Mataupu 15
O Valaauga Paia o Tamā ma Tina
“Tau ina ia tatou faamaoni i lenei matafaioi sili o le tulaga faamatua, i lenei matafaioi paia.”
Mai le Soifuaga o Ezra Taft Benson
Na aoao atu e Peresitene Ezra Taft Benson e ala i upu ma faataitaiga, i le aiga ma le lalolagi atoa, i tulaga faaleEkalesia ma tulaga faalemalo, le taua o le avea ma ni matua lelei. “Ia faafailele lau fanau i le alofa ma a’oaiga a le Alii,” na ia saunoa mai ai.1 “E faamasinoina e le Atua ia matua mo lo latou tiute faatausimea i le tausiga o o latou aiga. O se tiutetauave e sili ona paia.2
Sa galulue vavalalata Peresitene Benson ma lona faletua o Flora i le faataunuuina o o la tiutetauave paia o ni matua. Sa la “faatinoina le galuega o le faafaileleina o lo latou iunite faaleaiga i le malosi ma le naunautai.”3 Sa la fefautuaai faatasi e uiga i le la fanau ma isi mataupu. Na saunoa Peresitene Benson, “Ua mafai ona ou iloa na i ai i o’u tafatafa se tamaitai sa mataala faaleagaga.”4
Sa laua galulue faatasi e fatua’i se aiga e mafai ai e a laua fanau ona tutupu ae ai ma aoao—ma se nofoaga na mananao le le fanau ia i ai. “E sili atu ia te a’u lo’u i ai i le fale nai lo o se isi lava nofoaga,” o le tala lea a le la atalii o Mareko. “Sa o se sulufaiga mai afa. O Tina sa fai ma malutaga, ae o Tama sa i ai iina ma lona malosi.”5
Sa faatinoina ma le agaga tatalo e Peresitene ma Tuafafine Benson o laua tiutetauave o ni matua. Na fai mai Mareko: “O Tina sa matuai tele atu lona faatuatua nai lo o se isi lava tamaitai ua ou iloaina. … Ou te le’i vaai lava i ni tatalo ua tele i lo’u olaga. E vave lava ona alu ifo o ia i ona tulivae, e tatalo mo lana fanau, pe o se suega po o se fusuaga i lotoa o le aoga, sa le’i afaina lea. Sa i ai ia i laua ma Tama lena faatuatua faatauvaa.”6
Sa masani ona aluese Peresitene Benson mai le aiga ona o lana galuega ma ona tiute o le Ekalesia, o lea na faia ai e Flora le tele o tiutetauave mo le faafaileleina ma le aoaoina o o la alo e toaono. Na fiafia o ia i lona tiute o le avea ma se tina. “O le aiga o le totonugalemu lea o o matou lagona alofa loloto,” o lana tala lea.7 Na faamatala e Mareko, “Sa matuai fiafia lava tina i le aiga. Ma sa ia alofa ia i matou—e le faapea ona o lona tiute lea, ae ona o lona olaga lena.”8 O le faailoa mai o ona lagona e uiga i le taua o le avea ma se tina, sa tusia ai e Flora: “Afai e te fia sueina le tulaga silisili, aua e te sailia i le nofoalii [o se tupu], ae su’e atu i le moega pepe [le nofoaga e faafailele ai e tina olaga]. O loo i ai se mana malosi i se tina. O ia lea e mamanuina loto, olaga, ma uiga faaletagata.”9
A aluese Peresitene Benson mai le aiga, na te sailia i taimi uma ni auala e leoleo ai ma faamalosia lona aiga. Na te faatumauina ni fesootaiga masani ma i latou e ala i le valaau i le telefoni ma tusi. Ma a i ai o ia i le fale, na te faaaluina se taimi ma i latou i le tele e mafai ai. Sa masani ona ia ta’ua le tala i se “tamā pisi na faamatalaina le mafuaaga na ia faaaluina ai ni itula se tele e taaalo ai ma lona atalii i le faapea atu, ‘E sili atu lo’u maua o se tua tiga i le taimi lenei nai lo o le loto tiga i se taimi mulimuli ane.’”10
Ezra Taft Benson ma ona atalii o Reed ma Mareko
