Mataupu 6
O Iesu Keriso, Lo Tatou Faaola ma le Togiola
“Tatou te tautino atu le paia o Iesu Keriso. Tatou te vaai atu ia te Ia ona e na o le pau lea o le puna o lo tatou faaolataga.”
Mai le Soifuaga o Ezra Taft Benson
“Ou te le manatua se taimi ou te le’i talitonu ai ia Iesu Keriso,” o le saunoaga lea a Peresitene Ezra Taft Benson. “E foliga mai o le moni o Lona soifuaga, maliu, ma le toetu na avea pea ma se vaega o lo’u olaga. Sa tausia a’u i se aiga e ni matua faatuatua o e na talitonu ma le faamaoni ma molimau mai e uiga ia Keriso, ma o lena mea ou te matuai faafetai ai.”1
O lenei molimau e uiga ia Iesu Keriso sa avea ma faavae o le soifuaga o Peresitene Benson. Na mamanuina ai mea na ia faamuamuaina, taiala ai ana faaiuga, ma fesoasoani ia te ia i ona tofotofoga. Na tuuina atu ai se vaaiga i le faamoemoega o le olaga faaletino ma le talitonuga maumaututu i folafolaga ma faamanuiaga o le ola e faavavau.
I le taimi o lana galuega faaaposetolo i le avea ai ma se molimau faapitoa o Iesu Keriso, sa masani ona molimau atu Peresitene Benson e uiga i le Faaola. I le faailoaina atu e faapea “o le fesili e fesiligia i nisi o taimi o le, ‘Pe o Mamona o ni Kerisiano?’” sa ia molimau atu ai:
“Matou te tautino atu le paia o Iesu Keriso. Matou te vaai atu ia te Ia ona e na o le pau lea o le puna o lo tatou faaolataga. Matou te taumafai e ola i Ana aoaoga, ma matou te tepa taulai atu i le taimi o le a toe afio mai ai o Ia i lenei lalolagi e pule ma nofotupu o le Tupu o Tupu ma Alii o Alii. I upu a se perofeta o le Tusi a Mamona, matou te faapea atu ai … , ‘[E] leai se isi igoa e tuuina mai po o se isi lava ala po o ni auala e mafai ona oo mai ai le faaolataga i le fanauga a tagata, ua na’o i le suafa lava ma ala i le suafa lava o Keriso, le Alii Mamana Aoao’ (Mosaea 3:17).”2
O le folafolaga a Peresitene Benson e uiga i le Paia o Iesu Keriso sa tele lava ina fesootai i le Tusi a Mamona.3 Fai mai a ia, “E ala mai i le Tusi a Mamona, ua tuuina mai ai e le Atua mo o tatou aso se faamaoniga vaaia o Iesu o le Keriso.”4 Na ia aoao mai, o le “misiona autu” lava o le Tusi a Mamona o le faatalitonuina o tagata i lenei upumoni.5 Sa ia ta’ua, “E silia ma le afa o fuaiupu uma o le Tusi a Mamona e faatatau atu i lo tatou Alii.” “E sili atu i le 100 suafa eseese ua taua ai o ia i le Tusi a Mamona. E i ai se uiga taua faapitoa o Lona natura paia, ua faamatala mai i ia igoa taitasi.”6
O le molimau a Peresitene Benson e uiga i le Faaola na faaalia ai le vavalalata patino sa ia lagonaina ia te Ia:
“Ou te alofa ia te Ia ma lo’u agaga atoa.
“Ou te molimau faamaualalo atu, o Ia lava o le Alii agaalofa ma agalelei i le asō e pei ona sa Ia femaliuai ai i auala pefua o Palesitina. E latatala o Ia i Ana auauna o i lenei lalolagi. E manatu popole ma alofa o Ia ia i tatou taitoatasi i aso nei. Ia mafai ona e mautinoaina lena mea.
“O loo soifua o Ia i le asō o lo tatou Alii, o lo tatou Matai, o lo tatou Faaola, o lo tatou Togiola, ma o lo tatou Atua.
