Mataupu 13
Faamanuiaga Lemafaatauina o le Maota o le Alii
“O totonu o malumalu tatou te maua ai faamanuiaga aupito silisili a le Atua e faatatau i le ola e faavavau. O malumalu o faitotoa moni ia i le lagi.”
Mai le Soifuaga o Ezra Taft Benson
“Ou te faafetai i le Alii ona o mea ou te manatua e uiga i malumalu e oo atu lava i tua—i le taimi a o avea a’u o se tamaitiiti,” sa saunoa ai Peresitene Ezra Taft Benson. “Ou te manatua lelei lava, a o o’u laitiiti, i lo’u foi mai se galuega i le fanua ma ou latalata atu i le fale tuai i le faatoaga i Whitney, Idaho. Ou te faalogo atu lava i le pese a lo’u tina ‘Ua Ou Faia Ea se Lelei i le Aso?’ (Viiga, nu. 136.)
“O loo mafai lava ona ou vaai faalemafaufau ia te ia, o punou i luga o le laupapa auli faapea ma ni nusipepa i luga o le fola, i le auliina o ni ie uumi papae, ma le afu e to’a i lona muaulu. Ina ua ou fesiligia o ia po o a ana mea o loo fai, sa ia fai mai, ‘Atalii, o ofutalaloa nei o le malumalu. O le a ma o atu ma lou tamā i le malumalu. …’
“Ona ia faataatia lea o le auli mafolafola tuai i luga o le ogaumu, toso mai se nofoa ia latalata mai ia te a’u, ma faamatala mai ia te a’u e uiga i galuega faalemalumalu—o le taua o le mafai ona alu atu i totonu ma auai i sauniga paia o loo faia ai iina. Sa ia faailoa mai foi lona faamoemoega naunautai ina ia i ai se aso e maua ai e lana fanau, fanau a lana fanau, ma a latou fanau le avanoa e olioli ai i nei faamanuiaga taua.
“O nei mea matagofie e manatua pea e uiga i le agaga o galuega faalemalumalu o ni faamanuiaga i lo matou aiga i le faatoaga. … Na toe foi mai nei manatuaga ina ua ou faatinoina faaipoipoga uma a le ma fanau ma fanau o le ma fanau, fanau o fanau a lo’u tina ma a latou fanau, i lalo o uunaiga a le Agaga i totonu o le maota o le Alii.
“O manatuaga faapelepele nei ia te au.”1
Aoaoga a Ezra Taft Benson
1
O malumalu o faatusa ia o mea uma e pele ia i tatou.
O le malumalu o le nofoaga aupito sili lea ona latalata i le lagi i luga o lenei lalolagi faaletino.2
[O le] a avea le malumalu ma se sulu i tagata uma [i le] eria—o se faatusa lea o mea uma e pele ia i tatou.3
O le malumalu o se faamanatu faifai pea o le faamoemoega o le Atua ina ia faavavau aiga.4
[O le malumalu o se] faailoga tumau ma vaaia lea e le’i tuua lava e le Atua le tagata e tauautago i le pogisa. O se nofoaga o faaaliga. E ui o loo tatou ola i se lalolagi agasala—se lalolagi amioleaga—ae ua vaetofia ma faapaiaina ia nofoaga paia ina ia mafai ai e alii ma tamaitai agavaa ona iloa le faatulagaga o le lagi ma usiusitai i le finagalo o le Atua.5
[O le malumalu o se] molimau maumaututu o le mana o le Atua e mafai ona faatoilalo ai mana o le tiapolo o loo lotolotoi ia i tatou. O le toatele o matua, e auai ma e le auai foi i le Ekalesia, ua popole i le puipuiga e faasagatau atu i le matua faatupulaia o le amioleaga o loo taufaamatau mai e faatoilalo ia mataupu faavae faaKerisiano. Ou te matuai ioe atoatoa i se faamatalaga na saunoa i ai Peresitene Harold B. Lee i le vaitaimi o le Taua Lona II o le Lalolagi. Na saunoa o ia: “Tatou te talanoa e uiga i le saogalemu i lenei vaitaimi, ae ua tatou le malamalama … o loo i ai o tatou malumalu paia o loo tutu tatou te maua ai faatusa ia e mafai ona afua mai ai le mana lea o le a faasaoina ai lenei malo mai le faafanoga.”6
