Kapitulo 24

“Pasigaa Ninyo ang Inyong Kahayag”

Hinaut nga ang Espiritu sa Ginoo maanaa sa inyong mga kasingkasing, ug sa inyong mga panimalay, aron ang mga tawo nga makaambit sa dinan-ag sa inyong pagkamatinuoron, kaligdong, katarung, ug hugot nga pagtuo sa atong Ginoong Jesukristo makat-on sa paghimaya sa atong Amahan sa langit.¹

Pasiuna

Si Presidente David O. McKay nakadawat sa mosunod nga sulat gikan ni Harold L. Gregory, kinsa nag-alagad isip presidente sa East German Mission sa sayo pa niadtong mga 1950:

“Minahal nga Presidente McKay:

“Mainteresado ikaw nga maminaw sa usa ka kasinatian nga akong nasinati niining semanaha. Duha ka mga lalaki mga kwarenta anyos ang edad, kabus og sininaan, nakigkita kanako karong semanaha. Giingnan nila ako nga nawad-an sila sa ilang pagtuo, ug pero dili sila makabalhin ngadto sa laing mga tinuohan o relihiyoso nga mga organisasyon nga ilang nahibaloan. Si ‘Mr. Braun (nga maoy tawag sa usa) mihangyo sa iyang higala, nga si Mr. Fascher, nga mokuyog ug makigkita kanako. Iyang giingnan si Mr. Fascher nga siya nasayud sa atong simbahan ug nga kita makatabang kanila. Hugot nga nagmagahi si Fascher sulod sa duha ka mga adlaw, pero sa katapusan mikuyog ra.

“Si Mr. Braun misugod sa pagsulti nga nagbarug siya sa eskina sa dalan usa ka adlaw niana sa dihang iyang namatikdan ang gatusan ka mga tawo nga nanglakaw. Gipangutana niya ang usa kon asa siya paingon, ug siya miingon, ‘Aron makakita sa Propeta.’ Mikuyog si Mr. Braun. Pagpahinungod kadto sa balay-tigumanan sa Berlin-Charlottenburg, ug ang Propeta mao si Brother McKay.

“Miingon siya (ug kutloon nako siya kapin kun kulang): ‘Wala ako sukad mobati sa mao nga espiritu sa gugma ug kaayo sama sa akong nasinati niadtong mga tawhana nianang adlawa. Ug dayon ang Propeta, usa ka taas nga tawo nga mga otsentahon, nga puno pa sa buhok—puti ang tanan—mibarug ug namulong sa mga katawhan. Wala ako sukad makakita og tawo nga batan-on pa tan-awon niana nga edad. Sa dihang siya namulong, morag adunay misulod kanako. Pagkahuman samtang nagpaingon siya sa iyang sakyanan, nakita nako nga nakiglamano siya sa mga miyembro, ug bisan ako dili nila kauban milakaw ako paingon didto ug milamano usab sa iyang kamot. Dihay kainit ug maanindot nga misulod sa akong lawas, ug natingala ako sa iyang kabatanon, sanag nga pamayhon. Tungod sa kalibutanong kawad-on ug hilabihang ekonomikanhong mga kalisud ang handumanan ingon og nangitngitan pero nasayud ko nga kinahanglan kong mobalik aron masayud pa gyud og dugang.’

“Si Mr. Fascher misulti kanako nga si Braun walay masulti kon dili katingala ug kahibulong lamang sa tawo nga iyang nakita. Ang duha naglingkod sa akong opisina ug naminaw pag-ayo sa mensahe sa pagpahiuli nga akong gitudlo kanila, ingon ang matag pulong importante kanila. Wala silay kwarta ug miserable, pero mapainubsanon ug wala makaangay sa mga simbahan sa mga tawo. Gipahulam nako sila og Basahon ni Mormon, ug misaad sila nga mosimba sa Dominggo. Nagtuo ako nga kining duha ka mga tawo (mga piniriso sa gubat sa Russia) andam na alang sa ebanghelyo.

“Hinaut nga ang Ginoo mopanalangin kanimo, Brother McKay. Ikaw ug ang atong tanang mga kaigsoonan nga nangulo sa atong simbahan mao ang mahayag nga mga ehemplo sa tanan nga matarung ug maayo.”²

Nakita sa daghang mga tawo si David O. McKay sama sa pagkakita niining duha ka mga tawo—usa ka ehemplo sa tinuod nga tinun-an ni Kristo. Ang istorya gisaysay sa usa ka litratista sa pamantalaan kinsa nakakita ni Presidente McKay sa unang higayon:

“Mga kasabutan gihimo aron dunay molitrato, pero ang regular nga litratista wala moabut, mao nga sa kapungot sa United Press ilang gikuha ang ilang litratista para sa krimen—usa ka tawo nga naanad sa malisud nga matang sa trabaho sa New York. Miadto siya sa airport, nagpabilin didto og duha ka mga oras, ug mibalik gikan [sa] mangitngit nga lawak dala ang dakong binugkos nga mga litrato. Molitrato lang unta siya og duha ka buok. Gikasab-an siya sa iyang boss, ‘Nganong nag-usik-usik ka man sa oras ug sa mga suplay sa litrato?’

