Kapitulo 12

Priesthood, ang Responsibilidad sa Pagrepresentar sa Dios

Ang priesthood usa ka walay katapusang baruganan nga diha na sa sinugdanan uban sa Dios ug magpadayon hangtud sa kahangturan. Ang mga yawe nga gihatag aron pagagamiton pinaagi sa priesthood nagagikan sa langit, ug kini nga gahum sa priesthood naglihok diha sa Simbahan karon samtang kini magpadayon sa pagdako dinhi sa yuta.¹

Pasiuna

Samtang namulong sa usa ka sesyon sa priesthood sa kinatibukang komperensya, si Presidente McKay miistorya sa usa ka kasinatian nga iyang nasinati samtang nag-alagad isip usa ka misyonaryo didto sa Scotland niadtong 1898. Siya ug ang iyang kauban, nga si Elder Peter Johnston, naglakaw sa may usa ka bilding nga nakapadani sa ilang pagtagad tungod kay kini adunay bato nga arko ibabaw sa atubangang pultahan ug adunay kinulit nga sulat diha sa arko. Si Presidente McKay nahinumdom:

“Akong giingnan ang akong kauban: ‘Dili kana kasagaran! Akong tan-awon unsa ang gisulat niini.’ Sa dihang duol na kaayo ko, kini nga mensahe midulot kanako, dili lamang sa bato, pero ingon og kini nagagikan sa Usa kansang pagserbisyo among gihimo:

“ ‘Bisan Kinsa Ka, Buhatag Maayo ang Imong Bahin’ …

“Ang Dios motabang kanato sa pagsunod niana nga motto. Usa lang kini ka laing ekspresyon sa mga pulong ni Kristo: ‘Siya nga mohimo sa kabubut-on sa Dios makahibalo sa doktrina, kon ang buhat iya ba sa Dios, o nagsulti ba lamang ako sa kinaugalingong kong pagbulut-an, ’ [tan-awa sa Juan 7:17] ug kana nga pagpamatuod nagtultol kanatong tanan ngadto sa giya sa Balaang Espiritu sa kinabuhi. Mapainubsanon akong nag-ampo nga ang Priesthood nga nagpundok karong gabhiona … modala nganha sa ilang mga kaugalingon sa mga responsibilidad nga gihatag sa Dios nganha kanila, ug mobuhat sa ilang katungdanan bisan asa man kini.”²

Si Presidente McKay napanalanginan sa iyang kinabuhi dihang daghang mga naghupot sa priesthood sa matarung nga paagi migamit sa gahum sa priesthood alang sa iyang kaayohan. Niadtong Marso 1916, ang Suba sa Ogden miawas ug maoy nakaingon nga mauyog-uyog ang taytayan nga naa duol sa ba-ba sa pangpang. Siya miasoy: “Kami [siya ug sa iyang igsoon nga si Thomas E.] misakay sa usa ka gamay nga sakyanan nga Ford ug mipahaguros agi sa ulan ug kalapukan. … Akong nakita ang pinundok nga mga bato didto sa taytayan, ug ingon og wala maunsa sama sa miaging adlaw. Mao nga [nagkinomedya] ako miingon, ‘Motabok ko sa taytayan. Makalangoy ka ba?’ Niana akong gitumban ang gasolinador ug mipadagan tabok sa taytayan, nga nakadungog ni Thomas E. nga miingon, ‘O, pagbantay! Anaay pisi!’ Ang tigbantay nga mibiya sa alas siete miisa sa pisi tabok sa dalan, ug ang mopuli niya wala pa moabut. Dali nakong gitumban ang brake pero ulahi na kaayo ang tanan. Ang pisi mibuak sa bintana, mibanda sa ibabaw, ug naigo ako sa suwang, nga migisi sa akong mga ngabil, milubo sa akong mga ngipon sa ubos, ug mibuak sa akong ibabaw nga apapangig. Si Thomas midungo sa iyang ulo ug wala maunsa, pero ako hapit kawad-i sa panimuot. …