“Ia faamanuia i tatou uma e le Atua ina ia tatou talitonu ia te Ia, ia talia o Ia, ia tapuai atu ia te Ia, ia talitonuina atoa o Ia, ma ia mulimuli ia te Ia.”7
“E leai se mea na tupu e sili atu ona taua i tagata taitoatasi po o atunuu nai lo o le toetu o le Matai.”
Aoaoga a Ezra Taft Benson
1
Ona o Lona alofa e le mavae mo i tatou, na togiolaina ai e Iesu Keriso i tatou mai le oti faaletino ma le oti faaleagaga.
E leai lava se isi faatosinaga e tasi ua i ai se aafiaga sili ona maoae i luga o lenei fogaeleele nai lo o le soifuaga o Iesu le Keriso. E le mafai ona tatou vaai faalemafaufau i o tatou olaga e aunoa ma Ana aoaoga. A aunoa ma Ia o le a tatou fenumia’i i talitonuga sese ma tapuaiga e faavaeina i le mata’u ma le pouliuli, lea ua puleaina e mea faaletino ma mea o le lalolagi. E le’i taitai ona ausia la tatou sini ua Ia faatuina mo i tatou, ae e le tatau lava ona faatuatuanai ia i tatou, pe tatou te faagaloina foi o la tatou malaga tele e agai atu i le malamalama, agai atu i le atoatoa, o le a le mafai ona faataunuuina sei vagana ai o Ana aoaoga, Lona soifua, Lona maliu, ma Lona toetu.8
Ina ia i ai se fuataga o le talisapaiaina ma le loto faafetai mo le mea ua ausiaina e [Iesu Keriso] na fai ai ma o tatou sui, e ao ona tatou manatua ia upumoni taua nei:
Na afio mai Iesu i le lalolagi e fai le finagalo o lo tatou Tama.
Na maliu mai o Ia ma se muai silafia o le a Ia tauaveina le avega mamafa o agasala a i tatou uma.
Na Ia silafia o le a siia’e o ia i luga o le satauro.
Na soifua mai o Ia e avea ma Faaola ma Togiola o tagata uma.
Sa mafai e Ia ona faataunuu Lana misiona aua o Ia o le Alo o le Atua ma sa ia te Ia le mana o le Atua.
Sa naunau o Ia e faataunuu Lana misiona ona e alofa o Ia ia i tatou.
E leai se tagata ola na i ai le mana po o le malosi e togiola ai isi tagata mai lo latou tulaga pa’ū ma le se ese, pe mafai foi ona ofo fua atu lona lava ola ma faapea e faataunuu ai le toetutu atoa mo isi tagata uma.
E na’o Iesu Keriso lava sa mafaia ma naunau ia ausia se faatinoga faaola faapena o le alofa.9
Na afio mai Iesu Keriso … i lenei lalolagi i se taimi na muai-atofaina e ala i se tofi tautupu lea na faapea ona faasaosaoina ai Lona tulaga faaleatua. Na i ai faatasi i Ona natura ia uiga faaletagata o Lona tina i la le tino ma ni uiga paia ma mana o Lona Tama Faavavau.
O Lona tofi tulaga ese na avea ai o Ia ma suli o le faalagiga mamalu—O Le Alo Pele e Toatasi na Fanaua e le Atua i la le tino. I le avea ai ma Alo o le Atua, na Ia mauaina ai mana ma le poto lea e le’i i ai lava i se tagata muamua pe talu mai lena taimi. O Ia moni lava o Emanuelu, o lona uiga “Ua ia te i tatou le Atua.” (Tagai i le Isaia 7:14; Mataio 1:23.)
E ui lava ona o Ia o le Alo o le Atua na auina mai i le lalolagi, ae o le fuafuaga paia a le Tama na tatau ai ona oo Iesu i faigata ma tofotofoga uma o le olaga nei. O le mea lea, na oo ai o Ia i “faaosoosoga, … fia ‘ai, fia inu, ma le lailoa.” (Mosaea 3:7.)