“Ang litratista mitubag dayon, miingon nga malipay siyang mobayad sa sobra nga mga materyal, ug gani mahimong kuhaan ang iyang suweldo sa dugang oras sa iyang paglitrato. … Pipila ka mga oras ang milabay ang bise presidente mitawag kaniya ngadto sa iyang opisina, gustong mahibalo unsay nahitabo. Ang litratista para sa krimen miingon, ‘Sa bata pa ako, ang akong inahan mobasa kanako gikan sa Daang Tugon, ug sa akong tibuok kinabuhi naghunahuna ako kon unsa gayud kahay hitsura sa usa ka propeta sa Dios. Hinoon, karon, ako nakakita na.’”³

Mga Pagtulun-an ni David O. McKay

Atong maimpluwensya ang uban pinaagi sa unsay atong isulti, unsay atong buhaton, ug kinsa kita.

Ang matag tawo nga nagpuyo niini nga kalibutan nakahatag og impluwensya, alang sa maayo o alang sa dautan. Dili lang kon unsay iyang gisulti, dili lang kon unsay iyang gibuhat. Kon dili kon unsa siya. Ang matag tawo, mosanag kon unsa siya. Ang matag tawo makadawat og kasanag. Ang Manluluwas nakahibalo niana. Kon siya moduol sa usa ka indibidwal, iyang mamatikdan kana nga kasanag—ma babaye man sa Samaria sa iyang miaging kinabuhi; ma babaye man kinsa gibato o sa mga lalaki nga nagbato kaniya; ma magbabalaod man, nga si Nicodemo, o usa sa mga sanglahon. Makahibalo siya sa kasanag gikan sa indibidwal. Ug sa ingon kamo usab, ug ako usab. Kon kinsa kita ug unsay atong gipasanag ang makaapekto sa mga tawo sa atong palibut.

… Isip mga indibidwal, kinahanglang maghunahuna kita og mas putli nga mga hunahuna. Kinahanglan nga dili kita moawhag og dautan nga mga hunahuna o walay hinungdan nga mga pangandoy. Modan-ag kini kon ato kining buhaton. Kon maghunahuna kita og putli nga mga hunahuna, kon iawhag ug idasig nato ang lunsay nga mga pangandoy, anaa kana nga pagdan-ag kon makighimamat kita sa mga tawo, ilabi na kon kita makig-uban kanila.⁴

Dako og epekto ang atong mga pulong ug mga buhat niini nga kalibutan. Sa matag gutlo sa kinabuhi inyong giusab sa hinayhinay ang mga kinabuhi sa tibuok kalibutan. … Mao nga, dili ang palibut, dili ang mga posisyon; mga butang nga makaimpluwensya sa [uban] niini nga kalibutan, mao ang mga personalidad. Bisan unsa pa kamo ang mga tawo mobati ug makaila niini. Modan-ag kamo, dili ninyo kini matago. Mahimong magpakaaron-ingnon kamo, pero dili kana makaapekto sa mga tawo.⁵

Importante … nga kita magtinguha, sa kinabuhi ug sa mga libro, sa pagpakig-uban sa labing maayo ug labing halangdong mga lalaki ug mga babaye. Si [Thomas] Carlyle, usa ka bantugang magsusulat sa Iningles, miingon nga “Ang bantugang mga tawo nga gikauban sa bisan unsang paagi mapuslanon nga ikauban. Dili kita makatan-aw, bisan unsa pa ka dili hingpit, sa usa ka bantugang tawo, nga walay makat-unan gikan kaniya. Siya mao ang buhi nga ‘tinubdan sa kahayag, ’ nga maayo ug nindot nga mapadul-an.”