“Mga alas nuybe nianang buntag ako didto sa lamesa nga operahanan. … Ilang gitahi ang akong ibabaw nga apapangig ug nakaangkon og katorse ka tinahian sa akong ubos nga ngabil ug sa nagisi nga aping. Usa sa mga tig-alagad misulti, ‘Looy kaayo; bati na ang iyang nawong sa tibuok kinabuhi.’ Tinuod gayud nga ako dili na mailhan. Sa dihang gibalik ako ngadto sa kwarto sa ospital, usa sa mga nars malipayong misulti, ‘Nan, Brother McKay, magpabungot na lang ka, ’ nagpasabut nga aron akong matago ang akong mga uwat. … Tulo ka suod kaayo ka mga higala … gitawag ug nangalagad ngari kanako. Sa pagsilyo sa pagdihog, [usa kanila] miingon, ‘Mopanalangin kami kanimo nga dili maunsa ang imong nawong ug nga ikaw dili mobati og ka sakit’ …

“Sabado sa gabii si Dr. William H. Petty gitawag aron tan-awon kon ang ngipon nga nagpabilin sa ibabaw nga apapangig masalbar pa ba. Siya mao ang miingon, ‘Paminaw nako nag-antus gyud ka sa hilabihan ka sakit.’ Miingon ko, ‘Wala, wala ako batiag sakit.’ … Dominggo sa buntag si Presidente Heber J. Grant miabut gikan sa Dakbayan sa Salt Lake. … Misulod siya ug miingon, ‘David, ayaw pagtabi; hatagan ko lang ikaw og panalangin’ …

“Pagkasunod Oktubre, … naglingkod ako sa duol duol sa gilingkoran ni Presidente Grant. Nakamatikod ako nga siya mitutok kanako pag-ayo, ug dayon miingon, ‘David, gikan dinhi sa akong gilingkuran wala akoy nakitang uwat sa imong nawong!’ Mitubag ko, ‘Wala, Presidente Grant, walay mga uwat.’”³

Mga Pagtulun-an ni David O. McKay

Ang priesthood mao ang gahum ug awtoridad sa pagrepresentar sa Dios.

Matag higayon nga ang priesthood gihatag ngadto sa tawo, gitugyan kini diha kaniya dili isip personal nga ilhanan, bisan og mao kana kon siya mopasidungog niini, pero isip awtoridad sa pagrepresentar sa Dios ug usa ka obligasyon sa pagtabang sa Ginoo sa pagpahinabo sa pagka-imortal ug kinabuhing dayon sa tawo [tan-awa sa Moises 1:39].⁴

Kamo mga lalaki kinsa naghupot sa priesthood sa Dios, kinsa naghupot sa balaang awtoridad sa pagrepresentar sa Dios sa bisan unsang katungdanan nga gitugyan kaninyo. Kon ang usa ka tawo, usa ka ordinaryong tawo nga gi-set apart sa iyang komunidad isip usa ka pulis, adunay butang nga nadugang ngadto kaniya. Kon ang usa ka pulis sa kadalanan, sa krosing, mopataas sa iyang kamot, hunong kamo. Adunay butang bahin kaniya nga mas labaw pa kay sa usa lamang ka indibidwal, adunay gahum nga gihatag kaniya. Ug mao usab kana sa tibuok kinabuhi. Walay tawo nga hatagan og usa ka katungdanan nga dili ituboy. Tinuod kini. Mao, usab, ang gahum sa priesthood.⁵

Ang priesthood kabahin sa Dios nga Kapangulohan. Mao kini ang awtoridad ug gahum nga ang tinubdan niini anaa lamang sa Mahangturong Amahan ug sa iyang Anak nga si Jesukristo. …