Sa ia faaaluina foi ni taimi uumi e mafuta taitoatasi ai ma lana fanau. Na manatua e Mareko le aveina o ia e lona tama i le Aai o Sate Leki, Iuta, e vaai se fomai faapitoa: “Oka se fiafia o le faatasi ai ma Tama, na o ia lava ma a’u! Sa ma talanoa i soo se mea lava na ou fia talanoa ai. E oo lava i aso a’o o’u laitiiti, na ou iloa lava na alofa Tama ia te a’u, aua sa i ai o ia faatasi ma a’u ma sa fesoasoani mai ia ou toe malosi.”11
I taimi sa saofia ai, sa alu ai Peresitene Benson ma ave lana fanau i ana malaga. Ia Mati 1948 sa alu ai ma ave lona afafine o Bonnie, o le taimi lena a o fitu ona tausaga, i se fonotaga taufaatoaga i Nebraska. “Sa matuai fiafia tagata faasalalau i le tamalii o le teineitiiti laitiiti, ma le faataitaiga e le masani ai a se tamā i le aumaiga o se teineitiiti laitiiti faapea i se malaga umi ina ia auai i se faatasiga iloga, o lea na faasalalauina ai i le itulau pito i luma [o le nusipepa] se ata o Bonnie i le taeao na sosoo ai. Peitai, ia Elder Benson o le mea na tupu sa le o se mea e le masani ai. Sa masani ona alu ma ave lana fanau i malaga e o ese ai mai lo latou afioaga, ina ia avea ma auala e faamausali ai sootaga lelei ma ia aoao ai i latou.”12
Aoaoga a Ezra Taft Benson
1
O le valaauga o se tamā, e faavavau.
Tamā, o lou valaauga o se valaauga e faavavau, lea e le mafai ona faamaloloina ai oe. O valaauga i totonu o le Ekalesia, e ui lava i lo latou taua, ae o lo latou natura moni e mo na o se vaitaimi lava, ia ona faia ai foi lea o se faamalologa e tatau ai. Ae o le valaauga o se tama e faavavau, ma o lona taua e le noatia i se taimi. O se valaauga mo le taimi nei ma le faavavau.13
O le tatou mamanu, po o le faataitaiga mo le tulaga faatamā o lo tatou Tama Faalelagi lea. E faapefea ona galue o Ia faatasi ma Lana fanau? Ia, ina ia mafai ona iloa lena mea, e tatau i [tamā] ona iloaina se mea e uiga i le talalelei, le fuafuaga sili a le Alii.14
Mo se alii, e leai se valaauga e maualuga atu nai lo o se peteriaka amiotonu, faaipoipoina i le maota o le Alii, ma pulefaamalumalu i Lana fanau. E oo lava foi ia Elohima, na faatonuina i tatou e ta’u o Ia o “lo tatou Tama o i le lagi” (Mataio 6:9; 3 Nifae 13:9).15
2
E ao i tama ona tuuina atu le taitaiga faaleagaga i o latou aiga.
E tatau i le tama ona matelaina ma galala ma naunau atu e faamanuia lona aiga, ma alu atu i le Alii, mafaufau loloto i afioga a le Alii, ma ola e ala i le Agaga ina ia iloa ai le mafaufau ma le finagalo o le Alii, ma mea e tatau ona ia faia e taitai ai lona aiga.16
[Tamā,] ua ia te outou se tiutetauave paia e tuuina atu le taitaiga faaleagaga i lou aiga.
I se tamaitusi na lolomiina i ni tausaga ua mavae e le Aufono a le Toasefululua, sa matou fai atu ai i le mea lenei: “O le tulaga faatama o le tulaga faaletaitai lea, o le ituaiga tulaga faaletaitai lea e sili atu ona taua. O le mea lava lena sa i ai; ma o le a i ai pea lava e le aunoa. Tama, faatasi ai ma le lagolagosua ma fautuaga ma faamalosiauga a lau soa e faavavau, e te pulefaamalumalu ai i totonu o le aiga” (Father, Consider Your Ways [pamphlet, 1973], 4–5). …
Faatasi ai ma le alofa i lo’u loto mo tama i Isaraelu, ou te fia fautuaina atu ai ni auala patino se 10 e mafai ona tuuina atu ai e tama le taitaiga faaleagaga i a latou fanau:
1. Tuu atu ni faamanuiaga faaletama i lau fanau. Papatiso ma faamau lau fanau. Faauu ou atalii i le perisitua. O mea nei o le a avea ma faatumutumuga faaleagaga i olaga o lau fanau.