Kon tun-an ninyo ang mga kinabuhi niining bantugang “mga tinubdan sa kahayag” sa kalibutan, makakat-on kamo bisan og usa ka butang nga maoy nakapabantog sa ilang mga ngalan. Mao kini: Ang matag usa mihatag og butang sa iyang kinabuhi aron mahimong mas maanindot ang kalibutan. Wala nila igahin ang ilang tanang panahon sa pagpangita sa kalipay ug kasayon lamang, ug sa usa “paglingaw-lingaw” alang sa ilang mga kaugalingon lamang, pero nakita nila ang ilang labing dakong kalipay sa paghimo sa uban nga malipayon ug mas komportable. Ang tanang maayong mga binuhatan molungtad sa kahangturan, bisan kon ang kalibutan dili magpakabana niini.⁶

Walay maayong binuhatan, walay mabination nga pulong ang masulti nga dili mabati ang epekto niini alang sa kaayohan sa tanan. Usahay ang maayo mahimong gamay ra kaayo, pero sama sa usa ka bato nga giitsa sa linaw mosugod sa pagbawod sa tunga nga magpadayon sa pagdako hangtud ang tanang bahin sa baybayon natandog, mao nga ang inyong mga binuhatan, hilom, kadaghanan niini, wala mahibaloi, wala hisguti, wala isibya, nagpadayon sa pagdan-ag ug pagtandog sa daghang mga kasingkasing.⁷

Ang Dios mopanalangin kaninyo, akong isig ka mamumuo, kamong mga General Authorities, mga stake presidency, mga bishopric, matag opisyal ug magtutudlo sa tibuok yuta, matag miyembro. Hinaut nga ang Espiritu sa Ginoo maanaa sa inyong mga kasingkasing, ug sa inyong mga panimalay, aron nga mga tawo makaambit sa dinan-ag sa inyong pagkamatinuoron, kaligdong, katarung, ug hugot nga pagtuo sa atong Ginoong Jesukristo makat-on sa paghimaya sa atong Amahan sa langit.⁸

Ang mga panimalay sa mga Santos sa Ulahing mga Adlaw mahimong mga ehemplo sa panag-uyon ug gugma.

Ang atong mga panimalay modan-ag kon unsa kita, ug kana nga pagdan-ag magagikan sa unsay atong gisulti ug kon unsay atong binuhatan sa panimalay. … Kinahanglan kamong motampo ngadto sa usa ka sulundon nga panimalay pinaagi sa inyong kinaiya, sa pagkontrolar sa inyong kahinam, sa inyong kinaiya, magbantay sa inyong sinultihan, tungod kay kanang mga butanga maoy makaingon kon unsa ang inyong panimalay ug unsay ikapakita niini nganha sa kasilinganan. …

“Usa ka amahan mibisita sa bag-ong panimalay sa iyang anak nga lalaki. Ang anak nga lalaki mapasigarbuhon nga mipakita kaniya sa bag-ong lawak-katulganan, sa bag-ong mga instalasyon sa kusina. Human sa ilang pagpanan-aw, ang amahan miingon, “Oo, nindot, pero wala ako makakita og timailhan sa Dios sa imong panimalay.” Ug ang anak nga lalaki miingon, “Mibalik ko, ug samtang ako nagtan-aw sa mga kwarto, nabantayan nako nga wala akoy nakita nga nagsugyot bahin presensya sa Manunubos o sa Manluluwas.”

Unsay akong gisulti mao nga, kita [adunay] dako nga responsibilidad kay sa kaniadto, isip mga lalaki sa priesthood, isip mga babaye sa Simbahan, sa paghimo sa atong mga panimalay aron modan-ag ngadto sa atong mga silingan ang panag-uyon, gugma, mga katungdanan sa katilingban, pagkamaunungon. Pakit-a ug padungga ang atong mga silingan niini. Wala gayuy angay masulti nga pagpamalikas, panghimaraut, pagpangita og sayop, pagkasuko o kasina o kasilag diha sa panimalay sa Santos sa Ulahing mga Adlaw. Kontrola kini! Ayaw kini isulti!…

Ang Manluluwas mipakita kanato sa ehemplo, kanunay nga kalma, kanunay nga nakakontrol, nagdan-ag og butang nga mabati sa mga tawo kon sila moagi. … Ang Dios motabang kanato sa pagdan-ag og kalig-on, kontrol, gugma nga putli, nga maoy laing ngalan sa gugma, konsiderasyon, maayong tinguha alang sa tanang mga tawo.⁹