Sa pagpangita sa tinubdan sa priesthood, … atong masabtan nga walay kondisyon nga lapas sa Dios mismo. Nagsentro kini Kaniya. Kinahanglan nga gikan Kaniya mogawas. Ang priesthood, nga kabahin sa Amahan, mao nga siya lamang ang makahatag niini ngadto sa lain. Busa, ang priesthood, nga gihuptan sa tawo, kinahanglan gayud nga matugyan pinaagi sa awtoridad. Wala gayuy usa ka tawo dinhi sa kalibutan kinsa adunay katungod sa [pagpahiluna] sa iyang kaugalingon sa gahum ug awtoridad sa priesthood. Adunay pipila kinsa [mipahiluna] sa ilang mga kaugalingon diha niana nga katungod, pero ang Ginoo wala gayud moila niini. Sama nga ang usa ka ambasador gikan sa bisan unsang panggobyerno mogamit lamang niana nga awtoridad nga gihatag kaniya sa iyang gobyerno, mao usab ang usa ka tawo kinsa gitugutan sa pagrepresentar sa Dios mohimo lamang pinaagi sa hiyas sa mga gahum ug mga katungod nga gihatag ngadto kaniya. Bisan pa niana, kon ang mao nga awtoridad gihatag, apil na niini, apan may mga limitasyon, ang tanang mga pribelihiyo sa legal nga gahum, diin ang usa gihatagan og katungod sa laing tawo sa paglihok alang sa laing tawo. Ang tanang opisyal nga aksyon nga gipahigayon sumala sa maong legal nga gahum sama ra ka balido kon ang tawo mismo maoy naghimo niini. …

Nag-ila sa kamatuoran nga ang Tiglalang mao ang mahangturon ug walay katapusang tinubdan niini nga gahum, nga siya lamang ang makagiya niini, ug nga ang pag-angkon niini mao ang pagbaton sa katungod, isip usa ka tinugutan nga representante, direktang nakigsuod sa Dios, makatarunganon kaayo pero halangdon ang mga pribilihiyo ug mga panalangin nga nahimong posible pinaagi sa pagkab-ot sa pag-angkon sa gahum ug awtoridad sa Melchizedek Priesthood––mao kini ang labing mahimayaon nga mapalandong sa tawhanong hunahuna.

Ang usa ka tawo kinsa nakigsuod uban sa iyang Dios makakaplag nga ang iyang kinabuhi maanindot, ang iyang pag-ila malantip sa paghukom dayon tali sa matarung ug sayop, ang iyang mga pagbati malumo ug maloloy-on, pero ang iyang espiritu lig-on ug maisugon sa pagpanalipod sa matarung; iyang makaplagan ang priesthood nga usa ka walay hunong nga tinubdan sa kalipay—usa ka atabay sa buhing tubig nga nagtubod ngadto sa kinabuhing dayon.⁶

Ang gahum sa priesthood mahimong magamit pinaagi sa mga korum ingon man usab sa tagsa-tagsa.

Sa estrikto nga pagkasulti, ang priesthood ingon nga tinugyan nga gahum maangkon lamang tagsa-tagsa nga paningkamot. Bisan pa niana, pinaagi sa balaan nga lagda ang mga lalaki kinsa gitudlo sa pag-alagad sa usa ka katungdanan diha sa priesthood maghiusa diha sa mga korum. Ang inyong gahum sa priesthood mahimong magamit pinaagi sa mga korum ingon man usab sa tagsa-tagsa. Ang korum mao ang kahigayunan sa mga lalaki nga susama og mga pangandoy nga mahibalo, nga mahigugma, ug magtinabangay sa usag usa.⁷

Kon ang priesthood nangahulugan lamang sa personal nga dungog, o panalangin, tagsa-tagsa nga kauswagan, wala na kinahanglana pa ang mga grupo o mga korum. Ang pagkaanaa sa maong mga grupo nga gitukod sa balaang awtoridad nagpahayag sa atong pagsalig sa usag usa, ang mahinungdanon kaayo nga panginahanglan sa mutual nga tabang ug abag. Kita, pinaagi sa balaan nga katungod, mga sosyal nga mga binuhat.⁸

[Ang Ginoo] nakaamgo nga kining [mga naghupot sa priesthood] nagkinahanglan og panag-uban, panagdait, sa kalig-on sa grupo; ug mao nga iyang giorganisar ang mga korum ug nagtudlo sa gidaghanon sa matag usa gikan sa deacon ngadto sa seventy.

