni Propeta Joseph Smith. Mao kana ang akong pagpamatuod––ang labing bililhong butang sa kinabuhi!”⁴

Mga Pagtulun-an ni David O. McKay

Ang pagpamatuod sa kamatuoran mao ang labing bililhong butang sa kalibutan.

Walay laing butang nga maangkon sa tawo dinhi sa kalibutan, nga makahatag og dugang kahupayan, dugang paglaum ug hugot nga pagtuo kay sa pagpamatuod sa pagkaanaa sa Langitnong Amahan kinsa naghigugma kanato, o sa katinuod ni Jesukristo, ang iyang Bugtong Anak, nga kadtong duha ka langitnong mga personahe nagpakita ngadto ni Propeta Joseph ug mitukod sa Simbahan ni Jesukristo, ug nga ang mga lalaki opisyal nga gitugutan sa pagrepresentar sa Dios.⁵

Ang labing bililhong butang sa kalibutan mao ang pagpamatuod sa kamatuoran. … Ang kamatuoran dili gayud matigulang, ug ang kamatuoran mao nga ang Dios mao ang tinubdan [sa] Priesthood … ; nga Siya buhi, nga si Jesukristo, ang Halangdong Pari, nagbarug isip pangulo niini nga Simbahan.⁶

Aduna kitay pagpamatuod sa Espiritu nga kita mga anak sa atong Amahan sa langit. Aduna kitay pagpamatuod nga ang Dios usa ka buhi nga binuhat. Aduna kitay pagpamatuod nga si Kristo, kinsa gilansang ug mibangon sa ikatulo ka adlaw usa ka nabanhaw nga binuhat, mao ang pangulo sa iyang Simbahan. Aduna kitay pagpamatuod sa Espiritu nga mipadayag siya niini nga dispensasyon sa ebanghelyo ni Jesukristo, nga gitukod sa makausa dinhi sa yuta sa tanang kahingpitan niini. Ang ebanghelyo ni Jesukristo, ingon nga gipadayag ngadto ni Propeta Joseph Smith, mao gayud sa tanang paagi ang gahum sa Dios ngadto sa kaluwasan [tan-awa sa Mga Taga-Roma 1:16]. Naghatag kini sa matag tawo sa hingpit nga kinabuhi dinhi, ug pinaagi sa pagsunod sa mga baruganan sa ebanghelyo makahatag kini kanato og kinabuhing dayon.⁷

Alimaha diha sa inyong mga kasingkasing ang pagpamatuod sa kamatuoran; himoa kini nga solido ug malig-on ug walay pagkabalhin sama sa mga bitoon sa kalangitan. Hinaut nga moabut diha sa kasingkasing sa matag usa ug nganha sa tanan natong mga panimalay ang tinuod nga Espiritu ni Kristo, ang atong Manunubos, kansang pagkatinuod, kansang makadasig nga giya nasayud ako nga tinuod.⁸

Samtang kita magmasulundon, makadawat kita og pagpamatuod pinaagi sa Espiritu.

Ang kaputli sa hunahuna, ug kasinsero sa kasingkasing sa pagpangita sa giya sa Manluluwas kada adlaw mosangpot sa pagpamatuod sa kamatuoran sa Ebanghelyo ni Kristo nga sigurado ug permanente sama sa gihuptan ni Pedro … human makakita sa pagkausab sa panagway ni Kristo, ug pagkadungog sa tingog sa Dios nga mipamatuod sa Iyang pagkabalaan [tan-awa sa Mateo 17:1–5].⁹

Naghunahuna ko kon pila kanato ang nagpakita … [sa mga kabatan-onan] sa unsang paagi sila mahimong [makadawat og pagpamatuod]. Gipasabut ba nato pag-ayo ang kamatuoran nga dili gayud sila masayud niini kon sila magpakasala; dili gayud nila kini mahibaloan kon sila nagpakabuhi sa pagpatuyang sa ilang mga kahinam ug mga gana. “Ang akong Espiritu dili kanunay magpabilin uban sa tawo” (Gen. 6:3; D&P 1:33; Moises 8:17.) Ang iyang espiritu dili gayud mopuyo sa hugaw nga mga tabernakulo. (“Ang Espiritu sa Ginoo dili mopuyo sa dili balaan nga mga templo.” Helaman 4:24.) Ug dili kamo makabaton og pagpamatuod kon wala ang Espiritu sa Dios. …

