Mataupu 1

O Le Poloaiga Sili—Alofa i le Alii

“Pe a tatou faamuamua le Atua, o le a sologa lelei isi mea uma pe aveesea foi mai o tatou olaga.”

Mai le Soifuaga o Ezra Taft Benson

Sa faaalia i le soifuaga o Peresitene Ezra Taft Benson lona alofa mo le Alii ma lana tautinoga mausali e ola i le talalelei. Sa saunoa se tasi o tagata o le aiga lautele i se tasi taimi e faapea, “Ia Ezra ma lona aiga, o le lotu o se ala atoa lea o le olaga—o se mea e ao ona ola ai i aso e fitu o le vaiaso. E faamuamua lava i lona mafaufau pe a oo i le taimi e faia ai ana faaiuga.”¹

E matauina foi e tagata i fafo atu o le aiga o Benson le alofa o Peresitene Benson i le Alii. I le 1939, a o auauna atu Peresitene Benson o se peresitene o le siteki, sa valaaulia ai o ia e malaga atu i Uosigitone, D.C., e fono ai ma faatonu o le Fono Aoao a Faalapotopotoga a Faifaatoaga (National Council of Farmer Cooperatives). “Ina ua maea ona iloiloina lona agavaa ma fesiligia o ia, na ofo atu ai e le fono faatonu ia te ia le tofiga o le failautusi faapitoa o lena faalapotopotoga. … E ui na faagaeetiaina o ia i lenei avanoa e le i faamoemoeina mo lana tautua, ae sa ia le finagalo e taliaina. E pei ona ia malamalama i ai, o lea galuega o le a aafia ai faatosinaga ma taitai faalemalo e faaaogaina ai pati e taumafa ai ava malosi, ia o le a le tusa ai ma lana tapuaiga.

“‘Lau Susuga Benson,’ sa tali atu ai le Faamasino ia John D. Miller, o le taiulu o le vaega, ‘o le mafuaaga lena na matou filifilia ai oe. Matou te iloa ou tulaga faatonuina.’ Faatasi ai ma le faamautinoaga atoa mai le fono faatonu o le a le faamoemoeina ai o ia e sailia se malamalama i faafitauli tau faatoaga i taimi e taumafa ai ava malosi, sa ia fiafia ai e talia le tofiga, ae sa faalagolago lea i le maea ai ona fefautuaai ma le Au Peresitene Sili ma lona faletua.”²

Sa aoao mai Peresitene Benson e faapea tatou te faaalia lo tatou alolofa i le Alii e ala i lo tatou naunautaiga e faia le finagalo o le Alii. Sa ia saunoa mai: “Ou te moomoo lava ia mafai e tagata uma o le Au Paia o Aso e Gata Ai ona tau atu ma manatu mamafa i ai i lona loto atoa. “Ou te alu i le mea e te finagalo ou te alu i ai. Ou te tau atu mea e te finagalo ou te tau atu.Ou te avea ma tagata e te finagalo ou te avea ai’ [tagai Viiga, nu. 169]. Afai e mafai e i tatou uma ona faia lena mea, o le a faamautinoa mai ia i tatou le fiafia silisili iinei ma le faaeaga i le malo selesitila o le Atua pe a mavae lenei olaga.”³

I se lauga i le konafesi aoao ia Aperila 1988—o le lauga lea o loo faatatau i ai lenei mataupu—na taulai atu ai Peresitene Benson i le poloaiga muamua ma le sili: ia alofa atu i le Atua. E tusa ai ma lenei lauga, sa matauina ai e Elder Francis M. Gibbons o le Fitugafulu e faapea, “O mea uma na galueaiina e Peresitene Ezra Taft Benson ia ausia, o mea uma na ia tu atu ai, ma mea uma na ia faamoemoe i ai—mo ia lava, mo lona aiga, ma mo le Ekalesia—ua aofia uma i totonu o lenei lauga.”⁴

Jesus Christ depicted in red and black robes. Christ is talking to a rich young man. Christ has His arms extended as He gestures toward a poorly dressed man and woman. The painting depicts the event wherein Christ was approached by a young man who inquired of Christ what he should do to gain eternal life. Christ instructed him to obey the commandments and to give his wealth to the poor and follow Him. The young man was unable to part with his wealth and went away sorrowfully. (Matthew 19:16-26) (Mark 10:17-27) (Luke 18:18-27)

Aoaoga a Ezra Taft Benson

O le poloaiga muamua ma le sili o le alofa lea i le Alii.