2. Ia e taitaiina e oe lava ia tatalo faaleaiga, faitauina o tusitusiga paia i aso uma, ma afiafi faaleaiga i vaiaso taitasi. O lou i ai patino o le a faaali atu ai i lau fanau le taua o nei gaoioiga.
3. I soo se taimi e mafai ai, auai faatasi o se aiga i sauniga a le Ekalesia. O tapuaiga faaleaiga e faia i lalo o lau taitaiga e taua tele i le manuia faaleagaga o lau fanau.
4. O i ni tafaoga o le tamā-ma-afafine ma ni evaga a tama-ma-atalii faatasi ma lau fanau. …
5. Fau ni tu masani o ni tafaoga, malaga, ma ni evaga a le aiga. O nei manatuaga o le a le mafai ona galo i lau fanau.
6. Ia fai e le aunoa ni au faatalanoaga taitoatasi ma lau fanau. Tuu atu ia i latou e talanoa atu e uiga i ni mea e fia talanoa atu ai. Aoao atu ia i latou mataupu faavae o le talalelei. Aoao atu ia i latou tulaga faatauaina moni. Tau atu i ai e te alofa ia i latou. O taimi patino e te faaaluina i lau fanau e ta’u atu ai ia i latou mea e ave i ai le faamuamua a Tama.
7. Aoao lau fanau e galulue, ma faaali atu ia i latou le taua o le galue agai i se sini tauaogaina. …
8. Ia uunaia musika, faatufugaga ma tusi faitau lelei i totonu o o outou aiga. O aiga e i ai se lagona o le faaleleia atili ma le matagofie o le a manuia ai olaga o lau fanau e faavavau.
9. Pe a talafeagai ai ma le mamao [o femalagaaiga], ia auai e le aunoa ma lou faletua i le malumalu. O le a malamalama lelei ai lau fanau i le taua o le faaipoipoga faalemalumalu ma feagaiga o le malumalu ma le iunite o le aiga e faavavau.
10. Ia vaai lau fanau i lou olioli ma le faamalieina i auaunaga i le Ekalesia. E mafai ona pipisi atu lenei mea ia i latou, ma o i latou foi, o le a mananao e auauna atu i le Ekalesia ma o le a fiafia i le malo [o le Atua].
Tama e, ma tane o Isaraelu, e tele naua mea e mafai ona outou faia mo le faaolataga ma le faaeaga o o outou aiga! E matuai taua tele o outou tiutetauave.17
“Fai ni faatalanoaga taitoatasi ma lau fanau.”
O nisi taimi tatou te faalogo ai i tala e uiga i alii, e oo lava i le Ekalesia, o e manatu o le avea ma ulu o le aiga ua tuu ai i latou i se matafaioi maualuga atu ma ua faatagaina ai i latou ia pule malosi ma faatonu malosi atu i o latou aiga.