… Ang pangutana moabut––Unsaon man nako pagkahibalo? Mitubag si Jesus niini, sa dihang iyang gipakita ang paagi sa matag bahin sa kinabuhi. Usa ka adlaw niana, sa dihang nagpamatuod siya sa iyang pagkabalaan, nga ang iyang mga pagtulun-an gikan sa Dios, ang mga Pariseo ug ang uban nga naglibot kaniya miingon, “Naunsa bang may hingkat-onan man kining tawhana nga wala man unta siya makaiskuyla?” Unsaon namo sa pagkahibalo [mao kadto ang ilang pangutana), nga ikaw balaan? Ug mihatag siya og yanong tubag: “Kon tuyoon ni bisan kinsa ang pagbuhat sa kabubut-on sa Dios, nan, iyang mahibaloan kon ang akong gitudlo gikan ba sa Dios o nagsulti ba lamang ako sa kinaugalingong kon pagbulut-an.” (Juan 7:15, 17.) Anaa ang sakto nga tubag––klaro nga pamahayag. … “Kon tuyoon ni bisan kinsa ang pagbuhat sa kabubut-on, nan, iyang mahibaloan.” Ug, ang “pagpakaila sa Dios, ug kang Jesukristo nga imong gipadala mao ang kinabuhing dayon.” [Tan-awa sa Juan 17:3.]¹⁰

Gihatag ngadto sa uban, miingon ang Ginoo diha sa Doktrina ug mga Pakigsaad, nga masayud pinaagi sa Espiritu Santo nga si Jesus mao ang Anak sa Dios ug nga Siya gilansang alang sa mga sala sa kalibutan [tan-awa sa D&P 46:13]. Mao kini ang akong giingon kinsa nagbarug nga lig-on diha sa bato sa pagpadayag sa pagpamatuod nga ilang gipamatuod ngadto sa kalibutan. Pero ang Ginoo dugang nga miingon nga adunay uban nga gihatagan sa pagtuo pinaagi sa mga pulong sa pagpamatuod sa uban, aron sila makadawat usab sa kaluwasan kon sila magpadayon nga matinud-anon [tan-awa sa D&P 46:14]. Niining tanan, hinoon, adunay moabut nga pagpamatuod sa inadlaw nga kasinatian.

Ang mga Santos sa Ulahing mga Adlaw sa tibuok kalibutan nakahibalo nga nakumpirmar ang ilang pagpamatuod sa higayon nga ilang himoon ang katungdanan. Nasayud sila nga ang ebanghelyo nagtudlo nila nga mahimong mas maayong mga tawo; nga ang pagsunod sa mga baruganan sa ebanghelyo makapahimo nila nga mas lig-on nga mga lalaki, ug mas matinud-anon nga mga babaye. Kada adlaw ang mao nga kahibalo moabut nganha kanila, ug dili sila makalimud niini; nasayud sila nga ang pagsunod sa ebanghelyo ni Jesukristo makapahimo nila nga mas maayong mga bana, matinud-anon ug madungganong mga asawa, masulundong mga anak. Nasayud sila nga ang pagsunod sa mga baruganan sa ebanghelyo makapahimo nila sa tanang paagi nga sulundon nga tigtukod sa panimalay; ang pagkasulundon anaa, nakita nila kini sa ilang mga hunahuna, dili sila makalimud niini, nasayud sila niini, ug nasayud sila nga ang kalapasan niining mga baruganan adunay lahing epekto sa ilang tagsa-tagsa ka mga kinabuhi ug sa ilang mga kinabuhi sa panimalay. Nasayud sila nga ang pagkamasulundon sa ebanghelyo mopalambo sa tinuod nga panag-inigsoonay ug pagpakigdait sa mga tawo; nasayud sila nga sila mas maayong mga lumulupyo tungod sa hiyas sa pagsunod sa mga balaod ug sa mga ordinansa. Mao nga, samtang ilang himoon ang ilang inadlaw nga mga buhat, ug gamiton ang ilang relihiyon sa ilang pagpanarbaho, ang kamatuoran sa Ebanghelyo makita diha sa ilang mga kinabuhi.¹¹