O le tofotofoga sili o le olaga o le usiusitai lea i le Atua. “O le a tatou tofotofoina ai i latou,” na fetalai ai le Alii, “e vaai pe latou te faia mea uma o soo se mea e poloaiina ai i latou e le Alii lo latou Atua” (Aperaamo 3:25).

O le galuega sili o le olaga o le iloaina lea o le finagalo o le Alii ona faia lea.

O le poloaiga sili o le olaga o le alofa lea i le Alii.

“O mai ia Keriso,” o loo apoapoai mai ai Moronae i lana molimau faaiu, “… ma alolofa i le Atua ma o outou manatu atoa, mafaufau, ma le malosi atoa” (Moronae 10:32).

O le poloaiga muamua ma le sili la lenei: “Ia e alofa foi i le Alii lou Atua ma lou loto atoa, ma lou agaga atoa, ma lou manatu atoa, ma lou malosi atoa” (Mareko 12:30; tagai foi Mataio 22:37; Teuteronome 6:5; Luka 10:27; Moronae 10:32; MF&F 59:5).

O le alofa le pona o Keriso, ua ta’ua o le alofa mama, lea o loo molimau mai ai le Tusi a Mamona o le alofa aupito silisili lea o alofa uma—lea e le uma lava, e tumau e faavavau, lea e tatau ona maua e tagata uma, ma a aunoa ma lea alofa o se mea noa lava i latou (tagai Moronae 7:44–47; 2 Nifae 26:30).

“O le mea lea, ou uso pele e,” ua augani mai ai Moronae, “ia outou tatalo atu i le Tamā ma le malosi atoa o o [outou] loto, ina ia faatumulia outou i lenei alofa, lea ua ia faaee mai i luga o i latou uma o e o soo moni o lona Alo, o Iesu Keriso; ina ia mafai ona avea outou ma atalii o le Atua; a oo ai ina afio mai o ia o le a tatou faapei o ia” (Moronae 7:48).

I tala faaiu o sa Iareto ma sa Nifae, o loo tusia ai e Moronae e faapea sei vagana ua i ai i tagata lenei alofa le pona o Keriso, ua ta’ua o le alofa mama, e le mafai lava ona latou mauaina lena nofoaga ua saunia e Keriso i maota o Lona Tama pe mafai foi ona faaolaina i latou i le malo o le Atua (tagai Eteru 12:34; Moronae 10:21).

O le fua na taumafa e Liae i lana miti lea na matuai faatumulia ai lona agaga i le olioli tele ma lea sa sili ona manaomia i lo mea uma, o le alofa lea o le Atua.⁵

A ou mafaufau i le alofa mama, Ou te … mafaufau i lo’u tama ma le aso lea na valaauina ai o ia i lana misiona [tagai i itulau 4–6 i le tusi lenei]. Ou te manatu atonu e faapea nisi o tagata i le lalolagi o lona taliaina o lena valaauga o se faamaoniga sa lei alofa moni o ia i lona aiga. O le tuua ai o le fanau e toafitu ma se toalua sa maitaga i le fale na o i latou mo le lua tausaga, sa mafai faapefea ona avea ma se alofa moni lena mea? Ae sa iloa e lo’u tama se faaaliga sili atu o le alofa. Sa ia iloaina e faapea “e galulue faatasi mea uma e lelei ai i latou o e ua alofa atu i le Atua” (Roma 8:28). Sa ia iloaina o le mea silisili e mafai ona ia faia mo lona aiga o le usiusitai lea i le Atua.⁶

O le alofa atu i le Atua ma lou loto atoa, agaga, mafaufau, ma le malosi atoa e alu uma ai le malosi ma mafaufauga. E le o se taumafaiga faatāgāfai pe faapa’ole. O le tuuto atoa atu o o tatou lava tagata—faaletino, faalemafaufau, faalelagona, ma faaleagaga—i se alofa o le Alii.