I se patī i le Faletalimalo o le Beverly Hills Hilton i Los Angeles, [Kalefonia,] na talosagaina ai a’u e le Peresitene o le Iunaite Setete [a o avea ma ana failautusi o mea taufaatoaga] e faafeiloai le peresitene o se tasi o o tatou malo fou, le peresitene o le valusefulu valu miliona tagata na taape solo i ni atumotu e 3,000 i se mamao e afe maila, o se malo sa na o ni nai tausaga talu ona faatu. A o matou saofafai ai iina i le taumafataga o le afiafi, lea sa tele lava ina lagolagoina e le vaega gaosi ata tifaga, ma o lea sa i ai foi le toatele o tagata autu o ata tifaga, na mafai ona ou vaavaai atu i fafo i se faamalama tele matagofie. O lalo i le auala, i luga o se maupu’epu’e, na mafai ona ou iloa atu ai sulu vaivai na faataamilo i lo tatou Malumalu matagofie o Los Angeles, ma sa ou fiafia e faasino atu i a’u malo ma uo sa i ai i le matou laulau ma isi laulau. Sa ou mafaufau, a o matou saofafai ai iina, “O le tele o mea o loo tutupu i le po lenei ua na o ni mea e le tumau ma lē taua o le olaga. O mea e tumau, o mea moni ia, o mea e taua o mea na o loo tutupu i totonu o le malumalu o le Atua.”7
Malumalu o Los Angeles Kalefonia
Talosia ia avea [le malumalu] ma se faamanatu tumau o lena olaga e faavavau ma o feagaiga tatou te osia i le olaga lenei e mafai ona faavavau.8
2
Tatou te manaomia sauniga ma feagaiga o le malumalu ina ia mafai ona tatou ulufale atu ai i le atoatoa o le perisitua ma saunia ai e toe maua le afioaga o le Atua.
Ina ua tuu e lo tatou Tama Faalelagi ia Atamu ma Eva i luga o lenei fogaeleele, sa Ia faia ma le faamoemoega ia aoao i laua i le ala e toe maua ai Lona afioaga. Na folafola mai e lo tatou Tama se Faaola e laveai i laua mai lo laua tulaga pa’ū. Sa Ia tuuina atu ia i laua le ata o le faaolataga ma ta’u atu ia i laua e aoao le la fanau ia faatuatua ia Iesu Keriso ma le salamo. Ma le isi, na poloaiina Atamu ma lana fanau e le Atua ina ia papatisoina, ia maua le Agaga Paia, ma ia ulu atu i le faatulagaga a le Alo o le Atua.
O le ulu atu i le faatulagaga a le Alo o le Atua, e tutusa lea ma le ulu atu i le atoatoa o le Perisitua Mekisateko i aso nei, lea e na o totonu o le maota o le Alii e maua ai.
Ona na usitaia e Atamu ma Eva ia nei tulaga manaomia, na fetalai atu ai le Atua ia i laua, “O oe o se tasi o le faatulagaga a ia o lē ua aunoa ma se amataga o aso po o se gataaga o tausaga, mai le vavau atoa e oo i le faavavau atoa.” (Mose 6:67.)
E tolu tausaga a’o le’i maliu Atamu, na tupu ai se mea maoae lava. Na ia aveina ai lona atalii o Setu, ma Enosa le atalii o lona atalii, ma isi faitaulaga sili o e na tupuga moni mai ia te ia, faapea ma isi ana fanau amiotonu, i le vanu na ta’ua o Atamu-onai-Amani. O iina na tuu atu ai e Atamu i nei suli amiotonu lana faamanuiaga mulimuli.
Sa faaali ane le Alii ia i latou [tagai MF&F 107:53–56]. …
Na faapefea ona aumai e Atamu ona suli i luma o le Alii?
O le tali: Na ulu atu Atamu ma ona suli i le faatulagaga o le perisitua a le Atua. O aso nei, e mafai ona tatou faapea, sa latou o atu i le Maota o le Alii ma maua ai o latou faamanuiaga.
O le faatulagaga o le perisitua o loo ta’ua i tusitusiga paia, o nisi taimi e ta’ua ai o le faatulagaga faapeteriaka ona e faasolo ifo i lalo mai le tamā i le atalii. Peitai o lenei faatulagaga ua faamalamalamaina mai foi i faaaliga i ona po nei o se faatulagaga o se malo faaleaiga e ulu atu ai se alii ma se tamaitai i se feagaiga ma le Atua—e pei ona sa faia e Atamu ma Eva—ina ia faamauina mo le faavavau, ia maua ni fanau, ma ia faia le finagalo ma le galuega a le Atua i o latou olaga atoa i le tino.