Kamo, sa walay duhaduha, nakasugat og mga tawo … kinsa natingala kon sa unsang paagi nga kini nga Simbahan nagpakita sa maong kalagsik ug pagtubo. Ang sekreto mao kini, nga ang matag tinuod nga Santos sa Ulahing mga Adlaw tagsa-tagsa adunay kasiguroan nga kini mao ang buhat sa Dios, ang samang gahum nga nakahatag ni Pedro ug Juan og kalig-on sa pagbarug sa atubangan sa ilang mga tigsumbong ug maisugon ug walay lipud-lipod nga mipahayag sa Sanhedrin nga si “Jesus nga inyong gilansang sa krus mao ang gahum nga naayo kining tawhana, ” nga ang Iyang ngalan mao lamang ang ngalan nga gikahatag ngadto sa mga tawo nga sila maluwas [tan-awa sa Mga Buhat 4:10, 12].

Ang sekreto nag-agad sa pagpamatuod nga anaa sa tagsa-tagsa kinsa matinud-anon sa pagkamiyembro sa Simbahan ni Kristo, nga ang ebanghelyo naglangkob sa sakto nga mga baruganan. … Kini nga pagpamatuod gipadayag ngadto sa matag sinsero nga lalaki ug babaye kinsa nagsubay sa mga baruganan sa ebanghelyo ni Jesukristo, misunod sa mga ordinansa ug may katungod ug nakadawat sa Espiritu sa Dios, sa Espiritu Santo, sa paggiya kanila. Ang matag indibidwal nagbarug nga independente sa iyang kahimtang niana nga pagpamatuod, sama [sa] liboan ka mga bombilya nga maoy [nakapahimo] sa Dakbayan sa Salt Lake … nga hayag kaayo sa gabii, ang matag usa nagbarug ug nagahayag sa iyang kaugalingong dapit, pero ang kahayag niini nagagikan sa samang koryente, sa samang enerhiya, diin nagagikan usab ang enerhiya sa uban pang mga suga.¹²

Kon makadawat kita og pagsaksi gikan sa tawo, ang pagsaksi sa Dios mas labaw pa, kay kini ang pagsaksi sa Dios nga iyang gipamatuod sa iyang Anak: “Ang nagasalig sa Anak sa Dios nagabaton sa pagpamatuod diha sa iyang kaugalingon.” [1 Juan 5:10.] Pagsaksi kana sa Espiritu. Ang Dios mopadayag karon ngadto sa tawo sa ka tinuod sa pagkabanhaw sa Ginoo, sa ka balaan niining importante nga buhat, sa kamatuoran, sa balaan ug mahangturong kamatuoran, nga ang Dios buhi, dili isip usa ka gahum, usa ka butang nga maoy tinubdan sa tanan, usa ka puwersa, sama sa elektrisidad, pero isip atong Amahan sa langit. … Ipadayag sa Dios ngadto sa kalag ang iyang pagkaanaa. Iyang gipadayag ang pagkadios ni Ginoong Jesukristo, kinsa mianhi sa yuta aron sa paghatag ngadto sa mga tawo sa importanting kamatuoran sa pagkaanaa sa Dios ug sa iyang Anak.¹³

Uban sa kamatuoran nga atong giya, atong kauban, atong kaabin, atong inspirasyon, mahimong mobati kita sa atong kalambigitan sa Walay Kinutuban, ug ang tanang gagmay nga mga pagsulay, mga kasubo, ug mga pag-antus niini nga kinabuhi mahanaw sama sa temporaryo, dili makadaot nga mga panan-awon makita diha sa damgo. Mao kana ang atong maangkon nga kahigayunan pinaagi sa panalangin ug giya sa Dios kon atong gamiton sa inadlaw nga kalihokan ang espirituhanong mga panalangin ug mga kahigayunan sa ebanghelyo ni Jesukristo.¹⁴

Ang pagpamatuod sa ebanghelyo usa ka suporta ngadto sa kalag.