O le lautele, loloto, ma le maualuga o lenei alofa o le Atua e oo atu lea i vaega uma o le olaga o se tagata. O o tatou manaoga, pe faaleagaga pe faaletino, e tatau lava ona mauaa i se alofa o le Alii. O o tatou mafaufauga ma lagona alofa e tatau ona faatotonugalemu i le Alii. “Ia tuu atu ou manatu uma i le Alii,” sa fai mai ai Alema, “ioe, ia tuu atu alofaaga o lou loto i le Alii e faavavau” (Alema 37:36).⁷

Tatou te faaalia lo tatou alolofa i le Atua pe a tatou faamuamua o Ia i o tatou olaga.

Aisea na tuu ai e le Atua le poloaiga muamua lea e faamuamua?Ona na Ia silafia afai tatou te alolofa moni lava ia te Ia o le a tatou mananao e tausia isi Ana poloaiga uma. “Aua o lenei lava le alofa i le Atua,” na fai mai ai Ioane, “ia tatou tausi i ana poloaiga” (1 Ioane 5:3; tagai foi 2 Ioane 1:6).

E tatau ona tatou tuu le Atua i luma o isi mea uma i o tatou olaga. E tatau ona faamuamua o Ia, e pei lava ona Ia folafola mai i le poloaiga muamua o Ana Poloaiga e Sefulu: “Aua ne’i e fai mo oe ni atua ese i o’u luma” (Esoto 20:3).

Pe a tatou faamuamua le Atua, o le a sologa lelei isi mea uma pe aveesea foi mai i o tatou olaga. O lo tatou alofa mo le Alii o le a pulea ai mea o loo manaomia mai lo tatou alofa, o mea o loo manaomia mai ai o tatou taimi, o mea tatou te fiafia i ai o loo tatou tulitulimatagauina, ma le faatulagaga o a tatou mea e faamuamua.

E tatau ona tatou tuu le Atua e faamuamua i lo isi tagata uma lava i o tatou olaga.

A o i ai Iosefa i Aikupito, o le a le mea na muamua i lona olaga—Atua, lana galuega, po o le avā a Potifara? Ina ua ia taumafai e faatosina ia [Iosefa], sa ia tali atu i ai, “Pe faapefea ona ou faia lenei mea leaga tele, ma ou agasala ai i le Atua?” (Kenese 39:9).

Na lafo Iosefa i le falepuipui ona sa ia faamuamua le Atua. Afai tatou te fetaiai ma se filifiliga tali tutusa faapea, o fea o le a faamuamua i ai lo tatou faamaoni? E mafai ea ona tatou faamuamuaina le Atua i lo le saogalemu, filemu, tuinanau, tamaoaiga, ma mamalu faaletagata?

Ina ua faamalosia Iosefa e filifili, sa sili atu lona popole e faamalieina le Atua nai lo le faamalieina o le avā a lona pule. Pe a manaomia i tatou e fai se filifiliga, pe o sili atu ea ona tatou popole e faamalieina le Atua nai lo o tatou pule, o tatou faiaoga, o tatou tuaoi, po o e o loo tatou tafafao faamasani?

Joseph of Egypt in prison. — Sa loto lava Iosefa o Aikupito e alu i le falepuipui nai lo le faafitia o lona faamaoni tuuto i le Atua.