Ua faailoa mai e le Aposetolo o Paulo “o le tane o le ulu ia o le ava, pei o Keriso foi o le ulu ia o le ekalesia” (Efeso 5:23; faaopoopo le faatusilima). O le faataitaiga lena e tatau ona tatou mulimuli ai i lo tatou matafaioi o le pulefaamalumalu i totonu o le aiga. Tatou te le’i tau i se mea na taitai ai le Faaola i le Ekalesia ma se aao saua pe faalealofa. Tatou te le’i tau i se mea e faapea na taulimaina ai e le Faaola Lana Ekalesia ma le le faaaloalo po o le tuulafoai. Tatou te le’i tau i se mea e faapea na faaaoga ai e le Faaola le pule malosi po o le fai faamalosi ina ia ausia ai Ana faamoemoega. E leai lava se mea na tatou tau i ai e faapea na faia ai e le Faaola soo se mea sei vagana ai mea faagaeetia, siitia, faamafanafana, ma faaea ai le Ekalesia. Uso e, ou te fai atu ia te outou ma le faamaoni atoa, o Ia o le faataitaiga e ao ona tatou mulimuli ai a o tatou taimuaina le faaleagaga i o tatou aiga.18
I le avea ai ma peteriaka i totonu o lou aiga, ua ia te oe se tiutetauave ogaoga o le tauaveina o le tulaga faaletaitai o le galulue faatasi ma lau fanau. E tatau ona e fesoasoani e atia’e se aiga e mafai e le Agaga o le Alii ona mafuta ai. …
O o outou fale e tatau ona avea o ni malutaga o le filemu ma le olioli mo lou aiga. E mautinoa lava e leai se tamaitiiti e tatau ona fefe i lona lava tama—ae maise lava o se tama ua i ai le perisitua. O le tiute o se tama o le faia lea o lona aiga ia avea o se nofoaga o le fiafia ma le olioli. … O aafiaga mamana o ni tama amiotonu i le faia o se faataitaiga, aoaiina ma le aoaoina, faafaileleina ma le agaalofa e taua tele i le manuia faaleagaga o a [latou] fanau.19
3
O le matafaioi o se tina ua faauuina e le Atua.
O [tina] o, pe e tatau ona avea ma fatu ma agaga moni o le aiga. E leai se upu e sili atu le paia o i ai i tusitusiga faalelalolagi pe paia nai lo o lena upu o le tina. E leai se galuega e sili atu ona tamalii nai lo o se tina lelei ma mata’u i le Atua.
I le aiga e faavavau, na faavaeina ai e le Atua o tama e pulefaamalumalu i totonu o le aiga. O tama e ao ona tuuina atu mea e manaomia [e le aiga], e ao ona alolofa, e ao ona aoao atu, ma e ao ona taitaia. O le matafaioi o se tina ua faauuina foi e le Atua. O tina e ao ona tauaveina, fanauina, fafagaina, alofa, ma aoao [le fanau]. O le folafolaga na mai faaaliga.20
Ua matou iloa o nisi o tamaitai, ona e le o so latou lava sese, ua le mafai ai ona fanauina ni fanau. I nei tuafafine lelei, ua folafola mai e perofeta uma a le Atua, o le a faamanuiaina i latou i ni fanau i le faavavau, ma o le fanauina o ni fanau o le a le taofia mai ia i latou.
E ala atu i le faatuatua a’ia’i, tatalo faatauanau, anapogi, ma faamanuiaga faapitoa, o le toatele o nei lava tuafafine lelei, faatasi ai ma a latou soa tamalii i o latou autafa, ua tutupu ai ni vavega i o latou olaga ma ua faamanuiaina i ni fanau. O isi ua filifilia ma le agaga tatalo e vaetamaina ni fanau. E to o matou pulou i nei ulugalii lelei mo osigataulaga ma le alofa ua outou tuuina atu i na fanau ua outou filifili e ta’u o a outou lava fanau.21
Ia faamanuia le Atua i o tatou tina maoae. Matou te tatalo mo outou. Matou te lagolagoina outou. Matou te faamamaluina outou a o outou fanauina, fafagaina, faamasani, aoao, ma alolofa [i fanau] mo le faavavau. Ou te folafola atu ia te outou faamanuiaga o le lagi ma “mea uma o loo [i le] Tama” (tagai MF&F 84:38) a o outou faalauteleina lo outou valaauga aupito malualii i valaauga uma—o se tina i Siona.22
4
E tatau i tina ona alofa, aoao, ma faaaluina ni taimi aoga ma a latou fanau.
Tina i Siona, o a outou matafaioi mai le Atua e taua tele i lou oe lava faaeaga ma i le faaolataga ma le faaeaga o lou aiga. E sili atu le manaomia e se tamaitiiti o se tina nai lo o mea uma e mafai ona faatauina i tupe. O le faaaluina o le taimi ma lau fanau o le meaalofa aupito silisili lea o meaalofa uma.23
Faatasi ai ma le alofa faamaoni mo tina i Siona, ou te fia fautuaina atu ai ni auala patino se 10 e mafai ai e o tatou tina ona faaaluina ni taimi aoga ma a latou fanau.