Ina ia agavaa e fai ma Togiola o fanau uma a lo tatou Tama Faalelagi, na tatau ai ia Iesu ona usiusitai atoatoa i tulafono uma a le Atua. Talu ai o Lona gauai atu o Ia lava i le finagalo o le Tama, sa tuputupu a’e ai o Ia “mai lea alofa tunoa i lea alofa tunoa, seia oo ina ona mauaina le atoatoaga” o le mana o le Tama. O lea sa ia te Ia ai “le mana atoa, i le lagi ma i le lalolagi.” (MF&F 93:13, 17.)10
Talu ai o [Iesu] o le Atua—o le Alo lava o le Atua—e mafai ai ona Ia tauaveina le mamafa ma avega o agasala a isi tagata i Ona lava luga. Na vavalo Isaia i upu nei [e uiga] i le naunautai o lo tatou Faaola e fai lenei mea: “E moni ua na tauave o tatou tiga, ma na tauave o tatou faanoanoa: … A ua manu’a o ia ona o a tatou solitulafono, ua momomo o ia ona o a tatou amioleaga: o le aoaiga e filemu ai tatou sa i ona luga lea; o ona faalavalava foi ua malolo ai tatou.” (Isaia 53:4–5.)
O lena faatinoga paia, ma le le manatu faapito o le ofo atu e tauave i Ona luga agasala a isi tagata uma, o le Togiola lea. O le mafai e le Tasi ona tauave agasala mo tagata uma e le mafai ona malamalama i ai le tagata soifua. Ae o le mea lenei ua ou iloa: Sa Ia tauave i Ona luga agasala a tagata uma, ma sa faia ona o Lona alofa e le iu mo i tatou uma taitoatasi. Na fetalai o Ia: “Aua faauta, o A’u o le Atua, na mafatia i nei mea mo tagata uma, ina ia latou le mafatia pe afai latou te salamo; … o le mafatia lea na oo ai ia te a’u lava, o le Atua lava lea, o lē ua silisili i tagata uma, le gatete ona o le tiga, ma tafe toto ai i pu afu uma, ma mafatia ai i le tino atoa ma le agaga —ma manao ai ia Ou le inuina le ipu oona, ma ma’e’e’e.” (MF&F 19:16,18.)
E ui lava i lena aafiaga matuitui, ae sa Ia aveina le ipu ma inu. Sa mafatia o ia i tiga o tagata uma ina ia tatou le mafatia. Sa Ia onosaia le faalumaina ma taufaifaiga a e na faasalaina o Ia e aunoa ma se faitio pe tetee atu i ai. Sa ia onosaia le sasaina i ta ma sosoo ai ma le faalumaina i le fasiotiga matuia—[i luga] o le satauro.11
I Ketesemane ma i luga o Kalevario, sa faatino ai e [Iesu] le togiola e le i’u ma faavavau. O le faatinoga silisili lea e tasi o le alofa i le talafaasolopito atoa. Ona sosoo ai lea ma Lona maliu ma le toetu mai.
O lea na avea ai o Ia ma o tatou Togiola—ua togiolaina i tatou uma mai le oti faaletino, ma faaolaina foi i tatou mai le oti faaleagaga, o e o le a usitai i tulafono ma sauniga o le talalelei.12
Atonu o le a le mafai ona tatou malamalama pe iloa i le olaga nei pe na faapefea ona Ia ausiaina le mea na Ia faia, ae e le tatau ona tatou le malamalama pe aisea na Ia faia ai le mea na Ia faia.
O mea uma na Ia faia sa faaosofia e Lona alofa lē manatu faapito, ma lē i’u mo i tatou.13
“E leai lava se isi faatosinaga e tasi ua i ai se aafiaga sili ona maoae i luga o lenei fogaeleele nai lo o le soifuaga o Iesu le Keriso.”
2
Na toetu ae Iesu Keriso mai le tuugamau, ma o loo soifua nei o Ia i aso nei o se tagata toetu.