Kining mga grupoha magpundok, una, sa pagtudlo ug sa paghatag og kaayohan, sa pagpauswag sa kahibalo sa kinatibuk-an, ug ilabi na sa pagtudlo sa moral ug relihiyoso nga kahibalo, diha sa hugot nga pagtuo, sa kabalaan, pero sa pag-angkon usab og mutual nga kalig-on, sa paglihok sa matarung nga paagi. Kining mga grupoha nagsuplay sa panginahanglan nga gibati sa kinatibuk-an sa katawhan. … Angmga korum sa priesthood … makahatag sa gitinguha nga pakigdait, panag-inigsoonay, ug pagserbisyo kon ang mga lalaki mohimo lamang sa ilang katungdanan.⁹

Mga miyembro sa Aaronic Priesthood, ug ang mga miyembro sa mga korum sa Melchizedek priesthood, aduna kitay katungdanan sa pagtukod sa atong mga korum, dili nato kini gub-on pinaagi sa pagdili pagtunga sa miting sa [priesthood], o sa dili pagpangandam, o pinaagi sa pagbaliwala sa katungdanan. Atong bation, matag usa nato, … nga ato ang katungdanan sa paghimo og pipila ka butang makatukod sa Simbahan, ingon nga ang katungdanan sa Simbahan mao ang pagtukod sa kamatuoran ug sa pagtubos sa katawhan gikan sa sala. Mga lalaki sa priesthood, maghiusa kita niini nga pagtukod, magbuhat kita og maayo; ug walay tawo, gikan sa high priest ngadto sa deacon, niining nabantog nga kalihokan sa priesthood …, malakip ngadto sa pundok sa tigbuhat og dautan o tigbagulbol.¹⁰

Ang usa nga naghupot sa priesthood kinahanglang magmabinantayon sa iyang mga aksyon ug mga pulong sa tanang higayon.

Ang priesthood mao ang awtoridad sa pagrepresentar sa Dios. Ang usa ka tawo kinsa gihatagan sa priesthood mao ang tinugutang representante sa Ginoo sa bisan unsang bahina diin gitudlo ang indibidwal. Katungdanan sa usa ka representante sa bisan unsang indibidwal nga grupo o organisasyon nga maninguha sa pagrepresentar nianang indibidwal nga grupo o organisasyon nga madungganon. Ang labing maayong paagi aron mahimong takus nga mga representante mao ang pagpuyo nga matarung aron nga ang matag usa daling mobati sa mga pag-aghat sa Ginoo nga iyang girepresentaran. Karon hunahunaa unsa ang gipasabut sa usa ka mahiyason nga kinabuhi.

“… ang akong Espiritu dili kanunay magpabilin uban sa tawo, ” (D&P 1:33) miingon ang Ginoo. Mao nga, ang tanan, kinsa naghupot sa priesthood kinahanglang magpuyo og usa ka kinabuhi nga makahatag niyag katungod sa inspirasyon sa Ginoo. Ug pasultiha ko bahin niini nga ang pagpakighinabi sa Balaang Espiritu sama ka tinuod sa inyong koneksyon sa radyo nga puno sa dili madungog nga mga tingog ug musika nga anaa ra sa kahanginan. Ang kakulba anaa kanunay.

Mao usab kini sa Espiritu sa Dios. Andam siya sa paggiya kanunay ug sa pagtudlo niadtong kinsa angayan pinaagi sa matarung nga pagpuyo ug kinsa sinserong nagtinguha kaniya. Usbon nako, katungdanan sa matag tawo nga gitugutan sa pagrepresentar kaniya nga magpuyo sa paagi nga daling mobati niana nga Espiritu.¹¹