Afai e faamaoni se ulugalii i a laua feagaiga, e agavaa i laua i faamanuiaga o le tikeri aupito maualuga o le malo selesitila. O nei feagaiga i aso nei e na o le pau lava le auala e mafai ona ulu atu i ai, o le o lea i le Maota o le Alii.
Sa mulimuli Atamu i lenei faatulagaga ma aumai ai lana fanau i le afioaga o le Atua. …
… O lenei faatulagaga o le perisitua e na o le pau lava le auala e mafai ona ulu atu i ai, pe afai lena tatou te usitai i poloaiga a le Atua ma saili faamanuiaga o tamā e pei ona sa faia e Aperaamo [tagai Aperaamo 1:1–3] e ala i le o atu i le maota o lo tatou Tama. E leai lava se isi nofoaga i luga o lenei lalolagi e mafai ona maua ai!
… O i le malumalu—le maota o lo tatou Tama—e maua mai ai faamanuiaga o o outou tama ina ia mafai ona outou agavaa i faamanuiaga aupito sili ona maualuluga o le perisitua. “Aua a aunoa ma lea, e leai se tagata e mafai ona vaai i fofoga o le Atua, le Tamā lava, ma ola.” (MF&F 84:22.)
O le maota o lo tatou Tama o se maota o le faatulagaga lelei. Tatou te o atu i Lona maota ina ia ulu atu i lena faatulagaga o le perisitua lea o le a tatou agavaa ai i mea uma o loo i le Tama, pe afai tatou te faamaoni.9
3
E ala atu i sauniga ma feagaiga o le malumalu, e mafai ai ona tatou maua le puipuiga ma faamanuiaga silisili a le Atua e faatatau i le ola e faavavau.
O faamanuiaga o le maota o le Alii e faavavau. E matuai silisili lo latou taua ia i tatou ona o totonu o malumalu tatou te maua ai faamanuiaga silisili a le Atua e faatatau i le ola e faavavau. O malumalu o faitotoa moni ia i le lagi.10
O le finagalo o le Alii, e mo alii ma tamaiti matutua uma o le Ekalesia ia maua sauniga o le malumalu. O le uiga o lenei mea, ia maua o latou faaeega paia ma ia faamauina mo le faavavau ia ulugalii uma ua faaipoipoina. O nei sauniga e tuuina atu ai se puipuiga ma faamanuiaga i a latou faaipoipoga. E faamanuiaina foi a latou fanau e fananau mai i totonu o le feagaiga. O le fananau mai i totonu o le feagaiga ua agavaa ai na fanau i se faamanuiaga tautofi lea e faamautinoa ai lo latou tulaga faamatua e faavavau e tusa lava po o a ni mea e tutupu i o latou matua, pe afai e tumau le agavaa o le fanau mo ia faamanuiaga.11
Pe le taua ea ia te outou i aso nei le salalau atu o le Au Paia i le lalolagi atoa ma, i lo latou tulaga o le faasalalauina, ua fausia ai malumalu mo i latou? E ala mai i sauniga latou te maua i totonu o nofoaga paia, o le a faaauupegaina ai i latou i le amiotonu ma faaeeina mai i ai le mana o le Atua e le mafuatia.12
O loo i ai se mana e i ai faatasi ma sauniga o le lagi—o le mana lava lea o le faaleatua—lea e mafai ma o le a faatoilalo ai ‘au a le tiapolo pe afai o le a tatou agavaa mo na faamanuiaga paia. O le a puipuia o [tatou] nuu, o le a puipuia o tatou aiga, o le a malupuipuia a tatou fanau pe a tatou ola i le talalelei, o atu i le malumalu, ma ola latalata i le Alii. … Ia faamanuia i tatou e le Atua o ni Au Paia e ola agavaa mo feagaiga ma sauniga ua osia i totonu o lenei nofoaga paia.13
O le sauniga o le malumalu na tuuina mai e se Tama Faalelagi atamai e fesoasoani ina ia tatou avea atili ai e pei o Keriso.14
O le a le mafai ona tatou nonofo faatasi ma tagata selesitila sei vagana ua tatou mamā ma paia. O tulafono ma sauniga ia e mafua ai ona o ese ai alii ma tamaitai mai le lalolagi ae avea ma ni tagata faapaiaina e na o totonu lava o nei nofoaga paia e faataunuuina ai. Na tuuina mai e ala i faaaliga ma e malamalama foi i ai e ala i faaaliga. O le mafuaaga lenei na ta’ua ai e se tasi o le Usoga ia malumalu o le “iunivesite a le Alii.”15
E leai se tagata o le Ekalesia e mafai ona faaatoatoaina e aunoa ma sauniga o le malumalu. O loo i ai sa tatou misiona e fesoasoani atu ia i latou o e e le o mauaina nei faamanuiaga ina ia latou mauaina.16
4
O loo ia i tatou le avanoa o le tatalaina o faitotoa o le faaolataga mo o tatou tuaa.