O mea aupito maoae na tutupu i le talafaasolopito, o mea ia e aafia ai le anoanoai o tagata mo ni vaitaimi aupito umi. O le tulaga la lenei, e leai se mea na tupu e sili atu ona taua i tagata taitoatasi po o atunuu nai lo o le toetu o le Matai.
O le toetutu moni o tagata uma o e na soifua ma maliliu i luga o le fogaeleele o se mea mautinoa lea, ma e moni lava, e tatau i se tagata ona faia ni tapenapenaga mae’ae’a mo lenei mea. O se toetu faamamaluina e tatau ona avea ma sini a alii ma tamaitai uma, aua o le toetu o le a avea ma se mea moni lava.
E leai se mea e sili atu ona faatapulaaina lona aoaotetele nai lo le toetu. O mea ola uma o le a toetutu. “Aua faapei ona oti uma ia Atamu, e faapea foi ona faaolaina uma ia Keriso.” (1 Korinito 15:22.)
Ua ta’u mai e tusitusiga paia e faapea, o le aso lona tolu ina ua mavae le faasatauroga o Iesu, sa i ai se mafuie tele. Sa toe taavale ese ai le maa mai le gutu o le tuugamau. O nisi o tamaitai, o nisi ia o Ona soo aupito tuuto, na o atu i le nofoaga ma mea faamanogi “ae le’i iloa le tino o le Alii o Iesu.”
Sa faaali ifo ni agelu ma faapea mai, “Se a le mea tou te saili ai lē ua soifua i e ua oti? E le o iinei o ia, a ua tu. (Luka 24:3–6.) E leai se mea i le talafaasolopito e tutusa ma lena faasilasilaga mataina: “E le o inei o ia, a ua tu.”
O le mea moni e uiga i le toetu mai o lo tatou Alii ua faavae lea i mau o le toatele o molimau faatuatuaina. Sa faaali atu le Alii toetu i ni isi o tamaitai, i soo e toalua i le ala i Emau, ia Peteru, i Aposetolo; ma “ina ua mavae lena,” e pei ona lipotia mai e Paulo, “ona toe iloa lea o ia e le au uso e lima selau ma ona tupu ina ua faatasi. … E mulimuli lava ona iloa ai e [Paulo foi].” (1 Korinito 15:6, 8.)…
I le avea ai ma se tasi o Ana molimau i aso e gata ai, ou te molimau atu o loo soifua o Ia i le asō. O Ia o se Tagata toetu. O Ia o lo tatou Faaola, lo tatou Alii, o le Alo lava o le Atua. Ou te molimau atu o le a toe afio mai o Ia o lo tatou Alii toetu mamalu. E le o toe mamao lena aso. Ia i latou uma o e talia o Ia o le Faaola ma le Alii, o le uiga o Lona toetu moni e faapea e le muta le olaga i le oti, aua na Ia folafola mai: “Ou te ola a’u, o le mea lea e ola ai outou.” (Ioane 14:19.)14
Ua na o Ia lava na i ai le mana o le toetu. Ma o lea la, i le aso tolu ina ua mavae Lona tanuga, sa toetu a’e o Ia mai le tuugamau ua soifua ma faaali atu o Ia lava i le toatele. … I le avea ai ma se tasi o [Ana] molimau faapitoa ua valaauina i lenei vaitaimi, ou te molimau atu ia te outou o loo soifua o Ia. O loo soifua o Ia ma se tino toetu. E leai se upumoni po o se mea moni ua sili atu ona ou mautinoaina pe sili atu ona ou talitonu i ai nai lo le upumoni o le toetu moni o lo tatou Alii.15
3
E tatau ona tatou totoa i la tatou molimau ia Iesu Keriso.
O se faamanuiaga aupito sili ona lē mafaatauina ua avanoa mo tagata uma o le Ekalesia, o se molimau lea o le paia o Iesu Keriso ma Lana ekalesia. O se molimau o se tasi lea o nai meatotino e mafai ona tatou aveina ma i tatou pe a tatou tuua lenei olaga.