Ang paghupot sa priesthood sa Dios pinaagi sa balaang awtoridad mao ang usa sa labing dagkong mga gasa nga moabut ngadto sa usa ka tawo, ug ang katakus mao ang pinakaimportante. Ang diwa sa priesthood mao ang mahangturon. Mapanalanginan pag-ayo ang tawo kinsa mobati sa responsibilidad sa pagrepresentar sa Dios. Kinahanglan nga mobati siya niini hangtud nga siya masayud sa iyang mga aksyon ug mga pulong ubos sa tanang mga kahimtang. Walay tawo kinsa naghupot sa Balaang Priesthood nga walay pagtahud sa iyang asawa. Walay tawo kinsa naghupot niana nga priesthood nga mapakyas sa pagpangayo og panalangin sa iyang pagkaon o sa pagluhod uban sa iyang asawa ug mga anak ug mangayo og giya sa Dios. Ang usa ka panimalay mausab tungod kay ang usa ka lalaki naghupot ug mipasidungog sa priesthood. Kinahanglan nga dili kita modiktar, kay ang Ginoo miingon nga “kon kita mosulay sa pagtabon sa atong mga sala, o sa pagtagbaw sa atong garbo, sa atong walay kapuslanan nga pangandoy, o sa paggamit sa gahum o kamandoan o pagpugos sa mga pagbati sa mga katawhan, bisan unsa nga matang, tan-awa, ang langit sa ilang mga kaugalingon mobiya; ang Espiritu sa Ginoo maguol; ug kon kini mobiya, Amen sa pagkapari o sa pagtugot niana nga tawo.” (D&P 121:37.)

Kana nga pagpadayag, nga gihatag sa Ginoo ngadto ni Propeta Joseph Smith, mao ang usa sa labing matahum nga leksyon sa pagtudlo o psychology ug panggobyerno nga sukad gihatag, ug kita kinahanglan mobasa niini pag-usab diha sa ika-121 nga seksyon sa Doktrina ug mga Pakigsaad.¹²

Walay miyembro niini nga Simbahan, walay bana o amahan, ang adunay katungod sa pagsulti og dili maayo nga mga pulong diha sa iyang panimalay, o bisan mosulti og masuk-anong pulong ngadto sa iyang asawa o sa iyang mga anak. Tungod sa inyong ordinasyon ug sa inyong responsibilidad, dili kamo makahimo niini isip usa ka lalaki nga naghupot sa priesthood ug magmatinuoron ngadto sa espiritu nga anaa kaninyo. Nagtampo kamo ngadto sa usa ka sulundon nga panimalay pinaagi sa inyong kinaiya, sa pagkontrolar sa inyong kahinam, sa inyong pagkasaputon, magbantay sa inyong sinultihan, tungod kay kanang mga butanga maoy makaingon kon unsa nga matang ang inyong panimalay, ug unsay ikapakita niini ngadto sa kasilinganan. Himoa ang unsay inyong mahimo aron makaangkon og kalinaw ug panag-uyon, bisan unsa pay inyong antuson.¹³

Ako nag-ampo aron kita mobati … sa bili sa priesthood, ug nga ang matag deacon niini nga Simbahan makaamgo nga sa dihang siya hatagan sa Aaronic Priesthood siya gilain gikan sa iyang mga kauban, nga siya lahi na sa uban. Dili siya makapanumpa nga walay sangputanan sama sa ubang mga batan-on nga manumpa, dili siya makaapil sa pagkapilyo sama sa giapilan sa ubang mga batanon sa kasilinganan, magbarug siya nga lahi. Mao kanay kahulugan niini ngadto sa usa ka batan-on nga nag-edad og dose anyos, ug, mga bishop, mao gayud kana ang inyong ipasabut kon mopili kamo kanila nga mahimong mga deacon. Ayaw lamang sila tawaga ug ordinahi, pero pakigsulti kanila ug pasabta sila unsay buot ipasabut nga hatagan og Aaronic Priesthood. Sa bahin sa pagkabata kining mga bataa nga gipili ug gitudlo kinahanglan nga magpakita og impluwensya alang sa kaayohan. …

… Ato ang obligasyon kon kita modawat sa priesthood sa pagpakita og ehemplo nga angay nga sundon sa atong isig ka tawo. Dili unsay atong isulti ang makaimpluwensya kanila. Kon dili unsay atong gibuhat. Kon unsa kita.¹⁴

Kon ang mga miyembro sa priesthood makaangkon sa giya ni Kristo pinaagi sa matinuoron ug matarung nga pagpakigsabotsabot sa ilang isig ka tawo, pinaagi sa pagpakigbatok sa dautan sa bisan unsang matang, pinaagi sa matinud-anong pagbuhat sa katungdanan, walay mabatukong gahum niini nga kalibutan nga makapugong sa pag-uswag sa Simbahan ni Jesukristo.¹⁵

Ang gahum sa priesthood mahimong mabungahon kon kini gamiton sa pag-alagad sa uban.