Ua fausia ma faapaiaina malumalu ina ia mafai ai, e ala atu i le perisitua, ona faamauina matua i a latou fanau, ma ia mafai ona faamauina fanau i o latou matua. O nei sauniga o le faamauga e faatatau uma i e o soifua ma e ua maliliu. Afai e le faamauina i tatou i o tatou augatama ma a tatou fanau, o le a matuai maumau atoa le faamoemoega o lenei lalolagi, le faaolataga o le tagata, e tusa ai ma lo tatou aafiaga.17
E le lava mo se tane ma se ava le faamauina i le malumalu e faamautinoa ai lo laua faaeaga—pe afai la te faamaoni—ae ao foi ona la fesootai e faavavau ma o la augatama ma vaai ua fai galuega mo nei tuaa. Fai mai le Aposetolo o Paulo, “E le mafai ona faaatoatoaina o i latou e aunoa ma i tatou—pe mafai foi ona faaatoatoaina i tatou e aunoa ma o tatou tagata maliliu” (MF&F 128:15). O le mea lea e ao ai ona malamalama o tatou tagata, ua tofu i latou ma se tiutetauave e vaai ua latou fesootai atu i o latou augatama—po o le, e pei ona ta’ua e tusitusiga paia, o o tatou “tamā.” O le uiga lenei o le vaega e 2, fuaiupu e 2, o le Mataupu Faavae ma Feagaiga ina ua folafola mai e Moronae “o le a toto e [Elia] i loto o fanau folafolaga na faia i tamā, ae o le a liliu atu loto o fanau i o latou tamā.”18
A ou mafaufau i gafa, ou te vaaia tagata—tagata ou te alofa i ai o e o loo faatalitali i lo matou aiga, a latou fanau, e fesoasoani ia latou maua le faaeaga i le malo selesitila.19
O lo tatou avanoa o le tatalaina o faitotoa o le faaolataga i na agaga o e atonu o faafalepuipuiina i le pogisa i le lalolagi o agaga, ina ia mafai ona latou maua le malamalama o le talalelei ma ia faamasinoina e pei lava o i tatou. Ioe, “o galuega ou te faia”—o le tuuina atu lea o sauniga faaola o le talalelei i isi—“e fai foi e ia” [tagai Ioane 14:12]. Mata e fia ni afe o o tatou tuaa o loo faatalitali pea mo nei sauniga o faamauga?
E lelei le fesili, “Pe ua ou faia ea mea uma e mafai ona ou faia i lenei itu o le veli? Pe o le a avea ea a’u ma se faaola ia i latou— o o’u lava augatama?”
A aunoa ma i latou, e le mafai ona faaatoatoaina i tatou! O le faaeaga o se mataupu faaleaiga.20
O le veli e manifinifi lava. O loo tatou ola i le faavavau. O mea uma ua pei o se aso e tasi i le Atua. Ou te matea i le Alii, e le o i ai se veli. O se fuafuaga tele lava e tasi. Ou te mautinoa e i ai se fiafiaga i le lagi pe a tatou feiloai [i totonu o le malumalu]. O loo olioli o tatou augatama, ma o lo’u faamoemoega ma la’u tatalo ia tatou faaaoga lelei avanoa ua tuuina mai ia i tatou e o mai ai e le aunoa i le malumalu.21
O outou o e na galulue i o outou gafa, o e ua iloaina le taua o le galuega ma ua lagonaina le fiafia lea e oo mai mai le sosooina faatasi o aiga, ma iloa lou tofi mamalu, e tatau ona faasoa atu lena fiafiaga i isi. Fesoasoani ia latou iloa le olioli ma le faamalieina lena e te vaaia i le galuega. E tatau ona tatou faaliliuina mai ni o tatou tagata se toatele i lenei galuega. E tele naua galuega e tatau ona fai, ma e pei ona outou silafia uma, ma e matuai toatele lava tagata o le au paia o e e mafai ona faia le galuega, ma e o le a fiafia e fai le galuega, pe afai o le a faamaite e nisi o i tatou se lagona fiafia ia i latou—outou uma—e ala i lou naunautai, faataitaiga, ma le tuuto.22
5
E manaomia ona iloa e tamaiti ma le autalavou faamanuiaga o loo faatalitali mai mo i latou i le malumalu.