[Muamua,] i soo se taimi e mafai ai, ia outou i ai i fetaulaiga ala i taimi uma e o mai ai pe o atu ai lau fanau—pe a latou ō ese atu ma toe foi mai mai le aoga, pe a latou ō ese atu ma toe foi mai mai ni tafaoga faamasani, pe a latou aumaia ni uo i le fale. Ia outou i ai pea iina i fetaulaiga ala e tusa pe ua 6 pe ua 16 tausaga o lau fanau. …
Lona lua, tina, ia faaalu le taimi e avea ai oe o se uo moni i lau fanau. Faalogo i lau fanau, matuai faalogo toto’a. Talanoa ma i latou, taliē ma tausua ma i latou, pepese ma i latou, taaalo faatasi ma i latou, fetagisi faatasi ma i latou, opo mai i latou, ma ia viia ma le faamaoni i latou. Ioe, ia faaalu e le aunoa ni ou taimi e talanoa taitoatasi ai ma tamaiti taitasi. Ia e avea ma se uo moni i lau fanau.
Tolu, faaalu se taimi e te faitau atu ai i lau fanau. E amata lava mai le moega pepe, faitau atu i lau fanau tama ma lau fanau teine. … O le a e totoina ai se fiafia i tusi faitau lelei ma se fiafia moni mo tusitusiga paia pe afai o le a e faitau atu i lau fanau e le aunoa.
Fa, faaalu se taimi e tatalo faatasi ai ma lau fanau. O tatalo faaleaiga, i lalo o le taitaiga a le tama, e tatau ona faia i taeao ma afiafi. Tuu atu i lau fanau ia lagonaina lou faatuatua a o e talosagaina faamanuiaga o le lagi i o latou luga. … Tuu atu i lau fanau ia auai i tatalo faaleaiga ma tatalo faaletagata lava ia, ma ia olioli i a latou upu matagofie o tatalo i lo latou Tama i le Lagi.
Lima, ia faaalu se taimi e fai ai afiafi faaleaiga anoa i vaiaso taitasi. Tuu atu i lau fanau ia auai ma le naunautai. Aoao i latou i mataupu faavae sa’o. Ia fai lenei mea ma se tu masani a lou aiga. …
Ono, ia faaalu le tele o taimi e mafai ai e faatasitasi ai i taimi o taumafataga. O se luitau lenei mea a o faasolosolo matutua le fanau ma faasolo pisi ai olaga. Ae o talanoaga fiafia, fefaasoaaiina o fuafuaga ma gaoioiga o le aso, ma taimi faapitoa e aoao atu ai e tupu i le taimi o taumafataga ona e taumafai matua ma fanau ia faatupuina.
Fitu, ia faaalu se taimi i aso taitasi e faitau ai faatasi o se aiga ia tusitusiga paia. … O le faitauina faatasi o le Tusi a Mamona o se aiga o le a aumaia faapitoa ai le faateleina o le faaleagaga i totonu o lou aiga, ma o le a tuuina atu ai i matua ma le fanau le malosi e tetee ai faaosoosoga, ma avea ai le Agaga Paia ma o latou soa tumau. Ou te folafola atu ia te outou o le Tusi a Mamona o le a suia ai olaga o lou aiga.
Valu, ia faaalu se taimi e fai faatasi ai ni mea o se aiga. Ia fai evaga ma tafaoga ma faamanatuga o aso fanau, ma malaga o ni taimi faapitoa ma fausia ai mea e manatua pea. I soo se taimi e mafai ai, ia auai faatasi o se aiga, i polokalama e auai ai se tasi o le aiga, e pei o se tala faatino a le aoga, o se taaloga, se tautalaga, po o se faaaliga faamusika. Ia auai faatasi i sauniga Lotu, ma ia nonofo faatasi o se aiga i taimi e mafai ai. O tina o e e fesoasoani i aiga e tatalo ma taaalo faatasi o le a [fesoasoani ia i latou] ia nonofo faatasi ma o le a faavavau ona faamanuiaina ai olaga o fanau.