Hunahunaon nato ang priesthood nga sama sa dako kaayo nga pundohanan sa tubig. Ang ingon nga gahum mahimong kusganon ug mohatag og kaayohan kon kini mokanap na sa mga walog, sa mga daruhan, sa mga hardin ug sa malipayon nga mga panimalay. Mao nga ang priesthood, ingon nga may kalabutan sa katawhan, usa ka prinsipyo sa gahum lamang kon kini aktibo diha sa mga kinabuhi sa katawhan, nga moagni sa ilang mga kasingkasing ug mga tinguha ngadto sa Dios ug moaghat sa pag-alagad sa ilang isigkatawo.¹⁶

Ang atong mga kinabuhi giputos uban sa mga kinabuhi sa uban. Mas magmalipayon kita kon kita motampo ngadto sa mga kinabuhi sa uban. Miingon ko niana tungod kay ang priesthood nga inyong gihuptan nagpasabut nga kamo kinahanglang moalagad sa uban. Nagrepresentar kamo sa Dios sa dapit nga kamo gitudlo. “Bisan kinsa nga magawagtang sa iyang kinabuhi tungod kanako makakaplag siya niini.” (Mat. 16:25.)¹⁷

Kamong mga elder tingali adunay usa ninyo nga masakiton, ug ang iyang tanom kinahanglang anihon. Pagpundok mo ug aniha kini. Usa sa inyong miyembro adunay anak nga lalaki nga nagmisyon, ug ang iyang kwarta gamay na lang. Pangutan-a kon makatabang ba kamo. Ang inyong pagkamanggihunahunaon dili gayud niya kalimtan. Ang mao nga mga buhat sama niini maoy gihunahuna sa Manluluwas sa dihang siya miingon, “Nga maingon nga gibuhat ninyo kini ngadto sa usa sa mga labing gagmay niining akong mga igsoon, gibuhat usab ninyo kini kanako.” (Tan-awa sa Mat. 25:40.) Walay laing paagi nga kamo makaalagad ni Kristo. Makaluhod kamo ug makaampo ngadto kaniya, maayo kana. Makapangamuyo kamo kaniya aron ihatag niya kaninyo ang iyang giya pinaagi sa Balaang Santo––oo, gibuhat nato kana ug kinahanglan mohimo niana. Kinahanglang buhaton nato kana. Pero praktikal ba kini, inadlaw nga pagbantay sa kinabuhi, ang pagkontrol sa atong dila, sa dili pagsulti og dautan sa usa ka igsoon, pero magsulti og maayo bahin kaniya, maoy giingon sa Manluluwas nga tinuod nga serbisyo.¹⁸

“Bisan kinsa ka, buhatag maayo ang imong bahin.” Kon usa ikaw ka deacon, tarunga og buhat ang mga katungdanan sa usa ka deacon pag-ayo. Kon usa ba ikaw ka magtutudlo, buhata ang inyong trabaho. Ang usa ka priest nga nagbantay sa Simbahan, moduaw kanila––mga batan-ong lalaki niini nga Simbahan, kon ato lang untang mabuhat ang mga katungdanan sa teacher ug sa priest, nga magtudlo sa mga katawhan sa ilang katungdanan, dako kaayo kini nga gahum alang sa kaayohan sa mga batan-ong lalaki nga nag-edad og diseotso anyos, ug disenuybe. Modawat og koreksyon, dili mabudhion, pero mga lider. Mga kaigsoonan walay laing butang sa kalibutan nga gamhanan kaayo sa paggiya sa kabatan-onan sama sa tarung nga paghimo sa ilang bahin diha sa priesthood.¹⁹

Ang mga naghupot sa priesthood adunay responsibilidad sa pagrepresentar sa Dios isip mga home teacher.