Ang Dios mopanalangin kaninyo, minahal kong isig ka trabahante. Panalanginan kamo diha sa inyong mga panimalay. Ipakita ang inyong hugot nga pagtuo pinaagi sa inyong mga binuhatan diha sa inyong panimalay. Mga bana, pagmatinud-anon ngadto sa inyong mga asawa, dili lamang sa buhat, pero sa hunahuna; mga asawa, pagmatinud-anon ngadto sa inyong mga bana. Mga anak, pagmatinud-anon ngadto sa inyong mga ginikanan, ayaw [pagtuo] nga kinaraan ang ilang pagtuo ug nga kamo mas nakahibalo kay kanila. Mga babaye, sunda ang buotan nga inahan ug ang iyang gitudlo. Mga lalaki, pagmatinud-anon ngadto sa inyong mga amahan, kinsa nagtinguha og kalipay ug kalampusan alang kaninyo, nga mahitabo lamang pinaagi sa pagsunod sa mga baruganan sa ebanghelyo. Ang mga dumuduong, nga makakita sa maong mga panimalay, moingon, “Well, kon mao kana ang resulta sa Mormonismo, nagtuo ko nga kini maayo.” Inyong ipakita pinaagi sa inyong hugot nga pagtuo ug mga buhat sa matag adlaw nga kinabuhi unsa gayud kamo.¹⁰

Himoa nga ang sinsero nga mga investigator kinsa mas motuo sa unsay ilang nakita kay sa unsay ilang nadungog, makakita, tungod sa imbestigasyon, nga ang “mga Mormon” namatud-an pinaagi sa ehemplo diha sa panimalay, pinaagi sa debosyon, ug sa ilang pagserbisyo ngadto sa Dios, nga sila mituo ug nakaila nga ang Dios mao ang ilang Amahan.¹¹

Kon kita magpuyo sumala sa atong mga pagtuo, ang atong maayong ehemplo makalig-on sa Simbahan ug mahimong kahayag ngadto sa kalibutan.

Ang Dios motabang kanato sa pagpadayon … mapuno sa Espiritu sa Ginoo, nga ang matag lalaki ug babaye kinsa adunay kahigayunan sa pagtrabaho diha sa Simbahan—ug nagpasabut kana sa tanan—mahimong determinado nga magpuyo og kinabuhi nga mahiyason ug maputli nga makaimpluwensya sa kaligon ug pagdayeg sa kalibutan. Sa laktud, atong ipakita sa tanang mga tawo ang pagkamatinuoron. Kon posible, kutob sa atong mahimo, magpuyo kitang malinawon uban sa tanang mga tawo—dili mobuntog sa dautan pinaagi sa dautan, o mabuntog sa dautan, pero mobuntog sa dautan pinaagi sa maayo. Dayon ang Simbahan mobarug nga kahayag sa kalibutan. Mao kana ang kapalaran niini.¹²

Pasigaa ninyo ang inyong kahayag sa atubangan sa mga tawo aron makita nila ang inyong mga maayong buhat ug daygon nila ang inyong Amahan nga anaa sa langit [tan-awa sa Mateo 5:16; 3 Nephi 12:16]. Wala siguroy laing mas epektibo nga paagi nga masaksihan sa mga tawo ang kamatuoran kay sa palamboon ug amumahon sa matag Santos sa Ulahing mga Adlaw ang pagsalig sa atong dili miyembro nga mga higala ngadto sa matinud-anong miyembro sa Simbahan ni Kristo.

Karon, aron mahimo kana kinahanglang magmatinuoron kita sa tanang mga butang. Kon kita mga kontraktor, ug miuyon sa pagbutang sa mao nga materyal niana nga bilding, atong ibutang kana nga materyal. Kon kita miuyon sa kasabutan sa kontrata, sa pagbutang og usa ka gatus ug singkwenta ka pye nga [mga materyal sa pagpainit] sa bilding, ibutang nato ang usa ka gatus ug singkwenta ka pye. Mao kana ang mga detalye, dili ba, pero kana ang mga detalye diin ang mga tawo nga inyong gikasabut mohukom sa inyong mga aksyon. Kon modala kita ngadto sa merkado og mga patatas sa maong kalidad, ug atong gihulagway kana nga kalidad, atong tan-awon nga mapamatud-an sa mga tawo nga ang gisulti tinuod. Naguol ko sa dihang nakadungog ko nga ang usa ka mamaligyaay og dinaghan miingon nga iyang giablihan ang mga sako sa abut, nga gidala gikan sa uma, ug nakita ang laing mga materyal, sama sa mga bato ug yuta, nga gibutang aron madugangan ang kabug-at. Wala ako mangutana sa relihiyon niadtong mga tawhana; wala ko mangayo og mga pangalan; pero ang mao nga mga butang dili maayo, walay tinuod nga miyembro sa Simbahan ni Kristo ang makahimo sa maong pagpanglimbong. Pasigaa ninyo ang inyong kahayag sa atubangan sa mga tawo. Niini nga kalibutan karon kinahanglan nga adunay usa ka bandila, usa ka katawhan nga magbarug nga dili matarug isip usa ka ehemplo ngadto sa kalibutan sa pagkamatinuoron ug pagkamakiangayon.¹³