Na fetalai mai le Alii, “O le ua tele lona alofa i lona tama po o lona tina, a e itiiti ia te au, e le aoga lea ia te au: O le ua tele foi lona alofa i lona atalii po o lona afafine, a e itiiti ia te au, e le aoga foi lea ia te au” (Mataio 10:37). O se tasi o tofotofoga aupito sili ona faigata o tofotofoga uma o le taimi lea e te filifili ai i le va o le faamalieina o le Atua po o le faamalieina o se tagata e te alofa i ai pe faaaloalo i ai—aemaise lava i se tagata o le aiga.

Na feagai Nifae ma lena tofotofoga ma sa taulimaina lelei ina ua muimui lona tama lelei i sina taimi puupuu e faasaga i le Alii (tagai 1 Nifae 16:18–25). Sa faatumauina e Iopu lona faamaoni a’ia’i i le Alii e ui lava sa ta’u atu i ai e lona toalua ia faifai i le Atua ma oti ai (tagai Iopu 2:9–10).

O loo ta’u mai e tusitusiga paia, “Ia e ava i lou tama ma lou tina” (Esoto 20:12; tagai foi i le Mosaea 13:20). O nisi taimi e tatau ona filifili ai se tasi e āva i le Tama Faalelagi e sili atu i se tama faaletino.

E tatau ona tatou avatu i le Atua, le Tama o o tatou agaga, se faamamaluga silisili ese i o tatou olaga. Ua ia te Ia se uluai aia faamātua i lo tatou manuia e faavavau, e sili atu i lo isi uma noataga e ono noatia ai i tatou iinei po o le olaga a sau.

O le Atua, lo tatou Tama; o Iesu, lo tatou Uso Matua ma lo tatou Togiola; ma le Agaga Paia, le Molimau, ua atoatoa [i Latou]. Ua silisili lo Latou silafiaina o i tatou ma silisili ona alolofa ia i tatou ma o le a Latou le tuua lava se mea e tasi e le faia mo lo tatou manuia e faavavau. Pe le tatau ea la ona tatou alolofa ia i Latou mo lena mea ma muai ava ia i Latou?

O loo i ai tagata faamaoni ua auai i le Ekalesia e ui lava i le tetee ai o o latou aiga i le olaga nei. E ala i le faamuamua o le Atua, na mulimuli ane ai avea le toatele ma ni meafaigaluega na taitai maia i latou o e pele i le malo o le Atua.

Na fetalai Iesu, “Ou te faia pea lava o mea e lelei [i le Atua] (Ioane 8:29).

O le a le tulaga i totonu o o tatou aiga? Pe o tatou tauivi ea e faamuamua le Alii ma faafiafia o Ia?

Tamā, pe faafiafiaina le Alii pe afai o loo faia tatalo faaleaiga i aso taitasi ma faitauga tusitusiga paia i lou aiga? Ae a le faia o afiafi faaleaiga i vaiaso uma ma i ai i nisi taimi se taimi faapitoa taitoatasi ma lau ava ma tamaiti taitasi? Ma afai e se ese sou alo mo se taimi le tumau, e te manatu ea o le a fiafia i ai le Alii ma Na te faamamaluina au taumafaiga pe afai e faaauau pea ona e ola i se olaga o faataitaiga lelei, tatalo e le aunoa ma anapogi soo mo lena tamaitiiti, ma tusia i taimi uma le igoa o lena atalii po o le afafine i le lisi o tatalo o le malumalu?

Outou tina, o e ua poloaiina faapitoa e tausi ma le amiotonu le autalavou a Siona, pe o outou faamuamua ea le Atua pe a outou faamamaluina lo outou valaauga paia? … E faamuamua e o tatou tina le Atua pe a latou faataunuuina la latou misiona sili ona maualuga i totonu o puipui o o latou lava fale.

Fanau, o outou tatalo ea mo o outou matua? O outou taumafai ea e lagolago i latou i a latou taumafaiga malualii? O le a latou faia ni mea sese, e pei foi o outou, ae o loo i ai sa latou misiona paia ia faataunuuina i lou olaga. O le a outou fesoasoani ea ia i latou ia faia lea mea? O le a outou faaopoopo ea le mamalu i lo la igoa ma aumai le mafanafana ma le lagolago ia i laua i o la tausaga matutua?