Gisulti diha sa Mga Taga-Efeso, ikaupat nga kapitulo, nga si Kristo mihatag sa uban nga mahimong mga apostoles ug ang ubang mga propeta, ang uban mga ebanghelista, ang uban mga pastor ug mga magtutudlo; “alang sa pagkasangkap sa mga balaan, alang sa buhat sa pag-alagad, alang sa paglig-on sa lawas ni Kristo.” [Mga Taga-Efeso 4:12.] Ang mga [home] teacher, diha sa Simbahan, nga naghupot sa balaang priesthood, nakapalambo diha kanila sa dakong responsibilidad sa pagsangkap sa mga Balaan, ug paglig-on sa lawas ni Kristo; busa, nagtuo ako nga dili sobra ang pagsulti nga kini ilang katungdanan, ilang katungdanan, ang pagpadala nganha sa matag panimalay sa maong balaang espiritu nga atong nasinati dinhi niining mga sesyon sa komperensya. Walay mas dakong responsibilidad ang anaa ni bisan kinsang tawo, kay sa mahimong usa ka magtutudlo sa mga anak sa Dios.

… Pipila sa [mga home teacher] mibati nga ang ilang katungdanan dili kaayo importante, nga wala kaayoy dignidad nga nalakip niini, nga ang tinuod mao, nga wala nay mas labaw ka importanting trabaho diha sa Simbahan. Dili kita makaingon sa bisan unsang katungdanan sa Simbahan, nga mas importante kay sa uban, tungod kay ang tanan alang ngadto sa kalamboan, sa panudlo, sa kaluwasan sa mga anak sa Dios. Mao usab sa katungdanan sa magtutudlo; pero kon dunay bisan unsang pagpili nga ihatag, tungod sa dakong bintaha sa pagdani niining mga katawhan ngadto sa kaluwasan moadto kini ngadto sa mga tawo nga naghupot sa priesthood sa Dios, kinsa adunay direktang kontak sa indibidwal nga mga miyembro sa Simbahan …

Ang unang butang nga buhaton, akong mga kaigsoonan, mao ang pagtan-aw sa inyong kaugalingon, aron mahibaloan kon kamo andam ba sa pagtudlo o dili. Walay tawo nga makatudlo sa butang nga wala niya mahibaloi mismo sa iyang kaugalingon. Inyo ang katungdanan sa pagtudlo nga si Jesukristo mao ang manunubos sa kalibutan, nga si Joseph Smith usa ka propeta sa Dios, ug nga ngadto kaniya niining katapusang dispensasyon nagpakita sa personal ang Dios Amahan ug ang iyang Anak. Mituo ba kamo niini? Mibati ba kamo niini? Kana ba nga pagpamatuod mosanag gikan sa inyong pagkatawo kon kamo mosulod na sa panimalay? Kon mao, kana nga kasanag makahatag og kinabuhi ngadto sa mga tawo nga inyong tudloan. Kon wala, naay kanihit, usa ka huwaw, kakulang nianang espirituhanong kahimtang diin ang mga Santos motubo. …

… Mga kaigsoonan, ang mensahe, ug ilabi na ang paagi sa pagtudlo sa mensahe tingali dili pareho kon ihatag ngadto sa usa kinsa migahin sa iyang kinabuhi sa matinud-anong paghago diha sa Simbahan, kay sa paghatag niadtong kinsa bag-o lang nakabig. Ingon nga ang matag pamilya lahi sa uban…, mao usab ang atong mga mensahe ug ang atong mga pamaagi, ilabi na ang atong mga pamaagi sa pagtudlo, mahimong mag-usab-usab. Gisulti nako kini aron lang sa pagdani kanato niining hunahuna, nga atong katungdanan nga makaila niadtong atong tudloan.²⁰

Ang katungdanan sa [home] teacher walay mahimo kon moadto lamang siya makausa sa usa ka bulan ngadto sa matag balay. Nahinumdom ko sa panahon dihang ang usa ka Bishop mihatag og nga katungdanan sa [home] teacher sa pag-adto dayon ngadto sa usa ka balay sa nagsubo tungod sa kamatayon sa usa ka minahal ug mosusi unsay mahimo aron mahatagan og kahupayan kadtong kinsa nagbangutan ug sa mohimo og pakigsabut alang sa haya. Katungdanan sa [home] teacher sa pagsiguro nga walay kakulang sa panginahanglan; kon dunay masakiton didto, moadto ug mangalagad––magbantay kanunay nianang mga pamilya.²¹