O le malumalu o se nofoaga paia, ma o sauniga i totonu o le malumalu o ni mea paia. Ona o lona paia, o nisi taimi tatou te mumusu ai e fai atu se faamatalaga e uiga i le malumalu i a tatou fanau ma fanau a tatou fanau.
O se taunuuga, o le toatele e le o atiaeina se manao moni e o atu i le malumalu, ae pe afai foi latou te o atu i ai iina, latou te faia e aunoa ma se malamalamaaga tele e saunia ai i latou mo matafaioi ma feagaiga latou te ulu atu i ai.
Ou te talitonu o se malamalamaaga lelei po o se iloa o le a le mafaatusalia le fesoasoani tele i le saunia o o tatou tagata talavou mo le malumalu. O lenei malamalamaaga, ou te talitonu, o le a faaosofia i totonu o i latou se manao e saili o latou faamanuiaga o le perisitua e pei lava ona sailia ai e Aperaamo ona [faamanuiaga o le perisitua] [tagai Aperaamo 1:1–4].23
A fesili a tatou fanau pe aisea tatou te faaipoipo ai i totonu o le malumalu, e tatau ona outou aoao atu ia i latou o malumalu e na o le pau ia o nofoaga i luga o le fogaeleele e mafai ona faia ai ni sauniga faapitoa. E tatau foi ona outou faasoa atu i a outou fanau o outou lagona patino a o outou tootutuli faatasi i le fata faitaulaga ma tauave i o outou luga feagaiga ia ua mafai ai ona latou faamau atu ia te outou e faavavau.24
“Ia faamanuia i tatou e le Atua e aoao a tatou fanau ma fanau a fanau i le maoae o faamanuiaga o loo faatalitali mai ia i latou e ala i le ulu atu i le malumalu.”
E matagofie tele pe a tusi atu lima o tina ma tamā i le malumalu ma faapea atu i a latou fanau, “O le nofoaga lena sa ma faaipoipo ai mo le faavavau.” O le faia o lea mea, o sini o le faaipoipo i le malumalu, o le a mafai ona musuia ai mafaufau ma loto o a outou fanau a o latou laiti.25
E tatau ona tatou faasoa atu i o tatou aiga lo tatou alolofa i o tatou tuaa ma lo tatou loto faafetai i le mafai ona tatou fesoasoani atu ia i latou ia maua sauniga faaola, e pei ona sa faia e o’u matua ia te a’u. Afai tatou te faia lea mea, o le a faapea ona tupu ai le faateleina o sootaga o le talisapaia ma le alofa i totonu o o tatou aiga.26
Ou te talitonu e le gata ina naunau ma mafai e le autalavou ona fai le sailiga o gafa, ae o i latou foi o ni auala lelei e ola ai le polokalama atoa.”27
Ia faamanuia i tatou e le Atua e aoao a tatou fanau ma fanau a fanau i le maoae o faamanuiaga o loo faatalitali mai ia te i latou e ala i le ulu atu i le malumalu.28
6
O le faateleina o le auai atu i le malumalu e oo atu ai i le faateleina o faaaliga faaletagata lava ia.