O le maua o se molimau ia Iesu, o le mauaina lea o se malamalama e ala mai i le Agaga Paia e uiga i le paia o le misiona a Iesu Keriso.
O se molimau ia Iesu o le iloa lea o le natura paia o le soifua mai o lo tatou Alii—ma o Ia moni o le Alo e Toatasi na Fanaua i la le tino.
O se molimau ia Iesu o le iloaina lea o Ia o le Mesia na folafolaina ma a o soifua ai o Ia faatasi ma tagata sa Ia faia le tele o vavega tetele.
O se molimau ia Iesu o le iloaina lea o tulafono na Ia faatulagaina e fai ma Ana aoaoga faavae e moni, ona ola ai lea e tusa ma nei tulafono ma sauniga.
Ina ia maua se molimau ia Iesu o le iloaina lea sa Ia ofo fua mai e tauave i Ona luga agasala a tagata ola uma i le Faatoaga o Ketesemane, lea na mafua ai ona mafatia o Ia i le tino ma le agaga ma tafe toto ai i pu afu uma. O nei mea uma na Ia faia ina ia tatou le mafatia pe afai tatou te salamo. (Tagai MF&F 19:16,18.)
Ina ia maua se molimau ia Iesu, o le iloaina lea toetu manumalo ae o Ia mai le tuugamau ma se tino faaletino toetu. Ma ona o loo soifua o Ia, o le a faapena ai foi tagata uma.
Ina ia maua se molimau ia Iesu, o le iloaina lea na faaali moni mai le Atua le Tama ma Iesu Keriso i le Perofeta o Iosefa Samita, ina ia faavae se tisipenisione fou o Lana talalelei ina ia mafai ona talai atu le faaolataga i malo uma a o le’i afio mai o Ia.
Ina ia maua se molimau ia Iesu, o le iloaina lea o le Ekalesia, lea na Ia faatuina i le vaeluaga o taimi ma toefuatai mai i aso nei, e pei ona folafola mai e le Alii, “o le ekalesia moni ma ola e tasi i luga o le lalolagi atoa.” (MF&F 1:30.)
O le mauaina o se molimau faapena e taua tele. Ae e sili atu le taua o le lototoa i la tatou molimau.
O se molimau ia Iesu o lona uiga, ua tatou taliaina le misiona paia a Iesu Keriso, talia Lana talalelei, ma fai Ana galuega. O lona uiga foi, ua tatou taliaina le misiona faaperofeta a Iosefa Samita ma i latou e sosoo atu ma ia ma mulimuli i a latou fautuaga. E pei ona fetalai Iesu, “Pe i lo’u lava leo po o i le leo o a’u auauna, ua tutusa lava.” (MF&F 1:38.)
I lana fetalaiga e uiga ia i latou o e o le a iu ina maua faamanuiaga o le malo selesitila, na fetalai mai ai le Alii ia Iosefa Samita:
“O i latou ia o i latou o e na taliaina le molimau ia Iesu, ma talitonu i lona suafa ma papatiso e tusa ma le ala o lona tanuga, i le tanumia lea i totonu o le vai i lona suafa, ma e tusa lenei ma le poloaiga na tuuina mai e ia.” (MF&F 76:51.)
O i latou nei o e e totoa i a latou molimau ia Iesu, o e, e pei ona folafola mai e le Alii, “e manumalo e ala i le faatuatua, ma ua faamauina e le Agaga Paia o le folafolaga, lea e liligi mai e le Tama i luga o i latou uma o e amiotonu ma faamaoni.” (MF&F 76:53.)16
4
O le faatuatua ia Iesu Keriso e aafia ai le faalagolago atoa atu ia te Ia ma mulimuli i Ana aoaoga.
O le mataupu faavae autu o la tatou tapuaiga o le faatuatua i le Alii o Iesu Keriso. Aisea e taua ai le faatotonugalemu o lo tatou talitonuga, lo tatou faamoemoe, ma lo tatou faalagolago i se tagata e toatasi? Aisea e matuai manaomia ai le faatuatua ia te Ia i le filemu o le mafaufau i lenei olaga ma le faamoemoe i le olaga a sau?