Iva, tina, ia faaalu se taimi e aoao ai lau fanau. Ia faaaoga taimi o taumafataga e aoao atu ai, i tulaga faasamasamanoa, po o taimi faapitoa foi e saofafai faatasi ai i lalo, i vae o le moega i le faaiuga o le aso, po o le taimi o se savaliga faatasi i le taeaopo. …
O le alofa o le tina ma popolega ma le agaga tatalo mo lana fanau, o mea autu sili ia ona taua i le aoaoina o lana lava fanau. Aoao atu i fanau mataupu faavae o le talalelei. Aoao i latou e tauia le avea ma ni tamaiti lelei. Aoao i latou e leai se saogalemu i le agasala. Aoao atu ia i latou se alofa mo le talalelei a Iesu Keriso ma se molimau i lona paia.
Aoao o outou atalii ma afafine i le tauagafau, ma aoao i latou ia faaaloalo i le tulaga faatamatane ma le faatamaitai. Aoao lau fanau ia mamā mai feusuaiga, o tulaga faatonuina talafeagai mo tafaoga faamasani, faaipoipoga faalemalumalu, auaunaga faafaifeautalai, ma le taua o le taliaina ma le faalauteleina o valaauga a le Ekalesia.
Aoao i latou ia fiafia e galulue atoa ai ma le taua o le aoaoina lelei.
Aoao i latou i le taua o le ituaiga faafiafiaga sa’o, e aofia ai ata tifaga, vitio, musika, tusi ma mekasini talafeagai. Ia talanoaina le leaga o ponokalafi ma fualaau faasāina, ma aoao i latou i le taua o le ola i se olaga mama.
Ioe, tina, aoao lau fanau i le talalelei i totonu o lou lava aiga, i totonu o puipui o lou lava fale. O le aoaoga aupito lelei lenei o le a maua e lau fanau. …
Lona sefulu ma le mulimuli foi lea, tina, ia faaalu se taimi e te alofa moni ai i lau fanau laiti. O le alofa e le faatuaoia o se tina e latalata atu i le alofa FaaKeriso.
E manaomia foi e lau fanau talavou lena lava ituaiga o alofa ma le gauai atu i ai. E foliga mai e faigofie atu i le toatele o tina ma tama ona faaali atu lo latou alolofa i a latou fanau a o laiti, ae fai si faigata atu pe a matutua ae. Ia galulue i ai ma le agaga tatalo i lenei mea. E le tatau ona motusia fegalegalea’iga i vaitupulaga. Ma o le ki taua lava o le alofa. E manaomia e o tatou tagata talavou le alofa ma le gauai atu i ai, ae le o le fai faavalea. Latou te manaomia le agalelei ma le agaga malamalama, ae le o le faaalia o le lē popole mai tina ma tamā. Latou te manaomia le taimi o matua. O aoaoga agalelei a se tina ma lona alofa ma le talitonuina o se atalii po o se afafine talavou, e mafai moni lava ona faasaoina mai ai i latou mai se lalolagi amioleaga.24
“Faaalu le taimi e faitau atu ai i lau fanau.”
Tou te iloa se mafuaaga se tasi e alolofa tele ai tina amiotonu i a latou fanau? Ona latou te ositaulagaina le tele o mea mo i latou. Matou te alolofa i tagata matou te ositaulaga i ai, ma matou te ositaulaga mo tagata matou te alolofa i ai.25
5
E tatau i matua ona galulue faatasi i le lotogatasi ma le alofa i le tausiga o a latou fanau.