Kon kita makatuman lang unta sa mga sumbanan sa ebanghelyo ni Jesukristo, ang umaabot sa Simbahan sigurado. Sa pagkatinuod, ang mga lalaki ug mga babaye makakita og suga nga wala ibutang sa ilawom sa gantangan, kondili sa ibabaw sa bungtod, ug sila madani niini, ug mas magiyahan sa pagpangita sa kamatuoran pinaagi sa atong mga buhat ug mga binuhatan ug pinaagi sa unsay midan-ag kanato diha sa hiyas ug kaligdong, kay sa unsay atong gisulti.¹⁴

Atong ipakita ang usa ka ehemplo sa panag-uyon ug kalinaw ngadto sa kalibutan. Atong ipamatuod nga bisan og kita atua sa Africa, Habagatang Amerika, New Zealand, o Australia, usa kita diha ni Kristo. Kita adunay usa lamang ka tumong: ang pagpahayag ngadto sa kalibutan nga ang ebanghelyo ni Jesukristo gipahiuli sa kahingpitan niini, ug nga ang ebanghelyo ni Jesukristo mao lamang ang plano nga gihatag sa tawo diin ang kalinaw sa mga kalungsuran, ang kalinaw sa mga kanasuran sa katapusan moabut.¹⁵

Hinaut nga moabut diha sa kasingkasing sa matag usa, ug nganha sa tanan natong mga panimalay, ang tinuod nga espiritu ni Kristo, ang atong Manunubos, kansang kamatuoran, kansang makadasig nga giya nasayud ako nga tinuod.

Ang ebanghelyo mao ang atong kasandigan. Nasayud kita unsay gibarugan niini. Kon kita mosunod niini, mobati niini, ug magpamatuod sa kalibutan pinaagi sa atong pagpakabuhi, makatampo kita sa pagtubo ug pag-ugmad niini. Isulti ang maayo bahin niini, sa priesthood, sa mga Authorities; himoa nga ang mga sumbanan sa ebanghelyo modan-ag diha sa atong mga kinabuhi.¹⁶

Mga Sugyot alang sa Pagtuon ug Panaghisgutan

Ngano nga importante man nga mahinumdom nga “dako og epekto ang atong mga pulong ug mga buhat niini nga kalibutan”? (Tan-awa sa mga pahina 274–76.) Sa unsang paagi nga inyong nakit-an nga ang gagmay nga mga buhat sa pagkamatarung adunay malungtarong impluwensya?
Sa unsa nga mga paagi nga ang atong mga hunahuna ug mga aksyon makaimpluwensya sa unsay atong gidan-ag ngadto sa uban?
Unsay atong mahimo sa atong mga kaminyoon ug sa atong mga pamilya sa pagpakita nga kita mga disipulo ni Kristo? (Tan-awa sa mga pahina 276–78.)
Kinsa ang ubang mga tawo kansang mga ehemplo nakaimpluwensya kaninyo? Ngano nga kining mga tawhana nakaimpluwensya kaayo sa inyong kinabuhi?
Sa unsa nga mga paagi nga ang atong ehemplo makahimo og kalainan diha sa atong mga panimalay, sa atong trabahoanan ug sa mga katilingban? (Tan-awa sa mga pahina 278–80.) Unsay inyong mahimo karon sa pagdan-ag sa kahayag ni Kristo diha sa inyong kinabuhi?
Ngano nga ang ehemplo usa ka importanting bahin sa misyonaryo nga buhat? Unsa nga mga kasinatian ang inyong nasinati diin ang maayong ehemplo sa mga Santos sa Ulahing mga Adlaw nakadasig sa uban sa pagpakisusi sa Simbahan?

May Kalabutan nga mga Kasulatan:Mateo 5:14–16; Alma 5:14; 17:11; 3 Nephi 12:14–16; 18:16, 24

President McKay — Si Presidente McKay misunod sa pahimangno sa Manluluwas: “Pasigaa ninyo ang inyong kahayag sa atubangan sa mga tawo aron makita nila ang inyong mga maayong buhat ug dayegon nila ang inyong Amahan nga anaa sa langit” (Mateo 5:16).

woman touching Jesus’ robe — Samtang mosunod kita sa ehemplo sa Manluluwas, “nagdan-ag kita sa kalig-on, pagkontrol, gugma nga putli, … konsiderasyon, maayong tinguha alang sa tanang mga tawo.”