O a tatou tali i nei fesili e iloa ai pe o tatou faafetaia’ia le lumanai ma le lototele, faamoemoe, ma le manatu o le a lelei mea uma, pe o le le mautonu, popole, ma le manatu o le a le lelei mea uma.
O la’u savali ma la’u molimau o lenei: E na o Iesu Keriso lava ua tulaga ese le agavaa e tuuina mai lena faamoemoe, lena mautinoa, ma lena malosi tatou te manaomia e faatoilalo ai le lalolagi ma manumalo ai i o tatou vaivaiga faaletagata. Ina ia faia lena mea, e tatau ona tuu atu lo tatou faatuatua ia te Ia ma ola i Ana tulafono ma aoaoga. …
O le faatuatua ia te Ia e sili atu nai lo le tau na ona faailoa atu o loo soifua o Ia. E sili atu nai lo le ta’uta’u atu o le talitonuga.
O le faatuatua ia Iesu Keriso e aofia ai le faalagolago atoa atu ia te Ia. I le avea ai ma Atua, ua ia te Ia le mana, poto, ma le alofa e le i’u. E leai se faafitauli faaletagata e le mafai ona Ia le foiaina. Ona sa alu ifo maualalo o Ia i mea uma (tagai MF&F 122:8), ua Ia silafia ai le ala e toe tulai a’e ai mai i o tatou faafitauli o aso uma.
O le faatuatua ia te Ia o lona uiga o le talitonu e ui lava ina tatou le malamalama i mea uma, ae ua silafia e Ia. O le mea lea, e tatau ai ona tatou vaai atu ia te Ia “i mafaufauga uma; aua le masalosalo, aua le fefefe.” (MF&F 6:36.)
O le faatuatua ia te Ia o lona uiga o le faatuatuaina lea ua ia te Ia le mana uma i tagata uma ma malo uma. E leai se amioleaga e le mafai ona Ia le taofia. Ua i Ona aao mea uma. O le lalolagi lenei o Lona malo moni lea. Ae na te faatagaina le tiapolo ina ia mafai ona tatou faia ai filifiliga i le va o le lelei ma le leaga.
O Lana talalelei o le vaifofō tonu lava lea o faafitauli uma o tagata ma faaletonu o malo.
Ae na o le pau le auala e aoga lelei ai Lana talalelei pe afai lena tatou te faaaogaina i o tatou olaga. O le mea lea, e tatau ai ona tatou, “taumamafa fiafia i afioga a Keriso; aua faauta, o afioga a Keriso o le a ta’u mai ai ia te [tatou] mea uma e tatau ona [tatou] faia.” (2 Ni. 32:3.)
Tatou te le faaali atua le faatuatua ia te Ia, sei vagana ai ua tatou ola i Ana aoaoga.
Mafaufau i le ese o se lalolagi o le a i ai pe a na faapea o le a faia e tagata uma mea e pei ona Ia fetalai mai: “E te alofa atu i le Alii lou Atua ma lou loto atoa, ma lou agaga atoa, ma lou manatu atoa. … E te alofa atu i lē lua te tuaoi, ia pei o oe lava ia te oe.” (Mata. 22:37, 39.)
O le a la le tali i le fesili “O le a se mea e fai e uiga i faafitauli ma faigata o loo feagai ma tagata taitoatasi, o nuu, ma malo i aso nei?” O Lana vaifofo faigofie lenei:
“Ia talitonu i le Atua; ia talitonu o loo soifua o ia, ma o ia na foafoaina mea uma, i le lagi ma le lalolagi; ia talitonu ua ia te ia le poto uma, ma le mana uma, i le lagi ma le lalolagi; ia talitonu e lē mafai e le tagata ona malamalama i mea uma e mafai ona malamalama i ai le Alii. …
“Ia talitonu e ao ina outou salamo ia outou agasala ma lafoai i ai, ma outou faamaualalo outou lava i luma o le Atua; ma ole atu ma le faamaoni o le loto ia faamagaloina e ia outou; ma o lenei, afai tou te talitonu i nei mea uma, vaai ia outou faia.” (Mosaea 4:9–10; faaopoopo le faatusilima.)17
“Ina mulimuli mai ia ia te a’u” (Mareko 1:17).