O tane ma avā, i le avea ai o ni soa-foafoa, e tatau ona taliaina ma le naunautai ma le agaga tatalo ia fanau i totonu o o latou aiga. … Amuia se tane ma se ava ua i ai se aiga o i ai ni fanau. O fiafiaga ma faamanuiaga silisili o le olaga e fesootai lea ma le aiga, tulaga faamatua, ma osigataulaga. O le oo mai o na agaga matagofie i totonu o le aiga e matuai tauia ai lava soo se osigataulaga.26
A faataunuuina e matua, i se faiga faapaaga, i le alofa, ma le lotogatasi, lo latou tiutetauave ua tuuina mai le lagi, ma tali atu le fanau i le alofa ma le usiusitai, o le taunuuga o le olioli sili.27
Ia fesoasoani mai le Atua ia tatou felagolagoma’i o le tasi ma le isi. Tau ina ia amatalia i totonu o o tatou aiga a o tatou lagolago atu i o tatou aiga. Tau ina ia i ai se agaga o le faamaoni atoa, lotogatasi, alofa, ma le faaaloalo o le tasi i le isi. Tau ina ia tuuto atoa atu tane i a latou avā, ia faamaoni ia i latou, alofa ia i latou, taumafai e faamama a latou avega, ma tausoa faatasi tiutetauave mo le vaaiga, aoaoina, ma le tausiga o le fanau. Tau ina ia faaali atu e tina ma avā se agaga o le lotofesoasoani i a latou tane, puipui ma lagolago i latou i o latou tiute faaleperisitua, ma ia tuuto atoa ma faamaoni i valaauga e oo atu ia i latou mai le perisitua a le Atua.28
Tau ina ia tatou faamaoni i lenei matafaioi maoae o le tulaga faamatua, i lenei matafaioi paia, ina ia mafai ona tatou fausia ma le mausali o tatou aiga i luga o mataupu faavae e faavavau, ina ia leai ni mea tatou te toe salamo mulimuli ai. Tau ina ia aua ne’i o tatou lē faamaoni i le faatuatuaga tele ua tuuina mai ia i tatou. Tau ina ia tatou manatua pea o nei agaga ua ulufale mai i o tatou aiga o ni agaga faapelepele.29
Fautuaga mo Suesuega ma le Aoaoina Atu
Fesili
-
Na saunoa Peresitene Benson, “O le tatou mamanu, po o le faataitaiga mo le tulaga faaletamā o lo tatou Tama Faalelagi lea” (vaega 1). O a ni auala e mafai ai e tama faalelalolagi ona mulimuli i le mamanu ua faatulagaina e le Tama Faalelagi?
-
Mafaufau i le lisi a Peresitene Benson o “auala faapitoa e 10 e mafai ai e tamā ona tuuina atu le taitaiga faaleagaga i a latou fanau” (vaega 2). O a ni auala e te manatu e ono mafai ai e fautuaga taitasi nei ona faia ni faatosinaga i le fanau?
-
Na tautino mai Peresitene Benson, “E leai se galuega e sili atu ona tamalii nai lo o se tina lelei ma mata’u i le Atua” (vaega 3). O a ni faataitaiga ua e vaai i ai o le tamalii o le tulaga faatina? A o fesuisuia’i uiga faaalia o le lalolagi e uiga i le tulaga faatina, o a ni mea e mafai ona tatou faia e faatumauina ai le tamalii ma le paia o tiutetauave o tina?
-
O a nisi o faamanuiaga e oo mai pe a faaalu faatasi taimi o matua ma le fanau? (Mo nisi o faataitaiga, tagai i le vaega 4.)
-
O a nisi o faamanuiaga e oo mai i se aiga pe a lotogatasi matua i o latou tiutetauave? (Tagai i le vaega 5.) O a ni mea e mafai ona fai e tama ma tina e faateleina ai le lotogatasi? O a ni auala e mafai ona maua ai e matua nofotoatasi le malosi latou te manaomia e faataunuu ai nei tiutetauave?
Mau Fesootai
Faataoto 22:6; Efeso 6:4; Mosaea 4:14–15; Alema 56:45–48; 3 Nifae 22:13; tagai foi i le “O Le Aiga: O Se Folafolaga i le Lalolagi,” Liahona, Nov. 2010, 129
Fesoasoani mo le Aoaoina Atu
“A’o e saunia oe faaleagaga ma faailoa atu le Alii i lau aoaoga, o le a avea oe ma se meafaigaluega i Ona aao. O le a faalauteleina e le Agaga Paia au upu ma le mana” (O Le Aoao Atu, E Leai Se Isi Valaauga E Sili Ai [1999], 43).