Afai e manao se tasi e faaipoipo ia te oe i fafo atu o le malumalu, o ai lea o le a e taumafai e faafiafiaina—o le Atua po o le tagata? Afai e te finafinau pea mo se faaipoipoga faalemalumalu, o le a e faafiafiaina le Alii ma faamanuia ai le isi itu. Aisea? Ona o lena tagata o le a avea ma sē agavaa e alu i le malumalu—lea o le a avea ma se faamanuiaga—pe o le a alu ese—lea e mafai foi ona avea ma se faamanuiaga—ona o le a leai se tasi o oulua e tatau ona amo faalegatasi [pe mamafa itutasi ai le avega] (tagai 2 Korinito 6:14).

E tatau ona e agavaa mo le malumalu. Ona e iloa ai lea e leai se tasi e lava lona lelei o le a e faaipoipo i ai i fafo atu o le malumalu. Afai o na tagata e lelei tele, o le a latou ola i se tulaga ina ia mafai ai foi e i latou ona faaipoipo i le malumalu.⁸

Pe a tatou filifili e faamuamua le Atua i o tatou olaga, o le a oo mai le anoanoai o Ana faamanuiaga.

O alii ma tamaitai e liliu atu o latou olaga i le Atua o le a iloaina e mafai ona Ia faia le anoanoai o mea i o latou olaga nai lo mea latou te mafaia. O le a Ia faalolotoina lo latou olioli, faalautele la latou vaai mamao, faatelea’iina o latou mafaufau, faamalosia o latou maso, siitia o latou agaga, faateleina o latou faamanuiaga, faateleina o latou avanoa, faamafanafana o latou agaga, faatulai mai uo, ma liligi atu le filemu. Po o ai lava o le a faamaumau lona ola i le galuega a le Atua o le a ia maua le ola e faavavau.⁹

Sa fetalai atu le Atua ia Aperaamo ina ia ositaulagaina ia Isaako. Ana faapea e sili atu le alofa o Aperaamo ia Isaako i lo le Atua, faamata na te malie i ai? E pei ona faailoa mai e le Alii i le Mataupu Faavae ma Feagaiga, ua nonofo uma nei Aperaamo ma Isaako o ni atua (tagai MF&F 132:37). Sa la loto e ofo atu taulaga pe taulagaina i laua lava e pei ona manaomia ai e le Atua. Sa ia i laua se alofa ma se faaaloalo sili atu ona loloto o le tasi i le isi ona sa laua taufai loto uma e faamuamua le Atua.

Ua aoao mai le Tusi a Mamona e faapea ‘e tatau ona i ai le faafeagai o mea uma’ (2 Nifae 2:11)—ma o loo faapena lava. E tuuina mai e mea faafeagai ni filifiliga, ma o filifiliga e oo mai ai taunuuga—lelei po o le leaga.

O loo faamalamalamaina mai e le Tusi a Mamona e faapea o tagata “ua … saoloto e filifili le saolotoga ma le ola e faavavau, e ala i le Puluvaga sili o tagata uma, pe filifili le faatagataotauaina ma le oti, e tusa ma le faatagataotauaina ma le mana o le tiapolo” (2 Nifae 2:27).

E alofa le Atua ia i tatou; ae inoino le tiapolo ia i tatou. E finagalo le Atua ia tatou maua le olioli atoatoa e pei ona i ai ia te Ia. E manao le tiapolo ia malaia i tatou e pei o ia. Ua tuuina mai e le Atua ia poloaiga ia i tatou ia tatou manuia ai. Ae manao le tiapolo ia tatou solia nei poloaiga ia tatou malaia ai.

O aso taitasi, tatou te filifili ai lava i taimi uma e ala i o tatou manaoga, o o tatou mafaufauga, ma a tatou amioga pe tatou te mananao ina ia faamanuiaina pe faamalaiaina, fiafia pe faanoanoa. O se tasi o tofotofoga o le olaga o le le masani lea ona tatou mauaina vave ia faamanuiaga atoatoa mo le amiotonu po o le faamalaiaina atoa mo le amioleaga. O lena mea o le a mautinoa lava e oo mai, ae e masani lava o loo i ai se taimi faatalitali, e pei o le tulaga sa tupu ia Iopu ma Iosefa.