5
E sili ona tatou manuia ma olioli pe a tatou taumafai ia avea faapei o Iesu Keriso.
O se tasi o faamoemoega o lenei olaga o le tofotofoina lea o i tatou e vaai pe o le a tatou “faia mea uma e poloaiina ai i tatou e le Alii” lo tatou Atua. (Aper. 3:25.) O le faapuupuuga, e ao ona tatou aoao i le finagalo o le Alii ona fai lea. E ao ona tatou mulimuli i le faataitaiga a Iesu Keriso ma avea e faapei o Ia.
O le fesili taua o le olaga e tatau ona tutusa lava ma le fesili lea sa tuuina atu e Paulo: “Le Alii e, se a le mea e te finagalo i ai ou te faia?” (Galuega 9:6.) …
Tatou te manaomia nisi alii ma tamaitai o Keriso o e o le a manatuaina pea o Ia, o e o le a tausia Ana poloaiga ia ua Ia tuuina mai ia i latou. O le fuataga sili lava o le faamanuiaina o le vaai lea po o le a le latalata e mafai ai ona tatou savavali i taimi taitasi i Ona tulaga aao.18
O nisi… ua naunau lava e feoti mo lo latou faatuatuaga, ae latou te le naunau e ola atoatoa mo lena faatuatuaga. Na soifua ma maliu Keriso mo i tatou. E ala atu i Lana togiola ma e ala i le savavali i Ona tulaga aao, e mafai ai ona tatou maua le meaalofa silisili o meaalofa uma lava—o le ola e faavavau, o le ituaiga soifuaga lea o le Tagata silisili e Faavavau—lo tatou Tama o i le Lagi.
Na fesili Keriso i le fesili e faapea, “O a ituaiga o tagata e tatau ona [tatou] i ai?” Ona Ia tali lea i le fetalai mai, e tatau ona tatou faapei o Ia. (3 Ni.27:27.)
O lena [tagata] e aupito maoae ma sili ona faamanuiaina ma fiafia, o lona soifuaga e aupito sili ona latalata atu i le mamanu a le Keriso.E leai se mea e faia e lenei tulaga i le tamaoaiga faalelalolagi, malosi, po o mamalu. Na o le pau le suega moni o le tulaga silisili, faamanuiaina, ma le fiafia, o le, pe faape’i le latalata e mafai ona oo atu i ai se olaga o se tagata ia faapei o le Matai, o Iesu Keriso. O Ia o le ala sa’o, o le upumoni atoatoa, ma le ola faamanuiaina.
O le fesili faifaipea ma e sili ona fesiligia soo i o tatou mafaufau, lea e aafia ai mea uma tatou te mafaufau ma faia i o tatou olaga, e tatau ona faapenei, “Le Alii e, se a le mea e te finagalo i ai ou te faia?” (Galuega 9:6.) Na pau le ala e oo mai ai le tali i lena fesili, e ala lea i le Malamalama o Keriso ma le Agaga Paia. E manuia i latou o e o ola ina ia faatumulia o latou tagata i na malamalama uma e lua. …
A mafaufau atu i mea uma ua faia ma o loo faia e [Iesu Keriso] mo i tatou, e i ai se mea e mafai ona tatou toe faafoi atu ia te Ia.
O le meaalofa silisili a Keriso ia i tatou o Lona soifua lea ma le taulaga. Pe le tatau ea ona avea foi na mea ma a tatou meaalofa faatauvaa mo Ia—o tatou ola ma osigataulaga, e le gata i le taimi nei ae faapea foi i le lumanai?19
[O i latou o e o loo] taitaia e Keriso o le a avea ma se vaega o Keriso. O o latou loto e tusa lea ma Lona finagalo. (Tagai Ioane 5:30.) Latou te faia pea lava o mea e lelei i le Alii. (Tagai Ioane 8:29.) E le gata o le a latou oti mo le Alii, ae o le mea e sili atu le taua latou te mananao e ola mo Ia.