Ou te fai ma a’u masani, soo se taimi ou te faataunuuina ai se faaipoipoga, ou te fautuaina ai le ulugalii talavou ina ia la toe foi atu i le malumalu i se vave la te mafaia ai, ma ia toe o i sauniga o le malumalu o se tane ma se ava. E le mafai ona la malamalama atoa i le uiga o le faaeega paia po o faamauga i le na o se malaga se tasi i le malumalu, ae a o latou asiasi soo mai i le malumalu, o le a faapea ona faamamafaina ai i o latou luga le matagofie, le aano moni, ma le taua o mea uma. Na ou mauaina mulimuli ane ni tusi mai nisi o nei ulugalii talavou e faailoa mai ai le agaga faafetai ona sa faapitoa lava le faamamafaina atu o lena vaega. A o latou saga asiasi atu pea i le malumalu, na matele ina faateleina lo latou alofa mo le tasi ma le isi ma na tele foi ina faamalosia ai o latou faaipoipoga.29
I le faagasologa o a tatou malaga atu i le malumalu, e tuuina mai ia i tatou ni malamalamaaga i le uiga o le malaga e faavavau o le tagata. Tatou te vaaia ni faatusa matagofie ma mataina o mea aupito taua e tutupu—i le taimi ua tuanai, i le taimi nei, ma i le lumanai—ua faatusaina i le misiona a le tagata e faatatau i le Atua. O loo faamanatu mai ai ia i tatou o tatou tiutetauave a o tatou osia faamaoni feagaiga e faatatau i le usiusitai, faapaiaina, ositaulaga, ma auaunaga tuuto i lo tatou Tama Faalelagi.30
Ou te folafola atu ia te outou, o le faateleina o le auai atu i malumalu o lo tatou Atua, o le a outou maua ai le faateleina o faaaliga patino e manuia ai o outou olaga a o outou faamanuiaina i latou o e ua maliliu.31
I totonu o le toafilemu o nei malumalu matagofie, tatou te maua ai i nisi o taimi ia tali i faafitauli ogaoga o le olaga. I lalo o le uunaiga a le Agaga, o nisi taimi e oo mai ai ia i tatou iina le malamalama mamā. O malumalu o nofoaga o faaaliga faaletagata lava ia. I taimi e mamafatu ai se faafitauli po o se mea faigata ia te a’u, ou te alu atu ai i le Maota o le Alii ma se tatalo i lo’u loto mo ni tali. Na oo mai nei tali i auala manino ma tulaga ese.32
Pe o tatou toe foi soo atu ea i le malumalu ina ia maua mai ai faamanuiaga patino ia e oo mai le tapuai soo i le malumalu? E taliina talosaga, e tutupu faaaliga, ma oo mai faatonuga e ala i le Agaga i totonu o malumalu paia o le Alii.33
Talosia ia tatou faia le malumalu o se aiga paia a o tatou o ese mai lo tatou aiga e faavavau.34
Fautuaga mo Suesuega ma le Aoaoina Atu
Fesili
-
Na saunoa Peresitene Benson o se malumalu “o se faailoga lea o mea uma tatou te faapelepele i ai,” ma ia faailoa mai ai nisi o upumoni ua faatusa i ai malumalu (tagai i le vaega 1). O le a se faatusa o malumalu ia te oe?
-
I le vaega 2, e faapefea ona faatatau aoaoga a Peresitene Benson e uiga i faamanuiaga o le perisitua i tagata uma o le aiga? A o e toe iloiloina le vaega lenei, mafaufau loloto i lou faamanuiaga ma lou tiutetauave o le fesoasoani atu i tagata o le aiga e saunia e toe foi atu i le afioaga o le Atua.
-
A o e faitau i le vaega 3, mafaufau loloto i aoaoga a Peresitene Benson e uiga i faamanuiaga tatou te maua e ala mai i sauniga o le malumalu. O a ni auala ua faamanuiaina ai oe e ala i sauniga o le malumalu? Afai e te le’i maua sauniga o le malumalu, mafaufau loloto po o le a se mea e mafai ona e faia e saunia ina ia maua ai.
-
Na saunoa Peresitene Benson, “A ou mafaufau i gafa, ou te vaaia tagata—tagata ou te alofa i ai” (vaega 4). E ono mafai faapefea e lenei manatu ona faaosofia lou faiga o talafaasolopito o aiga? O le a se mea e mafai ona tatou faia e fesoasoani atu ai i o tatou tuaa toatele atu ia maua faamanuiaga o le talalelei?
-
O a nisi o mea e mafai ona tatou faia e fesoasoani ai i tamaiti ma le autalavou ia saunia mo sauniga ma feagaiga o le malumalu? O a ni auala e ono mafai e le autalavou ona tuu atu ai le “ola i le polokalama atoa” o talafaasolopito o aiga? (Tagai i le vaega 5.)
-
Ua uunaia i tatou e Peresitene Benson ia “faia le malumalu o se aiga paia a o tatou o ese mai mai lo tatou aiga e faavavau” (vaega 6). O le a le uiga o le faamatalaga lenei ia te oe? Mafaufau i faamanuiaga ua e maua ina ua e toe foi atu i le malumalu.
Mau Fesootai
Fesoasoani mo le Aoaoina Atu
“E masani lava ona tele atu ia mea e faaaogaina i le lesona nai lo le taimi ua tuuina atu ia te oe. I tulaga faapea, e tatau ona e filifilia na o mea e sili atu ona fesoasoani i tagata o loo e aoaoina” (O Le Aoao Atu, E Leai Se Isi Valaauga E Sili Ai [1999], 106).