Ang pagpamatuod sa ebanghelyo usa ka suporta ngadto sa kalag taliwala sa kalibog ug panagsumpaki. … Ang kahibalo bahin sa Dios ug sa Iyang mga balaod, nagpasabut nga kalig-on, nagpasabut nga katagbawan, nagpasabut nga kalinaw, ug uban niana ang usa ka kasingkasing nga puno sa gugma nga motanyag sa atong isig ka tawo sa samang mga panalangin, sa samang mga pribelihiyo.¹⁵

Dili kita sa tinud-anay makatuo nga kita mga anak sa Dios, ug nga anaay Dios, kon dili kita motuo sa dili kapugngan nga katapusang kadaugan sa kamatuoran sa ebanghelyo ni Jesukristo. Kon kita motuo nga, dili kaayo mabalaka mahitungod sa kalaglagan sa kalibutan ug sa karon nga sibilisasyon, tungod kay ang Dios mitukod sa iyang Simbahan nga dili na gayud mapukan pa ni ihatag ngadto sa laing mga katawhan. Ug samtang ang Dios buhi, ug ang iyang mga katawhan matinud-anon ngadto kaniya ug sa usag usa, dili kita kinahanglang mabalaka mahitungod sa katapusang kadaugan sa kamatuoran.

… Kon kamo aduna niana nga pagpamatuod [sa kamatuoran], makasugakod kamo sa mangitngit nga walog sa pagbutangbutang, pagpanglimbong, ug pang-abuso, nga dili mahadlok sama nga kamo nagsul-ob og katingalahang taming nga walay bala nga makasulod, walay pana nga makatusok. Mapataas ninyo ang inyong ulo, mohangad niini nga walay kukahadlok ug mahagiton, makatan-aw sa mga mata sa matag tawo nga kalma ug dili mosibog. … Makahibalo kamo nga ang tanan mahimo rang sakto sa katapusan; nga kini moabut gayud; nga ang tanan mopalayo ra gikan sa puting kahayag sa kamatuoran, sama sa kangitngit nga molayas inig abut sa kahayag sa adlaw.¹⁶

Mga Sugyot alang sa Pagtuon ug Panaghisgutan

Unsay gipasabut nga magbaton og pagpamatuod bahin ni Jesukristo ug sa Iyang ebanghelyo? Ngano nga ang usa ka pagpamatuod mao ang labing bililhong katigayunan nga atong maangkon? (Tan-awa sa mga pahina 199–200.) Ngano nga mahinungdanon nga ang matag usa kanato adunay tagsa-tagsa ka pagpamatuod?
Unsa gayuy angay natong buhaton aron makadawat og pagsaksi sa kamatuoran? (Tan-awa sa mga pahina 200–04.) Ngano nga ang pagkamasulundon usa ka bahin sa lig-ong pagpamatuod? Unsay bahin sa Espiritu Santo sa atong pag-angkon og pagpamatuod?
Ngano nga importante ang pagpadayon sa paglig-on sa atong mga pagpamatuod sa atong tibuok kinabuhi? Unsang mga paagi ang inyong nakita aron maamuma ang inyong pagpamatuod?
Unsay atong mahimo aron sa pagtabang sa atong mga anak nga makadawat og pagpamatuod ni Jesukristo ug sa Iyang ebanghelyo?
Si Presidente McKay nagtudlo nga ang usa ka “pagpamatuod sa ebanghelyo maoy suporta sa atong kalag” (pahina 204.) Nganong nagkinahanglan kita og pagpamatuod aron kasuportahan ang atong mga kalag? (Tan-awa sa pahina 204.) Sa unsa nga paagi nga ang inyong pagpamatuod nakapanalipod ug nakapalig-on kaninyo agi sa mga pagsulay sa kinabuhi?
Ngano nga importante nga atong ipakigbahin ang atong mga pagpamatuod ngadto sa uban? Unsa nga mga panalangin ang inyong nasinati isip resulta sa paghatag og pagpamatuod?

May Kalabutan nga mga Kasulatan:Mateo 16:13–17; Lucas 22:32; Juan 7:17; 14:26; Ether 12:4; Moroni 10:3–5; D&P 1:39; 93:24–28

sister bearing testimony — “Ang labing bililhong butang sa kalibutan mao ang pagpamatuod sa kamatuoran.”