Ae i le taimi lava lea o loo manatu ai e amioleaga ua latou sao ese mai i se mea. Ua aoao mai le Tusi a Mamona e faapea o e amioleaga “latou te maua le olioli ia latou galuega mo se vaitau, [ae] e toe itiiti ane oo mai le iuga, ma o le a tatuu i latou i lalo ma lafo i le afi, lea ua leai se toe foi mai ai” (3 Nifae 27:11).

I le taimi o lenei vaitau o tofotofoga e tatau ai i tagata amiotonu ona faaauau pea ona alolofa i le Atua, faalagolago i Ana folafolaga, ia onosai, ma ia mautinoa, e pei ona fai mai le tusisolo, “o le na te faia le galuega a le Atua o le a maua le totogi a le Atua.” …

Ou te molimau atu ia te outou o le totogi a le Atua o le totogi sili lava lea ua iloaina e lenei lalolagi po o soo se isi lava lalolagi. Ma ua na o i latou lava e alolofa i le Alii ma faamuamua o Ia e oo mai i ai le totogi atoa silisili lenei.

O le tofotofoga sili o le olaga o le usiusitai lea i le Atua.

O le galuega sili o le olaga o le iloaina lea o le finagalo o le Alii ona faia lea.

O le poloaiga sili o le olaga o le, “Ia e alofa i le Alii lou Atua ma lou loto atoa, ma lou agaga atoa, ma lou manatu atoa, ma lou malosi atoa” (Mareko 12:30).

Ia faamanuia mai le Atua ia tatou faamuamua le tulafono muamua ma, e avea o se taunuuga, le seleseleina o le filemu i lenei olaga ma le olaga e faavavau faatasi ai ma le atoatoa o le olioli i le olaga a sau.¹⁰

Fautuaga mo Suesuega ma le Aoaoina Atu

Fesili

I le vaega 1, o loo aoao mai ai Peresitene Benson e uiga i le “poloaiga muamua ma le sili” (Mataio 22:38). Aisea e te manatu ai o lenei poloaiga e tatau ona tatou faamuamuaina? O a ni malamalamaaga ua e mauaina mai le ala na faafesootai ai e Peresitene Benson le alofa mama i lenei poloaiga?
O le a se uiga ia te oe ia “faamuamua le Atua”? (Mo nisi faataitaiga, tagai i le vaega 2.) O le a se taimi e te vaaia ai le “sologa lelei o isi mea uma pe aveesea foi mai i o tatou olaga” pe a tatou faamuamua le Atua?
Mafaufau loloto i folafolaga a Peresitene Benson ia i latou o e “liliu atu o latou olaga i le Atua” (vaega 3). O a ni faataitaiga ua e vaaia o ni tagata ua liliu atu o latou olaga i le Atua? O a ni auala na faaleleia ai e le Atua na tagata e sili atu nai lo tagata semanu e ono avea ai i latou pe ana na o i latou lava?

Mau Fesootai

Iosua 24:14–15; Mataio 6:33; 7:21; Ioane 14:15, 21–24; 17:3; 1 Korinito 2:9; 1 Nifae 3:7; Moronae 10:32

Fesoasoani mo le Aoaoina Atu

“Ia mautinoa ia aua ne’i e talitonu o oe o le ‘faiaoga moni.’ O se mea matuai sese lava lena. … Ia faaeteete ia aua nei e faalavelave i le Agaga. O le matafaioi autu a se faiaoga o le saunia lea o le auala ina ia maua ai e tagata se aafiaga faaleagaga ma le Alii” (Gene R. Cook, sii mai le O Le Aoao Atu, E Leai Se Isi Valaauga e Sili Ai [1999], 43).