Nagtuo ako nga sa [home] teaching adunay dagkong mga kahigayunan sa tibuok kalibutan sa pagpahigmata niadtong kinsa walay panumbaling, sa nawad-an og paglaum, sa nahiubos, ug masulub-on, sa nagbag-o sa kinabuhi ug sa may tinguha sa pagapil pag-usab sa kalihokan sa Simbahan ni Jesukristo. Pinaagi sa maong kalihokan sila magiyahan balik ngadto sa espirituhanong kahimtang nga mobayaw sa ilang mga kalag ug mohatag kanila og gahum sa pagbuntog sa mga kahuyang nga karon miposas kanila.

Ang paghatag og tabang, awhag, ug inspirasyon ngadto sa matag indibidwal mao ang dakong responsibilidad ug kahigayunan sa mga [home] teacher.²²

Mga Sugyot alang sa Pagtuon ug Panaghisgutan

Unsa ang gahum sa priesthood? (Tan-awa sa mga pahina 138–39.) Alang sa unsang mga katuyoan nga gitugyan sa Ginoo ngadto sa tawo ang awtoridad sa priesthood? (Tan-awa sa mga pahina 140–41, 144–45.) Unsa ang kalainan tali sa yanong pagdawat sa awtoridad sa priesthood ug sa pagbaton sa gahum sa priesthood?
Paghunahuna og usa ka kasinatian diin ang gahum sa priesthood gigamit alang kaninyo. Sa unsa nga paagi kini nakaapekto kaninyo o sa mga miyembro sa inyong pamilya? Sa unsa nga paagi kita makagamit sa mga kasinatian sama sa “mga higayon sa pagtudlo” alang sa atong mga anak ug mga apo?
Ngano nga gikinahanglan nga ang usa ka tawo nga naghupot sa priesthood magpuyo nga takus aron magiyahan sa Espiritu sa Ginoo? (Tan-awa sa mga pahina 142–43.) Unsa nga mga panalangin ang gisaad ngadto niadtong matinud-anon sa mga pakigsaad ug mga obligasyon sa priesthood? (Tan-awa usab sa D&P 84:33–34.)
Ngano nga ang home teaching importante man kaayo diha sa Simbahan? (Tan-awa sa mga pahina 146–47.) Unsa ang atong mahimo aron mahimong mas epektibo nga mga home teacher? Sa unsa nga paagi nga ang tambag ni Presidente McKay ngadto sa mga home teacher ngadto sa mga visiting teacher? Unsa ang atong mahimo sa pagtabang sa atong mga home ug visiting teacher nga mobati nga giabi-abi diha sa atong mga panimalay ug mahimong epektibo sa ilang mga katungdanan?
Sa unsa nga paagi nga ang pag-ampo, pagtuon sa mga kasulatan, ug pagpakahimong sama ni Kristo makatabang kanato sa pagpasidungog sa priesthood? Sa unsa nga mga paagi nga ang mga amahan ug mga inahan makaandam sa ilang mga anak nga lalaki sa pagdawat sa priesthood?
Sa unsa nga paagi nga ang mga babaye makaambit sa mga panalangin nga nagagikan sa gahum sa priesthood?
Unsa ang katuyoan sa mga korum sa priesthood? (Tan-awa ang mga pahina 140–41.) Unsa nga mga responsibilidad ang may kalabutan isip usa ka miyembro sa usa ka korum? (Tan-awa sa mga pahina 140–41.)

May Kalabutan nga mga Kasulatan: 1 Pedro 2:9; D&P 84:33–48; 121:34–46

motto stone in Scotland — Si Presidente McKay sa kasagaran moawhag sa mga naghupot sa priesthood sa pagsunod sa motto nga iyang nakit-an nga gikulit diha sa usa ka bato didto sa Scotland: “Bisan Kinsa Ka, Buhatag Maayo ang Imong Bahin.”

priesthood quorums — “Ang mga lalaki kinsa gitudlo sa pag-alagad sa usa ka katungdanan diha sa priesthood maghiusa diha sa mga korum.”