E te ulu atu i o latou fale, ma o ata i luga o o latou puipui, o tusi i luga o o latou fatatusi, o musika e faalogoina, o a latou upu ma gaoioiga ua faaalia mai ai o i latou o ni Kerisiano. Latou te tutu o ni molimau a le Atua i taimi uma ma i mea uma, ma i nofoaga uma. (Tagai Mosaea 18:9.) E i ai Keriso i o latou mafaufau, a o latou vaai atu ia te Ia i mafaufauga uma. (Tagai MF&F 6:36.) E i ai Keriso i o latou loto a o tuuina o latou alofaaga ia te Ia e faavavau. (Tagai Alema 37:36).
Toeitiiti lava o vaiaso uma latou te aai ai ma feinu i le faamanatuga ma faafouina se molimau i lo latou Tama Faavavau o le a latou naunau e tauave i o latou luga le suafa o Lona Alo, manatua pea o Ia, ma tausi Ana poloaiga. (Tagai Moronae 4:3.)
I le gagana o le Tusi a Mamona, latou te “taumamafa i afioga a Keriso” (2 Ni. 32:3), “tautalatala e uiga ia Keriso” (2 Ni. 25:26), “olioli ia Keriso” (2 Ni. 25:26), “ua faaolaina [i latou] ia Keriso” (2 Ni. 25:25), ma “olioli i [lo latou] Iesu” (tagai 2 Ni. 33:6). I se faapuupuuga, e faamaumau i latou lava i le Alii ma maua ai le ola e faavavau. (Tagai Luka 17:33.)20
Fautuaga mo Suesuega ma le Aoaoina Atu
Fesili
-
Na aoao mai Peresitene Benson e faapea, e ui ina tatou le malamalama atoa pe na faapefea ona faataunuuina e le Faaola le Togiola, ae e mafai ona tatou malamalama pe aisea na Ia faia ai (tagai i le vaega 1). O a ni auala ua uunaia ai e lenei malamalama lou olaga?
-
A o e suesue i le vaega 2, mafaufau i le aafiaga o le Toetu o le Faaola. E faapefea ona uunaia e Lona Toetu lou olaga?
-
Aisea e te manatu ai o se molimau ia Iesu Keriso o se “faamanuiaga aupito sili ona le mafaatauina”? (Tagai vaega 3.) O le a le uiga ia te oe ia toa i lau molimau e uiga i le Faaola?
-
Mafaufau loloto i upu a Peresitene Benson e uiga i le faatuatua ia Iesu Keriso (tagai i le vaega 4). O a ni auala e loloto atu ai le faamatalaga lenei e uiga i le faatuatua ia Keriso nai lo le “tau na ona faailoa atu o loo soifua o Ia”?
-
Na saunoa Peresitene Benson e faapea, o tagata o e o loo “taitaia e Keriso” ua naunau e “oti mo le Alii, ae, o le mea e sili atu le taua, latou te mananao e ola mo Ia” (vaega 5). O le a le uiga ia te oe o le ola mo le Faaola?
Mau Fesootai
Ioane 10:17–18; 2 Nifae 9:20–24; 31:20–21; Mosaea 16:6–11; 3 Nifae 27:20–22; Moronae 7:33; MF&F 19:1–3, 16–19; 76:22–24; Mataupu Faavae o le Faatuatua 1:3
Fesoasoani mo Suesuega
“A o e lagonaina le olioli lea e maua mai le malamalama i le talalelei, o le a e manao e faaaoga mea na e aoaoina. Ia taumafai ina ia e ola e tusa ai ma lou malamalama. O le faia ai faapea o le a faamalosia ai lou faatuatua, malamalama, ma le molimau” (Tala’i La’u Talalelei [2004], 19).